ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⴳⵔⴰⵡ ⵡⵉⵙ 11 ⵏ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ ⵏ ⵉⴼⵔⵉⵇⵢⴰ
ⵎⴰⵙⵙ ⴰⵏⵙⵙⵉⵅⴼ
ⵉⵏⴳⴳⵯⴰ ⴷ ⵜⵏⴳⴳⵯⴰ ⵉⵏⵙⵙⵉⵅⴼⵏ ⵏ ⵉⵙⵇⵇⵉⵎⵏ ⵉⵣⵣⵔⴰⴼⵏ ⴷ ⵉⵏⵙⵙⵉⵅⴼⵏ ⵏ ⵉⴽⴰⴱⴰⵕⵏ
ⵉⵙⵜ ⵎⴰⵙⵙ ⴷ ⵉⴷ ⵎⴰⵙⵙ
ⴳ ⵜⵣⵡⵉⵔⵉ, ⴰⵔ ⴽⵏ ⴱⴰⵀⵔⴰ ⵙⵏⵉⵎⵎⵉⵔⵖ, ⵎⴰⵙⵙ ⴰⵏⵙⵙⵉⵅⴼ, ⴼ ⵜⵖⵓⵔⵉ ⵏⵏⵓ ⴰⴷ ⴷⵔⵓⵖ ⴳ ⵓⴳⵔⴰⵡ ⴰⵙⴳⴳⵯⵙⴰⵏ ⵡⵉⵙ 11 ⵏ ⵉⴱⵕⵍⴰⵎⴰⵏⵏ ⵏ ⵉⴼⵔⵉⵇⵢⴰ, ⵙⵓⵜⴳⵖ ⴰⵙⵜⴰⵢ ⵏ ⵉⵙⵏⵜⵍⵏ ⵍⵍⵉ ⴼ ⵔⴰⴷ ⵢⵉⵍⵉ ⵓⵎⴹⴰⴽⴰⵕ ⴳ ⵜⵙⵓⵜⵍⵜ ⴰⴷ, ⵉⵟⵟⴰⴼⵏ ⴰⵜⵉⴳ ⴰⵎⵇⵔⴰⵏ, ⵉⴳ ⴰⵙⵏⵜ ⴰⵏⴰⵎⵎⴰⵙ ⴷⴰⵔ ⵉⴱⵕⵍⴰⵎⴰⵏⵏ ⴷ ⵜⵏⴱⴰⴹⵉⵏ, ⵙⵍⴰⵡⴰⵏ ⴰⴽⴽⵯ ⴷⴰⵔ ⵉⵎⴰⴷⴰⵏⵏ, ⴳ ⵉⴼⵔⵉⵇⵢⴰ ⴷ ⵓⵎⴰⴹⴰⵍ ⴰⴽⴽⵯ.
ⵜⵖⵣⴰⵏ ⵜⴰⵎⵓⵏⵜ ⵏ ⵓⵕⵓⴱⴱⴰ ⵍⵍⵉⵖ ⵜⵙⵜⵉ ⴰⵙⴳⴳⵯⴰⵙ ⵏ 2022 ⴰⴷ ⵜⴳ:”ⴰⵙⴳⴳⵯⴰⵙ ⵏ ⵓⵜⵛⵓ ⴷ ⵓⵙⴷⵓⵙ ⵏ ⵜⵙⵓⴳⴰⵔ ⵏ ⵓⵎⵏⵥⴰⵡ ⴳ ⵢⵉⴳⵔ ⵏ ⵓⵜⵛⵓ ⴷ ⵜⵏⴼⵔⵓⵜ ⵏ ⵓⵜⵛⵓ: ⴰⵙⴷⵓⵙ ⵏ ⵉⴳⵔⴰⵡⵏ ⵏ ⵜⴼⵍⵍⴰⵃⵜ ⵓⵜⵛⵓ ⴷ ⵉⵏⴳⵔⴰⵡⵏ ⵏ ⵜⴷⵓⵙⵉ ⴷ ⵓⴼⵔⴰⴳ ⴰⵏⴰⵎⵓⵏ ⵉ ⴽⵉⴳⴰⵏ ⵏ ⵜⴳⵎⵉ ⵜⴰⵏⴼⴳⴰⵏⵜ ⴷ ⵜⵏⴰⵎⵓⵏⵜ ⴷ ⵜⴷⵎⵙⴰⵏⵜ”. ⵓⴷⵎⴰⵡⵏ ⵏ ⵓⵏⵣⵡⵉ ⵍⵍⵉ ⵏⵥⵕⴰ, ⴷ ⴰⵔ ⵜⵏ ⵙⵓⵍ ⵏⵥⵥⵕⵕⴰ ⴳ 2022 ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵥⵍⵉⵏ ⴷ ⵡⴰⵍⴰⵢ ⵏ ⵉⵙⵖⵍⵏ ⵏ ⵜⵔⵖⵉ, ⴰⵔ ⵎⵎⴰⵍⴰⵏ ⵎⴰⵙ ⵍⵍⴰⵏ ⵉⵎⵉⵣⵉⵜⵏ ⴳⴳⵓⵜⵏⵉⵏ ⴳ ⵉⵙⵏⴼⵍⵏ ⵉⵏⵣⵡⵢⴰⵏ. ⵙ ⵓⵖⵉⵍⵓⴼ, ⴳⴰⵏ ⵉⵙⵏⴼⵍⵏ ⴰⴷ ⵀⵔⵛⵏⵉⵏ, ⴳ ⵉⵥⵥⵍⵎⴹ ⵡⴰⵍⴰ ⴳ ⵉⴼⴼⵓⵙ, ⵡⵉⴷⴰ ⵙⴽⵔⵏⵉⵏ ⵜⴰⵅⴰⵔⵜ ⵉⵛⴷⴷⴰⵏ, ⴷ ⵓⴷⵔⵓⵙ ⵏ ⵉⵙⵓⴳⴰⵏ ⵏ ⵡⴰⵎⴰⵏ ⴷ ⵜⵉⵍⵉⵜ ⵏ ⵜⴰⴽⴰⵜⵉⵏ, ⴰⵢⵍⵍⵉ ⵔⴰⴷ ⵉⵟⵟⵉⴼ ⵉⴷⵔⵉⵣⵏ ⵀⵔⵛⵏⵉⵏ ⴼ ⵉⵖⴱⵓⵍⴰ ⵏ ⵓⵜⵛⵓ ⴷ ⵉⵙⵔⵓⵙⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⵏⴳⵔⴰⵡⵏ ⵉⵡⵏⴹⴰⵏⵏ.
ⵜⴰⵎⴰ ⵏ ⵜⵎⵓⴽⵔⵉⵙⵉⵏ ⴰⴷ, ⵜⴻⵟⵟⴰⴹⵏ ⵜⴷⵎⵙⴰ ⵜⴰⵎⴰⴹⵍⴰⵏⵜ ⵉⴷⵔⵉⵣⵏ ⵀⵔⵛⵏⵉⵏ ⵣⴷⵉⵏⵉⵏ ⴷ ⵓⴱⴰⵢⵢⵓⵕ ⵏ ⴽⵓⴼⵉⴷ 19. ⵍⵍⵉⵖ ⵉⵏⵏⵓⵔⵣ ⵓⵎⴰⴹⴰⵎ ⴰⴷ ⵜⵊⵊⵉ ⵜⴷⵎⵙⴰ ⵜⴰⵎⴰⴹⵍⴰⵏⵜ, ⵢⵓⵛⴽⴰ ⴷ ⵡⴰⵍⴰⵢ ⵉⴳⴳⵓⵜⵏ ⵏ ⵡⴰⵜⵉⴳⵏ ⵏ ⵜⵥⴹⴰⵕⵜ ⵢⵉⵡⵙ ⴳ ⵓⵙⴱⴷⴷⵉ ⵏ ⵜⴷⵉⵏⴰⵎⵉⵜⵉⵏ ⵥⵉⵍⵏⵉⵏ ⵍⵍⴰⵏⵉⵏ ⴳ 2021 ⴳ ⵜⴷⵎⵙⵉⵡⵉⵏ ⵜⵉⵏⴰⵎⵓⵔⵉⵏ ⴷ ⵉⵙⵏⴼⵎⵏ ⵉⵎⴰⴹⵍⴰⵏ, ⵙ ⵎⴰⴷ ⵜⵉⵡⵉ ⵜⵎⴰⵖⵜ ⵉⵍⵍⴰⵏ ⴳ ⵍⵇⴱⵍⵜ ⵏ ⵓⵕⵓⴱⴱⴰ ⴷ ⵡⴰⵍⴰⵢ ⵏ ⵡⴰⵜⵉⴳ ⵏ ⵡⴰⵙⵙⴰⵢ ⴷ ⵓⴷⵔⵓⵙ ⵏ ⵉⵖⴱⵓⵍⴰ ⵏ ⵓⵙⴳⴱⵔ.
