ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴰⵙⵉⵡⴹ ⴼ ⵜⵙⵎⵓⵏⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, 20 ⵉⴱⵔⵉⵔ 2020
ⵉⵙⵏⵎⴰⵍⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵜⴰⵙⵎⵓⵏⵉ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⵙⵙ ⵏ ⵡⴰⵢⵏⴰⵙ 20 ⵉⴱⵔⵉⵔ 2020, ⵜⵥⵍⵉ ⵉ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ ⵖ ⵓⵣⵣⵔⴰⴼ ⴷ ⵜⵉⴹⴰⴼ.
ⵖ ⵜⵣⵡⵉⵔⵉ, ⵉⴼⴽⴰ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵣⴳⵣⵍ ⴼ ⵜⵓⵡⵔⵉ ⵏ ⵓⵙⵇⵇⵉⵎ ⵖ ⵓⵙⵡⵉⵔ ⵏ ⵜⵡⵓⵔⵉⵡⵉⵏ ⵏ ⵜⵙⵇⵇⵉⵎⵉⵏ, ⵉⴼⴽ ⵓⵍⴰ ⵉⵙⵉⵙⴼⵉⵡⵏ ⴼ ⵎⴰⴷ ⵉⵙⴽⵔ ⵓⵙⵇⵇⵉⵎ ⵖ ⵓⵎⵏⵉⴷ ⵏ ⵓⵏⵢⴰⵍⴽⴰⵎ ⴷ ⵜⵙⵏⵜⴰⵢⵜ ⵜⴰⴳⵍⴷⴰⵏⵜ ⵜⴰⵎⴰⵜⵜⵓⵢⵜ ⵉⵡⴰⵜⵜⵙⵏ ⴰⵙⵕⵚⵓ ⵏ ⵓⵙⴰⵜⵉ ⴰⵙⵉⴽⵔⴰⵏ ⵏ ⵓⴹⴼⵕ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⵖ ⵜⴼⵔⴽⵉⵡⵉⵏ ⵏ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ.
ⵍⵍⵉⵖ ⵉⵙⴰⵡⵍ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴼ ⵉⵡⵜⵜⴰⵙⵏ ⵥⵉⵍⵏⵉⵏ ⵏ ⵜⵙⵏⵜⴰⵢⵜ ⵜⴰⴳⵍⴷⴰⵏⵜ ⵜⴰⵎⴰⵜⵜⵓⵢⵜ, ⵍⵍⵉ ⵉⵡⴰⵜⵜⵙⵏ ⴰⴷⵔⴰⵡ ⵏ ⵜⵉⵔⵎⵉⵜⵉⵏ ⴷ ⵓⵙⴽⴰⵔ ⵏ ⵜⵏⴼⵔⵓⵜ ⵜⴰⴷⴰⵡⵙⴰⵏⵜ ⴷ ⵜⵏⴼⴳⴰⵏⵜ ⵢⴰⵎⴰⵏ, ⵉⵎⵍⴰ ⵉ ⴽⵓ ⵉⴳⵎⴰⵎⵏ ⵜⴰⵙⵏⵜⴰⵢⵜ ⵜⴰⴱⵕⵍⴰⵎⴰⵏⵉⵜ ⵖ ⵉⵍⵍⴰ ⵓⵙⴷⵔⵓ ⵏ ⵜⵎⴰⴷⴷⴰⵙⵉⵏ ⵜⵉⵙⴳⴰⵡⴰⵏⵉⵏ ⴷ ⵜⵎⵏⵥⴰⵡⵉⵏ ⵙⵍⴰⵡⵏ ⴰⴽⴽⵯ ⵜⴰⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴼⵕⴰⵏⴽⵓⴼⵓⵏⵉⵜ ⴷ ⵓⴱⵕⵍⴰⵎⴰⵏ ⵏ ⴽⵓ ⵉⴼⵔⵉⵇⵢⴰ ⴷ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴼⵔⵉⵇⵉⵜ ⵃⵎⴰ ⴰⴷ ⵢⵉⵍⵉ ⵉⵎⵔⵙⵉ ⵏ ⵓⵙⵡⵓⴷⴷⵓ ⵏ ⵉⵎⵉⵣⵉⵢⵏ ⵏ ⵓⴱⴰⵢⵢⵓⵕ ⵖ ⵉⵙⵡⵉⵔⵏ ⴰⴷⴰⵡⵙⴰⵏ ⴷ ⵓⵏⴰⵎⵓⵏ ⴷ ⵓⴷⵎⵙⴰⵏ ⵖ ⵉⵎⵔⵙⵉⵡⵏ ⴼ ⵔⴰⴷ ⵢⵉⵍⵉ ⵓⵎⴹⴰⴽⴰⵕ ⵖ ⵜⵙⵎⵓⵏⴰⵢ ⵍⵍⵉ ⴷ ⵢⵓⵛⴽⴰⵏ.
