ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵙⵎⴰⴷ ⵏ ⵜⵙⵓⵜⵍⵜ ⵜⴰⵣⵣⵔⴰⴼⵜ ⵜⵉⵙ ⵙⵏⴰⵜ ⵏ ⵓⵙⴳⴳⵯⴰⵙ ⴰⵣⵣⵔⴰⴼ 2022-2023
ⵎⴰⵙⵙ ⴰⵎⴰⵡⵙⴰⵙ
ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⵓⵔⴰ
ⵉⵙⵜ ⵎⴰⵙⵙ ⴷ ⵉⴷ ⵎⴰⵙⵙ
ⵙ ⵓⵙⴽⵔ ⵏ ⵓⴷⵙⵜⵓⵔ ⵏ ⵜⴳⵍⴷⵉⵜ ⴷ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ, ⵏⵙⵎⴷ ⵜⴰⵙⵓⵜⵍⵜ ⵜⴰⵣⵣⵔⴰⴼⵜ ⵜⵉⵙ ⵙⵏⴰⵜ ⵏ ⵓⵙⴳⴳⵯⴰⵙ ⴰⵣⵣⵔⴰⴼ ⵡⵉⵙ ⵙⵉⵏ ⵏ ⵜⵡⴰⵍⴰ ⵜⵉⵙ ⵢⴰⵜ ⴷ ⵎⵔⴰⵡⵜ ⵍⵍⵉⵖ ⵜⵣⵔⵉ ⵜⵎⵉⴹⵉ ⵏ ⵜⵡⵡⵓⵔⵉ ⵖ ⵏⵎⵎⴰⵖ ⴰⴷ ⵉⵍⵉⵏ ⵉⵎⴷⴰⵡⴰⵍⵏ ⴷ ⵜⵖⵉⵎⵉⵜⵉⵏ ⴷ ⵜⵙⵎⵓⵏⴰⵢ ⵏⵏⵖ ⴳ ⵓⵙⵡⵉⵔ ⴼⴽⵉⵏ ⴰⴼⴰⵔⵙ.
ⵉⵎⵙⴰⵙⴰ ⵓⵙⵎⴰⴷ ⴰⴷ ⴷ ⵓⵙⴼⵓⴳⵍⵓ ⵏ ⵓⵎⴰⴷⴰⵏ ⵏ ⵍⵎⵖⵔⵉⴱ ⵏ ⵜⴼⴼⵓⴳⵍⴰ ⵏ ⵓⴷⴰⴱⵓ ⵉⵍⴰⵏ ⴰⴷⴷⵓⵔ ⴳ ⵜⵙⵓⵜⵍⵜ ⵜⵉⵙ 24 ⴳ ⵉⵍⵍⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ ⴼ ⵓⴷⴰⴱⵓ ⵏ ⵉⴷ ⴱⴰⴱ ⵏⵏⵙ ⵍⴰⵏⵉⵏ ⴰⴷⴷⵓⵔ. ⵙ ⵜⵎⵍⴷⴰ ⴷ ⵜⴰⵏⴰⵎⵓⵔⵜ ⵜⴰⵎⴰⵜⵜⵓⵢⵜ ⴷ ⵜⵜⵉⵏⵉⵖ ⵙ ⵉⵙⵎ ⵏⵏⵓⵏ ⵉⵙⵔⵖⵓⴷⵏ ⵏⵏⵖ ⵉ ⴱⴰⴱ ⵏ ⵡⴰⴷⴷⵓⵔ, ⵏⵜⵜⵔ ⴰⴳⵍⵍⵉⴷ ⵎⵇⵇⵓⵔⵏ ⴰⴷ ⵜ ⵉⵃⴼⴹ ⵉⵏⵚⵕ ⵜ ⵉⴷⵓⵎ ⴼⵍⵍⴰⵙ ⵜⴰⴷⵓⵙⵉ, ⵉⵙⵓⵎⵎⵔⵜ ⵙ ⴱⴰⴱ ⵏ ⵜⴰⵜⵜⵓⵢⵜ ⵜⴰⴳⵍⴷⴰⵏⵜ ⵉⵡⵉⵙ ⵎⵓⵍⴰⵢ ⵍⵃⴰⵙⴰⵏ ⴷ ⵎⴰⵕⵕⴰ ⵜⴰⵡⵊⴰ ⵜⴰⴳⵍⴷⴰⵏⵜ ⵜⴰⵛⵛⵔⵉⴼⵜ.
ⵜⴳⴰ ⵜⴰⵎⵍⴷⴰ ⵉ ⵓⵙⵉⵡⵍ ⴼ ⵓⴱⵓⵔⵣ ⵙ ⵎⴰⴷ ⵉⵙⴽⵔ ⵍⵎⵖⵔⵉⴱ ⵙ ⵜⵏⴰⵔⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⵜⵣⵣⵉⴳⵣⵜ ⴷ ⵣⵣⵀⵕⵜ, ⴷ ⵎⴰⴷ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⴳ ⵉⵥⵎⵓⵥⵥⴰⵍ ⴳ ⵜⵙⵙⵕⵚ ⴰⵙⴷⵖⵔ ⵏⵏⵙ ⴰⵏⵎⵏⴰⴹ ⴷ ⵓⵎⵏⵥⴰⵡ ⴷ ⵓⴳⵔⴰⵖⵍⴰⵏ, ⵜⴳ ⴰⵎⴷⵔⴰⵡ ⵉⵖⵣⴰⵏ ⴳ ⵜⵍⵍⴰ ⵜⵎⵢⵉⵎⴰⵏⵜ ⵉⵜⵜⴰⵡⵙⵏ ⴳ ⵓⵚⴽⵓ ⵏ ⵓⴼⵔⴰ ⴷ ⵜⴳⵎⵉ ⴷ ⵓⵎⵙⴰⵡⴰⵍ ⵊⴰⵔ ⵉⵡⴰⵏⴽⵏ ⴷ ⵜⵖⵔⵎⵉⵡⵉⵏ ⴷ ⵜⴷⵍⵙⵉⵡⵉⵏ ⵉⵜⵜⴰⵎⴰⵖⵏ ⴼ ⵓⵣⵔⴼ ⴷ ⵜⵖⴰⵎⵜ.
ⵉⵙⵜ ⵎⴰⵙⵙ ⴷ ⵉⴷ ⵎⴰⵙⵙ
ⵜⴳⴰ ⵜⴰⵎⵢⵓⵔⵜ ⵜⴰⵎⵔⵙⵍⴰⵏⵜ ⴰⴷ ⵏⵥⵍⵉ ⵜⵉⵖⵉⵎⵉⵜ ⴰⴷ ⵉ ⵜⵢⵢⴰⴼⵓⵜ ⵉⵜⵜⵓⵙⴽⴰⵔⵏ, ⵜⴰⵢⵢⴰⴼⵓⵜ ⴰⴷ ⵉⵎⵎⴰⵍⴰⵏ ⵜⵉⵡⵡⵓⵔⵉⵡⵉⵏ ⵍⵍⵉ ⵙⴽⵔⵏ ⵉⴳⵎⴰⵎⵏ ⵏ ⵓⵙⵇⵇⵉⵎ, ⵜⵓⵣⵍⵜ ⵓⵍⴰ ⵜⵓⴳⵜ, ⴷ ⵓⵙⴽⵔ ⵏ ⵜⵎⵥⵍⴰⵢ ⵏⵏⵖ ⵜⵉⴷⵙⵜⴰⵔⵉⵏ, ⴳ ⵓⵎⵣⵡⴰⵔⵓ ⴳ ⵓⵡⵇⵇⵔ ⵙⵇⵇⵉⵇⵏ ⵏ ⵓⴷⵙⵜⵓⵔ ⴷ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ, ⵡⵉⵙ ⵙⵉⵏ ⴳ ⵓⵙⴽⵔ ⵙ ⵡⴰⴽⵓⴷ ⴰⴷⵙⵜⴰⵔ ⴷ ⵓⵎⵔⵙⵍⴰⵏ ⵉⵣⴷⵉⵏ ⴷ ⵜⵙⵎⵉⴳⴰⵍ ⵏⵏⵖ, ⵡⵉⵙ ⴽⵕⴰⴹ ⵍⵍⵉⵖ ⵏⵎⵎⴰⵖ ⴰⴷ ⵎⵙⴰⵙⴰⵏⵜ ⵜⵡⵡⵓⵔⵉⵡⵉⵏ ⵏⵏⵖ ⴷ ⵉⵎⵏⴰⴹⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ ⴷ ⵎⴰⵙ ⵉⵇⵇⵍ ⵡⴰⵎⵓⵏ ⴰⵎⵖⵔⵉⴱⵉ, ⴳ ⵓⵙⴽⵔ ⵙ ⵓⵏⴰⵎⴽ ⵏ ⵓⴱⵕⵍⴰⵎⴰⵏ ⵉⵜⵜⵏⵢⴰⵍⴽⴰⵎⵏ ⴷ ⵉⵏⴰⵔⵓⵣⵏ ⴷ ⵜⵎⵙⴰⵔⵉⵏ, ⵍⵍⵉⵖ ⴰ ⵜⵜⴰⴼⵉⵏⵜ ⵜⵎⵙⴰⵔⵉⵏ ⵏ ⵡⴰⵎⵓⵏ ⵜⴰⵖⵍⴰⵖⴰⵍⵜ ⵏⵏⵙⵏⵜ ⵜⴰⴳⴰⵎⴰⵏⵜ.
ⵉⴳⴰ ⵍⵃⴰⵍ, ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ, ⴰⵍⴽⴰⵎ ⵏ ⵜⵎⵙⴽⵔⵜ ⵏⵏⵖ ⵜⴰⴱⵕⵍⴰⵎⴰⵏⵉⵜ ⵢⴰⵏ ⵓⵙⵡⵉⵔ ⵢⴰⵜⵜⵓⵢⵏ ⵏ ⵜⵉⵏⵡⵉⵜ ⴷ ⵓⵙⴳⵓⴷⵉ ⴷ ⵓⵙⵖⵓⴷⵓ ⴷ ⵜⵉⵢⵢⴰⴼⵓⵜ, ⵜⴳ ⴰⵙⵙ ⴰⴷ ⵜⵉⵎⵙⴽⵔⵜ ⵜⴰⴱⵕⵍⴰⵎⴰⵏⵉⵜ ⵉⵟⵟⴰⴼⵏ ⵜⵉⵔⵙⴰⵍ ⵏ ⵜⵣⵡⵉⵔⵉ ⵙ ⵓⵎⵙⴰⵙⴰ ⴷ ⵉⵙⵖⴰⵍⵏ ⵏ ⵜⴷⵉⵎⵓⵇⵔⴰⵟⵉⵜ ⵜⴰⴱⵕⵍⴰⵎⴰⵏⵉⵜ ⴳ ⵜⴰⵙⵓⵜ ⵜⵉⵙ ⵡⴰⴳⵏⴰⵔ ⴷ ⵢⴰⵏ ⵎⴽ ⵍⵍⵉ ⵜⵍⵍⴰ ⴳ ⵜⴻⵜⴳⴰⵔⵉⵏ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ.
ⵜⵍⵍⴰ ⵜⵣⵡⵉⵔⵉ ⴰⴷ ⵍⵍⵉⵖ ⵉⵥⴹⴰⵕ ⵡⴰⵏⴰⵡ ⵏⵏⵖ ⴰⴱⵕⵍⴰⵎⴰⵏⵉ ⴰⵎⵔⵙⵍⴰⵏ ⴰⴷ ⵉⵙⵎⵓⵏ ⵊⴰⵔ ⵜⴰⵡⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⵜⴰⵇⴱⵓⵔⵜ ⴷ ⵜⵎⵢⵓⵔⵉⵏ ⵏⵏⵖ ⵜⵉⵎⵔⵙⵍⴰⵏⵉⵏ, ⴷ ⵜⴷⵉⵇⵎⵓⵇⵔⴰⵟⵉⵜ ⵜⴰⵎⴰⵢⵏⵓⵜ ⴳ ⵓⵎⵏⴰⴹ ⴰⵎⴰⵢⵏⵓ, ⴷ ⵉⵙⵉⴳⴳⵉⵍⵏ ⵉⵎⴰⵢⵏⵓⵜⵏ ⵏ ⵡⴰⵎⵓⵏ ⴷ ⵡⴰⵏⴰⵡⵏ ⵏ ⵓⴼⵔⴰⴽ ⵍⵍⵉ ⴷⵉⴷⵙ ⵎⵓⵏⵏⵉⵏ, ⴷ ⵡⴰⵏⴰⵡⵏ ⵏ ⵓⵙⵡⵉⵏⴳⵎ ⵣⴷⵉⵏⵉⵏ ⴷ ⵜⵣⵣⵉⴳⵣⵜ ⵜⴰⵅⴰⵜⴰⵔⵜ ⵏ ⵜⴻⵜⵉⴽⵏⵓⵍⵓⵊⵉⵜ ⴷ ⵓⴼⵓⵍⵍⵙ ⴰⵎⴳⵓⵔⴰⵏ ⴷ ⵓⵎⵢⴰⵡⴰⴹ.
