ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵙⵎⴰⴷ ⵏ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ ⵏ ⵓⵙⴳⴳⵯⴰⵙ ⴰⵣⵣⵔⴰⴼ 2021-2022
ⵙ ⵉⵙⵎ ⵏ ⵕⴱⴱⵉ, ⵜⴰⵥⴰⵍⵍⵉⵜ ⴷ ⵓⴼⵔⴰ ⴼ ⵓⵔⵇⵇⴰⵚ ⵏⵏⵙ
ⵎⴰⵙⵙ ⴰⵎⴰⵡⵙⴰⵙ
ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⵓⵔⴰ
ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ
ⵏⵥⵍⵉ ⵜⵉⵖⵉⵎⵉⵜ ⴰⴷ ⵉ ⵓⵙⵎⴰⴷ ⵏ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ ⵏ ⵓⵙⴳⴳⵯⴰⵙ ⴰⵣⵣⵔⴰⴼ ⴳ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵢⴰⵜ ⴷ ⵎⵔⴰⵡⵜ ⴳ ⵜⵖⵉⵎⵉⵜⵉⵏ ⵜⵉⵎⴰⵜⴰⵢⵉⵏ, ⵔⴰⴷ ⵜⵣⵣⵉⴳⵣ ⵜⵡⵡⵓⵔⵉ ⵏ ⵓⵙⵇⵇⵉⵎ ⵏⵏⵖ ⴳ ⵓⵙⵡⵉⵔ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⴷ ⵜⵙⵇⵇⵉⵎⵉⵏ ⵜⵉⵙⴳⵓⵎⴰⵏⵉⵏ ⴷ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ.
ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ
ⴷⴰ ⵏⵙⵎⴰⴷ ⵜⴰⵙⵓⵜⵍⵜ ⴰⴷ ⴳ ⵓⵎⵏⴰⴹ ⴳ ⵜⵣⵣⵉⴳⵣ ⵜⵎⴰⵣⵉⵔⵜ ⵏⵏⵖ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵙ ⴰⴷ ⵜ ⵉⵄⵣⵣⵓ ⵕⴱⴱⵉ ⴰⵙⴷⵖⵔ ⵏⵏⵙ ⴰⵙⴳⴰⵡⴰⵏ ⴷ ⵓⵏⵎⵏⵥⴰⵡ ⴷ ⵢⴳⵔⴰⵖⵍⴰⵏ, ⴷ ⴰⵎⴷⵔⴰⵡ ⴰⴳⵔⴰⵖⵍⴰⵏ ⵉⵖⵣⴰⵏⵏ, ⴳ ⵜⵍⵍⴰ ⵜⵎⵢⵉⵎⴰⵏⵜ ⴷ ⵜⵔⵙⵍⵜ ⴷ ⵓⵔⴳⴳⵉⴳ ⴰⵙⴳⴰⵡⴰⵏ, ⵢⵉⵡⵙⵏ ⴳ ⵓⵚⴽⵓ ⵏ ⵓⴼⵔⴰ ⴷ ⵜⵎⵢⵉⴷⵉⵔⵜ.
ⵉⵜⵜⵓⵙⵏⴰⵍ ⵡⴰⵢⴷⴰ ⴰⴷ ⵙ ⵜⵎⵢⵉⵎⴰⵏⵜ ⵜⴰⴳⵔⴰⵖⵍⴰⵏⵜ ⴳ ⵉⵙⵜⴰⵢⵏ ⴷ ⵜⵙⵔⵜⴰⵢ ⵏⵏⵙ, ⵜⵣⵣⵉⴳⵣ ⵜⵎⴰⵣⵉⵔⵜ ⵏⵏⵖ ⴳ ⵓⵙⵎⵢⴰⵏⴰⵡ ⵏ ⵜⵎⴰⴷⵔⴰⵡⵉⵏ ⵏⵏⵙ, ⴷⴰ ⵜⵜⴰⵡⵉ ⴰⵏⵄⴰⵔ ⵏ ⵜⵔⴰⴱⴱⵓⵜ ⵜⴰⴳⵔⴰⵖⵍⴰⵏⵜ ⵉ ⵜⵍⵍⵓⴳⵏⴰ ⵏ ⵜⵢⴰⵏⵜ ⵜⴰⵏⴰⴽⵍⵜ ⵎⴽ ⵉⵍⵍⴰⵏ ⵖ ⵜⵖⵜⴰⵙⵜ ⵜⴰⵎⴳⴳⴰⵔⵓⵜ ⵏ ⵓⵙⵇⵇⵉⵎ ⵏ ⵜⵏⴼⵔⵓⵜ ⵉⵣⴷⵉⵏ ⴷ ⵜⵎⵙⴰⵔⵜ ⵏ ⵜⵙⴳⴳⵉⵡⵉⵏ ⵏⵏⵖ ⵏ ⵉⴼⴼⵓⵙ ⵖ ⵣⵣⵉⴳⵣⵏ ⵉⵙⵏⴼⴰⵔⵏ ⵏ ⵜⴳⵎⵉ ⴳⴰⵏⵉⵏ ⵉⵎⵣⵡⵓⵔⴰ ⴷ ⵉⵅⴰⵜⴰⵔⵏ ⴳ ⵉⵡⵙⵏ ⴰⵢⵜ ⵎⴰⵜⵏⵖ ⴷ ⵉⵙⵜ ⵎⴰⵜⵏⵖ ⴳ ⵜⵙⴳⴳⵉⵡⵏ ⴰⴷ ⴷ ⵜⵓⴼⵔⵉⵏ ⵏⵏⵙ ⵜⵉⵙⵔⵜⴰⵏⵉⵏ ⴷ ⵜⵖⵔⵎⴰⵏⵉⵏ ⴷ ⵜⴷⵎⵙⴰⵏⵉⵏ ⵙ ⵉⵎⴰⵏ ⴰⵏⴰⵎⵓⵔ ⵏ ⵜⴰⵎⵓⵏⵜ, ⵉⵎⵎⴰⵍⴰⵏ ⴰⵙⵓⵊⴷ ⵉⵙⵓⵍⵏ ⵉ ⵓⵎⵣⴰⵖ ⵏ ⵜⵎⵓⵔⵜ ⴷ ⵉⵡⵜⵜⴰ ⵏⵏⵙ ⵖ ⴱⴷⴷⵏⵜ ⵜⴳⴳⴰⵍⵉⵏ ⵜⵍⴰⴼⵉⵏ ⵜⵉⴳⵍⴷⴰⵏⵉⵏ ⴷ ⵓⴳⴳⵓⴳ ⵉⵛⴷⴷⴰⵏ ⵉⵕⵥⵥⴰⵏ ⵉⵊⴰⵊⵉⵡⵏ ⵏ ⵡⴰⵄⴷⵉⵡⵏ. ⵉ ⵜⴳⴳⴰⵍⵉⵏ ⴰⴷ ⴷ ⵓⵅⴰⵜⴰⵔ ⵏⵏⵙⵏⵜ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵙ ⴰⵙⵓⵜⴳ ⴷ ⵓⵡⵇⵇⵔ.
ⵜⵉⵏⴳⴳⵯⴰ ⴷ ⵉⵏⴳⴳⵯⴰ
ⵉⵖ ⵉⵥⵍⵉ ⵡⴰⵏⴰⵡ ⵏ ⵜⵖⵉⵎⵉⵜⵉⵏ ⴰⴷ ⵉ ⵓⵙⵎⵏⵉⴷ ⵏ ⵜⵉⵢⵢⴰⴼⵓⵜ ⵏ ⵜⵡⵡⵓⵔⵉ ⵏ ⵓⵙⵇⵇⵉⵎ ⴷ ⵓⵙⵔⵓⵙ ⵏ ⵉⵎⵏⴰⴷⵏ ⵏ ⵜⵡⵡⵓⵔⵉ, ⵀⴰⵜⵉ ⵜⴰⵙⵓⵜⵍⵜ ⴰⵙ ⵜⵕⵥⵎ ⵢⴰⵜ ⵜⵡⴰⵍⴰ ⵜⴰⵣⵣⵔⴰⴼⵜ ⵜⴰⵎⴰⵢⵏⵓⵜ, ⵜⵕⵥⵎ ⵙⵔⵙ ⵜⴰⴼⵔⴽⴰ ⵜⴰⵎⴰⵢⵏⵓⵜ ⵏ ⵜⵓⴷⵔⵜ ⵏⵏⵖ ⵜⴰⵎⵔⵙⵍⴰⵏⵜ ⴷⴼⴼⵉⵔ ⵏ ⵓⵙⵔⵓⵙ ⵏ ⵜⵏⴱⴰⴹⵜ ⵜⴰⵎⴰⵢⵏⵓⵜ ⴷ ⵉⴽⴽⴰⵏ ⵉⴼⵏⵉⵇⵏ ⵏ ⵓⵙⵜⴰⵢ ⵉⵣⵔⵉⵏ ⴳ 8 ⵛⵓⵜⴰⵏⴱⵉⵔ 2021.
ⵉⴳⴰ ⴰⵖ ⴰⴷⴷⵓⵔ ⵎⴰⵙ ⵉⵚⴰⵃⴰ ⵉ ⵍⵎⵖⵔⵉⴱ ⵚⴰⵃⴰ ⵏ ⵜⵍⵍⵓⴳⵏⵓ ⵏ ⵜⵡⵡⵓⵔⵉⵡⵉⵏ ⵏ ⵜⵎⵔⵙⴰⵍ, ⴰⵢⵍⵍⵉ ⵉⵜⵜⵓⵙⴽⴰⵔⵏ ⵙ ⵜⵡⵡⵓⵔⵉ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ ⴳ ⵓⵙⵎⴰⵢⵏⵓ ⵏ ⵜⵎⵔⵙⴰⵍ ⵙ ⵓⵡⵇⵇⵔ ⵏ ⵜⵓⵎⴰⵢⵉⵏ ⵏ ⵓⴷⵓⵙⵜⵓⵔ, ⴷ ⵓⴼⵔⴰⴳ ⵏ ⵡⴰⵏⴰⵡ ⵏⵏⵖ ⴰⵎⵔⵙⵍⴰⵏ ⵎⵇⵇⴰⵔ ⵉⵍⵍⴰ ⵓⵎⵏⴰⴹ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19 ⴳ ⴽⵓ ⵉⴳⵔⴰⵏ ⵏ ⵜⵓⴷⵔⵜ ⴳ ⴽⵓ ⵜⵉⵎⵉⵣⴰⵔ.
