ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴳ ⵉⵎⴹⴰⴽⴰⵕⵏ ⵏⵏⵙ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ...ⵉⵙⵓⵜⴳ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵜⴰⵎⴷⵏⴰⵏⵜ ⵏ ⵛⵛⵉⵏⵡⴰ ⵜⵉⵣⵡⵉⵔⵉ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴳ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19
ⵉⵙⴽⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⴽⵕⴰⵙ 7 ⵉⴱⵔⵉⵔ 2021, ⵙ ⵓⴼⵉⵣⵢⵓⴽⵓⵏⴼⵉⵕⵓⵏⵚ ⵉⵎⴹⴰⴽⴰⵕⵏ ⴷ ⵎⴰⵙⵙ Li Zhanshu ⴰⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵜⴰⵎⴷⵏⴰⵏⵜ ⵏ ⵛⵛⵉⵏⵡⴰ, ⴼ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⴷ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⴷ ⵉⵎⵔⵙⵉⵡⵏ ⵛⵛⴰⵔⵏⵉⵏ.
ⴳ ⵓⵏⵎⵓⵇⴰⵔ ⴰⴷ, ⵙⵓⵜⴳⵏ ⵉⵎⵙⵜⴳⴳⴰⵔⵏ ⵜⴰⴷⵉⵏⴰⵎⵉⵜ ⵏ ⵓⵎⵢⴰⵡⴰⵙ ⴰⵎⵖⵔⵉⴱⵉ-ⴰⵛⵉⵏⵡⵉ ⵙⴳ ⴰⵔⵣⴰⴼ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵛⵛⵉⵏⵡⴰ ⴳ 2016 ⴷ ⵓⵣⵎⵎⴻⵎ ⵏ ⵜⵎⵢⴰⵇⵇⴰⵏⵜ ⵏ ⵜⵎⴰⴷⵔⴰⵡⵜ ⵜⴰⵙⵜⵔⴰⵜⵉⵊⵉⵜ ⵊⴰⵔ ⵙⵏⴰⵜ ⵜⵎⵉⵣⴰⵔ, “ⵉⵣⵣⵉⴳⵣ ⵓⵎⵢⴰⵡⴰⵙ ⴰⵙⵉⵏⵔⴰⵏ ⴳ ⵉⴳⵔ ⴰⴷⵎⵙⴰⵏ ⴷ ⵓⵏⵙⴱⴰⴱ ⴷ ⵉⴳⵔⴰⵏ ⵢⴰⴹⵏⵉⵏ”.
ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵜⴰⵎⴷⵏⴰⵏⵜ ⵏ ⵛⵛⵉⵏⵡⴰ ⵎⴰⵙ ⴷ ⴰⵏⵢⴰⵍⴽⴰⵎ ⵏ ⵜⵜⵉⵍⵉⴼⵓⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴷ ⵓⵏⵙⵙⵉⵅⴼ ⵏ ⵜⴳⴷⵓⴷⴰⵏⵜ ⵜⴰⵎⴷⵏⴰⵏⵜ ⵏ ⵛⵛⵉⵏⵡⴰ ⵎⴰⵙⵙ “ⵛⵉ ⵊⵉⵏⴱⵉⵏⵖ” ⴳ ⵖⵓⵛⵜ ⵉⵣⵔⵉⵏ, ⵉⴼⴽⴰ ⵓⵏⴼⵓⵙ ⴰⵎⴰⵢⵏⵓ ⵉ ⵜⵎⴷⵔⴰⵡⵜ ⵊⴰⵔ ⵙⵏⴰⵜ ⵜⵎⵉⵣⴰⵔ ⴳ ⵓⵙⴱⴷⴷⵉ ⵏ ⴽⵓⴼⵉⴷ 19, ⵢⵉⵏⵉ ⵎⴰⵙ ⵜⴼⴽⴰ ⵜⵎⴰⵣⵉⵔⵜ ⵏⵏⵙ ⵉ ⵜⴳⵍⴷⵉⵜ ⵉⴳⵣⵣⴰⵢⵏ ⵎⴳⴰⵍ ⵏ ⵓⴼⵉⵔⵓⵙ ⵏ ⴽⵓⴼⵉⴷ 19, ⵔⴰⴷ ⵜⴼⴽ ⵉ ⵜⴳⵍⴷⵉⵜ 10 ⵉⴷ ⵎⵍⵢⵓⵏ ⵏ ⵉⴳⵣⵣⴰⵢⵏ ⴳ ⵉⴱⵔⵉⵔ ⴷ ⵎⴰⵢⵢⵓ ⵏ ⵓⵙⴳⴳⵯⴰⵙ ⴰⴷ, ⵉⵙⵓⵜⴳ ⵜⵉⵣⵡⵉⵔⵉ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴷ ⵜⵢⴰⴼⵓⵜⵉⵏ ⴼⴰⵡⵏⵉⵏ ⵏ ⵍⵎⵖⵔⵉⴱ ⴳ ⵓⵙⴱⴷⴷⵉ ⵏ ⵓⴱⴰⵢⵢⵓⵕ.