ⴰⵊⵊⴰⵜ ⴰⵖ, ⵜⵉⵏⴳⴳⵯⴰ ⴷ ⵉⵏⴳⴳⵯⴰ, ⵉⵙⵜ ⵎⴰⵙⵙ ⴷ ⵉⴷ ⵎⴰⵙⵙ, ⴰⴷ ⵏⵙⵔⵙ ⴰⵎⴹⴰⴽⴰⵕ ⵏⵏⵖ ⴷ ⵜⵙⵓⵎⵔⵉⵏ ⵏⵏⵖ ⴼ ⵉⵙⵓⵔⵙⵏ ⵏ ⵓⵎⴰⵥⵓⵏ ⵏⵏⵖ ⵉⴼⵔⵉⵇⵢⴰ, ⵖ ⴱⴷⴷⴰ ⴰⴷⵍⵍⵉ ⵉⵍⵍⴰ ⵓⴷⵔⵓⵙ ⵏ ⵓⵜⵛⵓ ⴷ ⵜⵏⵓⴼⴰ ⵜⵉⴷⵓⵙⴰⵏⵉⵏ ⴷ ⵓⴷⵔⵓⵙ ⵏ ⵡⴰⵎⴰⵏ ⴷ ⵜⵖⴰⵔⵜ, ⴰⵛⴽⴰ ⴰⵔ ⵜⴼⵔⵔⵓ ⴰⵜⵉⴳ ⵏ ⵓⴼⵓⵖ ⵏ ⵉⴳⴰⵣⵏ ⵙⴽⴰⵔⵏⵉⵏ ⴰⵍⵓⵢ ⵏ ⵓⵙⵖⵍ ⵏ ⵜⵔⵖⵉ ⵏ ⵡⴰⴽⴰⵍ, ⴷ ⵓⵔ ⴰⴷ ⵜⵜⴰⵡⵉ ⵜⴰⵢⵢⴰⴼⵓⵜ ⵏ ⵜⵎⴳⵓⵔⵉ.
ⵓⵔ ⴰⵔ ⵜⴻⵜⵜⴰⵡⵙ ⴳ ⵉⴳⴰⵣⵏ ⴰⴷ ⴰⴱⵍⴰ ⵙ 4%, ⵉⴼⵔⵉⵇⵢⴰ ⵉⴳⴰⵏ ⵜⴰⵏⴳⴰⵙⵜ, ⵜⵉⴽⴽⵍⵉⵜ ⵢⴰⴹⵏⵉⵏ, ⵏ ⵜⵙⵔⵜⴰⵢ ⵜⵉⴳⵔⴰⵖⵍⴰⵏⵉⵏ ⴳ ⵓⵔ ⵜⵉⵡⵙ ⴳ ⵓⵙⵓⵊⴷ ⵏⵏⵙⵏⵜ, ⴷ ⵓⵙⵎⵔⵙ ⵉⵛⴷⴷⴰⵏ ⵏ ⵉⴽⴰⵍⵉⵡⵏ ⵏⵏⵙ, ⴰⵢⵍⵍⵉ ⵎⵓ ⵓⵔ ⵓⴼⵉⵏ ⵉⵎⴰⴷⴰⵏⵏ ⵏⵏⵙ ⴰⴷ ⴰⵡⵉⵏ ⵉⴷⵔⵉⵣⵏ ⵏⵏⵙ ⵙ ⵉⵙⵏⴰⴼⴰⵔⵏ ⵏ ⵜⴳⵎⵉ ⵍⵍⵉ ⵔⴰⴷ ⵢⴰⵡⵙ ⴳ ⵉⵙⵏⴼⵍⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵙⴽⵔⵏ ⵓⵍⴰ ⵉⵏⴰⵔⵓⵣⵏ ⵓⴽⴳⵉⵏⵏ ⵏ ⵉⵎⴰⴷⴰⵏⵏ ⵏⵏⵙ.
ⴷⴰⵜ ⵏ ⵉⵎⵏⵜⵉⵍⵏ ⵓⵚⴽⵉⵡⵏ ⵙⴱⴷⴷⵏⵉⵏ ⵜⵉⴳⵎⵉ ⴳ ⴽⵉⴳⴰⵏ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ, ⵉⵙⴱⵉⴷⴷ ⵓⴱⴰⵢⵢⵓⵕ ⵏ ⴽⵓⴼⵉⴷ 19 ⵜⵓⴳⴳⴰⵙ ⵏ ⵓⵙⴱⴷⴷⵉ ⵏ ⵓⵥⵍⴰⴹ, ⵍⵍⵉⵖ ⴷⴰⵖ ⵉⵣⵣⵉⴳⵣ ⵊⴰⵔ 2015 ⴷ 2019. ⵙ ⵜⵓⴳⴳⵯⴰ ⵏ ⵜⵎⵜⵜⴰ ⵎⵓⵏⵏⵉⵏ, ⵜⵍⴽⵎ ⵜⵙⵖⴰⵍⵜ ⵏ ⵍⴰⵥ ⴷ ⵓⴷⵔⵓⵙ ⵏ ⵓⵜⵛⵓ ⵙ ⵓⵎⵣⴰⵣⴰⵍ ⴷ ⵓⵏⵛⴽ ⵏ ⵎⵉⴷⴷⵏ, ⵜⵣⵣⵉⴳⵣ ⴽⵉⴳⴰⵏ ⴳ ⵉⴼⵔⵉⵇⵢⴰ, ⵜⴳ ⵜⴰⵙⵖⵍⵜ ⴱⴰⵀⵔⴰ ⵢⴰⵜⵜⵓⵢⵏ ⴳ ⵓⵎⴰⴹⴰⵍ.
