ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴰⵙⵉⵡⴹ ⴼ ⵜⵙⵎⵓⵏⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⴽⵕⴰⵙ 15 ⵉⴱⵔⵉⵔ 2020
ⵉⵙⵏⵎⴰⵍⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵜⴰⵙⵎⵓⵏⵉ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⵙⵙ ⵏ ⵓⴽⵕⴰⵙ 15 ⵉⴱⵔⵉⵔ 2020, ⵜⵥⵍⵉ ⵉ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ ⵖ ⵓⵣⵣⵔⴰⴼ ⴷ ⵜⵉⴹⴰⴼ.
ⵖ ⵜⵣⵡⵉⵔⵉ ⵏ ⵜⵙⵎⵓⵏⵉ, ⵉⵙⵙⴽⵜⵉ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵉ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵖⵜⴰⵙⵉⵏ ⴷ ⵜⵓⵙⵎⵉⵔⵉⵏ ⵍⵍⵉ ⴷ ⵙⵙⴼⵖⵏ ⵉⵏⴳⵎⴰⵎⵏ ⵏ ⵓⵙⵇⵇⵉⵎ, ⵙⴷⴷⵉⴷⵏ ⴼ ⵡⴰⵜⵉⴳ ⴷ ⵜⵉⵕⵡⵉ ⵏ ⵜⵎⵢⴰⴷⴰⵙⵜ ⵉⵜⵜⵓⵙⴽⴰⵔⵏ ⵖ ⵓⵙⵡⵓⴷⴷⵓ ⵏ ⵜⵡⵓⵔⵉ ⵏ ⵓⵙⵇⵇⵉⵎ ⵖ ⵓⵣⵣⵔⴰⴼ ⴷ ⵜⵉⴹⴰⴼ ⵙ ⵓⵎⵙⴰⵙⴰ ⵉⵙⵎⴷⵏ ⴷ ⵉⴱⴹⵉⵢⵏ ⵏ ⵓⴷⵓⵙⵜⵓⵔ.
ⵖⵎⴽ ⵍⵍⵉ ⵜⵙⴷⴷⵉⴷ ⵜⵙⵎⵓⵏⵉ ⴼ ⵡⴰⵜⵉⴳ ⵏ ⵜⵎⴰⵎⴽⵜ ⵜⴰⵎⴰⵢⵏⵓⵜ ⵏ ⵓⵎⵙⴰⵡⴰⴹ ⵏ ⵓⵙⵇⵇⵉⵎ ⵍⵍⵉ ⵉⵣⵉⵢⵢⴷⵏ ⵖ ⵓⵏⵏⵓⵕⵥⵎ ⵏⵏⵙ ⴼ ⴱⵕⵕⴰ, ⴰⵢⵍⵍⵉ ⵢⵉⵡⵙⵏ ⵉ ⵓⵎⴰⴷⴰⵏ ⴰⵎⵖⵔⵉⴱⵉ ⴰⴷ ⵉⵥⵕ ⵙ ⵡⴰⴷⴰⵙ ⵜⵉⵎⵙⴰⵔⵉⵏ ⴷ ⵉⵅⵎⵎⵉⵎⵏ ⵉⴷⵙⵍⴰⵏⵏ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ.
ⵖ ⵓⵣⵎⵣⵣⵓ ⴰⴷ, ⵙⴰⵡⵍⵏⵏ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⴼ ⵡⴰⵍⵜⴰⵖ ⵏⵏⵙ ⴷ ⵓⵎⵙⴰⵙⴰ ⵏⵏⵙ ⴷ ⵓⵎⴽⵕⴰⴹ ⴰⵏⴰⵎⵓⵔ ⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ, ⴷ ⵓⵙⵡⵓⵔⵉ ⵙ ⴽⵓ ⵜⵉⵓⵥⵉⴹⴰⵕ ⵜⵉⴷⵙⵜⴰⵔⵉⵏ ⵃⵎⴰ ⴰⴷ ⵜⵉⵍⵉ ⵜⵡⵉⵙⵉ ⵉⵕⵡⴰⵏ ⵖ ⵜⵍⵍⴰ ⵜⵢⴰⴼⵓⵜ ⵖ ⵜⵓⴳⴳⴰⵙ ⵜⵉⵏⴰⵎⵓⵔⵉⵏ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵃⴼⴹ ⵕⴱⴱⵉ.
ⵖ ⵓⵎⵏⵉⴷ ⵏ ⵓⵣⵣⵔⴰⴼ, ⵥⵕⴰⵏ ⵉⵎⴷⵔⴰⵡⵏ ⵖ ⵜⵙⵎⵓⵏⵉ ⴰⴷ ⴰⵢⴷⴰ ⴰⵣⵣⵔⴰⴼ ⵖ ⵍⵍⴰⵏ ⵉⵙⵏⴼⴰⵔⵏ ⴷ ⵜⵙⵓⵎⴰⵔ ⵏ ⵉⵙⵍⴳⵏⵏ, ⴱⴷⴷⵏ ⵓⵍⴰ ⴼ ⵎⴰⴷ ⵜⵙⵖⴰⵡⵙⴰ ⵜⴼⵔⴽⴰ ⴰⴷ ⵖ ⵉⴹⵕⵉⵚⵏ ⵉⵣⵣⵔⴰⴼⵏ ⵍⵍⵉ ⵔⴰⴷ ⵢⴰⵡⵙ ⵉ ⵉⴳⵔⴰⵏ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ, ⵖⵎⴽ ⵍⵍⵉ ⵉⵍⵍⴰ ⵡⴰⵡⴰⵍ ⵓⵍⴰ ⴼ ⵉⵣⵣⵔⴰⴼⵏ ⵥⵍⵉⵏⵉⵏ ⵙ ⵓⵏⴳⵔⴰⵡ ⵏ ⵜⴷⵓⵙⵉ ⵖ ⵉⵎⵏⵉⴷⵏ ⵉⵙⵙⴰⵜⵢⴰⵏⵏ ⴷ ⵉⵣⵣⵓⵍⴰⵏⵏ ⴷ ⵉⵏⴰⵎⵓⵏⵏ ⴷ ⵉⵎⵔⵙⵍⴰⵏⵏ, ⵢⵉⵍⵉ ⵓⵎⵛⴰⵛⴽⴰ ⴼ ⵓⵙⴽⴰⵔ ⵏ ⵢⴰⵜ ⵜⵙⵇⵇⵉⵎⵜ ⵉⵥⵍⵉⵏ ⵍⵍⵉ ⵔⴰⴷ ⵉⵙⴳⵉⴷⴷⵉ ⵢⴰⵏ ⵓⵙⵎⴰⵇⵇⵍ ⵢⵓⵎⴰⵏ ⴼ ⵓⵎⵓⴽⵏ ⴰⵣⵣⵔⴰⴼ ⵏ ⵓⵏⴳⵔⴰⵡ ⴰⴷ ⵙ ⵜⵡⵉⵙⵉ ⴷ ⵜⵏⴱⴰⴹⵜ ⴷ ⵜⵎⴰⵡⵙⴰⵙⵜ ⵏ ⵜⴷⵓⵙⵉ.
ⵖ ⵓⵎⵏⵉⴷ ⵏ ⵜⵉⴹⴰⴼ, ⵜⵎⴷⴰⵡⴰⵍ ⵜⵙⵎⵓⵏⵉ ⴼ ⵓⵙⵏⵎⴰⵍⴰ ⵏ ⵜⵖⵉⵎⵉⵜ ⵜⴰⵏⵎⵍⴰⵙⵙⵜ ⵉⵥⵍⵉⵏ ⵉ ⵉⵙⵇⵙⵉⵜⵏ ⵉⵎⵉⵡⴰⵏⵏ ⵖ ⵔⴰⴷ ⵢⵉⵍⵉ ⵢⵉⴳⵔ ⵏ ⵜⴷⵓⵙⵉ ⵖ ⵓⵖⴰⵡⴰⵙ ⵏⵏⵙ ⵏ ⵜⵡⵓⵔⵉ, ⵉⵍⵍⴰ ⵓⵎⵛⴰⵛⴽⴰ ⴰⴷ ⵜⵉⵍⵉ ⵜⵖⵉⵎⵉⵜ ⴰⴷ ⵙ ⵉⵙⵇⵙⵉⵜⵏ ⵉⵎⵉⵡⴰⵏⵏ ⵍⵍⵉ ⴷ ⵉⴹⴼⵕ ⵓⵎⴹⴰⴽⴰⵕ ⵙ ⵉⴱⴹⵉⵢⵏ ⵏ ⵓⵎⴰⴳⵔⴰⴷ 268 ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ.
ⵉⵏⵏⴰ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵎⴰⵙ ⴱⴷⴷⵏ ⴰⴷ ⵉⵍⵉⵏⵜ ⴽⵓ ⵜⵉⴷⴳⴳⴰⵔⵉⵏ ⵜⵉⴷⵙⵜⴰⵔⵉⵏ ⵖ ⵜⵡⵓⵔⵉⵡⵉⵏ ⵏ ⵓⵙⵇⵇⵉⵎ ⵖ ⵓⵣⵣⵔⴰⴼ ⴷ ⵜⵉⴹⴰⴼ, ⵙⴷⴷⵉⴷⵏ ⵎⴰⵙ ⵜⵙⵖⴰⵡⵙⴰ ⵜⴼⵔⴽⴰ ⴰⴷ ⴰⵏⴰⴼ ⵏ ⵉⵥⵍⴰⵢⵏ ⵉⵙⵔⵜⴰⵏⵏ , ⵜⵉⵔⵉ ⵓⵍⴰ ⵜⴰⵎⵓⵏⵜ ⵜⴰⵏⴰⵎⵓⵔⵜ ⴷ ⵓⵙⵔⵙ ⵏ ⵜⵏⴰⴼⵓⵜ ⵜⴰⵏⴰⴼⵍⵍⴰⵜ ⵏ ⵜⵎⵓⵔⵜ.