ⴰⵢⵍⵍⵉ ⵉⵜⵜⴰⵡⵉⵏ ⵙ ⵓⴱⵓⵔⵣ, ⵢⴰⵡⵙ ⴰⵖ ⴰⴷ ⵏⵎⵎⴰⵖ ⴼ ⵓⴼⵔⴰⴳ ⵏ ⵡⴰⵏⴰⵡ ⴰⴷ ⴰⵎⵔⵙⵍⴰⵏ ⴰⵏⴰⵎⵓⵔ, ⵉⴳⴰ ⵜ ⵎⴰⵙ ⵉⵜⵜⴷⵓⵙ ⴳ ⵢⴰⵏ ⵓⵎⵏⴰⴹ ⴰⵙⴳⴰⵡⴰⵏ ⴷ ⵓⴳⵔⴰⵖⵍⴰⵏ ⴳ ⵔⵎⵉⵏⵜ ⴽⵔⴰ ⵏ ⵜⴷⵉⵎⵓⵇⵔⴰⵟⵉⵢⵉⵏ, ⴷ ⴷⴷⵔⵏⵜ ⵙⵓⵔ ⴽⵉⴳⴰⵏ ⵏ ⵜⵎⵉⵣⴰⵔ ⵉⵙⵇⵙⵉⵜⵏ ⴷ ⵜⵎⵓⴽⵔⵉⵙⵉⵏ ⴷ ⵡⴰⵏⴰⵡ. ⵏⴽⴽⵏⵉ ⵓⵔ ⴰⵔ ⵏⵜⵜⵉⵏⵉ ⵎⴰⵙ ⵏⵙⵎⴷ ⴳ ⵎⴰⴷ ⵏⵍⴽⵎ, ⵍⵍⵉⵖ ⵏⴳⴰ ⵜⴰⴷⵓⵙⵉ ⵜⴰⴷⵉⵎⵓⵇⵔⴰⵟⵉⵜ ⵜⴰⵎⴰⵢⵏⵓⵜ ⴰⵙⵙ ⴰⴷ ⵏⵍⴽⵎ ⵜⵜ ⵙ ⵉⵎⵓⴽⴽⵏⵏ ⵣⵣⵉⴳⵣⵏⵉⵏ, ⵙ ⵜⵉⵍⴰⵍⵜ ⵜⴰⵎⵣⵡⴰⵔⵓⵜ ⵏ ⵜⴳⵍⴷⵉⵜ ⵏⵏⵖ ⵜⴰⴷⵙⵜⴰⵔⵜ ⵜⴰⴷⵉⵎⵓⵇⵔⴰⵟⵉⵜ ⵜⴰⵏⴰⵎⵓⵏⵜ, ⵜⴰⵣⴷⴰⵢⵜ ⵏ ⵓⵎⵛⴰⴱⴱⴰⴽ ⴰⵎⵔⵙⵍⴰⵏ ⴷ ⵓⵏⴰⵎⵓⵏ ⴷ ⵜⵔⵙⵍⵜ ⵏ ⵜⴷⵍⵙⴰ ⵏ ⵓⵎⵙⴰⵙⴰ.
ⵉⵙⵜ ⵎⴰⵙⵙ ⴷ ⵉⴷ ⵎⴰⵙⵙ
ⵙⵙⵓⵔⴼⴰⵜ ⵉⵢⵉ ⴰⴷ ⵙⵎⵏⵉⴷⵖ ⵜⵉⵎⵉⵜⴰⵔ ⵏ ⵜⵣⵡⵉⵔⵉ ⵏ ⵡⴰⵏⴰⵡ ⴰⵎⵔⵙⵍⴰⵏ ⴰⵏⴰⵎⵓⵔ ⵙ ⵓⵙⵎⵏⵉⴷ ⵏ ⵜⵉⵢⵢⴰⴼⵓⵜ ⵏ ⵜⵙⵓⵜⵍⵜ ⵜⴰⵣⵣⵔⴰⴼⵜ ⵜⵉⵙ ⵙⵏⴰⵜ ⵏ ⵓⵙⴳⴳⵯⴰⵙ ⴰⵣⵣⵔⴰⴼ ⵡⵉⵙ ⵙⵉⵏ, ⵜⴰⵢⵢⴰⴼⵓⵜ ⴳ ⴷⵔⵓⵏ ⵉⴼⵔⴷⴰⵙ ⵉⵙⵔⵜⴰⵏⵏ ⵏ ⵓⵙⵇⵇⵉⵎ, ⵜⵓⵣⵍⵜ ⴷ ⵜⵓⴳⵜ, ⴷ ⵉⵏⴳⵎⴰⵎⵏ ⵏⵏⵙ ⵙ ⵓⵎⵢⴰⵡⴰⵙ ⴷ ⵓⵙⵎⴰⴷ ⴷ ⵜⵏⴱⴰⴹⵉⵏ ⴷ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ. ⵜⴰⵣⴷⴰⵢⵜ ⵊⴰⵔ ⵎⴰ ⴰⵏⵏ ⵉⴳⴰ ⵜⵜ ⵓⵏⵢⴰⵍⴽⴰⵎ ⴷ ⵓⵎⵏⴰⴹ ⴰⵏⴰⵎⵓⵔ, ⴷ ⵓⵙⵔⵙ ⵏ ⵜⵡⵡⵓⵔⵉⵡⵉⵏ ⴷⴰⵜ ⵏ ⵉⵎⵙⵉⴳⴳⵉⵍⵏ, ⴷ ⵜⵎⵔⴰⵔⵓⵜⵉⵏ ⴼ ⵉⵙⵇⵙⵉⵜⵏ ⵉⵅⴰⵜⴰⵔⵏ ⵍⵍⴰⵏⵉⵏ ⴳ ⵡⴰⵎⵓⵏ ⵙ ⵓⵙⴰⵜⵉ ⴰⵣⵣⵔⴰⴼ ⵏ ⵉⵎⵓⴽⵏⵏ, ⴷ ⵜⵉⴹⴰⴼ ⵏ ⵜⵡⵡⵓⵔⵉ ⵏ ⵜⵏⴱⴰⴹⵜ ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵙ ⵓⵅⵎⵎⴻⵎ ⴳ ⵜⵎⵣⵡⵓⵔⴰ ⵏ ⵓⵖⴰⵡⴰⵙ ⴰⵏⴰⵎⵓⵔ.
ⵡⴰⵜⵜⵙⵏ ⵉⴹⵕⵉⵚⵏ ⴰⴷ ⴰⴷⵓⵙ ⵏ ⵜⵔⵙⴰⵍ ⵏ ⵓⵡⴰⵏⴽ ⴰⵏⴰⵎⵓⵏ ⴷ ⵓⵙⵔⵅⵓ ⵏ ⵓⴽⵛⵓⵎ ⵙ ⵜⵏⵓⴼⴰ ⵜⵉⴷⵓⵙⴰⵏⵉⵏ ⴷ ⵜⴷⵉⵎⵓⵇⵔⴰⵟⵉⵜ ⵏⵏⵙ ⵙ ⵓⵙⴷⵖⵔ ⴰⵏⴰⴽⴰⵍ ⵏ ⵜⵎⵔⵙⴰⵍ ⵙ ⵜⵖⴰⵔⴰⵙⵜ ⵏ ⵜⵎⵓⵟⵟⵓⵏⵜ ⴷ ⵓⵙⴽⵔ ⵏ ⵜⵔⵙⴰⵍ ⵜⵉⵎⵙⵙⵓⴳⵓⵔⵉⵏ ⴷ ⵜⴻⵜⵉⵇⵏⵉⵢⵉⵏ ⵍⵍⵉ ⵔⴰⴷ ⵉⵙⵎⵖⵔ ⵉⴳⵔ ⴰⴷ ⴷ ⵜⵙⵓⵍⴰⵏⵜ ⵏⵏⵙ ⴷ ⵓⵙⵎⴰⵢⵏⵓ ⵏⵏⵙ. ⵡⴰⵜⵜⵙⵏ, ⴳ ⵜⵙⴳⴰ ⵢⴰⴹⵏⵉⵏ, ⴰⵢⵍⵍⵉ ⵉⴳⴰⵏ ⴰⴷⵙⵍⴰⵏ, ⴰⵙⵎⵖⵔ ⵏ ⵢⵉⴳⵔ ⴷ ⵓⵙⵙⵔⵇⴱ ⵏ ⵉⵙⵓⴳⴰⵎ ⵉⵏⴼⴳⴰⵏⵏ ⴷ ⵓⵙⵓⵜⴳ ⵏⵏⵙⵏ ⵙ ⵓⵙⵕⵚⵓ ⵏ ⵓⵏⴰⵎⴽ ⵏ ⵜⵣⵣⵓⵍⵜ ⵜⴰⴷⵓⵙⴰⵏⵜ ⴷ ⵓⵡⵇⵇⵔ ⵏ ⵜⵥⵍⴰⵢ ⵥⵉⵍⵏⵉⵏ.
ⴳ ⵢⵉⴳⵔ ⵏ ⵓⵣⵣⵔⴰⴼ, ⵙ ⵓⵣⴷⴰⵢ ⴷ ⵓⵎⵏⴰⴹ ⴰⵏⴰⵎⵓⵏ, ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵎ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴳⴰⵏⵉⵏ ⵉⵙⵍⴳⵏⵏ ⵉⵎⵙⴽⴰⵔⵏ ⵣⴷⵉⵏⵉⵏ ⴷ ⵓⵙⴼⵍⵙ ⴰⴷⵓⵙⴰⵏ ⴷ ⵜⵏⵏⵓⴱⴹⴰ ⵏ ⵢⵉⴳⵔ ⴷ ⵓⵙⵉⵥⴹⵕ ⵏ ⵜⵎⵔⵙⴰⵍ ⴷ ⵉⵙⵓⴳⴰⵎ ⵉⵏⴼⴳⴰⵏⵏ ⴱⴷⴷⵏⵉⵏ ⴼ ⵓⵙⵖⵓⴷⵓ ⵏ ⵜⵏⵓⴼⴰ ⵏⵏⵙ, ⴷ ⵓⵙⵎⵔⵙ ⵏ ⵓⵔⵣⵣⵓ ⴰⵎⴰⵙⵙⴰⵏ ⴳ ⵢⵉⴳⵔ ⵏ ⵜⴷⵓⵙⵉ.
ⵉⴳⴰ ⵓⵙⵖⵣⵏ ⵏ ⵉⴹⵕⵉⵚⵏ ⴰⴷ ⴰⵙⵎⴰⴷ ⵏ ⵓⵚⴽⵓ ⵏ ⵓⵡⴰⵏⴽ ⴰⵏⴰⵎⵓⵏ ⵉⵜⵜⵉⵎⵖⵓⵔⵏ ⵙⴳ ⵓⴳⴳⴰⵔ ⵏ ⵡⴰⴳⵏⴰⵔ ⵏ ⵓⵙⴳⴳⵯⴰⵙ ⴳ ⵓⵙⴽⵔ ⵏ ⵉⵣⵔⴼⴰⵏ ⵉⵏⴰⵎⵓⵏⵏ ⴷ ⵓⵎⵢⴰⵡⴰⵙ ⴷ ⵜⵡⵉⵣⵉ ⵍⵍⴰⵏⵉⵏ ⴳ ⵓⴷⵙⵓⵜⵓⵔ ⵏ ⵜⴳⵍⴷⵉⵜ ⴷ ⵉⵎⵇⵇⵏⵏ ⵉⴳⵔⴰⵖⵍⴰⵏⵏ, ⵙ ⵓⵎⵙⴰⵙⴰ ⴷ ⵓⵙⵎⴰⵇⵇⵍ ⵏ ⴱⴰⴱ ⵏ ⵡⴰⴷⴷⵓⵔ ⴳ ⵢⵉⴳⵔ ⵏ ⵓⴼⵔⴰⴳ ⴰⵏⴰⵎⵓⵏ.
