ⵜⴰⴳⵓⵔⵉ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵖ ⵓⵙⵎⴰⴷ ⵏ ⵜⵙⵓⵜⵍⵜ ⵜⴰⵣⵣⵔⴰⴼⵜ ⵜⵉⵙ ⵙⵏⴰⵜ ⵏ ⵓⵙⴳⴳⵯⴰⵙ ⴰⵣⵣⵔⴰⴼ 2019-2020

ⵙ ⵉⵙⵎ ⵏ ⵕⴱⴱⵉ ⴰⵏⵙⵎⵍⵍⴰ ⴷ ⵓⵏⵎⵍⵍⴰ, ⵜⴰⵥⴰⵍⵍⵉⵜ ⴷ ⵓⴼⵔⴰ ⴼ ⵓⴼⵓⵥⴰⵕ ⵏ ⵉⵕⵇⵇⴰⵙⵏ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⴰⵡⵙⴰⵙⵏ

ⵜⵉⵙⵎⵓⵏⵉⵏ ⴷ ⵉⵙⵎⵓⵏⵏ ⵉⵎⵓⵔⴰ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵏⵙⵎⴷ ⵜⵉⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⴰⵣⵣⵔⴰⴼⵜ ⵜⵉⵙ ⵙⵏⴰⵜ ⵏ ⵓⵙⴳⴳⵯⴰⵙ ⴰⵣⵣⵔⴰⴼ 2019-2020 ⵖ ⵢⴰⵏ ⵓⵎⵏⴰⴹ ⵉⵥⵍⵉⵏ ⴷ ⵜⵎⵙⵓⵜⵍⵉⵏ ⵥⵍⵉⵏⵉⵏ ⵣⴷⵉⵏⵉⵏ ⴷ ⵓⴱⴰⵢⵢⵓⵕ ⵏ ⴽⵓⴼⵉⴷ 19 ⵙ ⴽⵓ ⵉⴷⵔⵉⵣⵏ ⵏⵏⵙ ⵍⵍⵉ ⴽⵓⵍⵍⵓ ⵏⵥⵕⴰ, ⴰⵡⵉⵏ ⴰⵖ ⴷ, ⴰⵎ ⴽⵓ ⵜⵉⵎⵉⵣⴰⵔ ⵏ ⵓⵎⴰⴹⴰⵍ, ⴰⵙⵏⴼⵍ ⵏ ⵡⴰⵏⴰⵡⵏ ⵏ ⵓⵙⵡⵓⵔⵉ ⵏⵏⵖ, ⴷ ⵓⵙⴰⴽⵙⵍ ⵏ ⵜⵎⵙⴽⴰⵔ ⵏⵏⵖ ⴷ ⴰⵢⵍⵍⵉ ⵉⵙⵉⴳⴳⵉⵍ ⵡⴰⵔⴰⵢ ⵙⴳ ⵓⴱⴰⵢⵢⵓⵕ.

ⵉⵍⵍⴰ ⴼⵍⵍⴰⵖ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⴰⴷ ⵏⴼⴽ ⴰⵎⴷⵢⴰ ⵖ ⵓⵙⴽⴰⵔ ⵙ ⵉⵍⵓⴳⵏⵏ ⵏ ⵡⴰⵔⴰⵢ ⵙⴳ ⵓⴱⴰⵢⵢⵓⵕ, ⵖⵎⴽ ⴰⵏⵏ ⴷ ⵜⵣⵣⵉⴳⵣⵜ ⵏ ⵜⵡⵓⵔⵉⵡⵉⵏ ⵏⵏⵖ, ⵓⴳⴳⴰⵔ ⵏ ⵖⵎⴽ ⴰⵏⵏ, ⵏⵙⵎⴰⵙⵙ ⴽⵓ ⵉⴳⵎⴰⵎⵏ ⵏ ⵓⵙⵇⵇⵉⵎ ⵖ ⵜⴳⴰ ⵜⵏⵙⵙⵉⵅⴼⵜ ⴷ ⵓⵙⵉⵔⴰ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⵙⵇⵇⵉⵎⵉⵏ ⵃⵎⴰ ⴰⴷ ⵜⵉⵍⵉ ⵜⵎⵔⵙⵍⵜ ⵏⵏⵖ ⵖ ⵓⴳⵏⵙ ⵏ ⵜⵎⴰⵖⴰⵜ ⵎⴳⴰⵍ ⵏ ⵓⴱⴰⵢⵢⵓⵕ, ⵜⴰⵎⴰⵖⵜ ⵎⵓ ⵉⴳⴰ ⴰⵅⴰⵜⴰⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴰⴷ ⵜ ⵉⵄⵣⵣⵓ ⵕⴱⴱⵉ, ⵙ ⵉⵥⵕⵉ ⵉⴷⵔⴰⵏ ⴷ ⵓⵙⵎⴰⵇⵇⵍ ⴰⵙⵜⵔⴰⵜⵉⵊⵉ, ⵖ ⴽⵓ ⵜⴰⵙⴳⵉⵡⵉⵏ ⵜⵉⴷⵓⵙⴰⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ.

ⵍⵍⵉⵖ ⵜⴳⴰ ⵜⵎⴰⵖⵜ ⴰⴷ ⵜⴰⴷ ⵉⴳⴰⵏ ⵜⴰⵏⴰⵎⵓⵔⵜ, ⵎⵓ ⴳⴳⵓⵜⵏ ⵉⵎⵏⴰⴷⵏ ⵏⵏⵙ, ⵜⵙⵉⴳⴳⵍ ⴳⵉⴳⵏⵖ ⵢⴰⵏ ⵓⵙⵎⵓⵙⵙⵓ ⵉⵥⵍⵉⵏ, ⵙ ⵉⵣⵡⴰⵔ, ⴰⴷ ⵢⵉⵍⵉ ⵓⵡⵇⵇⵔ ⵉⵙⵎⴷⵏ ⴷ ⵉⵙⵇⵇⵉⵇⵏ ⵏ ⵜⵓⵎⴰⵢⵉⵏ ⵏ ⵓⴷⵓⵙⵜⵓⵔ ⵃⵎⴰ ⴰⴷ ⵏⵙⵙⵕⵚⵓ ⵜⴰⴷⵉⵎⵓⵇⵔⴰⵟⵉⵜ ⴷ ⵓⵡⵇⵇⵔ ⵏ ⵓⵎⵏⵣⴰⵢ ⵏ ⵓⵡⴰⵏⴽ ⵏ ⵜⵎⵔⵙⴰⵍ; ⵡⵉⵙ ⵙⵉⵏ, ⴰⴷ ⵢⵉⵍⵉ ⵓⵙⵖⵣⵏ ⵏ ⵉⵣⵣⵔⴰⴼⵏ ⴷ ⵇⵇⴰⵏⵏⵉⵏ ⵉ ⵓⵙⵡⵓⵜⵜⵓ ⵏ ⵓⵎⵏⴰⴹ ⴰⴷ ⵉⵥⵍⵉⵏ ⵓⵔ ⵊⵊⵓ ⵉⵍⵍⵉⵏ, ⴷ ⵎⴰ ⴷ ⴷⵉⴷⵙⵏ ⵉⵣⴷⵉⵏ ⵖ ⵉⵙⵡⵓⴷⴷⵓⵜⵏ ⵥⵍⵉⵏⵉⵏ. ⵏⵙⵎⴷ ⵜⵉⵡⵓⵔⵉⵡⵉⵏ ⵏⵏⵖ ⵙ ⵓⵙⵖⵣⵏ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵉⵜⵜⴰⵡⵙⵏⴼⴰⵍⵏ ⴷ ⵉⴹⵕⵉⵚⵏ ⴷⵉⴷⵙ ⵣⴷⵉⵏⵉⵏ, ⵡⵉⵍⵍ ⵙ ⵉⵙⵖⴰⵡⵙⴰ ⵓⵣⵣⵔⴰⴼ ⵃⵎⴰ ⴰⴷ ⵉⵎⵛⴰⵛⴽⴰ ⵓⵙⵍⴳⵏ ⵏ ⵓⵥⵕⴼ ⵏ ⵓⵙⴳⴳⵯⴰⵙ ⵏ 2020 ⴷ ⵎⴰⴷ ⵜⵙⵉⴳⴳⵉⵍ ⵜⴷⵎⵙⴰ ⵏ ⵓⵎⵏⴰⴹ ⴰⵎⴰⵢⵏⵓ ⴷ ⵉⵎⵙⵉⴳⴳⵉⵍⵏ ⵏⵏⵙ ⵉⵥⵕⴼⴰⵏⵏ ⴷ ⵉⵏⴰⵎⵓⵏⵏ, ⴷ ⴰⵢⵍⵍⵉ ⵉⵔⴰ ⵓⵖⵓⵍ ⵏ ⵜⴷⵉⵏⴰⵎⵉⵜ ⵜⴰⴷⵎⵙⴰⵏⵜ. ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰ ⴷ ⵉⴳⴰⵏ ⴰⴳⵏⴰⵔ ⴷ ⵢⴰⵏ (21) ⵏ ⵓⵙⵏⴼⴰⵔ ⵏ ⵓⵙⵍⴳⵏ ⴼ ⴽⵓ ⵜⵉⵍⴰⵍ ⴷ ⵉⴳⵔⵏ, ⴳⵉⵙⵏ ⵎⴰ ⴷ ⵉⵣⴷⵉⵏ ⴷ ⵓⵎⴰⵡⴰ ⵏ ⵓⵎⵣⴰⵖ ⴷ ⵉⵔⴱⴰⴱⵏ ⴷ ⵜⵏⴼⴰⵔ ⴷ ⵜⵏⴼⵔⵓⵜ ⵜⴰⵍⵉⴽⵟⵕⵓⵏⵉⵜ ⴷ ⵜⵉⴹⴰⴼ ⵏ ⵓⵙⴽⵛⵎ ⵏ ⵜⴳⵓⵔⴰ ⵏ ⵓⵙⵎⵔⵙ ⴰⵙⵉⵏⵔⴰⵏ ⵓⵖⵔⵉⵎ ⴷ ⵓⵄⵚⴽⵕⵉ; ⴰⵙⵖⵣⵏ ⵏ ⵉⴹⵕⵉⵚⵏ ⴰⴷ ⴷⴰⵔⵙ ⴰⵎⵎⴰⴽ ⴰⵏⴰⵎⵓⵔ ⴷ ⵓⴱⴰⴹ ⴰⵎⵇⵔⴰⵏ.

ⴰⵡⵇⵇⵔ ⵉⵙⵎⴷⵏ ⵏ ⵓⴷⵓⵙⵜⵓⵔ ⵖ ⵓⵎⵏⴰⴹ ⵏ ⵓⴱⴰⵢⵢⵓⵕ

ⵜⵉⴽⵍⵉⵜ ⵢⴰⴹⵏⵉⵏ, ⵏⵙⴷⴷⵉⴷ ⵎⴰⵙ ⴷ ⴰⵎⴷⴰⵡⴰⵍ ⵅⴼ ⵉⴹⵕⵉⵚⵏ ⴰⴷ ⴷ ⵓⵙⵖⵣⵏ ⵏⵏⵙⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⵉⵍⵍⴰ ⵙ ⵓⵡⵇⵇⵔ ⵉⵙⵎⴷⵏ ⵏ ⵉⵎⴰⵏ ⵏ ⵓⴷⵓⵙⵜⵓⵔ ⴷ ⵜⵎⵙⴽⵔⵜ ⵜⴰⴷⵉⵎⵓⴽⵔⴰⵟⵉⵜ ⴷ ⵓⵡⴰⵏⴽ ⵏ ⵜⵎⵔⵙⴰⵍ, ⵖ ⵓⵙⴰⵜⵉ ⵏ ⵢⴰⵏ ⵓⵎⵛⴰⵛⴽⴰ ⴷ ⵓⵎⴰⴽⵕⴰⴹ ⵖ ⵜⵓⴳⵜ ⵏ ⵉⴹⵕⵉⵚⵏ, ⴰⵢⵍⵍⵉ ⵉⵎⵎⴰⵍⵏ ⵎⴰⵙ ⵜⵍⵍⴰ ⵢⴰⵜ ⵜⵢⴰⵏⵜ ⵜⴰⵏⴰⵎⵓⵔⵜ ⵖ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ. ⵖ ⵓⵎⵏⴰⴹ ⴰⴷ, ⵉⵇⵇⴰⵏ ⴷ ⴰⴷ ⵏⵏⵙⴽⵜⵉ ⴰⵜⵉⴳ ⵏ ⵜⵙⵏⵜⴰⵢⵉⵏ ⵜⵉⵣⵣⵔⴰⴼⵉⵏ ⵏ ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⴳⵎⴰⵎⵏ ⵏ ⵓⵙⵇⵇⵉⵎ ⵍⵍⵉ ⵙⵎⵏⵉⴷⵏⵉⵏ ⵙⴳ ⵜⵉⵣⵡⵉⵔⵉ ⵏ ⵜⴰⵡⴰⵍⴰ ⴰⴷ ⵎⴰ ⴷ ⵉⴳⴰⵏ 219 ⵏ ⵜⵙⵓⵎⵔⵜ ⵏ ⵓⵙⵍⴳⵏ, ⵓⵔ ⴳⵉⵙⵏ ⵜⵏⵢⴰⵍⴽⴰⵎ ⵜⵏⴱⴰⴹⵜ, ⵙ ⴽⵉⴳⴰⵏ ⵏ ⵓⵖⵉⵍⵓⴼ, ⴰⴱⵍⴰ ⴷ ⴽⵕⴰⴹ ⴷ ⵎⵔⴰⵡ (13) ⵏ ⵜⵙⵓⵎⵔⵜ, ⵜⵍⵍⴰ ⵓⴽⴰⵏ ⵙⵓⵍ ⵜⵖⵔⵉ ⵏ ⵙⵏⴰⵜ ⵜⵉⵎⴰⴹ (200) ⵏ ⵜⵙⵓⵎⵔⵜ ⵏ ⵓⵙⵍⴳⵏ, ⵏⴻⵏⵏⵓⵔⵣ ⴰⴷ ⴷⵉⴷⵙⵏ ⵜⵏⵢⴰⵍⴽⴰⵎ ⵜⵏⴱⴰⴹⵜ.

ⵏⵥⴹⴰⵕ ⴰⴷ ⵏⵉⵏⵉ, ⵎⴰⵙ ⵉⵙⴽⵔ ⵓⵙⵇⵇⵉⵎ ⵏⵏⵖ ⵙ ⴰⵢⵍⵍⵉ ⵜⵙⵉⴳⴳⵉⵍ ⵜⵎⴰⵣⵉⵔⵜ ⵖ ⵉⵣⵣⵔⴰⴼⵏ ⵙ ⵓⵍⴳⴳⵓⴷ ⴷ ⵜⵉⵕⵡⵉ ⵉⵜⵜⵓⵙⴰⴳⴳⴰⵍⵏ, ⵉⵙⵙⵎⵖⵔ ⵖ ⵜⵎⴰⵎⴽⵉⵏ ⵏ ⵓⵏⵏⵓⵕⵥⵎ ⵏⵏⵙ ⴼ ⵡⴰⵎⵓⵏ ⴷ ⵓⵎⵢⴰⵡⴰⴹ ⴷⵉⴷⵙ ⵙ ⵜⴻⵜⵉⴽⵏⵓⵍⵓⵊⵉⵜ ⵏ ⵓⵙⵏⵖⵎⵙ ⴷ ⵓⵎⵢⴰⵡⴹ, ⵜⵣⵣⵉⴳⵣ ⵜⵙⵖⵍⵜ ⵏ ⵓⴹⴼⵕ ⵏ ⵜⵡⵓⵔⵉⵡⵉⵏ ⵏ ⵓⵙⵇⵇⵉⵎ ⵖ ⵓⵙⵡⵉⵔ ⵏ ⵜⴳⵉⵡⵔⵉⵏ ⵜⵉⵎⴰⵜⴰⵢⵉⵏ ⴷ ⵜⵙⵇⵇⵉⵎⵉⵏ ⵖ ⵓⵙⴰⵔⵓ ⵏⵏⵙ ⴰⵍⵉⴽⵟⵕⵓⵏⵉ ⵙ 300%, ⵙ ⵓⵎⴷⵢⴰ.