ⵙ ⵓⵙⴷⴷⵉⴷ, ⵔⴰⴷ ⵓⴽⴰⵏ ⵙⵓⵍ ⵣⵣⵉⴳⵣⵏ ⵓⵟⵟⵓⵏⵏ ⴰⴷ, ⵜⵣⵣⵉⴳⵣ ⴷⵉⵙⵏ ⵓⵍⴰ ⵜⴰⵔⵡⵓⵔⵉ, ⵢⵉⵍⵉ ⵓⴼⵔⴰⴽ ⵙ ⵓⵖⵉⵍⵓⴼ ⴷ ⵡⴰⵔⴰⵏⴰⵔⵓⵣ, ⴷⴰⵔ ⴽⵉⴳⴰⵏ ⵏ ⵉⵡⴷⴰⵏ ⵏⵏⵖ, ⵍⵍⵉⵖ ⵟⵟⴰⴼⵏ ⴰⴷⵔⵉⵣ ⴼ ⵓⵙⵖⵍ ⵏ ⵜⵎⵢⵉⵎⴰⵏⵜ, ⵙⵍⴰⵡⴰⵏ ⴰⴽⴽⵯ ⴳ ⵓⵏⴳⵔⴰⵡ ⴰⴷ ⴰⵎⴰⴹⵍⴰⵏ ⵓⵔ ⵉⵍⵍⵉⵏ ⴷ ⵉⴼⵔⵉⵇⵢⴰ. ⵜⴳ ⵜⴼⵔⴽⴰ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19 ⵜⴰⵎⵍⴷⴰ ⵖ ⵉⵣⵣⵔⵉ ⵉⵔⵉⵎ ⵓⵎⵢⴰⵡⴰ ⴰⵛⵔⴰⵖⵍⴰⵏ ⵎⵏⵉⴷ ⵏ ⵉⴼⵔⵉⵇⵢⴰ, ⵣⵣⵉⴳⵣⵣⵏⵜ ⴳⵉⵙ ⵜⵉⵏⵉⵎⴰⵏⵉⵏ, ⵖⴰⵎⴰⵏⵜ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⵡⴰⵃⴷⵓⵜⵏⵜ ⵎⴳⴰⵍ ⵏ ⵓⴱⴰⵢⵢⵓⵕ ⴷ ⵉⴷⵔⵉⵣⵏ ⵏⵏⵙ ⵙ ⵜⵥⴹⴰⵕⵉⵏ ⵏⵏⵙⵏ ⴷⵔⵓⵙⵏⵉⵏ ⴷ ⵜⵓⵚⴽⵉⵡⵉⵏ ⵏⵏⵙⵏⵜ ⵜⵉⴷⵓⵙⴰⵏⵉⵏ ⵕⵎⵉⵏⵉⵏ. ⵎⵇⵇⴰⵔ, ⵉⴼⴼⵖ ⵓⵎⵏⵥⴰⵡ ⵏⵏⵖ ⵙ ⵎⴰⴷ ⵉⴷⵔⵓⵙⵏ ⴳ ⵉⵏⴳⴰⵙⵏ ⵉⵏⴼⴳⴰⵏⵏ.