ⴰⵔ ⵏⵙⵓⵜⵓⴳ ⴰⵙⴳⵓⴷⵉ ⵍⵍⵉ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⴳ ⵓⵎⵏⵉⴷ ⵏ ⵉⵎⵓⵔⵙⵏ ⴰⴷ, ⴷ ⵜⵥⴹⴰⵕⵜ ⵏⵏⵙ ⴳ ⵓⵙⵡⵓⴷⴷⵓ ⵉⵕⵡⴰⵏ ⵏ ⵓⴱⴰⵢⵢⵓⵕ ⴷ ⵉⴷⵔⵉⵣⵏ ⵏⵏⵙ, ⵍⵍⴰⵏⵜ ⴷⴰⵜ ⵏⵏⵖ ⴼ ⵓⵙⵇⵇⵉⵎ ⵏ ⵉⵎⵓⵔⴰ ⵜⵉⵎⴰⵙⴰⵢⵉⵏ ⵅⴰⵜⵔⵏⵉⵏ ⴳ ⵓⵙⴽⵔ ⵏ ⵜⵥⵍⴰⵢⵉⵏ ⵏⵏⵖ ⵜⵉⴷⵙⵜⴰⵔⵉⵏ ⴷ ⵜⵉⵏ ⵜⵎⵔⵙⵍⵜ ⴷ ⵜⵉⵏ ⵜⴳⵏⵙⴰⵙⵜ, ⵙ ⵜⵉⵕⵡⵉ ⵍⵍⵉ ⵔⴰⵏⵜ ⵜⵏⴰⵥⴰⵕⵉⵏ ⵏ ⵜⴼⵔⴽⴰ, ⴷ ⵉⵎⵏⴰⴷⵏ ⵏ ⵓⵙⴷⵓⵙ ⵏ ⵓⵙⴷⵖⵔ ⵏ ⵜⵎⴰⵣⵉⵔⵜ ⵏⵏⵖ ⴰⴷ ⵜⴳ ⵢⴰⵜ ⵜⴷⵓⵙⵄ ⵜⴰⴷⵉⵎⵓⵇⴰⵔⴰⵟⵉⵜ ⵉⵣⵣⵉⴳⵣⵏ ⵙ ⵎⴰⴷ ⵉⵎⵙⴰⵙⴰⵏ ⴷ ⵓⵎⵣⵔⵓⵢ ⵏⵏⵙ ⵉⴷⵔⴰⵏ.
ⵏⵙⴽⵔ, ⴳ ⵜⵎⵥⵍⴰⵢⵉⵏ ⵏⵏⵖ ⵜⵉⵎⵏⵏⴰⵡⵉⵏ, ⵙ ⵓⵎⴰⵜⴰ ⵏ ⵉⵏⴰⵡ ⴰⴳⵍⴷⴰⵏ ⴰⵎⴰⵜⵜⵓⵢ ⵍⵍⵉ ⵙ ⵉⵕⵥⵎ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵏⵚⵕ ⵕⴱⴱⵉ ⵜⴰⵡⴰⵍⴰ ⵜⴰⵣⵣⵔⴰⴼⵜ, ⵏⵙⵙⴽⵯⵜⵉ ⴷ ⵜⵉⵏⴰⵥⴰⵕⵉⵏ ⵏ ⵜⵎⴰⵣⵉⵔⵜ ⵏⵏⵖ, ⴷ ⵉⵎⵏⴰⴷⵏ ⵏ ⵜⴼⵔⴽⴰ ⵜⴰⵎⴰⵢⵏⵓⵜ.
ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴼ ⴽⵕⴰⴷ ⵉⵎⵏⴰⴷⵏ ⵉⴷⵙⵍⴰⵏⵏ ⴳⴰⵏⵉⵏ ⵉⵎⵣⵡⵓⵔⴰ, ⴳ ⵜⵎⵣⵡⴰⵔⵓⵜ: 1)ⴰⵙⴷⵓⵙ ⵏ ⵓⴷⵖⴰⵔ ⵏ ⵍⵎⵖⵔⵉⴱ ⴷ ⵓⵎⵣⴰⵖ ⵏ ⵜⵏⵓⴼⴰ ⵏⵏⵙ ⵜⵉⵎⴰⵜⵜⵓⵢⵉⵏ, ⴷ ⴰⴷ ⵜⵉⵍⵉ ⵜⵅⵅⵓⵜⵔⴰ ⵜⴰⵏⴰⵎⵓⵔⵜ ⵙ ⵓⵙⵓⵊⴷ ⵏ ⵡⴰⵢⴷⴰ ⴰⵙⵜⵔⴰⵜⵉⵊⵉ ⴳ ⵜⵎⵜⵜⵉⵡⵉⵏ ⵜⵓⴷⴷⵉⵔⵉⵏ, 2) ⴰⵙⵡⵓⴷⴷⵓ ⵏ ⵜⴰⵙⵙⴰⵙⵜ ⵏ ⵓⴱⴰⵢⵢⵓⵕ ⴷ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏⵏⵙ, ⴳ ⵓⵎⵏⵉⴷ ⴰⴷ, ⴷ ⵏⵙⵓⵜⵓⴳ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵓⴱⵓⵔⵣ ⴰⵕⵥⵥⵓⵎ ⵏ ⴱⴰⴱ ⵏ ⵡⴰⴷⴷⵓⵔ ⵖ ⵉⵎⴰⵍⴰⵙⵙ ⵉⵣⵔⵉⵏ ⵜⵉⵡⵡⵓⵔⵉⵡⵉⵏ ⵏ ⵓⵙⴽⵔ ⵏ ⵓⵙⴰⵡⵓⵔ ⵏ ⵓⴼⴰⵔⵙ ⵏ ⵉⴳⵣⵣⴰⵢⵏ ⵎⴳⴰⵍ ⵏ ⴽⵓⴼⵉⴷ 19 ⴷ ⵉⴳⵣⵣⴰⵢⵏ ⵢⴰⴹⵏⵉⵏ, ⵉⴳⴰ ⵢⴰⵏ ⵓⵚⴽⵓ ⴰⵙⵜⵔⴰⵜⵉⵊⵉ ⵍⵍⵉ ⵔⴰⴷ ⵢⴰⵡⵉ ⵜⵉⵅⵅⵓⵜⵔⴰ ⵏ ⵉⴳⵣⵣⴰⵢⵏ ⵉ ⵜⴳⵍⴷⵉⵜ ⴷ ⵉⴼⵔⵉⵇⵢⴰ, ⵉⴳⴰ ⵜⴰⵎⴰⵜⴰⵔⵜ ⵢⴰⴹⵏⵉⵏ ⴼ ⵜⴷⵓⵙⵉ ⴷ ⵜⵓⵏⵥⵉⵣⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⵜⵏⴰⵔⴰ ⵏⵏⵙ ⵉ ⵍⵎⵖⵔⵉⴱ ⴳ ⵢⴰⵜ ⵜⵙⵓⵜⵍⵜ ⵜⴰⵎⴰⴹⵍⴰⵏⵜ ⴱⴰⵀⵔⴰ ⵉⵛⴷⴷⴰⵏ.
ⵉⴳⴰ ⵡⵉⵙ ⴽⵕⴰⴹ ⵉⵎⵏⴰⴷⵏ ⴼ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⵙⴽⵔ ⵏ ⵡⴰⵏⴰⵡ ⵓⵏⴳⵉⵎ ⴰⵎⴰⵢⵏⵓ ⵉⴳⴰⵏ ⴰⵙⴰⵜⵉ ⴰⵎⴰⵜⵢ ⵉⵏⵏⵓⵕⵥⵎⵏ ⵉ ⵜⵡⵡⵓⵔⵉ ⵙ ⵎⴰⴷ ⵉⴼⴽⴰ ⴳ ⵜⵡⵡⵓⵔⵉ ⵎⵇⵇⵓⵔⵏ ⴷⴰⵜ ⵏ ⵜⵏⴱⴰⴹⵜ ⴷ ⵓⴱⵕⵍⴰⵎⴰⵏ ⴷ ⵎⴰⴷ ⵢⵉⵡⵉ ⴷ ⵜⵎⴰⵙⴰⵢⵉⵏ ⴼ ⵜⵓⴼⵔⴰⵢⵉⵏ ⵜⵉⵙⵔⵜⴰⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⴻⵜⵉⵇⵏⵉⵢⵉⵏ ⴷ ⵜⴷⵍⵙⴰⵏⵉⵏ.
ⵙ ⵜⴰⵏⵏⴰⵢⵜ ⴰⴷ ⵜⴰⴳⵍⴷⴰⵏⵜ, ⵉⵍⵍⴰ ⴼⵍⵍⴰⵖ ⴰⴷ ⵏⵙⵙⵣⵔⴱ ⴰⴷ ⵜⴻⵟⵟⵉⴼ ⵜⵎⵔⵙⵍⵜ ⵉⵏⴳⵎⴰⵎⵏ ⵏⵏⵙ ⵍⵍⵉ ⵙ ⵔⴰⴷ ⵜⵙⵡⵓⴷⴷⵓ ⵜⵉⵡⵡⵓⵔⵉⵡⵏ ⵏⵏⵙ, ⴰⵢⵍⵍⵉ ⵉⵜⵜⵓⵙⴽⴰⵔⵏ ⵙ ⵓⵖⴰⵡⴰⵙ ⵏ ⵜⵡⵡⵓⵔⵉ ⵍⵍⵉ ⴷ ⵢⵉⵡⵉ ⵓⵎⵏⴰⴹ ⴷ ⵓⵇⵍⵏ ⵉⵏⴰⵎⵓⵏⵏ.
