ⴰⵙⵉⵔⴰ(2016-2021):
ⴰⵙⵉⵡⴹ ⵏ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵡⴰⵙ 21 ⵎⴰⵢⵢⵓ 2020
ⵉⵙⵏⵎⴰⵍⴰ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⵏⵏⵙ ⵜⴰⵏⵎⵍⴰⵙⵙⵜ ⵙ ⵜⵏⵙⵙⵉⵅⴼⵜ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵙⵙ ⵏ ⵓⴽⵡⴰⵙ 21 ⵎⴰⵢⵢⵓ 2020, ⵉⵥⵍⵉ ⵓⵖⴰⵡⴰⵙ ⵏⵏⵙ ⵏ ⵜⵡⵓⵔⵉ ⵉ ⵜⵉⴹⴰⴼ ⴷ ⵓⵣⵣⵔⴰⴼ ⴷ ⵜⵎⵙⴰⵔⵉⵏ ⵢⴰⴹⵏⵉⵏ.
ⵖ ⵜⵣⵡⵉⵔⵉ ⵏ ⵜⵙⵎⵓⵏⵉ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⴼ ⵡⴰⵜⵉⴳ ⵎⵇⵇⵓⵔⵏ ⵉⵍⵍⴰⵏ ⴷⴰⵔ ⵜⵖⵉⵎⵉⵜ ⵍⵍⵉ ⵉⵙⵏⵎⴰⵍⴰ ⵓⵙⵇⵇⵉⵎ, ⵖ ⵓⵎⴹⴰⴽⴰⵕ ⵏ ⵉⵙⵉⵙⴼⵉⵡⵏ ⵍⵍⵉ ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⴼ ⵓⵥⵍⴰⵢ ⴰⴷⵓⵙⴰⵏ ⴷⴼⴼⵉⵔ ⵏ 20 ⵎⴰⵢⵢⵓ, ⵍⵍⵉⵖ ⵜⴳⴰ ⴰⵣⵎⵣⵣⵓ ⵏ ⵓⵣⵣⵔⴰⵢ ⵏ ⵜⵡⵓⵔⵉ ⵏ ⵜⵏⴱⴰⴹⵜ, ⵜⵜⵓⴼⴽⵉⵏⵜ ⵓⵍⴰ ⴽⵉⴳⴰⵏ ⵏ ⵜⵙⵓⵎⴰⵔ ⴷ ⵉⵙⵖⵍⴰⴼ ⵀⵎⵎⴰⵏⵉⵏ ⵉⴳⵔⴰⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⵏⴼⴳⴰⵏⵏ. ⵖⵎⴽ ⵍⵍⵉ ⵙⴷⴷⵉⴷⵏⵜ ⴰⴷ ⵢⵉⵍⵉ ⴽⵉⴳⴰⵏ ⵏ ⵓⵙⵎⵓⵙⵙⵓ ⴰⵏⴰⵎⵓⵔ ⵉ ⵓⵙⵎⵔⵙ ⵏ ⵓⴱⵔⵉⴷ ⵍⵍⵉ ⵉⵙⵜⵉ ⵍⵎⴰⵖⵔⵉⴱ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ.
ⵖⵎⴽ ⵍⵍⵉ ⵜⵎⴷⴰⵡⴰⵍ ⵜ ⵜⵙⵎⵓⵏⵉ ⴼ ⵜⴼⵔⴽⵉⵡⵉⵏ ⵍⵍⵉ ⴷ ⵢⵓⵛⴽⴰⵏ ⵖ ⵜⵡⵓⵔⵉ ⵏ ⵓⵙⵇⵇⵉⵎ, ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵥⵍⵉⵏ ⵙ ⵜⵖⵔⵉ ⴷ ⵓⵎⴹⴰⴽⴰⵕ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⴰⵥⵕⴼⴰⵏ ⵉⵜⵜⵓⵙⵏⴼⴰⵍⵏ ⵍⵍⵉ ⵉⵜⵜⵓⵏⵏⴰⵏ ⵖ ⵓⵙⵎⵏⵉⴷ ⵏ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵍⵍⵉ ⴼ ⵔⴰⴷ ⵉⵍⵉⵏ ⵉⵎⵛⴰⵡⴰⵕⵏ ⴷ ⵉⵎⵓⵍⵍⵉⵜⵏ ⵉⵙⵔⵜⴰⵏⵏ ⴷ ⵉⵏⵎⵓⵍⵍⴰ ⴷ ⵉⵎⵙⴽⴰⵔⵏ ⵉⴷⵎⵙⴰⵏⵏ.