ⵙ ⵓⵙⵖⵣⵏ ⵏ ⵉⴹⵕⵉⵚⵏ ⴰⴷ, ⵜⵍⴽⵎ ⵜⵎⴰⵣⵉⵔⵜ ⵏⵏⵖ ⴰⴼⴰ ⵏ ⵓⵙⴳⵓⴷⵉ ⵏ ⵉⵎⵓⴽⵏⵏ ⵉⵏⴰⵎⵓⵏⵏ ⴷ ⵓⵚⴽⵓ ⵏ ⵓⵏⴳⵔⴰⵡ ⴰⴷⵓⵙⴰⵏ ⴰⵎⴰⵢⵏⵓ ⵉⴱⴷⴷⵏ ⴼ ⵜⵏⴰⴼⵜ ⵜⴰⴳⴷⵓⴷⴰⵏⵜ, ⴷ ⵓⵙⵎⴰⵜⴰ ⴷ ⵓⵙⵖⵓⴷⵓ, ⴷ ⵓⵙⵕⵚⵓ ⵏ ⵜⵅⵅⵓⵜⵔⴰ ⵏ ⵉⵙⴰⴼⴰⵔⵏ ⴷ ⵓⴷⵡⴰⵙ ⵙ ⵜⵖⴰⵔⴰⵙⵜ ⵢⵓⵎⴰⵏ ⵍⵍⵉ ⵉⴳⴰⵏ ⴰⴳⵣⵣⵓⵎ ⵙⴳ ⵜⵅⵅⵓⵜⵔⴰ ⵜⴰⵏⴰⵎⵓⵔⵜ ⵙ ⵎⴰⵕⵕⴰ ⵉⴽⵛⵓⵎ ⵏⵏⵙ ⴳⴰⵏⵉⵏ ⵜⵉⵎⵙⵉⵔⵉⵏ ⵙⴳ ⵓⴱⴰⵢⵢⵓⵕ ⵏ ⴽⵓⴼⵉⴷ 19.
ⴳ ⵓⵎⵏⵉⴷ ⵢⴰⴹⵏⵉⵏ, ⵉⴳⴰ ⵓⵙⵖⵏ ⵏ ⵓⵙⵇⵇⵉⵎ ⵏ ⴽⵉⴳⴰⵏ ⵏ ⵉⵙⵍⴳⵏⵏ ⵉ ⵓⵎⵙⴰⵙⴰ ⵏ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⵜⵉⵙⵉⵏⵔⴰⵏⵉⵏ ⴷ ⵜⴳⵜⵉⵔⴰⵏⵉⵏ, ⴰⴳⵣⵣⵓⵎ ⵉⵙⵜⴰⵡⵀⵎⵎⴰⵏ ⵏ ⵜⵉⵢⵢⴰⴼⵓⵜ ⵜⴰⵣⵣⵔⴰⴼⵜ ⴳ ⵜⵙⵓⵜⵍⵜ ⵏ ⵉⴱⵔⵉⵔ 2023. ⴰⵔ ⵎⵎⴰⵍⴰⵏⵜ ⵜⵎⵢⴰⵇⵇⴰⵏⵉⵏ ⴰⴷ ⴰⴷⵖⴰⵔ ⵏ ⵜⴳⵍⴷⵉⵜ ⴳ ⵉⵙⵡⵉⵔⵏ ⴰⴳⵔⴰⵖⵍⴰⵏ ⴷ ⵓⵎⵏⵥⵡⴰⵏ ⴷ ⵓⵙⴳⴰⵡⴰⵏ ⴷ ⴰⵎⴷⵔⴰⵡ ⴰⵖⵔⴰⵖⵍⴰⵏ ⵉⵖⵣⴰⵏⵏ ⴷ ⵉⵏⵏⵓⵕⵣⵎⵏ ⴼ ⵜⵎⴷⵔⴰⵡⵉⵏ ⵜⵉⵎⵏⵏⴰⵡⵉⵏ ⴷ ⵓⵎⵙⴽⴰⵔ ⴳ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ.
ⴷⴰⵜ ⵏ ⵉⴹⵕⵉⵚⵏ ⴰⴷ, ⵏⵙⵖⵣⵏ ⵡⵉⵢⵢⴰⴹ ⴳⴰⵏⵉⵏ ⵉⵎⵙⴽⴰⵔⵏ, ⵏⵖ ⵙⵏⴼⵍ ⵡⵉⵢⵢⴰⴹ ⵍⵍⴰⵏⵉⵏ, ⴼ ⵎⴰⵕⵕⴰ ⵉⴳⵔⴰⵏ ⵏ ⵜⵓⴷⵔⵜ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ ⴷ ⵜⴷⵍⵙⴰⵏⵜ, ⵉⵍⴽⵎ ⵓⵏⵛⴽ ⵏ ⵉⴹⵕⵉⵚⵏ ⵍⵍⵉ ⵉⵙⵖⵣⵏ ⵓⵙⵇⵇⵉⵎ ⴳ ⵜⵙⵓⵜⵍⵜ 34 ⵏ ⵓⴹⵕⵉⵚ. ⴰⵙⵖⵣⵏ ⴰⴷ ⵓⵔ ⵉⴳⵉ ⴰⵡⵜⵜⴰⵙ, ⵉⵇⵇⴰⵏ ⴰⵖ ⴷ ⴳ ⵓⵙⴰⵜⵉ ⵏ ⵜⵎⵥⵍⴰⵢ ⵏⵏⵖ ⵏ ⵜⵉⴹⴰⴼ, ⵓⴹⴼⵕ ⵏ ⵓⵙⴽⵔ ⵏ ⵉⵙⵍⴳⵏⵏ ⴷ ⵜⵖⵔⵉ ⵏ ⵓⴷⵔⵉⵣ ⵏⵏⵙⵏ ⴷ ⵓⵙⵜⴳ ⵏ ⵓⴷⵔⵉⵣ ⵏⵏⵙ ⴼ ⵡⴰⵎⵓⵏ.
ⴳ ⵜⵙⴳⴰ ⵢⴰⴹⵏⵉⵏ, ⵉⵇⵇⴰⵏ ⴰⵖ ⴷ ⴳ ⵓⵙⴰⵜⵉ ⵏ ⵓⵎⵙⴰⵙⴰ ⴰⵎⵔⵙⵍⴰⵏ ⴷ ⵜⵎⴰⴼⴰⵡⵜ, ⴰⴷ ⵏⵙⵡⵓⵔⵉ ⴼ ⵓⵙⵔⵅⵓ ⵏ ⵜⵣⵣⵉⴳⵣⵜ ⵏ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵍⵍⵉ ⵙⵎⵏⵉⴷⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⴳ ⵓⵙⴰⵜⵉ ⵏ ⵜⵙⵏⵜⴰⵢⵉⵏ ⵏⵏⵙ ⵜⵉⵣⵣⵔⴰⴼⵉⵏ, ⴼⵔⴽⵖ ⵙ ⵡⴰⵜⵉⴳ ⵏⵏⵙⵏⵜ ⴳ ⵓⵙⵖⵏⵓ ⵏ ⵓⵣⵣⵔⴰⴼ ⴰⵏⴰⵎⵓⵔ, ⴳⵉⵏⵜ ⵓⵍⴰ ⵜⵉⵎⵙⴽⵔⵜ ⵏ ⵢⴰⵜ ⵜⵥⵍⵉⵜ ⵜⴰⴷⵙⵜⴰⵔⵜ ⵏ ⵉⴱⵕⵍⴰⵎⴰⵏⵉⵢⵏ.
ⵉⵙⵜ ⵎⴰⵙⵙ ⴷ ⵉⴷ ⵎⴰⵙⵙ
ⴳ ⵎⴰⴷ ⵉⵥⵍⵉⵏ ⵙ ⵜⵉⴹⴰⴼ ⵏ ⵜⵡⵡⵓⵔⵉ ⵜⵓⵏⴱⵉⴹⵜ, ⵉⵇⵇⴰⵏ ⴷ ⴽⵓⵢⴰⵏ ⴰⵙ ⵉⵙⵓⵜⴳ ⵜⵉⵎⵙⴽⵔⵜ ⵏ ⵓⵙⵇⵇⵉⵎ ⵏ ⵓⵙⵎⵔⵙ ⵏⵏⵙ ⵏ ⵉⵎⴰⵙⵙⵏ ⵏ ⵜⵉⴹⴰⴼ, ⴰⵢⵍⵍⵉ ⵉⵎⵎⴰⵍⴰⵏ ⴰⵏⵢⵍⴰⴽⵎ ⵏⵏⵓⵏ, ⴽⵯⵏⵏⵉ ⵉⴳⵎⴰⵎⵏ ⵏ ⵓⵙⵇⵇⵉⵎ, ⴷ ⵜⵎⵙⴰⵔⵉⵏ ⵏ ⵡⴰⵎⵓⵏ ⴷ ⵉⵅⵎⵎⵉⵎⵏ ⵏ ⵎⵉⴷⴷⵏ.
ⵙ ⵖⵎⴽ ⴰⴷ, ⴰⴼ ⵏⵥⵍⵉ ⴽⵕⴰⴹ ⵜⵖⵉⵎⵉⵜⵉⵏ ⴼ ⵉⵜⵜⵔⵓⵔ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴼ ⵉⵙⵇⵙⵉⵜⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵙ ⵓⵎⵙⴰⵙⴰ ⴷ ⵉⴱⴹⵉⵢⵏ ⵏ ⵓⵎⵏⵏⵉ 100 ⵏ ⵓⴷⵓⵙⵜⵓⵔ, ⵉ ⵜⵙⵔⵜⴰⵏⵉⵏ ⵜⵉⵎⴰⵜⴰⵢⵉⵏ ⴳⴰⵏⵉⵏ ⵜⵉⵅⴰⵜⴰⵔⵉⵏ ⵏ ⵖⵉⵍⴰⴷ ⴷ ⵜⵙⵜⵔⴰⵜⵉⵊⵉⵢⵉⵏ ⴰⵎ ⵜⵉⵅⵅⵓⵜⵔⴰ ⵏ ⵓⵜⵛⵓ ⵖ ⵜⴱⴷⴷⵎ ⴼ ⵡⴰⵜⵉⴳ ⵏⵏⵙ ⴳ ⵓⵎⵏⴰⴹ ⴰⴳⵔⴰⵖⵍⴰⵏ ⵏ ⵖⵉⵍⴰⴷ ⵉⵜⵜⵓⵙⵙⴰⵏⵏ ⵙ ⵓⵎⵃⵉⵣⵡⴰⵔ ⵉ ⵜⵉⵍⵉⵜ ⵏ ⵜⵏⴼⵔⵓⵜ ⵏ ⵓⵜⵛⵓ ⴷ ⵓⵙⴼⵍⵙ ⵏ ⵓⴳⴰⴷⴰⵣ ⴰⴳⵔⴰⵖⵍⴰⵏ, ⴷ ⵓⵙⵙⵍⵎⴷ ⴰⵎⴰⵜⵜⵓⵢ ⴷ ⵓⵙⵙⴰⵔⵓ ⴳⵉⵙ ⴷ ⵓⵙⵓⵊⴷ ⵏ ⵜⵎⴰⵣⵉⵔⵜ ⵏⵏⵖ ⵉ ⵉⵎⴰⵍ ⵍⵍⵉⵖ ⵔⴰⴷ ⵜⴳ ⵜⵓⵙⵙⵏⴰ ⴷ ⵜⵙⵓⴳⴰⵔ ⴷ ⵓⴼⵔⴰⴽ ⴰⵏⴼⴳⴰⵏ ⵜⵉⵎⵏⵜⵍⵉⵏ ⴼⴰⵡⵏⵉⵏ ⴳ ⵜⵣⵣⵉⴳⵣⵜ ⴷ ⵜⴳⵎⵉ.
ⵏⵥⵍⵉ ⵜⵉⵖⵉⵎⵉⵜ ⵉⴳⴳⵓⵔⴰⵏ ⵉ ⵓⵣⵓⵛⵛⵍ ⴷ ⵓⵙⵖⵓⴷⵓ ⵏ ⵓⵙⵉⵥⴹⵕ ⵏ ⵜⵎⵖⴰⵔⵉⵏ ⵏ ⵍⵎⵖⵔⵉⴱ, ⴰⵢⵍⵍⵉ ⵉⴳⴰⵏ ⵉⵎⵔⵙⵉ ⵢⵉⵡⵉⵏ ⴰⵅⵎⵎⴻⵎ ⴰⵅⴰⵜⴰⵔ ⵏ ⵡⴰⵎⵓⵏ ⴰⵎⵖⵔⵉⴱⵉ ⴷ ⵓⵅⵎⵎⴻⵎ ⵢⴰⵜⵜⵓⵢⵏ ⵏ ⵏ ⴱⴰⴱ ⵏ ⵡⴰⴷⴷⵓⵔ.