ⴳ ⵓⵎⵏⵉⴷ ⵏⵏⵙ, ⵉⵣⵎⵎⵉⵎ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⴷ ⴰⵙⵓⵔⵙ ⵏ ⵓⴱⵢⵢⵓⵕ ⴳ ⵉⵣⵣⵔⴰⵢ ⵓⵎⴰⴹⴰⵍ ⵉⴳⴰ ⵜⴰⵎⵍⴷⴰ ⵏ ⵓⵙⴷⴷⵉⴷ ⴼ ⵜⵉⵕⵡⵉ ⵏ ⵓⵎⵢⴰⵡⴰⵙ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵉⵙⴰⵡⵍ ⴼ ⵓⵖⴰⵡⴰⵙ ⴰⵎⵣⵡⴰⵔⵓ ⵏ ⵍⵎⵖⵔⵉⴱ ⵙ ⵓⵙⵡⵓⵔⵉ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ, ⵉⴱⴷⵔ ⴰⵙⵓⵜⴳ ⵏⵏⵙ ⵉ ⵓⵙⵏⴰⵍ ⵏ ⵛⵛⵉⵏⵡⴰ ⵉ ⵍⵎⵖⵔⵉⴱ ⴷ ⵉⵡⴰⵏⴽⵏ ⵢⴰⴹⵏⵉⵏ ⵏ ⵉⴼⵔⵉⵇⵢⴰ ⴳ ⵓⴱⴰⵔⴰⵣ ⴰⴷ. ⵉⵙⵉⵙⴼⵉⵡ ⵎⴰⵙ ⴷ ⴰⵙⵏⴼⴰⵔ ⵏ ⵓⵙⴽⵔ ⵏ ⵜⵎⵙⵙⵓⵔⵜ ⵜⴰⵛⵉⵏⵡⵓⵜ-ⵜⴰⵎⵖⵔⵉⴱⵉⵜ ⵉ ⵓⴼⴰⵔⵙ ⵏ ⵉⴳⵣⵣⴰⵢⵏ ⵉⴳⴰ ⵡⴰⴷ ⵉⵙⵜⴰⵡⵀⵎⵎⴰⵏ, ⵔⴰⴷ ⵉⵍⵉⵏ ⵉⴳⵣⵣⴰⵢⵏ ⴰⴷ ⵉ ⵚⴰⵃⴰ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ “ⴰⵢⵍⵍⵉ ⵔⴰⴷ ⵢⴰⵡⵙ ⵉ ⵉⴼⵔⵉⵇⵢⴰ ⴰⴷ ⵜⵣⵣⵔⵉ ⴳⴰⵔ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⴳ ⵎⴰ ⵏⵏ ⵓⵔ ⵢⴰⴳⴳⵓⴳⵏ”.
