ⴰⵙⵇⵇⵉⵎ ⵏ ⵉⵎⵓⵔⴰ ⵉⵙⵏⴰⵍ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵉ ⵜⵉⵍⵉⵜ ⵏ ⵜⴼⵔⵓⵜ ⵖ ⵜⵙⴳⴰ ⵏ ⵍⴳⵔⴳⴰⵔⴰⵜ, ⵉⵙⵖⵣⵏ ⵙ ⵜⵓⴳⵜ ⴰⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵏ 2021
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵜⵓⴳⵜ ⴰⵙⵙ ⵏ ⵓⵙⵉⵎⵡⴰⵙ 13 ⵏⵓⵡⴰⵏⴱⵉⵔ 2020 ⴰⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵓⵟⵟⵓⵏ 65.20 ⵏ 2021, ⵖ ⵜⵖⵉⵎⵉⵜ ⵜⴰⴳⴷⵓⴷⴰⵏⵜ ⵍⵍⵉ ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵜⵉⵍⵉⵜ ⵏ ⵎⴰⵙⵙ ⵎⵓⵃⴰⵎⵎⴰⴷ ⴱⵏⵛⴰⵄⴱⵓⵏ ⴰⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ, ⴷ ⴽⵔⴰ ⵏ ⵉⴳⵎⴰⵎⴰⵏ ⵏ ⵜⵏⴱⴰⴹⵜ.
ⵖ ⵜⵣⵡⵉⵔⵉ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⴷ “ⵢⵓⵛⴽⴰ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵏ 2021 ⵖ ⵓⵎⵏⴰⴹ ⵉⵥⵍⵉⵏ ⵖ ⵜⴷⴷⵔ ⵜⵎⴰⵣⵉⵔⵜ ⵏⵏⵖ, ⴷ ⵓⵎⴰⴹⴰⵍ, ⵙ ⵉⴷⵔⵉⵣⵏ ⵏⵏⵙ ⴼ ⵜⴷⵎⵙⴰⵏⵉⵏ ⵏ ⵉⵡⴰⵏⴽⵏ ⵏ ⵓⵎⴰⴹⴰⵍ”, ⵉⵙⵓⵜⴳ” ⵜⵉⵔⴰⵜ ⵉⴷⵓⵙⵏ ⵉⴹⴼⵕⵏ ⵜⴰⵙⵙⴰⵙⵜ ⵙⴳ ⵜⵉⵣⵡⵉⵔⵉ ⵙ ⵓⵙⵎⴰⵇⵇⵍ ⵉⴷⵔⴰⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵍⵍⵉ ⵉⵎⵎⴰⵖⵏ ⴼ ⵉⵏⴰⵔⵓⵣⵏ ⵏ ⴽⵓ ⵉⵎⵙⴽⴰⵔⵏ, ⵖⵎⴽ ⵍⵍⵉ ⴷ ⵜⵎⵍⴰ ⵜⵉⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⵏ ⵜⵎⴰⵣⵉⵔⵜ ⵏⵏⵖ”.
ⵉⴳⴰ ⵓⵙⵖⵣⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵏ ⵓⵙⴳⴳⵯⴰⵙ ⵏ 2021 ⵖ ⵜⵉⵖⵔⵉ ⵜⴰⵎⵣⵡⴰⵔⵓⵜ ⴰⵙⵎⴰⴷ ⵏ ⵜⴱⵔⵉⴷⵜ ⵏ ⵜⵖⵔⵉ ⵏⵏⵙ, ⵉⵍⵍⴰ ⵓⵙⵎⵏⵉⴷ ⵏⵏⵙ ⵙⴳ ⵓⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⵖ ⵜⵖⵉⵎⵉⵜ ⵜⴰⴳⴷⵓⴷⴰⵏⵜ, ⵜⵉⵖⵔⵉ ⵏⵏⵙ ⴷⴰⵔ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ, ⴰⵙⵏⴼⵍ ⵏⵏⵙ, ⴷ ⵓⵎⴹⴰⴽⴰⵕ ⴷ ⵓⵙⵜⴰⵢ ⵏⵏⵙ ⵖ ⵜⵖⵉⵎⵉⵜ ⵜⴰⴳⴷⵓⴷⴰⵏⵜ.
