ⴰⴳⵔⴰⵡ ⴰⴱⵕⵍⴰⵎⴰⵏⵉ ⴼ ⵓⵎⵙⴰⵡⴰⵍ ⵊⴰⵔ ⵉⵙⴳⴷⵏ, 13 ⴰⵔ 15 ⵢⵓⵏⵢⵓ 2023 ⴳ ⵡⴰⵎⵓⵔ ⵏ ⵡⴰⴽⵓⵛ
ⵔⴰⴷ ⵜⵙⵏⵎⴰⵍⴰ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⴷ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴳ 13 ⴰⵔ 15 ⵢⵏⵓⵢⵓ 2023 ⴳ ⵡⴰⵎⵓⵔ ⵏ ⵡⴰⴽⵓⵛ ⴰⴳⵔⴰⵡ ⴰⴱⵕⵍⴰⵎⴰⵏⵉ ⴼ ⵓⵎⵙⴰⵡⴰⵍ ⵊⴰⵔ ⵉⵙⴳⴷⵏ: ⴰⵎⵢⴰⵡⴰⵙ ⵉ ⵉⵎⴰⵍ ⵉⵛⵛⴰⵔⵏ, ⵙ ⵜⵎⴷⵔⴰⵡⵜ ⴷ ⵜⵎⴰⴷⴷⴰⵙⵜ ⵏ ⵉⵙⴳⴷⵏ ⵉ ⵓⴼⵔⴰ, ⴷ ⵓⵙⵏⴰⵍ ⵏ ⵜⴰⵎⵓⵏⵜ ⵏ ⵜⵖⵔⵎⵉⵡⵉⵏ ⵉⴹⴼⵕⵏ ⵜⴰⵎⴰⴷⴷⴰⵙⵜ ⵏ ⵜⵎⵜⵜⴰ ⵎⵓⵏⵏⵉⵏ ⵉ ⵜⵣⵍⵖⴰ ⵜⴰⵎⵓⵃⵎⵎⴰⴷⵉⵜ ⵏ ⵉⵎⴰⵙⵙⴰⵏⵏ.
ⵔⴰⴷ ⵢⵉⵍⵉ ⵓⴳⵔⴰⵡ ⵙ ⵓⴼⵔⴰⴳ ⴰⵎⴰⵜⵜⵓⵢ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ , ⵔⴰⴷ ⴳⵉⵙ ⴷⵔⵓⵏ: ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ, ⵉⴱⵕⵍⴰⵎⴰⵏⵉⵢⵏ, ⵉⵅⴰⵜⴰⵔⵏ ⵏ ⵓⵙⴳⴷ, ⵉⴳⵏⵙⴰⵙⵏ ⵏ ⵡⴰⵎⵓⵏ ⴰⵖⵔⵎⴰⵏ, ⵉⵎⵓⵣⴰⵢⵏ. ⵔⴰⴷ ⵎⴹⴰⴽⴰⵕⵏ ⴼ ⵜⵎⵙⴰⵔⵉⵏ ⵏⵣⴷⵉⵏⵉⵏ ⴷ ⵜⵎⵢⵉⴷⵉⵔⵜ ⵜⴰⵙⵓⵍⴰⵏⵜ ⴷ ⵓⵚⴽⵓ ⵏ ⵡⴰⵎⵓⵏⵏ ⵏ ⵓⴼⵔⴰ, ⴷ ⵓⵙⵔⵓⵙ ⵏ ⵜⴽⵕⴹⴰ ⵏ ⵜⵡⵡⵓⵔⵉ ⵉⵛⵛⴰⵔⵏ ⴳ ⵉⵎⴰⵍ.
ⵔⴰⴷ ⵢⵉⵍⵉ ⵓⵎⴹⴰⴽⴰⵕ ⴳ ⵓⴳⵔⴰⵡ ⴼ ⵓⵙⴷⵓⵙ ⵏ ⵓⴼⵔⴰ ⴷ ⵓⵡⴰⵏⴽ ⵏ ⵓⵙⵍⴳⵏ ⴷ ⵓⵥⵕⴼ ⴷ ⵓⵚⴽⵓ ⵏ ⵉⵎⴰⵍ ⵉⵛⵛⴰⵔⵏ ⴷ ⵢⵉⵙⴽⵉⵍ ⵊⴰⵔ ⵉⵡⵜⵎⴰⵏ ⴷ ⵜⴷⵔⴰⵡⵜ ⵏ ⵉⵄⵔⵔⵉⵎⵏ ⴷ ⵜⵎⵢⵉⵎⴰⵏⵜ ⵉⵜⵜⵓⵙⵏⴼⴰⵍⵏ ⴷ ⵜⵡⵉⵣⵉ ⴷ ⵓⵙⵉⴷⴼ. ⵔⴰⴷ ⵉⴳⴳⵔⵓ ⵙ ⵓⵙⵉⵡⴹ ⴰⵅⴰⵜⴰⵔ.
