ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵜⵖⵉⵎⵉⵜ ⵏ ⵓⵏⵏⵓⵕⵥⵎ ⵏ ⵜⵙⵓⵜⵍⵜ ⵜⵉⵙ 17 ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵢⵉⵍ ⵓⵎⵍⵉⵍ ⴰⵏⴰⵎⵎⴰⵙ

ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ,

ⵎⴰⵙⵙ ⴰⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⵢⵉⵍ ⵓⵎⵍⵉⵍ ⴰⵏⴰⵎⵎⴰⵙ,

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ ⵉⴳⵎⴰⵎⵏ ⴷ ⵉⵏⵙⵙⵉⵅⴼⵏ ⵏ ⵉⴽⴰⴱⴰⵕⵏ,

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⴳⵯⵏⵙⴰⵙⵏ ⵏ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ,

ⵉⴷ ⴱⴰⴱ ⵏ ⵜⵓⵎⵔⵜ ⵉⵏⵙⵙⵉⵅⴼⵏ ⴷ ⵉⴳⵯⵏⵙⴰⵙⵏ ⵏ ⵜⵎⵢⴰⵣⴰⵏⵉⵏ ⵜⵉⴷⵉⴱⵍⵓⵎⴰⵙⵉⵢⵉⵏ ⵖⵔ ⵜⴳⵍⴷⵉⵜ ⵏ ⵍⵎⵖⵔⵉⴱ,

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵉⴳⴰ ⵉⵢⵉ ⵜⵓⵎⵔⵜ ⴰⴷ ⴷⵔⵓⵖ ⴳ ⵜⵡⵡⵓⵔⵉⵡⵉⵏ ⵏ ⵜⵖⵉⵎⵉⵜ ⵏ ⵓⵏⵏⵓⵕⵥⵎ ⵏ ⵜⵙⵓⵜⵍⵜ ⵜⵉⵙ ⵙⴰⵜ ⴷ ⵎⵔⴰⵡⵜ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵢⵉⵍ ⵓⵎⵍⵉⵍ ⴰⵏⴰⵎⵎⴰⵙ, ⵏⵎⵎⵔ ⴳ ⵓⴱⵕⵍⴰⵎⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵓⵙⵏⵓⴱⴳ ⵏⵏⵙ.  ⵏⵎⵎⵔ ⵓⵍⴰ ⴰⴷ ⴷⵉⴷⵏⵖ ⵜⵃⴰⴹⵕⵎ, ⴱⵔⵔⴽⴰⵜ ⴷ ⵉⵏⴱⴳⵉⵡⵏ ⵏⵏⵖ, ⴷ ⵉⵏⴳⴳⵯⴰ ⵏⵏⵖ ⴷ ⴰⵢⵜⵎⴰⵜⵏ ⵔⴰⵏⵉⵏ ⵜⴰⵣⵣⵉⴳⵣⵜ ⵏ ⵜⵡⵡⵓⵔⵉ ⴷⵉⴷⵓⵏ ⴷⴼⴼⵉⵔ ⵏ ⵎⴰⴷ ⵢⵉⵡⵉ ⵓⴱⴰⵢⵢⵓⵕ ⵏ ⴽⵓⴼⵉⴷ 19 ⴼ ⵓⵎⴰⴹⴰⵍ ⵙ ⴳ ⵜⵎⵢⴰⴳⴳⵓⴳⵜ ⴷ ⵉⵙⴽⵔⴰⴼ ⵏ ⵓⵎⵓⴷⴷⵓ, ⵉⵙⵏⵓⴱⴳ ⴰⵖ ⵓⵙⴰⵢⵔⵓⵔ ⴰⴷ, ⴳ ⵡⴰⴽⴰⵍ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴰⵡⴰⵏⴽ ⵢⵓⵜⵏ ⵙ ⵉⵥⵓⵕⴰⵏ ⴳ ⵢⵉⵍ ⵓⵎⵍⵉⵍ ⴰⵏⴰⵎⵎⴰⵙ, ⵜⴰⵎⴰⵣⵉⵔⵜ ⵉⵟⵟⴰⴼⵏ ⴳ ⵜⴰⵙⵓⵜⵉⵏ ⵜⵉⵍⵉⵜ ⵉⴷⵓⵙⵏ ⴳ ⵓⵚⴽⵓ ⵏ ⵜⵖⵔⵎⵉⵡⵉⵏ ⵏ ⵓⵏⴰⵎⵎⴰⵙ, ⴳ ⵜⵎⵙⴰⵔⵉⵏ ⴼⴰⵡⵏⵉⵏ ⴳ ⵜⵊⵢⵓⵖⵕⴰⴼⵉⵜ ⵜⴰⵙⵔⵜⴰⵏⵜ ⵏ ⵜⵙⴳⴰ ⴰⴷ ⵜⴰⵏⴰⵎⵎⴰⵙⵜ.

ⵜⵍⵍⴰ ⵜⵙⵓⵜⵍⵜ ⴰⴷ ⴳ ⵓⵎⵏⴰⴹ ⴰⵏⵎⵏⴰⴹ ⴳ ⵍⵍⴰⵏ ⵉⵎⴰⵖⵏ ⴷ ⵜⴰⵙⵙⴰⵙⵉⵏ ⵣⵣⵉⴳⵣⵏⵉⵏ ⴳ ⵉⴼⴼⵓⵙ ⴷ ⵍⵇⴱⵍⵜ ⵏ ⵓⵏⴰⵎⵎⴰⵙ ⴷ ⵜⵎⵉⵣⴰⵔ ⵍⵍⴰⵏⵉⵏ ⵜⴰⵎⴰ ⵏ ⵜⵎⵉⵣⴰⵔ ⴳ ⵜⵙⴳⴰ ⴰⴷ ⴷ ⵉⵏⴳⴰⵥⵏ ⵏⵏⵙⵏ ⴼ ⵉⵎⴰⴷⴰⵏⵏ ⵏ ⵜⵙⴳⴰ, ⴷ ⵉⴷⵔⵉⵣⵏ ⵏⵏⵙ ⴼ ⵜⵙⴳⴰ ⵓⵕⵓⵜⴰⵏⴰⵎⵎⴰⵙⵜ. ⵣⵣⵉⴳⵣⵏ ⴳⴰⵔ ⵉⵙⵓⵔⵙⵏ ⴰⴷ ⴳ ⵓⵎⵏⴰⴹ ⴰⴳⵔⴰⵖⵍⴰⵏ ⵉⵜⵜⵓⵙⵙⴰⵏ ⵙ ⵜⵎⵓⴽⵔⵉⵙⵉⵏ ⵜⵉⵊⵢⵓⵙⵔⵜⴰⵏⵉⵏ, ⵙ ⵉⴷⵔⵉⵣⵏ ⵏ ⵜⵎⴰⵖⵜ ⵉⵍⵍⴰⵏ ⴳ ⵍⵇⴱⵍⵜ ⵏ ⵓⵕⵓⴱⴱⴰ.

