ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵜⴰⵙⵎⵓⵏⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ, ⴰⴽⵕⴰⵙ 15 ⵉⴱⵔⵉⵔ 2020
ⵉⵙⵏⵎⴰⵍⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵜⴰⵙⵎⵓⵏⵉ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ, ⴰⵙⵙ ⵏ ⵓⴽⵕⴰⵙ 15 ⵉⴱⵔⵉⵔ 2020.
ⵖ ⵜⵣⵡⵉⵔⵉ ⵏ ⵜⵙⵎⵓⵏⵉ ⴰⴷ, ⵏⵏⴰⵏ ⴽⵓⵍⵍⵓ ⵡⵉⵍⵍⵉ ⵃⴰⴹⵕⵏⵉⵏ ⵙ ⵢⴰⵏ ⵡⴰⵡⴰⵍ ⴰⵙⵓⵜⴳ ⴷ ⵓⵙⵙⵓⵙⵎ ⵏ ⵡⴰⴷⴷⴰⴷⵏ ⴷ ⵜⵙⵏⵜⴰⵢⵉⵏ ⵍⵍⵉ ⵉⵙⴽⴰⵔ ⵍⵎⴰⵖⵔⵉⴱ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ, ⴰⵢⵍⵍⵉ ⵉⴳⴰⵏ ⴰⴱⵓⵔⵣ ⵉ ⴽⵓ ⵜⴰⵎⵖⵔⵉⴱⵉⵜ ⴷ ⵓⵎⵖⵔⵉⴱⵉ ⴷ ⵉⵎⵖⵔⴰⴱⵉⵢⵏ ⵎⴰⵕⵕⴰ ⵍⵍⵉ ⴷ ⵉⵎⵍⴰⵏ ⴰⵎⵢⴰⵎⴰⵥ ⴷ ⵜⵡⵉⵣⵉ ⵖ ⵜⴼⵔⴽⵉⵡⵉⵏ ⵛⴷⴷⴰⵏⵉⵏ, ⴰⵢⵍⵍⵉ ⵔⴰⴷ ⵉⵙⵙⵎⵖⵔ ⵜⵉⵥⵥⵉⴹⵕⴰ ⵏ ⵍⵎⴰⵖⵔⵉⴱ ⴷⴰⵜ ⵏ ⴽⵓ ⵜⵉⵏⵥⴰⵕ.
ⵉⵙⴰⵡⵍ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⴼ ⵡⴰⵍⵜⴰⵖ ⵏⵏⵙⵏ ⵉⵙⵎⴷⵏ ⵖ ⵓⵙⵎⵓⵙⵙⵓ ⵏ ⵜⵥⵉⴹⴰⵕ ⵉⵍⵍⴰⵏ ⴷⴰⵔ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵖ ⵓⵣⵣⵔⴰⴼ ⴷ ⵜⵉⴹⴰⴼ, ⵃⵎⴰ ⴰⴷ ⵢⵉⵍⵉ ⵓⵏⵢⴰⵍⴽⴰⵎ ⴷ ⵡⴰⵎⵓⵏ ⵢⵉⵍⵉ ⵓⵅⵎⵎⴻⵎ ⵖ ⵜⵎⵓⴽⵔⵉⵙⵉⵏ ⵏⵏⵙ ⴷ ⵓⴼⵙⴰⵔ ⵏ ⵉⴼⵙⵙⴰⵢⵏ ⴷ ⵜⵙⵓⵎⴰⵔ ⵉ ⴽⵓ ⵉⴳⵔⴰⵏ ⵏ ⵜⵏⴱⴰⴹⵜ.
ⵖ ⵓⵎⵏⵉⴷ ⴰⴷ, ⵉⵙⵙⴽⵜⵉ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵜⵉⴳ ⵏ ⵜⵙⵎⵓⵏⴰⵢ ⵍⵍⵉ ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ ⴷ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⴷ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵙⵢⴰⴼⵓⵜⵏ ⴷ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ ⵖ ⵉⵎⵔⵙⵉⵡⵏ ⵏ ⵓⵣⵣⵔⴰⴼ ⴷ ⵜⵉⴹⴰⴼ ⵍⵍⵉ ⵀⵎⵎⴰⵏⵉⵏ ⵉⵏⵎⵓⵔⴰⵏ ⵖ ⵉⴳⵔⴰⵏ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵜⴷⵓⵡⵙⴰ ⴷ ⵜⵏⴼⵔⵓⵜ, ⵀⵎⵎⵓⵏⵜ ⵓⵍⴰ ⴰⴼⵍⵍⴰⵃ ⴰⵎⵖⵔⵉⴱⵉ ⵍⵍⵉ ⵢⵉⵡⵉⵏ ⴰⵙⵓⵜⴳ ⵏ ⴽⵓ ⵡⵉⵍⵍⵉ ⵍⵍⴰⵏⵉⵏ ⵖ ⵜⵙⵎⵓⵏⵉ ⴰⴷ, ⵉⵏⵉⵏ ⵎⴰⵙ ⴷ ⵉⵇⵇⴰⵏ ⵡⴰⵏⵏⴰⵍ ⵏⵏⵙ ⵙⵍⴰⵡⴰⵏ ⴰⴽⴽⵯ ⵖ ⵜⵎⵙⵓⵜⴰⵍ ⴰⴷ ⵏ ⵜⵖⴰⵔⵜ.