ⵉⴱⴷⴷ ⵓⵙⵉⵔⴰ ⵏ ⵓⵙⵇⵇⵉⵎ ⴼ ⵜⵎⵓⴽⵔⵉⵙⵉⵏ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⵖ ⵓⵙⴰⵜⵉ ⴰⵣⵣⵔⴰⴼ ⵍⵍⵉ ⵜ ⵉⵙⵏⵎⴰⵍⴰⵏ, ⵉⵙⴷⴷⵉⴷ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵓⵣⵣⵔⴰⵢ ⴷ ⵜⵖⵔⵉ ⵏ ⵓⵙⵍⴳⵏ ⴰⴳⵯⵏⵙⴰⵏ ⵖ ⵜⵏⴰⵎⵉⵜ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⴷ ⵜⵎⵙⴽⴰⵔ ⵏ ⵡⴰⵔⴰⵢ ⴷ ⵜⴱⵔⵉⴷⵉⵏ ⵉⵍⵍⴰⵏ ⵖ ⵓⵙⵍⴳⵏ ⴰⴳⵯⵏⵙⴰⵏ ⵙ ⵓⵎⵛⴰⵛⴽⴰ ⵉⵙⵎⴷⵏ ⴷ ⵉⵎⵏⵣⴰⵢⵏ ⵉⴷⵙⵜⴰⵔⵏ, ⵉⵙⵙⵏⵜⵉ ⵓⵙⵉⵔⴰ ⴷ ⵉⴼⵔⴷⴰⵙ ⵏ ⵓⵙⵇⵇⵉⵎ ⴰⵎⴹⴰⴽⴰⵕ ⵏⵏⵙⵏⵜ ⴰⵎⵣⵡⴰⵔⵓ ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵥⵍⵉⵏ ⴷ ⵓⵏⴳⵔⴰⵡⴰ ⵏ ⵉⵙⵇⵙⵉⵜⵏ ⵉⵎⵉⵡⴰⵏⵏ ⴷ ⵓⵙⵏⵎⴰⵍⴰ ⵏ ⵜⵡⵓⵔⵉⵡⵉⵏ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ, ⴷ ⵜⵙⴰⵡⵔⵉⵏ ⵢⴰⴹⵏⵉⵏ.
ⵉⵙⵙⴽⵜⵉ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⵜⵓⴳⴳⴰⵙ ⵜⵉⵏⴰⵎⵓⵔⵉⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵖ ⵓⵣⵎⵣ ⵏ ⵓⵥⵍⴰⵢ ⴰⴷⵓⵙⴰⵏ ⵖ ⵉⵔⵓⵜⵜⵢⵏ ⵏ ⵓⵙⵜⴰⵢ ⴷ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⵍⵍⵉ ⴷ ⵉⴼⴽⴰⵏ ⵉⵙⵍⴳⵏⵏ ⵙ ⵜⵉⵕⵡⵉ ⴷ ⵓⵍⴳⴳⵓⴷ ⵜⵙⵉⴳⴳⵉⵍ ⵜⴼⵔⴽⴰ ⴰⴷ, ⵖⵎⴽ ⴰⵏⵏ ⴷ ⵜⵉⴹⴰⴼ ⵉⵣⵣⵉⴳⵣⵏ ⴷ ⵉⵙⵓⵍⵏ ⵏ ⵜⵏⴱⴰⴹⵜ ⵍⵍⵉⵖ ⵜⵜⵓⴼⴽⴰⵏ ⵉⵙⵇⵙⵉⵜⵏ ⵉ ⵜⵎⴰⵡⴰⵙⵉⵏ ⵖ ⵉⴳⵔⴰⵏ ⵏ ⵜⴷⵎⵙⴰ ⴷ ⵡⴰⵎⵓⵏ ⴷ ⵜⵏⴼⵔⵓⵜ ⴷ ⵓⵙⵡⵓⴷⴷⵓ ⵣⴷⵉⵏⵉⵏ ⴷ ⵓⵥⵍⴰⵢ ⴰⴷⵓⵙⴰⵏ.
ⵉⵣⵎⵎⵉⵎ ⵓⵙⵉⵔⴰ ⵏ ⵓⵙⵇⵇⵉⵎ ⴰⵜⵉⴳ ⵉⵍⵍⴰⵏ ⴷⴰⵔ ⵉⵏⵎⵓⵇⵇⴰⵔⵏ ⵉⵏⵎⴰⵍⴰⵙⵙⵏ ⵙⵓⵍⵏⵉⵏ ⵍⵍⵉ ⵙⴽⴰⵔⵏⵜ ⵜⵙⵇⵇⵉⵎⵉⵏ ⵖ ⵜⵉⴹⴰⴼ ⴷ ⵓⵣⵣⵔⴰⴼ.