ⵙⵏⵎⴰⵍⴰⵏⵜ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ 55 ⵏ ⵜⵙⵎⵓⵏⵉ ⵙ 198 ⵏ ⵜⵙⵔⴰⴳⵜ ⵏ ⵜⵡⵓⵔⵉ, ⵉⵍⵍⴰ ⵓⵙⵎⵏⵉⴷ ⵏ 185 ⵏ ⵓⵙⵏⴼⵍ ⵖ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ ⵙⴳ ⵜⵏⴰⴱⴰⴹⵜ ⴷ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⴷ ⵉⵎⵓⵔⴰ ⵓⵔ ⵍⵍⵉⵏⵉⵏ ⵖ ⴽⵔⴰ ⵏ ⵜⵔⴰⴱⴱⵓⵜ, ⵜⵜⵓⵇⴱⴰⵍⵏ 49 ⵏ ⵓⵙⵏⴼⵍ, ⴳⵉⵙⵏ ⵓⴳⴳⴰⵔ ⵏ 40 % ⵏ ⵡⵉⵏ ⵜⵓⵣⵍⵜ.
ⵜⵙⴽⵔ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ 10 ⵜⵙⵎⵓⵏⴰⵢ ⵖ ⵙⴰ ⵡⵓⵙⵙⴰⵏ, ⵙ 54 ⵏ ⵜⵙⵔⴰⴳⵜ ⵏ ⵜⵡⵓⵔⵉ, ⵖⵎⴽ ⵍⵍⵉ ⵙⴽⵔⵏⵜ ⵜⵙⵇⵇⵉⵎⵉⵏ ⵢⴰⴹⵏⵉⵏ ⵜⵉⵙⵎⵓⵏⴰⵢ ⵉ ⵓⵙⵎⵏⵉⴷ ⴷ ⵓⵎⴹⴰⴽⴰⵕ ⴷ ⵜⵖⵔⵉ ⵏ ⵜⵎⵙⴰⵙⵜⵍⵉⵏ ⵜⴰⵢⵢⴰⵡⵉⵏ, ⴳⵉⵏⵜ ⵜⴰⵎⵍⴷⴰ ⵏ ⵓⵣⵣⵔⴰⵢ ⵏ ⵉⵖⴰⵡⴰⵙⵏ ⵉⴳⴷⴰⴷⴰⵏⵏ ⴷ ⵓⵙⵎⵀⵍ ⵏ ⵓⵙⵍⴳⵏ ⴰⵎⴰⴷⴷⴰⵙ ⵏ ⵓⵥⵕⴼ.
ⵜⵉⴽⵍⵉⵜ ⵜⴰⵎⵣⵡⴰⵔⵓⵜ ⴰⴷ ⵉⵍⵍⴰ ⵓⵣⵣⵔⴰⵢ ⵏ ⵜⵡⵓⵔⵉⵡⵉⵏ ⵏ ⵜⵙⵇⵇⵉⵎⵉⵏ ⵖ ⵓⵎⵏⵉⴷ ⴰⴷ ⵖ ⵓⵙⵉⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵉⵥⵟⵡⴰⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ, ⴰⵢⵍⵍⵉ ⵢⵉⵡⵙⵏ ⵖ ⵓⵎⵢⴰⴷⴰⵙ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⴷⴰⵔ ⵉⵏⵎⵓⵔⴰⵏ ⴷ ⵓⵙⴷⵓⵙ ⵏ ⵓⵏⵢⴰⵍⴽⴰⵎ ⵏ ⵉⵎⵓⵔⴰ ⴷⵉⴷⵙⵏ.
ⵉⵡⵙⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵖ ⵉⵎⴹⴰⴽⴰⵕⵏ ⵉⵎⴰⵜⴰⵢⵏ ⴷ ⵣⵓⵣⵣⵔⵏⵉⵏ ⴷ ⵜⵙⵓⵎⵔⵉⵏ ⵏ ⵉⵙⵏⴼⵍⵏ, ⴰⵢⵍⵍⵉ ⵢⵉⵡⵙⵏ ⵖ ⵓⵙⵖⵓⴷⵓ ⵏ ⵓⵙⵏⴼⴰⵔ ⵏ ⵓⵙⵍⴳⵏ, ⴷ ⵓⵙⵏⵓⵛⵛⴳ ⵏ ⵜⴰⵢⵏⵉⵜ ⵏ ⵜⵏⴱⴰⴹⵜ ⵉ ⵜⵎⵙⴰⵔⵉⵏ ⵍⵍⴰⵏⵉⵏ ⵖ ⵉⵅⵎⵎⵉⵎⵏ ⵏ ⵉⵏⵎⵓⵔⴰⵏ ⴰⵎ ⵜⵉⵡⵉⵙⵉ ⵏ ⵜⵡⵉⵣⵉ ⵃⵎⴰ ⴰⴷ ⵢⵉⵍⵉ ⵓⵎⵢⴰⵙ ⵊⴰⵔ ⴽⵓ ⵡⵉⵍⵍⵉ ⵜⵜⴰⵡⵙⵏⵉⵏ.
ⵖⵔⴰⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵉ ⵓⵙⵎⴰⵜⴰ ⵏ ⵓⵙⴼⵍⵙ ⴰⴷⵓⵙⴰⵏ, ⴷ ⵓⵎⵓⴽⵏ ⵏ ⵓⵏⴳⵔⴰⵡ ⵏ ⵓⵙⵙⵍⵎⴷ, ⴷ ⵓⵙⵎⵖⵔ ⵏ ⵜⵙⵓⴳⵔⵜ ⵏ ⵎⵙⵓⵖⵜ, ⴰⵙⴱⴷⴷⵉ ⵏ ⵜⵛⵃⵓⵜ, ⴰⵙⴷⵓⵙ ⵏ ⵜⵎⵙⵙⵏⵜⵉⵜ ⵜⴰⵎⵖⵔⵉⴱⵉⵜ, ⴰⵙⵏⴰⵍ ⵏ ⵓⵙⵡⵓⵔⵉ, ⴰⵣⵣⵔⴰⵢ ⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⴰⵙⵏⴰⵍ ⵏ ⵉⴳⵔⴰⵏ ⵜⵜⵓⴹⵕⵕⴰⵏⵉⵏ, ⴰⵙⴷⵓⵙ ⵏ ⵓⵥⵟⵟⴰ ⴰⴷⵎⵙⴰⵏ ⴷ ⵓⵏⴼⵍⴰⵃ ⴷ ⵓⵏⴰⵎⴰⵏ ⴷ ⵓⴷⵍⵙⴰⵏ ⴷ ⵓⵏⵎⵏⴰⴹ, ⴰⵙⵓⵊⴷ ⵏ ⵉⴼⵙⵙⴰⵢⵏ ⵉ ⵓⵖⵓⵍ ⴰⵏⴰⵎⵓⵔ ⵢⵓⵎⴰⵏ ⴽⵓ ⵉⵙⵡⵉⵔⵏ ⴷ ⴽⵓ ⵉⴳⵔⴰⵏ.
ⵢⵉⵡⵉ ⴷ ⵓⵙⵏⴼⴰⵔ ⵏ ⵓⵙⵍⴳⵏ ⵉⵜⵜⵓⵙⵖⵣⵏⵏ ⴽⵕⴰⴹ ⵉⵙⵡⴰⵍⴰⵢⵏ ⵉⴷⵙⵍⴰⵏⵏ: ⴰⵙⴽⵔ ⵏ ⵓⵖⴰⵡⴰⵙ ⵏ ⵓⵙⵙⵉⴷⵔ ⵏ ⵜⴷⵎⵙⴰ ⵜⴰⵏⴰⵎⵓⵔⵜ, ⴰⵙⵎⴰⵜⴰ ⵏ ⵓⵙⴼⵍⵙ ⴰⴷⵓⵙⴰⵏ ⵓⵛⵛⵉⵍ ⵙⴳ ⵉⵏⵏⴰⵢⵔ 2021, ⴰⵙⴽⵔ ⵏ ⵡⴰⵏⴰⵡ ⵏ ⵓⵡⴰⵏⴽ ⴷ ⵓⵙⵏⵍⵍⵉ ⵏ ⵓⵙⵡⵓⴷⴷⵓ ⵏⵏⵙ. ⵉⵙⵔⵙ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵏ 2021 ⵜⴰⵔⴷⵉⵡⵉⵏ ⵖ ⵜⵍⵍⴰ ⵜⵢⴰⴼⵓⵜ ⵜⴰⵏⴼⵍⴰⵃⵜ ⵏ 70 ⵎⵉⵍⵢⵓⵏ ⵇⵉⵏⵟⴰⵕ, ⴰⵜⵜⵉⴳ ⴰⵏⴰⵎⵎⴰⵙ ⵏ ⵍⴱⵓⵟⴰⵏ ⵖ 350 ⴷⵓⵍⴰⵕ ⵉ ⵟⵟⵓⵏ, 4.8% ⴰⵙⵖⵍ ⵉⵜⵜⵔⵙⵏ ⵉ ⵓⵙⴳⴳⵯⴰⵙ ⴷ ⵢⵓⵛⴽⴰⵏ, ⴰⵙⵉⵣⴷⵔ ⵏ ⵜⵎⵙⴰⵙⵜⵍⵜ ⵉⴳⴰ 6.5% ⵖ ⵓⵢⴰⴼⵓ ⴰⴳⵯⵏⵙⴰⵏ.
