ⴰⵙⵉⵡⴹ ⵏ ⵜⵙⵎⵓⵏⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⵢⵏⴰⵙ 23 ⵏⵓⵡⴰⵏⴱⵉⵔ 2020

ⵉⵙⵏⵎⴰⵍⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵜⴰⵙⵎⵓⵏⵉ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⵢⵏⴰⵙ 23 ⵏⵓⵡⴰⵏⴱⵉⵔ 2020, ⵜⵥⵍⵉ ⵉ ⵜⵉⴹⴰⴼ ⴷ ⵓⵣⵣⵔⴰⴼ ⴷ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ.

ⵖ ⵜⵉⴹⴰⴼ, ⵉⵍⵍⴰ ⵓⵎⵙⴰⵛⴽⴰ ⴰⴷ ⵜⵉⵍⵉ ⵜⵖⵉⵎⵉⵜ ⵏ ⵜⵙⵔⵜⵉⵜ ⵜⴰⵎⴰⵜⴰⵢⵜ ⴼ “ⵉⵖⴰⵡⴰⵙⵏ ⵓⵏⴳⵉⵎⵏ ⵏ ⵜⵙⴳⴳⵉⵡⵉⵏ ⵏ ⵉⴼⴼⵓⵙ”, ⵜⴳ ⵜⴰⵎⵍⴷⴰ ⵖ ⵙⴷⴷⵉⴷⵏ ⵉⴼⵔⴷⴰⵙ ⵏ ⵓⵙⵇⵇⵉⵎ ⴰⵙⵎⵓⵙⵙⵓ ⵉⵎⵓⵏⵏ ⴷ ⵓⵎⴰⴽⵕⴰⴹ ⴰⵏⴰⵎⵓⵔ ⴷ ⵓⵙⵓⵜⴳ ⵏ ⵜⵖⵜⴰⵙⵉⵏ ⵜⵓⵏⵥⵉⵥⵉⵏ ⵏ ⵍⵎⵖⵔⵉⴱ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵖⵎⴽ ⵍⵍⵉ ⵙⴷⴷⵉⴷⵏ ⴼ ⵡⴰⵜⵉⴳ ⵏ ⵓⵖⴰⵡⴰⵙ ⴰⴷ ⵓⵏⴳⵉⵎ ⵍⵍⵉⵖ ⵉⴳⴰ ⴰⵙⵏⴼⴰⵔ ⵉⵙⵎⵓⵏⵏ ⴽⵉⴳⴰⵏ ⵏ ⵉⴳⵔⴰⵏ ⵙ ⵜⵥⴹⴰⵕⵉⵏ ⵙⵜⴰⵡⵀⵎⵎⴰⵏⵉⵏ.

ⴼ ⵓⵖⴰⵡⴰⵙ ⵙ ⵜⵉⴹⴰⴼ ⵜⴰⵏⵎⵍⴰⵙⵙⵜ, ⵙ ⵜⵓⵇⵍⴰ ⵙ ⵜⵖⵜⴰⵙⵜ ⵏ ⵓⵙⵉⵔⴰ ⵏ ⵓⵙⵇⵇⵉⵎ, ⵉⵍⵍⴰ ⵓⵎⵙⴰⵛⴽⴰ ⴼ ⵉⴳⵔⴰⵏ ⵏ ⵜⴳⵯⵏⵙⴰⵏⵜ ⴷ ⵜⴼⵍⵍⴰⵃⵜ ⴷ ⵓⵙⴳⵎⵉ ⴰⵏⴰⵎⵓⵔ ⵉ ⵡⴰⵙⵙ ⵏ 7 ⴷⵓⵊⴰⵏⴱⵉⵔ 2020 ⴷ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵓⵙⵖⵏⵣⵉ ⴷ ⵜⵎⴳⵓⵔⵉ ⴷ ⵜⴷⵎⵙⴰ ⵜⴰⵣⴳⵣⴰⵡⵜ ⴷ ⵜⵎⵓⵟⵟⵓⵏⵜ ⴷ ⵓⵎⴰⵡⴰ ⴷ ⵡⴰⵙⵙⴰⵢ ⴷ ⵍⵓⵊⵉⵙⵜⵉⴽ ⴷ ⵡⴰⵎⴰⵏ ⵉ ⵡⴰⵙⵙ ⵏ 14 ⴷⵓⵊⴰⵏⴱⵉⵔ 2020.

ⵜⵎⴷⴰⵡⴰⵍ ⵜⵙⵎⵓⵏⵉ ⵓⵍⴰ ⴼ ⵓⵙⵡⵓⴷⴷⵓ ⵏ ⵜⵖⵉⵎⵉⵜⵉⵏ ⵜⵉⵏⵎⴰⵍⴰⵙⵙⵉⵏ ⵉ ⴽⵉⴳⴰⵏ ⵏ ⵓⵏⵢⴰⵍⴽⴰⵎ ⵏⴳⵔ ⵓⵙⵇⵇⵉⵎ ⴷ ⵜⵏⴱⴰⴹⵜ ⵙ ⵜⵎⵔⴰⵔⵓⵜⵉⵏ ⴷ ⵉⵅⴼⴰⵡⴰⵍⵏ.

ⵙⴷⴷⵉⴷⵏ ⵉⵎⴷⵔⴰⵡⵏ ⵓⵍⴰ ⴼ ⵡⴰⵜⵉⴳ ⵏ ⵉⵎⵔⵙⵉⵡⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵖ ⵓⵙⴰⵜⵉ ⵏ ⵓⵎⵏⵏⵉ 152 ⵏ ⵓⵏⴳⵔⴰⵡ ⴰⴳⵯⵏⵙⴰⵏ, ⵉⵇⵇⴰⵏ ⴷ ⴰⴷ ⴳⵉⵙⵏ ⵜⵅⵎⵎⵉⵎ ⵜⵏⴱⴰⴹⵜ.

ⴼ ⵜⵖⵉⵎⵉⵜⵉⵏ ⵏ ⵓⵣⵣⵔⴰⴼ, ⵉⵍⵍⴰ ⵓⵎⵙⴰⵛⴽⴰ ⴰⴷ ⵢⵉⵍⵉ ⵓⵙⵏⴼⴰⵔ ⵏ ⵓⵙⵍⴳⵏ ⵉⵣⴷⵉⵏ ⴷ ⵓⴼⵓⴽⴽⵓ ⵏ ⵓⵙⴳⴳⵯⴰⵙ ⴰⵥⵕⴼⴰⵏ 2018 ⵖ ⵢⴰⵜ ⵖ ⵜⵖⵉⵎⵉⵜⵉⵏ ⴷ ⵓⵛⴽⴰⵏⵉⵏ.

ⴼ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ, ⵥⵕⴰⵏ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵙⵏⴰⵜ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵉⵎⴰⴷⴷⴰⵙⵏ ⴼ ⵜⵓⵍⴽⵉⵎⵉⵏ ⴷ ⵜⵓⵜⵔⵉⵡⵉⵏ ⵍⵍⵉ ⵜⵙⵓⵊⴰⴷ ⵜⵙⵇⵇⵉⵎⵜ, ⴼ ⵜⵢⴰⴼⵓⵜ ⵏ ⵡⴰⵙⵙ ⵏ ⵜⵖⵓⵔⵉ ⵍⵍⵉ ⴰⴷ ⵉⵙⴽⵔ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵓⵜⵔⵉⵡⵉⵏ ⵏ ⴽⵓ ⵉⵎⵙⴽⴰⵔⵏ ⵉ ⵓⴼⵓⵖ ⵏ ⵜⵙⴰⵡⵓⵔⵜ ⴰⴷ ⵜⴰⴷⵉⵎⵓⵇⵔⴰⵟⵉⵜ ⵉⵙⵜⴰⵡⵀⵎⵎⴰⵏ.

ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴼ ⵡⴰⵜⵉⴳ ⵏ ⵙⵏⴰⵜ ⵜⵙⵓⵎⵔⵉⵏ ⴰⴷ, ⵉⵎⵍ ⵜⵉⵎⵙⴽⴰⵔ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴷⴰⵔ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴷ ⵎⴰⵙⵙ ⴰⵎⴰⵡⴰⵙⴰⵙ ⵏ ⵓⵡⴰⵏⴽ ⵉⵜⵜⵓⵙⵎⴰⴳⴰⵍⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵣⴷⴰⵢⵉⵏ ⴷ ⵓⴱⵕⵍⴰⵎⴰⵏ ⵃⵎⴰ ⴰⴷ ⵜⵉⵍⵉ ⵜⵙⵇⵇⵉⵎⵜ ⵉⵜⵜⵓⵛⵔⴰⴽⵏ ⵉ ⵓⵎⵙⴰⵛⴽⴰ ⴼ ⵜⵓⵏⵖⵉⵍⵜ ⵉⵎⵙⴰⵙⴰⵏ.

ⵖ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ ⴷ ⵜⵎⵙⴽⴰⵔ ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⴷ ⵉⴼⵔⴷⴰⵙ ⵏ ⵓⵙⵇⵇⵉⵎ ⴼ ⵜⵡⵓⵔⵉ ⵜⴰⵡⵓⵙⵙⴰⵏⵜ ⵉⵜⵜⵓⵙⴽⴰⵔⵏ ⵖ ⵓⵙⵡⵓⴷⴷⵓ ⵏ ⵜⴰⵙⵙⴰⵙⵜ  ⴰⴷ ⵜⴰⴷⵓⵙⴰⵏⵜ. ⵜⵜⵓⴼⴽⴰⵏ ⵉⵏⵖⵎⵉⵙⵏ ⴼ ⵓⵙⵙⵖⵓⵙ ⵢⵓⵎⴰⵏ ⵏ ⵜⴷⴰⵍⴰ ⵏ ⵜⵖⵉⵎⵉⵜⵉⵏ ⴷ ⵜⵙⵇⵇⵉⵎⵉⵏ ⴷ ⵉⵙⵉⵔⴰⵜⵏ ⴷ ⵓⴹⴼⵕ ⵏ ⵉⵎⵓⴹⴰⵏ ⴷ ⵜⵎⵙⴽⴰⵔ ⵏ ⵜⵎⵙⵙⵓⴳⵓⵔⵜ ⴷ ⵡⴰⵔⴰⵢ.

ⵃⵎⴰ ⴰⴷ ⵣⵣⵉⴳⵣⵏⵜ ⵜⵓⴳⴳⴰⵙ ⴰⴷ, ⵉⵍⵍⴰ ⵓⵎⵙⴰⵛⴽⴰ ⴼ ⵓⵙⵓⵊⴷ ⵏ ⵓⵖⴰⵡⴰⵙ ⵉⵙⵎⴷⵏ ⵏ ⵡⴰⵔⴰⵢ ⵙ ⵓⵣⴷⴷⵓⵢ ⴷ ⵜⵎⴰⵡⴰⵙⵜ ⵏ ⵜⴷⵓⵙⵉ.