ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵜⴰⵙⵎⵓⵏⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⵙⵉⵏⴰⵙ 5 ⵎⴰⵢⵢⵓ 2020
ⵉⵙⵏⵎⴰⵍⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵜⴰⵙⵎⵓⵏⵉ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴰⵙⵙ ⵏ ⵓⵙⵉⵏⴰⵙ 5 ⵎⴰⵢⵢⵓ 2020, ⵜⵥⵍⵉ ⵉ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ.
ⵉⵍⵍⴰ ⵓⵎⴹⴰⴽⴰⵕ ⴼ ⵓⵙⵏⵎⴰⵍⴰ ⵏ ⵜⵖⵉⵎⵉⵜⵉⵏ ⵜⵉⵏⵎⵍⴰⵙⵙⵉⵏ ⵥⵍⵉⵏⵉⵏ ⵉ ⵉⵙⵇⵙⵉⵜⵏ ⵉⵎⵉⵡⴰⵏⵏ, ⵉⵜⵜⵓⵙⴽⴰⵔ ⵓⵣⵣⵔⴰⵢ ⵏ ⵜⴼⵔⴽⴰ ⴰⴷ ⵉⵥⵍⵉⵏ ⵖ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ. ⴱⴷⴷⵏ ⵉⵎⴷⵔⴰⵡⵏ ⵖ ⵜⵙⵎⵓⵏⵉ ⴰⴷ ⴼ ⵜⵉⵕⵡⵉ ⵏ ⵜⵎⵢⴰⴷⴰⵙⵜ ⵉⵍⵍⴰⵏ ⵖ ⵓⵎⵏⵉⴷ ⵏ ⵜⵎⵙⴽⴰⵔ ⵏ ⵡⴰⵔⴰⵢ ⵓⵍⴰ ⵖ ⵉⵎⵔⵙⵉⵡⵏ ⵏ ⵜⵖⵉⵎⵉⵜⵉⵏ ⵜⵉⵏⵎⵍⴰⵙⵙⵉⵏ, ⵙⵓⵜⴳⵏ ⵓⵍⴰ ⵉⵎⴰⵏ ⵏ ⵜⵡⵉⵣⵉ ⵢⴰⵜⵜⵓⵢⵏ ⵍⵍⵉ ⴷ ⵎⵍⴰⵏ ⴽⵓ ⵉⴼⵔⴷⴰⵙ ⵏ ⵓⵎⴰⴷⴰⵏ ⴰⵎⵖⵔⵉⴱⵉ ⵖ ⵓⵙⴱⴷⴷⵉ ⵏ ⵓⴱⴰⵢⵢⵓⵕ.
ⵖⵎⴽ ⵍⵍⵉ ⵉⵜⵜⵓⵙⴽⴰⵔ ⵓⵙⴼⵙⵉ ⵉ ⵓⵙⵡⵓⴷⴷⵓ ⵏ ⵜⵖⵉⵎⵉⵜⵉⵏ ⴷ ⵓⵙⵏⵎⴰⵍⴰ ⵏⵏⵙⵏⵜ ⵃⵎⴰ ⴰⴷ ⵜⵉⵍⵉ ⵜⵓⵙⵙⵏⴰ ⵢⵓⵎⴰⵏ ⵏ ⵉⵙⵡⵓⴷⴷⵓⵜⵏ ⵍⵍⵉ ⵙⴽⵔⵏⵜ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⴷ ⵓⵎⴹⴰⴽⴰⵕ ⵏⵏⵙⵏ ⵖ ⵜⵎⵙⵓⵜⵍⵉⵏ ⵏ ⵡⴰⴽⵓⴷ ⴼⵓⵍⴽⵉⵏⵉⵏ.