ⵖ ⵉⵎⵔⵙⵉ ⵏ ⵉⵎⵖⵔⴰⴱⵉⵢⵏ ⵍⵍⵉ ⵏⵏ ⵖⴰⵎⴰⵏⵉⵏ ⵖ ⴱⵕⵕⴰ, ⵉⴱⴷⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⴼ ⵜⵎⵓⴽⵔⵉⵙⵜ ⵏ ⴰⵢⵜⵎⴰⵜⵏⵖ ⵍⵍⵉ ⵏⵏ ⵖⴰⵎⴰⵏⵉⵏ ⵖ ⴱⵕⵕⴰ ⵏ ⵜⵎⴰⵣⵉⵔⵜ, ⴷ ⵓⵙⵓⵔⵙ ⵉⵛⴷⴷⴰⵏ ⵍⵍⵉⵖ ⴷⴷⵔⵏ ⵖ ⵜⴰⴳⴳⵓⴳⵜ ⴼ ⵜⴰⵡⵊⵉⵡⵉⵏ ⵏⵏⵙⵏ ⴷ ⴰⵢⵜ ⴷⴰⵔⵙⵏ, ⵎⴰⵢⴰ ⴷ ⵉⴳⴰ ⵉⵎⵔⵙⵉ ⵏ ⵜⵙⵎⵓⵏⵉ ⵜⴰⵎⵙⴼⵔⴰⵡⵜ ⵏ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ ⴷ ⵉⵎⵖⵔⴰⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ, ⵏⵏⴰⵏ ⴳⵉⵙ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⴰⵙⵓⵜⴳ ⵏⵏⵙⵏ ⵉ ⵜⵓⴳⴳⴰⵙ ⵉⵣⵣⵉⴳⵣⵏ ⵍⵍⵉ ⵙⴽⴰⵔⵏⵜ ⵜⵎⴰⵣⴰⵏⵉⵏ ⵜⵉⴷⵓⴱⵍⵓⵎⴰⵙⵉⵢⵉⵏ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵃⵎⴰ ⴰⴷ ⵢⵉⵍⵉ ⵓⴹⴼⵓⵕ ⴷ ⵡⴰⵏⵏⴰⵍ ⵏ ⵉⵏⵎⵓⵔⴰⵏ ⵏⵏⵖ, ⵙⴷⴷⵉⴷⵏ ⵖ ⵓⵎⵏⵉⴷ ⴰⴷ ⵖ ⵓⵅⵎⵎⴻⵎ ⵏⵏⵙⵏ ⵃⵎⴰ ⴰⴷ ⴷ ⵓⵔⵔⵉⵏ ⵙ ⵜⴷⴳⴳⴰⵔⵉⵏ ⵉⵍⵍⴰⵏ ⵖ ⵢⴰⵏ ⵓⵖⴰⵡⴰⵙ ⵉⴼⴰⵡⵏ, ⵖⵎⴽ ⵍⵍⵉ ⵖⵔⴰⵏ ⴰⴷ ⵙⵓⵍ ⵉⵍⵍⵉⵏⵜ ⵜⵓⴳⴳⴰⵙ ⵢⴰⴹⵏⵉⵏ ⵖ ⵜⵏⵟⵟⵓⴼⵜ ⵏⵏⵙⵏ, ⵉⵍⵉⵏⵜ ⵓⵍⴰ ⵜⴼⴰⴷⵉⵡⵉⵏ ⴰⴷ ⴷⴷⵔⵏ ⵙ ⵜⵖⴰⵔⴰⵙⵜ ⵉⵥⵉⵍⵏ.
ⵜⵖⵔⴰ ⵜⵙⵎⵓⵏⵉ ⴰⴷ ⵉ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ ⴷ ⵉⵎⵖⵔⴰⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ ⴰⴷ ⵜⵜⵓⵙⴽⵉⵔ ⵢⴰⵜ ⵜⵓⵙⵎⵉⵔⵜ ⵜⴰⵎⵙⴼⵔⴰⵡⵜ ⵖ ⵍⵍⴰⵏⵜ ⴽⵓ ⵜⵓⵜⵔⵉⵡⵉⵏ ⴷ ⵜⵙⵓⵎⴰⵔ ⵍⵍⵉ ⵔⴰⴷ ⵢⴰⵣⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵉ ⵓⵏⵙⵙⵉⵅⴼ ⵏ ⵜⵏⴱⴰⴹⵜ.