ⵍⴽⵎⵏⵜ ⵜⵖⵉⵎⵉⵜⵉⵏ ⴰⴷ ⵎⵔⴰⵡⵜ ⵜⵖⵉⵎⵉⵜⵉⵏ, ⵍⵍⴰⵏⵜ ⴼ ⵜⵎⵓⴽⵔⵉⵙⵉⵏ ⵏ ⵡⴰⵎⴰⵏ ⴷ ⵓⵙⵓⵔⵙ ⵏ ⵜⴼⵍⵍⴰⵃⵜ ⵜⴰⵎⵖⵔⵉⴱⵉⵜ ⴳ ⵓⵎⵏⴰⴹ ⵏ ⵜⵖⴰⵔⵜ ⴷ ⵉⴷⵔⵉⵣⵏ ⵏ ⵜⵎⵓⴽⵔⵉⵙⵉⵏ ⵏ ⵓⵏⵣⵡⵉ ⴼ ⵓⵙⵓⵔⵙ ⵏ ⵡⴰⵎⴰⵏ ⴷ ⵜⴼⵍⵍⴰⵃⵜ ⵜⴰⵏⴰⵎⵓⵔⵜ ⴳ ⵓⵎⵙⴰⵡⴰⵍ ⵊⴰⵔ ⵜⵉⵏⴱⴰⴹⵉⵏ ⵜⴰⵣⵣⵔⴰⴼⵜ ⴷ ⵜⵎⵣⵣⴳⴰⵔⵜ. ⵙ ⵓⵟⵟⵓⵏⵏ, ⵏⵙⵖⵉⵡⵙ ⴷ ⵏ ⵎⴹⴰⴽⴰⵔ ⴳ ⵜⵖⵉⵎⵉⵜⵉⵏ ⴰⴷ ⵎⴰⴷ ⵉⴳⴰ 340 ⵏ ⵓⵙⵇⵙⵉ ⴳ 855 ⵏ ⵓⵙⵇⵙⵉ ⴳⴳⵓⴷⵉⵏⵉⵏ, ⴰⵢⵍⵍⵉ ⵉⵍⴽⵎⵏ ⵎⴰⴷ ⵉⴳⴰⵏ 40%.
ⵉⵡⵉⵏⵜ ⵜⵎⵙⴰⵔⵉⵏ ⵏ ⵜⴷⵓⵙⵉ ⴷ ⵜⵏⴰⴼⵜ ⵜⴰⴳⴷⵓⴷⴰⵏⵜ ⵏ ⵜⵙⵏⵉⵊⵊⵉⵜ ⴷ ⵉⵖⴰⵡⴰⵙⵏ ⵏ ⵓⵙⵏⴰⵍ ⴰⵏⴰⵎⵓⵏ ⴷ ⵜⵙⵓⵍⴰⵏⵜ ⵏ ⵜⴳⵎⵉ ⴷ ⵓⵙⴱⴷⴷⵉ ⵏ ⵜⵎⵓⴽⵔⵉⵙⵉⵏ ⵏ ⵓⵏⵣⵡⵉ ⴷ ⵓⵙⵙⵍⵎⴷ ⵙ ⵎⴰⵕⵕⴰ ⵉⵙⵡⵉⵔⵏ ⵏⵏⵙ ⴷ ⵜⵉⵍⴰⵍⵜ ⵏ ⵡⴰⵎⵓⵏ ⴰⵖⵔⵎⴰⵏ ⴳ ⵜⴳⵎⵉ, ⴰⵅⵎⵎⴻⵎ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⴳ ⵜⵖⵉⵎⵉⵜⵉⵏ ⵏ ⵉⵙⵇⵙⵉⵜⵏ ⵉⵎⵉⵡⴰⵏⵏ ⵉ ⵜⵏⴱⴰⴹⵜ.
ⴳ ⵜⵙⴳⴰ ⵢⴰⴹⵏⵉⵏ, ⵉⵣⵣⵉⴳⵣ ⵓⵙⵎⵔⵙ ⵉⵕⵡⴰⵏ ⵏ ⵉⵙⵇⵙⵉⵜⵏ ⵉⵎⵉⵔⴰⵢⵏ ⴷ ⵉⵎⵉⵙⵙ ⵏ ⵓⵙⵇⵙⵉ ⵏ ⵜⵏⴱⴰⴹⵜ ⴼ ⵜⵎⵙⴰⵔⵉⵏ ⵜⵉⵙⴳⴰⵡⴰⵏⵉⵏ ⴷ ⵜⴷⵖⴰⵔⴰⵏⵉⵏ ⵙⵜⴰⵡⵀⵎⵎⴰⵏⵉⵏ ⴼ ⵜⵎⵙⴰⵔⵉⵏ ⵏ ⵜⵙⵔⵜⴰⵢ ⵏ ⵉⴷⵖⴰⵔⵏ, ⴰⵎ ⴰⵚⴽⵓ ⴷ ⵓⵙⵡⵓⴷⴷⵓ ⵏ ⵡⴰⵔⵔⴰⵙⵏ ⴷ ⵜⵏⵓⴼⴰ ⵜⵉⵏⴰⵎⵓⵏⵉⵏ ⴷ ⵓⵎⴰⵡⴰ ⴰⴷⵙⵍⴰⵏ.
ⴳ ⵓⵎⵏⵉⴷ ⴰⴷ, ⵉⵍⵍⴰ ⵎⴰⴷ ⵉⴳⴰⵏ 2700 ⵏ ⵓⵙⵇⵙⵉ ⴰⵎⵉⵔⴰⵢ ⵏ ⵉⴳⴰⵎⴰⵏ ⵏ ⵓⵙⵇⵇⵉⵎ ⵉ ⵜⵏⴱⴰⴷⵜ, ⵜⵍⵍⴰ 1331 ⵏ ⵜⵎⵔⴰⵔⵓⵜ, ⴰⵢⵍⵍⵉ ⵉⴳⴰⵏ 50 % ⵏ ⵓⵏⵢⴰⵍⴽⴰⵎ ⴰⵎⵔⵙⵍⴰⵏ.
ⵜⵣⵣⵉⴳⵣ ⵜⵡⵡⵓⵔⵉ ⵏ ⵜⵉⴹⴰⴼ ⴷⴰⵔ ⵜⵙⵇⵇⵉⵎⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⵓⵍⴰⵏⵉⵏ ⵙ ⵓⵎⴹⴰⴽⴰⵕ ⵏ ⵉⵙⵎⵏⵉⴷⵏ ⴷ ⵓⵙⵙⴼⵍⴷ ⵉ ⵉⵙⵉⵙⴼⵉⵡⵏ ⵏ ⵉⴳⵎⴰⵎⵏ ⵏ ⵜⵏⴱⴰⴹⵟ ⴷ ⵉⵎⵙⵜⴳⴳⴰⵔⵏ ⵏ ⵜⵎⵔⵙⴰⵍ ⵜⵉⴳⴷⵓⴰⵏⵉⵏ ⴼ ⵜⵎⵙⴰⵔⵉⵏ ⵏ ⵖⵉⵍⴰⴷ ⵙ ⵓⴱⴷⴷⴰⴷ ⴼ ⵜⵓⵜⵔⴰⵡⵉⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵍⵍⵉ ⵙⵎⵏⵉⴷⵏⵉⵏ 63 ⵏ ⵜⵓⵜⵔⴰ ⴷ 51 ⵏ ⵉⵎⵔⵙⵉ ⵍⵍⵉ ⵖⵔⴰⵏⵜ ⵜⵙⵇⵇⵉⵎⵉⵏ. ⴳⴰⵏ ⵉⵎⴹⴰⴽⴰⵕⵏ ⴰⴷ ⵜⴰⵎⵍⴷⴰ ⵏ ⵓⵎⵙⴰⵡⴰⵍ ⵉⵟⵟⴰⴼⵏ ⴰⵡⵜⵜⴰⵙ ⵉⴷⵔⴰⵏ ⵍⵍⵉ ⵔⴰⴷ ⵉⵙⵎⵖⵔ ⵜⵉⵙⵔⵜⴰⵢ ⵜⵉⴳⴷⵓⴷⴰⵏⵉⵏ.
ⴳ ⵓⵎⵏⵉⴷ ⵏⵉⵜ ⵏ ⵜⵉⴹⴰⴼ, ⵙ ⵜⵉⵕⵡⵉ ⴷ ⵜⵉⵢⵢⴰⴼⵓⵜ ⵏ ⵜⵙⵎⵉⴳⴰⵍ ⵏ ⵓⵙⴰⴳⴳⵯ, ⵉⴼⴽⴰ ⵓⵙⵇⵇⵉⵎ ⴳ ⵜⵙⵓⵜⵍⵜ ⵜⴰⴷ ⵜⵓⵔⴰⴳⵜ ⵉ ⵙⵏⴰⵜ ⵜⵙⵎⵉⴳⴰⵍ ⵏ ⵓⵙⴰⴳⴳⵯ, ⵙⵎⴷⵏⵜ ⴽⴽⵓⵥⵜ ⵜⵙⵎⵉⴳⴰⵍ ⵏ ⵓⵙⴰⴳⴳⵯ ⵜⵉⵡⵡⵓⵔⵉⵡⵉⵏ ⵏⵏⵙⵏⵜ.
ⵜⵙⵙⵏⵎ ⵏⵉⵜ ⵜⴰⵜⵉⴳ ⵏ ⵉⵎⵉⵙⵙ ⴰⴷ ⵏ ⵜⵉⴹⴰⴼ ⴳ ⵓⵙⵎⵓⵏ ⵏ ⵜⵎⵓⵛⴰ ⴷ ⵓⵙⴼⵙⵉ ⵏ ⵓⴷⵎⴰⵏ ⵏ ⵓⵛⵃⵓ ⴷ ⵜⴷⵓⵙⵉ ⴳ ⵜⵉⵍⴰⵍ ⴷ ⵉⴳⵔⴰⵏ ⵍⵍⵉ ⴼ ⵍⵍⴰⵏⵜ. ⵉⴳⴰ ⵍⵃⴰⵍ ⵢⴰⵏ ⵓⵙⴰⵔⵓ ⴰⴷⵙⵍⴰⵏ ⵉ ⵜⵡⵡⵓⵔⵉ ⵏ ⵜⵏⴱⴰⴹⵜ, ⵉⵇⵇⴰⵏ ⴷ ⵉⵡⵉⵣ ⴼ ⵜⵉⵕⵡⵉ ⴷ ⵓⵣⵓⵛⵛⵍ ⴷ ⵓⵙⵔⵡⵓ ⵏ ⵜⵣⵣⵉⴳⵣⵜ ⴷ ⵓⴱⴷⴷⴰⴷ ⴷ ⵉⵡⵜⵜⴰⵙⵏ ⵏⵏⵙ ⴷ ⵉⵡⵜⵜⴰ ⵏⵏⵙ.
ⴰⵔ ⵎⵎⴰⵍⴰⵏⵜ ⵜⵡⵡⵓⵔⵉⵡⵉⵏ ⵏ ⵜⵉⴹⴰⴼ ⵏ ⵜⵡⵡⵓⵔⵉ ⵜⵓⵏⴱⵉⴹⵟ ⵙⴳ ⵜⵉⵙⵇⵇⵉⵎⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴰⵅⵎⵎⴻⵎ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⴳ ⵓⴹⴼⵕ ⵏ ⵉⵙⵓⵔⵙⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵍⵙⴰⵏⵏ ⴷ ⵓⵙⵎⴰⵜⵜⵉ ⵏ ⵉⵅⵎⵎⵉⵎⵏ ⵏ ⵎⴰⵕⵕⴰ ⵉⵡⴷⴰⵏ ⴷ ⵉⴳⵔⴰⵏ ⵉ ⵓⴳⵯⵏⵙ ⵏ ⵓⵎⴹⴰⴽⴰⵕ ⴰⵎⵔⵙⴰⵍⵏ, ⵉ ⵓⵙⴰⵜⵉ ⵏⵏⵙ ⴷ ⵓⴷⵖⴰⵔ ⵏⵏⵙ ⵉⴷⵓⵙⵏ ⵍⵍⵉⵖ ⴷ ⵉⵇⵇⴰⵏ ⴰⵎⵙⴰⵙⴰ ⴼ ⵉⴼⵙⵙⴰⵢⵏ ⴷ ⵜⵡⴰⴼⵉⵜ ⵏ ⵉⴼⵙⵙⴰⵢⵏ ⴱⴷⴷⵏⵉⵏ ⴼ ⵓⵎⵙⴰⵡⴰⵍ ⴷ ⵓⵎⵢⴰⵙⴰ ⴷ ⵓⵎⵢⴰⵡⴰⵙ ⵊⴰⵔ ⵜⵉⵏⴱⴰⴹⵉⵏ.