ⵙ ⵓⵎⴰⵜⴰ, ⴳⴰⵏ ⵉⵙⵓⵔⵙⵏ ⵏ ⵖⵉⵍⴰⴷ ⴷ ⵡⵉⵏ ⵜⵙⴳⴰ ⵓⵕⵓⵜⴰⵏⴰⵎⵎⴰⵙⵜ, ⵓⵔ ⵥⵉⵍⵏ, ⵉⵖ ⴰⴽⴽⵯ ⵓⵔ ⵀⵔⵛⵏ ⴼ ⵡⵉⴷ ⵍⵍⵉ ⴷ ⵉⵡⵉⵏⵉⵏ ⴰⴷ ⵢⵉⵍⵉ ⵓⴳⵔⴰⵡ ⵏ ⵜⵏⴼⵔⵓⵜ ⴷ ⵓⵎⵢⴰⵡⴰⵙ ⴳ ⵜⵙⴳⴰ ⵏ ⵓⵏⴰⵎⵎⴰⵙ ⴳ ⵜⵣⵡⵉⵔⵉ ⵏ ⵉⵙⴳⴳⵯⴰⵙⵏ ⵏ 90, ⴳ ⵓⴳⵔⴰⵡ ⵏ ⵎⴰⵍⵇⴰ ⴳ 1992, ⵜⴰⵡⵡⵓⵔⵉ ⵍⵍⵉ ⴷ ⵢⵉⵡⵉⵏ ⴰⴷ ⵜⵉⵍⵉ ⴳ 2006 ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⵙⴳⴰ ⵏ ⵓⵏⴰⵎⵎⴰⵙ, ⵜⵉⵎⵏⵜⵍⵉⵏ ⵍⵍⵉⵖ ⵣⵔⵉⵏ ⵉⵎⴹⴰⴽⴰⵕⵏ ⵏ ⵓⵙⵍⵓ ⴼ ⵜⵎⵙⴰⵔⵜ ⵏ ⴼⴰⵍⵉⵙⵟⵉⵏ ⴷ ⵉⵏⴰⵔⵓⵣⵏ ⵍⵍⵉ ⴷ ⵜⵉⵡⵉ ⴳ ⵓⵚⴽⵓ ⵏ ⵓⴼⵔⴰ ⴷ ⵜⵎⵢⵉⴷⵉⵔⵜ ⴳ ⵍⵇⴱⵍⵜ ⵜⴰⵏⴰⵎⵎⴰⵙⵜ, ⵜⵉⵎⵏⵜⵍⵉⵏ ⴰⴷ ⵏⵉⵜ ⴰⴷ ⵢⵉⵡⵉⵏ ⴰⴷ ⵢⵉⵍⵉ ⵓⵏⵎⵓⵇⵇⴰⵔ ⵏ ⴱⴰⵔⵛⴰⵍⵓⵏⴰ ⴳ 1995 ⴷ ⵓⵣⵣⵔⴰⵢ ⵏⵏⵙⵏⵜ.

ⵍⵍⴰⵏ ⵉⵎⴰⵙⵙⵏ ⴰⴷ ⵙ ⵉⵡⵜⵜⴰⵙⵏ ⵛⵛⴰⵔⵏⵉⵏ ⵛⵛⴰⵔⵏⵉⵏ ⴳ ⵉⵍⵍⴰ ⵓⴼⵔⴰ ⴰⵣⵔⴼⴰⵏ ⵉⵙⵓⵍⵏ, ⴷ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ ⴷ ⵉⵥⵓⵕⴰⵏ ⵏⵏⵙ ⴷ ⵜⵎⵏⵜⵍⵉⵏ ⵏⵏⵙ, ⴷ ⵓⵙⴽⵔ ⵏ ⵜⵙⴳⴰ ⵏ ⵓⴱⵓⵖⵍⵓ ⴷ ⵥⵥⵀⵕⵜ ⵜⴰⴷⵎⵙⴰⵏⵜ ⵉⵛⵛⴰⵔⵏ, ⴷ ⵓⵡⵇⵇⵔ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏ ⵜⴷⵉⵎⵓⵇⵔⴰⵟⵉⵜ, ⴷ ⵓⵙⵡⵓⴷⴷⵓ ⴰⵏⴼⴳⴰⵏ ⵏ ⵓⵣⵡⴰⴳ ⴷ ⵓⵙⴱⴷⴷⵉ ⵏ ⵜⵎⵏⵜⵍⵉⵏ ⵏ ⵓⵣⵡⴰⴳ ⵡⴰⵔⵓⵍⴳⵉⵏ, ⴷ ⵓⵙⵎⴰⵜⵜⵉ ⵏ ⵜⴻⵜⵉⴽⵏⵓⵍⵓⵊⵉⵜ ⴷ ⵉⵙⵙⴰⵔⵓⵜⵏ ⵙⴳ ⵉⵥⵥⵍⵎⴹ ⴰⵔ ⵉⴼⴼⵓⵙ ⵏ ⵍⵇⴱⵍⵜ ⵏ ⵓⵏⴰⵎⵎⴰⵙ.

ⵙ ⵓⵙⵎⴰⵇⵇⵍ ⴷ ⵓⵍⴳⴳⵓⴷ ⵉ ⵉⵙⵓⵔⵙⵏ ⵏ ⵜⵙⴳⴰ ⵏⵏⵖ ⴰⵙⵙ ⴰⴷ, ⴰⵔ ⵏⵥⵕⵕⴰ ⵎⴰⵙ ⴷ ⵉⵎⴰⵖⵏ ⴳ ⵍⵇⴱⵍⵜ ⴷ ⵉⴼⴼⵓⵙ ⵏ ⵓⵏⴰⵎⵎⴰⵙ ⴷ ⵜⵙⴳⴳⵉⵡⵉⵏ ⵏⵏⵙ, ⵎⵎⴰⵜⵜⵉⵏ ⵙⴳ ⵢⴰⵜ ⵜⵎⴰⵖⵜ ⴰⵔ ⴽⵉⴳⴰⵏ ⵏ ⵜⵎⴰⵖⵉⵏ ⵖ  ⵉⵍⵍⴰ ⵓⵇⵔⵢⴰⵏ ⴳⴰⵏⵉⵏ ⵜⵉⴳⵯⵏⵙⴰⵏⵉⵏ ⵣⵣⵔⴰⵢⵏⵉⵏ ⵉⵡⵜⵜⴰ, ⵙⵍⴰⵡⴰⵏ ⴰⴽⴽⵯ ⵙ ⵉⴽⵛⵓⵎⵏ ⵏ ⴱⵕⵕⴰ ⴳ ⵜⵖⴰⵡⵙⵉⵡⵉⵏ ⵏ ⵡⵉⵢⵢⴰⴹ, ⵙ ⵜⵎⴰⵖⵉⵏ ⵜⵉⵥⵓⵕⴰⵏⵉⵏ ⴳⴰⵏⵉⵏ ⴳⴰⵔ ⴷ ⵜⵙⵎⵓⵏⵏⵉⵏ ⵜⵉⵏⵎⵏⴰⴹⵉⵏ.