ⵙⵙⵓⵔⴼⴰⵜ ⵉⵢⵉ, ⵜⵉⵏⴳⴳⵯⴰ ⴷ ⵉⵏⴳⴳⵯⴰ, ⴰⴷ ⵙⵙⴽⵟⵉⵖ ⵎⴰⵙ ⴷ ⴰⵙⵣⵔⴱ ⴷ ⵓⵔⵅⵓ ⵙ ⵜⵜⴰⵡⵙⴽⴰⵔⵏ ⵉⵏⴳⵎⴰⵎⵏ ⵏ ⵓⵙⵇⵇⵉⵎ, ⴷⴰⵜ ⵏ ⵎⴰⴷ ⵉⴷⵔⵓⵙⵏ ⴼ ⵉⵎⴰⵍⴰⵙⵙ ⵖ ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⵕⵥⵥⵓⵎ ⵏ ⵜⵓⵙⵜⵍⵜ ⵜⴰⵣⵣⵔⴰⴼⵜ, ⵉⴳⴰ ⵜⴰⵎⵢⵓⵔⵜ ⴷ ⵓⵎⵎⵉⵥ ⵉⴳⴰⵏ ⵡⵉⵏ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⵍⵍⵉ ⵙⵙⵔⵅⴰⵏⵉⵏ ⵎⴰ ⴰⵏⵏ, ⴰⵡⵙⵏ ⵙ ⵉⵎⴰⵏ ⴰⵙⵔⵜⴰⵏ ⴷ ⵓⵏⴰⵎⵓⵔ ⵢⴰⵜⵜⵓⵢⵏ , ⴰⵢⵍⵍⵉ ⵉⵎⵎⴰⵍⴰⵏ ⵜⵉⵏⵡⵉⵜ ⵏ ⵓⵏⴳⵔⴰⵡ ⵏⵏⵖ ⵏ ⵉⴽⴰⴱⴰⵕⵏ ⵉⴱⴷⴷⵏ ⴼ ⵓⵎⵙⴰⵙⴰ ⴳ ⵉⵣⵎⴰⵣ ⵉⵅⴰⵜⴰⵔⵏ ⴷ ⵓⵙⵉⵜⵜⵉ ⵏ ⵜⵎⴰⵖⵜ ⵙ ⵜⵜⵓⵙⵙⵏⵜ ⵛⴰ ⵏ ⵜⴷⵉⵎⵓⵇⵔⴰⵟⵉⵢⵉⵏ.
ⵢⵉⵡⵙ ⵓⵙⵜⴰⵢ ⵏ ⵉⵏⴳⵎⴰⵎⵏ ⴰⴷ ⵉⵍⵉⵏ ⵜⵡⵡⵓⵔⵉⵡⵉⵏ ⵏⵏⵖ ⵏ ⵜⵉⴹⴰⴼ ⵉ ⵓⵙⵙⴼⵍⴷ ⵉ ⵓⵖⴰⵡⴰⵙ ⵓⵏⴱⵉⴹ ⵍⵍⵉ ⵉⵙⵎⵏⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴷⴰⵜ ⵏ ⵓⴱⵕⵍⴰⵎⴰⵏ, ⴰⵢⵏⴰⵙ 11 ⴽⵟⵓⴱⵕ 2021 ⴷ ⵓⵎⴹⴰⴽⴰⵕ ⵏⵏⵙ ⴷ ⵓⵙⵜⴰⵢ ⵏⵏⵙ ⵙⴳ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵜⵉⴽⴽⵉ ⵏ ⵜⵎⵢⵉⵎⴰⵏⵜ ⵉ ⵜⵏⴱⴰⴹⵜ , ⴳ ⵜⵉⵣⵉ ⴷ ⵢⵓⵙⴰⵏ.
ⵉⴳⴰ ⵓⵎⴹⴰⴽⴰⵕ ⵏ ⵓⵖⴰⵡⴰⵙ ⴰⴷ ⵢⴰⵜ ⵜⵉⵣⵉ ⵜⴰⵎⵔⵙⵍⴰⵏⵜ ⴱⴰⵀⵔⴰ ⵉⵙⵜⴰⵡⵀⵎⵎⴰⵏ, ⴷ ⵜⵎⵍⴷⴰ ⵏ ⵓⵎⴹⴰⴽⴰⵕ ⴷ ⵓⵎⵙⴰⵡⴰⵍ ⴰⴷⵉⵎⵓⵇⵔⴰⵟⵉ ⵉⴼⴽⴰⵏ ⵜⴰⵢⵢⴰⴼⵓⵜ ⵊⴰⵔ ⵜⴰⵏⴱⴰⴹⵜ ⵜⴰⵣⵣⵔⴰⴼⵜ ⴷ ⵜⵎⵣⵣⴳⴰⵔⵜ, ⵙ ⵜⵡⵉⵙⵉ ⵏ ⵜⵓⵣⵏⵍⵜ ⵜⴰⴱⵕⵍⴰⵎⴰⵏⵉⵜ ⴷ ⵜⵓⴳⵜ ⵉⴳ ⵜⴰⵎⴰⵜⴰⵔⵜ ⴼ ⵜⵥⵍⴰⵢⵜ ⵏ ⵡⴰⵏⴰⵡ ⵏⵏⵖ ⴰⵎⵔⵙⵍⴰⵏ.
ⵉⴹⴼⵕ ⵜ ⵓⵎⴹⴰⴽⴰⵕ ⵏ ⵓⵙⵍⴳⵏ ⵏ ⵓⵥⵕⴼ ⵉ ⵓⵙⴳⴳⵯⴰⵙ ⴰⵥⵕⴼⴰⵏ 2022, ⵉⴳⴰⵏ ⵢⴰⵏ ⵉⵎⵉⵙⵙ ⵓⵛⵛⵉⵍ ⵉ ⵉⴽⵛⵛⵓⵎⵏ ⵏ ⵓⵡⴰⵏⴽ ⴷ ⵓⵣⵣⴳⵉⵔ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⵙ ⵓⵡⵇⵇⵔ ⵉⵙⵎⴷⵏ ⵏ ⵉⵣⵎⴰⵣ ⵉⴷⵙⵜⴰⵔⵏ ⴷ ⵉⵣⵣⵔⴰⴼⵏ.
ⵉⴳⴰ ⵓⵎⴹⴰⴽⴰⵕ ⵏ ⵓⵙⵏⴼⴰⵔ ⴰⴷ ⵜⴰⵎⵍⴷⴰ ⵏ ⵓⵎⴹⴰⴽⴰⵕ ⵉⴷⵔⴰⵏ ⴷ ⵓⵏⵢⴰⵍⴽⴰⵎ ⵏ ⵜⵢⵢⴰⴼⵓⵜ ⵊⴰⵔ ⵙⵏⴰⵜ ⵜⵎⵔⵙⴰⵍ ⵜⴰⵣⵣⵔⴰⴼⵜ ⴷ ⵜⵎⵣⵣⴳⴰⵔⵜ, ⵍⵍⵉ ⵉⵙⴱⵓⵖⵍⴰⵏ ⴰⵎⴹⴰⴽⴰⵕ ⴰⴳⴷⵓⴷⴰⵏ ⵅⴼ ⴽⵉⴳⴰⵏ ⵏ ⵜⵎⵙⴰⵔⵉⵏ ⵜⵓⴷⴷⵉⵔⵉⵏ ⵏ ⵜⵎⴰⵣⵉⵔⵜ ⵏⵏⵖ, ⵢⴰⵡⵙ ⴳ ⵓⵙⵖⵓⴷⵓ ⵏ ⵜⵓⵎⴰⵢⵉⵏ ⵏ ⵓⵙⵏⴼⴰⵔ ⵍⵍⵉ ⵉⵜⵜⴱⵓⵖⵍⴰⵏ ⵙ ⵉⵙⵏⴼⵍⵏ ⵜⵜⵓⵙⵎⵏⴰⴷⵏⵉⵏ ⴼ ⵓⴹⵕⵉⵙ, ⵢⵉⵍⵉ ⵓⵎⵙⴰⵙⴰ ⴼ 32% ⵏⵏⵙ, ⴷⴼⴼⵉⵔ ⵏ ⵓⵎⴹⴰⴽⴰⵕ ⵉⴷⵔⴰⵏ ⴳ ⵜⵙⵇⵇⵉⵎⵜ ⵏ ⵜⴷⵔⵉⵎⵜ.
ⴰⵔ ⵜⵎⵎⴰⵍⴰ ⵜⵣⵣⵉⴳⵣⵜ ⴰⴷ ⵏ ⵜⵡⵡⵓⵔⵉ ⵏⵏⵖ ⵜⴰⴱⵕⵍⴰⵎⵏⵉⵜ, ⴰⵎⵢⴰⵡⴰⵙ ⵊⴰⵔ ⵜⵏⴱⴰⴹⵜ ⵜⴰⵣⵣⵔⴰⴼⵜ ⴷ ⵜⵎⵣⵣⴳⴰⵔⵜ, ⴷ ⵜⵉⵔⴰⵜ ⵜⴰⵎⴳⵔⵓⵜ ⵉ ⵓⵙⴳⵉⴷⴷⵉ ⵏ ⵓⵙⵡⵓⴷⴷⵓ ⵏ ⵓⵣⵎⵣ ⴰⵙⵔⵜⴰⵏ ⴷ ⵓⴱⵕⵍⴰⵎⴰⵏⵉ ⵉⴳⴰⵏ ⴰⴼⵔⴷⵉⵙ ⵉⵙⵜⴰⵡⵀⵎⵎⴰⵏ ⴳ ⵓⴱⵔⵉⴷ ⵏ ⵜⴳⵎⵉ, ⴷ ⵓⵏⵢⴰⵍⴽⴰⵎ ⴷ ⵓⵇⵍⵏ ⵏ ⵉⵏⵎⵓⵔⴰⵏ, ⴷ ⵓⵡⵡⵇⵔ ⵏ ⵉⵙⵜⴰⵢⵏ ⵏⵏⵙ, ⴷ ⵓⵙⵎⵎⴽⵯⵜⵉ ⵏ ⵜⵏⴰⵥⴰⵕⵉⵏ ⵍⵍⴰⵏⵉⵏ ⵔⴰⵏⵉⵏ ⵜⵉⵎⵔⴰⵔⵓⵜⵉⵏ ⴷ ⵓⵍⴳⴳⵓⴷ, ⴷ ⵓⵙⵡⴰⵍⴰ ⵏ ⵜⵓⴳⴳⵯⴰⵙ ⵜⴰⵎⴳⵔⵓⵜ ⵉ ⵜⵎⵙⴰⵔⵉⵏ ⵜⵉⵅⴰⵜⴰⵔⵉⵏ ⵏ ⵏ ⵡⴰⵎⵓⵏ, ⵉⵖ ⵉⴳ ⵎⴰ ⴰⴷ ⵡⵉⵏ ⵜⵓⵣⵍⵜ ⴷ ⵜⵓⴳⵜ ⵜⴰⴱⵕⵍⴰⵎⵏⵉⵜ ⵙ ⵙⵏⴰⵜ, ⵚⴰⵃⴰ ⵉⴳⴰ ⵡⵉⵏ ⵜⵎⵓⵔⵜ.