ⴳ ⵓⵙⵡⵉⵔ ⴰⴱⵕⵍⴰⵎⴰⵏⵉ, ⵎⵛⴰⵛⴽⴰⵏ ⴷ ⵙⵉⵏ ⵉⵎⵙⵜⴳⴳⴰⵔⵏ ⴼ ⵓⵣⵎⵎⴻⵎ ⵏ ⵜⵎⵢⴰⵇⵇⴰⵏⵜ ⵏ ⵓⵎⵢⴰⵡⴰⵙ ⵊⴰⵔ ⵜⵉⵎⵔⵙⴰⵍ ⵜⵉⵣⵣⵔⴰⴼⵉⵏ, ⴷ ⵓⵙⵏⴼⵍ ⵏ ⵉⵔⵣⴰⴼⵏ ⴷ ⵜⵎⵓⵣⴰⵢⵉⵏ, ⴷ ⵓⵙⵡⵓⵔⵉ ⵏ ⵜⵔⵓⴱⴱⴰ ⵏ ⵜⴷⴷⵓⴽⴽⵍⴰ ⵜⴰⴱⵕⵍⴰⵎⵏⵉⵜ, ⴷ ⵓⵣⴷⴷⵓⵢ ⴷ ⵓⵎⵛⴰⵡⴰⵕ ⵉⵙⵓⵍⵏ ⴳ ⵉⵎⵓⵙⵙⵓⵜⵏ ⵉⴱⵕⵍⴰⵎⴰⵏⵉⵢⵏ ⵉⴳⵔⴰⵖⵍⴰⵏⵏ. ⵉⴼⴽ ⵎⴰⵙⵙ ⴰⵏⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵜⴰⵎⴷⵏⴰⵏⵜ ⵏ ⵛⵛⵉⵏⵡⴰ ⵜⵉⵖⵔⵉ ⵉ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⵓⵔⵣⴰⴼ ⵏ ⵜⵡⵓⵔⵉ ⵉ ⵛⵛⵉⵏⵡⴰ ⵃⵎⴰ ⴰⴷ ⵢⵉⵍⵉ ⵓⵔⵣⵣⵓ ⵏ ⵜⴱⵔⵉⴷⵉⵏ ⵏ ⵓⵙⵎⵖⵔ ⵏ ⵓⵎⵢⴰⵡⴰⵙ ⵊⴰⵔ ⵙⵏⴰⵜ ⵜⵎⵉⵣⴰⵔ ⴳ ⴽⵓ ⵉⴳⵔⴰⵏ.
ⵙⴰⵡⵍ ⵙⵉⵏ ⵉⵎⵙⵜⴳⴳⴰⵔⵏ ⴼ ⵉⵙⵏⴼⴰⵔⵏ ⵓⵏⴳⵉⵎⵏ ⴳ ⵜⴳⵍⴷⵉⵜ ⴷ ⵜⵎⵙⴽⴰⵔ ⵏ ⵛⵛⵉⵏⵡⴰ ⴳ ⵓⵙⵡⵉⵔ ⴰⴷⵎⵙⴰⵏ ⴷ ⵓⵏⴰⵎⵓⵏ, ⴷ ⵓⵎⵢⴰⵡⴰⵙ ⴰⵎⵖⵔⵉⴱⵉ -ⴰⵛⵉⵏⵡⵉ ⴰⴼⵔⵉⵇⵉ, ⴷ ⵓⵎⵢⴰⵡⴰⵙ ⴰⵄⵕⴰⴱ-ⴰⵛⵉⵏⵡⵉ, ⴷ ⵓⵙⵏⴰⵍ ⵉⵜⵜⵓⵙⵏⴼⴰⵍⵏ ⴳ ⵓⵙⵡⵉⵔ ⴰⴳⵔⴰⵖⵍⴰⵏ ⴷ ⵜⵎⵙⴰⵔⵉⵏ ⵛⵛⴰⵔⵏⵉⵏ.