ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴳ ⵜⵙⵓⵜⵍⵜ ⵜⵉⵙ 44 ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⵣⵍⵖⴰ ⵏ ⵉⵡⴰⵏⴽⵏ ⵏ ⵉⴼⴼⵓⵙ ⴷ ⵍⵇⴱⵍⵜ ⵏ ⴰⵙⵢⴰ
ⵙⵉⵙⵎⵏⵕⴱⴱⵉ, ⵜⴰⵥⴰⵍⵍⵉⵜ ⴷ ⵓⴼⵔⴰ ⴼ ⵓⵕⵇⵇⴰⵚ ⵏⵏⵙ
ⵎⴰⵙⵙⴰ Puan MAHARANI ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⴰⵏⴷⵓⵏⵉⵙⵢⴰ, ⵜⴰⵏⵙⵙⵉⵅⴼⵜ ⵏ ⵜⵙⵓⵜⵍⵜ ⵜⵉⵙ 44 ⵏ ⵜⵎⵙⵎⵓⵏⵜ ⵜⴰⵎⴰⵜⴰⵢⵜ;
ⵉⴷ ⵎⴰⵙⵙ ⵉⵏⴳⴳⵯⴰ ⴷ ⵜⵏⴳⴳⵯⴰ ⵉⵏⵙⵙⵉⵅⴼⵏ ⵏ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⴷ ⵉⴳⵎⴰⵎⵏ ⵏ ⵉⴽⴰⴱⴰⵕⵏ;
ⵉⴷ ⵎⴰⵙⵙ ⵉⵎⵙⵇⵇⴰⴷⵏ;
ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ.
ⵔⵉⵖ ⴳ ⵜⵣⵡⵉⵔⵉ ⴰⴷ ⴱⴰⵀⵔⴰ ⵙⵏⵉⵎⵎⵔⵖ ⵎⴰⵙⵙⴰ Puan MAHARANI ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⴰⵏⴷⵓⵏⵉⵙⵢⴰ ⴼ ⵜⵖⵔⵉ ⵉⵥⵉⵍⵏ ⵍⵍⵉ ⵜⵙⵎⵏⵉⴷ ⵉ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⵃⵎⴰ ⴰⴷ ⵏⴷⵔⵓ ⴳ ⵜⵙⵓⵜⵍⵜ ⵜⵉⵙ 44 ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⵣⵍⵖⴰ ⵏ ⵉⵡⴰⵏⴽⵏ ⵏ ⵉⴼⴼⵓⵙ ⴷ ⵍⵇⴱⵍⵜ ⵏ ⴰⵙⵢⴰ (AIPA), ⵖ ⵏⴳⴰ ⴰⴳⵎⴰⵎ ⵉⵎⵥⵕⵉ. ⵙⵓⵜⴳⵖ ⴰⵙⵏⵓⴱⴳ ⵉⵥⵉⵍⵏ ⴷ ⵓⵙⵏⵎⴰⵍⴰ ⵉⵛⵏⴰⵏ ⵏ ⵜⵙⵓⵜⵍⵜ ⴰⴷ ⵙ ⵜⴼⴰⴷⵉⵡⵉⵏ ⵍⵍⴰⵏⵉⵏ ⵉ ⵓⵎⵓⵔⵙ ⵏⵏⵙ. ⴰⵙⵏⵓⴱⴳ ⴰⴷ ⴷ ⵜⵙⵓⴳⵔⵜ ⴰⴷ ⴼ ⵓⵙⵏⵎⴰⵍⴰ ⵏ ⵉⴳⵔⴰⵡⵏ ⵉⵎⴰⴹⴰⵍⴰⵏⵏ ⵜⵥⴹⴰⵕ ⴰⵙⵏ ⵜⵎⵜⵜⵉ ⵜⴰⵅⴰⵜⴰⵔⵜ ⵏ ⴰⵏⴷⵓⵏⵉⵙⵢⴰ. ⵍⵍⵉ ⵉⴳⴰⵏ ⴱⴷⴷⴰ ⴰⵡⴰⵏⴽ ⵉⵣⵣⵔⵉⵏ ⵜⵉⵏⴰⵥⴰⵕⵉⵏ. ⴰⵔ ⴷ ⴰⴽⴽⵯ ⵏⴽⵯⵜⵜⵉ ⴰⴳⵔⴰⵡ ⵏ ⴱⴰⵏⴷⵓⵏⴳ ⴳ 1955 ⴳ ⴷⵔⵓⵏ 29 ⵏ ⵓⵡⴰⵏⴽ ⵙⴳ ⵉⴼⵔⵉⵇⵢⴰ ⴷ ⴰⵙⵢⴰ ⵢⵓⵎⵥⵏ ⵜⴰⵙⵉⵎⴰⵏⵜ ⴳ ⵓⵣⵎⵣ ⴰⵏⵏ, ⴷ ⵡⵉⴷ ⵎⵎⴰⵖⵏⵉⵏ ⵉ ⵓⵙⵍⴻⵍⵍⵉ ⴰⵏⴰⵎⵓⵔ ⵙⴳ ⵓⵙⴷⵓⵔⵔⵉ.