ⵖⵎⴽ ⵍⵍⵉ ⵜⵙⴰⵡⵍ ⵜⵙⵎⵓⵏⵉ ⴼ ⵜⵖⵓⵔⵉ ⵉⴳⴳⵓⵔⴰⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ, ⵜⴰⵙⵏⵜⴰⵢⵜ ⵜⴰⴼⵔⵉⵇⵉⵜ ⵏ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⵙ ⵓⵙⵙⵕⵚⵓ ⵏ ⵢⴰⵏ ⵓⵙⴰⵜⵉ ⴰⵎⵙⴽⴰⵔⴰⵏ ⵖ ⵜⵍⵍⴰ ⵜⴹⴼⵕⵉ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⵖ ⵜⴼⵔⴽⵉⵡⵉⵏ ⵏ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵙ ⵓⴷⵔⴰⵡ ⵏ ⵜⵉⵔⵎⵉⵜⵉⵏ ⴷ ⵜⵎⵙⴽⴰⵔ ⵥⵉⵍⵏⵉⵏ. ⵉⴱⴷⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵜⵏⵙⵙⵉⵅⴼⵜ ⴷ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⴼ ⵡⴰⵜⵉⴳ ⵏ ⵜⵙⵏⵜⴰⵢⵜ ⴰⴷ ⵍⵍⵉ ⵉⵙⴷⴷⵉⴷⵏ ⴼ ⵜⴷⵔⵓⵜ ⵜⴰⴼⵔⵉⵇⵉⵜ ⵏ ⵍⵎⵖⵔⵉⴱ ⴷ ⵉⴼⵔⴰⵢⵏ ⵥⵉⵍⵏⵉⵏ ⵏ ⵍⵎⵖⵔⵉⴱ ⵉ ⵉⵎⴰⴷⴰⵏⵏ ⵏ ⵓⵎⵏⵥⴰⵡ ⴰⴼⵔⵉⵇⵉ.
ⵖ ⵓⵎⵏⵉⴷ ⵏ ⵜⴱⵔⵉⴷⵉⵏ ⵉⵍⵍⴰⵏ ⵖ ⵓⵙⴽⴰⵔ ⵏ ⵓⵙⵇⵇⵉⵎ ⵏ ⵜⵥⵍⴰⵢⵉⵏ ⵏⵏⵙ ⵜⵉⴷⵙⵜⴰⵔⵉⵏ, ⵜⵙⴷⴷⵉⴷ ⵜⵙⵎⵓⵏⵉ ⵜⵉⴽⴽⵍⵉⵜ ⵢⴰⴹⵏⵉⵏ ⵎⴰⵙ ⴰ ⵜⵣⵣⵔⴰⵢ ⵜⵎⵙⴽⵔⵜ ⴰⴷ ⵙ ⵓⵡⵇⵇⵔ ⵉⵙⵎⴷⵏ ⵏ ⵓⴷⵓⵙⵜⵓⵔ ⴷ ⵢⵉⵎⴰⵏ ⵖ ⵉⵍⵍⴰ ⵓⴼⵏⵥⴰⵢ ⴷ ⵓⵎⴽⵕⴰⴹ ⴰⵏⴰⵎⵓⵔ.
ⵖ ⵓⵎⵏⵉⴷ ⵏ ⵓⵙⵏⵎⴰⵍⴰ ⵏ ⵜⵡⵓⵔⵉ ⵏ ⵜⵙⵇⵇⵉⵎⵉⵏ, ⵉⵖⵔⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵉ ⵓⵙⵔⵙ ⵏ ⵢⴰⵏ ⵓⵖⴰⵡⴰⵙ ⴰⵎⵙⴼⵔⴰⵡ ⵏ ⵜⵡⵓⵔⵉ ⵖ ⵓⵣⵣⵔⴰⴼ ⴷ ⵜⵉⴹⴰⴼ ⵖ ⵜⵍⵍⴰ ⵜⵏⵓⴼⴰ ⵜⴰⵏⴰⵎⵓⵔⵜ ⵖ ⵡⴰⴷⴷⴰⴷⵏ ⵏ ⵓⵖⴰⵡⴰⵍ.
ⵖⵎⴽ ⵍⵍⵉ ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴼ ⵓⵣⵣⵔⴰⵢ ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⵍⵍⵉ ⵉⴳⴰⵏ ⴰⵙⵙ ⴰⴷ ⵢⴰⵜ ⵜⵙⴰⵡⵔⵜ ⵉⵏⵏⵓⵕⵥⵎⵏ ⵉ ⵓⵎⴹⴰⴽⴰⵕ, ⵉⵙⴷⴷⵉⴷ ⵖ ⵓⵎⵏⵉⴷ ⴰⴷ ⵎⴰⵙ ⵔⴰⴷ ⵉⵙⵙⵓⵊⴷ ⴰⵙⴰⵜⵉ ⴷ ⵢⵓⵙⴰⵏ ⵉ ⵓⵣⵣⵔⴰⵢ ⵏⵏⵙ.