ⵜⵉⵏⴳⴳⵯⴰ ⴷ ⵉⵏⴳⴳⵯⴰ,
ⵍⵍⵉ ⵉⵇⵇⵔⴱ ⵓⵙⵎⴰⴷ ⵏ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ ⵏ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵢⴰⵜ ⴷ ⵎⵔⴰⵡⵜ, ⵏⴹⴼⵕ ⴰⴽⴽⵯ ⴽⵔⴰ ⵏ ⵜⴰⵏⵏⴰⵢⵢⵉⵏ ⴼ ⵜⵎⵙⴽⵔⵜ ⵏⵏⵖ ⵜⴰⵣⵣⵔⴰⴼⵜ ⵏ ⵓⴱⵕⵍⴰⵎⴰⵏ ⴳ ⵜⵎⵉⴹⵉ ⵏ ⵡⵓⵙⵙⴰⵏ ⵜⴰⵎⵣⵡⴰⵔⵓⵜ ⴳ ⵜⵡⵡⵓⵔⵉ ⵏ ⵜⵏⴱⴰⴹⵉⵏ ⵜⴰⵣⵣⵔⴰⴼⵜ ⴷ ⵜⵎⵣⵣⴳⴰⵔⵜ.
ⵙⵙⵏⵖ ⵉⵙ ⵓⵔ ⵍⵍⵉⵖ ⴳ ⵓⴷⵖⴰⵔ ⵍⵍⵉ ⵉⵢⵉ ⵉⵜⵜⴰⵊⵊⴰⵏ ⴰⴷ ⵎⵎⴰⵖ ⴼ ⵜⵉⵢⵢⴰⴼⵓⵜ ⵏ ⵜⵏⴱⴰⴹⵜ, ⵎⴰⵛⵛ ⵍⵍⵉⵖ ⴳⵉⵖ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵜⵓⵣⵍⵜ ⴷ ⵜⵓⴳⵜ, ⵉⵍⵍⴰ ⴼⵍⵍⴰ ⴰⴷ ⵙⵎⵏⵉⴷⵖ ⵛⴰ ⵏ ⵉⵙⵉⵙⴼⵉⵡⵏ ⴷ ⵜⵖⴰⵡⵙⵉⵡⵉⵏ ⵍⵍⵉ ⵔⴰⴷ ⵢⴰⵡⵙ ⴳ ⵓⵚⴽⵓ ⵏ ⵉⵏⴰⵡ ⵏ ⵓⴼⵔⴰⵏ ⵏ ⵜⵎⵙⴽⵔⵜ ⵜⴰⴳⴷⵓⴷⴰⵏⵜ ⴼ ⵜⵎⵙⵖⴰⵔⵓⵜ ⴷ ⵓⵙⵙⴽⵯⵜⵉ ⵏ ⵓⵎⵣⵔⵓⵢ, ⵔⴰⴷ ⵜⴰⵡⵙ ⴽⵔⴰⵢⴳⴰⵜ ⵜⴰⵢⵢⴰⴼⵓⵜ ⴳ ⵓⵙⵖⵓⴷⵓ ⵏ ⵜⵎⵙⴽⵔⵜ ⴷ ⵜⵡⵡⵓⵔⵉ ⵢⴰⴹⵏⵉⵏ.
ⵜⴰⵖⴰⵡⵙⴰ ⵜⴰⵎⵣⵡⴰⵔⵓⵜ, ⵉ ⵜⵉⴷⵜ ⴷ ⵓⵎⵣⵔⵓⵢ ⵏ ⵜⵡⵉⵍⴰ ⵜⵉⵣⵣⵔⴰⴼⵉⵏ ⴳⴳⵓⵔⴰⵏⵉⵏ, ⵓⵔ ⵜⴳⴳⵓⵜ ⵜⵡⵡⵓⵔⵉ ⵏ ⵓⵣⵣⵔⴰⴼ ⴳ ⵜⵙⵓⵜⵍⵜ ⴰⴷ ⵙ ⵓⵎⵣⴰⵣⴰⵍ ⴷ ⵎⴰⴷ ⵉⵍⵍⴰⵏ ⴳ ⵜⵎⴽⵯⵜⵉⵜ ⵏ ⵓⴱⵕⵍⴰⵎⵏ ⴰⵎⵖⵔⵉⴱⵉ, ⵏⵙⵙⵖⵣⵏ ⵙⴰ ⴷ ⵎⵔⴰⵡ ⵏ ⵓⴹⵕⵉⵚ, ⵉⵖ ⵏⵙⵙⵏ ⵎⴰⵙ ⴰ ⵉⵜⵜⴰⵡⵉ ⵓⵙⵍⴳⵏ ⵏ ⵓⵥⵕⴼ , ⴳ ⵜⵎⵢⵓⵔⵜ, ⵜⵉⵣⵉ ⵉⴳⴳⵓⵜⵏ ⴳ ⵓⵣⵣⵔⴰⴼ ⴳ ⵜⵙⵓⵜⵍⵉⵏ ⵜⵉⵎⵣⵡⵓⵔⴰ.
ⴳ ⵓⵎⵏⵉⴷ ⵢⴰⴹⵏⵉⵏ, ⴰⵔ ⴷ ⵏⵙⵙⴽⵜⴰⵢ ⴰⵜⵉⴳ ⵏ ⵜⵙⵏⵜⴰⵢⵉⵏ ⵜⵉⵣⵣⵔⴰⴼⵉⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ, ⵉⵍⴽⵎ ⵓⵏⵛⴽ ⵏ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵜⵜⴰⵡⵚⵕⴰⴼⵏⵉⵏ ⴰⵔ ⵉⴳⴷⴰⵎ, 69 ⵏ ⵜⵙⵓⵎⵔⵜ. ⵔⴰⴷ ⵏⴱⴷⴷ ⴳ ⵉⵏⴳⵎⴰⵎⵏ ⵏ ⵏ ⵓⵙⵇⵇⵉⵎ ⴰⴷ ⴰⵎⵥⵏⵜ ⵜⵙⵏⵜⴰⵢⵉⵏ ⵜⵉⵣⵣⵔⴰⴼⵉⵏ ⵏ ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⴳⵎⴰⵎⵏ ⵏ ⵓⵙⵇⵇⵉⵎ ⵜⵉⴱⵔⵉⴷⵉⵏ ⵍⵍⴰⵏⵉⵏ ⴳ ⵓⴷⵓⵙⵜⵓⵔ ⴷ ⵓⵏⴳⵔⴰⵡ ⴰⴳⵯⵏⵙⴰⵏ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⴳ ⵓⵣⵣⵔⴰⴼ, ⵍⵍⵉⵖ ⴷⴰⵔⵙⵏⵜ ⴰⵜⵉⴳ ⴳ ⵓⵙⵎⵖⵔ ⵏ ⵉⵣⵣⵔⴰⴼⵏ ⵉⵏⴰⵎⵓⵔⵏ.
ⵜⵉⵙ ⵙⵏⴰⵜ ⵜⵖⴰⵡⵙⵉⵡⵉⵏ, ⴳ ⵜⴷⵍⵙⴰ ⵜⴰⴱⵕⵍⴰⵎⴰⵏⵉⵜ ⵜⴰⵎⴰⵢⵏⵓⵜ, ⴷ ⵜⵎⵙⴽⴰⵔ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵎⴰⵢⵏⵓⵜⵉⵏ, ⴼⵜⴰⵏ ⵉⴱⵕⵍⴰⵎⴰⵏⵏ ⴳ ⵜⵎⵉⵣⴰⵔ ⵏ ⵜⴷⵉⵎⵓⵇⵔⴰⵟⵉⵏ ⴷⵔⴰⵏⵉⵏ, ⵉ ⵜⵉⴹⴰⴼ ⵏ ⵜⵡⵡⵓⵔⵉ ⵜⵓⵏⴱⵉⴹⵜ ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵜⵎⵙⴽⵔ ⴷ ⵓⴷⵔⵉⵣ ⵏ ⵜⵙⵔⵜⴰⵢ ⴰⴷ ⴷ ⵓⴹⴼⵕ ⵏ ⵓⵣⵣⴳⵉⵔ ⵏ ⵉⵙⵍⴳⵏⵏ. ⵎⴰ ⴰⴷ ⵉⵍⵍⴰ ⴰⵡⴷ ⴳ ⵜⵎⵙⴽⵔⵜ ⵜⴰⴱⵕⵍⴰⵎⵏⵉⵜ ⵜⴰⵎⵖⵔⵉⴱⵉⵜ, ⵙⵍⴰⵡⴰⵏ ⴰⴽⴽⵯ ⴳ ⵜⵡⴰⵍⴰ ⵜⴰⵣⵣⵔⴰⴼⵜ ⵉⵣⵔⵉⵏ. ⵎⴰ ⴰⴷ ⵉⵍⵍⴰ ⵏⵉⵜ ⵓⵍⴰ ⴳ ⵜⵙⵓⵜⵍⵜ ⴰⴷ, ⵎⴽ ⵔⴰⴷ ⵙⵙⵉⵙⴼⵉⵡⵖ.