ⴳ ⵓⵎⵏⴰⴷ ⵏ ⵜⵣⵣⵉⴳⵣⵜ ⵏ ⵜⴰⵙⵙⴰⵙⵉⵏ ⴷ ⵜⵉⵍⵉⵜ ⵏ ⵉⵙⵖⴰⵡⵙⴰⵜⵏ, ⴷ ⵓⵎⵃⵉⵣⵡⴰⵔ ⵉⵛⴷⴷⴰⵏ ⴼ ⵉⵙⵓⴳⴰⵎ ⴷ ⵉⵙⴱⵖⵔⵏ, ⵉⵇⵇⴰⵏ ⴷ ⴰⴷ ⵏⴼⵔⴽ ⴳ ⵉⴱⵕⵍⴰⵎⴰⵏⵏ ⵉⴼⵔⵉⵇⵉⵢⵏ, ⴷ ⵉⵎⵙⵜⴰⵢⵏ ⵉⴼⵔⵉⵇⵉⵢⵏ, ⵎⴰⵙ ⴷⴰⵔⵏ ⵍⵍⴰⵏ ⵉⵎⵓⵜⵜⵓⵢⵏ ⵅⴰⵜⵔⵏⵉⵏ, ⵍⵍⵉ ⵔⴰⴷ ⵉⵙⴽⵔ ⵜⵉⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ ⵜⵉⵎⴰⵢⵏⵓⵜⵉⵏ ⴱⴷⴷⵏⵉⵏ ⴼ ⵜⵏⵓⴼⴰ, ⵉⵇⵇⴰⵏ ⴰⴷ ⴰⴷ ⵏⵙⵎⵖⵔ ⵜⵉⵥⴹⴰⵕⵉⵏ ⵏⵏⵖ, ⵏⵙⵡⵓⵔⵉ ⵙ ⵉⵎⴰⵏ ⴰⴼⵔⵉⵇⵉ ⴰⵎⴳⵔⵓ ⵍⵍⵉ ⵉⵙⵎⴰⵜⵔⵏ ⵜⴰⴼⵔⴽⴰ ⵏ ⵜⵎⴰⵖⵜ ⵉ ⵜⵙⵉⵎⴰⵏⵉⵏ ⵜⵉⵏⴰⵎⵓⵔⵉⵏ, ⵃⵎⴰ ⴰⴷ ⵏⵙⴱⴷⴷ ⵉⴼⵔⵉⵇⵢⴰ ⵜⴰⵎⴰⵢⵏⵓⵜ ⵉⴱⴷⴷⵏ ⴼ ⵉⴷⵔⵉⵣⵏ ⵏ ⵜⵉⴱⴹⵉⵢⵉⵏ ⴷ ⵜⴰⵙⵙⴰⵙⵉⵏ ⴷ ⵓⵛⵃⵓ. ⵉⵇⵇⴰⵏ ⴷ ⴰⴷ ⵙⵡⵓⵔⵉⵏ ⵜⵎⵔⵙⴰⵍ ⵏⵏⵖ ⴷ ⵉⵎⵙⴽⴰⵔⵏ ⵏⵏⵖ ⴼ ⵉⵙⵏⴼⴰⵔⵏ ⴷ ⵜⵙⵔⵜⴰⵢ ⵍⵍⵉ ⵔⴰⴷ ⵢⴰⵡⵙ ⵉ ⵉⴼⵔⵉⵇⵢⴰ ⴰⴷ ⵜⴻⵟⵟⴼ ⵚⴰⵃⴰ ⵙⴳ ⵉⵙⴳⴱⵔⵏ ⵏⵏⵙ.
ⵖⵎⴽ ⵍⵍⵉ ⵙ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⴳ ⵉⵏⴰⵡ ⵏⵏⵙ ⴰⵎⵣⵔⴰⵢ ⴷⴰⵜ ⵏ ⵓⴳⵔⴰⵡ ⵡⵉⵙ 28 ⵏ ⵉⵏⵎⵖⵓⵔⵏ ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ ⴰⵙⵙ ⵏ 31 ⵉⵏⵏⴰⵢⵔ 2017 ⴳⴰ ⴰⴷⵉⵙ ⴰⴱⴰⴱⴰ: “ⵜⵍⴽⵎ ⵜⵉⵣⵉ ⴰⴷ ⵜⴰⵎⵥ ⵉⴼⵔⵉⵇⵢⴰ ⵚⴰⵃⴰ ⵙⴳ ⵉⵙⴳⴱⵔⵏ ⵏⵏⵙ. ⵍⵍⵉⵖ ⵣⵔⵉⵏ ⵜⴰⵙⵓⵜⵏ ⵏ ⵜⵓⴽⴽⵕⴹⴰ ⵏ ⵉⴽⴰⵍⵉⵡⵏ ⵉⴼⵔⵉⵇⵉⵢⵏ, ⵉⵇⵇⴰⵏⴷ ⴰⴷ ⵏⵙⵡⵓⵔⵉ ⴰⴷ ⵜⵉⵍⵉ ⵜⴼⴽⴰ ⵜⴰⵎⴰⵢⵏⵓⵜ ⵏ ⵓⵙⵎⵖⵔ”. ⵉⵙⵎⴷ ⵉⵏⴰⵡ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.
