ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵜⴰⵙⵎⵓⵏⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⵢⵏⴰⵙ 15 ⵢⵓⵏⵢⵓ 2020
ⵉⵙⵏⵎⴰⵍⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵜⴰⵙⵎⵓⵏⵉ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⵙⵙ ⵏ ⵡⴰⵢⵏⴰⵙ 15 ⵢⵓⵏⵢⵓ 2020, ⵜⵥⵍⵉ ⵉ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ.
ⵖ ⵜⵣⵡⵉⵔⵉ, ⵙ ⵓⵍⴰⵡⵏ ⵖ ⵜⵍⵍⴰ ⵜⵓⵎⵔⵜ ⴷ ⵉⵎⵉⵔⵉ ⴳⴳⵓⵜⵏⵉⵏ, ⵢⵓⵣⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⴽⵓ ⵉⴼⵔⴷⴰⵙ ⵉⵙⵔⵜⴰⵏⵏ ⵉⵙⵔⵖⴷⵏ ⴱⴰⵀⵔⴰ ⴼⵓⵍⴽⵉⵏⵉⵏ ⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ ⵉⵏⵊⵊⵓ ⵜ ⴷ ⵓⵎⴰⴷⴰⵏ ⴰⵎⵖⵔⵉⴱⵉ ⴰⴽⴽⵯ ⵙ ⵜⵎⵍⴷⴰ ⵏ ⵓⵎⵓⵔⵙ ⵏ ⵓⴼⵍⴰⵢ ⵍⵍⵉ ⵉⵙⴽⵔ ⴱⴰⴱ ⵏ ⵡⴰⴷⴷⵓⵔ, ⵉⵏⵉⵏ ⴽⵓ ⵉⵙⵉⵜⴰⵎ ⵏⵏⵙⵏ ⵉ ⴱⴰⴱ ⵏ ⵡⴰⴷⴷⵓⵔ, ⵜⵜⵔⵏ ⵕⴱⴱⵉ ⴰⴷ ⵜ ⵉⵃⴼⴹ ⵉⴷⴰⵡⵎ ⴼⵍⵍⴰⵙ ⵜⴰⴷⵓⵙⵉ ⵃⵎⴰ ⴰⴷ ⵉⴳ ⵉⵎⵃⴹⵉ ⴷ ⵓⵖⴱⴰⵍⵓ ⵏ ⵜⵎⴰⵣⵉⵔⵜ ⴰⴷ ⵜⴰⵏⴰⵖⵍⴰⴼⵜ.