ⵉⵙⵜ ⵎⴰⵙⵙ ⴷ ⵉⴷ ⵎⴰⵙⵙ
ⵓⵔⵜⴰ ⵉⵣⵔⵉ ⵉⵎⴰⵍⵍⴰⵙ, ⵜⵙⵏⵓⴱⴳ ⵜⴷⴰⵍⴰ ⵏ ⵜⵖⵉⵎⵉⵜⵉⵏ ⵜⴰⵎⴰⵜⴰⵢⵜ, ⴰⵎⴹⴰⴽⴰⵕ ⵉⵙⵜⴰⵡⵀⵎⵎⴰⵏ ⵉⵥⵍⵉⵏ ⵉⴳⴰⵏ ⵡⵉⵏ ⵜⵏⵎⵓⵔⵉ, ⵜⵎⵙⴰⵙⴰⵎ ⴼ ⵡⴰⵜⵉⴳ ⵏⵏⵙ, ⵢⵉⵍⵉ ⴳⵉⵙ ⵓⵎⵙⴰⵙⴰ ⵏ ⵉⴼⵔⴷⴰⵙ ⵏ ⵓⵙⵇⵇⵉⵎ ⴷ ⵜⵏⴱⴰⴹⵜ ⴼ ⵜⵉⵢⵢⴰⴼⵓⵜⵉⵏ ⵏ ⵉⵏⵇⵇⵉⵙⵏ ⵏ ⵙⵏⴰⵜ ⵜⵡⵡⵓⵔⵉⵡⵉⵏ ⵏ ⵓⵙⵓⵜⴳ ⵏ ⵙⵏⴰⵜ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵥⵍⵉⵏⵉ ⴳ ⵓⵎⵏⴰⴹ ⵏⵏⵖ ⵓⵏⴳⵉⵎ.ⵉⴳⴰ ⵍⵃⴰⵍ ⵖⵎⴽ ⵍⵍⵉ ⵜⵙⵙⵏⵎ ⴰⵎⴹⴰⴽⴰⵕ ⵏ ⵉⵏⵇⵇⵉⵙⵏ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⴼ ⵓⵣⵣⵔⴰⵢ ⵏ ⵜⵙⵔⵜⵉⵜ ⵏ ⵡⴰⵎⴰⵏ ⴷ ⵜⵉⵏ ⵓⵣⵣⵔⴰⵢ ⵏ ⵓⵖⴰⵡⴰⵙ ⴰⵏⴰⵎⵓⵔ ⵏ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ 2018-2021.
ⵉⴳⴰ ⵍⵃⴰⵍ ⵜⵉⵙⵔⵜⵉⵜ ⵏ ⵡⴰⵎⴰⵏ ⵏⵖ ⴰⵎⵓⴽⵏ ⴰⵎⵙⵙⵓⴳⵓⵔ, ⵏⴳⴰ ⵎⵏⵉⴷ ⵏ ⵓⵙⵎⵀⵍ ⵉⵥⵉⵍⵏ ⵏ ⵜⵓⵎⴰⵢⵉⵏ ⵏ ⵓⴷⵓⵙⵜⵓⵔ ⵍⵍⵉ ⵉⴼⴽⴰⵏ ⵉ ⵓⵙⵇⵇⵉⵎ ⵜⵉⵎⵥⵍⵉⵜ ⵏ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⵙ ⵓⵏⵢⴰⵍⴽⴰⵎ ⴷ ⵓⵎⵏⴰⴹ ⴰⵏⴰⵎⵓⵔ, ⴷ ⵉⵅⵎⵎⵉⵎⵏ ⵏ ⵜⴰⵏⵏⴰⵢⵜ ⵜⴰⵎⴰⵜⴰⵢⵜ, ⵙ ⵜⵡⵡⵓⵔⵉ ⵉⵡⴰⵜⵜⵙⵏ ⴰⵙⵖⵓⴷⵓ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵜⵏⵏⵓⴱⴹⴰ ⵏ ⵜⵏⴰⴼⵜ ⵜⴰⴳⴷⵓⴷⴰⵏⵜ.
ⴳ ⵜⵙⴳⴰ ⵢⴰⴹⵏⵉⵏ, ⵉⵇⵇⴰⵏ ⴷ ⵓⵣⵎⵎⴻⵎ ⵜⴰⵡⵡⵓⵔⵉ ⵏ ⵓⵙⵇⵇⵉⵎ ⴼ ⵓⵙⵓⵜⴳ ⵏ ⵓⵙⴽⵔ ⵏ ⵓⵙⵍⴳⵏ 13.103 ⴼ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵉⵏ, ⵜⵉⴽⴽⵍⵉⵜ ⵜⴰⵎⵣⵡⴰⵔⵓⵜ ⴰⴷ ⵜⵙⵡⵓⵔⵉ ⵜⵉⵎⵔⵙⵍⵜ ⵜⴰⵣⵣⵔⴰⴼⵜ ⴼ ⵢⴰⵏ ⵓⵙⵍⴳⵏ ⵉⵍⵍⴰⵏ ⵉ ⵓⵙⵓⵜⴳ ⵃⵎⴰ ⴰⴷ ⵏⵙⵙⵏ ⴰⴷⵔⵉⵣ ⵏⵏⵙ ⴼ ⵓⵙⴱⴷⴷⵉ ⵏ ⵜⵎⵓⴽⵔⵉⵙⵜⴰⴷ, ⵍⵍⵉ ⵉⵟⵟⴰⴼⵏ ⴳⴰⵔ ⵉⴷⵔⵉⵣⵏ ⴼ ⵡⴰⵎⵓⵏ. ⵏⵙⵙⵕⵚⵓ ⵙ ⵖⵎⴽ ⴰⵏⵏ ⵜⵉⵏⵏⵓⴱⴹⴰ ⵏ ⵜⵎⵙⴽⵔⵜ ⵏⵏⵖ, ⵏⵙⵔⵙ ⵜⴰⵎⵢⵓⵔⵜ ⵏ ⵓⵙⵓⵜⴳ ⵏ ⵓⵙⴽⵔ ⵏ ⵉⵙⵍⴳⵏⵏ ⴷ ⴰⴳⵣⵣⵓⵎ ⵙⴳ ⵜⵎⵙⴽⵔⵜ ⵏⵏⵖ ⵜⴰⴱⵕⵍⴰⵎⴰⵏⵉⵜ.
ⵉⵙⵜ ⵎⴰⵙⵙ ⴷ ⵉⴷ ⵎⴰⵙⵙ
ⴳ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴷ ⵜⵣⴷⴰⵢⵉⵏ ⵏ ⴱⵕⵕⴰ, ⵉⵣⵣⵉⴳⵣ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵉⵍⵉⵜ ⵏⵏⵙ ⵉⵕⵡⴰⵏ ⴳ ⵉⵏⵎⵓⵇⵇⴰⵔⵏ ⵉⴱⵕⵍⴰⵎⴰⵏⵉⵢⵏ ⵉⴳⵜⵉⵔⴰⵏⵏ ⵉⴳⵔⴰⵖⵍⴰⵏⵏ ⴷ ⵉⵎⵏⵥⴰⵡⵏ ⴷ ⵉⵙⴳⴰⵡⴰⵏⵏ, ⵉⵣⵣⵉⴳⵣ ⴳ ⵜⵎⵙⴽⵔⵜ ⵏⵏⵙ ⵉⴳⴰⵏ ⵜⵉⵏ ⵜⵙⵏⵜⴰⵢⵜ ⵜⴰⵎⴰⵢⵏⵓⵜ ⴳ ⵓⵏⵢⴰⵍⴽⴰⵎ ⵏ ⵜⵔⴰⴱⴱⵓⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⴷ ⵜⵎⵙⴰⵔⵉⵏ ⴷ ⵜⴰⵙⵙⴰⵏⵉⵏ ⵍⵍⴰⵏⵉⵏ ⴳ ⵜⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ.
ⴳ ⵓⵎⵏⵉⴷ ⴰⴷ, ⵉⵇⵇⴰⵏ ⴷ ⴰⴷⴷ ⵙⵙⴽⵯⵜⵉⵖ ⵙ ⵓⴳⵔⴰⵡ ⴰⴱⵕⵍⴰⵎⴰⵏⵉ ⴰⴳⵔⴰⵖⵍⴰⵏ ⵍⵍⵉ ⵉⵙⵏⵎⴰⵍⴰ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴷ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⴷ ⵜⵎⵔⵙⴰⵍ ⵜⵉⵙⴳⴷⴰⵏⵉⵏ, ⵙ ⵉⵡⵉⵣ ⴰⵎⴰⵜⵜⵓⵢ ⵏ ⵓⴳⵍⴷⵓⵏ ⵏ ⵉⵎⵓⵎⵎⵏ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵏⵚⵕ ⵕⴱⴱⵉ ⴳ ⵡⴰⵎⵓⵔ ⵏ ⵡⴰⴽⵓⵛ ⴳ 13 ⴰⵔ 15 ⵢⵓⵏⵢⵓ 2023 ⴼ : « ⴰⵎⵙⴰⵡⴰⵍ ⴳⵔ ⵉⵙⴳⴷⵏ : ⴰⵎⵢⴰⵡⴰⵙ ⵉ ⵉⵎⴰⵍⴰ ⵉⵛⵛⴰⵔⵏ », ⴳ ⵜⵍⵍⴰ ⵜⴱⵔⴰⵜ ⵜⴰⴳⵍⴷⴰⵏⵜ ⵜⴰⵎⴰⵜⵜⵓⵢⵜ ⵍⵍⵉ ⵢⵓⵣⵏ ⴱⴰⴱ ⵏ ⵡⴰⴷⴷⵓⵔ ⵉ ⵡⵉⴷⴰ ⴷⵔⵓⵏⵉⵏ. ⵔⴰⴷ ⵜⵖⴰⵎⴰ ⵜⴱⵔⴰⵜ ⴰⴷ ⵜⴰⴳⵍⴷⴰⵏⵜ ⵢⴰⵜ ⵜⴰⵜⴳⴰⵔⵜ ⵜⴰⵎⵣⵔⴰⵢⵜ ⵉⵙⵜⴰⵡⵀⵎⵎⴰⵏ ⵍⵍⵉ ⵉⵙⴽⵔⵏ ⴰⵙⴼⵙⵉ ⵏ ⵓⴷⵖⴰⵔ ⵏ ⵓⵎⵙⴰⵡⴰⵍ ⵏ ⵉⵙⴳⴷⵏ ⴳ ⵜⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵊⴰⵔ ⵜⵉⵖⵔⵎⵉⵡⵉⵏ ⴷ ⵉⵎⴰⴷⴰⵏⵏ, ⴷ ⵎⴰⴷ ⵜⵙⵎⵓⵏ ⴳ ⵜⵓⵎⴰⵢ ⴷ ⵓⵙⵎⴰⵇⵇⵍ ⵉⴷⵔⴰⵏ, ⴷ ⵎⴰⴷ ⵜⵉⵡⵉ ⴳ ⵉⵎⴰⵙⵙⵏ ⵉ ⵓⵙⵔⵅⵓ ⵏ ⵓⵎⵙⴰⵡⴰⵍ ⴰⴷ, ⴷ ⵓⵙⴽⵔ ⵏ ⵉⴱⵕⵍⴰⵎⴰⵏⵏ ⵏ ⵜⵉⵍⴰⵍ ⵏⵏⵙⵏ ⴳ ⵓⵙⵉⵜⵜⵉ ⵏ ⵉⵎⵉⵣⵉⵢⵏ ⵏ ⵉⵎⴰⵖⵏ ⵉⵙⴳⴷⴰⵏ ⴷ ⵜⴰⴳⵯⵉⵜ.
ⵜⴳⴰ ⵜⴱⵔⴰⵜ ⵜⴰⴳⵍⴷⴰⵏⵜ ⵜⴰⵎⴰⵜⵜⵓⵢⵜ ⴰⵍⴰ ⵜⴰⴷ ⵉⵙⵙⴼⵔⴽⵏ ⵉⵎⴷⵔⴰⵡⵏ ⴳ ⵓⴳⵔⴰⵡ ⴰⴷ, ⵍⵍⵉ ⵍⴽⵎⵏⵉⵏ 500 ⵏ ⵓⵎⴷⵔⴰⵡ ⵙⴳ ⵎⴰⵕⵕⴰ ⵉⵙⴳⴷⵏ ⴷ ⵜⵉⵏⵎⴰⵍ ⵏ ⵓⵙⵡⵉⵏⴳⵎ ⴷ ⵉⵙⵡⴰⵍⴰⵢⵏ ⵉⵙⵔⵜⴰⵏⵏ, ⴳ ⵓⵎⴹⴰⴽⴰⵕ ⵉⴱⵓⵖⵍⴰⵏ ⵍⵍⴰⵏⵉⵏ ⴳ ⵓⴳⵔⴰⵡ, ⵙⵍⴰⵡⴰⵏ ⴰⴽⴽⵯ ⴳ ⵓⵙⵉⵡⴹ ⴰⵎⴳⴳⴰⵔⵓ (ⴰⵍⵖⵓ ⵏ ⵡⴰⵎⵓⵔ ⵏ ⵡⴰⴽⵓⵛ) ⵍⵍⵉ ⵉⴳⴰⵏ ⵜⴰⵢⵢⴰⴼⵓⵜ ⵏ ⵜⵡⵡⵓⵔⵉⵡⵉⵏ ⵏ ⵓⴳⵔⴰⵡ.