ⵜⵓⴳⴳⴰⵙ ⵏ ⵜⵉⴹⴰⴼ ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⴷ ⵉⴷⵔⵉⵣⵏ ⵏⵏⵙ

ⵖ ⵜⵙⴳⴰ ⵢⴰⴹⵏⵉⵏ, ⵉⵙⵎⵔⵙ ⵓⵙⵇⵇⵉⵎ ⵏⵏⵖ ⵜⵓⴳⴳⴰⵙ ⵏⵏⵙ ⵖ ⵜⵉⴹⴰⴼ ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⴷ ⵉⴷⵔⵉⵣⵏ ⵏⵏⵙ, ⵜⵜⵓⵙⴽⴰⵔⵏⵜ ⵙⵎⵎⵓⵙⵜ ⴷ ⵎⵔⴰⵡⵜ ⵏ ⵜⵖⵉⵎⵉⵜⵉⵏ ⵏ ⵜⵉⴹⴰⴼ ⵖ ⵜⵙⵓⵜⵍⵜ ⴰⴷ, ⴳⵉⵙⵏⵜ ⴽⵕⴰⴹⵜ ⵉⵔⵓⵔ ⴳⵉⵙⵏⵜ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴼ ⵉⵙⵇⵙⵉⵜⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ, ⵜⵉⴳⵉⵡⵔⵜ ⵉⵛⵛⴰⵔⵏ ⵏ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏ ⴳⴰⵏⵉⵏ ⴰⵙⵎⵀⵍ ⵏ ⵓⵎⵏⵏⵉ 68 ⵏ ⵓⴷⵓⵙⵜⵓⵔ, ⵥⵍⵉⵏⵜ ⴰⴽⴽⵯ ⵉ ⵉⵎⵔⵙⵉ ⴰⴷ, ⵍⵍⴰⵏⵜ ⴼ ⵚⴹⵉⵚ ⴷ ⵎⵔⴰⵡ ⵏ ⵢⵉⴳⵔ, ⴰⵢⵍⵍⵉ ⵉⵎⵎⴰⵍⴰⵏ ⵜⵉⴹⴰⴼ ⵏ ⵓⵙⵇⵇⵓⵎ ⵉⵎⵎⴰⵖⵏ ⴼ ⵓⴹⴼⵕ ⴷ ⵜⵉⴽⴽⵉ ⵏ ⵉⵙⵇⵙⵉⵜⵏ.

ⵉⴳⴰ ⴰⵏⵛⴽ ⵏ ⵉⵙⵇⵙⵉⵜⵏ ⵍⵍⵉ ⴼⴽⴰⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵉ ⵜⵏⴱⴰⴹⵜ ⵎⴰ ⴷ ⵉⴳⴰⵏ 3390 ⵏ ⵓⵙⵇⵙⵉ, ⴳⵉⵙⵏ 826 ⵏ ⵓⵙⵇⵙⵉ ⴰⵎⵉⵡⴰⵏ ⵉⵍⵍⴰ ⵓⵙⵖⵉⵡⵙ ⴷ ⵓⵎⴹⴰⴽⴰⵕ ⵏ 42 ⴳⵉⵙⵏ ⵖ ⵓⵙⴰⵜⵉ ⵏ ⵉⵙⵇⵙⵉⵜⵏ ⵉⴹⴼⵕ ⵓⵎⴹⴰⴽⴰⵕ, ⴷ 2564 ⵏ ⵓⵙⵇⵙⵉ ⴰⵎⵉⵔⴰⵢ, ⵜⵍⴽⵎ ⴷ ⴰⵙⵇⵇⵉⵎ ⵜⵎⵔⴰⵔⵓⵜ ⴼ 795 ⴳⵉⵙⵏ.

ⵖ ⵜⵙⴳⴰ ⵢⴰⴹⵏⵉⵏ, ⵃⵎⴰ ⴰⴷ ⵜⵙⴽⵔ ⵜⵉⵍⴰⵍⵜ ⵏⵏⵙ ⵏ ⵜⵉⴹⴰⴼ, ⵜⵎⴹⴽⴰⵕ ⵜⵙⵇⵇⵉⵎⵜ ⵏ ⵜⵣⵔⴼⵜ ⴷ ⵓⵣⵣⵔⴰⴼ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴰⵏⵇⵇⵉⵙ ⵏ ⵜⵙⵎⵉⴳⵍⵜ ⵏ ⵓⵙⴰⴳⴳⵯ ⵍⵍⵉ ⵜⵙⴽⵔ ⴼ ⵉⵙⵓⵔⵙⵏ ⵏ ⵉⵖⵣⵓⵜⵏ, ⵖⵎⴽ ⵍⵍⵉ ⵉⵜⵜⵓⵙⵎⵏⴰⴷ ⴷⴰⵜ ⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ ⴷ ⵉⵎⵖⵔⴰⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ, ⴰⵏⵇⵇⵉⵙ ⵏ ⵜⵙⵎⵉⴳⵍⵜ ⵏ ⵓⵙⴰⴳⴳⵯ ⵉⵜⵜⵓⵙⴽⴰⵔⵏ ⴼ ⵜⵙⵇⵓⵏⵙⵓⵜⵉⵏ ⵏ ⵜⴳⵍⴷⵉⵜ ⵖ ⴽⵉⴳⴰⵏ ⵏ ⵜⵎⵉⵣⴰⵔ.

ⵉⵍⵍⴰ ⵓⵎⴹⴰⴽⴰⵕ ⴷ ⵓⵙⵎⵏⵉⴷ ⴰⴷ ⵙ ⵜⵉⵍⵉⵜ ⵏ ⵉⴳⵎⴰⵎⵏ ⵏ ⵜⵏⴱⴰⴹⵜ ⵉⵎⵏⵜⴰⵢⵏ ⵙ ⵙⵉⵏ ⵉⴳⵔⴰⵏ ⴰⴷ. 

ⵜⵉⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ: ⵜⴰⴷⵉⵏⴰⵎⵉⵜ ⵖ ⵓⵣⵣⵔⴰⴼ ⴷ ⵜⵉⴹⴰⴼ

ⵣⵣⵉⴳⵣⵏⵜ ⵜⵙⵇⵇⵉⵎⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵎⵖⵍⴰⵍⵉⵏ ⵖ ⵓⵣⵎⵣ ⵉⴱⴹⴰⵏ ⵜⴰⵙⵓⵜⵍⵜ ⵏ ⴽⵟⵓⴱⵕ 2019 ⴷ ⵉⴱⵔⵉⵔ 2020, ⴷ ⵜⵙⵓⵜⵍⵜ ⵏ ⵉⴱⵔⵉⵔ 2020,  ⵖ ⵜⵡⵓⵔⵉⵡⵉⵏ ⵏⵏⵙⵏⵜ ⵖ ⵓⵣⵣⵔⴰⴼ ⴷ ⵜⵉⴹⴰⴼ ⵙ ⵜⵖⴰⵔⴰⵙⵜ ⵜⴰⵎⵙⵉⵎⵢⴰⵔⵜ, ⵙⴽⵔⵏⵜ 53 ⵏ ⵜⵙⵎⵓⵏⵉ ⴳⵉⵙⵏⵜ 31 ⵉ ⵜⵉⴹⴰⴼ ⵏ ⵜⵡⵓⵔⵉ ⵜⵓⵏⴱⵉⴹⵜ ⴷ ⵜⵉⴽⴽⵉ ⵏ ⵉⵙⵇⵙⵉⵜⵏ ⵉ ⵉⵎⴰⵡⵙⴰⵙⵏ ⴷ ⵉⵎⵙⵜⴳⴳⴰⵔⵏ ⵏ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ, ⵎⵎⴰⵖⵏⵜ ⴰⴷ ⵎⵙⴰⵙⴰⵏⵜ ⵜⴱⵔⵉⴷⵉⵏ ⵏ ⵓⵙⵡⵓⵔⵉ ⵏⵏⵙⵏⵜ ⴷ ⴰⵢⵍⵍⵉ ⵉⵙⵉⴳⴳⵉⵍ ⵡⴰⵔⴰⵢ ⵙⴳ ⵓⴱⴰⵢⵢⵓⵕ, ⵉⵍⵍⴰ ⵓⵙⵎⵔⵙ ⵙ ⵓⴳⴳⴰⵔ ⵏ ⵜⴻⵜⵉⴽⵏⵓⵍⵓⵊⵉⵜⵉⵏ ⵜⵉⵎⴰⵢⵏⵓⵜⵉⵏ ⵃⵎⴰ ⴰⴷ ⵜⵜⵓⴹⵎⵉⵏ ⵜⵡⵉⵙⵉ ⵏ ⴽⵓ ⵉⴳⵎⴰⵎⴰⵏ ⵏ ⵜⵙⵇⵇⵉⵎⵉⵏ ⵖ ⵜⵡⵓⵔⵉⵡⵉⵏ ⴰⴷ, ⵢⵉⵍⵉ ⵓⵙⴷⵓⵙ ⵏ ⵓⵏⵏⵓⵕⵥⵎ ⵏ ⵓⵙⵇⵇⵉⵎ ⴼ ⵓⴳⴷⵓⴷ ⴰⵎⴰⵜⴰⵢ. 

ⵖⵔⴰⵏⵜ ⵜⵙⵇⵇⵉⵎⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵎⵖⵍⴰⵍⵉⵏ ⵙⵙⵖⵣⵏⵏⵜ ⵖ 22 ⵏ ⵜⵙⵎⵓⵏⵉ 21 ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵖ ⵎⴰ ⴷ ⵉⴳⴰⵏ 26 ⵏ ⵓⵙⵏⴼⴰⵔ ⵏ ⵓⵙⵍⴳⵏ.

ⵖ ⵜⵙⴳⴰ ⵏ ⵜⵉⴹⴰⴼ, ⵥⵍⵉⵏⵜ ⵜⵙⵇⵇⵉⵎⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⵎⵓⵏⴰⵢ ⵏⵏⵙⵏⵜ ⵉ ⵜⵖⵔⵉ ⵏ 72 ⵏ ⵉⵎⵔⵙⵉ, ⵙⵎⵏⵉⴷⵏ ⵉⴳⵎⴰⵎⵏ ⵏⵏⵙⵏⵜ ⵜⵉⵙⵓⵎⵔⵉⵏ ⴼ ⵜⵎⵙⴰⵔⵉⵏ ⵍⵍⵉ ⴳⴰⵏⵉⵏ ⵉⵎⵔⵙⵉ ⵏ ⵜⵙⵎⵓⵏⴰⵢ ⴰⴷ ⴷ ⵜⵏⴱⴰⴹⵜ ⵜⴰⵎⵣⵣⴳⴰⵔⵜ.

ⵉⵖ ⵉⴳⴰ ⵍⵃⴰⵍ ⴰⵣⵣⵔⴰⴼ ⵏⵖ ⵜⵉⴹⴰⴼ, ⵖ ⵓⵙⵡⵉⵔ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⴷ ⵜⵖⵉⵎⴰ ⵜⵉⵎⴰⵜⴰⵢⵉⵏ, ⵏⵎⵎⴰⵖ ⴰⴷ ⵢⵉⵍⵉ ⵓⵎⵏⵣⴰⵢ ⵏ ⵡⴰⴷⴰⵙ ⴷ ⴰⴷ ⵜⴻⵟⵟⴼ ⴽⵓ ⵜⴰⵎⵙⴰⵔⵜ ⵜⴰⵏⴰⵎⵓⵏⵜ ⵜⴰⵖⵍⴰⵖⴰⵍⵜ ⵏⵏⵙ ⴷⴷⴰⵡ ⵏ ⵍⵇⵓⴱⵜ, ⵙ ⴰⵢⵍⵍⵉ ⴷ ⵢⵉⵡⵉ ⵓⵛⵛⵉⵍ ⵏ ⵓⵏⵢⴰⵍⴽⴰⵎ ⵏ ⵜⵎⵙⴰⵔⵉⵏ ⵏ ⵡⴰⵎⵓⵏ. ⵖ ⵓⵎⵏⵉⴷ ⴰⴷ, ⵏⴹⴼⵕ ⵜⵉⵎⵔⵉⵙⵉⵏ ⵜⵓⵏⴱⵉⴹⵉⵏ  ⴷⴰⵜ ⵏ ⵉⴳⵎⴰⵎⵏ ⵏ ⵓⵙⵇⵇⵉⵏ, ⵏⴰⵣⵏ ⵉ ⵜⵏⴱⴰⴹⵜ ⴼ 56 ⴳⵉⵙⵏⵜ. ⵉⵙⴽⵔ ⵓⵙⵇⵇⵉⵎ ⵜⵉⵎⵥⵍⴰⵢ ⵏⵏⵙ ⴷ ⵜⵉⵍⴰⵍ ⵏⵏⵙ ⴳⴰⵏⵉⵏ ⵜⵉⵏ ⵓⴷⵓⵙⵜⵓⵔ ⴷ ⵜⵉⵏ ⵜⵎⵔⵙⴰⵍ ⵜⴰⵎⴰ ⵏ ⵜⵎⵔⵙⴰⵍ ⵢⴰⴹⵏⵉⵏ ⵡⴰⵅⵅⴰ ⵍⵍⴰⵏⵜ ⵜⵎⵙⵓⵜⵍⵉⵏ ⵏ ⵓⴱⴰⵢⵢⵓⵕ, ⵏⵥⴹⴰⵕ ⴰⴷ ⴷⴰⵔⵏⵖ ⵢⵉⵍⵉ ⵓⴱⵓⵔⵣ ⵖ ⵍⵎⵖⵔⵉⴱ ⵎⴰⵙ ⵏⵎⵎⴰⵖ ⴷ ⵓⴱⴰⵢⵢⵓⵕ, ⵏⵎⵎⴰⵖ ⵓⴽⴰⵏ ⵙⵓⵍ ⴷⵉⴷⵙ ⵙ ⵜⵖⴰⵔⴰⵙⵜ ⵉⵥⵉⵍⵏ ⴷ ⵉⵕⵡⴰⵏ ⵖ ⴽⵓ ⵜⴰⵙⴳⵉⵡⵉⵏ ⵜⵉⴷⵓⵙⴰⵏⵉⵏ ⴷ ⵜⵏⴰⵎⵓⵏⵉⵏ ⴷ ⵜⴷⵎⵙⴰⵏⵉⵏ, ⵙ ⵜⴰⵏⵏⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴷ ⵓⵙⵡⵓⴷⴷⵓ ⵏⵏⵙ ⵉⵀⴷⴷⵏⵏ, ⴷ ⵓⵙⵖⵉⵡⵙ ⵏⵏⵙ ⵓⵏⵥⵉⵥ ⵉⴱⴷⴷⵏ ⴼ ⵜⵉⵣⵡⵉⵔⵉ ⴷ ⵜⵉⵕⵡⵉ ⴷ ⵜⵔⵔⵓⴳⵣⴰ ⴷ ⵓⵎⵢⴰⵡⴰⵣ ⴷ ⵡⴰⵔⴰⵢ ⴷ ⵉⵎⵉⵥ ⵏ ⵜⵣⵣⵉⴳⵣⵜ ⵏ ⵓⴱⴰⵢⵢⵓⵕ.

ⴳⴰⵏ ⵉⵙⵡⴰⵍⴰⵢⵏ ⵉⴳⵍⴷⴰⵏⵏ ⴷ ⵉⵙⵡⵓⴷⴷⵓⵜⵏ ⵍⵍⵉ ⵙ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜⵜⵓⵙⴽⵉⵔⵏ, ⵡⵉⴷ ⴱⴷⴷⵏⵉⵏ ⴼ ⵜⵉⵖⵔⵉ ⵜⴰⵙⵜⵔⴰⵜⵉⵊⵉⵜ ⵏ ⵉⵙⵓⵔⵙⵏ, ⴰⵢⵍⵍⵉ ⵢⵉⵡⵙⵏ ⵉ ⵍⵎⵖⵔⵉⴱ ⴰⴷ ⵢⴰⵏⴼ ⵉ ⵢⴰⵏ ⵓⵄⴷⵔⵉⵇ ⴰⴷⵓⵙⴰⵏ ⵉⵅⵛⵏⵏ, ⵜⴰⵡⵙ ⵜⵖⵜⴰⵙⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴷ ⵉⵜⵜⵓⵙⴽⵉⵔ ⵓⴼⵏⵉⵇ ⵏ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵃⵎⴰ ⴰⴷ ⵉⵍⵉⵏⵜ ⵜⵖⵔⴰⴷ ⵉ ⵓⴳⴳⴰⵔ ⵏ ⵙⵎⵎⵓⵙ ⵉⴷ ⵎⵍⵢⵓⵏ ⵏ ⵜⵓⵡⵊⴰ, ⴷ ⵓⵙⵏⴰⵍ ⵏ ⵜⵎⵙⵙⵏⵜⴰⵢ ⵜⵉⵏⴰⵎⵓⵔⵉⵏ ⵃⵎⴰ ⴰⴷ ⵢⵉⵍⵉ ⵓⵃⵟⵟⵓ ⵏ ⵜⵣⵣⵓⵍⵉⵏ ⴷ ⵓⴼⴰⵔⵙ, ⵉⵍⵉⵏⵜ ⵜⵖⴰⵡⵙⵉⵡⵉⵏ ⵏ ⵓⵎⴰⵡⴰ ⴷ ⵜⵎⵜⵜⴰⵡⵉⵏ ⵏ ⵜⵙⵏⵉⵊⵊⵉⵜ ⴳⴰⵏⵉⵏ ⵜⵉⵏ ⵓⵍⴳⴳⵓⴷ ⴷ ⵜⵉⴷ ⴼ ⵓⵔ ⵉⵍⵍⵉ ⵓⵙⵖⵉⵡⵙ.

ⵖ ⵜⵏⴰⵔⴰ ⵏⵏⵙ ⵉ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ, ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⴰⵙ ⵜⵍⵍⴰ ⵜⵣⵡⵉⵔⵉ ⵉ ⵜⵓⴷⵔⵜ ⵏ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵜⵉⵏ ⵉⴽ ⵏⵏⴰ ⴳⴰⵏⵜ ⵜⵎⵙⵓⵜⵍⵉⵏ. ⵖⵎⴽ ⵍⵍⵉ ⴷ ⴱⴷⴷⴰ ⵉⵎⵍⴰ ⴱⴰⴱ ⵏ ⵡⴰⴷⴷⵓⵔ, ⵖ ⵓⵙⵡⵓⴷⴷⵓ ⵏ ⴽⵉⴳⴰⵏ ⵏ ⵜⵎⵙⴰⵔⵉⵏ ⵜⵉⵙⵜⵔⴰⵜⵉⵊⵉⵢⵉⵏ ⴰⵎ ⴰⵙⴱⴷⴷⵉ ⵏ ⵓⴱⵔⵙⵉⵡⴷ, ⴷ ⵓⵙⴱⴷⴷⵉ ⵏ ⵜⵎⵓⴽⵔⵉⵙⵉⵏ ⵏ ⵓⵏⵣⵡⵉ ⴷ ⵉⴷⵔⵉⵣⵏ ⵏⵏⵙⵏⵜ, ⴷ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ, ⴷ ⵓⵣⵡⴰⴳ, ⴷ ⵓⵙⴽⵔ ⵏ ⵜⴷⵎⵙⴰ ⵜⴰⵣⴳⵣⴰⵡⵜ, ⴷ ⵓⵙⵓⵊⴷ ⵏ ⵡⴰⵏⴰⵡ ⴰⴷⵎⵙⴰⵏ ⴰⵎⴰⵢⵏⵓ, ⵉⵎⵍⴰ ⴷ ⴱⴰⴱ ⵏ ⵡⴰⴷⴷⵓⵔ ⵜⵓⵏⵥⵉⵥⵜ ⵉⵥⵍⵉⵏ ⴷ ⵓⵙⵎⴰⵇⵇⵍ ⵉⴷⵔⴰⵏ ⴷ ⵜⵎⵢⴰⴷⴰⵙⵉⵏ ⵙⵙⵔⵓⵙⵏⵉⵏ ⴰⴼⴳⴰⵏ ⵖ ⵓⴳⵏⵙ ⵏ ⵜⵙⵔⵜⴰⵢ ⵜⵉⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ. ⵜⵖⴰⵎⴰ ⵜⵓⵏⵥⵉⵥⵜ ⴷ ⵓⵙⵉⵣⵡⵔ ⴷ ⵡⴰⵔⴰⵢ ⴳⴰⵏⵜ ⴰⵣⴷⴷⵓⵢ ⵖ ⵜⵙⵏⵜⴰⵢⵉⵏ ⵜⵉⴳⵍⴷⴰⵏⵉⵏ.

ⵜⵉⵎⵙⵉⵔⵉⵏ ⵍⵍⵉ ⴰⵖ ⵜⵎⵍⴰ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ

ⵜⵎⵍⴰ ⴰⵖ ⵜⵏⴰⵔⴰ ⴰⴷ ⵜⴰⴳⵍⴷⴰⵏⵜ ⵉ ⵜⵎⴰⵣⵉⵔⵜ ⵖ ⵜⴰⵙⵙⴰⵙⵜ ⵜⵉⵎⵙⵉⵔⵉⵏ ⵢⴰⴹⵏⵉⵏ ⵖ ⵜⵏⵎⵓⵔⵉ ⴷ ⵓⵎⵛⴰⴱⴱⴰⴽ.

ⵜⴰⵎⵙⵉⵔⵜ ⵜⴰⵎⵣⵡⴰⵔⵓⵜ ⵍⵍⵉ ⵏⵥⴹⴰⵕ ⴰⵙ ⵜⵜ ⵏⵙⵙⵏ ⵜⴳⴰ ⵜⵜ ⵎⴰⵙ ⴷ ⵜⴰⴷⵓⵙⵉ ⵏ ⵉⵡⴰⵏⴽⵏ ⵓⵔ ⵜⵣⴷⵉ ⵀⵍⵍⵉ ⴷ ⵓⵙⵡⵉⵔ ⵏ ⵜⴷⵎⵙⴰ ⴷ ⵜⴻⵜⵉⴽⵏⵓⵍⵓⵊⵉⵜ, ⴰⴷ ⵜⵣⴷⵉ ⴷ ⵜⵏⴰⵔⴰ ⵉⵥⵉⵍⵏ ⴷ ⵓⵎⵏⴰⴷ ⵢⴰⴳⴳⵓⴳⵏ  ⴷ ⵉⵥⵕⵉ ⵉⴷⵔⴰⵏ ⵏ ⵉⵅⴰⵜⴰⵔⵏ ⵏ ⵉⵡⴰⵏⴽⵏ ⴷ ⵉⵙⵡⵓⴷⴷⵓⵜⵏ ⵉⵎⵣⵡⵓⵔⴰ ⴷ ⵇⵇⴰⵏⵏⵉⵏ ⴰⴷ ⵜⵜⵓⵙⴽⵉⵔⵏ. ⵉⴳⴰ ⵓⵛⵛⵉⵍ ⴰⴷ ⵢⵉⵍⵉ ⵓⵡⴰⵏⴽ ⵉⵎⵃⴹⵉ, ⵓⵔ ⴷ ⵖⴰⵙ ⴰⴷ ⵜⴳ ⵜⴰⵏⴱⴰⴹⵜ ⵏ ⵓⴱⴰⴹ ⴷ ⵓⵖⵔⵔⴷ ⵎⵓ ⵜⴷⵓⵙ ⵜⵉⵍⴰⵍⵜ ⵏⵏⵙ ⵙ ⵜⵡⵓⵔⵉⵡⵉⵏ ⵏ ⵡⴰⴷⴰⵙ ⴷ ⵜⵉⴹⴰⴼ ⵉⵣⵣⵉⴳⵣⵏ ⴷ ⵓⵙⵡⵓⵔⵉ ⵙ ⵉⵙⵖⵡⴰⵏ ⵏ ⵓⵥⵍⴰⵢ ⴰⴷⵓⵙⴰⵏ, ⵎⴰⵛⵛ ⵙ ⵓⵎⵢⴰⵡⴰⴹ ⴷ ⵓⵣⵣⴳⵉⵔ ⵏ ⵜⵖⵜⴰⵙⵉⵏ ⵜⵜⵓⵙⴽⴰⵔⵏⵉⵏ ⵖ ⵓⵙⵡⵉⵔ ⴰⵏⴰⵎⵎⴰⵙ, ⴰⵡⴰⵏⴽ ⵉⵎⵃⴹⵉ ⵉⴱⴷⴷⵏ ⴰⴷ ⵢⵉⵍⵉ ⵎⴰ ⴷ ⵉⴳⵓⵎⵏ ⵖ ⵜⵖⵔⴰⴷ ⵉ ⴽⵓ ⵢⴰⵏ ⵖ ⵓⵎⵏⴰⴹ ⵖ ⴱⴷⴷⵏⵜ ⵜⵎⵔⵙⴰⵍ ⵏ ⵓⴼⴰⵔⵙ, ⵜⴹⵎⵏ ⵜⵉⵏⵓⴼⴰ ⵜⵉⴷⵓⵙⴰⵏⵉⵏ, ⵜⴱⴷⴷ ⴼ ⵜⵣⵣⵉⴳⵣⵜ ⵏ ⵜⵏⵓⴼⴰ ⵢⴰⴹⵏⵉⵏ ⴰⵎ ⴰⵙⵙⵍⵎⴷ ⴷ ⵓⵙⵎⵓⵜⵜⴳ ⵙ ⵜⵉⴳⴳⵓⴳⵜ ⴷ ⵡⴰⵎⴰⵏ ⴷ ⵜⵉⴼⴰⵡⵜ ⴷ ⵍⴰⵏⵜⵉⵔⵏⵉⵜ ⴷ ⵓⵙⵉⴷⴼ ⵙ ⵜⵣⵔⴼⵜ ⴷ ⵜⵉⵢⵢⴰⴹ.

ⵜⴰⵎⵙⵉⵔⵜ ⵜⵉⵙ ⵙⵏⴰⵜ, ⵍⵍⵉ ⵏⵜⵜⵍⵎⴰⴷ ⵖⵉⵍⴰⴷ, ⵎⴰⵙ ⵜⴳⴰ ⵜⵎⵙⴽⵔⵜ ⴰⴷ ⵖ ⵓⵎⵏⴰⴹ ⵏ ⵓⴱⴰⵢⵢⵓⵕ, ⵉⵍⵍⴰⵏ ⵙ ⵉⵡⵉⵣ ⴰⴳⵍⴷⴰⵏ ⵉⴱⴷⴷⵏ ⴼ ⵜⴰⵏⵏⴰⵢⵜ ⵍⵍⵉ ⵉⵙⵔⵙ ⴱⴰⴱ ⵏ ⵡⴰⴷⴷⵓⵔ ⵙ ⵜⵖⴰⵔⴰⵙⵜ ⵉⵣⵡⴰⵔⵏ ⵉ ⵓⵙⵡⵓⴷⴷⵓ ⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ, ⵜⴳⴰ ⴰⵙⵙ ⴰⴷ ⵡⵉⵏ ⵓⵙⴷⵓⵙ ⵏ ⵜⵎⵢⵉⵎⴰⵏⵜ ⵖ ⵜⵎⵔⵙⴰⵍ ⴷ ⵓⵖⵣⴰⵏ ⵏ ⵜⵡⵓⵔⵉⵡⵉⵏ ⵏⵏⵙ, ⵉⵍⵍⴰ ⴼⵍⵍⴰⵖ ⵏⴽⴽⵏⵉ ⵏ ⵉⵎⵙⴽⴰⵔⵏ ⵉⵙⵔⵜⴰⵏⵏ ⴰⴷ ⵏⵙⵙⵓⵜⴳ ⴰⵢⴷⴰ ⴰⴷ ⵙ ⵓⴳⴳⴰⵔ.

ⵜⴳⴰ ⵜⵎⵙⵉⵔⵜ ⵜⵉⵙ ⴽⵕⴰⴹⵜ ⵜⴰⴷ ⵉⵣⴷⵉⵏ ⴷ ⵉⵎⴰⵍ, ⵉⵖ ⴷ ⵢⵉⵡⵉ ⵓⴱⴰⵢⵢⵓⵕ ⴰⴷ ⴰⴷ ⴷⴷⵓⵏⵜ ⵜⵓⴳⵜ ⵏ ⵜⴰⵣⵣⵓⵍⵉⵏ ⵏ ⵜⵡⵓⵔⵉ ⵖ ⴽⵉⴳⴰⵏ ⵏ ⵉⴳⵔⴰⵏ, ⵉⵍⵍⴰ ⴼⵍⵍⴰⵖ ⴰⴷ ⵜ ⵓⵔ ⵏⴰⵊⵊ ⴰⴷ ⵉⵙⵙⵉⴳⵓⵜ ⵖ ⵉⴷⵔⵉⵣⵏ ⵏⵏⵙ ⵉⵏⴰⵎⵓⵏⵏ, ⵏⴳⵔⴰ ⵜⵎⵉⵣⴰⵔ ⴷ ⵏⴳⵔ ⵜⴰⵙⵓⵜⵉⵏ. ⵎⴰ ⴰⴷ ⵓⵔ ⵔⴰⴷ ⵢⵉⵍⵉ ⵖⴰⵙ ⵙ ⵓⵎⵢⴰⵡⴰⵙ, ⵉⵇⵇⴰⵏ ⴷ ⴰⵜ ⵜⵜⵓⴼⴽⵉ ⵉ ⵓⵎⵢⴰⵡⴰⵙ ⴰⴷ - ⵍⵍⵉⵖ ⵉⴳⴰ ⴰⵜⵉⴳ ⴰⵏⴰⵎⵓⵏ ⵉⵥⵉⵍⵏ- ⵜⵓⵎⴰⵢⵜ ⵢⴰⴹⵏⵉⵏ ⴷ ⵉⵎⵏⴰⴷⵏ ⵢⴰⴹⵏⵉⵏ ⴰⴷ ⴷⴰⵔⵙ ⵢⵉⵍⵉ ⵓⴼⴰⵔⵙ, ⵢⴰⵡⵙ ⵖ ⵓⵙⵉⴷⴼ ⵖ ⵜⵣⴷⴰⵢⵉⵏ ⵏ ⵓⴼⴰⵔⵙ ⴷ ⵓⵥⵟⵟⴰ ⴰⴷⵎⵙⴰⵏ.

ⵉⴽ ⵏⵏⴰ ⵜⴳⴰ ⵜⵉⵣⵉ, ⵉⵍⵍⴰ ⴼⵍⵍⴰⵖ ⴰⴷ ⵏⵎⵎⴰⵖ ⴼ ⵓⵙⴳⵓⴷⵉ ⴰⴷ ⵏ ⵓⵎⵢⴰⵡⴰⵙ, ⴷ ⵓⵎⵛⴰⴱⴱⴰⴽ, ⵏⴰⵊⵊ ⵜ ⴰⴷ ⵉⵣⴷⵉ ⴷ ⵓⵙⴰⵍⵉ ⴰⴷⵎⵙⴰⵏ.     

ⵉⵇⵇⴰⵏ ⴰⵖ ⴷ ⵓⴳⴳⴰⵔ ⵏ ⵎⴰ ⴷ ⵉⵣⵔⵉⵏ ⵓⵙⵏⴼⵍ ⵏ ⵜⵥⴹⴰⵕⵉⵏ ⵓⵔ ⵉⵜⵜⵓⵙⵎⵔⴰⵙⵏ ⵉ ⵜⵏⵓⴼⵍⴰⵢ ⵙ ⵢⴰⵜ ⵜⵡⵓⵔⵉ ⵉⴱⴷⴷⵏ ⴼ ⵓⴼⴳⴰⵏ ⴷ ⵉⵙⴽⵔⵏ ⴳⵉⵙ ⴰⵡⵜⵜⴰⵙ ⵏⵏⵙ. ⵜⵉⵥⵉⴹⴰⵕ ⴰⴷ ⴳⴳⵓⵜⵏⵜ ⴱⴰⵀⵔⴰ, ⴰⵙⵎⵔⵙ ⵏⵏⵙⵏⵜ ⵔⴰⴷ ⵉⴳ ⴰⴼⴰⵔⵙ ⵏ ⵡⴰⵜⵉⴳ ⵉⵣⵓⵢⴷⵏ ⴷ ⵜⵢⴰⴼⵓⵜ ⵉⵙⴽⴰⵔⵏ ⴰⵙⴳⵓⴷⵉ. ⵓⵔ ⵙⵖⴰⵡⵙⴰⵖ ⴰⴷ ⵙⴽⴽⵜⵉⵖ ⵙ ⵜⵏⴰⵥⴰⵕⵜ ⵜⴰⵎⵓⵟⵟⵓⵏⵜ, ⴷ ⵜⵥⴹⴰⵕⵉⵏ ⵍⵍⵉ ⴷⴰⵔⵏⵖ ⵍⵍⴰⵏⵉⵏ ⴳⴰⵏⵉⵏ ⵉⵎⵙⵏⴼⵍⵓⵍⵏ ⴷ ⵉⵙⵏⴼⴰⵔⵏ ⴷ ⵉⵙⵍⵍⵡⵉⵜⵏ ⵜⵜⵓⵙⴽⴰⵔⵏⵉⵏ ⵖ ⵓⵎⵏⴰⴹ ⵏ ⵓⴱⴰⵢⵢⵓⵕ. ⵓⵔ ⵙⵖⴰⵡⵙⴰⵖ ⴰⴽⴽⵏⵉ ⴷ ⵙⵙⴽⵜⵉⵖ ⵙ ⵡⴰⵜⵉⴳ ⵏ ⵜⴷⵎⵙⴰ ⵜⴰⵣⴳⵣⴰⵡⵜ ⴷ ⵓⵛⵛⵉⵍ ⵏ ⵡⴰⵣⵣⴰⵣ ⵏ ⵉⵙⵏⴼⵍⵏ ⵍⵍⵉ ⵜⵙⵙⵏⵜⵉ ⵜⵎⴰⵣⵉⵔⵜ ⵏⵏⵖ ⵖ ⵓⵎⵏⵉⴷ ⴰⴷ, ⴷ ⵡⴰⵜⵉⴳ ⵏ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵔⵣⵣⵓ ⵅⴼ ⵓⵙⴱⵓⵖⵍⵓ.  

ⴳⴰⵏ ⵖⴰⵙ ⴽⵔⴰ ⵏ ⵜⵥⵉⴹⴰⵕ ⵍⵍⵉ ⵔⴰⴷ ⴰⵖ ⵢⴰⵡⵙ ⵖ ⵓⵙⵏⴼⵍ ⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⵙ ⵡⴰⵏⵏⴰⵣⵏ ⵏ ⵜⴳⵎⵉ ⵜⴰⵙⵓⵍⴰⵏⵜ, ⴷ ⵓⵙⵎⵖⵔ ⵙ ⵓⵎⵙⴰⵙⴰ ⴷ ⵓⵎⵏⴰⴹ ⵉⵥⵍⵉⵏ. ⵀⴰ ⵏⵏ ⵜⴰⵎⴰⵣⵉⵔⵜ ⵏⵏⵖ ⵜⵙⵙⵏⵜⵉ ⴰⵙⵡⴰⵍⴰ ⵙ ⵓⵎⵏⴰⴷ ⴰⴷ ⵖ ⵓⵣⵎⵣ ⵏ ⵓⴱⴰⵢⵢⵓⵕ ⵙ ⵉⵙⵍⵍⵡⵉⵜⵏ  ⵍⵍⵉ ⵙⴽⵔⵏ ⵉⵎⵙⵏⴼⵍⵓⵍⵏ ⵉⵎⵖⵔⵉⴱⵉⵢⵏ ⵖ ⵓⵎⴰⵡⴰ ⵏ ⵜⵙⵏⵉⵊⵊⵉⵜ ⴷ ⵉⵎⴰⵙⵙⵏ ⵏ ⵡⴰⵔⴰⵢ ⴷ ⵓⵙⵉⵣⴷⴳ ⴷ ⵢⵉⴳⵔ ⴰⵎⵓⵟⵟⵓⵏ, ⵜⵃⴱⵓ ⵜⵏ ⵜⵎⵙⵙⵏⵜⴰⵢⵜ ⵜⴰⵎⵖⵔⵉⴱⵉⵜ ⵍⵍⵉ ⴷ ⵉⵎⵍⴰⵏ ⵎⴰⵙ ⵜⵥⴹⴰⵕ ⴰⴷ ⵜⵙⴽⵙⵍ ⴷ ⵓⵎⵏⴰⴹ ⵉⵥⵍⵉⵏ, ⵙ ⵓⵙⵏⴰⵍ ⴷ ⵓⴹⴼⵕ ⵏ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵙ ⵉⵙⵡⴰⵍⴰⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.  

ⵜⴳⴰ ⵜⵎⵙⵉⵔⵜ ⵜⵉⵙ ⴽⴽⵓⵥⵟ ⴰⵜⵉⴳ ⵎⵇⵇⵓⵔⵏ ⴷ ⵉⵇⵇⴰⵏ ⵏⵏ ⴰⴷ ⵉⵜⵜⵓⴼⴽⵉ ⵉ ⵓⴼⴳⴰⵏ ⴷ ⵓⵛⵛⵉⵍ ⵏ ⵓⵙⵙⴰⵔⵓ ⵖ ⵓⴼⴳⴰⵏ, ⴷ ⵓⴷⵡⴰⵙ ⴷ ⵓⵙⴳⵎⵉ ⴷ ⵓⵙⵙⵍⵎⴷ ⴷ ⵓⵙⵎⵓⵜⵜⴳ, ⴷ ⵓⵣⵣⵔⴰⵢ ⵏ ⵡⴰⵏⴰⵡⵏ ⵏ ⵜⵙⵎⵓⵔⵜ ⴷ ⵓⵣⵣⵔⴰⵢ ⵏ ⵜⵎⵣⵡⵓⵔⴰ. ⵖ ⵓⵎⵏⴰⴹ ⵏ ⵜⵙⵎⴰⴹⴰⵍⵜ, ⵉⵇⵇⴰⵏ ⴷ ⴰⴷ ⵉⵜⵜⵓⴼⴽⵉ ⵡⴰⵜⵉⴳ ⵉⵥⵍⵉⵏ ⵉ ⵓⵎⵏⴰⴷ ⴰⵏⴼⴳⴰⵏ ⴰⴼⴰⴷ ⴰⴷ ⵢⵉⵍⵉ ⵢⴰⵏ ⵓⵏⴳⵔⴰⵡ ⴰⵎⴰⴹⵍⴰⵏ ⴰⵎⴰⵢⵏⵓ. ⵎⴰ ⴰⴷ ⴰⵔ ⵉⵙⵉⴳⴳⵉⵍ ⴰⴷ ⵢⵉⵍⵉ ⵓⵣⵔⴰⵢ ⵏ ⵜⵎⵢⴰⴷⴰⵙⵉⵏ ⴷ ⵓⵙⵎⴰⵇⵇⵍ ⵉⴳⴰⵏ ⵡⵉⵏ ⵖⵉⵍⴰⴷ ⵓⵔ ⵉⵣⵣⵉⴳⵣⵏ ⵉ ⵓⵙⵡⵓⴷⴷⵓ ⵏ ⵜⵉⵍⴰⵍ ⴷ ⵜⵣⴷⴰⵢⵉⵏ, ⵎⴳⴰⵍ ⵏ ⵎⴰⵢⴰ ⵏⵏ, ⵉⵇⵇⴰⵏ ⴷ ⴰⴷ ⵉⵍⵉⵏⵜ ⵜⵎⵢⴰⴷⴰⵙⵉⵏ ⵜⵉⵙⵜⵔⴰⵜⵉⵊⵉⵢⵉⵏ ⵖ ⵍⵍⴰⵏ ⵉⴼⵔⴷⴰⵙ ⵎⵓⵏⵏⵉⵏ ⵖ ⵓⵙⵡⵓⴷⴷⵓ ⴰⴷ, ⴳⵉⵙⵏ ⴰⴼⵔⴷⵉⵙ ⵏ ⵓⵣⵎⵣ, ⴷ ⵓⴼⵔⴷⵉⵙ ⵏ ⵓⴷⵔⴰⵡ ⵏ ⵉⵜⵜⵓⵎⵄⵏⵏ ⵏ ⵜⵓⵙⵙⵏⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵜⵢⴰⴼⵓⵜⵉⵏ ⵏⵏⵙ.

ⴰⴱⴰⵢⵢⵓⵕ ⴰⴷ ⴷ ⵉⴷⵔⵉⵣⵏ ⵏⵏⵙ ⵔⴰⴷ ⴼⵍⵍⴰⵖ ⵉⵙⴱⵣⵣⵉⵣ ⵖ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵎ ⴰⴽⴽⵯ ⵉⵙⵇⵇⵉⵎⵏ ⵢⴰⴹⵏⵉⵏ ⵏ ⵜⵎⵉⵣⴰⵔ ⵜⵉⴷⵉⵎⵓⵇⵔⴰⵟⵉⵢⵉⵏ, ⴰⵎⵙⴰⵙⴰ ⵏ ⵜⴱⵔⵉⴷⵉⵏ ⴷ ⵉⵎⴰⵙⵙⵏ ⵏ ⵜⵡⵓⵔⵉ. ⵖ ⵓⵎⵏⵉⴷ ⴰⴷ, ⵏⵎⵎⴰⵖ ⴰⴷ ⵉⵜⵜⵓⵕⵥⵉⵎ ⵓⵙⴰⵡⵓⵔ ⵏ ⵓⵣⵣⵔⴰⵢ ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ. ⵖ ⵜⵙⴳⴰ ⵢⴰⴹⵏⵉⵏ, ⵉⵍⵍⴰ ⴼ ⵙⵏⴰⵜ ⵜⵏⴱⴰⴹⵉⵏ ⵜⴰⵣⵣⵔⴰⴼⵜ ⴷ ⵜⵎⵣⵣⴳⴰⵔⵜ ⴰⴷ ⵥⵕⵉⵏⵜ ⵉⵎⴰⵍ ⵏ ⵓⵏⵏⵓⵕⵥⵎ ⵏ ⵓⵙⴰⵡⵓⵔ ⵏ ⵓⵎⵓⴽⵏ ⵏ ⴽⵉⴳⴰⵏ ⵏ ⵉⴹⵕⵉⵚⵏ  ⵉⵣⵣⵔⴰⴼⵏ ⴰⵎ ⴰⵙⵍⴳⵏ ⴰⵎⴰⴷⴷⴰⵙ ⵏ ⵓⵥⵕⴼ, ⴷ ⵉⵙⵍⴳⵏⵏ ⵉⵎⴰⴷⴷⴰⵙⵏ ⵣⴷⵉⵏⵉⵏ ⴷ ⵜⵓⵍⴽⵉⵎⵉⵏ ⴷ ⵜⵓⵜⵔⵉⵡⵉⵏ  ⵉ ⵓⵣⵣⵔⴰⴼ, ⵜⵉⵍⵉ ⵜⵣⵣⵉⴳⵣⵜ ⵙ ⵓⵎⵓⴽⵏ ⵏ ⵓⵏⴳⵔⴰⵡ ⴰⴷⵓⵙⴰⵏ. ⵉⵇⵇⴰⵏ ⴷ ⴰⴷ ⵢⵉⵍⵉ ⵎⴰⵢⴰ ⵏⵏ ⵖ ⵓⵙⴰⵜⵉ ⵏ ⵓⵎⵙⴰⵙⴰ ⴰⵏⴰⵎⵓⵔ ⴷ ⵓⴽⵜⵓⵢ ⵏ ⵜⵎⵙⴰⵔⵉⵏ ⵍⵍⵉ ⴷ ⵜⵉⵡⵉ ⵜⵎⵙⴽⵔⵜ, ⵉⴳ ⵜⴰⵔⵙⵍⵜ ⵏ ⵓⵙⵎⴰⴷ ⴷ ⵓⴷⵔⴰⵡ ⵏ ⵉⵎⵙⴽⴰⵔⵏ ⵉⵎⵏⵜⴰⵢⵏ.

ⵏⵍⵍⴰ ⵖ ⵓⵙⵇⵇⵉⵎ ⴷⴰⵜ ⵏ ⵢⴰⵜ ⵜⴼⵔⴽⴰ ⵏ ⵓⵙⵙⵏⵜⵉ ⵏ ⵉⵎⴰⵙⵙⵏ ⵏ ⵜⵡⵓⵔⵉ, ⵏⵙⴽⵔ ⵉⵢⴰⴼⵓⵜⵏ ⵙⵜⴰⵡⵀⵎⵎⴰⵏⵉⵏ ⵙ ⵜⵖⴰⵔⴰⵙⵜ ⵏ ⵜⵎⵓⵟⵟⵓⵏⵜ ⵏ ⵜⵡⵓⵔⵉⵡⵉⵏ ⵏⵏⵖ ⴷ ⵓⵎⵢⴰⵡⴰⴹ ⵏⵏⵖ, ⵔⴰⴷ ⵏⵙⴽⵔ ⴰⵙⵓⵜⴳ ⵏ ⴽⵓ ⵎⴰⵢⴰ ⵏⵏ ⴷ ⵓⵚⴽⵓ ⴼ ⵓⵙⴳⵓⴷⵉ ⵉⵜⵜⵓⵙⴽⴰⵔⵏ ⵉ ⵉⵙⴽⵔ ⵏ ⵓⵙⵎⴰⵜⵜⵉ ⴰⵎⵓⵟⵟⵓⵏ ⵢⵓⵎⴰⵏ.

ⴰⵙⵎⵔⵙ ⵉⵥⵉⵍⵏ ⵏ ⵜⴻⵜⵉⴽⵏⵓⵍⵓⵊⵉⵜ ⵏ ⵓⵙⵏⵖⵎⵙ ⴷ ⵓⵏⵢⴰⵍⴽⴰⵎ ⵖ ⵜⵡⵓⵔⵉⵡⵉⵏ ⴷ ⵓⵎⵢⴰⵡⴰⴹ

ⵖ ⵜⵙⵓⵜⵍⵜ ⴰⴷ ⵜⴰⵣⵣⵔⴰⴼⵜ, ⵉⵙⵙⵎⵖⵔ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵓⵎⵢⴰⵡⴰⴹ ⵏⵏⵙ ⴷ ⵜⵏⵎⵓⵔⴰⵜⵉⵏ ⴷ ⵉⵏⵎⵓⵔⴰⵏ ⵎⵓ ⵉⵣⵓⵢⵢⴷ ⵓⵅⵎⵎⴻⵎ ⵏⵏⵙⵏ ⴷ ⵓⴹⴼⵕ ⵏⵏⵙⵏ ⵉ ⵉⵎⴷⴰⵡⴰⵍⵏ ⵏ ⵓⵙⵇⵇⵉⵎ ⵖ ⵓⵣⵎⵣ ⵏ ⵓⴱⴰⵢⵢⵓⵕ.

ⴳⴰⵏ ⵉⵎⴰⵙⵙⵏ ⵏ ⵓⵏⵢⴰⵍⴰⴽⵎ ⵉⵎⴰⵢⵏⵓⵜⵏ ⵖ ⵍⵍⴰⵏ ⵉⵥⵟⵡⴰⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ ⴷ ⵓⵙⵉⵜ ⴰⵍⵉⴽⵟⵕⵓⵏⵉ ⵏ ⵓⵙⵇⵇⵉⵎ ⵉⵎⴰⵙⵙⵏ ⵉⴷⵙⵍⴰⵏⵏ ⵏ ⵓⵎⵢⴰⵡⴰⴹ ⴰⴷ, ⵉⵙⵔⵙ ⵓⵙⵇⵇⵉⵎ ⴽⵓ ⵜⵉⵥⴹⴰⵕⵉⵏ ⵜⵓⵛⵛⵉⵍⵉⵏ ⵉ ⵡⴰⵡⵜⵜⴰⵙ ⴰⴷ ⵃⵎⴰ ⴰⴷ ⵉⵥⴹⵉⵕⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⴰⴷ ⴰⵡⵙⵏ ⵙ ⵜⵉⴳⴳⵓⴳⵜ ⵖ ⵜⵙⵎⵓⵏⴰⵢ ⵏ ⵜⵙⵇⵇⵉⵎⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵉⵏⴳⵎⴰⵎⵏ ⵢⴰⴹⵏⵉⵏ ⵏ ⵓⵙⵇⵇⵉⵎ, ⴷⴼⴼⵉⵔ ⵍⵍⵉⵖ ⵉⴼⴼⵖ ⵓⵙⵇⵇⵉⵎ ⵙ ⵜⵖⵜⴰⵙⵜ ⵏ ⵓⵙⴽⵔ ⵏ ⵉⵙⵡⵓⴷⴷⵓⵜⵏ ⴷ ⵜⵎⵙⴽⴰⵔ ⵏ ⵡⴰⵔⴰⵢ ⴳⴰⵏⵉⵏ ⵜⵓⵛⵛⵉⵍⵉⵏ ⵍⵍⵉⵖ ⵉⵍⵍⴰ ⵓⵙⴼⵔⵓⵔⵜ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19, ⴰⵢⵍⵍⵉ ⴷ ⵢⵉⵡⵉⵏ ⴰⵙⵉⴷⵔⵓⵙ ⵏ ⵜⵉⵔⴰⵜ ⵏ ⵓⵏⵛⴽ ⵏ ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⵓⵔⴰ ⵍⵍⵉ ⵜⵜⵃⴰⴹⴰⵕⵏⵉⵏ ⵖ ⵜⵖⵉⵎⴰ ⵜⵉⵎⴰⵜⴰⵢⵉⵏ ⴷ ⵜⵙⵎⵓⵏⴰⵢ ⵏ ⵜⵙⵇⵇⵉⵎⵉⵏ.

ⵉⵎⵎⴰⵖ ⵓⵙⵇⵇⵉⵎ ⴼ ⵓⵙⴽⵙⵍ ⴷ ⵓⵍⴳⴳⵓⴷ ⴷ ⵓⵎⵏⴰⴹ ⵏ ⵓⴱⴰⵢⵢⵓⵕ, ⵜⴳⴰ ⵜⴰⵔⵙⵍⵜ ⵏⵏⵙ ⵜⴰⵢⴰⴼⵓⵜ ⵏⵏⵙ ⵖ ⵢⵉⴳⵔ ⵏ ⵓⵙⵎⴰⵜⵜⵉ ⴰⵎⵓⵟⵟⵓⵏ ⴷ ⵓⴱⵕⵍⴰⵎⴰⵏ ⴰⵍⵉⴽⵟⵕⵓⵏⵉ, ⵉⵙⵔⵙ ⵢⴰⵏ ⴰⵖⵡⴰⵙ ⵏ ⵓⵎⵢⴰⵡⴰⴹ ⵉⵡⴰⵜⵜⵙⵏ ⴰⴷ ⵜⵉⵍⵉ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⵜⴰⵎⴰ ⵏ ⵉⵏⵎⵓⵔⴰⵏ, ⵜⴰⵡⵉ ⴷ ⵉⵅⵎⵎⵉⵎⵏ ⵏⵏⵙⵏ ⵖ ⵉⵙⵓⵔⵙⵏ ⴰⴷ ⵥⵍⵉⵏⵉⵏ.

ⵙⴽⵔⵏ ⴽⵓ ⵉⵏⴳⵎⴰⵎⵏ ⵏ ⵓⵙⵇⵇⵉⵎ ⵎⴰ ⴷ ⵉⴳⴰⵏ 100 ⵏ ⵜⵙⵎⵓⵏⵉ, ⵉⵡⵙⵏ ⴳⵉⵙⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵓⵔ ⵃⴰⴹⵕⵏⵉⵏ ⵖ ⵓⴹⴼⵕ ⴷ ⵓⵎⴹⴰⴽⴰⵕ ⵙ ⵜⴻⵜⵉⵇⵏⵉⵢⵉⵏ ⵏ “ⵓⴼⵉⵣⵢⵓⴽⵓⵏⴼⵉⵕⵓⵏⵚ” ⵙ ⵜⵖⴰⵔⴰⵙⵜ ⵜⴰⵏⴼⵔⴰⵏⵜ.

ⵜⵣⵉⵢⵢⴷ ⵜⵙⵖⵍⵜ ⵏ ⵉⵎⵍⵜⴰⵖⵏ ⵖ ⵓⵙⴰⵔⵓ ⵏ ⵓⵙⵇⵇⵉⵎ ⵖ ⵢⵓⵜⵢⵓⴱ ⵙ 300 % ⵙ ⵓⵙⵎⵣⴰⵣⴰⵍ ⴷ ⵜⵣⵡⵉⵔⵉ ⵏ ⵉⴱⵔⵉⵔ ⵖ ⵓⵙⴳⴳⵯⴰⵙ ⴰⴷ, ⵢⵉⵍⵉ ⴳⵉⵙ 500 ⵏ ⵉⴼⴹ ⵏ ⵉⵎⵥⵕⵉ ⵖ ⵍⵎⵖⵔⵉⴱ ⵙ 73% , ⴷ ⴱⵕⵕⴰ ⵏⵏⵙ ⵙⴳ ⴼⵕⴰⵏⵚⴰ ⴷ ⵚⴱⴰⵏⵢⴰ ⴷ ⵉⵡⴰⵏⴽⵏ ⵢⴰⴹⵏⵉⵏ ⵏ ⵓⵎⴰⴹⴰⵍ.

ⵖ ⵜⵉⴼⵔⵜ ⵏ ⵓⵙⵇⵇⵉⵎ ⵖ ⵓⴼⴰⵢⵙⴱⵓⴽ, ⵜⵜⵓⵥⵕⴰⵏ ⴽⵕⴰⴹ ⵉⴷ ⵎⵍⵢⵓⵏ ⵏ ⵜⵓⵙⴷⴰⴷⵜ ⵖ ⵉⴼⵉⴷⵢⵓⵜⵏ ⵥⵍⵉⵏⵉⵏ ⴷ ⵜⵡⵓⵔⵉⵡⵉⵏ ⵏ ⵜⵖⵉⵎⴰ ⵜⵉⵎⴰⵜⴰⵢⵉⵏ ⴷ ⵜⵙⵇⵇⵉⵎⵉⵏ ⵜⵉⴱⵕⵍⴰⵎⴰⵏⵉⵢⵉⵏ, ⵉⵣⵉⵢⵢⴷ ⵓⵏⵛⴽ ⵏ ⵉⵎⵍⵜⴰⵖⵏ ⵙ 3 ⵜⵉⴽⴽⴰⵍ ⵙ ⵓⵙⵎⵣⴰⵣⴰⵍ ⴷ ⵜⵉⴽⵍⵉⵜ ⵉⵣⵔⵉⵏ ⵉⵍⴽⵎ ⵖⵉⵍⴰⴷ 75 ⵏ ⵉⴼⴹ. ⵍⴽⵎⵏⵜ ⴽⵔⴰ ⵏ ⵜⵖⵉⵎⴰ ⵍⵍⵉ ⵉⵣⵓⵣⵣⵔ ⵓⵙⵇⵇⵉⵎ ⵖ ⵜⴼⵔⵜ ⴰⴷ ⴰⴹⴼⵕ ⵉⴳⴳⵓⵜⵏ ⵏ ⵉⵏⵎⵓⵔⴰⵏ ⵍⵍⵉⵖ ⵍⴽⵎⵏⵜ 200 ⵏ ⵉⴼⴹ ⵏ ⵉⵎⵥⵕⵉ.

ⵖ ⵓⵥⵟⵟⴰ ⵏ ⵜⵡⵉⵜⵔ, ⵉⵣⵉⵢⵢⴷ ⵓⵏⵛⴽ ⵏ ⵡⵉⵍⵍⵉ ⴹⴼⵕⵏⵉⵏ ⴰⵎⵉⴹⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ 20 ⵏ ⵉⴼⴹ,  ⵉⵍⴽⵎ ⵖⵉⵍⴰⴷ 117.000. ⵖⵎⴽ ⵍⵍⵉ ⵉⵣⵎⵎⵉⵎ ⵓⴳⴳⴰⵔ ⵏ 521 ⵏ ⵉⴼⴹ ⵏ ⵓⵏⵢⴰⵍⴽⴰⵎ ⴷ ⵜⵓⵎⴰⵢⵉⵏ ⵣⴷⵉⵏⵉⵏ ⴷ ⵜⵉⵍⴰⵍ ⵏ ⵓⵙⵇⵇⵉⵎ.

ⴰⵔ ⵎⵎⴰⵍⴰⵏ ⵓⵟⵟⵓⵏⵏ ⴰⴷ ⴰⵜⵉⴳ ⵏ ⵉⵎⵔⵙⵉⵡⵏ ⴼ ⵉⵎⴹⴰⴽⴰⵕ ⵓⵙⵇⵇⵉⵎ ⵖ ⵓⵣⵎⵣ ⵏ ⵓⵥⵍⴰⵢ ⴰⴷⵓⵙⴰⵏ, ⵍⵍⵉ ⵍⵍⴰⵏⵉⵏ ⵖ ⵓⴳⵏⵙ ⵏ ⵉⵅⵎⵎⵉⵎⵏ ⵏ ⵉⵏⵎⵓⵔⴰⵏ ⴷ ⵜⵎⵓⴽⵔⵉⵙⵉⵏ ⵣⴷⵉⵏⵉⵏ ⴷ ⵜⴼⵔⴽⴰ, ⵜⵉⵍⵉ ⵜⵙⵓⵎⵔⵜ ⵏ ⵉⴼⵙⵙⴰⵢⵏ ⵙ ⴰⵢⵍⵍⵉ ⵉⵎⵎⴰⵍⵏ ⴰⵜⵉⴳ ⵎⵇⵇⵓⵔⵏ ⵏ ⵜⵎⵙⴽⵔⵜ ⵜⴰⴷⵉⵎⵓⴽⵔⴰⵟⵉⵜ ⵜⴰⵏⴰⵎⵓⵔⵜ.

ⵡⴰⵅⵅⴰ ⵍⵍⴰⵏⵜ ⵜⵎⵓⴽⵔⵉⵙⵉⵏ ⵣⴷⵉⵏⵉⵏ ⴷ ⵓⵥⵍⴰⵢ ⴰⴷⵓⵙⴰⵏ, ⵉⵍⵍⴰ ⵓⵙⵎⴰⵢⵏⵓ ⵉⵣⵣⵉⴳⵣⵏ ⵏ ⵓⵙⵉⵜ ⵏ ⵓⵙⵇⵇⵉⵎ, ⴷ ⵓⵣⵓⵣⵣⵔ ⵏ ⴽⵓ ⵓⵎⵍⴰⵏ ⴷ ⵡⴰⵔⵔⴰⵜⵏ ⴷ ⵉⵎⴰⵢⵏⵓⵜⵏ ⵙ ⵓⵍⴳⴳⵓⴷ ⴷ ⵉⵇⵇⴰⵏⵏ, ⵖⵎⴽ ⴰⵏⵏ ⴷ ⵓⵙⵓⵖⵍ ⵏ ⵜⵓⵎⴰⵢⵉⵏ ⴷ ⵓⵣⵓⵣⵣⵔ ⵏⵏⵙⵏⵜ ⵙ ⵙⵎⵎⵓⵙⵜ ⵜⵓⵜⵍⴰⵢⵉⵏ ⵜⴰⵄⵕⴰⴱⵜ ⴷ ⵜⵎⴰⵣⵉⵖⵜ ⴷ ⵜⴼⵔⴰⵏⵚⵉⵚⵜ ⴷ ⵜⵚⴱⵍⵢⵓⵏⵉⵜ ⴷ ⵜⵏⴳⵍⵉⵣⵜ.

ⵖ ⵜⴼⵔⴽⴰ ⴰⴷ, ⵉⴽⴽⴰ ⴷ ⴰⵙⵉⵜ ⴰⵍⵉⴽⵟⵕⵓⵏⵉ ⵎⴰ ⴷ ⵢⵓⴳⵔⵏ 170 ⵏ ⵉⴼⴹ ⵏ ⵓⵎⵙⵎⵔⵙ ⴳⵉⵙⵏ 17% ⵖ ⴱⵕⵕⴰ ⵏ ⵍⵎⵖⵔⵉⴱ, 6% ⵙⴳ ⴼⵕⴰⵏⵚⴰ, 3% ⵙ ⵎⴰⵔⵉⴽⴰⵏ ⴷ ⵉⵡⴰⵏⴽⵏ ⵢⴰⴹⵏⵉⵏ ⵏ ⵓⵎⴰⴹⴰⵍ.

ⵜⵎⵎⴰⵖ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⴷ ⵜⵏⵢⴰⵍⴽⴰⵎ ⵙ ⵜⵖⴰⵔⴰⵙⵜ ⵉⵥⵉⵍⵏ ⴷ ⵜⵙⵓⵎⵔⵉⵏ ⵍⵍⵉ ⴷ ⵉⵍⴽⴽⵎⵏ ⵙ ⵜⵖⴰⵔⴰⵙⵜ ⵏ ⵓⵙⵉⵜ ⴰⵍⵉⴽⵟⵕⵓⵏⵉ ⵃⵎⴰ ⴰⴷ ⵢⵉⵍⵉ ⵓⵙⵖⵓⴷⵓ ⵏ ⵜⵙⵓⵎⵔⵉⵏ ⴷ ⵉⵙⵏⴼⴰⵔⵏ ⵏ ⵉⵙⵍⴳⵏⵏ, ⴷ ⵓⵙⵙⴼⵍⴷ ⵉ ⵉⵅⵎⵎⵉⵎⵏ ⵏ ⵉⵏⵎⵓⵔⴰⵏ, ⴰⵔ ⵉⵜⵜⵉⵍⵉ ⵓⵙⵎⵓⵏ ⵏ ⵜⵙⵓⵎⵔⵉⵏ ⴰⴷ ⴷ ⵓⵣⵓⵣⵣⵔ ⵏⵏⵙⵏⵜ ⴼ ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⵃⵎⴰ ⴰⴷ ⵉⵜⵜⵓⵙⴽⵉⵔ ⴰⵢⵍⵍⵉ ⴷ ⵢⵓⵙⴰⵏ ⵖ ⵉⵎⵔⵙⵉ.

ⵉⵍⵍⴰ ⵓⴹⴼⵕ ⵏ ⵓⵙⵏⵖⵎⵙ ⵉ ⴽⵓ ⵜⵉⵍⴰⵍ ⵏ ⵓⵙⵇⵇⵉⵎ ⵙ ⵜⵥⵕⵉⴳⵜ ⵏ ⵉⵙⵉⵡⴹⵏ ⵉⵏⵖⵎⴰⵙⵏ ⵖ ⵉⵎⵔⵙⵉ ⴷ ⵓⵣⵓⵣⵣⵔ ⵏⵏⵙⵏ ⴼ ⵉⵎⴰⵙⵙⵏ ⵏ ⵓⵙⵏⵖⵎⵙ, ⵖⵎⴽ ⴰⵏⵏ ⴷ ⵜⵥⵕⵉⴳⵜ ⵏ ⵜⴳⴹⵡⵉⵏ ⵅⴼ  ⵜⵡⵓⵔⵉⵡⵉⵏ ⵏ ⵜⵙⵇⵇⵉⵎⵉⵏ ⵖ ⵓⵙⵉⵜ ⴰⵍⵉⴽⵟⵕⵓⵏⵉ ⵏ ⵓⵙⵇⵇⵉⵎ ⴷ ⴽⵓ ⵉⵥⵟⵡⴰⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ.

ⵖ ⵢⵉⴳⵔ ⵏ ⵓⵎⵢⴰⵡⴰⴹ, ⵉⵙⴽⵔ ⵓⵙⵇⵇⵉⵎ ⵏ ⵉⵎⵓⵔⴰ ⵓⵍⴰ ⵜⵓⴳⵜ ⵏ ⵜⵓⴹⴼⵉⵕⵉⵏ ⴷ ⵉⵎⴰⵙⵙⵏ ⵎⵎⴰⵍⵏⵉⵏ ⴰⵙⵇⵇⵉⵎ ⵏ ⵉⵎⵓⵔⴰ ⴷ ⵉⵏⴳⵎⴰⵎⵏ ⵏⵏⵙ, ⴳⵉⵙⵏ ⴰⵔⵔⴰⵜⵏ ⵚⴰⵃⴰⵏⵉⵏ ⵉ ⵜⴰⵣⵣⴰⵏⵉⵏ ⴷ ⵉⵏⵔⵣⴰⴼ ⵏ ⵓⵙⵇⵇⵉⵎ ⵙ ⵓⵎⴰⵜⴰ. ⴰⵔ ⵎⵎⴰⵍⴰⵏ ⵉⵎⴰⵙⵙⵏ ⴰⴷ ⵜⵉⵡⵓⵔⵉⵡⵉⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵎⵥⵍⴰⵢ ⵏⵏⵙ ⴷ ⵓⵙⵏⴰⵢ ⵏⵏⵙ ⴷ ⴽⵓ ⵉⵏⴳⵎⴰⵎⵏ ⵏⵏⵙ, ⵙ ⵜⵓⵜⵍⴰⵢⵉⵏ ⵜⴰⵄⵕⴰⴱⵜ ⴷ ⵜⵎⴰⵣⵉⵖⵜ ⴷ ⵜⴼⵔⴰⵏⵚⵉⵚⵜ ⴷ ⵜⵚⴱⵍⵢⵓⵏⵉⵜ ⴷ ⵜⵏⴳⵍⵉⵣⵜ.

ⵍⵍⵉⵖ ⵉⴼⵔⴽ ⵙ ⵡⴰⵣⵣⴰⵣ ⵏ ⵓⵎⵎⴰⵜⵜⵉ ⴰⵎⵓⵟⵟⵓⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⴳⴰⵏ ⵓⵛⵛⵉⵍ, ⵎⴰ ⴰⴷ ⵔⴰⴷ ⵢⴰⵊⵊ ⵜⵉⵎⵔⵙⵍⵜ ⵜⴰⵣⵣⵔⴰⴼⵜ ⴰⴷ ⵜⵥⵕ ⵉⵎⴰⵍ ⵙ ⵜⵖⴰⵔⴰⵙⵜ ⵉⵥⵉⵍⵏ, ⵉⵜⵜⵓⵙⴽⴰⵔ ⵓⵖⴰⵡⴰⵙ ⴰⵙⵜⵔⴰⵜⵉⵊⵉ ⵖ ⵓⵎⵏⵉⴷ ⴰⴷ ⵍⵍⵉ ⵔⴰⴷ ⵉⵙⴽⵔ ⵖ ⵜⵎⵓⵟⵟⵓⵏⵜ ⵉⵎⵉⵙⵙ ⵉⴹⵎⵏⵏ ⵜⵉⵕⵡⵉ ⴷ ⵓⵏⴱⴰⴹ ⵉⵥⵉⵍⵏ ⴷ ⵓⵏⵏⵓⵕⵥⵎ, ⴰⵢⵍⵍⵉ ⵔⴰⴷ ⵉⴳ ⵜⵜⵎⵉ ⵉ ⵓⵙⵎⵔⵙ ⵏ ⵓⴼⵔⴽⵓⴽ, ⴷ ⵓⵙⴷⵓⵙ ⵏ ⵓⵙⵏⴼⵍ ⴰⵍⵉⴽⵟⵕⵓⵏⵉ ⴷ ⴽⵓ ⵉⵎⴷⵔⴰⵡⵏ ⵏ ⵓⵙⵇⵇⵉⵎ.

ⵜⵉⵙⵏⵜⴰⵢⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴽⴷ ⵉⴼⵔⵉⵇⵢⴰ ⴳⴰⵏⵜ ⴰⵙⴽⵔ ⵏ ⵓⵙⵎⵀⵍ ⵏ ⵜⵡⵉⵣⵉ ⵏ ⵍⵎⵖⵔⵉⴱ ⴷ ⴰⵢⵜⵎⴰⵙ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵖ ⵓⵣⵎⵣ ⵖ ⴳⴳⵓⵜⵏⵜ ⵜⵥⵍⴰⵢⵉⵏ ⴳⴰⵏⵉⵏ ⵜⵉⵏⵉⵎⴰⵏⵉⵏ, ⵉⴳⵓⵜⵏ ⵉⵏⴰⵡⵏ ⵏ ⵓⵥⵍⴰⵢ ⴷ ⵓⵅⵎⵎⴻⵎ ⵏ ⵉⵡⴰⵏⴽⵏ ⵉⵎⴰⴹⵍⴰⵏⵏ ⵉⵎⵇⵔⴰⵏⵏ ⵖ ⵜⵎⵓⴽⵔⵉⵙⵉⵏ ⵏⵏⵙⵏ ⵜⵉⴳⵯⵏⵙⴰⵏⵉⵏ, ⴼⵍⵏ ⵉⵙⵖⵡⴰⵏ ⵏⵏⵙⵏ ⵉⴳⵔⴰⵖⵍⴰⵏⵏ, ⵖ ⵓⵣⵎⵣ ⴰⴷ ⵉⵍⵍⴰ ⴷⴰⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵢⴰⵏ ⵉⵥⵕⵉ ⴷ ⵢⴰⵜ ⵜⵎⵢⴰⴷⴰⵙⵜ ⵥⵍⵉⵏⵉⵏ ⵉⴱⴷⴷⵏ ⴼ ⵜⵡⵉⵣⵉ ⴷ ⵓⵎⵢⴰⵡⴰⵣ ⵓⵔ ⴷ ⵖⴰⵙ ⵖ ⵍⵎⵖⵔⵉⴱ, ⵎⴰⵛⵛ ⴰⵡⴷ ⴷ ⵡⵉⵢⵢⴰⴹ, ⴰⵢⵍⵍⵉ ⵉⴳⴰⵏ ⵜⵉⵡⵉⵣⵉ ⵏ ⵍⵎⵖⵔⵉⴱ ⴷ ⴰⵢⵜⵎⴰⵙ ⴷ ⵉⵎⴷⴷⵓⴽⴽⴰⵍ ⵏⵏⵙ ⵙⵍⴰⵡⴰⵏ ⴰⴽⴽⵯ ⵖ ⵉⴼⵔⵉⵇⵢⴰ. ⵖⵉⴽ ⴰⵏⵏ, ⵍⵍⵉⵖ ⵉⵍⵍⴰ ⵓⴱⴰⵢⵢⵓⵕ, ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴷ ⵜⵜⵢⵓⵣⵉⵏ ⵜⵡⵉⵙⵉ ⵉⵙⵜⴰⵡⵀⵎⵎⴰⵏ ⵖ ⴳⴰⵏ ⵉⵙⴰⴼⴰⵔⵏ ⴷ ⵜⴽⵎⴰⵎⵉⵏ ⴷ ⵜⵎⵜⵜⴰⵡⵉⵏ ⵏ ⵡⴰⵔⴰⵢ ⴷ ⵓⵎⴰⵡⴰ ⵏ ⵜⵙⵏⵉⵊⵊⵉⵜ ⵉ ⵎⴰ ⴷ ⵉⴳⴰⵏ ⵙⵎⵎⵓⵙⵜ ⴷ ⵎⵔⴰⵡⵜ ⵏ ⵜⵎⴰⵣⵉⵔⵜ ⵏ ⵉⴼⵔⵉⵇⵢⴰ. ⵉⴳⴰ ⵢⴰⵏ ⵡⴰⵏⴰⵡ ⵉⴼⴰⵡⵏ ⵏ ⵓⴷⵔⴰⵡ ⵏ ⵓⵥⴰⵥⵓⵢ ⵏ ⵓⴱⴰⵢⵢⵓⵕ ⴷ ⵓⵙⵡⵉⵏⴳⵎ ⵖ ⵡⵉⵢⵢⴰⴹ, ⴰⵢⵜⵎⴰⵜⵏ ⴷ ⵉⵎⴷⴷⵓⴽⴽⴰⵍ, ⵖ ⵓⵣⵎⵣ ⵏ ⵜⴰⵙⵙⴰⵙⵜ ⴷ ⵓⵙⵖⵉⵡⵙ  ⴰⵎ ⴰⵣⵎⵣ ⵏ ⵜⵓⴷⵔⵜ ⵉⵥⵉⵍⵏ. ⵉⵣⵣⵔⵉ ⴷ ⴰⵔ ⵓⴽⴰⵏ ⵉⵣⵣⵔⴰⵢ ⵓⴼⵔⴰⴽ ⴰⵎⴰⴹⵍⴰⵏ ⵢⴰⵏ ⵉⵔⵉⵎ ⴷⴰⵜ ⵏ ⵉⵙⵓⵔⵙⵏ ⵖ ⵉⴼⵔⵉⵇⵢⴰ ⵍⵍⵉⵖ ⵜⵎⵎⴰⵖ ⴷ ⵓⴱⴰⵢⵢⵓⵕ. ⵉ ⵓⵙⴽⵔ ⵏ ⵜⴰⵏⵏⴰⵢⵜ ⵏⵏⵙ ⵏ ⵓⵎⵢⴰⵡⴰⵣ ⵉⴳⴰⵏ ⵜⴰⵎⵣⵡⴰⵔⵓⵜ, ⵉⵣⵡⴰⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵖ ⵓⵏⵏⵓⵕⵥⵎ ⵏ ⵜⵙⵏⵜⴰⵢⵜ ⵉ ⵉⵏⵙⵙⵉⵅⴼⵏ ⵏ ⵉⵡⴰⵏⴽⵏ ⵏ ⵉⴼⵔⵉⵇⵢⴰ ⵃⵎⴰ ⴰⴷ ⵢⵉⵍⵉ ⵢⴰⵏ ⵓⵙⴰⵜⵉ ⵏ ⵜⵡⵓⵔⵉ ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19, ⴷ ⵓⴷⵔⴰⵡ ⵏ ⵜⵎⵓⵣⴰⵢⵉⵏ ⴷ ⵜⵎⵙⴽⴰⵔ ⵥⵉⵍⵏⵉⵏ ⵉ ⵓⵙⴱⴷⴷⵉ ⵏ ⵉⴷⵔⵉⵣⵏ ⵉⴷⵓⵙⴰⵏⵏ ⴷ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵏ ⵓⴱⴰⵢⵢⵓⵕ ⵖ ⵉⴼⵔⵉⵇⵢⴰ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵉⵍⵍⴰ ⵓⴱⴰⵢⵢⵓⵕ ⵢⵉⵍⵉ ⵓⴽⴰⵏ ⵙⵓⵍ ⵖ ⴽⵓ ⵓⴷⵎⴰⵡⵏ ⵏ ⵜⵓⴷⵔⵜ ⴷ ⵜⵉⵍⴰⵍ ⵜⵉⵏⴼⴳⴰⵏⵉⵏ, ⵉⵙⵙⵏⵜⵉ ⴰⵙⵏⴼⵍ ⵏ ⵓⴷⵎ ⵏ ⵓⵎⴰⴹⴰⵍ ⴷ ⵜⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ, ⵉⴷⵔⵉⵣⵏ ⵏⵏⵙ ⵔⴰⴷ ⴳⵉⵏ ⵉⵊⵢⵓⵙⵜⵔⴰⵜⵉⵊⵉⵢⵏ ⵟⵟⴰⴼⵏⵉⵏ ⵜⵉⵢⴰⴼⵓⵜⵉⵏ ⵏⵏⵙⵏ.