ⵖ ⵓⵎⵏⵉⴷ ⵏ ⵓⵣⵣⴳⵉⵔ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵜⵖⵉⵎⵉⵜⵉⵏ ⵜⵉⵏⵎⵍⴰⵙⵙⵉⵏ, ⵔⴰⴷ ⵢⵉⵍⵉ ⵓⵎⴰⴹⴰⴽⴰⵕ ⴼ ⵉⴳⵔ ⵏ ⵜⵎⴳⵓⵔⵉ ⴷ ⵓⵙⵖⵏⵣⵉ ⴷ ⵜⴷⵎⵙⴰ ⵜⴰⵣⴳⵣⴰⵡⵜ ⴷ ⵜⵎⵓⵟⵟⵓⵏⵜ, ⵖ ⵓⵙⴰⵜⵉ ⵏ ⵉⵙⵇⵙⵉⵜⵏ ⵍⵍⵉ ⴷ ⵉⴹⴼⵕ ⵓⵎⴹⴰⴽⴰⵕ, ⵔⴰⴷ ⵙⵇⵙⴰⵏ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⴰⵎⴰⵡⵙⴰⵙ ⵉⵍⵍⴰⵏ ⴼ ⵉⴳⵔⴰⵏ ⵏ ⵓⴼⴰⵔⵙ ⵖ ⵉⵎⵏⵉⴷⵏ ⵏ ⵜⵎⴳⵓⵔⵉ ⴷ ⵓⵙⵖⵏⵣⵉ ⴷ ⵜⵏⵓⴼⴰ ⴷ ⵜⵎⵙⵙⵏⵜⵉⵜ ⴷ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⴼ ⵜⵎⵙⵙⵏⵜⴰⵢ ⵜⵉⵏⴰⵎⵓⵔⵉⵏ ⴷ ⵉⴳⵔⴰⵏ ⵏ ⵓⵙⵖⵏⵣⵉ ⵏ ⵓⴳⵯⵏⵙ ⴷ ⵡⵉⵏ ⴱⵕⵕⴰ. ⵖⵎⴽ ⴰⵏⵏ ⴷ ⵜⵎⵙⴽⴰⵔ ⵍⵍⵉ ⵔⴰⴷ ⵜⵙⴽⵔ ⵜⵏⴱⴰⴹⵜ ⵉ ⵓⴹⴼⵕ ⵏ ⵜⵎⵙⵙⵏⵜⵉⵜ ⴷ ⵉⵙⵡⵓⴷⴷⵓⵜⵏ ⵍⵍⵉ ⵔⴰⴷ ⵜⵙⴽⵔ ⵃⵎⴰ ⴰⴷ ⵉⵍⵉⵏ ⵉⵡⵜⵜⴰⵙⵏ ⵏ ⵓⵖⴰⵡⴰⵙ ⵏ ⵡⴰⵣⵣⴰⵣ ⵏ ⵜⴳⵎⵉ ⵜⴰⵎⴳⵓⵔⴰⵏⵜ.
ⵉⵍⵍⴰ ⵓⵎⴹⴰⴽⴰⵕ ⵓⵍⴰ ⴼ ⵜⵎⴰⵎⴽⵉⵏ ⵏ ⵓⵙⵡⵓⴷⴷⵓ ⵏ ⵜⵖⵉⵎⵉⵜⵉⵏ ⵍⵍⵉ ⴷ ⵓⵛⴽⴰⵏⵉⵏ, ⵍⵍⵉⵖ ⴱⴷⴷⵏ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⴰⴷ ⵉⵍⵉⵏⵜ ⵖ ⵜⵎⵙⵓⵜⵍⵉⵏ ⵏ ⵓⵎⵓⵔⵙ ⵖ ⵉⵎⵔⵙⵉ ⵏⵏⵙⵏⵜ ⵓⵍⴰ ⵜⵉⵎⵙⴽⴰⵔ ⵏⵏⵙⵏⵜ, ⵔⴰⴷ ⵢⵉⵍⵉ ⵓⵎⴷⴰⵡⴰⵍ ⴼ ⵓⵙⵡⵓⴷⴷⵓ ⵏ ⵡⴰⴽⵓⴷ ⴷ ⵜⵎⵙⴽⴰⵔ ⵏ ⵡⴰⵔⴰⵢ ⵉⵍⵍⴰⵏ ⵖ ⵜⵙⵎⵓⵏⵉ ⵍⵍⵉ ⴷ ⵢⵓⵛⴽⴰⵏ.
ⵖ ⵓⵎⵏⵉⴷ ⵏ ⵜⵖⵉⵎⵉⵜ ⵜⴰⵢⵢⵓⵔⴰⵏⵜ ⵉⵥⵍⵉⵏ ⵙ ⵜⵙⵔⵜⵉⵜ ⵜⴰⵎⴰⵜⴰⵢⵜ ⵍⵍⵉ ⴼ ⴰ ⵉⵜⵜⵔⴰⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⵛⴰⵛⴽⴰⵏ ⴷ ⵉⵎⴷⵔⴰⵡⵏ ⵖ ⵜⵙⵎⵓⵏⵉ ⴰⴷ ⵜⵉⵍⵉ ⴰⵙⵙ ⵏ ⵡⴰⵢⵏⴰⵙ 18 ⵎⴰⵢⵢⵓ, ⴼ: “ⴰⵖⴰⵡⴰⵙ ⵏ ⵜⵏⴱⴰⴹⵜ ⵉ ⵓⵙⵉⵜⵜⵉ ⵏ ⵓⵥⵍⴰⵢ ⴰⴷⵓⵙⴰⵏ”.