ⴰⵙⵉⵔⴰ(2016-2021):
ⴰⵙⵉⵡⴹ ⵏ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 30 ⵢⵓⵏⵢⵓ 2020
|
ⴰⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵔ ⵉⵙⴼⵓⴳⵍⵓ ⴰⵙⵙ ⴰⴳⵔⴰⵖⵍⴰⵏ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ,ⵉⵙⵙⴽⵜⵉ ⴷ ⵙ ⵓⴱⵓⵔⵣ ⵜⵓⴳⴳⵓⵥⵜ ⵜⴰⵎⴰⵜⵜⵓⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵙ ⵜⵎⵔⵙⵍⵜ ⵜⴰⴱⵕⵍⴰⵎⴰⵏⵉⵜ. ⴰⵙⵉⵔⴰ ⵏ ⵓⵙⵇⵇⵉⵎ ⵉⵙⵓⵜⴳ ⴱⴰⵀⵔⴰ ⵜⵓⴳⴳⴰⵙ ⵏ ⵜⴳⵎⴰⵎⵉⵏ ⴷ ⵉⴳⵎⴰⵎⵏ ⵏ ⵓⵙⵇⵇⵉⵎ ⵖ ⵓⵣⵎⵣ ⵏ ⵓⴱⴰⵢⵢⵓⵕ, ⵉⵙⵓⵜⴳ ⵓⵍⴰ ⵉⵎⴰⵏ ⵏ ⵓⵎⴽⵕⴰⴹ ⴰⵏⴰⵎⵓⵔ. |
ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⵏⵏⵙ ⵜⴰⵏⵎⵍⴰⵙⵙⵜ ⵙ ⵜⵏⵙⵙⵉⵅⴼⵜ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵙⵙ ⵏ ⵓⵙⵉⵏⴰⵙ 30 ⵢⵓⵏⵢⵓ 2020, ⵜⵥⵍⵉ ⵉ ⵜⵉⴹⴰⴼ ⴷ ⵓⵣⵣⵔⴰⴼ.
ⵖ ⵜⵣⵡⵉⵔⵉ ⵏ ⵜⵙⵎⵓⵏⵉ, ⵉⵙⵙⴽⵜⵉ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⴳⵎⴰⵎⵏ ⵏ ⵓⵙⵉⵔⴰ ⵙ ⵡⴰⵜⵉⴳ ⵏ ⵜⵉⵣⵉ ⵜⴰⵎⵣⵔⴰⵢⵜ ⵍⵍⵉ ⵉⵙⴼⵓⴳⵍⵓ ⵓⵎⴰⴹⴰⵍ ⵙ ⵜⵎⵍⴷⴰ ⵏ ⵡⴰⵙⵙ ⴰⴳⵔⴰⵖⵍⴰⵏ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ, ⵜⴳⴰ ⵜⵉⵣⵉ ⵏ ⵓⵎⵣⵔⵓⵢ ⴼ ⵉⴱⵔⵉⴷⵏ ⵍⵍⴰⵏⵉⵏ ⵖ ⵓⵚⴽⵓ ⴷ ⵜⵖⵏⵙⴰ ⵉⴷⵉⵎⵇⵔⴰⵟⵉⵢⵏ, ⵜⵎⵍⵉ ⴷ ⵜⵉⵔⴰⵜ ⵏ ⵉⵎⴰⴷⴰⵏⵏ ⵉ ⵓⵙⴽⵔ ⵏ ⵜⴷⵔⴼⵉⵜ ⴷ ⵢⵉⵙⴽⵉⵍ ⴷ ⵜⴳⵎⵉ ⵜⴰⵙⵓⵍⴰⵏⵜ.
