ⵉⴷⵔⵓ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴳ ⵏⵢⵓⵢⵓⵔⴽ ⴳ ⵜⵖⵉⵎⵉⵜ ⵏ ⵓⵙⵙⴼⵍⴷ ⵜⴰⴱⵕⵍⴰⵎⴰⵏⵉⵜ ⵜⴰⵙⴳⴳⵯⵙⴰⵏⵜ ⵏ 2023 ⴼ ⵡⴰⵎⴰⵏ ⵉ ⴽⵓ ⵢⴰⵏ ⴷ ⵡⴰⴽⴰⵍ
ⵉⴷⵔⵓ ⵓⴽⴰⴱⴰⵕ ⵏ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴳ ⵜⵖⵉⵎⵉⵜ ⵏ ⵓⵙⵙⴼⵍⴷ ⵜⴰⴱⵕⵍⴰⵎⴰⵏⵉⵜ ⵜⴰⵙⴳⴳⵯⵙⴰⵏⵜ ⵏ 2023, ⴷⴷⵓ ⵜⵎⴰⵜⴰⵔⵜ: “ⴰⵎⴰⵏ ⵉ ⴽⵓ ⵢⴰⵏ ⴷ ⵡⴰⴽⴰⵍ: ⴰⴷ ⵏⵙⴱⴷⴷ ⴳⴰⵔ ⴰⵙⵎⵔⵙ, ⴰⴷ ⵏⵙⴽⵔ ⴰⵙⵏⴼⵍ, ⴰⴷ ⵏⵙⵙⴰⵔⵓ ⴳ ⵉⵎⴰⵍ”, ⵍⵍⵉ ⵜⵙⵏⵎⴰⵍⴰ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⵙ ⵜⴷⵔⴰⵡⵜ ⴷ ⵜⵎⵜⵜⴰ ⵎⵓⵏⵏⵉⵏ ⵓⵙⵙⴰⵏ 13 ⴷ 14 ⴱⵕⴰⵢⵕ 2023 ⴳ ⵏⵢⵓⵢⵓⵔⴽ ⴳ ⵎⴰⵔⵉⴽⴰⵏ.
ⵢⵓⵎⴰ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵎⵖⵔⵉⴱⵉ ⵙⴳ ⵓⵙⵇⵇⵉⵎ ⵏ ⵉⵎⵓⵔⴰ:
- ⵎⴰⵙⵙ ⴰⵃⵎⴰⴷ ⵜⵜⵡⵉⵣⵉ, ⵜⴰⵔⴰⴱⴱⵓⵜ ⵏ ⵜⵥⵖⵔⵜ ⴷ ⵜⵎⴰⵜⵔⴰⵔⵜ,
- ⵎⴰⵙⵙ ⵎⵓⵚⵟⴰⴼⴰ ⵔⴷⴷⴰⴷ, ⵜⴰⵔⴰⴱⴱⵓⵜ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵉⵏⵙⵉⵎⴰⵏⵏ.
- ⵎⴰⵙⵙ ⵄⵓⵎⴰⵕ ⵃⵊⵉⵔⴰ, ⵜⴰⵔⴰⴱⴱⵓⵜ ⵜⴰⵙⵉⵎⴰⵏⵜ ⵉ ⵜⵎⵓⵏⵉ ⴷ ⵢⵉⵙⴽⵉⵍ.
- ⵎⴰⵙⵙⴰ ⵅⴷⴷⵓⵊ ⵙⵙⵍⴰⵙⵉ, ⵜⴰⵔⴰⴱⴱⵓⵜ ⵜⴰⵙⵔⵎⵓⵏⵜ.
ⵙⴳ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ:
- ⵎⴰⵙⵙ ⴽⴰⵎⴰⵍ ⴰⵢⵜ ⵎⵉⴽ, ⵜⴰⵔⴰⴱⴱⵓⵜ ⵜⴰⵏⴰⵎⵓⵔⵜ ⵏ ⵉⵏⵙⵉⵎⴰⵏⵏ.
