ⴰⵙⵇⵇⵉⵎ ⵏ ⵉⵎⵓⵔⴰ ⵉⵙⵖⵣⵏ ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 30.20 ⵏ ⵓⵙⵔⵙ ⵏ ⵉⴱⴹⵉⵢⵏ ⵥⵍⵉⵏⵉⵏ ⵣⴷⵉⵏⵉⵏ ⵙ ⵜⵎⵖⵓⵏⵉⵏ ⵏ ⵉⵎⵓⴷⴷⵓⵜⵏ ⴷ ⵜⵣⴷⵓⵖⵉⵏ ⵏ ⵜⵎⴰⵍⵍⴰⵢⵜ ⴷ ⵜⵎⵖⵓⵏⵉⵏ ⵏ ⵡⴰⵙⵙⴰⵢ ⵏ ⵉⴳⵏⵏⴰ ⵏ ⵉⵏⵎⵓⴷⴷⴰ
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⴽⵕⴰⵙ 13 ⵎⴰⵢⵢⵓ 2020 ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 30.20 ⵏ ⵓⵙⵔⵙ ⵏ ⵉⴱⴹⵉⵢⵏ ⵥⵍⵉⵏⵉⵏ ⵣⴷⵉⵏⵉⵏ ⵙ ⵜⵎⵖⵓⵏⵉⵏ ⵏ ⵉⵎⵓⴷⴷⵓⵜⵏ ⴷ ⵜⵣⴷⵓⵖⵉⵏ ⵏ ⵜⵎⴰⵍⵍⴰⵢⵜ ⴷ ⵜⵎⵖⵓⵏⵉⵏ ⵏ ⵡⴰⵙⵙⴰⵢ ⵏ ⵉⴳⵏⵏⴰ ⵏ ⵉⵏⵎⵓⴷⴷⴰ. ⵖ ⵜⵖⵉⵎⵉⵜ ⵜⴰⴳⴷⵓⴷⴰⵏⵜ ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⵙ ⵜⵉⵍⵉⵜ ⵏ ⵎⴰⵙⵙⴰ ⵏⴰⴷⵢⴰ ⴼⵜⵜⴰⵃ ⵜⴰⵎⴰⵡⵙⴰⵙⵜ ⵏ ⵜⵎⴰⵍⵍⴰⵢⵜ ⴷ ⵜⵏⵉⴹⵉ ⴷ ⵡⴰⵙⵙⴰⵢ ⵏ ⵉⴳⵏⵏⴰ ⴷ ⵜⴷⵎⵙⴰ ⵜⴰⵏⴰⵎⵓⵏⵜ.
ⵖ ⵜⵏⴽⴷⴰ ⵏⵏⵙ ⵉ ⵓⵙⵏⴼⴰⵔ, ⵜⵙⵙⵉⵙⴼⵉⵡ ⴷ ⵎⴰⵙⵙⴰ ⵜⴰⵎⵡⵙⴰⵙⵜ ⵎⴰⵙ ⴷ ⵢⵓⵛⴽⴰ ⵖ ⵢⴰⵏ ⵓⵎⵏⴰⴹ ⵉⵥⵍⵉⵏ ⵖ ⵜⵍⵍⴰ ⵜⵎⴰⵣⵉⵔⵜ ⵏⵏⵖ ⴷ ⵓⵎⴰⴹⴰⵍ ⴰⴽⴽⵯ ⵙ ⵜⵣⵣⵉⴳⵣⵜ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⵍⵍⵉ ⵉⵟⵟⴰⴼⵏ ⵉⴷⵔⵉⵣⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ, ⵜⵎⵍⵉ ⴷ ⴰⵜⵉⴳ ⵉⵍⵍⴰⵏ ⴷⴰⵔ ⵓⵙⵏⴼⴰⵔ ⴰⴷ ⴷ ⵢⵓⵛⴽⴰⵏ ⴷ ⵓⵣⵎⵣ ⴰⴷ ⵍⵍⵉⵖ ⵔⴰⴷ ⵢⴰⵡⵙ ⵖ ⵓⵙⵏⵊⵎ ⵏ ⵜⵎⴰⵍⵍⴰⵢⵜ ⴷ ⵡⴰⵙⵙⴰⵢ ⵏ ⵉⴳⵏⵏⴰ ⵖ ⵓⵥⵓⵥⴹ, ⵢⴰⵡⵙ ⵉ ⵜⵙⵏⵓⵔⴰⵢ ⵏ ⵉⵎⵓⴷⴷⵓⵜⵏ ⴷ ⵜⵎⵔⵙⴰⵍ ⵏ ⵜⵎⴰⵍⵍⴰⵢⵜ ⴷ ⵉⴷ ⴱⴰⴱ ⵏ ⵡⴰⵙⵙⴰⵢ ⵏ ⵜⵎⴰⵍⵍⴰⵢⵜ ⴷ ⵡⴰⵙⵙⴰⵢ ⵏ ⵉⴳⵏⵏⴰ ⵏ ⵉⵏⵎⵓⴷⴷⴰ ⵉⴷⴷⵔⵏ ⵜⵉⵎⵓⴽⵔⵉⵙⵉⵏ ⵜⵉⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⵖ ⵜⵎⵙⵓⵜⵍⵜ ⴰⴷ.