ⴳ ⵜⵙⴳⴰ ⵢⴰⴹⵏⵉⵏ, ⵏⵎⵎⴰⵖ ⴰⴷ ⵖⴰⵎⴰⵏⵜ ⵜⵎⵙⴰⵔⵉⵏ ⵏ ⵓⵎⵏⵥⴰⵡ ⵏⵏⵖ ⴰⴼⵔⵉⵇⵉ ⴳ ⵓⵖⴰⵡⴰⵙ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⵜⴰⵎⵖⵔⵉⴱⵉⵜ ⵙ ⵓⵏⵄⴰⵕ ⵏ ⵜⵎⵙⴰⵔⵉⵏ ⵏ ⵉⴼⵔⵉⵇⵢⴰ ⴳ ⵉⵏⵎⵓⵇⵇⴰⵔⵏ ⵉⴱⵕⵍⴰⵎⴰⵏⵉⵢⵏ ⵉⴳⵜⵉⵔⴰⵏⵏ ⴷ ⵓⵏⵄⴰⵕ ⵏ ⵓⵙⴽⵔ ⵏ ⵜⵣⵔⴼⵜ ⴳ ⵉⴼⵔⵉⵇⵢⴰ ⵍⵍⵉ ⵉⵎⵎⴰⵖⵏ ⴷ ⵉⴷⵔⵉⵣⵏ ⴳⴰⵏⵉⵏ ⴳⴰⵔ ⵏ ⵜⵎⵓⴽⵔⵉⵙⵉⵏ ⵏ ⵓⵏⵣⵡⵉ ⴷ ⵓⵣⵡⴰⴳ ⴷ ⵓⵏⴰⵔⵓⵣ ⵏ ⵉ ⵓⴼⵔⴰ ⴷ ⵜⵏⴼⵔⵓⵜ.
ⴳ ⵓⵎⵏⵉⴷ ⴰⴷ, ⵔⴰⴷ ⵙⴰⵡⵍⵖ ⴼ ⵜⵉⵏⵏⴰⵡⵜ ⵍⵍⵉ ⵉⵙⵏⵓⴱⴳ ⵓⵙⵇⵇⵉⵎ ⵓⵙⵙⴰⵏ ⵏ 6 ⴷ 7 ⵢⵓⵍⵢⵓⵣ 2023 ⴼ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⴰⴼⵔⵉⵇⵉ ⴳ ⵓⵙⴰⵜⵉ ⵏ ⵜⵏⴰⵥⴰⵕⵉⵏ ⵏ ⵖⵉⵍⴰⴷ ⵙ ⵜⴷⵔⴰⵡⵜ ⵏ ⵉⵏⵙⵙⵉⵅⵏ ⵏ ⵜⵙⵇⵇⵉⵎⵉⵏ ⵏ ⴱⵕⵕⴰ ⴳ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ ⵉⴼⵔⵉⵇⵉⵢⵏ, ⵍⵍⵉ ⵉⴳⴰⵏ ⵜⴰⵎⵍⴷⴰ ⵏ ⵓⵎⴹⴰⴽⴰⵕ ⵅⴼ ⴽⵉⴳⴰⵏ ⵏ ⵉⵙⵡⵉⵏⴳⵉⵎⵏ ⴷ ⵜⵙⵓⵎⵔⵜ ⵏ ⵉⴼⵙⵙⴰⵢⵏ ⵉ ⴽⵔⴰ ⵏ ⵜⵎⵓⴽⵔⵉⵙⵉⵏ ⵏ ⵓⵎⵏⵥⴰⵡ ⴷ ⵜⵉⵡⵉⵙⵉ ⵜⴰⴱⵕⵍⴰⵎⴰⵏⵉⵜ ⵍⵍⵉ ⵉⵜⵜⵓⴱⴷⴰⵔⵏ ⴳ ⵜⴻⵜⴳⴰⵔⵜ ⵢⵓⵙⵉⵏ ⵉⵙⵎ ⵏ: “ⴰⵍⵖⵓ ⵏ ⵕⵕⴱⴰⵟ” ⵏ ⵜⵙⵇⵇⵉⵎⵉⵏ ⵏ ⴱⵕⵕⴰ ⴳ ⵉⴱⵕⵍⴰⵎⴰⵏⵏ ⵉⴼⵔⵉⵇⵉⵢⵏ.
ⴳⴰⵏ ⵉⵏⵎⵓⵇⵇⴰⵔⵏ ⴰⴷ ⵉⴱⵕⵍⴰⵎⴰⵏⵉⵢⵏ ⵍⵍⵉ ⵜⵙⵏⵓⴱⴳ ⵜⵎⴰⵣⵉⵔⵜ ⵏⵏⵖ, ⵜⴰⵎⴰⵜⴰⵔⵜ ⵜⴰⴳⵔⴰⵖⵍⴰⵏⵜ ⵢⴰⴹⵏⵉⵏ ⴼ ⵜⵎⵢⵉⵎⴰⵏⵜ ⵍⵍⵉ ⵟⵟⴰⴼ ⵜⵎⴰⵣⵉⵔⵜ ⵏⵏⵖ ⴳ ⵓⵙⵡⵉⵔ ⴰⴳⵔⴰⵖⵍⴰⵏ. ⴳ ⵢⴰⵏ ⵓⵎⵏⴰⴹ ⴰⴳⵔⴰⵖⵍⴰⵏ ⵉⵛⴰⵇⵇⴰⵏ ⴷ ⵓⵎⵏⴰⴹ ⴰⵙⴳⴰⵡⴰⵏ ⴳ ⵍⵍⴰⵏ ⵉⵎⴰⵖⵏ ⴷ ⵜⴰⵙⵙⴰⵙⵉⵏ, ⴷⵔⵓⵙⵏⵜ ⵜⵎⵉⵣⴰⵔ ⵍⵍⵉ ⵥⴹⴰⵕⵏⵉⵏ ⴰⴷ ⵙⵏⵓⴱⴳⵏⵜ ⴰⵏⵛⴽ ⴰⴷ ⵏ ⵉⴳⵔⴰⵡⵏ ⵉⴳⵔⴰⵖⵍⴰⵏⵏ ⴷ ⵉⵙⴳⴰⵡⴰⵏⵏ ⵓⵏⴱⵉⴹⵏ ⴷ ⵉⴱⵕⵍⴰⵎⴰⵏⵉⵢⵏ, ⵉⵖⵔⵎⴰⵏⵏ ⵉⵙⵔⵜⴰⵏⵏ ⴷ ⵉⴷⵎⵙⴰⵏⵏ ⴷ ⵡⵉⵏ ⵜⵏⵓⴼⴰ, ⴷ ⵓⵙⵎⵓⵏ ⵏ ⵓⴽⵍⴰⵏ ⵏ ⴽⵓ ⵉⵙⵡⴰⵍⴰⵢⵏ ⴷ ⵉⵥⵓⵕⴰⵏ ⴷⴷⵓ ⵢⴰⵏ ⵓⵣⵓⵔ ⵉ ⵓⵎⴹⴰⴽⴰⵕ ⵏ ⵜⵎⵙⴰⵔⵉⵏ ⴼ ⵜⵉⵍⴰⵡⵜ ⴷ ⵉ ⵉⵎⴰⵍ ⵏ ⵓⴼⴳⴰⵏ .
ⴰⵔ ⵜⵎⵎⴰⵍ ⵜⵙⵓⴳⵔⵜ ⴰⴷ ⴰⵙⴷⵖⵔ ⵏ ⵜⵎⴰⵣⵉⵔⵜ ⵏⵏⵖ ⴰⵙⴳⴰⵡⴰⵏ ⴷ ⵓⴳⵔⴰⵖⵍⴰⵏ ⴷ ⵓⵙⵖⵣⵏ ⵏⵏⵙ ⴷ ⵓⵙⵖⵡⵏ ⵏⵏⵙ ⵉⵖⵣⴰⵏ ⴳ ⵓⵎⵣⴰⵖ ⵏ ⵜⵏⴼⵔⵓⵜ ⴷ ⵓⴼⵔⴰ ⴷ ⵜⵎⵢⵉⴷⵉⵔⵜ, ⵎⴽ ⵍⵍⵉ ⵜⵎⵎⴰⵍ ⵜⴰⵎⵢⵉⵎⴰⵏⵜ ⵍⵍⵉ ⴷⴰⵔⵙ ⴷ ⵓⵙⵙⵏ ⵏ ⵓⵔⴳⴳⵉⴳ ⴷ ⵜⵏⴼⵔⵓⵜ ⵍⵍⵉ ⴷⴰⵔⵙ.
ⵓⵔ ⵏⵓⴼⵉ ⴰⴷ ⴽⵓⵍⵍⵓ ⵏⴻⵏⵏⴰ ⵜⴰⵢⵢⴰⴼⵓⵜ ⵏ ⵓⵙⵇⵇⵉⵎ ⵏ ⵓⵎⵏⵉⴷ ⵏ ⵜⵣⴷⴰⵢⵉⵏ ⵏ ⴱⵕⵕⴰ ⴷ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ, ⵍⵍⵉ ⴱⴷⴷⴰ ⵏⵙⴽⵔ ⵙ ⵓⵙⵡⵉⵏⴳⵎ ⵏ ⵜⴷⵉⴱⵍⵓⵎⴰⵙⵉⵜ ⵜⴰⵎⵖⵔⵉⴱⵉⵜ ⵎⴽ ⵍⵍⵉ ⵜⵜ ⵉⵙⵔⵙ ⵢⵉⵍⵉ ⴼⵍⵍⴰⵙ ⴱⴰⴱⴰ ⵏ ⵡⴰⴷⴷⵓⵔ, ⵉⵇⵇⴰⵏ ⴷ ⵓⵙⵙⴽⵯⵜⵉ ⵏ ⴽⵔⴰ ⵜⵔⵙⴰⵍ ⵍⵍⵉ ⵙ ⵏⵙⴰⵡⴰⵍⴰ ⴳ ⵓⵎⵏⴰⴹ ⵏ ⵖⵉⵍⴰⴷ :
ⴳ ⵓⵎⵣⵡⴰⵔⵓ, ⴰⵔ ⵏⵙⵎⴰⵢⵏⵓ ⵜⴰⴳⵯⵉⵜ ⵏⵏⵖ ⵉ ⵎⴰⴷ ⵉⵜⵜⴽⴽⴰⵏ ⴷⴰⵔ ⴽⵔⴰ ⵏ ⵜⵎⵔⵙⴰⵍ ⵏ ⵓⵕⵓⴱⴱⴰ, ⵙⵍⴰⵡⴰⵏ ⴰⴽⴽⵯ ⴰⴱⵕⵍⴰⵎⴰⵏ ⵏ ⵓⵕⵓⴱⴱⴰ, ⵙ ⵓⵙⴽⵔⴽⵙ ⴷ ⵓⵙⵙⵀⵔⵛ ⵏ ⴼⴰⴱⵓⵕ ⵉ ⵜⵎⴰⵣⵉⵔⵜ ⵏⵏⵖ, ⴰⵢⵍⵍⵉ ⵉⵃⴹⴰⵏ ⵜⴰⴳⵯⵉⵜ ⵏ ⵢⴰⵏ ⵓⴽⵍⵓ ⴰⵙⵔⵜⴰⵏ ⴳ ⵜⵎⵔⵙⵍⵜ ⴰⴷ ⵉ ⵉⵎⵓⵔⵙⵏ ⴷ ⵓⵙⴷⵖⵔ ⵉⵥⵉⵍⵏ ⵏ ⵜⵎⴰⵣⵉⵔⵜ ⵏⵏⵖ. ⵍⵍⵉⵖ ⵏⵓⵎⵥ ⵏⵙⴱⵔⵔⴽ ⴰⵎⵙⴰⵡⴰⵍ ⴰⴽ ⵜⵉⵏⴱⴰⴹⵉⵏ ⵜⵉⵙⵔⵜⴰⵏⵉⵏ ⵏ ⵜⵎⵔⵙⵍⵜ ⴰⴷ, ⴷⴰ ⵏⴰⵍⵙ ⴰⵙⴷⴷⵉⴷ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⴳ ⵓⵙⴰⵜⵉ ⵏ ⵓⵡⵇⵇⵔ ⵉⵜⵜⵓⵙⵏⴼⴰⵍⵏ ⴷ ⵜⵏⴳⴳⵯⴰ ⴷ ⵓⵙⵖⵏ ⵙ ⵎⴰⵙ ⵏⴼⴼⵖ ⴷ ⵓⵖⵣⴰⵏ.