ⵜⵙⵙⴽⵜⵉ ⴷ ⵜⵙⵎⵓⵏⵉ ⴰⴷ ⵙ ⴽⵉⴳⴰⵏ ⵏ ⵓⵙⵓⵜⴳ ⵜⵓⴳⴳⴰⵙ ⵥⵉⵍⵏⵉⵏ ⵍⵍⵉ ⵉⵙⴽⴰⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ, ⵖ ⵓⴹⴼⵕ ⵏ ⴽⵉⴳⴰⵏ ⵏ ⵉⵡⴰⵏⴽⵏ ⵉⴼⵔⵉⵇⵉⵢⵏ ⵖ ⵜⵓⴳⴳⴰⵙ ⵏ ⵓⵙⴱⴷⴷⵉ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ, ⵙ ⵜⵉⴽⴽⵉ ⵏ ⵜⵡⵉⵙⵉ ⵜⴰⴷⵓⵙⴰⵏⵜ ⵉ ⵙⵎⵎⵓⵙ ⴷ ⵎⵔⴰⵡ ⵏ ⵓⵡⴰⵏⴽ ⴰⴼⵔⵉⵇⵉ, ⵙ ⵜⵡⵓⵔⵉ ⵏ ⵜⵡⵉⵣⵉ ⵉⴽⵛⵎⵏ ⵖ ⵜⵙⵏⵜⴰⵢⵜ ⵍⵍⵉ ⵉⵙⴽⵔ ⵓⴳⵍⵍⵉⴷ ⴰⵎⵖⵔⵉⴱⵉ ⵖ ⵡⴰⵢⵢⵓⵔ ⵏ ⵉⴱⵔⵉⵔ ⵍⵍⵉ ⵉⵣⵔⵉⵏ. ⵖⵎⴽ ⵍⵍⵉ ⵏⵏⴰⵏ ⵉⴼⵔⴷⴰⵙ ⵏ ⵓⵙⵇⵇⵉⵎ ⴰⵙⵓⵜⴳ ⵏⵏⵙⵏ ⵉ ⵜⵙⵏⵜⴰⵢⵜ ⴰⴷ ⵉⵥⵉⵍⵏ ⵍⵍⵉ ⵉⴳⴰⵏ ⵢⴰⵜ ⵜⵎⵍⴷⴰ ⵏ ⵓⵙⵓⵜⴳ ⵏ ⵜⵙⵓⴳⴰⵔ ⵏ ⵜⵎⵙⵙⵏⵜⴰⵢⵜ ⵜⴰⵎⵖⵔⵉⴱⵉⵜ ⵜⴰⵏⵎⵓⵔⵉⵜ ⵍⵍⵉ ⵉⵥⴹⴰⵕⵏ ⴰⴷ ⵜⵙⴽⵔ ⵜⵉⵎⵜⵜⴰⵡⵉⵏ ⴰⴷ ⵙ ⵓⵎⵙⴰⵙⴰ ⴷ ⵉⵙⵓⵖⴰⵍ ⵏ ⵜⵎⴰⴷⴷⴰⵙⵜ ⵏ ⵜⴷⵓⵙⵉ ⵜⴰⵎⴰⴹⵍⴰⵏⵜ.
ⵖ ⵜⵎⵙⴰⵔⵜ ⵜⴰⴼⵉⵍⵙⵟⵉⵏⵉⵜ ⵉⴳⴰⵏ ⵜⴰⵣⵔⴼⴰⵏⵜ, ⵏⵏⴰⵏ ⴷⴰⵖ ⵉⴼⵔⴷⴰⵙ ⵏ ⵓⵙⵇⵇⵉⵎ ⴰⴱⴷⴷⴰⴷ ⴼ ⵉⵎⵏⵣⴰⵢⵏ ⵉⵙⵉⵍⴰⵏⵏ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵍⵇⵓⴷⵙ ⴰⴷ ⵜ ⵉⵃⴼⴹ ⵕⴱⴱⵉ, ⵍⵍⵉ ⴱⴷⴷⴰ ⴳⴰⵏⵉⵏ ⴰⵙⵏⴰⵍ ⵏ ⵉⵣⵔⴼⴰⵏ ⵏ ⵓⵎⴰⴷⴰⵏ ⴰⴼⵉⵍⵙⵟⵉⵏⵉ ⴷ ⵓⵚⴽⴰⵡ ⵏ ⵓⵡⴰⵏⴽ ⴰⴼⵉⵍⵙⵟⵉⵏⵉ ⵎⵓ ⵉⴳⴰ ⵍⵇⵓⴷⵙ ⵛⵛⴰⵔⵉⴼ ⵜⴰⵎⴰⵥⵓⵏⵜ ⵏⵏⵙ, ⵖⵎⴽ ⵍⵍⵉ ⵙⵙⵀⵔⵛⵏ ⵜⵉⵕⵥⵉ ⵉⵅⵛⵏⵏ ⴷ ⵉⵙⵓⵍⵏ ⵏ ⵜⵏⴱⴰⴹⵉⵏ ⵏ ⵓⵙⴷⵓⵔⵔⵉ ⵖ ⵓⵙⴽⵕⵕⵥ ⴷ ⵓⴽⴽⵓⵙ ⵏ ⵉⴽⴰⵍⵉⵡⵏ ⴷ ⵜⵏⵖⵉ ⵏ ⵉⴷⵔⵉⵡⵛⵏ ⴷ ⵜⵉⵕⵥⵉ ⵏ ⵜⵙⵏⵜⴰⵢⵜ ⵏ ⵓⴼⵔⴰ.