ⴳ ⵜⵙⴳⴰ ⵢⴰⴹⵏⵉⵏ, ⵣⵣⵉⴳⵣⵏ ⵉⵎⵣⵔⴰⵢⵏ ⵊⴰⵔ ⵉⵥⵥⵍⵎⴹ ⵏ ⵜⵙⴳⴰ ⵜⴰⵏⴰⵎⵎⴰⵙⵜ ⴷ ⴽⵇⴱⵍⵜ ⵏⵏⵙ ⴷ ⵉⴼⴼⵓⵙ ⵏⵏⵙ, ⴳ ⵜⵖⵔⴰⴷ ⵍⵍⵉ ⴷ ⴽⵛⵛⵎⵏⵉⵏ ⴷ ⵡⴰⴷⴰⴼ ⵙ ⵉⴷⴳⴰⵔⵏ ⴷ ⵜⵏⵓⴼⴰ ⴷ ⵓⵙⵙⵍⵎⴷ, ⴰⵔ ⵙⵙⵉⵎⵖⵓⵔⵏ ⵉⵎⴰⵖⵏ ⴷ ⵜⵎⵓⴽⵔⵉⵙⵉⵏ ⵏ ⵓⵏⵣⵡⵉ ⴷ ⵓⵥⵍⴰⴹ ⵜⵓⵎⴰⵏⵉⵏ ⵏ ⵓⵣⵡⴰⴳ ⴷ ⵓⵔⵡⵍ ⵙⴳ ⵜⵎⵉⵣⴰⵔ. ⵙⵙⵉⵎⵖⵓⵔⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19, ⴷ ⵜⵎⴰⵖⵜ ⴳ ⵍⵇⴱⵍⵜ ⵏ ⵓⵕⵓⴱⴱⴰ ⵉⵎⵣⵔⴰⵢⵏ ⴰⴷ ⵙ ⵡⴰⵍⴰⵢ ⵉⴳⴳⵓⵜⵏ ⵏ ⵡⴰⵜⵉⴳⵏ ⵏ ⵜⵥⴹⴰⵕⵜ ⴷ ⵜⵎⵜⵜⵉⵡⵉⵏ ⵜⵉⵎⵣⵡⵓⵔⴰ ⴷ ⵉⵢⴰⴼⵓⵜⵏ ⵏ ⵓⵜⵛⵉ. ⵙ ⵖⵎⴽⴰ ⴷ ⴰⵙ ⵣⵣⵉⴳⵣⵏ ⵉⵏⴰⵡⵏ ⵏ ⵓⵙⵏⵓⵃⵢⵓ ⴷ ⵜⴰⴳⵯⵉⵜ ⵏ ⵡⴰⵢⵢⴰⴹ ⴳ ⴽⵉⴳⴰⵏ ⵏ ⵜⵎⵉⵣⴰⵔ ⵍⵍⵉⵖ ⵉⵍⵍⴰ ⵓⵙⵎⵔⵙ ⵏ ⵜⵣⵣⵉⴳⵣⵜ ⵏ ⵓⵣⵡⴰⴳ ⴷ ⵓⴱⵔⵙⵙⵉⵡⴷ ⴷ ⵜⴽⵕⴹⵉ, ⵍⵍⵉ ⵓⵔ ⵔⵉⵏ ⴽⵓⵍⵍⵓ ⵉⵙⴳⴷⵏ ⵏ ⵉⴳⵏⵡⴰⵏ ⴷ ⵉⵙⵍⴳⵏⵏ ⵉⵖⵔⵎⴰⵏⵏ ⴷ ⵜⵎⵢⵓⵔⵉⵏ ⵏ ⵜⵓⴷⵔⵜ ⵉⵛⵛⴰⵔⵏ.

ⴰⵙⵙⴽⵯⵜⵉ ⵏ ⵉⵙⵓⵔⵙⵏ ⴰⴷ, ⴷ ⵡⴰⵡⵍⴰⴼ ⴰⵙⴳⴳⵯⴰⵏ ⵏ ⵡⴰⴷⴷⴰⴷ ⴳ ⵜⵙⴳⴰ ⵏⵏⵖ, ⵜⴰⵖⵓⵔⵉ ⵉ ⵡⴰⵔⴰⵏⴰⵔⵓⵣ, ⵎⴰⵛⵛ ⴰⵙⵙⴽⵯⵜⵉ ⵙ ⵜⵎⴰⵙⴰⵢⵉⵏ ⵏⵏⵖ ⵎⵏⵉⴷ ⵏ ⵜⵣⵣⵉⴳⵣⵜ ⵏ ⵉⵙⵓⵔⵙⵏ ⵍⵍⵉ ⴼ ⵜⵜⵓⵙⴽⴰⵔ ⵜⵎⴰⴷⴷⴰⵙⵜ ⵏⵏⵖ ⵜⴰⴱⵕⵍⴰⵎⴰⵏⵉⵜ ⴷ ⵜⵏⴳⴳⵯⴰ ⵏⵏⵙ ⴳ ⵜⵙⴳⴰ ⵉ ⵓⵣⵣⵔⴰⵢ ⵏⵏⵙⵏ ⵙ ⵓⵎⵙⴰⵡⴰⵍ ⴷ ⵓⵎⵢⴰⵡⴰⵙ ⴷ ⵜⵡⵉⵣⵉ, ⵙ ⵓⵡⵇⵇⵔ ⵉⵜⵜⵓⵙⵏⴼⴰⵍⵏ ⴷ ⵡⴰⵔⴰⴽⵛⵓⵎ ⴳ ⵜⵖⴰⵡⵙⵉⵡⵉⵏ ⵜⵉⴳⵯⵏⵙⴰⵏⵉⵏ ⵏ ⵡⵉⵢⵢⴰⴹ.

ⴳ ⵓⵎⵏⴰⴷ ⵢⴰⴹⵏⵉⵏ, ⴰⵡⴷ ⵢⴰⵏ ⵓⵔ ⵔⴰⴷ ⵉⵜⵜⵓ ⵜⴰⵣⵣⵉⴳⵣⵜ ⵜⴰⵅⴰⵜⴰⵔⵜ ⴷ ⵉⵙⵏⴼⵍⵏ ⵍⵍⵉ ⵙⴽⵔⵏ ⴽⵉⴳⴰⵏ ⵏ ⵉⵡⴰⵏⴽⵏ ⵉⴳⵎⴰⵎⵏ ⴳ ⵜⵎⵙⵙⵎⵓⵏⵜ ⵏⵏⵖ ⵜⴰⴱⵕⵍⴰⵎⴰⵏⵉⵜ ⴳ ⵢⵉⴳⵔ ⵏ ⵓⵚⴽⵓ ⴰⵎⵔⵙⵍⴰⵏ, ⴷ ⵜⴷⵉⵎⵓⵇⵔⴰⵟⵉⵜ ⵏ ⵜⵓⴷⵔⵜ ⵜⴰⵎⴰⵜⴰⵢⵜ, ⴷ ⵓⵙⵖⵏⵣ ⵏ ⵉⴷⵓⵙⵜⵓⵔⵏ, ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵢⵉⴳⵔ ⵏ ⵜⵎⵙⴽⵔⵜ ⵜⴰⴷⵎⵙⴰⵏⵜ ⴷ ⵓⵙⴱⴷⴷⵉ ⵏ ⵜⵎⵜⵍⵉⵏ ⵏ ⵜⵎⵓⴽⵔⵉⵙⵉⵏ ⵏ ⵓⵏⵣⵡⵉ, ⵎⵇⵇⴰⵔ ⴰⵙ ⵙⵙⵓⵜⵍⵏⵜ ⵜⴰⵙⵙⴰⵙⵉⵏ, ⵏⵖ ⴳⵉⵙⵏⵜ ⵜⵍⵍⴰ.

ⴰⵊⵊ ⴰⵜ ⴰⵖ ⴰⴷ ⵏⵙⵇⵙⴰ, ⵍⵍⵉⵖ ⵏⵍⵍⴰ ⴳ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⵉⴳⴰⵏ ⵉⵍⴻⵍⵍⵉ ⴷ ⵓⵎⵏⵏⴰⵡ ⴳ ⵉⵙⵡⵉⵔⵏ ⴰⵊⵢⵓⵖⵕⴰⴼⵉ ⴷ ⵓⵙⵔⵜⴰⵏ ⴷ ⵓⴷⵍⵙⴰⵏ : ⵉⵙ ⵜⵜⵓⵙⴽⴰⵔⵏⵜ ⵜⵏⴰⵥⴰⵕⵉⵏ ⵏⵏⵖ ⵛⵛⴰⵔⵏⵉⵏ ⵙⴳ ⵓⵎⵢⴰⵡⴰⵙ ⵉⵥⵥⵍⵎⴹ-ⵉⴼⴼⵓⵙ ⴳ ⵜⵙⴳⴰ ⵏ ⵓⵏⴰⵎⵎⴰⵙ ⴳ ⵓⴱⵓⵖⵍⵓ ⴷ ⵣⵣⵀⵕⵜ ⵉⵛⵛⴰⵔⵏ, ⴳ ⵢⵉⴳⵔ ⵏ ⵓⵙⵎⴰⵜⵜⵉ ⵏ ⵓⵙⵙⴰⵔⵓ ⵙ ⵜⵎⵥⵍⴰ ⵏ ⵚⴰⵃⴰ-ⵚⴰⵃⴰ, ⵙ ⵎⴰ ⵔⴰⴷ ⴰⵖ ⴷ ⵉⵙⵙⴼⵖ ⴳ ⵜⵎⵥⵍⴰ ⵜⴰⵇⴱⵓⵔⵜ ⵏ ⵜⵡⵉⵣⵉ ⵉ ⵜⴳⵎⵉ, ⵉⵙⵙⵔⵅⵓ ⵓⵍⴰ ⴰⵙⵎⴰⵜⵜⵉ ⵏ ⵜⴻⵜⵉⴽⵏⵓⵍⵓⵊⵉⵜ... ?

ⵙ ⵓⵎⴷⵢⴰ, ⵉⵙ ⵓⵔ ⵉⴳⵉ ⵓⴱⴰⵢⵢⵓⵕ ⴱ ⴽⵓⴼⵉⴷ 19, ⵜⴰⵙⵙⴰⵙⵜ ⵏ ⵉⵔⵉⵎ ⵏ ⵜⵡⵉⵣⵉ, ⵜⵎⵍⴰ ⴰⴷ ⴰⴱⵓⵖⵍⵓ ⵏ ⵜⵏⵉⵎⴰⵏⵉⵏ ⵜⵉⴰⵏⵎⵓⵔⵉⵏ ⵍⵍⵉ ⴷⵓⵙⵏⵉⵏ  ⴷ ⵜⵎⴰⵖⵜ ⴳ ⵍⵇⴱⵍⵜ ⵏ ⵓⵕⵓⴱⴱⴰ ⴷ ⵉⴷⵔⵉⵣⵏ ⵏⵏⵙ ⴳ ⵜⵥⴹⴰⵕⵜ ⴷ ⵓⵜⵛⵓ ?

ⴳ ⵜⵎⵙⴰⵔⵜ ⵏ ⵓⴼⵔⴰ ⴷ ⵜⵏⴼⵔⵓⵜ, ⵍⵍⵉ ⵉⴳⴰⵏ ⵜⴰⵏⴰⵥⴰⵕⵜ ⵏⵏⵖ ⵜⴰⵎⴳⵔⵓⵜ ⵉⵛⵛⴰⵔⵏ, ⵏⵔⴰ ⴰⴷ ⵏⵉⵏⵉ ⵎⴰⵙ ⵓⵔ ⵜⴳⴰⴷⴷⴰ ⵜⵡⵉⵙⵉ ⵏ ⵜⵔⴰⴱⴱⵓⵜ ⵓⵕⵓⵜⴰⵏⴰⵎⵎⴰⵙⵜ ⴳ ⵓⴼⵓⴽⴽⵓ ⵏ ⵉⵎⴰⵖⵏ ⴷ ⵓⵏⵛⴽ ⵏⵏⵙ ⴰⵖⵔⵎⴰⵏ ⴷ ⵓⵎⵣⵔⵓⵢ ⴷ ⵜⴷⵍⵙⴰ ⵏⵏⵙ, ⴷ ⵜⵏⴰⵥⴰⵕⵜ ⴷ ⵜⵏⴼⵔⵓⵜ ⵜⴰⵎⴳⵔⵓⵜ. ⵉⴳⴰ ⵓⴼⵔⴰ ⴰⵙⵙ ⴰⴷ ⴳ ⵍⵇⴱⵍⵜ ⵜⴰⵏⴰⵎⵎⴰⵙⵜ ⵡⴰⴷ ⵢⴰⴳⴳⵓⴳⵏ ⵎⴽ ⵉⴳⴰ ⴳ ⵉⵙⴳⴳⵯⴰⵙⵏ ⵏ 90. ⵎⴰⵛⵛ ⵉⵇⵇⴰⵏ ⴷ ⴰⴷ ⵏⴼⵔⴽ ⵎⴰⵙ ⵓⵔ ⵜⵥⴹⴰⵕ ⵍⵇⴱⵍⵜ ⵜⴰⵏⴰⵎⵎⴰⵙⵜ ⴰⴷ ⵜⴰⵙⵉ ⴽⵔⴰ ⵏ ⵜⵎⴰⵖⵜ ⵢⴰⴹⵏⵉⵏ ⵏⵖ ⵜⵣⵣⵉⴳⵣ ⴳ ⵜⵎⴰⵖⵉⵏ ⵍⵍⵉ ⴱⴰⵀⵔⴰ ⵎⴰⵟⵍⵏⵏⵉⵏ, ⵉⵎⴰⴷⴰⵏⵏ ⵏⵏⵙ ⵔⴰⵏ ⴰⴼⵔⴰ, ⵉⵥⴹⴰⵕ ⵉ ⵙⵉⵏ ⵉⵡⴰⵏⴽⵏ ⵡⵉⵏ ⴼⵉⵍⵉⵙⵟⵉⵏ ⴷ ⵡⵉⵏ ⵉⵙⵕⴰⵉⵍ, ⴷⴷⵔⵏⵉⵏ ⴳ ⵓⴼⵔⴰ.