ⵉⵣⵎⵎⵉⵎ ⵓⵙⵉⵔⴰ ⵏ ⵓⵙⵇⵇⵉⵎ ⴰⵜⵉⴳ ⵏ ⵓⵎⴹⴰⴽⴰⵕ ⴰⴳⴷⵓⴷⴰⵏ ⵍⵍⵉ ⴷ ⵉⴼⵍ ⵓⵥⵍⴰⵢ ⴰⴷⵓⵙⴰⵏ, ⵖ ⵉⵡⵙⵏ ⴽⵓ ⵉⴼⵔⴷⴰⵙ ⵏ ⵓⵎⴰⴷⴰⵏ ⴰⵎⵖⵔⵉⴱⵉ ⵙ ⵢⵉⵎⴰⵏ ⵏ ⵜⵎⴰⵙⴰⵢⵜ ⴷ ⵜⵏⵎⵓⵔⵉ ⴷ ⵓⵡⵇⵇⵔ ⵉⵙⵎⴷⵏ ⵏ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ ⵏ ⵜⵎⴰⵣⵉⵔⵜ ⵏⵏⵖ, ⴰⴼⵔⴰⴽ ⴰⴷ ⵓⵔ ⵥⴹⴰⵕⵏ ⴽⵔⴰ ⵏ ⵡⵉⴷ ⴰⴷ ⵙⵙⵉⵣⴷⵉⵔⵏ ⴰⵜⵉⴳ ⵏⵏⵙ ⵏⵜⵜⴰⵏ ⵓⵍⴰ ⵉⵎⴰⵏ ⴰⵏⴰⵎⵓⵔ ⵍⵍⵉ ⵜ ⵉⴼⴽⴰⵏ.
ⵖ ⵓⵎⵏⵉⴷ ⵏ ⵜⵉⴹⴰⴼ, ⵉⴼⴼⵖ ⵓⵙⵉⵔⴰ ⵏ ⵓⵙⵇⵇⵉⵎ ⴰⴷ ⵢⵉⵍⵉ ⵓⵙⵖⵉⵡⵙ ⵏ ⵢⵉⴳⵔ ⵏ ⵜⴼⵍⵍⴰⵃⵜ ⵖ ⵜⵖⵉⵎⵉⵜ ⵏ ⵡⴰⵢⵏⴰⵙ 1 ⵢⵓⵏⵢⵓ ⵙ ⵉⵙⵇⵙⵉⵜⵏ ⵉⴹⴼⵕ ⵓⵎⴹⴰⴽⴰⵕ.
ⵖ ⵓⵎⵏⵉⴷ ⵏ ⵓⵣⵣⵔⴰⴼ, ⵉⵥⵕⴰ ⵓⵙⵉⵔⴰ ⵢⴰⵣⵏ ⵉ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ, ⵜⴰⵙⵓⵎⵔⵜ ⵏ ⵓⵙⵍⴳⵏ ⴰⵎⴰⴷⴷⴰⵙ ⵏ ⵓⵙⵎⴰⴷ ⵏ ⵓⵙⵍⴳⵏ ⴰⵎⴰⴷⴷⴰⵙ ⵉⵣⴷⵉⵏ ⴷ ⵜⴳⵔⴰⵡⵉⵏ, ⴷ ⵜⵙⵓⵎⵔⵜ ⵏ ⵓⵙⵍⴳⵏ ⵉⵣⴷⵉⵏ ⵙ ⵉⵔⴳⴰⵢⵏ ⵏ ⵜⴳⵔⴰⵡⵉⵏ ⵜⵉⴷⵖⴰⵔⴰⵏⵉⵏ, ⵖⵎⴽ ⵍⵍⵉ ⵢⵓⵣⵏ ⵉ ⵜⵙⵇⵇⵉⵎⵜ ⵏ ⵜⵣⵔⴼⵜ ⴷ ⵓⵣⵣⵔⴰⴼ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⵙⵏⴰⵜ ⵜⵙⵓⵎⴰⵔ ⵏ ⵉⵙⵍⴳⵏⵏ ⵥⵍⵉⵏⵉⵏ ⵙ ⵜⵣⴷⴰⵢⵜ ⵏ ⵜⵎⵖⵓⵏⵜ ⵏⴳⵔ ⵓⴽⵔⵔⴰⵢ ⴷ ⵓⵎⵙⵙⵖⴼⵔ.
ⵖⵎⴽ ⵍⵍⵉ ⵉⵥⵕⴰ ⵓⵙⵇⵇⵉⵎ ⵖ ⵜⵙⵎⵓⵏⵉ ⴰⴷ ⴰⵏⵇⵇⵉⵙ ⴰⵏⵖⵔⴰⴼ ⵍⵍⵉ ⵉⵙⴳⴰⴷⴷⴰ ⵓⵙⵇⵇⵉⵎ ⵏ ⵜⵎⵙⵙⵉⴹⵏⵜ, ⵉⵙⵎⵏⵉⴷ ⵜ ⵓⵎⴰⵔⵉ ⴰⵎⵣⵡⴰⵔⵓ ⵏ ⵓⵏⵙⵙⵉⵅⴼ ⵎⴰⵙⵙ ⵙⵓⵍⴰⵢⵎⴰⵏ ⵍⵄⵓⵎⵕⴰⵏⵉ.