ⵜⵉⵙ ⴽⵕⴰⴹⵜ, ⵉⴳⴰ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵙⵓⵜⵍⵜ ⴰⴷ ⴰⵙⴰⵜⵉ ⴷ ⵓⵙⴰⵢⵔⵓⵔ ⵏ ⵓⵎⴷⴰⵡⴰⵍ ⴷ ⵓⵎⴹⴰⴽⴰⵕ ⵏ ⵜⵎⵙⴰⵔⵉⵏ ⵙⵜⴰⵡⵀⵎⵎⴰⵏⵉⵏ ⴳ ⵓⵎⵏⴰⴹ ⵏⵏⵖ ⴰⵏⴰⵎⵓⵔ, ⴳ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵙⵓⵍⵏⵉⵏ ⵍⵍⵉ ⵉⵙⴽⴰⵔⵏ ⵜⴰⵡⵡⵓⵔⵉ ⵏⵏⵙⵏⵜ ⵏ ⵜⵉⴹⴰⴼ, ⴷ ⵓⵙⵡⵉⵔ ⵏ ⵜⵖⵉⵎⵉⵜⵉⵏ ⵜⵉⴳⴷⵓⴷⴰⵏⵉⵏ. ⵉⵇⵇⴰⵏ ⴷ ⴰⴷ ⵏⴰⵍⵖ ⴰⵎⴹⴰⴽⴰⵔ ⵍⵍⵉ ⵜⵙⴱⵓⵖⵍⴰ ⵜⵓⵣⵍⵜ ⵓⵍⴰ ⵜⵓⴳⵜ ⴷ ⵜⵏⴱⴰⴹⵜ, ⴰⵢⵍⵍⵉ ⵉⵙⵔⵙⵏ ⴳ ⵓⵇⵍⵏ ⵏ ⵡⴰⵎⵓⵏ ⴷ ⵜⵓⴷⵔⵜ ⵜⴰⵡⵙⵙⴰⵏⵜ ⵏ ⵉⵡⴷⴰⵏ, ⴳ ⵉⵅⵎⵎⵉⵎⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵍⵍⵉ ⴱⴷⴷⴰ ⵉⵜⵜⵏⵢⴰⵍⴽⴰⵎⵏ ⴷ ⵓⵇⵍⵏ ⴰⴷ, ⵜⵉⵎⵔⵙⴰⵍ ⴰⴷ ⵉⴳⴰⵏ ⴰⵙⴰⵜⵉ ⴷ ⵢⵓⵙⴰⵏ ⵉ ⵓⵎⴹⴰⴽⴰⵕ ⵏ ⵓⵇⵍⵏ ⴰⴷ ⴷ ⵜⵡⴰⴼⵉⵜ ⵏ ⵉⴼⵙⵙⴰⵢⵏ ⵉ ⵜⵎⵙⴰⵔⵉⵏ ⵏ ⵡⴰⵎⵓⵏ, ⵜⵉⵍⵉ ⴳⵉⵙⵏⵜ ⵜⵎⵔⵙⵍⵜ ⵜⴰⵣⵣⵔⴰⴼⵜ, ⵃⵎⴰ ⴰⴷ ⵢⵉⵍⵉ ⵓⵙⴷⵓⵙ ⵏ ⵜⵎⵢⵉⵎⴰⵏⵜ ⴳⵉⵙ.
ⵉⵖ ⵜⴳⴰ ⵜⵉⵢⵢⴰⴼⵓⵜ ⴳ ⵓⴼⴰⵔⵙ ⵏⵏⵖ ⴰⴱⵕⵍⴰⵎⴰⵏⵉ, ⵜⵉⵏ ⵜⵉⵕⵡⵉ ⵏ ⵓⵣⵣⵔⴰⴼ ⴷ ⵓⴷⵔⵉⵣ ⵏⵏⵙ, ⴷ ⵓⵏⵢⴰⵍⴽⴰⵎ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⴷ ⵜⵎⵙⴰⵔⵉⵏ ⵏ ⵡⴰⵎⵓⵏ ⴳ ⵓⵙⴽⵔ ⵏ ⵜⵉⴹⴰⴼ ⴷ ⵓⵙⵓⵜⴳ, ⵜⵉⵖⵔⵉ ⵏ ⵉⵎⵔⵙⵉⵡⵏ ⴼ ⵜⵍⵍⴰ ⵜⵉⴹⴰⴼ ⵏ ⵓⵙⵇⵇⵉⵎ ⴳ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⴷ ⵜⵖⵉⵎⵉⵜⵉⵏ ⵜⵉⵎⴰⵜⴰⵢⵉⵏ, ⵉⵍⵍⴰ ⵢⴰⵏ ⵓⵙⵡⴰⵍⴰ ⴰⵎⴰⵜⴰⵢ ⵙ ⵜⵉⵖⵔⵉ ⵏ ⵜⵎⵙⴰⵔⵉⵏ ⵜⵉⵏⴰⵎⵓⵏⵉⵏ ⴳⴰⵏⵉⵏ ⵜⵉⵏ ⵖⵉⵍⴰⴷ, ⵖ ⵍⵍⴰⵏ: 1) ⵉⵙⴰⵡⵓⵔⵏ ⵏ ⵓⵙⴷⵓⵙ ⵏ ⵜⵔⵙⴰⵍ ⵏ ⵓⵡⴰⵏⴽ ⴰⵏⴰⵎⵓⵏ ⴷ ⵓⵙⵖⵓⴷⵓ ⵏ ⵜⵏⵓⴼⴰ ⵜⵉⴷⵓⵙⴰⵏⵉⵏ ⵙ ⵜⵣⴷⴰⵢⵜ ⴷ ⵓⴱⴰⵢⵢⵓⵕ ⵏ ⴽⵓⴼⵉⴷ, 2) ⴰⵙⴳⵎⵉ ⴷ ⵓⵙⵙⵍⵎⴷ, 3) ⴰⵙⵡⵓⵔⵉ, 4)ⵜⴰⵣⵔⴼⵜ, 5) ⵉⴳⵔⴰⵏ ⵜⵜⴰⵡⴹⵕⵕⴰⵏⵉⵏ ⵙⴳ ⵓⴱⴰⵢⵢⵓⵕ ⴰⵎ ⵜⴰⵎⴰⵍⵍⴰⵢⵜ ⴷ ⵜⴷⵍⵙⴰ, 6) ⵜⴰⴼⵍⵍⴰⵃⵜ ⴷ ⵓⵎⴰⴹⴰⵍ ⴰⴼⴰⵔⴰⵏ ⴳ ⵜⵣⴷⴰⵢⵜ ⵏⵏⵙ ⴷ ⵡⴰⵎⴰⵏ ⴷ ⵓⴷⵔⵓⵙ ⵏ ⵉⵏⵥⵕⴰⵏ.
ⵉⵍⴽⵎ ⵓⵏⵛⴽ ⵏ ⵉⵎⵔⵙⵉⵡⵏ ⴰⴷ ⵓⴳⴳⴰⵔ ⵏ ⵙⵉⵏ ⵡⴰⴳⵏⴰⵔⵏ ⵏ ⵉⵎⵔⵙⵉ ⴷⴰⵔ ⵜⵙⵇⵇⵉⵎⵉⵏ, ⵎⵎⴰⴳⴰⵔⵏⵜ ⴳⵉⵙⵏ ⵜⵙⵓⵎⵔⵉⵏ ⵏ ⵜⵓⴳⵜ ⴷ ⵜⵓⵣⵍⵜ , ⵉⵍⴽⵎ ⵓⵏⵛⴽ ⵏ ⵉⵙⵇⵙⵉⵜⵏ ⵜⵜⵓⵎⴹⴰⴽⴰⵕⵏⵉⵏ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵖⵉⵎⵉⵜⵉⵏ ⵏ ⵡⴰⵢⵢⵓⵔ ⵥⵍⵉⵏⵉⵏ ⵉ ⵜⵙⵔⵜⴰⵢ ⵜⵉⵎⴰⵜⴰⵢⵉⵏ, ⵎⵔⴰⵡ ⵉⵙⵇⵙⵉⵜⵏ. ⵉⵍⴽⵎ ⵓⵏⵛⴽ ⵏ ⵉⵙⵇⵙⵉⵜⵏ ⵉⵎⵉⵡⴰⵏⵏ ⵍⵍⵉ ⴼ ⵔⵓⵔⵏ ⵉⴳⵎⴰⵎⵏ ⵏ ⵜⵏⴱⴰⴹⵟ, ⴳ ⴽⵕⴰⴹⵜ ⴷ ⵎⵔⴰⵡⵜ ⵏ ⵜⵖⵉⵎⵉⵜ 276 ⵏ ⵓⵙⵇⵙⵉ ⴳⵉⵙⵏ 131 ⵏ ⵓⵙⵇⵙⵉ ⵏ ⵖⵉⵍⴰⴷ, ⴳⵉⵏ ⵉⵙⵇⵙⵉⵜⵏ ⵉⵎⵉⵔⴰⵢⵏ 2019.
ⵜⵉⵏⴳⴳⵯⴰ ⴷ ⵉⵏⴳⴳⵯⴰ,
ⵏⵎⵎⴰⵖ ⴳ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⵎⴱⵕⵍⴰⵎⴰⵏⵉⵢⵉⵏ ⴰⴷ ⵢⵉⵍⵉ ⵓⵎⵛⴰⵛⴽⴰ ⴼ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵍⵍⵉ ⵔⴰⴷ ⵉⴳ ⵉⵎⵔⵙⵉ ⵏ ⵓⵙⵓⵜⴳ ⵙ ⵓⵎⵙⴰⵙⴰ ⴷ ⵓⵎⵏⵉ 70 ⴳ ⵓⴷⵓⵙⵜⵓⵔ ⴳ ⵓⵙⴳⴳⵯⴰⵙ ⴰⵣⵣⵔⴰⴼ 2021-2022. ⵉ ⵓⵙⴷⵓⵙ ⵏ ⵜⵎⵙⴽⵔⵜ ⵏ ⵜⵥⵍⴰⵢⵜ ⵜⴰⴱⵕⵍⴰⵎⵏⵉⵜ, ⴷ ⵓⵍⵜⴰⵖ ⵏ ⵓⵙⵇⵇⵉⵎ ⴳ ⵜⴰⵏⵏⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ, ⵏⵙⵔⵙ ⵜⵉⵡⵡⵉⵔⵉⵡⵉⵏ ⵏ ⵓⵙⵓⵜⴳ ⵉⴳⴰⵏ ⵜⴰⵎⵏⵏⴰⵡⵜ ⴳ ⵉⴳⵔⴰⵏ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵣⴷⵉⵏⵉⵏ ⴷ: 1) ⴰⵖⴰⵡⴰⵙ ⵏ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ ⵜⴰⴳⴷⵓⴷⴰⵏⵜ, 2) ⴰⵖⴰⵡⴰⵙ ⵏ ⵍⵎⵖⵔⵉⴱ ⴰⵣⴳⵣⴰⵡ, 3) ⵜⴰⵙⵔⵜⵉⵜ ⵏ ⵡⴰⵎⴰⵏ.
ⵟⵟⴰⴼⵏⵜ ⵜⵙⵔⵜⴰⵢ ⴰⴷ ⴰⵜⵉⴳ ⵏⵏⵙⵏⵜ ⴳ ⵓⵎⵏⴰⴹ ⴰⵏⴰⵎⵓⵔ ⴷ ⵓⵊⵢⵓ-ⴰⵙⵔⵜⴰⵏ, ⵉⵍⵉⵏⵜ ⴳ ⵉⵅⵎⵎⵉⵎⵏ ⵅⴰⵜⵔⵏⵉⵏ ⵏ ⵜⴰⵙⵓⵜ ⵜⵉⵙ 21.
ⵉⵍⵍⴰ ⵓⵎⵛⴰⵛⴽⴰ ⴰⴷ ⵜⴳ ⵜⵉⵢⵢⴰⴼⵓⵜ ⵏ ⵓⵖⴰⵡⴰⵙ ⵏ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ ⵜⴰⴳⴷⵓⴷⴰⵏⵜ ⵢⴰⵜ ⵏ ⵜⵙⵔⵜⴰⵢ ⵏ ⵓⵙⵓⵜⴳ ⵙ ⵎⴰⴷ ⵉⵍⵍⴰⵏ ⴳ ⵓⴷⵓⵙⵜⵓⵔ ⵏ ⵜⴳⵍⴷⵉⵜ:”ⴰⴷ ⵉⵍⵉⵏⵜ ⵜⵏⵓⴼⴰ ⵜⵉⴳⴷⵓⴷⴰⵏⵉⵏ ⵙ ⵉⵙⵖⵍⵏ ⵏ ⵜⵉⵕⵡⵉ ⴷ ⵜⵎⴰⴼⴰⵡⵜ ⴷ ⵓⵙⵉⵟⵏ ⴷ ⵜⵎⴰⵙⴰⵢⵜ...”. ⵏⴰⵙⵉ ⴷ ⴰⵖⴱⴰⵍⵓ ⴰⵙⵔⵜⴰⵏ, ⵉⵙⵡⴰⵍⴰⵢⵏ ⴷ ⵜⴰⵏⵏⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵏⵚⵕ ⵕⴱⴱⵉ, ⵍⵍⵉ ⴱⴷⴷⴰ ⵉⵜⵜⵉⵏⵉⵏ “ⴰⵙⵕⵚⵓ ⵏ ⵜⵏⵏⵓⴱⴹⴰ ⵉⵥⵉⵍⵏ ⵉⴳⴰⵏ ⵜⴰⵔⵙⵍⵜ ⴳ ⵓⵙⵏⵎⴰⵍⴰ ⴷ ⵓⵙⵡⵓⴷⴷⵓ ⵏ ⵜⵏⵓⴼⴰ ⵜⵉⴳⴷⵓⴷⴰⵏⵉⵏ, ⵙ ⵎⴰⴷ ⵉⵙⵎⴰⵏⵏ ⵜⵉⵔⵙⴰⵍ ⵏ ⵜⵣⵉⵡⵉⵔ ⴷ ⵜⵣⴷⴳⵉ ⴷ ⵜⵎⴰⴼⴰⵡⵜ ⴷ ⵜⵏⴳⴰⴷⴷⴰⵢⵜ ⵏ ⵡⴰⵏⵏⴰⵣⵏ; ⵊⴰⵔ ⵎⴰⵕⵕⴰ ⵉⵎⵖⵔⵉⴱⵉⵢⵏ..”. ⵉⵙⵎⴷ ⵡⴰⵡⴰⵍ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.
ⵏⵕⵥⵎ ⵜⴰⵡⵡⵓⵔⵉ ⴰⴷ ⵏ ⵓⵙⵓⵜⴳ ⵙ ⵎⵏⵏⴰⵡ ⵉⵎⵏⴰⴷⵏ, ⴳⵉⵙⵏ:
1- ⴰⴷ ⵜⴳ ⵜⵏⵓⴼⴰ ⵜⴰⴳⴷⵓⴷⴰⵏⵜ ⵚⴰⵃⴰ ⵏ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵜⵉⵏ ⴷ ⵉⵎⵙⴽⴰⵔⵏ ⵉⴷⵎⵙⴰⵏⵏ, ⵜⴰⵡⵙ ⴳ ⵓⵙⵙⴰⵔ. ⵏⵓⵙⵉ ⴷ ⵜⴰⵖⵓⵔⵉ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ: “ⴰⵙⵔⵓⵙ ⵏ ⵜⴳⵓⵔⵉ ⵏ ⵜⵏⵓⴼⴰ ⵜⴰⴳⴷⵓⴷⴰⵏⵜ ⴳ ⵓⴳⵏⵙ ⵏ ⵡⴰⵏⴰⵡ ⵓⵏⴳⵉⵎ ⴰⵎⴰⵢⵏⵓⵙ ⵓⵎⵓⴽⵏ ⵢⵓⵎⴰⵏ ⴷ ⵉⴷⵔⴰⵏ ⵏ ⵜⵎⵙⵙⵓⴳⵓⵔⵜ ⵜⴰⴳⴷⵓⴷⴰⵏⵜ”.
2- ⵜⴰⵎⴰⴼⴰⵡⵜ ⴷ ⵜⴷⵉⵎⵓⵇⵔⴰⵟⵉⵜ ⵏ ⵓⴽⵛⵓⵎ ⵙ ⵜⵏⵓⴼⴰ ⵜⵉⴳⴷⵓⴷⴰⵏⵉⵏ ⴳⴰⵏⵉⵏ ⵙⴳ ⵉⵣⵔⴼⴰⵏ ⵏ ⵜⵏⵎⵓⵔⵉ.
3- ⴰⵙⵎⴰⵢⵏⵓ ⴷ ⵓⵙⵎⵓⵟⵟⵓⵏ ⴷ ⴰⴷ ⵜⵉⵍⵉ ⵜⵎⵙⵓⴳⵓⵔⵜ ⴳ ⵜⴷⵉⵏⴰⵎⵉⵜ ⵏ ⵜⴳⵎⵉ, ⵜⴳ ⵉⵎⵉⵙⵙ ⵉⵜⵜⵔⵓⵔⵏ ⵉ ⵉⵙⵖⴰⵡⵙⴰⵜⵏ ⵏ ⵡⴰⵎⵓⵏ ⴳ ⵜⴰⵙⵓⵜ ⵜⵉⵙ 21, ⵏⵎⵎⴰⵖ ⴰⴷ ⵓⵔ ⵏⴼⵍ ⵜⴰⴳⵔⴰⵡⵍⴰ ⵜⴰⵎⵓⵟⵟⵓⵏⵜ ⵜⴰⴳⵔⴰⵖⵍⴰⵏⵜ ⴷ ⵓⵎⵎⵉⵥⵏ ⵏⵏⵙ.
ⵉⴳⴰ ⵓⵙⵜⴰⵢ ⵏ ⵓⵖⴰⵡⴰⵙ ⵏ ⵍⵎⵖⵔⵉⴱ ⴰⵣⴳⵣⴰⵡ ⴰⴷ ⵉⴳ ⵜⴰⵙⵔⵜⵉⵜ ⵜⵉⵙ ⵙⵏⴰⵜ ⵍⵍⵉ ⵔⴰⴷ ⵉⵙⵓⵜⴳ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵙⴰⵜⵉ ⵏ ⵜⴰⵏⵏⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⵍⵍⵉ ⵉⵙⴷⴷⵉⴷⵏ ⴳ ⵉⵏⴰⵡ ⵏⵏⵙ ⵙ ⵜⵎⵍⴷⴰ ⵏ ⵓⵕⵥⵥⵓⵎ ⵏ ⵜⵙⵓⵜⵍⵜ ⵜⴰⵣⵣⵔⴰⴼⵜ ⵏ ⵜⵡⴰⵍⴰ ⴰⴷ ⵜⴰⵣⵣⵔⴰⴼⵜ:” ⵉⵇⵇⴰⵏ ⴷ ⴰⴷ ⵢⵉⵍⵉ ⵓⵏⴳⵔⴰⵡ ⵉⵙⵎⴷⵏ ⵉⵣⴷⵉⵏ ⴷ ⵡⴰⵢⴷⴰ ⵙⵜⵔⴰⵜⵉⵊⵉ ⵏ ⵜⵎⵜⵜⵉⵡⵉⵏ ⵜⵉⵙⵉⵍⴰⵏⵉⵏ, ⵙⵍⴰⵡⴰⵏ ⴰⴽⴽⵯ ⵜⵉⵏ ⵓⵜⵛⵓ ⴷ ⵓⴷⵡⴰⵙ ⴷ ⵜⵥⴹⴰⵕⵜ, ⴷ ⵓⵙⵎⴰⵢⵏⵓ ⵉⵙⵓⵍⵏ ⵏ ⵉⵙⵖⴰⵡⵙⴰⵜⵏ ⵉⵏⴰⵎⵓⵔⵏ ⴰⵢⵍⵍⵉ ⵔⴰⴷ ⵉⵙⵙⴷⵓⵙ ⵜⴰⵏⴼⵔⵓⵜ ⵜⴰⵙⵜⵔⴰⵜⵉⵊⵉⵜ ⵏ ⵜⵎⴰⵣⵉⵔⵜ”.
ⵉⵣⴷⵉ ⵓⵖⴰⵡⴰⵙ ⵏ ⵍⵎⵖⵔⵉⴱ ⴰⵣⴳⵣⴰⵡ ⴷ ⵜⵉⵢⵢⴰⴼⵓⵜ ⵏⵏⵙ ⴼ ⵜⵏⴼⵔⵓⵜ ⵏ ⵓⵢⵛⵓ ⵍⵍⵉ ⵉⴳⴰⵏ ⵜⴰⵎⵙⴰⵔⵜ ⵜⴰⵙⵜⵔⴰⵜⵉⵊⵉⵜ ⵏ ⵖⵉⵍⴰⴷ ⴷ ⵉⵎⴰⵍ ⴳ ⵜⴽⵕⴹⴰ ⵜⴰⴳⵔⴰⵖⵍⴰⵏⵜ, ⴷ ⴷⴰⵔ ⵉⵡⴰⵏⴽⵏ ⴷ ⵜⵥⴹⴰⵕⵟ ⵏⵏⵙ ⴳ ⵓⵎⴷⴰⵡⴰⵍ ⴷ ⵜⵎⵓⵣⴰⵢⵉⵏ ⵏⵏⵙ ⴰⴽⴷ ⴽⵉⴳⴰⵏ ⵏ ⵜⵎⵜⵜⴰ.