ⵜⴰⵖⵓⵔⵉ ⴰⴷ ⵜⴰⴳⵍⴷⴰⵏⵜ ⵜⴳⴰ ⵓⴽⴰⵏ ⵜⵉⵏ ⵖⵉⵍⴰⴷ ⵎⵇⵇⴰⵔ ⵣⵔⵉⵏ ⵙⵎⵎⵓⵙ ⵉⵙⴳⴳⵯⴰⵙⵏ ⴼ ⵓⵕⵥⵥⵓⵎ ⵏⵏⵙ, ⵜⵟⵟⴰⴼ ⴰⴷⵖⴰⵔ ⵏⵏⵙ ⴰⵅⴰⵜⴰⵔ ⴳ ⵓⵎⵏⴰⴹ ⴰⴳⵔⴰⵖⵍⴰⵏ ⵏ ⵖⵉⵍⴰⴷ, ⵙ ⵜⵎⵜⵉⵍⵉⵏ ⴰⴷ:
1- ⵜⴻⵟⵟⴰⴼ ⵉⴼⵔⵉⵇⵢⴰ ⵜⵉⵥⴹⴰⵕⵉⵏ ⴳⴳⵓⵜⵏⵉⵏ ⵍⵍⵉ ⴷ ⵉⵇⵇⴰⵏ ⵓⵙⵏⵍ ⵙ ⵉⵙⴳⴱⵔⵏ. ⴷⴰⵔⵙ 60% ⵏ ⵉⴽⴰⵍⵉⵡⵏ ⴳⴰⵏⵉⵏ ⵡⵉⵏ ⵉ ⵜⴽⵔⵣⴰ ⴳ ⵓⵎⴰⴹⴰⵍ. ⵓⵔ ⴳⵉⵙ ⵜⵓⵔⴷⴰ ⵎⴰⵙ ⴷ ⴰⵙⵎⵔⵙ ⵉⵥⵉⵍⵏ ⴷ ⵉⵙⵓⵍⵏ ⴷ ⵓⵎⴰⵢⵏⵓ ⵏ ⵉⴽⴰⵍⵉⵡⵏ ⴰⴷ ⵔⴰⴷ ⵢⵉⵡⵙ ⴳ ⵜⵉⵍⵉⵜ ⵏ ⵓⵜⵛⵓ ⵉ ⵉⵎⵣⴷⴰⵖⵏ ⵏ ⵓⵎⵏⵥⴰⵡ, ⴷ ⵓⵏⵛⴽ ⵉⴳⴳⵓⵜⵏ ⵏ ⵉⵎⵣⴷⴰⵖⵏ ⵏ ⵓⵎⴰⴹⴰⵍ. ⵓⵔ ⵙⵖⴰⵡⵙⴰⵖ ⴰⴷ ⵙⵙⴽⵜⵉⵖ ⴰⴷⵖⴰⵔ ⵏ ⵓⵜⵛⵓ ⴳ ⵜⵏⴰⵥⵕⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵖⵉⵍⴰⴷ ⴷ ⵜⵉⵏ ⵉⵎⴰⵍ.
2- ⵉⵟⵟⴰⴼ ⵓⵎⵏⵥⴰⵡ ⵏⵏⵖ ⵉⵙⵓⴳⴰⵎ ⵏ ⵢⵉⵍ ⴳⴳⵓⵜⵏⵉⵏ, ⴳⴰⵏ 13 ⵏ ⵎⵍⵢⵓⵏ ⵏ ⴽⵉⵍⵓⵎⵟⵕ ⵏ ⵉⴽⴰⵍⵉⵡⵏ ⵏ ⵢⵉⵍ ⴰⴼⵔⵉⵇⵉ ⴷ ⵓⴳⴳⴰⵔ ⵏ 6.5 ⵏ ⵎⵍⵢⵏ ⵏ ⵍⵊⵕ ⴰⵎⵏⵥⴰⵡ ⴰⴼⵔⵉⵇⵉ, ⴳⵉⵙⵏ ⵉⵙⵓⴳⴰⵎ ⴳⴳⵓⵜⵏⵉⵏ, ⵔⴰⴷ ⵜⴰⵡⵙ 26 ⵏ ⵜⵎⵉⴹⵉ ⵏ ⴽⵍⵎ ⵍⵍⵉ ⵜⴻⵟⵟⴰⴼ ⵉⴼⵔⵉⵇⵢⴰ ⴳ ⵉⴼⵜⴰⵙⵏ ⴰⴷ ⴳⵉⵏ ⵉⴳⵔ ⵏ ⵜⵉⵍⴰⵍ ⴷ ⵉⵙⵏⴼⵍⵏ ⵏ ⵓⵙⵖⵏⵣⵉ ⴰⵎⵏⵥⴰⵡ ⴷ ⵓⴳⵔⴰⵖⵍⴰⵏ ⵙ ⵜⵖⴰⵔⴰⵙⵜ ⵉⴳⴳⵓⵜⵏ ⴳ ⵉⵍⵍⴰ ⵚⴰⵃⴰ.
