ⴰⵙⵉⵡⴹ ⵏ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵡⴰⵙ 4 ⵎⴰⵕⵚ 2021

ⵉⵙⵏⵎⴰⵍⴰ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵡⴰⵙ 4 ⵎⴰⵕⵚ 2021, ⵉ ⵓⵙⵔⵙ ⵏ ⵓⵖⴰⵡⴰⵙ ⵏ ⵓⵙⵇⵇⵉⵎ ⴼ ⵉⴹⵕⵉⵚⵏ ⵉⵣⵣⵔⴰⴼⵏ ⵏ ⵜⵙⵓⵜⵍⵜ ⵉⵥⵍⵉⵏ.

ⴳ ⵜⵣⵡⵉⵔⵉ ⵏ ⵜⵙⵎⵓⵏⵉ, ⵉⵙⵙⴽⵜⵉ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵜⵉⵙⵓⵜⵍⵉⵏ ⵏ ⵓⵎⴹⴰⴽⴰⵕ ⵏ ⵉⴹⵕⵉⵚⵏ ⵉⵣⵣⵔⴰⴼⵏ ⵏ ⵉⵙⵜⴰⵢⵏ ⴳ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ, ⵉⵙⵙⴽⵜⵉ ⴷ ⴰⵜⵉⴳ ⵏ ⵓⵙⵔⵙ ⴰⴷ ⴰⵏⴰⵎⵓⵔ, ⵉⵙⵓⵜⴳ ⵜⵓⴳⴳⴰⵙ ⵏ ⵜⵙⵇⵇⵉⵎⵜ ⵙ ⵓⵏⵙⵙⵉⵅⴼ ⴷ ⵓⵙⵉⵔⴰ ⴷ ⵉⴳⵎⴰⵎⵏ ⴳ ⵓⵙⵓⵊⴷ ⵏ ⵜⵙⵓⵜⵍⵉⵏ ⴷ ⵓⵙⴰⵏⵉⵏ ⵉ ⵜⵖⵉⵎⵉⵜⵉⵏ ⵏ ⵓⵎⴹⴰⴽⴰⵕ ⴷ ⵓⵙⵜⴰⵢ ⵏ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⵉⵎⴰⴷⴷⴰⵙⵏ ⵏ ⵉⵙⵜⴰⵢⵏ ⴷ ⵉⵎⴰⵏ ⵏ ⵓⵎⵙⴰⵡⴰⵍ ⵉⵍⵍⴰⵏ ⴳ ⵓⵎⵢⴰⵡⴰⵙ ⵊⴰⵔ ⵓⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ ⴷ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ.

ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵉⵔⴰ ⴳ ⵓⵕⵥⵥⵓⵎ ⵏ ⵜⵙⵎⵓⵏⵉ ⵏ ⵓⵙⵉⵔⴰ ⴼ ⵓⵙⵎⵖⵔ ⴰⵎⵔⵙⵍⴰⵏ ⵉⵍⵍⴰⵏ ⴳ ⵓⵎⴹⴰⴽⴰⵕ ⴷ ⵡⴰⵜⵉⴳ ⵏ ⵓⵙⴳⵎⵉ ⴷ ⵓⵙⵢⴰⴼⴰ ⴰⴷⵉⵎⵓⵇⵔⴰⵟⵉ ⵏ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ, ⴰⵢⵍⵍⵉ ⵢⵉⵡⵙⵏ ⴳ ⵓⵙⵡⵓⴷⴷⵓ ⵏ ⵜⵙⵓⵎⵔⵉⵏ ⵜⵉⵎⵣⵔⴰⵢⵉⵏ, ⵉⴽⵏⵏⴰ ⴳⴰⵏⵜ, ⴷ ⵓⵙⵓⵊⴷ ⵏ ⵓⵙⵎⴰⵇⵍ ⵏ ⵓⵎⵣⴰⵔⴰⵢ ⵉⴳⴰⵏ ⵉⵎⴰⵏ ⵏ ⵜⴷⵉⵎⵓⵇⵔⴰⵟⵉⵜ.

ⵉⵏⵏⴰ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙ ⴷ ⵜⵉⵎⵙⵓⵜⵍⵉⵏ ⴰⴷ ⴰⵔ ⴰⴽⴽⴰⵏⵜ ⴰⴱⵓⵔⵣ ⵙ ⵜⵉⵍⵉⵜ ⵙ ⵜⵎⵔⵙⵍⵜ ⴰⴷ, ⴰⵢⵍⵍⵉ ⵉⵎⵎⴰⵍⴰⵏ ⵜⴰⵡⵓⵔⵉ ⵏ ⵉⴳⵏⵙⴰⵙⵏ ⵏ ⵜⵎⵜⵜⵉ ⴷ ⵜⵡⵉⵙⵉ ⵏⵏⵙⵏ ⴳ ⵜⵓⴳⴳⴰⵙ ⵜⴰⵏⴰⵎⵓⵔⵜ ⵜⴰⵎⴰⵜⴰⵢⵜ.

ⵜⵉⵖⵔⵉ ⵉⴼⴰⵡⵏ ⵏ ⵡⴰⵢⴷⴰ ⴰⴷ ⴳ ⵜⵡⴰⵍⴰ ⴰⴷ ⴳ ⵓⵣⵎⵣ ⵏ ⵓⵥⵍⴰⵢ ⴰⴷⵓⵙⴰⵏ ⴷ ⵉⵖⴰⵡⴰⵍⵏ ⵉⴷⵓⵙⴰⵏⵏ, ⵜⴳⴰ ⴰⵎⴰⵏⴰⵔ ⴼ ⵜⵉⵕⵡⵉ ⴷ ⵡⴰⵜⵉⴳ ⵏ ⵜⵎⵢⴰⴷⴰⵙⵉⵏ ⵍⵍⴰⵏⵉⵏ ⴳ ⵓⵎⴹⴰⴽⴰⵕ ⵏ ⵉⵅⵎⵎⵉⵎⵏ ⵏ ⵜⵎⵜⵜⵉ ⴷ ⵓⵙⵎⵏⵉⴷ ⵏ ⵉⵙⵖⵍⴰⴼ ⴷ ⵜⵙⵓⵎⵔⵉⵏ ⴼⵍⵍⴰⵙⵏ.

ⵔⴰⴷ ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵓⵔⴰ ⵜⵉⵖⵉⵎⵉⵜ ⵜⴰⴳⴷⵓⴷⴰⵏⵜ, ⴰⵙⵉⵎⵡⴰⵙ 5 ⵎⴰⵕⵚ 2021 ⴳ ⵜⵉⵙ 16, ⵉ ⵜⵖⵔⵉ ⴷ ⵓⵙⵜⴰⵢ ⵏ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⵏ ⵜⵙⵓⵜⵍⵜ ⵉⵥⵍⵉⵏ:

• ⴰⵙⵏⴼⴰⵔ ⵏ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 04.21 ⵉ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 27.11 ⵉⵥⵍⵉⵏ ⵙ ⵓⵙⵇⵇⵉⵎ ⵏ ⵉⵎⵓⵔⴰ;

• ⴰⵙⵏⴼⴰⵔ ⵏ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 05.21 ⵉ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ ⴰⵎⴰⴷⴷⴰⵙ ⵉⵥⵍⵉⵏ ⵙ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ;

• ⴰⵙⵏⴼⴰⵔ ⵏ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 06.21 ⵉ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 59.11 ⴼ ⵓⵙⵜⴰⵢ ⵏ ⵉⴳⵎⴰⵎⵏ ⵏ ⵉⵙⵇⵇⵉⵎⵏ ⵏ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ;

• ⴰⵙⵏⴼⴰⵔ ⵏ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 07.21 ⵉ ⵓⵙⵏⴼⵍ ⵏ ⵓⵙⵍⴳⵏⴰⵎⴰⴷ ⴷ ⴰⵙⵓⵟⵟⵓⵏ 29.11 ⴼⵉⴽⴰⴱⴰⵕ ⵏ ⵉⵙⵔⵜⴰⵏⵏ.