ⵡⵉⵙ ⵙⵉⵏ, ⴷⴰ ⵏⵙⴷⴷⵉⴷ ⵎⴰⵙ ⵉⴳⴰ ⴳ ⵓⵣⵔⴼ ⵏⵏⵖ ⴰⴷ ⵏⵙⵎⴰⵢⵏⵓ ⵜⵉⵎⴷⵔⴰⵡⵉⵏ ⵏⵏⵖ ⴷ ⵓⵙⴼⵍⵙ ⵏ ⵜⵏⵓⴼⴰ ⵏⵏⵖ ⵜⵉⵏⴰⵎⵓⵔⵉⵏ ⴷ ⵉⵙⵜⴰⵢⵏ ⵏⵏⵖ ⵉⵙⵜⵔⴰⵜⵉⵊⵉⵢⵏ, ⴰⵢⵍⵍⵉ ⵉⴳⴰⵏ ⴰⵣⵔⴼ ⵉⵙⵎⴷⵏ ⵏ ⵜⵅⵅⵓⵜⵔⴰ ⵍⵍⵉ ⵓⵔ ⵔⴰⴷ ⵜⵙⴱⵉⴷⴷ ⴽⵔⴰ ⵏ ⵜⴷⵓⵙⵉ ⴷ ⴽⵔⴰ ⵏ ⵜⵏⵏⵓⵄⴰⵕ, ⵜⵉⵔⵎⵉⵜ ⵏ ⵓⵙⴷⵍ ⵏ ⵓⴽⵛⵛⵓⵍ ⴳ ⵜⵖⴰⵡⵙⵉⵡⵉⵏ ⵏⵏⵖ ⵜⵉⴳⵯⵏⵙⴰⵏⵉⵏ, ⵙ ⵜⴽⵔⴽⴰⵙ ⵜⵜⵓⴼⴹⴰⵃⵏⵉⵏ ⴷ ⵓⵙⴽⵔ ⵏ ⵜⴰⵙⵙⴰⵙⵉⵏ, ⵓⵔ ⵔⴰⴷ ⵣⵔⵉⵏⵜ ⴼ ⵉⴷ ⴱⴰⴱ ⵏ ⵓⵏⵍⵉ ⵉⵙⵔⵜⴰⵏⵏ ⴷ ⵉⴳⵎⴰⵎⵏ ⵏ ⵜⵔⴰⴱⴱⵓⵜ ⵜⴰⴳⵔⴰⵖⵍⴰⵏⵜ.
ⵜⵉⵙ ⴽⵕⴰⴹⵜ ⵜⴳⴰ ⵜⴰⵔⵙⵍⵜ ⵜⴰⵏⴰⵎⵓⵔⵜ, ⵓⵔ ⴼⵍⵍⴰⵙ ⵉⵍⵍⵉ ⵓⵎⴹⴰⴽⴰⵕ, ⵜⴳⴰ ⵜⵉⵏ ⵜⵎⵙⴰⵔⵜ ⵜⴰⵏⴰⵎⵓⵔⵜ ⴷ ⵡⴰⴷⴷⴰⴷ ⴼⵍⵍⴰⵙ ⵍⵍⵉ ⵉⴳⴰⵏ ⴰⵙⵖⵍ ⵏ ⵜⵣⴷⴰⵢⵉⵏ ⵏⵏⵖ ⵜⵉⴳⵔⴰⵖⵍⴰⵏⵉⵏ, ⵙ ⵓⵙⴽⵔ ⴷ ⵓⵣⵣⴳⵉⵔ ⵏ ⵓⵙⴷⴷⵉⴷ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵍⵍⵉⵖ ⵉⵏⵏⴰ : ⵉⴳⴰ ⵓⵙⴷⴰⵡ ⵏ ⵚⵚⵃⵕⴰ ⵜⴰⵙⵎⵓⵇⵇⵓⵍⵜ ⵍⵍⵉⵙ ⵉⵥⵕⵕⴰ ⵍⵎⵖⵔⵉⴱ ⴰⵎⴰⴹⴰⵍ, ⵜⴳ ⴰⵙⵖⵍ ⵉⴼⴰⵡⵏ ⵉⴳⴰⵏ ⴰⴼⵔⴰⵔ ⵍⵍⵉ ⵙⴰ ⵉⵙⵖⴰⵍ ⴰⵖⵥⴰⵏ ⵏ ⵜⴷⴷⵓⴽⴽⵯⵍⴰ ⴷ ⵜⵉⵕⵡⵉ ⵏ ⵜⵎⴷⵔⴰⵡⵉⵏ ». ⵉⵙⵎⴷ ⵡⴰⵡⴰⵍ ⵏ ⴱⴰⴱ ⵏ ⵡⴰⴷⴷⵓⵔ.
ⵜⴳⴰ ⵜⵎⵙⴰⵔⵜ ⵏ ⵜⵢⴰⵏⵜ ⵏⵏⵖ ⵜⴰⵏⴰⴽⴰⵍⵜ, ⴷ ⵔⴰⴷ ⵜⴳ, ⴳ ⵜⵣⵡⵉⵔⵉ ⵏ ⵓⵙⵡⵓⵔⵉ ⵏⵏⵖ ⴳ ⵓⴷⵎ ⵏ ⵜⵣⴷⴰⵢⵉⵏ ⵏ ⴱⵕⵕⴰ ⴷ ⵉⵏⵢⴰⵍⴽⴰⵎⵏ ⵏⵏⵖ. ⵔⴰⴷ ⵏⴹⵓⴼ ⴰⵎⵣⴰⵖ ⵏⵏⵙ ⵏⵙⵙⵀⵔⵛ ⵉⵡⵏⵏⴰⵏ ⵏ ⵡⴰⵄⴷⵉⵡⵏ ⵏⵏⵖ ⵍⵍⵉ ⴱⴷⴷⵏⵉⵏ ⴼ ⵥⵥⵓⵕ ⴷ ⵜⵉⵕⵥⵉ ⵏ ⵜⵉⴷⵜ ⵏ ⵓⵎⵣⵔⵓⵢ. ⴰⵏⴰⵡ ⵏⵏⵖ ⵉⴳⴰⵜ ⴰⵙⵎⴰⵇⵇⵍ ⴷ ⵜⵙⵔⵜⴰⵢ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵏⵚⵕ ⵕⴱⴱⵉ ⴷ ⵉⵙⵡⴰⵍⴰⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⵙⵏⴰⵍ ⵏⵏⵖ, ⴷ ⵜⵉⵍⵉⵜ ⵏ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵎⵎⴰⵖⵏⵉⵏ ⵏ ⵉⵡⵜⵜⴰ ⵏ ⵜⵎⵓⵔⵜ ⴷ ⵜⵏⴼⵓⵔⵓⵜ ⵏⵏⵙ ⴷ ⵓⵔⴳⴳⵉⴳ ⵏⵏⵙ. ⵉ ⵜⴳⴳⴰⵍⵉⵏ ⴰⴷ ⵙ ⵜⵏⴰⵔⴰ ⵏ ⵓⵏⵎⵖⵓⵔ ⵏⵏⵙ ⴰⵎⴰⵜⵜⵓⵢ ⴷ ⵓⵏⵙⵙⵉⵅⴼ ⵏ ⵜⵎⴰⵖⵜ ⵏⵏⵙ ⵜⴰⵎⴰⵜⴰⵢⵜ, ⴰⵙⵓⵜⴳ ⴷ ⵓⵙⵙⵏ, ⵉ ⵉⵙⵜ ⵎⴰⵜⵏⵖ ⴷ ⴰⵢⵜ ⵎⴰⵜⵏⵖ ⴳ ⵜⵙⴳⴳⵉⵡⵉⵏ ⵏⵏⵖ ⵏ ⵉⴼⴼⵓⵙ ⴰⵣⵓⵍ ⴷ ⵓⵙⵓⵜⴳ ⴼ ⵓⵙⴱⴷⴷⵉ ⵏⵏⵙⵏ ⵏ ⵉⵖⴰⵡⴰⵙⵏ ⵏ ⵡⴰⵄⴷⵉⵡⵉⵏ ⴷ ⵓⵍⵜⴰⵖ ⵏⵏⵙⵏ ⵏ ⵜⵉⵔⴰⵜ ⵙ ⵜⵓⴳⴳⴰⵙ ⴳ ⵓⵚⴽⵓ ⵏ ⵜⵎⵔⵙⴰⵍ ⴷ ⵓⵙⴷⴷⵉⴷ ⵏ ⵓⵎⵛⴰⴱⴱⴰⴽ ⵊⴰⵔ ⵉⴼⵔⴷⴰⵙ ⵏ ⵜⵎⵓⵔⵜ ⵉⴳⴰⵏ ⵢⴰⵜ.
ⵉⵙⵜ ⵎⴰⵙⵙ ⴷ ⵉⴷ ⵎⴰⵙⵙ
ⵉⴳⴰ ⵙⴳ ⵜⵉⵎⵥⵍⴰⵢ ⵏ ⵓⵏⴳⵔⴰⵡ ⵏⵏⵖ ⴰⴷⵙⵜⴰⵔ ⴷ ⵓⵎⵔⵙⵍⴰⵏ ⴰⵙⴷⵔⵓ ⴷ ⵓⵎⵛⴰⵡⴰⵕ ⵙ ⵜⴷⵉⵎⵓⵇⵔⴰⵟⵉⵜ ⵜⴰⵎⴷⵔⴰⵡⵜ ⴷ ⵜⵉⵏ ⵜⵏⵎⵓⵔⵉ ⵙ ⵎⴰⵕⵕⴰ ⵉⵎⴰⵙⵙⵏ ,,ⵙ. ⵙ ⵖⵎⴽ ⴰⵏⵏ, ⵏⵣⵣⵉⴳⵣ ⴰⵏⵏⵓⵕⵥⵎ ⴼ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⵍⵍⵉ ⵉⴳⴰⵏ ⴱⴰⴱ ⵏ ⵜⵙⵏⵜⴰⵢⵉⵏ ⵏ ⵜⵏⵎⵓⵔⵉⵜⵉⵏ ⴷ ⵉⵏⵎⵓⵔⴰⵏ, ⵏⵙⵏⵎⴰⵍⴰ ⵜⵉⵏⵏⴰⵡⵉⵏ ⴷ ⵉⵏⵎⵓⵇⵇⴰⵔⵏ ⵉⵙⴳⵓⵎⴰⵏⵏ ⴷ ⵡⵉⵏ ⵓⵙⵎⵓⵜⵜⴳ ⵙ ⵜⴷⵔⴰⵡⵜ ⵏ ⵜⵎⵔⴰⵡⵉⵏ ⵏ ⵜⵎⴰⴷⴷⴰⵙⵉⵏ ⵜⵉⵖⵔⵎⴰⵏⵉⵏ ⵙⴳ ⵎⴰⵕⵕⴰ ⵜⵉⵙⴳⴳⵉⵡⵉⵏ ⵏ ⵜⴳⵍⴷⵉⵜ.
ⵉⴳⴰ ⵡⴰⵡⵜⵜⴰⵙ ⵏⵏⵖ ⵉⵥⵉⵍⵏ, ⴷ ⵔⴰⴷ ⴱⴷⴷⴰ ⵉⴳ, ⴰⵙⵕⵚⵓ ⵏ ⵜⵙⵓⵍⴰⵏⵜ ⵏ ⵓⵎⵙⴰⵡⴰⵍ ⴷ ⵓⵏⵏⵓⵕⵣⵎ ⴼ ⵡⴰⵎⵓⵏ ⴰⵖⵔⵎⴰⵏ ⵃⵎⴰ ⴰⴷ ⴰⵡⵙⵏ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵉⵏ ⵙ ⵜⴰⵏⵏⴰⵢⵜ ⴷ ⵜⵙⵓⵎⵔⵜ ⴳ ⵓⵣⵣⵔⴰⴼ ⴷ ⵜⵉⴹⴰⴼ ⴷ ⵓⵙⵓⵊⴷ ⵏ ⵜⵙⵔⵜⴰⵢ ⵜⵉⴳⴷⵓⴷⴰⴷⵏⵉⵏ ⴷ ⵓⵙⵓⵜⴳ ⵏⵏⵙⵏⵜ, ⴷ ⵓⵙⵙⵔⵇⴱ ⵉ ⵓⵙⵓⵊⴷ ⴷ ⵓⵙⵎⵏⵉⴷ ⵏ ⵜⵓⵍⴽⵉⵎⵉⵏ ⴷ ⵜⵓⵜⵔⴰⵡⵉⵏ ⵉ ⵉⵡⵣⵔⴰⴼ, ⴰⵢⵍⵍⵉ ⵔⴰⴷ ⵉⵙⴽⵔ ⴳ ⵜⴷⵉⵎⵓⵇⵔⴰⵟⵉⵜ ⵜⴰⵎⴷⵔⴰⵡⵜ ⴰⵙⴰⵔⵓ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⵔⵙⵍⴰⵏⵜ ⴷ ⵜⴳⵏⵙⴰⵙⵜ ⵙ ⵉⵡⵜⵜⴰ ⵍⵍⵉ ⴷ ⵉⵇⵇⴰⵏ ⵓⵡⵇⵇⵔ ⵊⴰⵔ ⵓⵙⵔⵜⴰⵏ ⴷ ⵓⵖⵔⵎⴰⵏ, ⵊⴰⵔ ⵉⴽⴰⴱⴰⵕⵏ ⴷ ⵜⵎⵙⵎⵓⵏⵉⵏ.