3- ⵓⴳⴳⴰⵔ ⵏ ⵎⴰ ⴰⵏⵏ, ⵉⵟⵟⴰⴼ ⵓⵎⴰⵥⵓⵏ ⵏⵏⵖ ⴰⵙⴳⴱⵔ ⵏ ⵉⵡⴷⴰⵏ ⴳⴰⵏⵉⵏ ⵉⵄⵔⵔⵉⵎⵏ, ⵥⴹⴰⵕⵏ ⵉⵖ ⵟⵟⴰⴼⵏ ⴰⵙⵉⵍⵖ ⴷ ⵓⵙⵎⵓⵜⵜⴳ ⴷ ⵢⵓⵙⴰⵏ, ⴰⴷ ⴰⵡⵙⵏ ⴳ ⵓⵙⵏⴼⵍ ⵏ ⵜⵥⴹⴰⵕⵉⵏ ⴰⴷ ⵙ ⵡⴰⵏⵏⴰⵣⵏ ⵍⵍⵉ ⵔⴰⴷ ⵢⴰⵡⵉ ⴰⵔⴳⴳⵉⴳ ⴷ ⵓⵏⴰⵔⵓⵣ ⵎⴳⴰⵍ ⵏ ⵡⴰⵔⴰⵏⴰⵔⵓⵣ ⴷ ⵜⵉⵔⴰⵜ ⵏ ⵓⵣⵡⴰⴳ ⵍⵍⵉ ⵉⵙⵎⵖⵔ ⵡⴰⵔⴰⵏⴰⵔⵓⵣ ⴷ ⵡⴰⵔⵡⵓⵔⵉ.
4- ⵔⴰⴷ ⵉⵥⴹⵉⵔⵏⵜ ⵜⵎⵉⵣⴰⵔ ⵏⵏⵖ ⴰⴷ ⵙⵎⵖⵔⵏⵜ ⵜⴰⴽⵔⵣⴰ ⵉⵙⵓⵍⵏ ⵙ ⵉⵙⴳⴱⵔⵏ ⵏ ⵡⵎⴰⵏ ⴳⴳⵓⵜⵏⵉⵏ ⵍⵍⵉ ⵟⵟⴰⴼⵏⵜ, ⵎⴰⵛⵛ ⵉⵇⵇⴰⵏ ⴷ ⴰⴷ ⵉⵥⵉⵍ ⵓⵙⵎⵓⵙⵙⵓ ⴷ ⵓⵙⵎⴰⵜⵜⵉ ⴷ ⵓⵙⵎⵔⵙ ⵏⵏⵙⵏ, ⵜⵉⴽⴽⵍⵉⵜ ⵢⴰⴹⵏⵉⵏ ⴰⵔ ⴷ ⵙⵙⴽⵜⵉⵖ ⵜⴰⵏⴰⵥⴰⵕⵜ ⵜⴰⴳⵔⴰⵖⵍⴰⵏⵜ ⵉⵣⴷⵉⵏ ⴷ ⵡⴰⵎⴰⵏ ⴳ ⵜⴰⵙⵓⵜ ⵜⵉⵙ 21.
ⵎⴰⵙⵙ ⴰⵏⵙⵙⵉⵅⴼ
ⵜⵉⵏⴳⴳⵯ ⴷ ⵉⵏⴳⴳⵯⴰ
ⵉⵖ ⵏ ⵓⵔⵔⵉ ⵙ ⵜⵎⵓⴽⵔⵉⵙⵉⵏ ⵏ ⵓⵏⵣⵡⵉ ⴷ ⵡⴰⵍⴰⵢ ⵏ ⵡⴰⵜⵉⴳⵏ ⵏ ⵜⵎⵜⵜⵉⵡⵉⵏ ⵏ ⵜⵥⴹⴰⵕⵉⵏ, ⵉⵇⵇⴰⵏ ⴷ ⴰⴷ ⵏⴼⵔⴽ ⵙ ⵡⴰⵜⵉⴳ ⵏ ⵉⵖⴱⵓⵍⴰ ⵏ ⵜⵥⴹⴰⵕⵜ ⵉⵖⵓⵙⵏ ⵍⵍⵉ ⵉⵟⵟⴰⴼ ⵓⵎⵏⵥⴰⵡ ⵏⵏⵖ, ⵍⵍⵉ ⵉⵙⵖⴰⵡⵙⴰⵏ ⵙ ⵜⴻⵜⵉⴽⵏⵓⵍⵓⵊⵉⵜ ⴷ ⵓⵙⵙⵥⵕⴼ. ⴳ ⵜⵎⵓⴽⵉⵙⵜ ⴰⴷ, ⵜⵍⵍⴰ ⵜⵖⴰⵡⵙⴰ ⵏ ⵓⵎⵢⴰⵡⴰⵙ ⴰⵎⴰⴹⵍⴰⵏ ⵍⵍⵉ ⵔⴰⴷ ⵢⵉⵍⵉ ⴳ ⵢⵉⵔⵉⵎ ⵎⵏⵉⴷ ⵏ ⵉⴼⵔⵉⵇⵢⴰ.