ⵖⵎⴽ ⵍⵍⵉ ⵉⵍⵍⴰ ⵓⵎⴹⴰⴽⴰⵕ ⴼ ⵓⵣⵣⵔⴰⴼ ⵉⵥⵍⵉⵏ ⵙ ⵓⵏⴳⵔⴰⵡ ⴰⴷⴰⵡⵙⴰⵏ ⴷ ⵓⵙⵙⵎⵖⵔ ⵏⵏⵙ ⵍⵍⵉ ⵔⴰⴷ ⵉⵙⴽⵔ ⵉⵡⵜⵜⴰⵙⵏ ⵏ ⵜⵙⵜⵔⴰⵜⵉⵊⵉⵜ ⵜⴰⴷⴰⵡⵙⴰⵏⵜ, ⵢⵉⵍⵉ ⵖⵉ ⴷ ⵓⵙⵓⵜⴳ ⵏ ⵜⵉⵍⴰⵍ ⴷ ⵉⵙⴼⴰⵙⴽⴰⵜⵏ ⵏ ⵢⵉⴳⵔ ⴰⴷⴰⵡⴰⵙⵏ ⵖ ⵜⵎⵙⵓⵜⵍⵉⵏ ⴰⴷ ⵖ ⵜⵍⵍⴰ ⵜⵎⴰⵣⵉⵔⵜ ⵏⵏⵖ. ⵢⵉⵍⵉ ⵓⵎⵛⴰⵛⴽⴰ ⴰⴷ ⵜⵜⵓⵙⴽⵉⵔ ⵢⴰⵜ ⵜⵙⵇⵇⵉⵎⵜ ⵜⴰⵙⴳⵓⵎⴰⵏⵜ ⵍⵍⵉ ⵔⴰⴷ ⵉⵙⴽⵔ ⵜⵉⵖⵓⵔⵉⵡⵉⵏ ⴷ ⵜⵙⵓⵎⴰⵔ ⵍⵍⵉ ⵔⴰⴷ ⵢⴰⵡⵙ ⵖ ⵓⵙⵙⵎⵖⵔ ⵏ ⵡⴰⵢⴷⴰ ⴰⵣⵣⵔⴰⴼ ⵖ ⵉⵎⵏⵉⴷⵏ ⵉⵣⵣⵓⵍⴰⵏⵏ ⵉⵎⵔⵙⵍⴰⵏⵏ.
ⵖ ⵉⵎⵔⵙⵉ ⵏ ⵓⵎⵙⴰⵡⴰⴹ ⴷ ⵓⵎⵏⵉⴷ ⴰⵎⴰⵜⴰⵢ ⴰⵏⴰⵎⵓⵔ, ⵉⵙⵙⴽⵜⵉ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙ ⴷ ⴼⵍⵏⵜ ⵜⵙⵎⵓⵏⴰⵢ ⵍⵍⵉ ⵙⴽⵔⵏⵜ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵖ ⵜⵉⵣⵉ ⴰⴷ ⵉⴳⴳⵓⵔⴰⵏ, ⵜⴰⵖⵍⴰⵖⴰⵍⵜ ⵉⵥⵉⵍⵏ ⴷⴰⵔ ⵓⵎⵏⵉⴷ ⴰⵎⴰⵜⴰⵢ ⴰⵏⴰⵎⵓⵔ, ⵙⴽⵔⵏⵜ ⵢⴰⵏ ⵓⴹⴼⵕ ⵙⵇⵇⵉⵇⵏ ⵉ ⵜⵓⴳⴳⴰⵙ ⵏ ⵜⵎⵔⵙⵍⵜ ⵖ ⵓⵙⵏⵖⵍ ⴷ ⵓⵎⵣⴰⵖ ⵏ ⵉⵅⵎⵎⵉⵎⵏ ⵏ ⵉⵏⵎⵓⵔⴰ.
ⵉⴼⴽⴰ ⵓⵏⵙⵙⵉⵅⴼ ⵢⴰⵜ ⵜⵙⵓⵎⵔⵜ ⵉⵡⴰⵜⵜⵙⵏ ⴰⵙⵙⴷⵓⵙ ⵏ ⵓⵎⵙⴰⵡⴰⴹ ⴰⴷ, ⴰⴷ ⵜⵜⵓⵙⴽⵉⵔ ⵢⴰⵜ ⵜⴷⴰⴱⵓⵜ ⵉⵥⵍⵉⵏ ⵙ ⵜⵓⵜⵔⴰⵡⵉⵏ ⴷ ⵜⵙⵓⵎⴰⵔ ⴷ ⵜⴰⵏⵏⴰⵢⵉⵏ ⵏ ⵉⵏⵎⵓⵔⴰ ⵙ ⴽⵓ ⵜⴰⴷⵔⴼⵉⵜ ⴷ ⵜⵎⴰⵙⴰⵢⵜ, ⵢⵉⵍⵉ ⵎⴰⵢⴰ ⴷ ⴷⴰⵔ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⵃⵎⴰ ⴰⴷ ⵙⵔⵙⵏⵜ ⵙⵡⵓⵔⵉⵏ ⵙ ⵜⵥⵍⴰⵢⵉⵏ ⵜⵉⴷⵙⵜⴰⵔⵉⵏ ⵍⵍⵉ ⵙⴽⴰⵔⵏ ⵖ ⵉⴳⵔⴰⵏ ⵏ ⵜⵉⴹⴰⴼ ⴷ ⵓⵣⵣⵔⴰⴼ ⴷ ⵓⵣⵣⵔⴰⵢ ⵏ ⵉⵖⴰⵡⴰⵙⵏ ⴷ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ.