ⵉⵎⴰⴷⴰⵏⵏ ⵏ ⵍⵇⴱⵍⵜ ⵜⴰⵏⴰⵎⵎⴰⵙⵜ ⵕⵎⵉⵏ ⵙⴳ ⵉⵎⴰⵖⵏ, ⵉⵇⵇⴰⵏ ⴷ ⴰⴷ ⴷⴷⵔⵏ ⴳ ⵓⴼⵔⴰ, ⴰⴼⵔⴰ ⴰⵣⵔⴼⴰⵏ ⴰⵙⵓⵍⴰⵏ ⵉⵕⵣⵎⵏ ⵉⵎⵏⴰⴷⵏ ⵉⵎⴰⵢⵏⵓⵜⵏ ⵏ ⵓⵎⵢⴰⵡⴰⵙ ⴳ ⵜⵙⴳⴰ, ⵍⵍⵉ ⵔⴰⴷ ⵉⵙⴱⴷⴷ ⵜⵉⵟⵟⵓⵕⴼⴰ ⴷ ⵓⵙⵏⵓⵃⵢⴰ ⴷ ⵜⴽⵕⴹⵉ.

ⴳ ⵜⵎⵙⴰⵔⵜ ⵏ ⵓⵣⵡⴰⴳ, ⵉⴳⴰ ⴰⵄⵓⵕⵉⴹ ⵉⵖ ⵜⵇⴱⵍ ⵜⵔⴰⴱⴱⵓⵜ ⵜⴰⴳⵔⴰⵖⵍⴰⵏⵜ ⴰⴷ ⵜⵥⵥⵕⵕⴰ ⵜⵉⵡⵍⴰⴼⵉⵏ ⵏ ⵜⴰⴷⴷⴰⵏⴳⵉⵡⵉⵏ ⵏ ⵢⵉⵍ ⵓⵎⵍⵉⵍ ⴰⵏⴰⵎⵎⴰⵙ ⴰⵔ ⵛⵛⵜⵜⴰⵏⵜ ⴽⵓ ⴰⵙⴳⴳⵯⴰⵙ ⵉⴼⴹⵏ ⵏ ⵜⵅⵛⴱⵉⵏ, ⵙⵍⴰⵡⴰⵏ ⴰⴽⴽⵯ ⵜⵉⵏ ⵉⵄⵔⵔⵉⵎⵏ ⵍⵍⵉ ⵙⴼⴰⵙⴽⴰⵏⵉⵏ ⵉⵎⴰⵏⵏ ⵏⵏⵙⵏ ⴳ ⵓⵙⵉⴳⴳⵍ ⴳ ⵓⵙⵉⴳⴳⵍ ⵏ ⵜⵖⵔⴰⴷ ⵏⵖ ⵜⴰⵏⴼⵔⵓⵜ ⵍⵍⵉⵖ ⵜⵜⵓⵇⵇⴰⵏⵜ ⵜⴼⵍⵡⵉⵏ ⵏ ⵓⵣⵡⴰⴳ ⵓⵍⴳⵉⵏ ⵙ ⵉⵥⵥⵍⵎⴹ ⴷⴰⵜ ⵏⵏⵙⵏ. ⵍⵍⵉ ⵔⴰⴷ ⵉⴳ ⵓⵏⴰⵎⵎⴰⵙ ⵉⵍ ⵏ ⵓⵏⴰⵔⵓⵣ ⴷ ⵓⵎⵢⴰⵡⴰⴹ ⴷ ⵉⵙⵏⴼⵍⵏ, ⵉⴳⴰ ⵖⵉⵍⴰⴷ ⵜⴰⴳⵯⵍⵎⴰⵎⵜ ⵉⵣⴷⵉⵏ ⴷ ⵜⴳⵓⴷⵉⵡⵉⵏ ⵜⵉⵏⴼⴳⴰⵏⵉⵏ ⵓⴳⴳⴰⵔ ⵏ ⵜⴰⵍⴽⵉⵡⵉⵏ ⵜⴰⵢⵍⴰⵏⵉⵏ ⵢⴰⴹⵏⵉⵏ.

ⵉⵖ ⵍⵍⴰⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵉⵜⴰⵔ ⵏ ⵓⵙⵉⴷⴼ ⴷⴰⵜ ⵏ ⵉⵔⵉⵎ, ⴰⵡⴷ ⵏⵜⵜⵏⵉⵜ ⴳ ⵜⵎⵓⴽⵔⵉⵙⵜ ⵏ ⵓⵣⵡⴰⴳ, ⵉⵇⵇⴰⵏ ⴰⵖ ⴷ - ⵏⴽⴽⵯⵏⵉ ⵉⴷ ⴱⴰⴱ ⵏ ⵜⵙⵔⵜⵉⵜ ⵉⴷⵉⵎⵓⵇⵔⴰⵟⵉⵢⵏ- ⴰⴷ ⵏⵣⵣⵔⵉ ⴽⵉⴳⴰⵏ ⵏ ⴳⴰⵔ ⵉⵙⵡⵉⵏⴳⵉⵎⵏ ⴼ ⵓⵣⵡⴰⴳ, ⵙⵍⴰⵡⴰⵏ ⴰⴽⴽⵯ ⵡⵉⵏ ⵉⴼⵔⵉⵇⵢⴰ. ⵍⵍⵉⵖ ⵉⵖⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ ⵙⴳ ⵉⵙⴳⴳⵯⴰⵙⵏ. ⵍⵍⵉⵖ ⵉⵏⵏⴰ ⵎⴰⵙ ⴷ ⴰⵣⵡⴰⴳ ⴰⴼⵔⵉⵇⵉ ⴰⵔ ⵉⵜⵜⵉⵍⵉ ⴳ ⵜⵎⵉⵣⴰⵔ ⵏ ⵉⴼⵔⵉⵇⵢⴰ, 5 ⵏ ⵉⴼⵔⵉⵇⵉⵢⵏ ⵣⵓⴳⵏⵉⵏ, 4 ⴳⵉⵙⵏ ⴰⵔ ⵜⴱⵇⴰⵏ ⴳ ⵉⴼⵔⵉⵇⵢⴰ, ⴰⵣⵡⴰⴳ ⵡⴰⵔⵓⵍⴳⵉⵏ ⵉⴳⴰ ⵖⴰⵙ 20 % ⵏ ⵓⵏⵛⴽ ⴰⵎⴰⵜⴰⵢ ⵏ ⵓⵣⵡⴰⴳ, 85 % ⵏ ⵜⵖⵔⴰⴷ ⵏ ⵉⵎⵣⵡⴰⴳ ⴰⵔ ⵜⵜⵓⵚⵉⴼⵏⵜ ⴳ ⵜⵎⵉⵣⴰⵔ ⵏ ⵓⵙⵏⵓⴱⴳ, ⵉⵙⵙⵉⵙⴼⵉⵡ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵍⵍⵉ ⵉⴳⴰⵏ ⴰⵎⵣⵡⴰⵔⵓ ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ ⴳ ⵉⵎⵔⵙⵉ ⵏ ⵓⵣⵡⴰⴳ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵡⴰⴷ ⵉⵙⴼⴰⵙⴽⴰⵏ ⵙ ⵓⵣⵡⴰⴳ, ⵉⵜⵜⵓⵅⴰⵙⵙⴰ, ⵏⵖ ⴰⵔ ⵉⵙⵉⴳⴳⵉⵍ ⵜⴰⵏⴼⵔⵓⵜ, ⵏⵖ ⵜⴻⵟⵟⴰⵢⵜ ⵜⴰⵖⴰⵔⵜ, ⴷ ⵉⵙⵓⵔⵙ ⵏ ⵡⴰⵔⴰⵔⴳⴳⵉⴳ ⴰⴷ ⵉⴼⴼⵖ ⵜⴰⵎⵓⵔⵜ ⵏⵏⵙ. ⵉⵇⵇⴰⵏ ⴰⵖ ⴷ ⴰⴷ ⵏⵙⴱⴷⴷ ⴰⵙⵎⵔⵙ ⵏ ⵓⵣⵡⴰⴳ ⵏ ⴳⴰⵔ ⵉⵎⴹⴰⴽⴰⵕⵏ ⵉⵙⵔⵜⴰⵏⵏ ⴷ ⵉⵙⵜⴰⵢⵏ ⴳ ⵓⵕⵓⴱⴱⴰ, ⵉⵇⵇⴰⵏ ⴰⵖ ⴷ ⵓⵔⵣⵣⵓ ⵏ ⵉⴼⵙⵙⴰⵢⵏ ⵉⵎⴳⵔⴰⵜⵏ ⵉ ⵜⵉⵍⵜⵉ ⵏ ⵡⴰⴷⴷⵓⵔ ⵏ ⵉⵎⵣⵡⴰⴳⵏ ⵍⵍⵉ ⵜⵜⴰⵡⵙⵏⵉⵏ - ⵎⴽ ⵍⵍⵉ ⵉⵡⵙⵏ ⵉⴷⴷⴰⴷⴷⴰⵜⵙⵏ- ⴳ ⵓⵚⴽⵓ ⵏ ⵜⴷⵎⵙⴰ ⵏ ⵓⵕⵓⴱⴱⴰ ⴷⴼⴼⵉⵔ ⵏ ⵓⵕⵓⴱⴱⴰ ⴷ ⵜⴼⴽⴰ ⵏ ⵓⵙⴷⴷⵓⵔⵔⵉ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵙⴳ ⵉⵡⵜⵜⴰⵙⵏ ⵏ ⵜⵎⵙⵎⵓⵏⵜ ⵏⵏⵖ ⵜⴰⴱⵕⵍⴰⵎⴰⵏⵉⵜ, ⴰⴷ ⵜⴰⵡⵙ ⴳ ⵓⵙⴷⵓⵙ ⵏ ⵜⵎⴷⵔⴰⵡⵜ ⵊⴰⵔ ⵜⵉⵎⵉⵣⴰⵔ ⵏⵏⵖ ⴷ ⵜⵙⴳⴰ ⵏ ⵓⵏⴰⵎⵎⴰⵙ ⴷ ⵓⵎⴰⴹⴰⵍ, ⴷ ⵓⵚⴽⵓ ⵏ ⵓⵙⴰⵢⵔⵓⵔ ⴰⴷⵎⵙⴰⵏ ⵏ ⵓⵙⵉⴷⴼ, ⵉⵣⵣⵉⴳⵣⵏ ⴳ ⵓⵙⴰⵜⵉ ⵏ ⵓⵔⴳⴳⵉⴳ ⴷ ⵓⴼⵔⴰ ⴷ ⵜⴷⵉⵎⵓⵇⵔⴰⵟⵉⵜ, ⵚⵉⵃⵉⵏⵜ ⵜⵉⵢⵢⴰⴼⵓⵜⵉⵏ ⵏⵏⵙ ⵉ ⴽⵓ ⵢⴰⵏ, ⵉⵍⵉⵏ ⴳⵉⵙ ⵡⴰⵜⵉⴳⵏ ⵏ ⵓⵎⵙⵓⵔⵓⴼ ⴷ ⵜⵎⵢⵉⴷⵉⵔⵜ ⵙ ⵓⵡⵇⵇⵔ ⵉⵜⵜⵓⵙⵏⴼⴰⵍⵏ. ⵎⴰⵛⵛ ⵙⵙⵓⵔⴼⴰⵜ ⵉⵢⵉ ⴰⴷ ⴷⴰⵖ ⵙⵙⴽⵯⵜⵉⵖ ⵎⴰⵙ ⴷ ⵜⵉⵎⵙⴽⴰⵔ ⵏ ⴽⵔⴰ ⵏ ⵜⵓⴷⴷⵉⵙⵏ ⵜⵉⵙⵔⵜⴰⵏⵉⵏ ⴳ ⵓⵕⵓⴱⴱⴰ ⴰⵔ ⵣⵣⵉⴳⵉⵣⵏⵜ ⵎⴳⴰⵍ ⵏ ⵓⵎⵏⴰⴷ ⴰⴷ.

