ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵜⴰⵙⵎⵓⵏⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⵙⵉⵏⴰⵙ 19 ⵎⴰⵢⵢⵓ 2020
ⵉⵙⵏⵎⴰⵍⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵜⴰⵙⵎⵓⵏⵉ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⵜⵥⵍⵉ ⵉ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ.
ⵖ ⵜⵣⵡⵉⵔⵉ, ⵉⵙⵙⴽⵜⵉ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵜⵉⴳ ⵏ ⵓⵙⵎⵀⵍ ⵏ ⵜⵓⵎⴰⵢⵉⵏ ⵏ ⵓⵎⵏⵏⵉ 68 ⵏ ⵓⴷⵓⵙⵜⵓⵔ ⵍⵍⵉ ⴷ ⵢⵉⵡⵉⵏ ⴰⴷ ⵉⵍⵉⵏⵜ ⵜⵙⵎⵓⵏⴰⵢ ⵉⵛⵛⴰⵔⵏ ⵏ ⵙⵉⵏ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏ, ⵢⵉⵍⵉ ⵓⵙⴼⵍⴷ ⵉ ⵉⵙⵉⵙⴼⵉⵡⵏ ⴼ ⵜⵣⵣⵉⴳⵣⵉⵏ ⵏ ⵓⵙⵡⵓⴷⴷⵓ ⵏ ⵓⵥⵍⴰⵢ ⴰⴷⵓⵙⵙⴰⵏ ⴷⴼⴼⵉⵔ ⵏ 20 ⵎⴰⵢⵢⵓ.
ⵙ ⵓⵣⵎⵣⵣⵓ, ⵜⴱⴷⴷ ⵜⵙⵎⵓⵏⵉ ⴼ ⵜⵎⵓⵛⴰ ⵍⵍⵉ ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵖ ⵓⵖⵔⵔⴷ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ, ⴷ ⵡⴰⵜⵉⴳ ⵉⵍⵍⴰⵏ ⴷⴰⵔ ⵓⵎⵉⵥⵏ ⵍⵍⵉ ⵉⵙⴽⵔ ⵍⵎⴰⵖⵔⵉⴱ ⵖ ⵓⵎⵏⵉⴷ ⴰⴷ.
ⵜⵎⴷⴰⵡⴰⵍ ⵜⵙⵎⵓⵏⵉ ⵓⵍⴰ ⴼ ⵜⵎⵓⵛⴰ ⵉⵜⵜⵓⵙⵎⵏⴰⴷⵏ ⵖ ⵓⵎⵏⵉⴷ ⵏ ⵉⵎⴰⵙⵙⵏ ⴷ ⵜⴱⵔⵉⴷⵜ ⵏ ⵓⵙⵡⵓⴷⴷⵓ ⵏ ⵜⴰⵙⵙⴰⵙⵜ ⵜⴰⴷⵓⵙⴰⵏⵜ ⵉⴱⴷⴷⵏ ⴼ ⵓⵏⴱⴰⴹ ⴷ ⵜⵣⵡⵉⵔⵉ ⴷ ⵓⵎⵢⴰⵡⴰⴹ, ⵖⵎⴽ ⵍⵍⵉ ⵜⵙⵓⵜⴳ ⵜⵙⵎⵓⵏⵉ ⴰⵜⵉⴳ ⵉⵍⵍⴰⵏ ⴷⴰⵔ ⵓⵙⵎⵖⵔ ⵏ ⵉⵎⵛⴰⵡⴰⵕⵏ ⴷ ⵉⵎⵓⵍⵍⵉⵜⵏ ⵉⵙⵔⵜⴰⵏⵏ ⴷ ⵉⵏⵎⵓⵍⵍⴰ ⴷ ⵉⵎⵙⴽⴰⵔⵏ ⵉⴷⵎⵙⴰⵏⵏ ⵃⵎⴰ ⴰⴷ ⵢⵉⵍⵉ ⵓⵙⴽⵔ ⵏ ⵓⵙⵍⴳⵏ ⵏ ⵓⵥⵕⴼ ⵉⵜⵜⵓⵙⵏⴼⴰⵍⵏ ⵍⵍⵉ ⵔⴰⴷ ⵜⵙⵎⵏⵉⴷ ⵜⵏⴱⴰⴹⵜ ⴼ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵉⵎⴰⵍⴰⵙⵙⵏ ⴷ ⵢⵓⵛⴽⴰⵏ.
ⵍⵍⵉⵖ ⵙⴷⴷⵉⴷⵏ ⵉⵎⴷⵔⴰⵡⵏ ⴼ ⵡⴰⵜⵉⴳ ⵏ ⵜⵎⵓⵛⴰ ⵉⵜⵜⵓⴼⴽⴰⵏ, ⵉⵍⵍⴰ ⵓⵎⵛⴰⵛⴽⴰ ⴰⴷ ⵜⵉⵍⵉ ⵜⵖⵉⵎⵉⵜ ⵜⵓⵙⵎⵉⴷⵜ ⵉ ⵓⵎⴹⴰⴽⴰⵕ ⴼ ⵓⵙⵎⵏⵉⴷ ⵏ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵍⵍⵉⵏⵜ ⴼⵍⵍⴰⵙ ⵜⴰⵏⵏⴰⵢⵉⵏ, ⴰⵙⵙ ⵏ ⵓⴽⵕⴰⵙ 20 ⵎⴰⵢⵢⵓ ⵖ ⵜⵙⵔⴰⴳⵜ ⵜⵉⵙ ⴽⵕⴰⴹⵜ ⴷ ⵎⵔⴰⵡⵜ.
ⵖ ⵓⵎⵏⵉⴷ ⵏ ⵓⵣⵣⵔⴰⴼ, ⵜⵙⴷⴷⵉⴷ ⵜⵙⵎⵓⵏⵉ ⴰⵜⵉⴳ ⵏ ⵜⵖⵜⴰⵙⵜ ⵏ ⵓⵙⴽⵔ ⵏ ⵜⵙⵇⵇⵉⵎⵜ ⵜⴰⵙⴳⵓⵎⴰⵏⵜ ⵜⴰⵎⵙⵉⴽⵓⴷⵜ ⵉⵙⵡⵓⵔⵉⵏ ⴼ ⵓⵣⵣⵔⴰⴼ ⵖ ⵓⵏⴳⵔⴰⵡ ⴰⴷⵓⵙⴰⵏ ⴷ ⵓⵙⵎⴰⵢⵏⵓ ⵏⵏⵙ ⵃⵎⴰ ⴰⴷ ⵢⵉⵍⵉ ⵢⴰⵏ ⵓⵙⴰⵜⵉ ⴰⵣⵣⵔⴰⴼ ⵉⵣⵡⴰⵔⵏ ⵉⵜⵜⵔⵓⵔⵏ ⴼ ⵉⵙⵖⴰⵡⵙⴰⵜⵏ ⵏ ⵉⵎⵖⵔⵉⴱⵉⵢⵏ.
ⵜⵙⵙⴽⵜⵉ ⴷ ⵜⵙⵎⵓⵏⵉ ⵓⵍⴰ ⵜⴰⵡⵓⵔⵉ ⵏ ⵓⵣⵣⵔⴰⴼ ⵍⵍⵉ ⵙⴽⴰⵔⵏⵜ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⵖ ⴳⴰⵏⵜ ⵜⵙⵓⵎⴰⵔ ⵏ ⵉⵙⵍⴳⵏⵏ ⵉⵍⴽⵎⵏ ⵖ ⵓⵣⵎⵣ ⵏ ⵓⵥⵍⴰⵢ ⴰⴷⵓⵙⴰⵏ ⵙⵉⵏ ⵡⴰⴳⵏⴰⵔⵏ ⵏ ⵜⵙⵓⵎⵔⵜ. ⵙⴷⴷⵉⴷⵏ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⵎⴰⵙ ⵔⴰⴷ ⵢⴰⵡⵙ ⵓⵙⵖⵣⵏ ⵏ ⵜⵙⵓⵎⴰⵔ ⴰⴷ ⵖ ⵓⵙⵎⴽⵍ ⵏ ⴽⵉⴳⴰⵏ ⵏ ⵜⵎⵙⴰⵔⵉⵏ ⵜⵉⵏⴰⵎⵓⵏⵉⵏ ⴷ ⵜⴷⵎⵙⴰⵏⵉⵏ.
ⵖⵎⴽ ⵍⵍⵉ ⵜⵎⴷⴰⵡⴰⵍ ⵜⵙⵎⵓⵏⵉ ⴼ ⵜⵎⵙⴽⴰⵔ ⵏ ⵡⴰⵔⴰⵢ ⵏ ⵓⵙⵇⵇⵉⵎ ⵍⵍⵉ ⵙ ⵉⴼⴼⵖ ⴷ ⵓⵎⵛⴰⵡⴰⵕ ⴷ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ, ⵉⵙⴷⴷⵉⴷ ⵓⵍⴰ ⴼ ⵜⵉⵕⵡⵉ ⵏⵏⵙⵏⵜ, ⵢⵉⵏⵉ ⵎⴰⵙ ⵡⴰⵜⵜⵙⵏⵜ ⴰⴷ ⵉⵍⵉⵏ ⵉⵙⴳⴳⵔⵏ ⵏ ⵜⴷⵓⵙⵉ ⴷ ⵡⴰⵔⴰⵢ ⵉ ⵚⴰⵃⴰ ⵏ ⴽⵓ ⵉⴳⵎⴰⵎⵏ ⵏ ⵓⵙⵇⵇⵉⵎ.
ⵜⴳⴰ ⵜⵙⵎⵓⵏⵉ ⴰⴷ ⵓⵍⴰ ⴰⵣⵎⵣⵣⵓ ⵖ ⵉⵍⵍⴰ ⵓⵙⵓⵜⴳ ⵏ ⵉⵎⵏⵉⴷⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵉⵡⴰⵜⵜⵙⵏ ⴰⴷ ⵉⵜⵜⵓⵙⴽⵉⵔ ⴰⵢⵍⵍⵉ ⴷ ⵢⵉⵡⵉ ⵓⴷⵓⵙⵜⵓⵔ ⵙ ⵜⵉⵍⵉⵜ ⴷ ⵜⵡⵉⵙⵉ ⵉⴱⴷⴷⵏ, ⵙⴷⴷⵉⴷⵏ ⵉⵎⴷⵔⴰⵡⵏ ⴼ ⵓⴼⵔⵉⵙ ⴰⵎⵙⵓⵜⴰⵍ ⵏ ⵜⵎⵙⴽⴰⵔ ⴰⴷ, ⴰⵢⵍⵍⵉ ⵓⵔ ⵉⵙⴱⴷⴷⵏ ⵜⵉⵎⵔⵙⵍⵜ ⵜⴰⵣⵣⵔⴰⴼⵜ ⴰⴷ ⵜⵙⴽⵔ ⴰⵢⵍⵍⵉ ⴼⵍⵍⴰⵙ ⵉⵍⵍⴰⵏ ⵖ ⵓⴷⵓⵙⵜⵓⵔ.