ⵖ ⵜⴳⵉⵔⴰ ⵏ ⵜⵖⵉⵎⵉⵜ, ⴷⴼⴼⵉⵔ ⵏ ⵜⵣⵣⵉⴳⵣⵉⵏ ⴳⴳⵓⵔⴰⵏⵉⵏ ⵖ ⵜⵙⴳⴰ ⵉⵥⵍⵉⵏ ⵏ ⵍⴳⵔⴳⴰⵔⴰⵜ ⵖ ⵉⴼⴼⵓⵙ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ, ⴼⴽⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⴰ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⴽⵛⵛⵓⵎⵉⵏ ⵖ ⵉⵍⵍⴰ ⵓⵙⵏⴰⵍ ⵉⵙⵎⴷⵏ ⵏ ⵜⵡⵓⵔⵉ ⵜⵓⵍⴳⵉⵏⵜ ⵏ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⵏⵙⵙⵉⵅⴼ ⴰⵏⴰⴼⵍⵍⴰ ⵏ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⴷ ⵓⵏⵙⵙⵉⵅⴼ ⵏ ⵜⵔⵙⴰⵍ ⵏ ⵜⵎⴰⵖⵜ ⵜⴰⵎⴰⵜⴰⵢⵜ ⵉ ⵓⵎⵣⴰⵖ ⵏ ⵜⵓⵍⴳⵉⵏⵜ ⴷ ⵜⵉⵍⵉⵜ ⵏ ⵜⴼⵔⵓⵜ ⴷ ⵓⵔⴳⴳⵉⴳ ⵖ ⵜⵙⴳⴰ.
ⵏⵏⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵉⵎⵉⵥ ⵏⵏⵙⵏ ⵖ ⵜⵖⵜⴰⵙⵉⵏ ⵜⵓⵏⵥⵉⵥⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴷ ⵓⵙⵓⵜⴳ ⵢⴰⵜⵜⵓⵢⵏ ⵉ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵙ ⵜⵡⵓⵔⵉ ⵏⵏⵙⵏⵜ ⵢⴰⵜⵜⵓⵢⵏ ⴷ ⵉⵥⵍⵉⵏ, ⵍⵍⵉ ⵉⵎⵎⴰⵙⵙⵏ ⵙ ⵜⵣⵓⵍⵜ ⵃⵎⴰ ⴰⴷ ⴳⵉⵏⵜ ⵜⵜⵎⵉ ⵉ ⴳⴰⵔ ⵉⵙⴽⴽⵉⵔⵏ ⵏ ⵡⴰⵄⴷⵉⵡⵏ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ, ⵙⵓⵜⴳⵏ ⵜⴰⵡⵓⵔⵉ ⵏⵏⵙⵏⵜ ⵖ ⵓⵎⵣⴰⵖ ⵏ ⵜⵎⵓⵔⵜ ⴷ ⵓⴼⵔⴰⴳ ⵏ ⵜⵢⴰⵏⵜ ⵏⵏⵙ ⵜⴰⵏⴰⴽⴰⵍⵜ.
ⵏⵏⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵎⴰⵙ ⴷ ⵜⴰⵡⵓⵔⵉ ⵏ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⴷⵓⴷⴰⵏⵉⵏ ⵉ ⵜⵉⵍⵉⵜ ⵏ ⵜⴼⵔⵓⵜ ⵖ ⵜⵙⴳⴰ ⵏ ⵍⴳⵔⴳⴰⵔⴰⵜ ⴳⴰⵏⵜ ⵓⵛⵛⵉⵍ ⵉ ⵓⴼⵔⴰⴳ ⵏ ⵓⴱⴰⴹ ⴰⵏⴰⵎⵓⵔ, ⴷ ⵓⵙⴼⵍⵙ ⵏ ⵓⵣⵔⴰⵢ ⵏ ⵉⴼⴳⴰⵏⵏ ⴷ ⵓⵙⵖⵏⵣⵉ ⴰⴳⵔⴰⵖⵍⴰⵏ, ⵙⴷⴷⵉⴷⵏ ⵎⴰⵙ ⵉⵍⵍⴰ ⵍⵎⵖⵔⵉⴱ ⴷ ⵡⴰⵜⵉⴳⵏ ⵏ ⵉⵎⵉⵥ ⴰⵏⵉⵎⴰⵏ, ⵖⵎⴽ ⵍⵍⵉ ⵢⵓⴳⵉ ⴽⵓ ⵎⴰⴷ ⵉⴳⴰⵏ ⵎⴳⴰⵍ ⵏ ⵓⵔⴳⴳⵉⴳ ⵖ ⵜⵙⴳⴰ.