ⴳ ⵎⴰⴷ ⵉⵥⵍⵉⵏ ⵙ ⵜⵏⵓⴼⴰ ⵜⵉⴷⵓⵙⴰⵏⵉⵏ, ⵙⵙⵓⵔⴼⴰⵜ ⵉⵢⵉ ⴰⴷ ⵙⵙⴽⵜⵉⵖ ⵎⴰⵙ ⵜⵎⵍⴰ ⵜⴰⵙⵙⴰⵙⵜ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19, ⵜⵉⵍⵉⵜ ⵏ ⵜⵏⵉⵎⴰⵏⵉⵏ ⴳⴳⵓⵜⵏⵉⵏ ⴷⴰⵔ ⴽⵉⴳⴰⵏ ⵏ ⵉⵡⴰⵏⴽⵏ ⵉⵏⴱⵖⵓⵔⵏ ⴷ ⵉⵎⵣⵡⵓⵔⴰ ⴳ ⵜⴻⵜⵉⴽⵏⵓⵍⵓⵊⵉⵜ, ⵍⵍⵉⵖ ⵏⴷⴷⵔ ⵉⵎⵉⵥ ⵏ ⵉⴳⵣⵣⴰⵢⵏ ⴷ ⵜⴻⵜⵉⴽⵏⵓⵍⵓⵊⵉⵜ ⴷ ⵉⵎⴰⵙⵙⵏ ⵏ ⵓⴼⵔⴰⴳ ⴷ ⵉⵎⴰⵙⵙⵏ ⵏ ⵜⵏⵙⵉⵊⵊⵉⵜ.
ⵜⵉⵎⵙⴰⵔⵉⵍ ⵍⵍⵉ ⴷ ⵉⵇⵇⴰⵏ ⴰⴷ ⵜⵏⵜ ⵏⴰⵎⵥ ⵙⴳ ⵓⵎⵏⴰⴷ ⴰⴷ, ⴳⴰⵏⵜ ⴰⴷ ⵢⵉⵍⵉ ⵢⴰⵏ ⵓⵏⴳⵔⴰⵡ ⵏ ⵓⵎⵢⴰⵡⴰⵙ ⴷ ⵓⴼⴰⵔⵙ ⵏ ⵉⵙⴰⴼⴰⵔⵏ ⴳ ⵉⴼⵔⵉⵇⵢⴰ, ⵉⵙⵙⵉⵣⵡⵉⵔⵏ ⴰⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ, ⵜⴰⵡⵙ ⴳ ⵓⵡⵓⵔⵉ ⵏ ⵜⵙⵓⴳⴰⵔ ⴷ ⵉⴷ ⴱⴰⴱ ⵏ ⵓⵙⵡⵉⵏⴳⵎ ⴳ ⵉⴼⵔⵉⵇⵢⴰ, ⵃⵎⴰ ⴰⴷ ⵢⵉⵍⵉ ⵓⵙⴰⵜⵉ ⵏ ⵓⵔⵣⵣⵓ ⴰⵎⴰⵙⵙⴰⵏ, ⵙⵎⵖⵔⵏ ⵜⵉⴷⴰⵏⵉⵎⵉⵢⵉⵏ ⵏ ⵓⵔⵣⵣⵓ ⴷ ⵜⵓⵙⵙⵏⴰ ⴷ ⵓⵙⴷⵖⵔ ⵏⵏⵙⵏⵜ ⴳ ⵜⵎⵉⵣⴰⵔ ⵏ ⵓⵎⵏⵥⴰⵡ.
ⴷ ⵉⴱⵕⵍⴰⵎⴰⵏⵉⵢⵉⵏ, ⵉⵇⵇⴰⵏ ⴰⵖ ⴷ ⵓⵏⵄⴰⵔ ⴳ ⵓⵙⵡⵉⵔ ⴰⴳⵔⴰⵖⵍⴰⵏ ⵃⵎⴰ ