ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⴰⵏⴱⴳⵉ ⵏ ⵡⴰⴷⴷⵓⵔ ⵖ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⵉⵙ 41 ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵎⵓⵍⵍⵉ ⵏ ⵉⵡⴰⵏⴽⵏ ⵏ ⵉⴼⴼⵓⵙ ⵏ ⵓⵙⵏⵇⵔ ⵏ ⴰⵙⵢⴰ

ⵉⴳⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵔⴰ, ⵉⵏⴱⴳⵉ ⵏ ⵡⴰⴷⴷⵓⵔ ⵖ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⵉⵙ 41 ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵎⵓⵍⵍⵉ ⵏ ⵉⵡⴰⵏⴽⵏ ⵏ ⵉⴼⴼⵓⵙ ⵏ ⵓⵙⵏⵇⵔ ⵏ ⴰⵙⵢⴰ “ⴰⵙⵢⴰⵏ”, ⵉⵍⵍⴰⵏ ⵏⴳⵔ 8 ⴷ 10 ⵖ ⵡⴰⵢⵢⵓⵔ ⵏ ⵛⵓⵜⴰⵏⴱⵉⵔ ⵖ ⵀⴰⵏⵓⵢ ⵜⴰⵎⴰⵥⵓⵏⵜ ⵏ ⴼⵉⵟⵏⴰⵎ ⵙ ⵜⴻⵜⵉⵇⵏⵉⵜ ⵏ ⵓⴼⵉⵣⵢⵓⴽⵓⵏⴼⵉⵕⵓⵏⵚ.

ⵙ ⵜⵉⵍⵉⵜ ⵏ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ ⵏ ⵉⵡⴰⵏⴽⵏ ⵉⴳⵎⴰⵎⵏ, ⴷ ⵉⴳⵏⵙⴰⵙⵏ ⵏ ⵜⵎⴰⴷⴷⴰⵙⵉⵏ ⵜⵉⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ, ⴷ ⴽⵉⴳⴰⵏ ⵏ ⵉⵏⴱⴳⵉⵡⵏ, ⵉⵙⵎⵏⵉⴷ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵙⵙ ⵏ ⵓⵙⵉⵏⴰⵙ 08 ⵛⵓⵜⴰⵏⴱⵉⵔ 2020, ⵢⴰⵜ ⵜⴳⵓⵔⵉ ⵖ ⵉⵙⴷⴷⵉⴷ ⴼ ⵡⴰⵜⵉⴳ ⴰⵅⴰⵜⴰⵔ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⵖ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ, ⵍⵍⵉⵖ ⵜⴳⴰ ⵜⴰⴷⵉⴱⵍⵓⵎⴰⵙⵉⵜ ⵉⵙⵎⴷⵏ, ⵉⵜⵜⴰⵡⵙⵏ ⴰⴷ ⵜⵜⵓⵙⴽⵉⵔⵏ ⵉⵡⵜⵜⴰⵙⵏ ⵛⵇⵇⴰⵏⵉⵏ ⵙ ⵜⵖⴰⵔⴰⵙⵉⵏ ⵜⵉⵇⴱⵓⵔⵉⵏ, ⵢⵉⵏⵉ: “ⵥⴹⴰⵕⵏⵜ ⵜⵣⴷⴰⵢⵉⵏ ⵏⴳⵔ ⵉⴱⵕⵍⴰⵎⴰⵏⵉⵢⵏ ⴰⴷ ⴳⵉⵏⵜ ⵉⵙⵓⵔⴰ ⵏ ⵓⵏⵢⴰⵍⴽⴰⵎ ⵉⵙⵙⵔⵅⵓⵏ ⵜⴰⵣⵣⵉⴳⵣⵜ ⵏ ⵜⵣⴷⴰⵢⵉⵏ ⵏⴳⵔ ⵉⵡⴰⵏⴽⵏ, ⵖ ⵜⵎⵙⴰⵔⵉⵏ ⴷ ⵉⵙⴷⴰⵡⵏ ⵖ ⵉⵛⵇⵇⴰ ⵓⵏⵢⴰⵍⴽⴰⵎ ⴰⵎⴰⴷⴷⵓⴷ”.

ⵉⵙⴷⴷⵉⴷ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴼ ⵜⵉⵍⴰⵍⵜ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⵖ ⵓⵏⵢⴰⵍⴽⴰⵎ ⵏⴳⵔ ⵜⵎⵉⵣⴰⵔ ⴷ ⵉⵎⴰⴷⴰⵏⵏ ⵙ ⵜⵉⴽⴽⵉ ⵏ ⵓⵎⵏⵉⴷ ⴰⴱⵕⵍⴰⵎⴰⵏⵉ ⵉ ⵓⵏⴱⴰⴹ ⴰⴳⵔⴰⵖⵍⴰⵏ ⴷ ⵓⵙⴷⵓⵙ ⵏ ⵓⴼⵔⴰ, “ ⵙ ⵖⵎⴽ ⴰⴷ ⴰⵙ ⵜⴳⴰ ⵢⴰⵏ ⵓⴷⵎ ⴰⴷⵙⵍⴰⵏ ⵖ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⴷ ⵓⵙⴷⵓⵙ ⵏ ⵜⴷⵉⵎⵓⵇⵔⴰⵟⵉⵜ”. ⵖⵎⴽ ⵍⵍⵉ ⵉⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵡⵓⵔⵉ ⵏ ⵜⵎⴰⴷⴷⴰⵙⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⴳⵉⵜⵔⴰⵏⵉⵏ ⵖ ⵜⵡⵉⵙⵉ ⵏⵏⵙⵏⵜ ⵖ ⵓⵙⴷⵓⵙ ⵏ ⵓⵎⵛⴰⵡⴰⵕ ⴷ ⵓⵣⴷⴷⵓⵢ ⵏⴳⵔ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ ⵖ ⵓⴷⵔⴰⵡ ⵏ ⵜⵉⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ ⵖ ⵢⵉⴳⵔ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ.

ⵏⵏⵓⵔⵣⵏ ⵉⵡⴰⵏⴽⵏ ⵉⴳⵎⴰⵎⵏ ⵖ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵉⵡⴰⵏⴽⵏ ⵏ “ⴰⵙⵢⴰⵏ” ⴽⵉⴳⴰⵏ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵖ ⵜⵙⵓⵜⵍⵜ ⴰⴷ ⵍⵍⵉ ⵜⵙⵙⵉⵅⴼ ⵎⴰⵙⵙⴰ Nguyen Thi Kim Ngan ⵜⴰⵏⵙⵙⵉⵅⴼⵜ ⵏ ⵜⵎⵙⵎⵏⵓⵜ ⵜⴰⴱⵕⵍⴰⵎⵏⵉⵜ ⵜⴰⵏⴰⵎⵓⵔⵜ ⵏ ⵜⴳⴷⵓⴷⴰⵏⵜ ⵏ ⴼⵉⵟⵏⴰⵎ ⵜⴰⵙⵔⵎⵓⵏⵜ, ⵏⵏⵓⵔⵣⵏ ⵓⵍⴰ ⴰⴷ ⵢⵉⵍⵉ ⵓⵎⴹⴰⴽⴰⵕ ⵉⴷⵔⴰⵏ ⴼ ⵜⵎⵙⴰⵔⵉⵏ ⵉⵛⵛⴰⵔⵏ ⵃⵎⴰ ⴰⴷ ⵢⵉⵍⵉ ⴽⵉⴳⴰⵏ ⵏ ⵓⵙⵉⴷⴼ.

ⵜⵍⵍⴰ ⵜⵙⵓⵜⵍⵜ ⴰⴷ ⴷⴷⵓ ⵜⵎⴰⵜⴰⵔⵜ:”ⵜⴰⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ, ⵉ ⵜⴰⵎⵓⵏⵜ ⵖ ⵉⵍⵍⴰ ⵓⵙⵉⴷⴼ ⴷ ⵓⵏⵢⴰⵍⴽⴰⵎ ⵉ ⴰⵙⵢⴰⵏ”. ⵔⴰⴷ ⴳⵉⵙ ⵢⵉⵍⵉ ⵓⵎⴹⴰⴽⴰⵕ ⵏ ⵜⵎⵙⴰⵔⵉⵏ ⵀⵎⵎⴰⵏⵉⵏ ⵜⵉⵍⴰⵍⵜ ⵏ ⵜⵎⵖⴰⵔⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵖ ⵓⵙⴽⵔ ⵏ ⵜⵡⵓⵔⵉⵡⵉⵏ ⵉ ⵚⴰⵃⴰ ⵏ ⵜⵎⵖⴰⵔⵉⵏ ⵥⴹⴰⵕⵏⵉⵏ ⴰⴷ ⵙⵡⵓⵔⵉⵏⵜ, ⴷ ⵜⵉⵍⴰⵍⵜ ⵏ ⵉⵄⵔⵔⵉⵎⵏ ⵖ ⵓⵙⴷⵓⵙ ⵏ ⵓⵙⵉⴷⴼ ⵏⴳⵔ ⵉⵡⴰⵏⴽⵏ ⵏ “ⴰⵙⵢⴰⵏ”, ⵖⵎⴽ ⵍⵍⵉ ⵔⴰⴷ ⵜⵎⴹⴰⴽⴰⵕ ⵜⵙⵇⵇⵉⵎⵜ ⵏ ⵉⵙⴽⴽⵉⵏⵏ ⵉⵙⵔⵜⴰⵏⵏ ⴷ ⵜⵙⵇⵇⵉⵎⵜ ⵏ ⵉⵙⴽⴽⵉⵏⵏ ⵉⴷⵎⵙⴰⵏⵏ ⴷ ⵜⵙⵇⵇⵉⵎⵜ ⵏ ⵉⵙⴽⴽⵉⵏⵏ ⵉⵏⴰⵎⵓⵏⵏ ⴼ ⴽⵉⴳⴰⵏ ⵏ ⵉⵎⵔⵙⵉⵡⵏ ⵣⴷⵉⵏⵉⵏ ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⵙⵔⵜⴰⵏ ⴷ ⵓⴱⵕⵍⴰⵎⴰⵏⵉ ⵏⴳⵔ ⵉⵡⴰⵏⴽⵏ ⵉⴳⵎⴰⵎⵏ, ⴷ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⴷ ⵜⵎⵓⴽⵔⵉⵙⵉⵏ ⵉⵛⵛⴰⵔⵏ ⴳⴰⵏⵉⵏ ⵜⴰⵢⵢⴰⴼⵓⵜ ⵏ ⵓⵙⴼⵔⵓⵔⵜ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19, ⴷ ⵓⵙⴷⵓⵙ ⵏ ⵓⵔⵎⵎⵓⵙ ⵏ ⵓⵏⴱⴰⴹ ⵉⵥⵉⵍⵏ ⵉⴳⴰⵏ ⵜⴰⵔⵙⵍⵜ ⵏ ⵜⴳⵎⵉ ⵜⴰⴷⵎⵙⴰⵏⵜ.

