ⵉⵙⵎⴷ ⵓⵙⵇⵇⵉⵎ ⵏ ⵉⵎⵓⵔⴰ ⴰⵖⴰⵡⴰⵙ ⵏ ⵜⵙⵓⵜⵍⵜ ⵉⵥⵍⵉⵏ ⵙ ⵓⵙⵖⵣⵏ ⵏ ⵓⵙⵏⴼⴰⵔ ⵏ ⵓⵙⵍⴳⵏ 46.19, ⴳ ⵜⵉⵖⵔⵉ ⵜⵉⵙ ⵙⵏⴰⵜ, ⴼ ⵓⵏⴳⵎⴰⵎ ⴰⵏⴰⵎⵓⵔ ⵉ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵓⵎⴰⴽⵕⴰⴹ, ⴰⵙⵉⵏⴰⵙ 23 ⵎⴰⵕⵚ 2021, ⴳ ⵜⵉⵖⵔⵉ ⵜⵉⵙ ⵙⵏⴰⵜ, ⴰⵙⵏⴼⴰⵔ ⵏ ⵓⵙⵍⴳⵏ 46.19 ⴼ ⵓⵏⴳⵎⴰⵎ ⴰⵏⴰⵎⵓⵔ ⵉ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ ⵉⵍⵍⴰⵏ ⴳ ⵓⵖⴰⵡⴰⵙ ⵏ ⵜⵙⵓⵜⵍⵜ ⵜⴰⵣⵣⵔⴰⴼⵜ ⵉⵥⵍⵉⵏ, ⴳ ⵜⵖⵉⵎⵉⵜ ⵜⴰⴳⴷⵓⴷⴰⵏⵜ ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵜⵉⵍⵉⵜ ⵏ ⵎⴰⵙⵙ ⵎⵓⵃⴰⵎⵎⴰⴷ ⴱⵏⵛⴰⵄⴱⵓⵏ ⴰⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ.
ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⵉⴳⴰ ⵓⵙⵏⴼⴰⵔ ⵏ ⵓⵙⵍⴳⵏ 46.19 ⴰⵙⵎⴰⵢⵏⵓ ⴰⵣⵔⴼⴰⵏ ⵏ ⵜⵎⵥⵍⴰⵢ ⵍⵍⵉ ⵉⴼⴽⴰ ⵓⴷⵓⵙⵜⵓⵔ ⵏ 2011 ⵉ ⵓⵏⴳⵎⴰⵎ ⴰⴷ, ⴷ ⵓⵙⴽⵔ ⵏ ⵉⵙⵡⴰⵍⴰⵢⵏ ⵉⴳⵍⴷⴰⵏⵏ ⴰⵜⵜⵓⵢⵏⵉⵏ ⵍⵍⵉ ⵙⴰⵡⴰⵍⵏⵉⵏ ⴼ ⵓⵛⵛⵉⵍ ⵏ ⵜⵎⴰⴼⴰⵡⵜ ⵏ ⵜⵓⴷⵔⵜ ⵜⴰⵎⴰⵜⴰⵢⵜ ⴷ ⵓⵙⴷⵓⵙ ⵏ ⵜⵣⴷⴳⵉ ⴷ ⵓⵙⴱⴷⴷⵉ ⵏ ⵜⵔⴰⵄⵉⵜ, ⴷ ⵓⵙⴽⵔ ⵏ ⵉⵏⴰⵔⵓⵣⵏ ⵏ ⵉⵏⵎⵓⵔⴰⵏ ⵉ ⵛⵉⴳ ⴰⵏ ⵏ ⵜⵎⴰⴼⴰⵡⵜ ⴷ ⵜⵣⴷⴳⵉ ⴷ ⵓⵙⵖⵓⴷⵓ.