ⵖ ⵉⵎⵔⵙⵉ ⵏ ⵜⵉⴹⴰⴼ ⵜⴰⵏⵎⵍⴰⵙⵙⵜ, ⵉⵍⵍⴰ ⵓⵎⵛⴰⵛⴽⴰ ⴰⴷ ⵜⵉⵍⵉ ⵜⵖⵉⵎⵉⵜ ⵏ ⵡⴰⵢⵏⴰⵙ 27 ⵉⴱⵔⵉⵔ 2020 ⵉⵥⵍⵉⵏ ⵉ ⵉⵙⵇⵙⵉⵜⵏ ⵉⵎⵉⵡⴰⵏⵏ ⴼ ⵓⵙⵓⵔⵙ ⴰⴷⵎⵙⴰⵏ ⴷ ⵓⵥⵕⴼⴰⵏ, ⵔⴰⴷ ⵜⵣⵔⵉ ⴰⵎ ⵜⵉⵖⵉⵎⵉⵜ ⵉⴳⴳⵓⵔⴰⵏ, ⴰⴷ ⵉⵍⵉⵏ ⵉⵙⵇⵙⵉⵜⵏ ⵍⵍⵉ ⴷ ⵉⴹⴼⵕ ⵓⵎⴹⴰⴽⴰⵕ, ⵔⴰⴷ ⵉⵙⵔⵙ ⵓⵙⵉⵔⴰ ⵏ ⵓⵙⵇⵇⵉⵎ ⴰⵖⴰⵡⴰⵙ ⵓⵙⵎⵉⴷ ⵏ ⵜⵡⵓⵔⵉ.
ⵜⴱⴷⴷ ⵜⵙⵎⵓⵏⵉ ⵓⵍⴰ ⴼ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴷ ⵜⵙⵓⵎⴰⵔ, ⵢⵉⵍⵉ ⵓⵎⵛⴰⵛⴽⴰ ⴰⴷ ⵜⵉⵍⵉ ⵢⴰⵜ ⵜⵖⵉⵎⵉⵜ ⵜⵓⵙⵎⵉⴷⵜ ⴰⵙⵙ ⵏ ⵓⵙⵉⵏⴰⵙ 21 ⵉⴱⵔⵉⵔ ⵉ ⵜⵖⵔⵉ ⴷ ⵓⵙⵜⴰⵢ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵉⵣⴷⵉⵏ ⴷ ⵓⵙⵔⵙ ⵏ ⵉⵙⵡⵓⴷⴷⵓⵜⵏ ⵥⵍⵉⵏⵉⵏ ⵉ ⵉⴷ ⴱⴰⴱ ⵏ ⵜⵡⵓⵔⵉ ⵉⵎⵍⵜⴰⵖⵏ ⵖ ⵓⴼⵏⵉⵇ ⴰⵏⴰⵎⵓⵔ ⵏ ⵜⵏⴼⵔⵓⵜ ⵜⴰⵏⴰⵎⵓⵏⵜ ⴷ ⵉⵅⴷⴷⴰⵎⵏ ⵏⵏⵙⵏ ⵉⵜⵜⵓⵣⵎⵎⴰⵎⵏ, ⵍⵍⵉ ⵉⵜⵜⵓⴹⵕⵕⴰⵏ ⵖ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⴽⵓⴼⵉⴷ 19.
ⵙⴰⵡⵍⵏ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⴷ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴼ ⵜⵙⵏⵜⴰⵢⵉⵏ ⵍⵍⵉ ⴼⴽⴰⵏ ⵖ ⵓⵙⵡⵉⵔ ⵏ ⵜⵙⵓⵎⴰⵔ ⵏ ⵉⵙⵍⴳⵏⵏ ⵍⵍⵉ ⵉⵍⵍⴰⵏ ⴼ ⴽⵓ ⵜⵎⵙⴰⵔⵉⵏ ⵍⵍⵉ ⴷ ⵉⵡⵉⵏⵜ ⵜⵎⵙⵓⵜⵍⵉⵏ ⴰⴷ ⵜⵉⴷⴰⵡⵙⴰⵏⵉⵏ ⴷ ⵜⵏⴰⵎⵓⵏⵉⵏ ⴷ ⵜⵣⵣⵔⴰⴼⵉⵏ ⵉⵍⵍⴰⵏ ⵖ ⵜⵎⴰⵣⵉⵔⵜ ⵏⵏⵖ.