- ⵎⴰⵙⵙ ⵃⴰⵙⴰⵏ ⵛⵎⵉⵙ, ⵜⴰⵔⴰⴱⴱⵓⵜ ⵏ ⵜⵥⵖⵔⵜ ⴷ ⵜⵎⴰⵜⵔⴰⵔⵜ.
ⵜⴽⵛⵎ ⵜⵖⵉⵎⵉⵜ ⴰⴷ ⴳ ⵓⵙⴰⵜⵉ ⵏ ⵓⵙⵓⵊⴷ ⵏ ⵓⴳⵔⴰⵡ ⵏ ⵜⵎⵜⵜⴰ ⵎⵓⵏⵏⵉⵏ ⵉ ⵡⴰⵎⴰⵏ ⴳ 22 ⴰⵔ 24 ⵎⴰⵕⵚ 2023, ⵜⴳ ⵜⴰⵎⵣⵡⴰⵔⵓⵜ ⵙⴳ 45 ⵏ ⵓⵙⴳⴳⵯⴰⵙ. ⵜⴳⴰ ⵜⴰⵎⵍⴷⴰ ⵏ ⵜⵏⴱⴰⴹⵉⵏ ⴷ ⵉⴱⵕⵍⴰⵎⴰⵏⵏ ⴷ ⵡⴰⵎⵓⵏ ⴰⴳⵔⴰⵖⵍⴰⵏ ⵉ ⵓⵙⵏⴼⵍ ⵏ ⵜⴰⵏⵏⴰⵢⵢⵉⵏ ⵅⴼ ⵜⴰⵙⵙⴰⵙⵜ ⵏ ⵡⴰⵎⴰⵏ ⴷ ⵡⴰⵡⵏⴰⴹ ⵉⵖⵓⵙⵏ ⵉⴱⴷⵏⵏ ⴼ ⵜⴳⵎⵉ ⵜⴰⵙⵓⵍⴰⵏⵜ, ⴷ ⵓⵙⵏⴼⵍ ⵏ ⵉⵙⵡⵉⵏⴳⵎⵏ ⴼ ⵢⵉⴳⵔ ⴰⴷ ⵓⴷⴷⵉⵔ ⴷ ⵓⴼⴰⵔⵙ ⵏ ⵜⵙⵓⵎⴰⵔ ⴷ ⵉⵙⵖⵍⴰⴼ ⵍⵍⵉ ⵔⴰⴷ ⵢⴰⵡⵙ ⴼ ⵓⵙⵡⵓⴷⴷⵓ ⵏ ⵓⵛⵃⵓ ⵏ ⵡⴰⵎⴰⵏ ⴳ ⵓⵙⵓⵊⴷ ⵏ ⵓⴳⵔⴰⵡ ⴰⴷ ⴰⵎⵣⵔⴰⵢ.
ⴳ ⵜⵖⵉⵎⵉⵜ ⴰⴷ, ⵔⴰⴷ ⵢⵉⵍⵉ ⵓⵙⵏⴼⵍ ⵏ ⵜⴰⵏⵏⴰⵢⵢⵢⵉⵏ ⵅⴼ ⵜⵉⵎⵙⴰⵔⵉⵏ ⵏ ⵖⵉⵍⴰⴷ ⵙ ⵜⴷⵔⴰⵡⵜ ⵏ ⵉⵎⵓⵣⴰⵢⵏ ⴷ ⵉⵎⴰⵙⴰⵢⵏ ⵏ ⵜⵎⵜⵜⴰ ⵎⵓⵏⵏⵉⵏ ⴷ ⵉⴷⵉⴱⵍⵓⵎⴰⵙⵉⵢⵏ ⴷ ⵉⵎⵣⵔⴰⵡⵏ ⵥⵍⵉⵏⵉⵏ ⴳ ⵓⵙⵓⵡⵓⴷⴷ ⵏ ⵡⴰⵎⴰⵏ. ⵔⴰⴷ ⵢⵉⵍⵉ ⵓⵍⴰ ⵓⵎⴹⴰⴽⴰⵔ ⵏ ⵉⵎⵕⵚⵉⵡⵏ ⴰⴷ:
- ⴰⵡⵜⵜⴰⵙ ⵡⵉⵙ ⵚⴹⵉⵚ ⵏ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ ⵍⵍⵉⵖ ⴳⴰⵏ ⵡⴰⵎⴰⵏ ⵏ ⵜⵉⵙⵙⵉ ⵙⴳ ⵉⵣⵔⴼⴰⵏ ⵏ ⵓⴼⴳⴰⵏ.