ⴰⴱⴰⵢⵢⵓⵕ ⵔⴰⴷ ⵉⵙⴽⵔ ⵉⵙⵏⴼⵍⵏ ⵉⵎⴰⵢⵏⵓⵜⵏ ⵖ ⵜⴰⵙⵓⵜ ⵜⵉⵙ 21

ⵉⵖ ⵜⵜⵓⵙⵙⴰⵏ ⵜⴰⵙⵓⵜ ⵏ ⵙⵉⵏ ⵡⴰⴳⵏⴰⵔⵏ ⵙ ⵉⵙⵏⴼⵍⵏ ⴷ ⵉⵎⵓⵙⵙⵓⵜⵏ ⵉⵎⵇⵔⴰⵏⵏ ⵍⵍⵉ ⵉⵡⵉⵏⵉⵏ ⵙ ⵜⵎⵓⴽⵔⵉⵙⵜ ⵜⴰⴳⵔⴰⵖⵍⴰⵏⵜ ⵏ ⵓⵙⴳⴳⵯⴰⵙ ⵏ 1929, ⴷ ⵎⴰ ⴷ ⵉⴹⴼⵕⵏ ⵖ ⵜⵎⴰⵖⵜ ⵜⴰⵚⵎⵎⴰⴹⵜ ⴷ ⵙⵉⵏ ⵉⴳⵊⴷⴰ ⵉⵙⵉⵏⵔⴰⵏⵏ ⴷ ⵓⵙⵉⵜⵜⵉ ⵏ ⵓⵙⴷⵓⵔⵔⵉ, ⵖⴷ ⵏⵜⵜⴰⵜ ⵔⴰⴷ ⵜⴳ ⵜⴰⵙⵓⵜ ⵜⵉⵙ 21, ⵙ ⵓⴱⴰⵢⵢⵓⵕ ⴷ ⵜⵎⵏⵜⴰⵍ ⵢⴰⴹⵏⵉⵏ, ⵜⴰⵙⵓⵜ ⵍⵍⵉ ⵔⴰⴷ ⵉⵙⴽⵔ ⵜⵉⵍⴰⵡⵉⵏ ⵜⵉⵎⴰⵢⵏⵓⵜⵉⵏ ⵖ ⵓⵙⵡⵉⵔ ⵏ ⵓⴼⵔⴰⴽ ⴷ ⵉⵙⵡⵉⵏⴳⵉⵎⵏ, ⴷ ⵜⵎⴰⵎⴽⵉⵏ ⴷ ⵓⵔⵎⵎⵓⵙ ⵏ ⵜⵡⵓⵔⵉ, ⴷ ⵉⵥⴹⴰⵕ ⵓⵍⴰ ⵖ ⵜⵣⴷⴰⵢⵉⵏ ⵏ ⵓⴼⴰⵔⵙ. ⵍⵍⵉⵖ ⵏⴷⴷⵔ ⵖ ⵓⵣⵎⵣ ⵏ ⵜⵙⵎⴰⴹⴰⵍⵜ ⵎⴰ ⴷ ⵉⴳⴰⴷⴷⴰⵏ ⴷ ⵙⵉⵏ ⵡⴰⴳⵏⴰⵔⵏ, ⵉⵇⵇⴰⵏ ⴷ ⴰⴷ ⴰⵙ ⵜⵜⵓⴼⴽⵉⵏ ⵉⵙⵇⵙⵉⵜⵏ ⵎⴰⵙ ⵓⵔ ⵜⵍⴽⵎ ⴰⴼⴰ ⵏⵏⵙ ⵖ ⵓⵙⴼⵓⵥⵥⵕ ⵏ ⵓⵎⵥⵍⴰⵏ ⵏ ⵜⵏⵓⴼⴰ ⴷ ⵚⴰⵃⴰ, ⵜⴼⵍ ⴰⵜⵉⴳⵏ ⴷ ⵜⵖⴰⵔⵉⵡⵉⵏ ⴷ ⵉⵎⵏⴰⴷⵏ ⵉⵏⴼⴳⴰⵏⵏ ⵏ ⵉⵙⵏⴼⵍⵏ ⴷ ⵓⵎⵢⴰⵡⴰⴹ, ⴷ ⵉⵙ ⵏⵉⵜ ⵓⵔⴰ ⵜⵙⴽⴰⵔ ⴰⴼⴰⵔⵙ ⴰⵎⴰⵢⵏⵓ ⵏ ⵉⵎⵣⴰⵔⴰⵢⵏ ⵉⵎⴰⵢⵏⵓⵜⵏ, ⵜⵉⴽⴽⵍⵉⵜ ⴰⴷ ⵖ ⵓⵙⵡⵉⵔ ⵏ ⵜⵓⵙⵙⵏⴰ ⴷ ⵉⵙⵍⵍⵡⵉⵜⵏ ⴷ ⵜⵓⵙⵙⵏⴰ ⵜⴰⵎⵓⵟⵟⵓⵏⵜ.

ⵓⵔ ⴳⵉⵙ ⵜⵓⵔⴷⴰ, ⵎⴰⵙ ⵔⴰⴷ ⵉⵙⵙⵎⵖⵔ ⵓⴱⴰⵢⵢⵓⵕ ⵉⵎⵣⴰⵔⴰⵢⵏ ⴰⴷ ⵍⵍⵉⵖ ⵔⴰⴷ ⵙⴽⵔⵏ ⵉⵡⴰⵏⴽⵏ ⴷ ⵜⴰⵎⵓⵏⵉⵏ ⵜⵉⴷⵎⵙⴰⵏⵉⵏ ⵜⵉⵙⵔⵜⴰⵢ ⴷ ⵉⵙⵡⵓⴷⴷⵓⵜⵏ ⵍⵍⴰⵏⵉⵏ ⵖ ⵓⵙⴰⵜⵉ ⵏ ⵉⵔⵎⵎⵓⵙⵏ ⴷ ⵉⵏⴰⵡⵏ ⵣⵣⵉⴳⵣⵏⵉⵏ ⴰⵙⵙ ⴰⴷ ⴰⵎ “ⴰⴱⴰⴹ ⴰⵏⴰⵎⵓⵔ” ⴷ “ⵜⵉⵣⵡⵉⵔⵉ ⵜⴰⵏⴰⵎⵓⵔⵜ” ⴷ “ⴰⵙⵙⴷⵖⵔ ⴰⵎⴰⵢⵏⵓ ⵏ ⵉⵙⵙⴰⵔⵓⵜⵏ”, ⴰⵏⴰⵔⵓⵣ ⵏⵏⵖ ⴰⴷ ⵓⵔ ⵢⴰⵡⵉ ⵎⴰⵢⴰ ⴷ ⵉⵡⵜⵜⴰ ⵉⵎⴰⵢⵏⵓⵜⵏ ⴷ ⵉⵙⵡⵓⴷⴷⵓⵜⵏ ⵉⵜⵜⴰⵡⵉⵏ ⴰⴷ ⵉⵇⵇⵏ ⴽⵔⴰ ⴼ ⴽⵔⴰ.

ⵜⴰⵣⵣⵉⴳⵣⵜ ⵏ ⵓⵙⵎⵓⵙⵙⵓ ⵉ ⵜⵎⵙⴰⵔ ⵜⵉⵏⴰⵎⵓⵔⵉⵏ

ⵖ ⵓⵎⵏⴰⴹ ⵏ ⵓⵎⴹⴰⴽⴰⵕ ⴰⴳⵔⴰⵖⵍⴰⵏ ⴼ ⵓⴱⴰⵢⵢⵓⵕ ⴷ ⵉⴷⵔⵉⵣⵏ ⵏⵏⵙ, ⵉⵙⴽⵔ ⵓⵙⵇⵇⵉⵎ ⵏⵏⵖ ⵜⵉⵡⵓⵔⵉⵡⵉⵏ ⵥⵉⵍⵏⵉⵏ ⵖ ⵜⵉⵍⴰⵍ ⵍⵍⵉ ⵙⴽⵔⵏⵜ ⵜⵎⴰⴷⴷⴰⵙⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⴳⵉⵜⵔⴰⵏⵉⵏ, ⵏⵎⵍⴰ ⴷ ⵏⵙⵓⵜⴳ ⵓⵍⴰ ⴷ ⴽⵓ ⵉⴳⵎⴰⵎⵏ ⵢⴰⴹⵏⵉⵏ ⵜⵉⵎⵙⴽⵔⵜ ⵜⴰⵎⵖⵔⵉⴱⵉⵜ ⵖ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ, ⵏⵎⵎⴰⵖ ⴱⴰⵀⵔⴰ ⴰⴷ ⵏⵙⴱⴷⴷ ⴽⵔⴰ ⵏ ⵜⵙⴳⵉⵡⵉⵏ ⵔⴰⵏⵉⵏ ⴰⴷ ⴷⴰⵖ ⵓⵔⵔⵉⵏⵜ ⵙ ⴳⴰⵔ ⵜⵡⵓⵔⵉⵡⵉⵏ ⵏⵏⵙⵏⵜ ⵜⵉⵙⵔⵜⴰⵏⵉⵏ ⵎⴳⴰⵍ ⵏ ⵜⵢⴰⵏⵜ ⵏⵏⵖ ⵜⴰⵏⴰⴽⴰⵍⵜ.

ⵓⵔ ⴰⵖ ⵢⵉⵡⵉ ⵓⵅⵎⵎⴻⵎ ⵖ ⵓⴱⴰⵢⵢⵓⵕ, ⴰⴷ ⵏⵙⵡⵓⵔⵉ ⵖ ⵢⵉⴳⵔ ⵏ ⵜⴷⵉⴱⵍⵓⵎⴰⵙⵉⵜ  ⵜⴰⴱⵕⵍⴰⵎⴰⵏⵉⵜ ⵉ ⵜⵎⵙⴰⵔⵉⵏ ⵏ ⵓⴼⵔⴰ, ⵏⴱⴷⴷ ⴰⴷ ⵉⵣⵣⵉⴳⵣ ⵓⵙⵏⴰⵍ ⵏⵏⵖ ⵉⵙⵎⴷⵏ ⵉ ⵓⵎⴰⴷⴰⵏ ⴰⴼⵉⵍⵉⵙⵟⵉⵏⵉ ⵖ ⵓⵙⴱⴷⴷⵉ ⵏ ⵉⵖⴰⵡⴰⵙⵏ ⵏ ⵜⵏⴱⴰⴹⵉⵏ ⵏ ⵓⵙⴷⵓⵔⵔⵉ ⵏ ⵉⵙⵔⴰⵢⵉⵍ ⵉ ⵓⵙⴽⵛⵎ ⵏ  ⵜⵙⴳⴰ ⵏ ⵍⵓⵕⴷⵓⵏ ⴷ ⵉⴳⵣⵣⵓⵎⵏ ⵉⵎⴰⵢⵏⵓⵜⵏ ⵏ ⴹⴹⵉⴼⴼⴰ ⵏ ⵜⴰⴳⵓⵜ ⵎⴳⴰⵍ ⵏ ⵓⵙⵍⴳⵏ ⴰⴳⵔⴰⵖⵍⴰⵏ ⴷ ⵜⵖⵜⴰⵙⵉⵏ ⵏ ⵜⵍⵍⵓⴳⵏⴰ ⵜⴰⴳⵔⴰⵖⵍⴰⵏⵜ ⴷ ⵜⵉⵔⴰⵜ ⵏ ⵓⴼⵓⴽⴽⵓ ⵏ ⵜⵎⵙⴰⵔⵜ ⵜⴰⴼⵉⵍⵙⵟⵉⵏⵉⵜ.

ⵡⴰⵅⵅⴰ ⵉⵍⵍⴰ ⵓⵎⵏⴰⴹ ⵉⵥⵍⵉⵏ ⵉⵙⴱⴷⴷⵏ ⴰⵎⵓⴷⴷⵓ ⵏⴳⵔ ⵜⵎⵉⵣⴰⵔ ⴰⵛⴽⵓ ⵉⵍⵍⴰ ⵓⴱⴰⵢⵢⵓⵕ, ⵉⵎⵎⴰⵖ ⵓⵙⵇⵇⵉⵎ ⴰⴷ ⵉⴷⵔⵓ ⵖ ⵜⵓⴳⵜ ⵏ ⵉⴳⵔⴰⵡⵏ ⴷ ⵉⵏⵎⵓⵇⵇⴰⵔⵏ ⵉⵙⵉⵏⵔⴰⵏⵏ ⴷ ⵉⴳⵉⵜⵔⴰⵏⵏ ⵙ ⵜⴻⵜⵉⵇⵏⵉⵢⵉⵏ ⵏ ⵓⵎⵢⴰⵡⴰⴹ ⵙ ⵜⵉⴳⴳⵓⴳⵜ. ⵉⵏⵢⴰⵍⴽⴰⵎ ⵓⵙⵇⵇⵉⵎ ⵓⵍⴰ ⴷ ⵜⵓⵜⵔⴰⵡⵉⵏ ⵏ ⴽⵉⴳⴰⵏ ⵏ ⵜⵎⴰⴷⴷⴰⵙⵉⵏ ⴷ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ ⵙ ⵓⴷⵔⴰⵡ ⵏ ⵜⵎⵙⴽⵔⵜ ⵜⴰⵎⵖⵔⵉⴱⵉⵜ ⵖ ⵓⵣⵎⵣ ⵏ ⵓⴱⴰⵢⵢⵓⵕ, ⵢⴰⵡⵙ ⵖ ⵜⵙⵎⵓⵏⴰⵢ ⵏ ⴽⵉⴳⴰⵏ ⵏ ⵜⵎⴰⴷⴷⴰⵙⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⴳⵉⵜⵔⴰⵏⵉⵏ ⴰⵎ ⵜⴰⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⴷ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵉ ⵜⴼⵕⴰⵏⴽⵓⴼⵓⵏⵉⵜ ⴷ ⵓⴱⵕⵍⴰⵎⴰⵏ ⴰⴼⵔⵉⵇⵉ ⴷ ⵓⴱⵕⵍⴰⵎⴰⵏ ⵏ ⵜⵔⴰⴱⴱⵓⵜ ⵏ ⵉⵡⴰⵏⴽⵏ ⵏ ⵍⴰⵏⴹⵉⵥ.

ⵉⵙⵜ ⵎⴰⵙⵙ ⴷ ⵉⴷ ⵎⴰⵙⵙ,

ⵜⵣⵣⵉⴳⵣ ⵙⵓⵍ ⵜⵎⴰⵣⵉⵔⵜ ⵏⵏⵖ ⵖ ⵓⵙⴱⴷⴷⵉ ⵏⵏⵙ ⵏ ⵓⴱⴰⵢⵢⵓⵕ, ⵉⵍⵍⴰ ⵉ ⵎⴰⵢⴰ ⴷ ⵓⵙⵎⵓⵙⵙⵓ ⵏ ⴽⵓ ⵜⵉⵎⵔⵙⴰⵍ ⴷ ⴽⵓ ⵉⴳⵔⴰⵏ ⵖ ⵉⵙⵡⵉⵔⵏ ⴰⴽⴽⵯ. ⴷⴰⵜ ⵏ ⵜⵎⴰⵖⵜ ⵜⴰⴷⵓⵙⴰⵏⵜ ⵎⴳⴰⵍ ⵏ ⵓⴱⴰⵢⵢⵓⵕ , ⵍⵍⴰⵏ ⵉⵎⵙⵡⵓⵔⵉⵢⵏ ⵉⴷⵓⵙⴰⵏⵏ ⴷ ⵡⵉⴷⴰ ⵜⵏ ⵉⵔⵡⴰⵙⵏ, ⵓⵖⵔⵉⵎⵏ ⴷ ⵉⵄⵚⴽⵕⵉⵢⵏ, ⵖ ⵍⵍⴰⵏ ⵉⴹⴱⵉⴱⵏ ⴷ ⵉⴼⵔⵎⵍⵉⵢⵏ ⴷ ⵉⵎⵙⵖⴰⵏⵏ ⵏ ⵡⴰⵔⴰⵢ ⵓⵖⵔⵉⵎ ⵍⵍⵉ ⵙⵜⴰⵀⵍⵍⴰⵏⵉⵏ ⴽⵓ ⴰⵙⵏⵉⵎⵎⵔ ⴷ ⵓⵙⵓⵜⴳ.

ⵖ ⵓⵣⵔⵉⵔⵉⴳ ⴰⵎⵣⵡⴰⵔⵓ, ⵍⵍⴰⵏⵜ ⵓⵍⴰ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵍⵍⵉ ⵉⴱⴷⴷⵏ ⴼ ⵓⵃⵟⵟⵓ ⵏ ⵉⵡⵜⵜⴰ ⵏ ⵜⵎⵓⵔⵜ, ⴰⵙⵙ ⴰⴷ ⴱⴷⴷⵏⵜ ⵓⵍⴰ ⵖ ⵓⵣⵔⵉⵔⵉⴳ ⴰⵎⵣⵡⴰⵔⵓ ⵉ ⵓⵙⵏⴰⵍ ⵏ ⵜⴰⴳⴳⴰⵍⵉⵏ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵖ ⵓⵃⵟⵟⵓ ⵏ ⵉⵍⵓⴳⵏⵏ ⵏ ⵜⴼⴰⵜⵉⵜ. ⵉ ⵜⴰⴳⴳⴰⵍⵉⵏ ⴰⴷ, ⵙ ⵜⵏⴰⵔⴰ ⵏ ⵓⵅⴰⵜⴰⵔ ⵏⵏⵙⵏⵜ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴽⵓ ⴰⵣⵓⵍ ⴷ ⵓⵙⵓⵜⴳ.

ⵖ ⵓⵣⵔⵉⵔⵉⴳ ⴰⵎⵣⵡⴰⵔⵓ ⴱⴷⴷⵏ ⵓⵍⴰ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⵏ ⵜⵏⴱⴰⴹⵜ ⴷ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵜⵊⴹⵕⵎⵜ ⵜⴰⴳⵍⴷⴰⵏⵜ ⴷ ⵜⴰⴳⴳⴰⵍⵉⵏ ⵏ ⵜⵡⵉⵙⵉ ⵍⵍⵉ ⵙⴼⴰⵙⴽⴰⵏⵉⵏ ⵉ ⵓⵃⵟⵟⵓ ⵏ ⵜⵏⴼⵔⵓⵜ ⴷ ⵜⵙⵏⵙⵉ ⵏ ⵉⵍⵓⴳⵏⵏ ⵏ ⵜⴼⴰⵜⵉⵜ.

ⵖ ⵉⵣⵔⵉⵔⵉⴳⵏ ⵉⵎⴳⴳⵓⵔⴰ, ⵜⵍⵍⴰ ⵜⵉⵍⴰⵍⵜ ⴷⴰⵔ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⵏ ⵓⵙⵙⵍⵎⴷ ⵍⵍⵉ ⵙⵜⴰⵀⵍⵍⴰⵏⵉⵏ ⴰⵙⵓⵜⴳ, ⵍⵍⵉⵖ ⴹⵎⵏⵏ ⵜⴰⵣⵣⵉⴳⵣⵜ ⵏ ⵜⵡⵓⵔⵉ ⵏ ⵓⵙⵙⵍⵎⴷ ⵖ ⵓⵣⵎⵣ ⵏ ⵓⵥⵍⴰⵢ ⴰⴷⵓⵙⴰⵏ. ⵖⵎⴽ ⵍⵍⵉ ⴱⴷⴷⵏ ⵉⵙⴱⴱⴰⴱⵏ ⴷ ⵉⴼⵍⵍⴰⵃⵏ ⵃⵎⴰ ⴰⴷ ⵢⵉⵍⵉ ⵓⵙⴳⴼⴰⵔ ⵏ ⵓⴳⴰⴷⴰⵣ.

ⵖ ⵓⵣⵎⵣ ⴰⴷ ⵉⵥⵍⵉⵏ, ⵓⵔ ⵔⴰⴷ ⵜⵜⵓⵖ ⴰⴷ ⵙⵓⵜⴳⵖ ⴱⴰⵀⵔⴰ ⵜⵓⴳⴳⴰⵙ ⵛⵇⵇⴰⵏⵉⵏ ⵍⵍⵉ ⵙⴽⴰⵔⵏ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⵙⵡⵓⵔⵉⵏⵉⵏ ⵖ ⵢⵉⴳⵔ ⵏ ⵜⵖⵓⵙⵉ ⴷ ⵜⵎⵙⵓⵜⵍⵉⵏ ⴷ ⵉⵎⵏⴰⴹⵏ ⵛⴷⴷⴰⵏⵉⵏ ⴰⵙⵉⵏ ⴽⵉⴳⴰⵏ ⵏ ⵓⵥⴰⵥⵓⵢ ⵖ ⵜⵎⵙⵓⵜⵍⵜ ⵉⵛⴷⴷⴰⵏ.

ⵖ ⵜⴳⵉⵔⴰ, ⵉⴳⴰ ⵢⵢⵉ ⴰⴷⴷⵓⵔ ⴰⴷ ⵙⵓⵜⴳⵖ ⴰⵎⴰⵢⴰⵡⴰⵙ ⵍⵍⵉ ⵙⴽⵔⵏⵜ ⴽⵓ ⵜⵉⵎⵔⵙⴰⵍ, ⵙⵏⵉⵎⵎⵔⵖ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴷ ⵎⴰⵙⵙ ⴰⵎⴰⵡⵙⴰⵙ ⵏ ⵓⵡⴰⵏⴽ ⵉⵜⵜⵓⵙⵎⴰⴳⴰⵍⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵣⴷⴰⵢⵉⵏ ⴷ ⵓⴱⵕⵍⴰⵎⴰⵏ ⴷ ⴽⵓ ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⴰⵡⵙⴰⵙⵏ ⴼ ⵜⵡⵓⵔⵉⵡⵉⵏ ⵏⵏⵙⵏ ⵏ ⵜⵡⵉⵙⵉ ⴷ ⵓⵏⵢⴰⵍⴽⴰⵎ ⵏⵏⵙⵏ ⴷ ⵜⵙⵏⵜⴰⵢⵉⵏ ⴷ ⵉⵙⵇⵙⵉⵜⵏ ⵏ ⵓⵙⵇⵇⵉⵎ ⴷ ⵜⵙⵓⵎⵔⵉⵏ ⵏⵏⵙ, ⴰⵢⵍⵍⵉ ⵉⴳⴰⵏ ⴰⴷⵙⵍⴰⵏ ⵃⵎⴰ ⴰⴷ ⵜⵉⵍⵉ ⵜⵢⴰⴼⵓⵜ ⵏ ⵜⵙⵓⵜⵍⵜ ⴰⴷ ⵖ ⵓⵙⵡⵉⵔ ⵏ ⵜⵏⴰⵥⴰⵕⵉⵏ ⵍⵍⴰⵏⵉⵏ ⵖ ⵜⵎⴰⵣⵉⵔⵜ ⵏⵏⵖ. ⵖⵎⴽ ⵍⵍⵉ ⵙⵓⵜⴳⵖ ⵜⴰⵡⵓⵔⵉ ⵏ ⵉⵏⴳⵎⴰⵎⵏ ⵏ ⵓⵙⵇⵇⵉⵎ ⴷ ⵉⴳⵎⴰⵎⴰⵏ ⵏⵏⵙ ⴷ ⵉⵎⵙⵖⴰⵏⵏ ⴷ ⵜⵎⵙⵖⴰⵏⵉⵏ ⵏⵏⵙ ⴷ ⴽⵓ ⵎⴰ ⴷ ⵉⴱⴷⴷⵏ ⴼ ⵜⵏⴼⵔⵓⵜ ⵏ ⵜⵎⵔⵙⵍⵜ ⵖ ⵍⵍⴰⵏⵜ ⵜⴰⴳⴳⴰⵍⵉⵏ ⵜⵉⴳⵍⴷⴰⵏⵉⵏ ⴷ ⵜⵎⵙⵙⵓⴳⵓⵔⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵉⴳⵏⵙⴰⵙⵏ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⴹⴼⵕⵏⵉⵏ ⵜⵉⵡⵓⵔⵉⵡⵉⵏ ⵏⵏⵖ.

ⵏⵙⵡⵓⵔⵉ ⵖ ⵜⵙⵓⵜⵍⵜ ⴰⴷ ⵖ ⵢⴰⵏ ⵓⵎⵏⴰⴹ ⵉⵥⵍⵉⵏ, ⵎⴰⵛⵛ ⵏⴱⴷⴷ ⴰⴷ ⵢⵉⵍⵉ ⵓⵡⵇⵇⵔ ⵏ ⵓⴷⵓⵙⵜⵓⵔ. ⵏⴱⴷⴷ ⵖ ⵜⵏⵙⵙⵉⵅⴼⵜ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⴰⴷ ⵢⵉⵍⵉ ⵓⵙⵓⵜⴳ ⵏ ⵜⵎⵙⴽⴰⵔ ⴷ ⵓⵙⴽⵙⵍ ⴷ ⵜⵎⵙⵓⵜⵍⵉⵏ ⵏ ⵓⴱⴰⵢⵢⵓⵕ ⵎⴽ ⵍⵍⵉ ⵏⵉⵜ ⵉⵍⵍⴰⵏ ⵖ ⵜⵣⵔⴰⵡⵜ « ⵜⵉⵖⵔⵉ ⴷ ⵓⵙⴼⵙⵉ ⵏ ⵜⵉⵍⴰⵍⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵓⵣⵎⵣ ⵏ ⵉⵖⴰⵡⴰⵍⵏ ⵉⴷⵓⵙⴰⵏⵏ » ⵍⵍⵉ ⵉⵙⵓⵊⴰⴷ ⵡⴰⵎⵎⴰⵙ ⴰⴱⵕⵍⴰⵎⴰⵏⵉ ⵉ ⵉⵔⵣⵣⵓⵜⵏ ⴷ ⵜⵖⵓⵔⵉⵡⵉⵏ ⵍⵍⵉ ⵔⴰⴷ ⴰⵡⵏ ⵜⴻⵜⵜⴱⴹⵓ, ⵍⵍⵉ ⵉⴳⴰⵏ ⴰⴳⵣⵣⵓⵎ ⵏ ⵜⵢⴰⴼⵓⵜ ⵜⴰⵎⵣⵡⴰⵔⵓⵜ ⵍⵍⵉ ⵉⵙⴽⵔ ⵡⴰⵎⵎⴰⵙ ⴰⴷ ⵖ ⵍⵍⴰⵏⵜ ⵜⵣⵔⴰⵡⵉⵏ ⴷ ⵉⵎⴰⵏⴰⵔⵏ ⵏ ⵜⵡⵓⵔⵉ ⵍⵍⵉ ⵔⴰⴷ ⴷⴰⵔⵓⵏ ⵢⵉⵍⵉ ⵜⵉⵣⵉ ⵏⵏⴰ ⵜⵏ ⵜⵣⵣⵔⵉ ⵜⵏⵙⵙⵉⵅⴼⵜ ⴷ ⵓⵙⵉⵔⴰ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵉⵚⴰⵃⴰ ⴰⵖ ⵓⵎⵏⵉⴷ ⵏ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⴷ ⵉⴷⵔⵉⵣⵏ ⵏⵏⵙ, ⵎⴰⵛⵛ ⵉⵎⵉⵣⵉ ⵉⵍⵍⴰ ⵓⴽⴰⵏ ⵙⵓⵍ, ⵉⵇⵇⴰⵏ ⴷ ⴰⴷ ⵉⵙⴽⴰⵔ ⴽⵓ ⵢⴰⵏ ⵙ ⵜⴼⴰⴷⵉⵡⵉⵏ ⵍⵍⵉ ⵙⵔⵙⵏⵜ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵖ ⵓⵎⵏⴰⴹ ⵏ ⵓⵙⴰⵍⵉ ⴰⵎⵙⴹⴼⵓⵕ ⵏ ⵓⵥⵍⴰⵢ ⴰⴷⵓⵙⴰⵏ ⴷ ⵓⵖⵓⵍ ⵏ ⵜⵉⵍⴰⵍⵜ ⵜⴰⴷⵎⵙⴰⵏⵜ. ⵉⴳⴰ ⴱⴷⴷⴰ ⵡⴰⵡⵜⵜⴰⵙ ⴰⴷ ⵜⵚⵉⵃⵉ ⵜⴰⵎⴰⵖⵜ ⵉ ⵜⵎⴰⵣⵉⵔⵜ ⵏⵏⵖ ⵎⴳⴰⵍ ⵏ ⵓⴱⴰⵢⵢⵓⵕ, ⵖ ⴽⵓ ⵉⵙⵡⵉⵔⵏ, ⵃⵎⴰ ⴰⴷ ⵜⵣⵣⵉⴳⵣ ⵖ ⵜⴳⵎⵉ ⵏⵏⵙ ⴷ ⵜⵣⵣⵉⴳⵣⵜ ⵏⵏⵙ ⴷ ⵓⵙⴷⵓⵙ ⵏ ⵜⵎⵔⵙⴰⵍ ⵏⵏⵙ ⴷ ⵓⵚⴽⵓ ⵏⵏⵙ ⴰⴷⵉⵎⵓⴽⵔⴰⵟⵉ, ⵉⵚⵉⵃⵉ ⴰⵙ ⵓⵎⵏⵉⴷ ⵏ ⵓⵙⵎⵖⵔ ⵜⴱⴷⴷ ⵜⴳ ⵜⴰⴷⵓⵙⵉ ⵎⵇⵓⵔⵏ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵙ ⵜⵎⵍⴷⴰ ⵏ ⵓⴽⵜⵓⵢ ⵡⵉⵙ ⵙⵉⵏ ⵉⴷ ⵎⵔⴰⵡ ⴷ ⵢⴰⵏ ⵖ ⵉⵍⵍⴰ ⵖ ⵓⴷⴰⴱⵓ ⵏ ⵉⵎⵣⵡⵓⵔⴰ ⵏⵏⵙ ⵉⴷ ⴱⴰⴱ ⵏ ⵡⴰⴷⴷⵓⵔ, ⴰⵔ ⴷⴰⵖ ⵏⵙⵎⴰⵢⵏⵓ ⵜⵉⵎⵉⵜⴰⵔ ⵏ ⵓⵙⵓⴼⵓ, ⵏⵜⵜⵔ ⵖ ⵕⴱⴱⵉ ⴰⴷ ⵉⵃⴼⴹ ⴱⴰⴱ ⵏ ⵡⴰⴷⴷⵓⵔ, ⵉⴷⵓⵎ ⴼⵍⵍⴰⵙ ⵜⴰⴷⵓⵙⵉ  ⴷ ⵏⵜⵜⴰⵏ ⵉⵍⵍⴰ ⵖ ⵜⵏⴰⵔⴰ ⵏ ⵜⴳⵍⴷⵉⵜ ⵙ ⴽⵉⴳⴰⵏ ⵏ ⵍⵄⵣⵣ ⴷ ⵓⵙⵙⵎⵖⵔ ⴷ ⵜⵓⴷⵔⵜ ⵉⵥⵉⵍⵏ ⴷ ⵜⵣⵣⵉⴳⵣⵜ ⴷ ⵓⵙⴷⵓⵙ ⵏ ⵓⴷⵖⴰⵔ ⵍⵍⵉ ⵜⵙⵜⴰⵀⵍⵍⴰ ⵖ ⵉⵙⵡⵉⵔⵏ ⴰⵏⵎⵏⴰⴹ ⴷ ⵓⵏⵎⵏⵥⴰⵡ ⴷ ⵓⴳⵔⴰⵖⵍⴰⵏ.

ⴰⵔ ⴽⵏ ⵙⵏⵉⵎⵎⵉⵔⵖ ⴼ ⵓⴷⵡⴰⵍ ⵏⵏⵓⵏ