ⵖⵎⴽ ⵍⵍⵉ ⴷ ⵉⵙⵙⴽⵜⵉ ⵓⵙⵉⵔⴰ ⵏ ⵓⵙⵇⵇⵉⵎ ⵙ ⴽⵉⴳⴰⵏ ⵏ ⵓⴱⵓⵔⵣ ⵜⵓⴳⴳⵓⵥⵜ ⵉⵍⵍⴰⵏ ⴷⴰⵔ ⵜⵎⵔⵙⵍⵜ ⵜⴰⴱⵕⵍⴰⵎⴰⵏⵉⵜ ⴷⴰⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ, ⵎⵍⵍⵉⵖ ⵉⵍⵍⴰ ⴱⴰⴱ ⵏ ⵡⴰⴷⴷⵓⵔ ⴼ ⵓⴷⴰⴱⵓ ⵏ ⵉⵎⵣⵡⵓⵔⴰ ⵏⵏⵙ ⵉⴷ ⴱⴰⴱ ⵏ ⵡⴰⴷⴷⵓⵔ, ⵉⴼⴽⴰ ⴰⵜⵉⴳ ⵎⵇⵇⵓⵔⵏ ⵉ ⵜⵎⵔⵙⵍⵜ ⵜⴰⴱⵕⵍⴰⵎⴰⵏⵉⵜ ⵖ ⵜⵉⵏⴰⵡⵉⵏ ⵏⵏⵙ ⵜⵉⵎⴰⵜⵜⵓⵢⵉⵏ ⵖ ⵉⵍⵍⴰ ⵓⵙⵡⴰⵍⴰ ⴷ ⵜⵓⴳⴳⵓⵥⵜ, ⵢⵉⵔⵉ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵃⴼⴹ ⵕⴱⴱⵉ ⴰⴷ ⵉⵍⴽⵎ ⵓⴱⵕⵍⴰⵎⴰⵏ ⴰⴼⴰ ⵏ ⵓⵚⴽⵓ ⴰⴷⵉⵎⵓⵇⵔⴰⵟⵉ, ⵖ ⵓⵙⴰⵜⵉ ⵏ ⵜⵎⵙⴽⵔⵜ ⵜⴰⴱⵕⵍⴰⵎⴰⵏⵉⵜ ⵉⵥⵉⵍⵏ ⵖ ⵉⵍⵍⴰ ⵓⵙⵖⵓⵏ ⵙ ⵡⴰⴷⴰⵙ ⵙ ⵍⵎⵖⵔⵉⴱ ⵉⴷⵔⴰⵏ ⴷ ⵓⵙⵙⴼⵍⴷ ⵉⵣⵣⵉⴳⵣⵏ ⵉ ⵉⵏⴰⵔⵓⵣⵏ ⴷ ⵉⵅⵎⵎⵉⵎⵏ ⵏ ⵉⵏⵎⵓⵔⴰⵏ ⴷ ⵜⵉⵏⵎⵓⵔⴰⵜⵉⵏ.
ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵃⴼⴹ ⵕⴱⴱⵉ, ⵖ ⵜⴱⵔⴰⵜ ⵜⴰⵎⴰⵜⵜⵓⵢⵜ ⵉ ⵉⵎⴷⵔⴰⵡⵏ ⵖ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵏ ⵓⵙⴼⵓⴳⵍⵓ ⵏ ⵓⴽⵜⵜⴰⵢ ⵡⵉⵙ 50 ⵏ ⵓⵙⴽⵔ ⵏ ⵓⴱⵕⵍⴰⵎⴰⵏ ⵖ ⵍⵎⵖⵔⵉⴱ:" ⵍⵍⴰⵏ ⵉⵙⴳⵓⴷⵉⵢⵏ ⵓⵎⵏⵉⴳⵏ ⵖ ⵜⵎⵔⵙⵍⵜ ⴰⴷ ⵜⴰⴷⵙⵜⴰⵔⵜ ⵙⴳ ⵓⴳⴳⴰⵔ ⵏ ⵡⴰⵣⴳⵏ ⵏ ⵜⴰⵙⵓⵜ ⵏ ⵓⵎⵣⵔⵓⵢ, ⵜⵥⴹⴰⵕ ⴳⵉⵙ ⵜⵎⴰⵣⵉⵔⵜ ⵏⵏⵖ ⴰⴷ ⵜⵙⵙⴷⵓⵙ ⵜⵉⵔⵙⴰⵍ ⵏ ⵜⴷⵉⵎⵓⵇⵔⴰⵟⵉⵜ ⵏ ⵜⴳⵏⵙⴰⵙⵜ...ⵍⵍⵉⵖ ⵉⴳⴰ ⵓⴱⵕⵍⴰⵎⴰⵏ ⵙ ⵓⵎⵣⵔⵓⵢ ⵏⵏⵙ ⴰⵇⴱⵓⵔ ⴰⵙⴰⵢⵔⵓⵔ ⵏ ⵓⵙⵎⵓⵜⵜⴳ ⵏ ⵜⵓⴼⵔⵉⵏⵉⵏ ⵜⵉⵙⵔⵜⴰⵏⵉⵏ ⵜⵉⵏⴰⵎⵓⵔⵉⵏ ⴷ ⵓⵙⴰⵜⵉ ⵏ ⵓⵎⴹⴰⴽⴰⵕ ⴷ ⵓⵙⵏⴼⵍ ⵏ ⵜⴰⵏⵏⴰⵢⵉⵏ ⴷ ⵓⵎⵣⴰⵔⴰⵢ ⵏⵏⵙⵏⵜ, ⵙⵡⴰ ⴷ ⵜⵏⴱⴰⴹⵜ ⵏⵖ ⵏⴳⵔ ⵜⵓⴳⵜ ⴷ ⵜⵓⵣⵍⵜ". ⵉⵙⵎⴷ ⵡⴰⵡⴰⵍ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.
ⵜⴳⴰ ⵜⵎⵍⴷⴰ ⴰⴷ ⴰⵣⵎⵣⵣⵓ ⵖ ⵓⵙⵙⴽⵜⵉ ⵏ ⵎⴰ ⴷ ⵉⵙⴽⵔ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵜⵉⵣⵉ ⵏ ⵓⴱⴰⵢⵢⵓⵕ ⵙ ⵓⴹⴼⵕ ⵏⵏⵙ ⵉⵍⵍⴰⵏ ⵏ ⵉⵏⴰⵔⵓⵣⵏ ⵏ ⵉⵏⵎⵓⵔⴰⵏ ⴷ ⵜⵉⵏⵎⵓⵔⴰⵜⵉⵏ ⵙ ⵜⵉⴹⴰⴼ ⵉⵙⵓⵍⵏ ⵏ ⵜⵏⴱⴰⴹⵜ ⴷ ⵓⵙⵓⴼⵖ ⵏ ⵉⵣⵣⵔⴰⴼⵏ ⵍⵍⵉ ⴷ ⵉⵡⵉⵏⵜ ⵜⵎⵙⵓⵜⵍⵉⵏ ⴰⴷ ⵥⵍⵉⵏⵉⵏ ⵃⵎⴰ ⴰⴷ ⴰⵙⵏⵜ ⵜⵜⵓⴼⴽⵉⵏⵜ ⵜⵎⵔⴰⵔⵓⵜⵉⵏ ⴷ ⵓⵍⴳⴳⵓⴷ.
ⵙ ⵜⵎⵍⴷⴰ ⴰⴷ, ⵉⵙⵓⵜⴳ ⵓⵏⵙⵙⵉⵅⴼ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⵉⵎⴰⵏ ⴰⵏⴰⵎⵓⵔ ⵢⴰⵜⵜⵓⵢⵏ ⵍⵍⵉ ⴷ ⵎⵍⴰⵏ ⴽⵓ ⵉⵎⵖⵔⴰⴱⵉⵢⵏ, ⴷ ⵉⵎⴰⵏ ⵏ ⵜⵡⵉⵣⵉ ⴷ ⵜⴳⵯⵎⴰⵜ ⵍⵍⵉ ⵙⴽⵔⵏ ⵖⵎⴽ ⴰⵏⵏ ⴷ ⴽⵓ ⵜⵉⴳⵎⴰⵎⵉⵏ ⴷ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙⵙⴽⵜⵉⵏ ⴷ ⵓⵍⴰ ⵜⵉⵏⴰⵥⴰⵕⵉⵏ ⵍⵍⴰⵏⵉⵏ ⵉ ⵓⵙⵎⵖⵔ ⵏ ⵉⴳⵔⴰⵏ ⵉⵏⴰⵎⵓⵏⵏ ⴷ ⵉⵏⴳⵔⴰⵡⵏ ⵉⴷⵓⵙⴰⵏⵏ ⴷ ⵓⵙⴽⵔ ⵏ ⵢⵉⵙⴽⵉⵍ ⴷ ⵓⵍⴰⵍⵍⵓ, ⵉⴳⴰ ⵍⵃⴰⵍ ⵜⵓⴳⴳⴰⵙ ⵜⵉⵏⴰⵎⵓⵔⵉⵏ ⵓⵎⴰⵏⵉⵏ ⵖ ⵉⵟⵟⴰⴼ ⵓⵙⵇⵇⵉⵎ ⵏ ⵉⵎⵓⵔⴰ ⵢⴰⵏ ⵓⴷⵖⴰⵔ ⴰⵏⴰⵎⵎⴰⵙ ⵙ ⵉⵎⴰⵙⵙⵏ ⵏⵏⵙ ⵉⴷⵙⵜⴰⵔⵏ ⵖ ⵉⴳⵔⴰⵏ ⵏ ⵓⵣⵣⵔⴰⴼ ⴷ ⵜⵉⴹⴰⴼ ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ.
ⵉⵙⴰⵡⵍ ⵓⵏⵙⵙⵉⵅⴼ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⵙ ⴽⵓ ⵉⴼⵔⴷⴰⵙ ⵏⵏⵙ ⵉⵙⵔⵜⴰⵏⵏ ⵙ ⵓⴱⵓⵔⵣ ⴷ ⵓⵙⵓⵜⴳ ⴼ ⵜⵎⴰⵙⴰⵢⵉⵏ ⵍⵍⵉ ⴷⴰⵔⵙ ⴷ ⵡⴰⴷⴷⵓⵔ ⴳⵉⵙⵏⵜ ⵉⵍⵍⴰⵏ ⵖ ⵜⵡⵓⵔⵉ ⵉ ⵜⵎⵔⵙⵍⵜ ⵜⴰⵣⵣⵔⴰⴼⵜ ⴷ ⵜⵎⵙⴰⵔⵉⵏ ⴰⵜⵜⵓⵢⵏⵉⵏ ⵏ ⵜⵎⵓⵔⵜ, ⵙⴷⴷⵉⴷⵏ ⵎⴰⵙ ⴱⴷⴷⵏ ⴼ ⵜⵣⵣⵉⴳⵣⵜ ⵏ ⵜⴱⵔⴰⵜ ⵏⵏⵙⵏ ⵉⵥⵉⵍⵉⵏ ⵙ ⴰⵢⵍⵍⵉ ⵜⵙⵉⴳⴳⵉⵍ ⵖ ⵜⵓⴳⴳⴰⵙ ⴷ ⵓⵙⴼⴰⵙⴽⴰ.
ⵖ ⵜⵡⵓⵔⵉ ⵏ ⵜⵉⴹⴰⴼ: ⵉⵙⵏⵎⴰⵍⴰ ⵓⵙⵉⵔⴰ ⵏ ⵓⵙⵇⵇⵉⵎ ⴷ ⵉⵙⵔⵙ ⴰⵖⴰⵡⴰⵙ ⵏ ⵜⵡⵓⵔⵉⵡⵉⵏ ⵏ ⵜⵖⵉⵎⵉⵜ ⵜⴰⵏⵎⵍⴰⵙⵙⵜ ⵏ 6 ⵢⵓⵍⵢⵓⵣ 2020 ⵉⵥⵍⵉⵏ ⵙ ⵉⵙⵇⵙⵉⵜⵏ ⵉⵎⵉⵡⴰⵏⵏ. ⵖⵎⴽ ⵍⵍⵉ ⵉⵥⵕⴰ ⴷ ⵢⴰⵣⵏ ⵉ ⵜⵙⵇⵇⵉⵎⵉⵏ ⵥⵍⵉⵏⵉⵏ ⵎⵏⵏⴰⵡ ⵉⴹⵕⵉⵚⵏ ⵉⵣⵣⵔⴰⴼⵏ: ⴰⵙⵏⴼⴰⵔ ⵏ ⵓⵙⵍⴳⵏ ⵏ ⵓⵏⴳⵔⴰⵡ ⴰⴷⵙⵍⴰⵏ ⵏ ⵜⵎⵚⵕⴰⵢ ⵏ ⵓⵙⵖⵏⵣⵉ ⴷ ⵜⵎⴳⵓⵔⵉ ⴷ ⵜⵏⵓⴼⴰ, ⴷ ⵜⵙⵓⵎⵔⵜ ⵏ ⵓⵙⵍⴳⵏ ⵏ ⵓⵙⴽⵔ ⵏ ⵜⵎⵔⵙⵍⵜ ⵏ ⵍⴱⴰⵏⴽ ⴰⵎⵙⴰⴷⵓⵔ ⵉ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵙⵢⴰⴼⵓⵜⵏ. ⴽⵕⴰⴹⵜ ⵜⵙⵓⵎⵔⵉⵏ ⵜⵉⵎⴰⴷⴷⴰⵙⵉⵏ ⵣⴷⵉⵏⵉⵏ ⴷ ⵜⵎⵏⴰⴹⵉⵏ ⴷ ⵜⵎⵏⴱⴰⴹⵉⵏ ⴷ ⵜⵙⴳⵉⵡⵉⵏ ⴷ ⵜⴳⵔⴰⵡⵉⵏ ⵉ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ.
ⵖ ⵜⵙⵎⵉⴳⴰⵍ ⵏ ⵓⵙⴰⴳⴳⵯ: ⵉⵎⴹⴰⴽⴰⵕ ⵓⵙⵉⵔⴰ ⵏ ⵓⵙⵇⵇⵉⵎ ⴼ ⵜⵢⴰⴼⵓⵜ ⵏ ⵜⵡⵓⵔⵉ ⵏ ⵜⵙⵇⵇⵉⵎⵉⵏ ⵖ ⵓⵎⵏⵉⴷ ⴰⴷ, ⵉⴱⴷⴷ ⴼ ⴽⵉⴳⴰⵏ ⵏ ⵜⴰⵏⵏⴰⵢⵉⵏ ⵥⵍⵉⵏⵉⵏ ⴷ ⵜⴱⵔⵉⴷⵜ ⴷ ⵜⵎⵙⴽⴰⵔ ⵙ ⵜⵣⴷⴰⵢⵜ ⴷ ⵜⵓⵎⴰⵢⵉⵏ ⵏⵏⵙⵏⵜ ⵖⵎⴽ ⵍⵍⵉ ⵍⵍⴰⵏⵜ ⵖ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵍⵍⵉⵖ ⵍⵍⴰⵏⵜ ⵜⵎⵙⵓⵜⵍⵉⵏ ⵥⵍⵉⵏⵉⵏ ⵍⵍⵉ ⵓⵔ ⵓⵊⵊⵉⵏⵉⵏ ⴰⵙⵎⴰⴷ ⵏ ⵉⵏⵇⵇⵉⵙⵏ ⵥⵍⵉⵏⵉⵏ ⵙ ⵜⵙⵎⵉⴳⴰⵍ ⴰⴷ, ⵉⴼⴼⵖ ⵓⵙⵉⵔⴰ ⴰⴷ ⵓⵔ ⵜⵜⵔⵙⵏ ⵉⵏⵇⵇⵉⵙⵏ ⴰⴷ ⴰⵔ ⵜⵉⴳⵉⵔⴰ ⵏ ⵜⵙⵓⵜⵍⵜ ⴰⴷ.