ⴳ ⵓⵎⵏⵉⴷ ⴰⴷ, ⵉⵇⵇⴰⵏ ⴷ ⵓⵙⵙⴽⵯⵜⵉ ⵏ ⵜⵉⵏⵏⴰⵡⵜ ⵍⵍⵉ ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⴳ ⵓⵙⵇⵇⵉⵎ ⴼ : « ⵉⴽⵛⵛⵓⵎⵏ ⵏ ⵜⴳⵎⵉ ⴳ ⵉⴷⵓⵔⴰⵔ » ⴳ 22 ⵢⵓⵏⵢⵓ ⵙ ⵜⴷⵔⴰⵡⵜ ⵏ ⴽⵉⴳⴰⵏ ⵏ ⵜⵎⵙⵎⵓⵏⵉⵏ ⵍⵍⴰⵏⵉⵏ ⴳ ⵜⴰⵎⵓⵏⵜ ⵜⴰⵖⵔⵎⴰⵏⵜ ⵉ ⵓⴷⵔⴰⵔ.
ⵜⵙⵙⵏⵎ ⵏⵉⵜ ⴰⵜⵉⴳ ⵏ ⵜⴳⵎⵉ ⵏ ⵉⴷⵓⵔⴰⵔ ⴳ ⵍⵎⵖⵔⵉⴱ ⵍⵍⵉ ⴳⴰⵏⵉⵏ ⴰⵖⴱⴰⵍⵓ ⵏ ⵓⵎⵣⵔⵓⵢ ⴷ ⵜⴷⵍⵙⴰ ⴷ ⵜⵖⵔⵎⴰ ⴷ ⵡⴰⵡⵏⴰⴹ ⵉⵟⵟⴰⴼⵏ ⵜⵉⵍⴰⵍⵜ ⵏⵏⵙ ⴳ ⵓⵎⵢⴰⵙ ⴰⵡⵏⴹⴰⵏ ⴷ ⵜⴳⵎⵉ, ⵜⴳ ⵉⵎⵔⵙⵉ ⵏ ⵜⵏⴰⵥⴰⵕⵉⵏ ⴷ ⵜⴳⵎⵉ ⴷ ⵡⴰⵡⵏⴰⴹ.
ⵙ ⵓⵎⵢⴰⵙ ⴷ ⵓⵏⵏⵓⵕⵥⵎ ⴰⴷ ⵉⵙⵓⵍⵏ ⴼ ⵡⴰⵎⵓⵏ ⴰⵖⵔⵎⴰⵏ, ⵏⵎⵎⴰ ⵉ ⵓⵙⵉⵥⴹⵕ ⵏ ⵉⵎⵙⵡⵓⵔⵉⵢⵏ ⵏⵏⵙ ⵙ ⵉⵙⵎⵓⵜⵜⴳⵏ ⴷ ⵜⵙⵓⴳⴰⵔ ⵜⵓⵛⵛⵉⵍⵉⵏ ⴷ ⵓⵙⵙⵏ ⵏ ⵜⵡⵡⵓⵔⵉ ⵜⴰⴱⵕⵍⴰⵎⴰⵏⵉⵜ.
ⴳ ⵓⵎⵏⵉⴷ ⴰⴷ, ⵏⵙⵏⵎⴰⵍⴰ ⴳ ⵓⵙⴰⵜⵉ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ, ⵙⵉⵏ ⵡⵓⵙⵙⴰⵏ ⵏ ⵓⵙⵎⵓⵜⵜⴳ ⵉ ⵚⴰⵃⴰ ⵏ ⵜⵎⵙⵎⵓⵏⵉⵏ ⴳ ⵢⵉⴳⵔ ⵏ ⵜⵙⵏⵜⴰⵢⵜ ⵏ ⵜⵎⴷⵔⴰⵡⵜ ⵉ ⵜⵏⴱⴰⴷⵜ ⵉⵏⵏⵓⵕⵥⵎⵏ, ⵉ ⵓⵙⴽⵔ ⵏ ⵉⵙⵖⴰⵡⵏ ⵏⵏⵖ ⴳ ⵓⵙⴰⵜⵉ ⵏ ⵜⵙⵏⵜⴰⵢⵜ ⴰⴷ ⵜⴰⴳⵔⵖⵍⴰⵏⵜ ⴳ ⵉⵍⵍⴰⵏ ⵓⵙⵇⵇⵉⵎ ⵏⵏⵖ.
ⴳ ⵜⵙⴳⴰ ⵢⴰⴹⵏⵉⵏ, ⵏⵕⵥⵎ ⴰⵖⴰⵡⴰⵙ ⵏ ⵓⵙⵎⵓⵜⵜⴳ ⵏ ⵉⵄⵔⵔⵉⵎⵏ ⵏ ⵉⴽⴰⴱⴰⵕⵏ ⵍⵍⴰⵏⵉⵏ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵎⵔⴰⵎⴰⵏ ⵉ ⵙⵉⵏ ⵉⵙⴳⴳⵯⴰⵙⵏ ⵃⵎⴰ ⴰⴷ ⵙⵙⵏⵏ ⵜⵡⵡⵓⵔⵉ ⵜⴰⵎⵔⵙⵍⴰⵏⵜ ⴷ ⵜⴱⵕⵍⴰⵎⴰⵏⵉⵜ ⴷ ⵜⴱⵔⵉⴷⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵉⵏⴳⵔⴰⵡⵏ ⵉⴱⵕⵍⴰⵎⴰⵏⵉⵢⵏ ⴷ ⵜⴷⵔⴰⵡⵜ ⵜⴰⵏⵎⵓⵔⵉⵜ. ⵏⴻⵏⵏⵓⵔⵣ ⴰⴷ ⴰⵡⵙⵏ ⵉⵙⵎⵓⵜⵜⴳⵏ ⴰⴷ ⴳ ⵓⵙⵕⵚⵓ ⵏ ⵜⴷⵍⵙⴰ ⵏ ⵜⴷⵔⴰⵡⵜ ⴷ ⵜⵎⵢⵉⵎⴰⵏⵜ ⴳ ⵜⵎⵔⵙⴰⵍ ⴷ ⴰⴷ ⴷⴷⵔⵏ ⵉⵄⵔⵔⵉⵎⵏ ⵜⴰⵡⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⴳ ⵓⴳⵯⵏⵙ.
ⵙ ⵜⵙⵏⵜⴰⵢⵉⵏ ⴰⴷ, ⵏⴻⵏⵏⵓⵔⵣ ⴰⵙⵕⵚⵓ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⴷⵔⴰⵡⵜ ⵙ ⵓⵎⵛⴰⵡⴰⵕ ⴰⴳⴷⵓⴷⴰⵏ ⴷ ⵜⵓⵍⴽⵉⵎⵉⵏ ⴷ ⵜⵓⵜⵔⴰⵡⵉⵏ ⵉ ⵓⵣⵣⵔⴰⴼ, ⵍⵍⵉⵖ ⵏⴼⵔⴽ ⵙ ⵜⵉⵍⴰⵍⵜ ⵏⵏⵙ ⴳ ⵓⵙⴷⵓⵙ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⵔⵙⵍⴰⵏⵜ.
ⵉ ⵓⵙⵔⵅⵓ, ⵏⵎⵎⴰⵖ, ⴳ ⵓⵙⴰⵜⵉ ⵏ ⵉⵖⴰⵡⴰⵙⵏ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ, ⴼ ⵓⵙⵓⵊⴷ ⵏ ⵜⵙⵉⵍⴰ ⵜⴰⵍⵉⴽⵟⵕⵓⵏⵉⵜ ⵉ ⵓⵙⵎⵏⵉⴷ ⵏ ⵜⵓⵍⴽⵉⵎⵉⵏ ⴷ ⵜⵓⵜⵔⴰⵡⵉⵏ ⵉ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵜⵖⴰⵔⴰⵙⵜ ⵜⴰⵎⵓⵟⵟⵓⵏⵜ, ⵔⴰⴷ ⵢⵉⵍⵉ ⵓⵕⵥⵥⵓⵎ ⵏⵏⵙ ⴳ ⵓⵙⴳⴳⵯⴰⵙ ⴰⵣⵣⵔⴰⴼ ⴷ ⵢⵓⵛⴽⴰⵏ, ⵏⴻⵏⵏⵓⵔⵣ ⴰⴷ ⵜⴰⵡⵙ ⴷ ⵓⵙⵔⵅⵓ ⵏ ⵜⵎⵙⴽⵔⵜ ⴰⴷ ⵜⴰⵏⴰⵎⵓⵔⵜ ⵉⵥⵉⵍⵏ.
ⵉⵙⵜ ⵎⴰⵙⵙ ⴷ ⵉⴷ ⵎⴰⵙⵙ
ⵉⴳⴰ ⵎⴰ ⴰⵏⵏ ⴰⵢⵍⵍⵉ ⵉⵥⵍⵉⵏ ⵜⴰⵡⵡⵓⵔⵉⵏⵏⵖ ⴳ ⵜⵙⵓⵜⵍⵜ ⴰⴷ, ⵜⴰⵡⵡⵓⵔⵉ ⵍⵍⵉⴷ ⵉⵇⵇⴰⵏ ⴰⴷ ⵏⵙⵓⵜⴳ ⵜⵉⵢⵢⴰⴼⵓⵜⵉⵏ ⵏⵏⵙ ⵏⵙⴽⵔ ⴰⵙⴳⵓⴷⵉ ⵍⵍⵉ ⵔⴰⴷ ⵉⵙⵙⵕⵚⵓ ⵜⵉⵏⵡⵉⵜ ⵏ ⵜⴷⵉⵎⵓⵇⵔⴰⵟⵉⵜ ⵏⵏⵖ ⵃⵎⴰ ⴰⴷ ⵜⴳ ⵜⴰⴷ ⵉⵟⵟⴰⴼⵏ ⵜⴰⵢⵢⴰⴼⵓⵜ ⵉ ⵓⵙⵕⵚⵓ ⵏ ⵉⵎⵓⴽⵏⵏ ⵍⵍⵉ ⵜⵙⴽⴰⵔ ⵜⵎⴰⵣⵉⵔⵜ ⵏⵏⵖ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ. ⵉⵇⵇⴰⵏ ⴷ ⴰⴷⴷ ⵏⵙⵙⴽⵯⵜⵉ ⵉⵎⵏⴰⴹⵏ ⵉⵙⴳⴰⵡⴰⵏⵏ ⴷ ⵉⴳⵔⴰⵖⵍⴰⵏⵏ, ⵖ ⴳⴰⵏⵜ ⵜⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ ⵜⵉⴷⴰ ⴱⴹⴹⴰⵏⵉⵏ ⵙ ⵢⴰⵜ ⵜⵖⴰⵔⴰⵙⵜ ⵓⵔ ⵊⵊⵓ ⵜⵜⵓⵙⵙⴰⵏ ⴷ ⵜⵙⵔⵜⵉⵜ ⵏ ⵉⵛⵓⵎⴰⵛ ⴷ ⵜⴰⵣⵍⴰ ⵉ ⵓⵙⴼⵍⵙ ⵏ ⵜⵏⵓⴼⴰ ⵜⵉⵏⴰⵎⵓⵔⵉⵏ ⴳ ⵓⵎⵏⴰⴹ ⵏ ⵜⴰⵙⵙⴰⵙⵉⵏ ⴷ ⵓⵛⵃⵓ ⴷ ⵜⵉⴹⴰⴼ.
ⵜⴰⵏⵎⵎⵉⵔⵜ ⴼ ⵓⵙⵙⴼⵍⴷ ⵏⵏⵓⵏ, ⵜⴰⴳⵓⵔⵉ ⵉ ⵎⴰⵙⵙ ⴰⵏⴼⵍⵓⵙ ⵏ ⵓⵙⵇⵇⵉⵎ ⵉ ⵜⵖⵔⵉ ⵏ ⵜⴱⵔⴰⵜ ⵏ ⵜⵎⵏⵉⵍⵜ ⴷ ⵓⵙⵓⴼⵓ ⵉ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵏⵚⵕ ⵕⴱⴱⵉ.