ⵖ ⵓⵙⴳⴳⵯⴰⵙ ⵉⵣⵔⵉⵏ, ⵉⴷⵔⵓ ⴰⴷ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵜⵙⵓⵜⵍⵜ ⵜⵉⵙ 40 ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵉⵡⴰⵏⴽⵏ ⵏ “ⴰⵙⵢⴰⵏ” ⵖ ⴱⴰⵏⴽⵓⴽ ⵜⴰⵎⴰⵥⵓⵏⵜ ⵏ ⵟⵟⴰⵢⵍⴰⵏⴹ.  ⵙ ⵜⵎⵍⴷⴰ, ⵉⵙⴷⴷⵉⴷ ⴼ ⵓⴷⵖⴰⵔ ⵉⵍⵍⴰⵏ ⴷⴰⵔ ⵜⵎⵙⵎⵓⵏⵜ ⵍⵍⵉⵖ ⵜⴳⴰ ⴰⵙⴰⵜⵉ ⴰⴱⵕⵍⴰⵎⴰⵏⵉ ⵉⵙⵜⴰⵡⵀⵎⵎⴰⵏ ⴷ ⵜⵔⵙⵍⵜ ⵜⴰⴷⵙⵍⴰⵏⵜ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵏⴳⵔ ⵉⵡⴰⵏⴽⵏ ⵏ ⵜⵙⴳⴰ, ⵢⵉⵏⵉ ⵎⴰⵙ ⵉⵏⵏⵓⵔⵣ ⵍⵎⵖⵔⵉⴱ ⴰⴷ ⵢⵉⵍⵉ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⵎⵔⵙⵍⴰⵏ ⴷ ⵜⵎⴰⴷⴷⴰⵙⵜ ⴰⴷ, ⵍⵍⵉⵖ ⵜ ⵙⵎⵓⵏⵏ ⴷ ⵉⴳⵎⴰⵎⵏ ⵏⵏⵙ ⵜⵉⵣⴷⴰⵢⵉⵏ ⵜⵉⵇⴱⵓⵔⵉⵏ ⵥⵍⵉⵏⵉⵏ.

“ⴰⵙⵢⴰⵏ” ⵏⵖ ⴰⵎⵓⵍⵍⵉ ⵏ ⵉⵡⴰⵏⴽⵏ ⵏ ⵉⴼⴼⵓⵙ ⵏ ⵓⵙⵏⵇⵔ ⵏ ⴰⵙⵢⴰ ⵉⴳⴰ ⵢⴰⵜ ⵜⴰⵎⵓⵏⵜ ⵜⴰⴷⵎⵙⴰⵏⵜ ⴷ ⵜⵙⵔⵜⴰⵏⵜ ⵉⵜⵜⵓⵙⴽⴰⵔⵏ ⵖ ⵓⵙⴳⴳⵯⴰⵙ ⵏ 1967, ⴳⵉⵙ 10 ⵉⵡⴰⵏⴽⵏ: ⵉⵏⴷⵓⵏⵉⵙⵢⴰ, ⵙⴰⵏⵖⴰⴼⵓⵕⴰ, ⵎⴰⵍⵉⵥⵢⴰ, ⴼⵉⵟⵏⴰⵎ, ⵟⵟⴰⵢⵍⴰⵏⴹ, ⵎⵢⴰⵏⵎⴰⵔ, ⵍⴼⵉⵍⵉⴱⴱⵉⵏ, ⴱⵕⵓⵏⴰⵢ, ⵍⴰⵡⵙ, ⴽⴰⵎⴱⵓⴷⵢⴰ.  ⵉⵡⴰⵜⵜⴰⵙ ⴰⴷ ⵜⵉⴳⵓⵜ ⵜⴳⵎⵉ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ ⴷ ⵜⴷⵍⵙⴰⵏⵜ ⵖ ⵉⴼⴼⵓⵙ ⵏ ⵓⵙⵏⵇⵔ ⵏ ⴰⵙⵢⴰ, ⵖⵎⴽ ⴰⵏⵏ ⴷ ⵓⴷⵖⴰⵔ ⵏ ⵓⵙⵖⵏⵣⵉ ⵉⵍⴻⵍⵍⵉ ⵏⴳⵔ ⵉⵡⴰⵏⴽⵏ ⵉⴳⵎⴰⵎⵏ ⵏⵏⵙ.