ⴰⵔ ⵉⵜⵜⴰⵊⵊⴰ ⵓⵙⵏⴼⴰⵔ ⵏ ⵓⵙⵍⴳⵏ ⵉ ⵉⴷ ⴱⴰⴱ ⵏ ⵜⵏⵓⴼⴰ ⴰⵙⵏⴼⵍ ⵏ ⵡⴰⵏⵛⴽⵏ ⵟⵟⴼⴰⵕⵏ ⵉⵎⵙⴰⵖⵏ ⵏⵏⵙⵏ ⵙ ⵢⴰⵏ ⵓⵙⵉⵙⵙⵏ ⵙ ⵜⵎⵔⵡⴰⵙⵜ ⵉⴳⴰⵏ ⵜⴰⵙⵓⵎⵔⵜ ⵏ ⵜⵏⴰⴼⵓⵜ ⵙ ⵜⴰⴷ ⵜⵜ ⵉⵔⵡⴰⵙⵏ ⴱⵍⴰ ⵉⵣⵉⵢⵢⴷ ⵡⴰⵜⵉⴳ ⵏⵏⵙ, ⵉⵡⴰⵜⵜⵙ ⴰⵙⴱⴷⴷⵉ ⵏ ⵓⴷⵔⵉⵣ ⵏ ⵓⴱⴷⴷⴰⴷ ⵏ ⵜⵉⵍⴰⵍⵜ ⵜⴰⴷⵎⵙⴰⵏⵜ ⴼ ⵜⵣⵣⵓⵍⵉⵏ ⵏ ⵜⵡⵓⵔⵉ, ⵉⵙⵙⵉⴼⵙⵉⵙ ⵓⵍⴰ ⴼ ⵜⴷⵔⵉⵎⵜ ⵏ ⵉⴷ ⴱⴰⴱ ⵏ ⵜⵏⵓⴼⴰ ⵖⵎⴽ ⴰⵏⵏ ⴷ ⵓⵃⵟⵟⵓ ⵏ ⵜⵏⵓⴼⴰ ⵏ ⵉⵏⵎⵎⵔⵡⵉⵙⵏ ⵖ ⵍⵍⴰⵏ ⵉⵎⵙⵖⴰⵏ, ⵢⵉⵍⵉ ⵓⵍⴰ ⵓⵙⵎⵖⵔ ⵏ ⵜⵓⵜⵔⴰ ⴷ ⵓⵃⵟⵟⵓ ⵏ ⵡⴰⵜⵉⴳ ⵏ ⵉⵙⵏⴼⵍⵏ ⵖ ⵍⵎⵖⵔⵉⴱ, ⵙ ⵓⵙⵉⵜⵜⵉ ⵏ ⵓⴼⵔⵓ ⵙ ⵓⴷⵔⵉⵎ ⴰⵏⵣⵎⴰⵔ.