ⵉⵕⵥⴰ ⵓⴳⵔⴰⵡ ⴰⴷ ⵜⴰⵙⵉⵏⴰⵔⵏ ⵉⴳⴳⵓⵜⵏ ⵍⵍⵉⵉ ⵉⵍⵍⴰⵏ, ⵉⵙⵔⵙ ⵜⴰⴽⵕⴹⴰ ⵏ ⵓⴱⵔⵉⴷ ⵉ ⵜⵉⵍⵉⵜ ⵏ ⵓⵎⵓⵙⵙⴰ ⵏ ⵡⴰⵔⵡⴰⵍⴰ, ⵉⵕⵥⵎ ⴰⵎⵏⴰⴷ ⴰⵎⴰⵢⵏⵓ ⴳ ⵜⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ. ⴰⴷⴷⵓⵔ ⵏ ⵡⴰⴷⴷⴰⴷⵏ ⴷ ⵓⵙⵏⵓⴱⴳ ⵏ ⵜⵙⵏⵜⴰⵢⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵓⴼⵔⴰ ⵓⵔ ⵉⴳⵉ ⴰⵎⴰⵢⵏⵓ ⴷⴰⵔ ⵜⵎⵜⵜⵉ ⵏ ⴰⵏⴷⵓⵏⵉⵙⵢⴰ ⴷ ⵜⵏⴰⵔⴰ ⵏⵏⵙ ⵜⴰⵙⵔⵜⴰⵏⵜ ⴷ ⵜⵎⴰⵜⴰⵔⵉⵏ ⵏⵏⵙ ⵜⵉⵎⵣⵔⴰⵢⵉⵏ, ⵢⵉⵍⵉ ⴳⵉⵙⵏ ⴰⵎⵖⴰⵔ ⵙⵓⴽⴰⵕⵏⵓ ⵍⵍⵉ ⴷ ⴽⵯⵜⵜⵉⵏ ⵉⵎⵖⵔⵉⴱⵉⵢⵏ ⴳ ⵉⵙⵡⴰⴽ ⴷ ⵉⵙⴰⵔⴰⴳⵏ ⵓⵙⵉⵏⵉⵏ ⴰⵙⵙⴰⵖ ⵏⵏⵙ.
ⵉⴳⴰ ⴰⵖ ⴰⴷⴷⵓⵔ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴰⴷ ⴷⴰⵔⵏⵖ ⵢⵉⵍⵉ ⵓⴱⵓⵔⵣ ⵙ ⵎⴰⴷ ⵏⴷⵔⵓ ⴰⴽⴷ ⵜⴰⵎⴰⵣⵉⵔⵜ ⴰⴷ ⵜⴰⴳⵯⵎⴰⵜ ⵙ ⵜⵣⴷⴰⵢⵉⵏ ⵏ ⵓⵙⴽⴷ ⴷ ⵡⴰⵜⵉⴳⵏ ⴷ ⵜⴷⵍⵙⴰ ⴷ ⵜⵉⵍⵉⵜ ⴷ ⵜⵏⵓⴼⴰ, ⴰⵎ ⵜⴰⴳⵯⵎⴰⵜ ⴷ ⵜⴷⴷⵓⴽⴽⵯⵍⴰ ⴰⵖ ⵉⵙⵎⵓⵏⵏ ⴷ ⵜⵎⵉⵣⴰⵔ ⵏ ⵜⵣⵍⵖⴰ ⵏ ⵉⴼⴼⵓⵙ ⴷ ⵍⵇⴱⵍⵜ ⵏ ⴰⵙⵢⴰ ⵍⵍⵉ ⴷ ⵏⴷⵔⵓ ⵜⴰⵎⴰⵖⵜ ⵎⴳⴰⵍ ⵏ ⵓⵙⴷⵓⵔⵔⵉ, ⵏⴷⵔⵓ ⴰⵙ ⴰⴷ ⵜⴰⵎⴰⵖⵜ ⵉ ⵜⴳⵎⵉ ⴷ ⵜⵣⵣⵉⴳⵣⵜ.
ⵜⵉⵏⴳⴳⵯⴰ ⴷ ⵉⵏⴳⴳⵯⴰ;
ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ .
ⵜⵍⵍⴰ ⵜⵙⵓⵜⵍⵜ ⵜⵉⵙ 44 ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⵣⵍⵖⴰ ⵏ ⵉⵡⴰⵏⴽⵏ ⵏ ⵉⴼⴼⵓⵙ ⴷ ⵍⵇⴱⵍⵜ ⵏ ⴰⵙⵢⴰ (AIPA) ⴳ ⵓⵎⵏⴰⴹ ⴰⵎⴰⴷⵍⴰⵏ ⵉⵛⴷⴷⴰⵏ ⴷ ⵉⵏⵏⵓⵕⵣⵎⵏ ⴼ ⴽⵉⴳⴰⵏ ⵜⵓⵔⴷⴰⵡⵉⵏ, ⴷ ⴽⵉⴳⴰⵏ ⵏ ⵜⴰⵙⵙⴰⵙⵉⵏ ⵉⵖ ⵓⵔ ⵜⵣⵣⵔⵉ ⵜⵔⴰⴱⴱⵓⵜ ⵜⴰⴳⵔⴰⵖⵍⴰⵏⵜ ⴽⵉⴳⴰⵏ ⵏ ⵜⵙⵔⵜⴰⵢ, ⵜⵙⴽⵔ ⴽⵉⴳⴰⵏ ⵏ ⵉⵙⵡⵓⴷⴷⵓⵜⵏ ⵕⵡⴰⵏⵉⵏ ⵉ ⵓⵙⴱⴷⴷⵉ ⵏ ⵉⵥⵓⵕⴰⵏ ⵏ ⵓⵎⴰⵍⴰⴷ.
ⵉⵥⵉⵍ ⵍⵍⵉⵖ ⵜⵙⵜⵉⵎ ⴳ ⵜⵙⵓⵜⵍⵜ ⴰⴷ ⵜⵉⵍⴰⵍⵜ ⵏ ⵉⴱⵕⵍⴰⵎⴰⵏⵏ ⴳ ⵓⵚⴽⵓ ⵏ ⵓⴼⵔⴰ ⴷ ⵓⵔⴳⴳⵉⴳ ⴷ ⵓⵙⴽⵔ ⵏ ⵓⴱⵓⵖⵍⵓ.
ⵜⴷⵔⵓⵙ ⵜⵉⵣⵉ, ⵓⵔ ⵥⴹⴰⵕⵖ ⴰⴷ ⵙⴰⵡⵍⵖ ⴼ ⵎⴰⵕⵕⴰ ⵏ ⵜⵏⴰⵥⴰⵕⵉⵏ ⴷⴰⵜ ⵏ ⵜⵔⴰⴱⴱⵓⵜ ⵜⴰⴳⵔⴰⵖⵍⴰⵏⵜ, ⵙⵙⵓⵔⴼⴰⵜ ⵉⵢⵉ ⴰⴷ ⵏⵢⴰⵍⴽⴰⵎⵖ ⴷ ⵜⴽⵛⵛⵓⵎⵉⵏ ⵏⵏⵓⵏ ⴷ ⵜⵙⵓⵎⴰⵔ ⵏⵏⵓⵏ ⵕⵡⴰⵏⵉⵏ, ⴷⵔⵓⵖ ⴷⵉⴷⵓⵏ ⵓⵍⴰ ⵜⴰⵏⵏⴰⵢⵢⵉⵏ ⴰⴷ:
ⵜⴰⵎⵣⵡⴰⵔⵓⵜ, ⵜⴰⵔⴰⴱⴱⵓⵜ ⵜⴰⴳⵔⴰⵖⵍⴰⵏⵜ ⵜⵍⵍⴰ ⴰⵙⵙ ⴰⴷ ⴷⴰⵜ ⵏ ⵜⵏⴰⵥⴰⵕⵉⵏ ⵍⵍⵉ ⵓⵔ ⵜⵥⵕⵉ ⵙⴳ ⵜⴰⵎⴰⵖⵜ ⵜⴰⵎⴰⴹⵍⴰⵏⵜ ⵜⵉⵙ ⵙⵏⴰⵜ. ⵍⵍⴰⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19 ⴼ ⵜⴷⵎⵙⴰ ⵜⴰⵎⴰⴹⵍⴰⵏⵜ, ⴷ ⴳⴰⵔ ⵉⴷⵔⵉⵣⵏ ⵏ ⵉⵙⵏⴼⵍⵏ ⵏ ⵓⵏⵣⵡⵉ ⴼ ⵡⴰⴷⴷⴰⴷⵏ ⵏ ⵓⴼⴳⴰⵏ, ⴷ ⵉⴷⵔⵉⵣⵏ ⵏ ⵜⵎⴰⵖⵉⵏ ⴷ ⵓⴷⵔⵓⵙ ⵏ ⵉⵖⴱⵓⵍⴰ ⵏ ⵓⵜⵛⵓ ⴷ ⵓⵎⵃⵉⵣⵡⴰⵔ ⴰⴳⵔⴰⵖⵍⴰⵏ ⵉⴳⴳⵓⵜⵏ.
ⵜⵉⵙ ⵙⵏⴰⵜ, ⵜⵉⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ ⴱⵉⴷⴷⵏⵜ ⴼ ⵓⴱⵟⵟⵓ, ⴷ ⵜⵓⴳⵜ ⵏ ⵉⵎⴰⵍⴰⵡⵏ ⴷ ⵉⵛⵓⵎⴰⵛ, ⴰⵢⵍⵍⵉ ⴷ ⵉⵜⵜⴰⵡⵉⵏ ⵜⵉⵏⴰⵥⴰⵕⵉⵏ ⵏ ⵜⵏⴼⵔⵓⵜ ⴷ ⵜⵣⵣⵓⴳⵣⵜ ⵏ ⵉⵎⵓⵙⵙⵓⵜⵏ ⵏ ⵓⴱⵔⵙⵙⵉⵡⴷ ⴷ ⵜⵎⴰⵖⵉⵏ ⵏ ⵓⵎⵣⴰⵔⴰⵢ ⵍⵍⵉ ⴷⵉⴷⵙⵏⵜ ⵎⵓⵏⵏⵉⵏ, ⴷ ⵉⵎⵉⵣⵉⵜⵏ ⵍⵍⴰⵏⵉⵏ ⴼ ⵜⵢⴰⵏⵜ ⵏ ⵉⵡⴰⵏⴽⵏ ⴷ ⵓⵔⴳⴳⵉⴳ ⵏⵏⵙⵏ ⴷ ⵜⵏⴼⵔⵓⵜ ⵜⴰⵎⴰⴷⵍⴰⵏⵜ.
ⵜⵉⵙ ⴽⵕⴰⴹⵜ, ⵣⵣⵉⴳⵣⵏⵜ ⵜⵏⵉⵎⴰⵏⵉⵏ ⵜⵉⵏⴰⵎⵓⵔⵉⵏ ⴳ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⴳ ⵓⴷⵖⴰⵔ ⵏ ⵜⵡⵉⵣⵉ ⴷ ⵓⵙⵎⵓⵙⵙⵓ ⴰⵎⴳⵔⵓ ⴷ ⵜⵢⴰⵏⵜ , ⴷ ⵜⵡⵡⵓⵔⵉ ⵉⵛⵛⴰⵔⵏ ⴳ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ ⵏ ⵖⵉⵍⴰⴷ ⴷ ⵡⵉⵏ ⵉⵎⴰⵍ.
ⵜⵉⵙ ⴽⴽⵓⵥⵜ,ⵉⴳⴳⵓⵜ ⵓⵎⵣⴰⵔⴰⵢ ⴳ ⵜⴳⵎⵉ ⴷ ⵓⴽⵛⵓⵎ ⴷ ⵓⵙⵡⵉⵔ ⵏ ⵜⵓⴷⵔⵜ ⴳ ⵜⵔⴰⴱⴱⵓⵜ ⵜⴰⴳⵔⴰⵖⵍⴰⵏⵜ, ⵊⴰⵔ ⵉⵥⵥⵍⵎⴹ ⴷ ⵉⴼⴼⵓⵙ, ⴷ ⵡⴰⵎⵓⵏ ⵉⴳⴰⵏ ⵢⴰⵏ, ⵙ ⵜⵎⵏⵜⵍⵉⵏ ⵍⵍⵉ ⴱⴷⵔⵖ ⴷ ⵜⵉⵢⵢⴰⴹ, ⴰⵢⵍⵍⵉ ⵉⵙⵎⵖⵔⵏ ⵉⵎⵓⵙⵙⵓⵜⵏ ⵏ ⵓⵣⵡⴰⴳ, ⵉⵙⵎⵖⵔ ⴰⵙⵢⴰⴼⴰ ⵙ ⵡⴰⵔⴰⵏⴰⵔⵓⵣ, ⵙⵍⴰⵡⴰⵏ ⴰⴽⴽⵯ ⴷⴰⵔ ⵉⵄⵔⵔⵉⵎⵏ, ⵙ ⵓⵎⵙⴰⵙⴰ ⴷ ⵜⵣⵣⵉⴳⵣⵜ ⵏ ⵓⴼⵔⴰⴽ ⵙ ⵉⵎⵣⵔⴰⵢⵏ ⵙ ⵜⵥⴹⴰⵕⵉⵏ ⵏ ⵓⵎⵢⴰⵡⴰⴹ, ⴰⵢⵍⵍⵉ ⵉⵙⵙⵔⵓⵙⵏ ⵜⴰⴷⵉⵎⵓⵇⵔⴰⵟⵉⵜ ⵜⴰⵎⵔⵙⵍⴰⵏⵜ ⴳ ⵓⵙⵇⵙⵉ ⴼ ⵜⵉⵢⵢⴰⴼⵓⵜ ⵜⴰⵏⴰⵎⵓⵏⵜ ⴷ ⵓⴷⵔⵉⵣ ⴼ ⵜⵓⴷⵔⵜ ⵏ ⵉⵡⴷⴰⵏ.
ⵜⵉⵏⴳⴳⵯⴰ ⴷ ⵉⵏⴳⴳⵯⴰ;
ⵓⵔ ⴳⵉⵏⵜ ⵜⵎⵓⴽⵔⵉⵙⵉⵏ ⴰⴷ ⴰⵥⵟⵟⴰ ⵓⵔ ⵉⵟⵟⴰⵏ ⴰⴼⵙⵙⴰⵢ, ⵜⴰⵎⴰⵙⴰⵢⵜ ⵜⴰⵙⵔⵜⴰⵏⵜ ⴷ ⵜⵉⵏ ⵜⵏⴼⴳⵓⵔⵉⵏ ⴷ ⵜⵎⵣⵔⴰⵢⵉⵏ ⵏ ⵉⵡⴰⵏⴽⵏ ⴷ ⵜⵓⴼⵔⴰⵢⵉⵏ ⵏⵏⵙⵏ,ⴷ ⵜⵎⵓⴽⵔⵉⵙⵉⵏ ⵏ ⵉⵙⵓⵔⵙⵏ ⵉⴳⵔⴰⵖⵍⴰⵏⵏ, ⵉⵇⵇⴰⵏ ⴷ ⴰⴷ ⵓⵔ ⵏⴰⴷⴷ ⵉ ⵢⵉⵅⴼ ⵉ ⵉⵎⵉⵣⵉⵜⵏ ⴰⴷ. ⵙ ⵓⵙⴷⴷⴻⴷ ⵜⵥⴹⴰⵕ ⵜⵣⵍⵖⴰ ⵏⵏⵓⵏ ⴰⴷ ⵜⵙⴽⵔ ⵓⴳⴳⴰⵔ ⵉ ⵓⵙⴱⴷⴷⵉ ⵏ ⵉⵙⴷⵓⴷⴷⵓⵢⵏ ⴰⴷ, ⴷ ⵓⵖⵓⵍ ⵏ ⵓⵎⵢⴰⵙⴰ ⵉ ⵜⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ, ⴷ ⵜⵉⵍⵉⵜ ⵏ ⵓⴼⵔⴰ ⴷ ⵜⵏⴼⵓⵔⵜ ⵜⵉⴳⵔⴰⵖⵍⴰⵏⵉⵏ ⴷ ⵓⵡⵇⵇⵔ ⵏ ⵜⵢⴰⵏⵜ ⵜⴰⴽⴰⵍⴰⵏⵜ ⵏ ⵉⵡⴰⵏⴽⵏ ⴷ ⵜⵅⵅⵓⵜⵔⴰ ⵏⵏⵙ ⴷ ⵡⴰⵔⴰⴽⵛⵓⵎ ⴳ ⵜⵖⴰⵡⵙⵉⵡⵉⵏ ⵏ ⵡⵉⵢⵢⴰⴹ, ⴰⵢⵍⵍⵉ ⵉⴳⴰⵏ ⵙⴳ ⵜⵉⵔⵙⴰⵍ ⵏ ⵓⵙⵍⴳⵏ ⴰⴳⵔⴰⵖⵍⴰⵏ. ⵥⴹⴰⵕⵏⵜ ⵜⵎⵉⵣⴰⵔ ⵏⵏⵓⵏ ⵓⵍⴰ ⴰⴷ ⴰⵡⵙⵏⵜ ⵏ ⵜⵡⴰⴼⵉⵜ ⵏ ⵉⵙⵎⵖⵔⵏ ⵉⴷⵎⵙⴰⵏⵏ ⴷ ⵉⴷⵍⵙⴰⵏⵏ ⵍⵍⵉ ⵔⴰⴷ ⵢⴰⵡⵙ ⵃⵎⴰ ⴰⴷ ⵚⴰⵃⴰⵏ ⵓⵎⵎⵉⵥⵏ ⵏ ⵜⵎⴰⴹⵍⴰⵏⵜ ⴷ ⵜⵙⴱⴱⴰⴱⵜ ⵜⴰⴳⵔⴰⵖⵍⴰⵏⵜ ⴷ ⵜⵣⵣⵉⴳⵣⵜ ⵜⴰⵜⵉⴽⵏⵓⵍⵓⵊⵉⵜ ⵉ ⴽⵓⵢⴰⵏ.
ⵓⵔ ⴳⵉⵙ ⵜⵓⵔⴷⴰ ⵎⴰⵙ ⴷ ⴰⵙⵎⵖⵔ ⴰⴷⵎⵙⴰⵏ ⴷ ⵓⵜⵉⴽⵏⵓⵍⵓⵊⵉ ⵍⵍⵉ ⵙⴽⵔⵏⵜ ⵜⵎⵉⵣⴰⵔ ⵉⴳⵎⴰⵎⵏ ⴳ ⵜⵣⵍⵖⴰ ⵏⵏⵓⵏ ⴷ ⵓⵎⵏⴰⴹ ⵏⵏⵙ ⴰⵙⴳⴰⵡⴰⵏ, ⴷ ⵎⴰⵙ ⵜⵜⵓⵙⵙⴰⵏⵏ ⵉⵎⴰⴷⴰⵏⵏ ⵏⵏⵓⵏ ⵙ ⵜⴷⵍⵙⴰ ⵏ ⵍⵢⴰⵇⵉⵏ ⴷ ⵜⵡⵡⵓⵔⵉ ⵥⴹⴰⵕⵏ ⴰⴷ ⵙⵙⵔⵅⵓⵏ ⵜⵉⵡⵉⵣⵉ ⴰⴷ.
ⵙⵙⵓⵔⴼⴰⵜ ⵉⵢⵉ ⴰⴷ ⵙⴷⴷⵉⴷⵖ ⵎⴰⵙ ⴷ ⵜⴰⵎⵓⵏⵜ ⵏⵏⵓⵏ ⵉⴱⴷⴷⵏ ⴼ ⵓⵎⵢⴰⵡⴰⵙ ⴷ ⵜⵎⴷⵔⴰⵡⵜ ⵍⵍⵉ ⵉⵥⴹⴰⵕⵏ ⴰⴷ ⵜⵉⵜⵜⵉ ⴷ ⵜⴰⵢⴷⵢⵓⵍⵓⵊⵉⵜ, ⵜⵥⴹⴰⵕ ⴰⴷ ⵜⴰⵡⵙ ⵙ ⴽⵉⴳⴰⵏ ⴳ ⵡⴰⵜⵉⴳ ⴰⴷⵎⵙⴰⵏ ⴷ ⵜⴻⵜⵉⴽⵏⵓⵍⵓⵊⵉⵜ ⴷ ⵜⵏⴳⴰⵏⵜ. ⴳ ⵉⵙⵏⴼⵍⵏ ⴳ ⵓⵖⵓⵍ ⵏ ⵓⵎⵢⴰⵙ ⵉ ⵜⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ, ⵙⵍⵡⴰⵏ ⴰⴽⴽⵯ ⵙ ⵓⴷⵔⵓ ⵏ ⵜⵎⵓⵣⴰⵢⵉⵏ ⴷ ⵓⵙⵔⵅⵓ ⵏ ⵓⵙⵎⴰⵜⵜⵉ ⵏ ⵜⴻⵜⵉⴽⵏⵓⵍⵓⵊⵉⵜ ⴷ ⵜⵙⵓⴳⴰⵔ. ⴰⵔ ⵉⵜⵜⴰⵙ ⴳ ⵎⴰ ⴰⴷ ⵓⴳⴳⵓⴳ ⴼ ⵜⵙⵔⵜⵉⵜ ⵏ ⵜⵛⵓⵎⴰⵛ ⵜⵉⵊⵢⵓⵙⵔⵜⴰⵏⵉⵏ ⴷ ⵓⵚⴽⵓ ⵏ ⵓⴼⴳⴰⵏ ⴰⵎⴰⵢⵏⵓ ⴷ ⵓⴼⴰⵔⵙ ⵏ ⵜⵎⴳⵓⵔⴰ ⴷ ⵓⵙⵎⴰⵢⵏⵓ.
ⵔⵉⵖ ⴰⴷ ⵙⴷⴷⵉⴷⵖ, ⵎⴰⵙ ⴷ ⵜⴰⵎⴰⵣⵉⵔⵜ ⵉⵏⵓ, ⵜⴰⴳⵍⴷⵉⵜ ⵏ ⵍⵎⵖⵔⵉⴱ, ⵍⵍⵉ ⵉⵙⴽⵔⵏ ⵜⵉⵣⴷⴰⵢⵉⵏ ⵜⵉⵎⵣⵔⴰⵢⵉⵏ ⴰⴽⴷ ⵜⵉⵎⵉⵣⴰⵔ ⵏⵏⵓⵏ, ⵜⴷⵔⵓ ⴷⵉⴷⵓⵏ ⵉⵅⵎⵎⵉⵎⵏ ⴰⴷ, ⴳ ⵓⵙⴱⴷⴷⵉ ⵏ ⵜⵎⵏⵜⵍⵉⵏ ⵏ ⵉⵙⵏⴼⵍⵏ ⵏ ⵓⵏⵣⵡⵉ, ⴷ ⵓⵙⵉⵣⴷⵔ ⵏ ⵡⴰⵡⵏⴰⴹ, ⵙⵍⴰⵡⵏ ⴰⴽⴽⵯ ⴰⵙⴳⵓⴼⵙⵓ ⵏ ⵉⴳⵔⵡⴰⵏ ⴷ ⵢⵉⵍⵏ, ⴷ ⵓⵙⴽⵔ ⵏ ⵉⵙⵏⴼⴰⵔⵏ ⵏ ⵜⴷⵎⵙⴰ ⵜⴰⵣⴳⵣⴰⵡⵜ ⴷ ⵓⴼⴰⵔⵙ ⵏ ⵜⵥⴹⴰⵕⵜ ⵜⴰⵎⴰⵢⵏⵓⵜ, ⵉⵙⵏⴼⴰⵔⵏ ⴳⴰⵏⵉⵏ ⵉⵙⵜⵔⴰⵜⵉⵊⵢⵏ ⴳ ⵜⴳⵍⴷⵉⵜ, ⵕⵥⵎⵏⵉⵏ ⵉⵎⵏⴰⴷⵏ ⵉⵅⴰⵜⴰⵔⵏ ⵏ ⵜⵎⴷⵔⴰⵡⵉⵏ ⵎⵢⴰⵙⴰⵏⵉⵏ.
ⵔⴰⴷ ⵏⵎⵎⵔ ⵙ ⵓⵎⵏⴰⴷⵏ ⵉⵎⴰⵢⵏⵓⵜⵏ ⵏ ⵓⵎⵢⴰⵡⴰⵙ ⴰⴽⴷ ⵜⵉⵎⵉⵣⴰⵔ ⵜⵉⴳⵎⴰⵎⵉⵏ ⴳ ⵜⵣⵍⵖⴰ ⵏⵏⵓⵏ, ⵙⵍⴰⵡⴰⵏ ⴰⴽⴽⵯ ⴳ ⵉⵙⵏⴼⴰⵔⵏ ⵉⵙⵜⵔⴰⵜⵉⵊⵉⵢⵏ ⵍⵍⵉ ⵔⴰⴷ ⵢⴰⵡⵙ ⴳ ⵓⴼⴰⵔⵙ ⵏ ⵓⵜⵛⵓ, ⴰⵔ ⵜⵙⴽⴰⵔ ⵜⵎⴰⵣⵉⵔⵜ ⵏⵏⵖ ⵉⵙⵏⴼⴰⵔⵏ ⵅⴰⵜⵔⴰⵏⵉⵏ, ⵜⴰⵡⵙ ⴳ ⵜⴳⵎⵉ ⵏ ⵜⴼⵍⵍⴰⵃⵜ ⴳ ⵉⴼⵔⵉⵇⵢⴰ, ⵙ ⵜⵙⵓⴳⴰⵔ ⵏⵏⵙ ⴳ ⵓⵎⵏⵉⴷ ⴰⴷ ⴷ ⵜⵥⴹⴰⵕⵉⵏ ⵅⴰⵜⵔⵏⵉⵏ ⵍⵍⵉ ⴷⴰⵔⵙ ⴳ ⵍⴼⵓⵚⴼⴰⵟ ⴼ ⵜⴷⵎⵙⴰ ⵜⴰⵣⴳⵣⴰⵡⵜ ⴷ ⵜⴻⵜⵉⴽⵏⵓⵍⵓⵊⵉⵜ ⵏⵏⵙ.
ⴰⵔ ⵜⵜⴰⵡⵙⵏⵜ ⵜⵎⵢⴰⵇⵇⴰⵏⵉⵏ ⵏ ⵓⵙⵏⴼⵍ ⵉⵍⴻⵍⵍⵉ ⵊⴰⵔ ⵜⵎⴰⵣⵉⵔⵜ ⵉⵏⵡ ⴷ ⵜⵎⵉⵣⴰⵔ ⴷ ⵜⴰⵎⵓⵏⵉⵏ ⵜⵉⴷⵎⵙⴰⵏⵉⵏ ⵅⴰⵜⵔⵏⵉⵏ, ⴳ ⵜⵍⵍⴰ ⵎⴰⵔⵉⴽⴰⵏ ⵉⴳⴰⵏ ⵜⴰⵎⴰⵣⵉⵔⵜ ⵜⴰⵎⴷⴷⴰⴽⴽⵯⵍⵜ ⵏ ⵍⵎⵖⵔⵉⴱ, ⵜⵉⵥⴹⴰⵕⵉⵏ ⴳⴳⵓⵜⵏⵉⵏ ⵉ ⵓⴽⵛⵓⵎ ⵙ ⵉⴳⴰⴷⴰⵣⵏ ⵙ ⵎⴰⴷ ⵉⴳⴰⵏ ⵎⵍⵢⴰⵕ ⵏ ⵓⵏⵙⵎⵓⵔ, ⴷ ⵎⴰⴷ ⵜⴰⴽⴽⴰ 1500 ⵏ ⵜⵎⵢⴰⵇⵇⴰⵏⵜ ⴰⴽⴷ ⵜⵉⵎⵉⵣⴰⵔ ⵜⴰⵢⵜⵎⴰⵜⵉⵏ ⵜⵉⴼⵔⵉⵇⵉⵢⵉⵏ, ⵉⴼⴹ ⴳⵉⵙⵏⵜ ⵉⵜⵜⵓⵣⵎⵎⴰⵎ ⵍⵍⵉⵖ ⵉⵍⵍⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵙⴹⵉⵚ ⴼ ⴰⴷⴰⴱⵓ ⴳ 1999.
ⵙ ⵓⴷⵖⴰⵔ ⵏⵏⵙ ⴰⵙⵜⵔⴰⵜⵉⵊⵉ ⵉⵍⵍⴰⵏ ⵜⴰⵎⴰ ⵏ ⵓⵕⵓⴱⴱⴰ (ⵎⴰⴷ ⵉⴷⵔⵓⵙⵏ ⵏ 14 ⴽⵍⵎ ⴼ ⵓⵕⵓⴱⴱ) ⴷ ⵓⵥⵓⵕ ⵏⵏⵙ ⴰⴼⵔⵉⵇⵉ ⴷ ⵓⵏⴰⵎⵎⴰⵙ, ⵉⵟⵟⴰⴼ ⵍⵎⵖⵔⵉⴱ ⴰⵎⴰⵡⴰ ⴰⴷⵙⵍⴰⵏ ⵉⵣⵣⵉⴳⵣⵏ, ⵙⵍⴰⵡⵏ ⴰⴽⴽⵯ ⵉⴼⵜⴰⵙⵏ ⴼ ⴰⴳⴰⵔⵓ ⴰⵟⵍⴰⵚⵉ ⴷ ⵢⵉⵍ ⵓⵎⵍⵉⵍ ⴰⵏⴰⵎⵎⴰⵙ, ⵉⴳ ⵙ ⵖⵎⴽ ⴰⵏⵏ ⴰⵎⵎⴰⵙ ⵏ ⵉⵙⵏⴼⵍⵏ ⵉⵏⵙⴱⴰⴱⵏ ⴰⴽⴷ ⵜⵉⵎⵉⵣⴰⵔ ⵏ ⵉⴼⵔⵉⵇⵢ ⴷ ⵉⵎⵓⵏ ⵙ ⵜⵎⴷⵔⴰⵡⵉⵏ ⴳⴳⵓⵜⵉⵏⵉⵏ, ⵖⵎⴽ ⴰⵏⵏ ⵓⵍⴰ ⵜⵉⵎⵉⵣⴰⵔ ⵏ ⵓⵕⵓⴱⴱⴰ ⴷ ⵉⵟⵟⴰⴼ ⴰⵙⵓⵔⵙ ⵉⵣⵣⵉⴳⵣⵏ ⴳ ⵜⵣⴷⴰⵢⵜ ⵏⵏⵙ ⴰⴽⴷ ⵜⴰⵎⵓⵏⵜ ⵏ ⵓⵕⵓⴱⴱⴰ.
ⵉⵍⵍⴰ ⵎⴰ ⴰⵏⵏ ⵖⵎⴽ ⴰⵏⵏ ⴷ ⵓⵔⴳⴳⵉⴳ ⴷ ⵜⵏⴼⵔⵓⵜ ⵍⵍⵉ ⵉⵟⵟⴰⴼ ⵍⵎⵖⵔⵉⴱ, ⴷ ⵜⵍⴻⵍⵍⵉ ⵜⴰⴷⵎⵙⴰⵏⵜ ⴷ ⵉⵙⵍⴳⵏⵏ ⵏ ⵓⵙⵙⴰⵔⵓ ⴰⴽⴽⴰⵏⵉⵏ ⵜⵉⵎⵍⴷⴰ ⵜⵉⵅⴰⵜⴰⵔⵉⵏ ⵏ ⵓⵙⵙⴰⵔⵓ ⴰⴱⵕⵕⴰⵏ, ⵙⵍⴰⵡⵏ ⴰⴽⴽⵯ ⵙ ⵜⵉⵍⴰⵍⵜ ⵏⵏⵙ ⴳ ⵜⵉⵍⵉⵜ ⵏ ⵓⴼⵔⴰ ⴷ ⵜⵎⵢⵉⴷⵉⵔⵜ ⵊⴰⵔ ⵉⵙⴽⴷⵏ ⴷ ⵜⵖⵔⵎⴰⵡⵉⵏ ⴷ ⵜⴷⵍⵙⴰⵡⵉⵏ, ⴰⵢⵍⵍⵉ ⵜⵙⴽⴰⵔ ⵜⴳⵍⴷⵉⵜ ⵜⴰⴷⵙⵜⴰⵔⵜ ⵜⴰⴷⵉⵎⵓⵇⵔⴰⵟⵉⵜ ⵜⴰⵏⴰⵎⵓⵏⵜ, ⵜⵉⵍⴰⵍⵜ ⵉⴳⴰⵏ ⵜⴰⵙⵜⵔⴰⵜⵉⵊⵉⵜ ⴷ ⵜⵉⵏ ⵉⵎⴰⵏ.
ⵜⵉⵏⴳⴳⵯⴰ ⴷ ⵉⵏⴳⴳⵯⴰ;
ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ .
ⴳⵎⴰⴷ, ⵟⵟⴰⴼⵏ ⵉⴱⵕⵍⴰⵎⴰⵏⵏ ⵜⵉⵍⴰⵍ ⵍⵍⵉ ⴷ ⵉⵇⵇⴰⵏ ⴰⴷ ⵙⴽⵔⵏ, ⵜⴰⵎⵣⵡⴰⵔⵓⵜ ⴰⵙⵙⴼⵔⴽ ⵙ ⵉⵎⵉⵣⵉⵜⵏ ⵏ ⵉⵙⵓⵔⵙⵏ ⵉⴳⵔⴰⵖⵍⴰⵏⵏ, ⵜⵉⵙ ⵙⴰⵏⵜ ⴰⵔⴰⵢ ⵙⵀ ⵜⴰⵙⵙⴰⵙⵉⵏ ⴷ ⵓⴼⵓⴽⴽⵓ ⵏ ⵜⵎⴰⵖⵉ, ⵜⵉⵙ ⴽⵕⴰⴹⵜ ⴰⵚⴽⵓ ⵏ ⵓⵏⴳⵔⴰⵡ ⴰⴷⵎⵙⴰⵏ ⴰⴳⵔⴰⵖⵍⴰⵏ ⴰⵣⵔⴼⴰⵏ ⵉⵍⵍⴰⵏ ⴷ ⵜⵏⵓⴼⴰ ⵏ ⵜⵎⵉⵣⴰⵔ ⵏ ⵉⴼⴼⵓⵙ, ⵜⵉⵙ ⴽⴽⵓⵥⵜ ⴰⵙⴷⵓⵙ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⵔⵙⵍⴰⵏⵜ ⵉⵍⵍⴰⵏ ⴷ ⵉⵎⵏⴰⴹⵏ ⵉⵏⴰⵎⵓⵔⵏ ⴷ ⵜⴷⵍⵙⴰⵡⵉⵏ ⴷ ⵓⵚⴽⵓ ⴼ ⵓⵙⴳⵓⴷⵉ ⴷ ⵓⵙⵉⵜⵜⵉ ⵏ ⵉⵎⵣⵔⴰⵢⵏ ⵀⵔⵛⵏⵉⵏ.
ⵜⴰⵏⵎⵎⵉⵔⵜ ⴼ ⵓⵙⵙⴼⵍⴷ ⵏⵏⵓⵏ