- ⴰⵙⵏⴼⵍ ⵏ ⵓⵏⵣⵡⵉ ⴷ ⵓⴷⵔⵓⵙ ⵏ ⵡⴰⵎⴰⵏ: ⴰⵙⴷⵓⵙ ⵏ ⵜⵙⵓⴳⴰⵔ ⵉ ⵜⵏⵣⴱⴰⵢⵜ.
- ⴰⵏⴰⵡⵏ ⵏ ⵓⵙⵎⵔⵙ ⴷ ⵓⴼⴰⵔⵙ ⵏ ⵡⴰⵎⴰⵏ.
- ⴰⵙⵙⵥⵕⴼ ⵏ ⵓⴼⴰⵔⵙ ⵏ ⵡⴰⵎⴰⵏ.
- ⴰⵙⴷⵔⵓ ⵏ ⵡⴰⵎⵓⵏ ⴰⴷⵖⴰⵔⴰⵏ ⴷ ⵜⵎⵖⴰⵔⵉⵏ ⴷ ⵉⵄⵔⵔⵉⵎⵏ ⴷ ⵉⵎⵣⴷⴰⵖ ⵉⵎⵣⵡⵓⵔⴰ ⴳ ⵓⵙⵖⵓⴷⵓ ⵏ ⵜⵙⵔⵜⴰⵢ ⵏ ⵡⴰⵎⴰⵏ.
- ⴰⵥⵎⴰⵥⵥⵍ ⵏ ⵉⵎⴰⵍ ⴳ ⵢⵉⴳⵔ ⵏ ⵓⵙⵔⵓⵙ ⵏ ⵜⵙⵔⵜⴰⵢ ⵏ ⵡⴰⵎⴰⵏ ⴳ ⵓⵎⴰⴹⴰⵍ.
ⴰⵔ ⵜⴻⵜⵜⵉⵍⵉ ⵜⵖⵉⵎⵉⵜ ⴰⴷ ⵙ ⵓⵎⵢⴰⵡⴰⵙ ⴷ ⵜⴳⵔⴰⵡⵉⵏ ⵏ ⵜⵎⵜⵜⴰ ⵎⵓⵏⵏⵉⵏ, ⴰⵔ ⵜⵜⴰⵡⵙ ⴳ ⵓⵎⴹⴰⴽⴰⵔ ⵏ ⵜⵎⵙⴰⵔⵉⵏ ⵙ ⵓⵙⵎⴰⵇⵇⵍ ⴰⴱⵕⵍⴰⵎⴰⵏⵉ ⵃⵎⴰ ⴰⴷ ⵢⵉⵍⵉ ⵓⵔⵎⴰⵙ ⴷⴰⵔ ⵉⴱⵕⵍⴰⵎⴰⵏⵉⵢⵉⵏ ⴷ ⵜⵉⴽⴽⵉ ⵏ ⵉⵙⴼⵙⵉⵜⵏ ⵥⵍⵉⵏⵉⵏ ⵉ ⵉⵡⴰⵏⴽⵏ ⵉⴳⵎⴰⵎⵏ ⴳ ⵜⵎⵜⵜⴰ ⵎⵓⵏⵏⵉⵏ ⴼ ⵜⵉⵔⵎⵉⵜ ⵜⴰⵏⴰⵎⵓⵔⵜ ⴷ ⵜⴷⵖⴰⵔⴰⵏⵜ.