ⵖ ⵜⵉⴹⴰⴼ ⵜⴰⵏⵎⵍⴰⵙⵙⵜ, ⵎⴹⴰⴽⴰⵕⵏ ⵉⴼⵔⴷⴰⵙ ⵏ ⵓⵙⵇⵇⵉⵎ ⴼ ⵓⵙⵖⵉⵡⵙ ⵏ ⵡⴰⴽⵓⴷ ⵏ ⵉⴳⵔⴰⵏ ⵉⵎⴰⵡⵙⴰⵙⵏ ⵍⵍⵉ ⵉⵙⵔⵙ ⵓⵙⵉⵔⴰ ⵏ ⵓⵙⵇⵇⵉⵎ ⵖ ⴽⵔⴰⵢⴳⴰⵜⵜ ⵜⵉⵖⵉⵎⵉⵜ, ⵔⴰⴷ ⴳⵉⵙⵏ ⵉⵍⵉⵏ ⵡⵉⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵜⴷⵓⵙⵉ ⴷ ⵜⵥⴹⴰⵕⵜ ⴷ ⵉⵣⵓⵖⴰⵣ ⵖ ⵜⵖⵉⵎⵉⵜ ⵏ ⵡⴰⵢⵏⴰⵙ 22 ⵢⵓⵏⵢⵓ.
ⵃⵎⴰ ⴰⴷ ⵢⵉⵍⵉ ⵓⵙⵉⴼⴹ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵉⵜⵜⵓⵙⵏⴼⴰⵍⵏ ⴼ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵜⵎⴷⴰⵡⴰⵍ ⵜⵙⵎⵓⵏⵉ ⵜⵙⵓⵜⴳ ⵓⵍⴰ ⴰⵎⴹⴰⴽⴰⵕ ⴰⴷⵙⵜⴰⵔ ⴷ ⵓⵣⵣⵔⴰⴼ ⵍⵍⵉ ⵉⵎⵓⵏⵏ ⴷ ⵜⵉⵔⵎⵉⵜ ⴰⴷ ⵜⴰⵎⵣⵡⴰⵔⵓⵜ ⵖ ⵜⵉⴼⴰⵡⵜ ⵏ ⵓⴷⵓⵙⵜⵓⵔ ⴰⵎⴰⵢⵏⵓ ⵏ ⵜⴳⵍⴷⵉⵜ, ⵖⵎⴽ ⵍⵍⵉ ⴱⴷⴷⵏ ⴼ ⵡⴰⵜⵉⴳ ⵏ ⵓⵙⵔⵙ ⴰⴷ ⵉⵍⵍⴰⵏ ⵖ ⵢⴰⵏ ⵓⵎⵏⴰⴹ ⴰⴽⵓⴷⴰⵏ ⵉⵥⵍⵉⵏ, ⵢⵉⵍⵉ ⵓⵎⵛⴰⵛⴽⴰ ⴼ ⵡⴰⵜⵉⴳ ⵏ ⵓⵣⴷⴷⵓⵢ ⴷ ⴽⵓ ⵜⴰⵙⴳⵉⵡⵉⵏ ⵖ ⵜⵍⵍⴰ ⵜⵏⴱⴰⴹⵜ ⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵃⵎⴰ ⴰⴷ ⵜⵉⵍⵉ ⵢⴰⵜ ⵜⴱⵔⵉⴷⵜ ⵏ ⵜⵡⵓⵔⵉ ⵖ ⵜⵍⵍⴰ ⵜⵉⵕⵡⵉ ⴷ ⵚⴰⵃⴰ.