ⴰⵔ ⵜⵙⵙⵀⵔⵛ, ⴷ ⴰⵔ ⵜⵙⵙⵄⵟⴰⵕ ⵜⵉⵍⵉⵜ ⵏ ⵜⵎⴷⵔⴰⵡⵉⵏ ⵏ ⵓⵎⵢⴰⵙ ⴳⴰⴷⴷⴰⵏⵉⵏ, ⵍⵍⵉ ⵔⴰⵏⵜ ⴰⴷ ⵙⴱⵣⵣⵉⵣⵏⵜ ⵉⵅⴼⴰⵏ ⵏⵏⵙⵏⵜ ⴼ ⵉⵎⴷⵔⴰⵡⵏ ⴰⵔ ⴽⵛⵛⵎⵏⵜ ⴳ ⵜⵖⴰⵡⵙⵉⵡⵉⵏ ⵜⵉⴳⵯⵏⵙⴰⵏⵉⵏ, ⴷ ⵜⵎⵔⵙⴰⵍ ⵏⵏⵙⵏⵜ ⵜⵉⴷⵙⵜⴰⵔⵉⵏ ⴷ ⵜⵎⵥⵍⴰⵢ ⵏⵏⵙⵜ. ⵙ ⵓⵖⵉⵍⵓⴼ, ⴷⴰ ⵉⵜⵜⵉⵍⵉ ⵎⴰ ⴰⵏⵏ ⵙ ⵉⵏⵇⵇⵉⵙⵏ ⵏ ⵜⴽⵔⴽⴰⵙ ⵜⵉⵍⵍⵉⵏⵉⵏ ⵙ ⵜⵓⵜⵔⴰ ⵢⵓⵊⴰⴷⵏ ⴷ ⴳⴰⵔ ⵉⵡⵜⵜⴰⵙⵏ. ⴷⴰ ⵏⵙⵙⵀⵔⴰⵛ ⵜⵉⴽⴽⵍⵉⵜ ⵢⴰⴷⵏⵉⵏ ⵜⵉⵎⵙⴽⴰⵔ ⴰⴷ ⵍⵍⵉ ⵍⵍⴰⵏⵉⵏ ⴳ ⵓⵙⵖⵍⴼ ⵏ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ, ⴷⴰ ⵙⴷⴷⵉⴷⵖ ⵎⴰⵙ ⴷ ⵜⵉⵎⴷⵔⴰⵡⵉⵏ ⵓⵔ ⴰⵔ ⵜⵜⵉⵍⵉⵏⵜ ⴷ ⵜⵉⴽⴽⵉ ⵏ ⵜⵎⵙⴰⵔⵉⵏ, ⴷ ⵉⵙⵡⵉⵏⴳⵉⵎⵏ ⴰⵢⴱⴱⴰⵜⵏ, ⴷ ⵜⵎⵎⵖⵔⵉ ⴼ ⵡⵉⵢⵢⴰⴹ. ⴰⵙⵓⵔⵙ ⵏⵏⵖ ⵉⵣⵣⵉⴳⵣⵏ ⴳ ⵜⵣⴷⴰⵢⵜ ⵏⵏⵖ ⴷ ⵜⴰⵎⵓⵜ ⵏ ⵓⵕⵓⴱⴱⴰ ⴷ ⵜⵎⴷⵔⴰⵡⵜ ⵏⵏⵖ ⵜⴰⵙⵜⵔⴰⵜⵉⵊⵉⵜ ⴰⴽⴷ ⵉⵙ ⵜⴱⵉⴷⴷ ⴼ ⵡⴰⵜⵉⴳⵏ ⴷ ⵉⵎⵏⵣⴰⵢⵏ ⴷⴰⵜ ⵏ ⵉⵚⴰⵃⴰⵜⵏ ⵍⵍⵉ ⴳⴳⵓⵜⵏⵉⵏ. ⴰⵢⵍⵍⵉ ⵉⴳⴰⵏ ⴰⴱⵓⵔⵣ ⴷ ⵓⵎⵛⴰⴱⴱⴰⴽ ⴷⴰⵔⵏⵖ.

ⵜⵉⵏⴳⴳⵯⴰ ⴷ ⵉⵏⴳⴳⵯⴰ, ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ, ⵜⴳⴰⵎ ⵉⵏⴰⴳⴰⵏ ⴼ ⵜⵡⵉⵙⵉ ⵉⵥⵉⵍⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵜⵎⴷⵔⴰⵡⵜ ⵓⵕⵓⵜⴰⵏⴰⵎⵎⴰⵙⵜ, ⴷ ⵓⵚⴽⵓ ⵏ ⵉⵎⴰⵙⵙⵏ ⵏⵏⵙ ⵉⴱⵕⵍⴰⵎⴰⵏⵉⵢⵏ. ⵢⵉⵡⵙ ⵓⴱⵕⵍⴰⵎⴰⵏ ⵏⵏⵖ ⴳ ⵓⴳⵔⴰⵡ ⵏ ⵓⴼⵔⴰ ⴷ ⵓⵎⵢⴰⵡⴰⵙ ⴳ ⵓⵏⴰⵎⵎⴰⵙ ⵙⴳ ⵉⵙⴳⴳⵯⴰⵙⵏ ⵏ 90 ⴷ ⵓⵙⵎⴰⵜⵜⵉ ⵏⵏⵙ ⵙ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ, ⴰⵙⴰⵜⵉ ⵍⵍⵉ ⴰⵖ ⵉⵙⵎⵓⵏⵏ ⴰⵙⵙ ⴰⴷ, ⵏⵙⵙⵉⵅⴼ ⵜⴰⵙⵓⵜⵍⵜ ⵏⵏⵙ ⵜⴰⵎⵙⴽⴰⵔⵜ ⴷ ⵜⵏⵙⵙⵉⵅⴼⵜ ⵏⵏⵙ ⵙ ⵓⵏⵙⵙⵉⵅⴼ ⵏ ⵡⴰⴷⴷⵓⵔ ⵏ ⵜⵎⴰⴷⴷⴰⵙⵜ ⵍⵍⵉ ⵜⵙⵙⵎⵖⵔⵎ ⴰⵙⵙ ⴰⴷ, ⵏⵙⵏⵓⴱⴳ ⵓⵍⴰ ⴽⵉⴳⴰⵏ ⵏ ⵜⵙⵎⵓⵏⴰⵢ ⵏⵏⵙ.

ⵏⵉⵡⵙ ⴰⴷ ⵢⵉⵍⵉ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⵓⵕⵓ ⴰⵏⴰⵎⵎⴰⵙ ⴳ 1998 ⵍⵍⵉ ⵉⴳⴰⵏ ⵜⴰⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⴳ 2004, ⵍⵍⵉ ⵉⴳⴰⵏ ⵖⵉⵍⴰⴷ ⵜⴰⵎⵙⵎⵓⵏⵜ ⵜⴰⴱⵕⴱⵕⵍⴰⵎⴰⵏⵉⵜ ⵏ ⵜⴰⵎⵓⵏⵜ ⵉ ⵓⵏⴰⵎⵎⴰⵙ, ⵉⴳ ⴳⵯⵎⴰⵜⵏⵖ ⵄⴰⴱⴷⵍⵡⴰⵃⴷ ⵕⵕⴰⴹⵉ, ⴰⵏⵙⵙⵉⵅⴼ ⵏ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⵙⴳ ⵎⴰⴷ ⵉⵍⵍⴰ ⵜⴰⵎⴰ ⵏ ⵉⵏⵙⵙⵉⵅⴼⵏ ⵏ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ, ⴰⵢⵍⵍⵉⵖ ⵉⴳⴰ ⵜⴰⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ. ⴳ ⵡⴰⵕⵛⵉⴼ ⴰⵙⵍⵉⵥⵉⵕ ⴷ ⵓⵎⵉⵔⴰⵢ ⵏ ⵓⴱⵕⵍⴰⵎⴰⵏ ⵏ ⵓⵔⵓⴱⴱⴰ ⵜⵉⵎⵉⵜⴰⵔ ⴼ ⵜⵡⵉⵣⵉ ⵏ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴳ ⵓⵚⴽⵓ ⵏ ⵉⵎⴰⵙⵙⵏ ⴰⴷ, ⴷ ⵎⴰⴷ ⵉⵙⵉⴳⴳⵉⵍ ⴳ ⵓⵎⵏⴰⴹ ⵍⵍⵉ ⴰⴽⴽⵯ ⵜⵙⵙⵏⵎ.

ⵜⴳⴰⵎ ⵓⵍⴰ ⵉⵏⴰⴳⴰⵏ ⵎⴰⵙ ⴷ ⵜⴰⴳⵍⴷⵉⵜ ⵏ ⵍⵎⵖⵔⵉⴱⵏ ⴰⵡⴰⵏⴽ ⴰⵅⴰⵜⴰⵔ ⵍⵍⵉ ⵉⵎⵎⵔⵏ ⵙ ⵓⵙⵏⵓⴱⴳ ⵏⵏⵓⵏ, ⵜⴰⵎⴰⵣⵉⵔⵜ ⵉⵟⵟⴰⴼⵏ ⵜⵉⵎⴰⵙⴰⵢⵉⵏ ⵏⵏⵙ ⵜⵉⴳⵔⴰⵖⵍⴰⵏⵉⵏ ⴷ ⵜⵙⴳⴰⵡⴰⵏⵉⵏ ⴳ ⵜⵎⵙⴰⵔⵉⵏ ⵜⵉⴳⵔⴰⵖⵍⴰⵏⵉⵏ ⵜⵉⴷⵙⵍⴰⵏⵉⵏ: ⴰⵙⴱⴷⴷⵉ ⵏ ⵓⴱⵔⵙⵙⵉⵡⴷ, ⵜⴰⵡⵡⵓⵔⵉ ⵉ ⵓⴼⵔⴰ ⴷ ⵓⵙⵡⵓⴷⴷⵓ ⴰⵏⴼⴳⴰⵏ ⴷ ⵓⵎⵢⴰⵡⴰⵙ ⵏ ⵓⵣⵡⴰⴳ, ⴰⵙⴱⴷⴷⵉ ⵏ ⵜⵎⵓⴽⵔⵉⵙⵉⵏ ⵏ ⵓⵏⵣⵡⵉ ⴷ ⵓⵎⵢⴰⵡⴰⵙ ⵉ ⵜⴳⵎⵉ ⴷ ⵓⴷⵔⴰⵡ ⵏ ⵜⵎⵓⵣⴰⵢⵉⵏ ⴰⴽⴷ ⴰⵢⵜⵎⴰⵜⵏⵖ ⴳ ⵉⴼⵔⵉⵇⵢⴰ.

ⵟⵟⴰⴼⵏⵜ ⵜⵎⵉⵣⴰⵔ ⵏ ⵉⴼⴼⵓⵙ ⵇ ⵍⵇⴱⵍⵜ ⵏ ⵓⵏⴰⵎⵎⴰⵙ, ⴳⵉⵙⵏⵜ ⵜⴰⴳⵍⴷⵉⵜ ⵏ ⵍⵎⵖⵔⵉⴱ, ⵜⵉⵎⵔⵙⴰⵍ ⵜⵉⴷⵙⵜⴰⵔⵉⵏ, ⴷ ⵉⵎⴰⵙⵙⵏ, ⴷ ⵉⴽⴰⴱⴰⵕⵏ, ⴷ ⵜⴳⵔⴰⵡⵉⵏ ⵜⵉⵖⵔⵎⴰⵏⵉⵏ ⵏ ⵓⵙⴽⵔ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵉⴹⴰⴼ ⵏ ⵓⵡⵇⵇⵔ ⵏⵏⵙⵏ, ⵉⵇⵇⴰⵏ ⴷ ⵓⵡⵇⵇⵔ ⵏ ⵜⵎⵔⵙⴰⵍ ⵏⵏⵙ ⴷ ⵉⵙⵜⴰⵢⵏ ⵏⵏⵙⵏⵜ ⴷ ⵡⴰⵔ ⴰⴽⵛⵓⵎ ⴳ ⵜⵖⴰⵡⵙⵉⵡⵉⵏ ⵏⵏⵙⵏⵜ ⵜⵉⴳⵯⵏⵙⴰⵏⵉⵏ.

ⵉⵇⵇⴰⵏ ⴷ ⴽⵓ ⵢⴰⵏ ⴰⴷ ⵉⴼⵔⴽ ⵎⴰⵙ ⴷ ⵜⴰⴷⵉⵎⵓⵇⵔⴰⵟⵉⵜ  ⵓⵔ ⵜⴳⵉ ⵜⵉⵍⴳⴰⵎⵉⵏ ⵏ ⴱⵕⵕⴰ, ⵜⴳⴰ ⵉⵙⴳⵓⴷⵉⵜⵏ, ⴷ ⵓⵚⵍⵓ ⵏ ⵜⵎⵔⵙⴰⵍ ⴱⵉⴷⴷⵏⵉⵏ ⴼ ⵉⵙⵜⴰⵢⵏ ⵉⵍⴻⵍⵍⵉⵢⵏ  ⴷ ⵉⵎⴰⴼⴰⵡⵏ ⵙ ⵜⴷⵔⴰⵡⵜ ⵏ ⵓⴷⴷⵉⵔⵏ ⵉⵙⵔⵜⴰⵏⵏ ⴼⵔⴽⵏⵉⵏ ⵙ ⵜⴷⵉⵎⵓⵇⵔⴰⵟⵉⵜ, ⵍⵍⵉ ⵙⵏⵎⴰⵍⴰⵏⵜ ⵜⵎⵉⵣⴰⵔ ⵏⵏⵖ ⵙ ⵜⵖⴰⵔⴰⵙⵜ ⵉⵙⵓⵍⵏ.

ⴳ ⵜⵙⴳⴰ ⵢⴰⴹⵏ, ⵜⴰⴷⵓⵙⵉ ⵏ ⵜⵙⴳⴰ ⵜⴰⵏⴰⵎⴰⵙⵙⵜ ⵓⵔ ⵜⵍⵍⵉ ⵖ ⵜⵉⵟⵟⵉⵜ ⴷ ⵓⵙⵉⵎⵥⵉ ⵏ ⵉⵎⴷⵔⴰⵡⵏ, ⵎⴰⵛⵛ ⵜⵍⵍⴰ ⵙ ⵓⵙⴽⵔ ⵙ ⵓⵙⵏⵍⵉ ⵏ ⵉⵏⵎⵖⵓⵔⵏ ⴰⵎ ⴰⵕⵉⵙⵟⵓ ⴷ ⵉⴱⵏ ⵕⵓⵛⴷ ⴷ ⴷⵉⴽⴰⵕⵜ, ⴷ ⵜⵡⵡⵓⵔⵉ ⵉⵖⵣⴰⵏ ⵙ ⵓⵖⵓⵍ ⵏ ⵉⵎⴰⵏ ⵏ ⴼⴰⵙ ⴷ ⴰⵜⵉⵏⴰ ⴷ ⵖⵔⵏⴰⵟⴰ ⴷ ⵕⵓⵎⴰ ⴷ ⵍⵉⵙⴽⴰⵏⴷⴰⵔⵉⵢⵢⴰ, ⵍⵍⵉ ⵉⴳⴰⵏ ⵉⵎⴰⵏ ⵏ ⵜⵎⵉⴷⵉⵔⵜ ⴷ ⵓⵎⵙⵓⵔⵓⴼ ⴷ ⵉⵙⵏⴼⵍⵏ ⵉⴷⵍⵙⴰⵏⵏ ⴷ ⵉⵎⵜⵜⵉⵡⵏ.

ⴰⵔ ⴷⴰⵖ ⵙⵔⵓⵏ ⵙⴱⵔⵔⴰⴽⵖ ⴷ ⴰⵔ ⴽⵏ ⵙⵏⵉⵎⵎⵉⵔⵖ ⴼ ⵓⵙⵙⴼⵍⴷ ⵏⵏⵓⵏ