ⵜⴳⴰ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⵜⴰⵎⴰⴷⴷⴰⵙⵜ ⵏ ⵉⴱⵕⵍⴰⵎⴰⵏⵏ ⵉⵡⴰⵏⴽⵏ ⵟⵟⴰⴼⵏⵉⵏ ⵜⵉⵅⵅⵓⵜⵔⴰ, ⵜⴳⴰ ⵜⴰⵙⵉⵍⴰ ⵍⵍⵉ ⵉⵜⵜⴰⵡⵙⵏ ⵉ ⵉⴱⵕⵍⴰⵎⴰⵏⵉⵢⵏ ⴰⴷ ⵙⵡⵓⵔⵉⵏ ⵉ ⵓⵙⴱⴷⴷⵉ ⵏ ⵜⵏⴰⵥⵕⵉⵏ ⴷⴰⵜ ⵏ ⵓⵎⴰⴹⴰⵍ. ⵎⵍⵍⵉⵖ ⵜⴻⵜⵜⵓⵙⴽⴰⵔ ⴳ 1889, ⵜⵉⵡⵙ ⴳ ⵓⵙⴷⵓⵙ ⵏ ⵓⵎⵙⴰⵡⴰⵍ ⴷ ⵜⵉⵍⵉⵜ ⵏ ⵜⵎⵏⵜⵍⵉⵏ ⵏ ⵓⴼⵔⴰ ⴷ ⵜⴷⵉⵎⵓⵇⵔⴰⵟⵉⵜ ⴷ ⵜⴳⵎⵉ ⵜⴰⵙⵓⵍⴰⵏⵜ.
ⴷⴰ ⵓⴽⴰⵏ ⵜⵙⵏⴰⵍ ⵜⴳⵍⴷⵉⵜ ⵏ ⵍⵎⵖⵔⵉⴱ ⴰⵏⵏⵓⵕⵥⵎ ⴷ ⵓⵎⵙⵓⵔⵓⴼ, ⵜⵏⵓⴱⴳ ⴽⵉⴳⴰⵏ ⵏ ⵉⵏⵎⵓⵇⵇⴰⵔⵏ ⴼ ⵉⵙⴳⴷⵏ ⴷ ⵜⵖⵔⵎⵉⵡⵉⵏ . ⵎⴽ ⵉⵍⵍⴰⵏ ⴳ ⵓⴷⵓⵙⵜⵓⵔ ⵏ ⵜⴳⵍⴷⵉⵜ, ⵢⵓⵎⵥ ⵍⵎⵖⵔⵉⴱ ⴳ ⵡⴰⵜⵉⴳⵏ ⵏ ⵓⵏⵏⵓⵕⵥⵎ ⴷ ⵓⵎⵙⵓⵔⵓⴼ ⴷ ⵓⵎⵙⴰⵡⴰⵍ ⴷ ⵓⵏⵔⴰⵎⴰⵙ ⵉⵜⵜⵓⵙⵏⴼⴰⵍⵏ ⵊⴰⵔ ⵜⴷⵍⵙⵉⵡⵉⵏ ⴷ ⵜⵖⵔⵎⵉⵡⵉⵏ ⵜⵉⵏⴼⴳⴰⵏⵉⵏ.