ⵍⵍⵉⵖ ⵉⵍⵍⴰ ⵓⵎⴹⴰⴽⴰⵕ ⴼ ⵓⵙⵏⴼⴰⵔ ⴰⴷ, ⵣⵎⵎⵉⵎⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵉⴳⵏⵙⴰⵙ ⵏ ⵜⵔⵓⴱⴱⴰ ⴷ ⵜⴳⵔⵓⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵎⴰⵙ ⴱⴰⵀⵔⴰ ⵉⵜⵜⵓⴹⵕⵕⴰ ⵢⵉⴳⵔ ⵏ ⵜⵎⴰⵍⵍⴰⵢⵜ ⴷ ⵡⴰⵙⵙⴰⵢ ⵏ ⵉⴳⵏⵏⴰ ⵖ ⴽⵓ ⵉⴳⵔⴰⵏ ⵉⴷⵎⵙⴰⵏⵏ ⵙ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵖⵎⴽ ⴰⵏⵏ ⵓⵍⴰ ⵜⵉⵏⵉⴹⵉ ⴷ ⵜⴷⵎⵙⴰ ⵜⴰⵏⴰⵎⵓⵏⵜ.
ⴼⴽⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵜⵉⵙⵓⵎⴰⵔ ⵏ ⵓⵙⵙⵉⴷⵔ ⵏ ⵢⵉⴳⵔ ⵏ ⵜⵎⴰⵍⵍⴰⵢⵜ ⵖ ⵉⵍⵍⴰ ⵓⵙⵎⵖⵔ ⵏ ⵜⵎⴰⵍⵍⴰⵢⵜ ⵜⴰⴳⵯⵏⵙⴰⵏⵜ ⴷ ⵓⵙⵙⵔⵇⴱ ⵏ ⵜⵙⵎⵓⵔⵜ ⵏ ⵓⵢⴰⴼⵓ ⴰⵎⵖⵔⵉⴱⵉ. ⵉⵏⵉⵏ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵓⵙⵡⵉⵏⴳⵎ ⵖ ⴷⴰⵜ ⵏ ⵜⴰⵙⵙⴰⵙⵜ ⵙ ⵜⵎⵢⴰⴷⴰⵙⵜ ⵜⴰⵎⴰⵜⴰⵢⵜ ⵏ ⵓⵙⵎⵖⵔ ⵏ ⵢⵉⴳⵔ ⵏ ⵜⵎⴰⵍⵍⴰⵢⵜ ⴷ ⵢⵉⴳⵔ ⵏ ⵜⵏⵉⴹⵉ ⴷ ⵜⴷⵎⵙⴰ ⵜⴰⵏⴰⵎⵓⵏⵜ ⴷ ⵉⴳⵔⴰⵏ ⵢⴰⴹⵏⵉⵏ ⵍⵍⵉ ⴷⵉⴷⵙⵏ ⵣⴷⵉⵏⵉⵏ.
ⵜⵓⵎⴰⵢⵉⵏ ⵏ ⵓⴹⵕⵉⵚ ⴰⴷ ⴰⵣⵔⴼⴰⵏ ⵀⵎⵎⴰⵏⵜ ⵢⴰⵜ ⵜⵉⵣⵉ ⵙⵇⵇⵉⵇⵏ ⵙ ⵜⴼⴰⴷⵉⵡⵉⵏ ⴼⴰⵡⵏⵉⵏ, ⵉⵥⵍⵉ ⵙ ⵜⵎⵖⵓⵏⵉⵏ ⵏ ⵉⵎⵓⴷⴷⵓⵜⵏ ⴷ ⵜⵣⴷⵓⵖⵉⵏ ⵏ ⵜⵎⴰⵍⵍⴰⵢⵜ ⴷ ⵜⵎⵖⵓⵏⵉⵏ ⵏ ⵡⴰⵙⵙⴰⵢ ⵏ ⵉⴳⵏⵏⴰ ⵏ ⵉⵏⵎⵓⴷⴷⴰ ⵉⵍⵍⴰⵏ ⵖ ⵜⵉⵣⵉ ⵙⴳ ⵜⵉⵣⵡⵉⵔ ⵏ ⵎⴰⵕⵚ 2020 ⴰⵔ ⵛⵓⵜⴰⵏⴱⵉⵔ 2020, ⵍⵍⵉ ⵉⵜⵜⵓⴽⴽⴰⵙⵏ ⵖ ⵓⵣⵎⵣ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⴽⵓⴼⵉⴷ 19.