ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴰⵙⵉⵡⴹ ⴼ ⵜⵙⵎⵓⵏⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⵢⵏⴰⵙ 12 ⴽⵟⵓⴱⵕ 2020
ⵉⵙⴽⵔ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⵜⵥⵍⵉ ⵉ ⵜⵡⵓⵔⵉ ⵏ ⵜⵉⴹⴰⴼ ⴷ ⵓⵣⵣⵔⴰⴼ.
ⵖ ⵜⵣⵡⵉⵔⵉ ⵏ ⵜⵙⵎⵓⵏⵉ, ⵉⵙⵎⵏⵉⴷ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⴽⵛⵛⵓⵎⵜ ⴼ ⵜⵓⵎⴰⵢⵉⵉⵏ ⵏ ⵉⵏⴰⵡ ⴰⴳⵍⴷⴰⵏ ⴰⵎⴰⵜⵜⵓⵢ ⵙ ⵜⵎⵍⴷⴰ ⵏ ⵓⵏⵏⵓⵕⵥⵎ ⵏ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ ⵏ ⵓⵙⴳⴳⵯⴰⵙ ⴰⵣⵣⵔⴰⴼ, ⵉⵙⵙⴽⵜⵉ ⴷ ⴰⵜⵉⴳ ⵉⵍⵍⴰⵏ ⴷⴰⵔ ⵓⵏⵏⵓⵕⵥⵎ ⴰⴷ ⵖ ⵉⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵃⴼⴹ ⵕⴱⴱⵉ ⴰⴷ ⴳⵉⵙ ⵉⵍⵉⵏⵜ ⵜⴱⵔⴰⵜⵉⵏ ⵙⵜⴰⵡⵀⵎⵎⴰⵏⵉⵏ ⵙ ⵓⵙⴽⵔ ⵏ ⵜⵎⵙⴽⴰⵔ ⵏ ⵡⴰⵔⴰⵢ ⵖ ⵓⵙⵡⵓⴷⴷⵓ ⵏ ⴽⵓⵕⵓⵏⴰ, ⴷ ⵜⵉⵔⴰⵜ ⵜⴰⴳⵍⴷⴰⵏⵜ ⵜⴰⵎⴰⵜⵜⵓⵢⵜ ⵉ ⵜⴼⴰⵜⵉⵜ ⵏ ⵉⴱⵕⵍⴰⵎⴰⵏⵉⵢⵏ ⵙ ⵓⵙⴽⵔ ⵏ ⴽⵓ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ ⵍⵍⴰⵏⵉⵏ.
ⴱⴷⴷⵏ ⵉⵎⴷⵔⴰⵡⵏ ⵖ ⵜⵙⵎⵓⵏⵉ ⴰⴷ ⴼ ⵜⴱⵔⴰⵜⵉⵏ ⵍⵍⴰⵏⵉⵏ ⵖ ⵉⵏⴰⵡ ⴰⴳⵍⴷⴰⵏ ⴰⵎⴰⵜⵜⵓⵢ ⵖ ⵉⵎⵏⵉⴷⵏ ⵏⵏⵙ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵜⵎⵙⴽⴰⵔ ⵍⵍⵉ ⵔⴰⴷ ⵢⵉⵍⵉ ⵉ ⵓⵙⵎⵖⵔ ⴰⴷⵎⵙⴰⵏ ⵙ ⵓⵙⴽⵔ ⵏ ⵓⴼⵏⵉⵇ ⵏ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵓⵙⵙⴰⵔⵓ, ⴷ ⵓⵙⵏⴰⵍ ⵏ ⵜⵎⵙⵙⵏⵜⴰⵢ ⴷ ⵓⵅⵎⵎⴻⵎ ⵖ ⵓⵎⴰⴹⴰⵍ ⴰⴼⴰⵔⴰⵏ ⴷ ⵜⵎⵖⴰⵔⵜ ⵜⴰⴼⴰⵔⴰⵏⵜ, ⴷ ⵜⵙⴰⵡⵓⵔⵜ ⵜⴰⵏⴰⵎⵓⵏⵜ ⵍⵍⵉ ⵉⵎⵎⴰⵍⵏ ⵉⵎⴰⵏ ⵏ ⵜⵡⵉⵣⵉ ⴷ ⵓⵎⵢⴰⵡⴰⵙ ⵏⴳⵔ ⵜⴰⵙⵓⵜⵉⵏ ⵉⴹⵎⵏⵏ ⵜⵉⵣⵉ ⵏ ⴽⵓ ⵜⴰⵔⵡⴰ ⵏ ⵓⵎⴰⴷⴰⵏ ⴰⵎⵖⵔⵉⴱⵉ.
ⴱⴷⴷⵏ ⵉⵎⴷⵔⴰⵡⵏ ⵓⵍⴰ ⴼ ⵓⵙⴰⵜⵉ ⵍⵍⵉ ⵔⴰⴷ ⵉⴼⴽ ⴰⵎⵓⵔⵙ ⵉ ⵉⵙⴰⵡⵓⵔⵏ ⵉⴳⵍⴷⴰⵏⵏ ⵙ ⵓⵙⴷⵓⵙ ⵏ ⵓⵏⴱⴰⴹ ⴷ ⵓⵣⴷⴰⵢ ⵏⴳⵔ ⵜⵎⴰⵙⴰⵢⵜ ⴷ ⵓⵙⵉⴹⵏ ⴷ ⵓⵙⵉⵣⵡⵔ ⵏ ⵜⵏⵓⴼⴰ ⵜⵉⵎⴰⵜⵜⵓⵢⵉⵏ ⵏ ⵜⵎⵓⵔⵜ, ⵙⴷⴷⵉⴷⵏ ⴼ ⵓⵍⵜⴰⵖ ⵏ ⴽⵓ ⵉⵎⵙⴽⵔⵏ ⵖ ⵓⵙⵓⵊⴷ ⵏ ⵉⵙⵡⴰⵍⴰⵢⵏ ⴰⴷ ⵙ ⵉⵖⴰⵡⴰⵙⵏ ⵏ ⵜⵉⵍⴰⵡⵜ ⴷ ⵓⴹⴼⵕ ⵏ ⵓⵣⵣⴳⵉⵔ ⵏⵏⵙⵏ.
ⵖ ⵜⵡⵓⵔⵉ ⵏ ⵜⵉⴹⴰⴼ, ⵉⵍⵍⴰ ⵓⵎⴹⴰⴽⴰⵕ ⴼ ⵓⵙⵏⴼⴰⵔ ⵏ ⵓⵖⴰⵡⴰⵙ ⵉⵥⵍⵉⵏ ⵙ ⵉⵙⵇⵙⵉⵜⵏ ⵉⵏⵎⵍⴰⵙⵙⵏ, ⴷ ⵉⵙⴳⵓⵎⵏ ⵍⵍⴰⵏⵉⵏ, ⵔⴰⴷ ⵢⵉⵍⵉ ⵓⵙⵏⵎⴰⵍⴰ ⵏⵏⵙⵏ ⵙ ⵜⵎⵣⵡⴰⵔ ⵍⵍⴰⵏⵉⵏ ⵖ ⵜⵣⵣⵉⴳⵣⵜ ⵏ ⵜⵎⵙⴰⵔ, ⵃⵎⴰ ⴰⴷ ⵢⵉⵍⵉ ⵓⵅⵎⵎⴻⵎ ⵏ ⵡⴰⵎⵓⵏ ⴰⵏⴰⵎⵓⵔ ⵖ ⵓⴳⵏⵙ ⵏ ⵜⵎⵙⴽⵔⵜ ⵜⴰⵏⵎⵍⴰⵙⵙⵜ ⵏ ⵜⵉⴹⴰⴼ.
ⵖ ⵢⵉⴳⵔ ⵏ ⵓⵣⵣⵔⴰⴼ, ⵉⵣⵎⵎⵉⵎ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵜⵏⵙⵙⵉⵅⴼⵜ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴰⵜⵉⴳ ⵏ ⵓⴼⴰⵔⵙ ⴰⵣⵣⵔⴰⴼ, ⵉⴳⴰⵏ ⵜⴰⵡⵓⵔⵉ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵖ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵍⴽⵎⵏⵉⵏ 201 ⵏ ⵜⵙⵓⵎⵔⵜ, ⴳⵉⵙⵏ 40 ⵏ ⵜⵙⵓⵎⵔⵜ ⵙⴳ ⵎⴰⵕⵚ ⵉⵣⵔⵉⵏ, ⵜⴳ ⵜⵡⵓⵔⵉ ⴰⴷ ⴰⵙⵏⴰⵍ ⵏ ⵜⵓⴳⴳⴰⵙ ⵏ ⵜⵏⴱⴰⴹⵜ, ⵜⵎⵎⴰⵖ ⴰⴷ ⵜⴼⴽ ⵉⴼⵙⵙⴰⵢⵏ ⵉⵣⵣⵔⴰⴼⵏ ⵍⵍⵉ ⴷ ⵉⵡⵉⵏⵜ ⵜⵎⵙⵓⵜⵍⵉⵏ ⵏ ⵓⴱⴰⵢⵢⵓⵕ, ⵖⵎⴽ ⵍⵍⵉ ⵜⵙⵎⴽⵍ ⴽⵉⴳⴰⵏ ⵏ ⵜⵎⵙⴰⵔⵉⵏ ⵜⵉⵏⴰⵎⵓⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⵎⴰⴷⴷⴰⵙⵉⵏ.
ⵖ ⵓⵙⵎⵀⵍ ⵏ ⵜⵓⵎⴰⵢⵉⵏ ⵏ ⵓⴷⵓⵙⵜⵓⵔ, ⵙⵍⴰⵡⴰⵏ ⵎⴰⴷ ⵉⵥⵍⵉⵏ ⴷ ⵓⵡⵇⵇⵔ ⵏ ⵓⵙⴰⴽⵓⴷ ⴰⵢⵢⵓⵔⴰⵏ ⵉⵥⵍⵉⵏ ⵙ ⵜⵖⵔⵉ ⵏ ⵜⵙⵓⵎⵔⵉⵏ ⵏ ⵉⵙⵍⴳⵏⵏ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴼ ⵓⵛⵛⵉⵍ ⵏ ⵓⵙⴽⵔ ⵏ ⵓⵏⵎⵓⵇⵇⴰⵔ ⴷ ⵜⵏⴱⴰⴹⵜ ⴷ ⵓⵙⵓⵊⴷ ⵏ ⵓⵖⵡⴰⵙ ⵏ ⵜⵡⵓⵔⵉ ⵉⵣⵓⵣⵣⵔⵏ ⴼ ⵜⵙⵓⵎⵔⵉⵏ ⴰⴷ ⵍⵍⵉ ⴳⴰⵏⵉⵏ ⵢⴰⵏ ⵡⴰⵢⴷⴰ ⵉⴱⵓⵖⵍⴰⵏ ⴷ ⵉⵕⵡⴰⵏ ⵉ ⵓⵙⵎⴽⵍ ⵏ ⴽⵉⴳⴰⵏ ⵏ ⵉⵙⴷⴰⵡⵏ ⵉⵏⴰⵎⵓⵔⵏ ⴷ ⵜⵎⵙⴰⵔⵉⵏ ⵜⵉⵏⴰⵎⵓⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⵣⵔⴼⴰⵏⵉⵏ.