ⵜⵙⵓⵜⴳ ⵜⵎⴰⵣⵉⵔⵜ ⵏⵏⵖ ⵜⵉⵎⵢⵓⵔⵉⵏ ⵏⵏⵙ ⵜⵉⵏⴼⵍⴰⵃⵉⵏ ⵜⵉⵎⵣⵡⵓⵔⴰ, ⵜⴳ ⴰⵙⵙ ⴰⴷ ⵜⴰⴷⵓⵙⵉ ⵜⴰⵣⴳⵣⴰⵡⵜ ⵉⵣⵣⵉⴳⵣⵏ, ⵓⵔ ⵜⴳⵉ ⵖⴰⵙ ⴰⵖⴱⴰⵍⵓ ⵏ ⵓⵜⵛⵓ ⵉ ⵉⵎⵖⵔⵉⴱⵉⵢⵏ, ⴰⵔ ⵜⵜⴷⵔⵓ ⵉⴼⵓⵍⴽⵉⵢⵏ ⵏⵏⵙ ⴷ ⵜⵎⵓⵣⴰⵢⵉⵏ ⵏⵏⵙ ⴷ ⴽⵉⴳⴰⵏ ⵏ ⵜⵎⵜⵜⴰ.
ⴰⵔ ⴰⵖ ⵉⵜⵜⴰⵡⵉ ⵓⵙⵓⵜⴳ ⵏ ⵓⵖⴰⵡⴰⵙ ⵏ ⵍⵎⵖⵔⵉⴱ ⵙ ⵓⵙⵓⵜⴳ ⵏ ⵜⵙⵔⵜⴰⵢ ⵏⵏⵖ ⴳ ⵎⴰⵎⴰⵏ ⴳ ⵓⵙⵎⵓⵙⵙⵓ ⴷ ⵉⵙⵎⵔⵙⵏ ⴷ ⵉⵎⴰⵙⵙⵏ ⴷ ⵉⵎⵏⴰⴷⵏ ⴷ ⵜⵎⴰⵎⴽⵉⵏ ⵙ ⵔⴰⴷ ⵜⵉⵍⵉ ⵜⵏⴼⵔⵓⵜ ⵏ ⵡⴰⵎⴰⵏ, ⵉⴳⴰⵏ ⵙⴳ ⵜⴰⵏⴼⵔⵓⵜ ⵏⵏⵖ ⵜⴰⵙⵜⵔⴰⵜⵉⵊⵉⵜ ⴷ ⵜⵉⵏ ⵓⵜⵛⵓ, ⵍⵍⵉⵖ ⴳⴰⵏ ⵡⴰⵎⴰⵏ ⵙⴳ ⵉⵎⵏⴰⴷⵏ ⵏ ⵜⵎⵜⵜⴰ , ⴰⵡⴷ ⵉⵙⵎⴰⵇⵇⵍⵏ ⵉⵙⵜⵔⴰⵜⵉⵊⵉⵢⵏ ⴳ ⵉⵍⵍⴰ ⵓⵙⴼⴰⵍ ⴰⵔ ⵜⵜⵉⵏⵉⵏ ⵎⴰⵙ ⴳⴰⵏ ⵡⴰⵎⴰⵏ ⴳ ⵜⵎⵏⵜⵍⵉⵏ ⵏ ⵉⵎⴰⵖⵏ ⵉⵙⴳⴰⵡⴰⵏⵏ ⴷ ⵜⵎⵓⴽⵔⵉⵙⵉⵏ ⵜⵉⴳⵏⵙⴰⵏⵉⵏ ⵏ ⵉⵡⴰⵏⴽⵏ.
ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,
ⴳ ⵜⵣⴷⴰⵢⵉⵏ ⵏ ⴱⵕⵕⴰ, ⵣⵣⵉⴳⵣⵏ ⵉⴼⵔⴷⴰⵙ ⴷ ⵉⵏⴳⵎⴰⵎⵏ ⵏ ⵓⵙⵇⵇⵉⵎ ⴳ ⵓⵙⵎⵓⵙⵙⵓ ⵏⵏⵙ, ⵙ ⵜⵉⴹⴰⴼ ⴷ ⵜⵉⵣⵡⵉⵔⵉ, ⴷ ⵜⴷⵉⴱⵍⵓⵎⴰⵙⵉⵜ ⵜⴰⵏⴰⵎⵓⵔⵜ, ⵉ ⵜⵎⵙⴰⵔⵉⵏ ⵏⵏⵖ ⵜⵓⴷⴷⵉⵔⵉⵏ ⵜⵉⵍⵉ ⴳ ⵜⵣⵡⵉⵔⵉ ⵏⵏⵙⵏⵜ ⵜⴰⵎⵙⴰⵔⵜ ⵏ ⵜⵢⴰⵏⵜ ⵜⴰⵏⴰⴽⴰⵍⵜ, ⴳ ⵓⵙⴰⵜⵉ ⴰⵙⵉⵏⵔⴰⵏ ⴷ ⵓⴳⵜⵉⵔⴰⵏ.
ⵉⴷⵔⵓ ⵓⵙⵇⵇⵉⵎ ⴳ ⵜⵙⵓⵜⵍⵜ ⵜⵉⵙ 143 ⵏ ⵜⵎⵙⵎⵓⵏⵜ ⵜⴰⵎⴰⵜⴰⵢⵜ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⴳ ⵏⵓⵡⴰⵏⴱⵉⵔ 2021 ⴳ ⵎⴰⴷⵔⵉⴷ, ⵜⴳⴰ ⵜⵎⵍⴷⴰ ⵖ ⵏⵙⴽⵔ ⴷ ⵉⴳⵎⴰⵎⵏ ⵏ ⵜⴰⵢⵢⴰⵡⵜ ⵜⴰⵏⴰⵎⵓⵔⵜ ⵉⵎⴹⴰⴽⴰⵕⵏ ⴳ ⴽⵉⴳⴰⵏ ⵏ ⵉⵏⴳⴳⵯⴰ ⵏⵏⵖ ⴳ ⵙⵎⵎⵓⵙ ⵉⵎⵏⵥⴰⵡⵏ.
ⵉⴷⵔⵓ ⵓⵙⵇⵇⵉⵎ ⵓⵍⴰ ⵖ ⵓⴳⵔⴰⵡ ⵏ ⵜⴰⵎⵓⵏⵜ ⵜⴰⴱⵕⵍⴰⵎⵏⵉⵜ ⵜⴰⴼⵔⵉⵇⵉⵜ ⴷ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⵎⵉⵣⴰⵔ ⵏ ⵉⴼⴼⵓⵙ ⵏ ⵍⵇⴱⵍⵜ ⵏ ⴰⵙⵢⴰ, ⴷ ⵓⵙⵉⵔⴰ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⵏⵉⵜ ⵜⴰⴼⵕⴰⵏⴽⵓⴼⵓⵏⵉⵜ, ⵉⵏⵄⵔ ⴳⵉⵙⵏⵜ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵜⵏⵓⴼⴰ ⵏ ⵜⵎⴰⵣⵉⵔⵜ ⵏⵏⵖ ⴷ ⵉⵎⵓⴽⴽⵏ ⵍⵍⵉ ⵜⵙⴽⵔ ⴷ ⵜⵎⵙⴰⵔⵉⵏ ⵏ ⵓⴼⵔⴰ ⴷ ⵓⵔⴳⴳⵉⴳ ⴷ ⵜⵣⵔⴼⵜ ⵏ ⵓⵏⵣⵡⵉ.
ⵍⵍⵉⵖ ⵏⵉⵡⵙ ⴳ ⵉⵎⴰⵙⵙⵏ ⵉⴱⵕⵍⴰⵎⴰⵏⵉⵢⵏ ⵓⵕⵓⵉⵏⴰⵎⵎⴰⵙⵏ, ⵏⵡⴰⵍⴰ ⵙⴳ ⵉⵏⵏⴰⵢⵔ 2022 ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⴰⵎⵓⵏⵜ ⵉ ⵓⵏⴰⵎⵎⴰⵙ ⵍⵍⵉ ⵉⴳⴰⵏ ⵉⵎⵉⵙⵙ ⴰⴱⵕⵍⴰⵎⴰⵏⵉ ⵏ ⵜⵎⴷⵔⴰⵡⵜ ⵓⵕⵓⵜⴰⵏⵏⴰⵎⵎⴰⵙⵜ ⵖ ⵜⴻⵟⵟⴰⴼ ⵜⵎⴰⵣⵉⵔⵜ ⵏⵏⵖ ⴰⴷⵖⴰⵔ ⵉⵙⵜⴰⵡⵀⵎⵎⴰⵏ.
ⵏⵎⵎⴰⵖ ⴼ ⵓⵙⴳⵉⴷⴷⵉ ⵏ ⵜⴰⵢⵢⴰⵡⵉⵏ ⵜⵉⵏⴰⵎⵓⵔⵉⵏ ⴳ ⵜⵎⴰⴷⴷⴰⵙⵉⵏ ⵜⵉⴳⵜⵉⵔⴰⵏⵉⵏ, ⵏⵙⵔⵙ ⵢⴰⵏ ⵓⵖⴰⵡⴰⵙ ⴰⵎⴰⵢⵏⵓ ⴼ ⵓⵙⵏⵎⴰⵍⴰ ⵏ ⵜⵔⵓⴱⴱⴰ ⵏ ⵜⴷⴷⵓⴽⴽⵍⴰ ⵜⴰⴱⵕⵍⴰⵎⴰⵏⵉⵜ ⵙ ⵓⵣⴷⴷⵓⵢ ⴷ ⵓⵎⵢⴰⵡⴰⵙ ⴰⴽⴷ ⵉⵏⴳⴳⵯⴰ ⵏⵏⵖ ⴳ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ.