ⵜⵍⵍⴰ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⵙⴳ ⵓⴳⴳⴰⵔ ⵏ 130 ⵏ ⵓⵙⴳⴳⵯⴰⵙ, ⵜⵡⴰⵜⵜⵙ ⴰⵙⵙⵔⵇⴱ ⵏ ⵓⵎⵢⴰⵡⴰⵙ ⴷ ⵓⵎⵙⵡⴰⵍ ⵊⴰⵔ ⵎⴰⵕⵕⴰ ⵏ ⵜⵎⵜⵜⵉⵡⵉⵏ , ⴷ ⵜⴰⵎⴰⴷⴷⴰⵙⵜ ⵜⴰⵙⵔⵜⴰⵏⵜ ⵜⴰⴳⵜⵉⵔⴰⵏⵜ ⵜⴰⵣⵡⴰⵔⵓⵜ ⵍⵍⵉ ⵉⵍⵓⵍⵏ. ⴳⵉⵙ ⴰⵙⵙ ⴰⴷ 179 ⵏ ⵓⴱⵕⵍⴰⵎⴰⵏ ⴰⴳⵎⴰⵎ ⴷ 14 ⵏ ⵜⵎⴰⴷⴷⴰⵙⵜ ⵜⴰⴱⵕⵍⴰⵎⴰⵏⵉⵜ ⵜⴰⵏⵎⵏⴰⴹⵜ. ⴰⵔ ⵜⵙⵏⴰⵍ ⵜⴰⴷⵉⵎⵓⵇⵔⴰⵟⵉⵜ ⴷ ⵓⵙⴷⵓⵙ ⵏ ⵜⵙⵓⴳⴰⵔ ⵏ ⵉⴱⵕⵍⴰⵎⴰⵏⵏ ⵉⵎⵍⵜⴰⵖⵏ, ⴰⵙⴽⵔ ⵏ ⵢⵉⵙⴽⵉⵍ ⵊⴰⵔ ⵉⵡⵜⵎⴰⵏ ⴷ ⵜⵓⵜⵎⵉⵏ, ⴰⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵓⵙⴽⵔ ⵏ ⵜⵙⵇⵇⵉⵎⵉⵜ ⵏ ⵉⴱⵕⵍⴰⵎⴰⵏⵉⵢⵏ ⵙⴳ ⵎⴰⵕⵕⴰ ⵜⵉⵙⴳⴳⵉⵡⵉⵏ ⵏ ⵓⵎⴰⴹⴰⵍ.
ⴷⴰ ⵉⵙⴽⴰⵔ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⵜⴰⵏⴱⴰⴹⵜ ⵜⴰⵣⵣⵔⴰⴼⵜ, ⴷⴰ ⵉⵙⵜⴰⵢ ⵉⵙⵍⴳⵏⵏ, ⵉⴹⵓⴼ ⵜⴰⵡⵡⵓⵉⵔ ⵏ ⵜⵏⴱⴰⴹⵜ, ⵉⵙⵓⵜⴳ ⵜⵉⵙⵔⵜⴰⵢ ⵜⵉⴳⴷⵓⴷⴰⵏⵉⵏ. ⴳⵉⵙ ⵙⵉⵏ ⵉⵙⵇⵇⵉⵎⵏ: ⴰⵙⵇⵇⵉⵎ ⵏ ⵉⵎⵓⵔⴰ ⵙ 395 ⵏ ⵓⵎⴰⵔⵉ ⵜⵜⴰⵡⵙⵔⴰⵢⵏⵉⵏ ⵙ ⵜⵖⴰⵔⴰⵙⵜ ⵜⵓⵙⵔⵉⴷⵜ ⵉ ⵙⵎⵎⵓⵙ ⵉⵙⴳⴳⵯⴰⵙⵏ. ⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴳ ⵍⵍⴰⵏ 120 ⵏ ⵓⵎⵛⵛⵉⵡⵕ ⵜⵜⴰⵡⵙⵜⴰⵢⵏⵉⵏ ⵙ ⵜⵖⴰⵔⴰⵙⵜ ⵡⴰⵔⵜⵓⵙⵔⵉⴷⵜ ⵉ ⵚⴹⵉⵚ ⵉⵙⴳⴳⵯⴰⵙⵏ, ⴳⴰⵏ ⵉⴳⵏⵙⴰⵙⵏ ⵏ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵜⵎⵚⵕⴰⵢ ⴷ ⵜⵎⴰⴷⴷⴰⵙⵉⵏ ⵜⵉⵣⵣⵓⵍⴰⵏⵉⵏ ⴷ ⵜⵉⵏ ⵉⴷ ⴱⴰⴱ ⵏ ⵜⵡⵡⵓⵔⵉ ⴷ ⵉⵎⵙⵡⵓⵔⵉⵢⵏ.
ⵔⴰⴷ ⵢⵉⵍⵉ ⵓⵣⵓⵣⵣⵔ ⵏ ⵜⵖⵉⵎⵉⵜⵉⵏ ⵙ ⵜⵖⴰⵔⴰⵙⵜ ⵜⵓⵙⵔⵉⴷⵜ ⴳ ⵓⵙⵉⵜ: www.ipu.org