ⵉⵜⵜⵓⵚⵕⴰⴼ ⴰⴷ ⵓⵙⵏⴼⴰⵔ ⴰⴷ ⵏ ⵓⵙⵍⴳⵏ ⵙⴳ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵙ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵉⵖⵔⵉ ⵜⵉⵙ ⵙⵏⴰⵜ, ⵢⵉⵍⵉ ⵓⵙⵏⴼⵍ ⵏ ⵓⵎⴰⴳⵔⴰⴷ ⵡⵉⵙ ⵚⴹⵉⵚ ⴳ ⵓⵎⵏⵏⵉ ⵡⵉⵙ ⴽⴽⵓⵥ ⴼ ⵜⵎⵥⵍⴰⵢ ⵏ ⵓⵏⴳⵎⴰⵎ. ⴰⵔ ⵉⵎⵎⴰⵍ ⵓⵙⵏⴼⴰⵔ ⵜⵉⵎⵥⵍⴰⵢ ⵏ ⵓⵏⴳⵎⴰⵎ ⴰⵏⴰⵎⵓⵔ ⵉ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ, ⴰⵙⴽⵔ ⵏⵏⵙ ⴷ ⵓⵙⵏⵎⴰⵍⴰ ⵏⵏⵙ ⴷ ⵜⵔⵙⴰⵍ ⵏ ⵜⵡⵓⵔⵉ ⵏⵏⵙ ⴷ ⵡⴰⴷⴷⴰⴷⵏ ⵏ ⵓⵎⵣⴰⵔⴰⵢ.
ⵔⴰⴷ ⵢⴰⵡⵙ ⵓⵏⴳⵎⴰⵎ ⴰⴷ ⴳ ⵜⵓⴳⴳⴰⵙ ⵜⵉⵏⴰⵎⵓⵔⵉⵏ ⴳ ⵓⵙⴱⴷⴷⵉ ⵏ ⵜⵔⴰⵄⵉⵜ ⴷ ⵓⵙⴷⵓⵙ ⵏ ⵓⵏⴱⴰⴹ ⵉⵥⵉⵍⵏ, ⴷ ⵓⵣⵓⵣⵣⵔ ⵏ ⵜⵣⴷⴳⵉ ⴷ ⵜⵎⴰⴼⴰⵡⵜ, ⵙ ⵓⵙⴽⵔ ⵙ ⵉⵙⵖⴰⵍⵏ ⵍⵍⴰⵏⵉⵏ ⴳ ⵓⵎⵏⵉⴷ ⵏ ⵉⵏⴳⵎⴰⵎⵏ ⵏ ⵓⵙⴱⴷⴷⵉ ⵏ ⵜⵔⴰⵄⵉⵜ, ⵙⵍⴰⵡⴰⵏ ⴰⴽⴽⵯ ⵜⴰⵙⵉⵎⴰⵏⵜ ⴷ ⵓⵙⵎⵖⵔ ⵏ ⵢⵉⴳⵔ ⵏ ⵜⵡⵓⵔⵉ ⴷ ⵓⵙⵎⵓⵏ ⵊⴰⵔ ⴰⵏⴱⴰⴹ ⴷ ⵡⴰⵔⴰⵢ ⴷ ⵓⵙⴱⴷⴷⵉ.
ⵜⵙⵎⴷ ⵜⵙⵓⵜⵍⵜ ⵜⴰⵣⵣⵔⴰⴼⵜ ⵉⵥⵍⵉⵏ ⴰⵖⴰⵡⴰⵙ ⵏⵏⵙ ⵙ ⵓⵙⵖⵣⵏ ⵏ ⵓⵙⵏⴼⴰⵔ ⵏ ⵓⵙⵍⴳⵏ 46.19 ⴼ ⵓⵏⴳⵎⴰⵎ ⴰⵏⴰⵎⵓⵔ ⵉ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ, ⵔⴰⴷ ⵢⵉⵍⵉ ⴷⴼⴼⵉⵔ ⵏ ⵓⵣⵓⵣⵣⵔ ⵏⵏⵙ ⴳ ⵓⵖⵎⵉⵙ ⵓⵏⵚⵉⴱ ⴷ ⵓⵙⵎⵍ ⵏ ⵓⵏⵙⵙⵉⵅⴼ ⴷ ⵓⵏⴼⵍⵓⵙ ⴰⵎⴰⵜⴰⵢ ⴷ ⵉⴳⵎⴰⵎⵏ ⵏⵏⵙ.