ⴳ ⵓⵙⴰⵜⵉ ⵏ ⵓⵙⵎⴰⵢⵏⵓ ⵏ ⵉⵖⴰⵡⴰⵙⵏ ⵏ ⵜⵎⴷⵔⴰⵡⵜ ⴷ ⵓⵎⵢⴰⵡⴰⵙ ⴰⴳⵔⵖⵍⴰⵏ, ⵉⵍⵍⴰ ⵓⵙⵓⵜⴳ ⵏ ⵜⵎⴷⵔⴰⵡⵜ ⵏ ⵓⵙⵇⵇⵉⵎ ⴰⴽⴷ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⴷ ⴽⵉⴳⴰⵏ ⵏ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ ⵏ ⵓⵕⵓⴱⴱⴰ ⴷ ⵜⵎⵙⵎⵓⵏⵜ ⵜⴰⴱⵕⵍⴰⵎⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ, ⵉⵍⵍⴰ ⵓⵎⵙⴰⵙ ⴼ ⵓⵙⵏⴼⴰⵔ ⵏ ⵜⴳⵯⵎⴰⵜ ⵜⴰⵎⵔⵙⵍⴰⵏⵜ ⵜⴰⵎⴰⵢⵏⵓⵜ ⵍⵍⵉ ⵜⵙⵥⵕⴼ ⵜⴰⵎⵓⵏⵜ ⵏ ⵓⵕⵓⴱⴱⴰ ⴰⴽⴷ ⵙⴰⵜ ⵜⵎⵔⵙⴰⵍ ⵜⵉⵣⵔⴰⴼⵉⵏ ⵏ ⵓⵕⵓⴱⴱⴰ ⵙ ⵜⵏⴰⵔ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵜⴰⴼⴰⵕⴰⵏⵚⵉⵜ ⴷ ⵜⵎⴷⵔⴰⵡⵜ ⴰⴽⴷ ⴰⵙⵇⵇⵉⵎ ⵏ ⵉⵎⵓⵔⴰ ⴰⵜⵛⵉⴽⵉ ⴷ ⵓⵙⵇⵇⵉⵎ ⵏ ⵉⵎⵓⵔⴰ ⴰⴱⵉⵍⵊⵉⴽⵉ ⴷ ⵓⵙⵏⴰⵍ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵉⵟⴰⵍⵢⴰ ⴷ ⵓⴱⵕⵍⴰⵎⴰⵏ ⵏ ⵍⵢⵓⵏⴰⵏ ⴷ ⵜⵎⵙⵎⵏⵜ ⵏ ⵍⴱⵓⵔⵜⵓⵖⴰⵍ ⴷ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵀⴰⵏⵖⴰⵔⵢⴰ.
ⵜⴳⴰ ⵜⴳⵯⵎⴰⵜ ⴰⴷ ⵜⴰⵎⴰⵜⴰⵔⵜ ⵏ ⵜⵎⵢⵉⵎⴰⵏⵜ ⴷ ⵜⴷⴷⵓⴽⵍⴰ, ⵜⴳ ⵜⵉⵔⴰⵜ ⵏ ⵓⵎⵢⴰⵡⴰⵙ ⵊⴰⵔ ⵓⵙⵇⵇⵉⵎ ⵏⵏⵖ ⴷ ⵉⴱⵕⵍⴰⵎⵏ ⵉⵏⴰⵎⵓⵔⵏ ⵏ ⵓⵕⵓⴱⴱⴰ, ⵙⵎⴷⵏ ⴰⴽⴷ ⵉⵖⴰⵡⴰⵙⵏ ⵏ ⵓⵎⵢⴰⵡⴰⵙ ⵢⴰⴹⵏⵉⵏ ⴷ ⵎⵔⵙⴰⵍ ⴳ ⵓⵙⴰⵢⵔⵓⵔ ⴰⵏⴳⵍⵓⵙⴰⴽⵙⵓⵏⵉ ⵢⵉⵍⵉ ⴳⵉⵙ ⵓⵎⵉⵔⵉⴽⴰⵏⵉ, ⵔⴰⴷ ⵜⴰⵡⵙ ⴳ ⵓⵎⵙⴰⵡⴰⵍ ⴰⴽⴷ ⵉⵎⴷⵔⴰⵡⵏ ⴰⴷ ⴷ ⵓⵙⵏⴼⵍ ⵏ ⵜⵎⵓⵣⴰⵢⵉⵏ ⴷ ⵉⵔⵣⴰⴼⵏ ⴷ ⵜⵙⵎⵉⴳⴰⵍ ⵏ ⵜⵖⵔⵉ, ⴷ ⵜⵓⵙⵙⵏⴰ ⵉⵜⵜⵓⵙⵏⴼⴰⵍⵏ ⴼ ⵜⵎⵙⴽⴰⵔ ⵜⵉⴱⵕⵍⴰⵎⵏⵉⵢⵉⵏ.
ⵉⵙⵜ ⵎⴰⵙⵙⴰ ⵉⴷ ⵎⴰⵙⵙ,
ⵔⴰⴷ ⴱⴷⴷⵏⵜ ⵜⵖⵉⵎⵉⵜⵉⵏ ⵜⵉⴳⴷⵓⴷⴰⵏⵉⵏ, ⵎⴰⵛⵛ ⵔⴰⴷ ⵏⵣⵣⵉⴳⵣ ⵜⵉⵡⵡⵉⵔⵉⵡⵉⵏ ⵏⵏⵖ ⴳ ⵓⵙⵡⵉⵔ ⵏ ⵜⵙⵇⵇⵉⵎⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵎⵖⵍⴰⵍⵉⵏ ⴷ ⵜⵔⵓⴱⴱⴰ ⵜⵉⵙⴳⵓⵎⴰⵏⵉⵏ ⵏ ⵜⵡⵡⵓⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵜⵉⵢⵢⴰⴹ, ⴷ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ, ⴷ ⵓⵙⵡⵓⵔⵉ ⴼ ⵉⵙⴰⵡⵓⵔⵏ ⵍⵍⵉ ⵏⵕⵥⵎ ⵖ ⵉⵍⵍⴰ ⵓⵙⵏⴼⵍ ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ.
ⵔⴰⴷ ⵏⵣⵣⵉⴳⵣ ⴰⵎⵙⴰⵡⴰⵍ ⵉⵕⵡⴰⵏ ⴳ ⵓⵙⴰⵜⵉ ⵏ ⵉⵏⴳⵎⴰⵎⵏ ⵏ ⵓⵙⵇⵇⵉⵎ ⴷ ⵉⴼⵔⴷⴰ ⵏⵏⵙ ⵉⵙⵔⵜⴰⵏ ⴰⴷ ⵏⵙⵓⵊⵉⴷ ⵉ ⵜⵙⵓⵜⵍⵜ ⴷ ⵢⵓⵛⴽⴰⵏ ⵍⵍⵉ ⵔⴰⴷ ⵉⴱⵓⵖⵍⵓ ⵓⵖⴰⵡⴰⵙ ⵏⵏⵙ ⵏ ⵜⵡⵡⵓⵔⵉ ⵙⵍⴰⵡⴰⵏ ⴰⴽⴽⵯ ⴳ ⵓⴼⴰⵔⵙ ⴰⵣⵣⵔⴰⴼ.
ⴰⵔ ⵙⵏⵉⵎⵎⵉⵔⵖ ⴽⵓ ⵎⴰⴷ ⵢⵉⵡⵙⵏ ⴰⴷ ⵢⵉⵍⵉ ⴰⵢⵍⵍⵉ ⵉⵜⵜⵓⵙⴽⴰⵔⵏ ⴳ ⵜⵙⵓⵜⵍⵜ ⴰⴷ, ⵙⵍⴰⵡⴰⵏ ⴰⴽⴽⵯ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵟ ⴷ ⵉⴳⵎⴰⵎⵏ ⵏⵏⵙ, ⵉⴼⵔⴷⴰⵙ ⵏ ⵓⵙⵇⵇⵉⵎ, ⵜⵓⵣⵍⵜ ⴷ ⵜⵓⴳⵜ, ⵍⵍⵉⵖ ⵉⵡⵙⵏ ⴳ ⵜⵡⵡⵓⵔⵉⵡⵉⵏ ⵏ ⵓⵙⵇⵇⵉⵎ, ⵜⴰⵎⴰⵜⴰⵔⵜ ⵏ ⵓⵍⵜⴰⵖ ⴰⵎⴳⵔⵓ ⴳ ⵜⵡⴰⴷⴰ ⵏ ⵜⴳⵎⵉ ⴷ ⵓⵙⴷⵓⵙ ⵏ ⵜⵔⵙⴰⵍ ⵏ ⵜⵎⵔⵙⴰⵍ ⴷ ⵜⴷⵉⵎⵓⵇⵔⴰⵟⵉⵜ ⴷ ⵜⵉⵍⵉⵜ ⴰⴽⴷ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵄⵣⵣⵓ ⵕⴱⴱⵉ, ⵃⵎⴰ ⴰⴷ ⵏⵉⵍⵉ ⴷ ⵜⵏⴰⵥⵕⵉⵏ ⵚⵉⵃⵉⵏ ⴰⵖ ⵉⵎⵏⴰⴷⵏ.
ⵜⵉⵡⵏⵏⵉⵜⵉⵏ ⵏ ⵓⵙⵏⵉⵎⵎⵔ ⵉ ⵉⵎⵙⵜⴳⴳⴰⵔⵏ ⴷ ⵉⵎⵙⵡⵓⵔⵉⵢⵏ ⵏ ⵓⵙⵇⵇⵉⵎ ⴼ ⵜⵡⵡⵓⵔⵉ ⵏⵏⵙ ⵉ ⵉⴷ ⴱⴰⴱ ⵏ ⵜⵏⴼⵔⵓⵜ ⴷ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⴷ ⵉⴷ ⴱⴰⴱ ⵏ ⵡⴰⵔⴰⵢ ⵙⵡⵓⵔⵉⵏⵉⵏ ⴳ ⵓⵙⵇⵇⵉⵎ ⴼ ⵓⵙⵎⵓⵙⵙⵓ ⵏⵏⵙⵏ ⵉⵙⵓⵍⵏ ⵉ ⵜⵡⵡⵓⵔⵉⵡⵉⵏ ⵏⵏⵖ, ⴰⴷ ⵓⵔ ⵜⵜⵓⵖ ⵓⵍⴰ ⵜⵎⵙⵡⵓⵔⵉⵢⵉⵏ ⴷ ⵉⵎⵙⵡⵓⵔⵉⵢⵏ ⵏ ⵜⵖⵓⵙⵉ ⴷ ⵓⴱⵟⵟⵓ ⴼ ⵜⵉⵍⵉ ⵏⵏⵙⵏ ⵉⵙⵓⵍⵏ ⵉ ⵜⵡⵉⵙⵉ, ⴰⵔ ⵙⵏⵉⵎⵎⵉⵔⵖ ⵓⵍⴰ ⵜⵉⵎⵖⴰⵔⵉⵏ ⴷ ⵉⵔⴳⴰⵣⵏ ⵏ ⵓⵙⵎⴰⵍⵍⵍⵉⵖ ⴹⴼⵕⵏ ⵜⵉⵡⵡⵓⵔⵉⵡⵉⵏ ⵏ ⵓⵙⵇⵇⵉⵎ ⵙ ⵓⵙⴼⵙⵉ ⴷ ⵓⵅⴼⴰⵡⴰⵍ ⴷ ⵓⴼⵔⴰⵏ.
ⵜⴰⵏⵎⵎⵉⵔⵜ ⴼ ⵓⵙⵙⴼⵍⴷ ⵏⵏⵓⵏ.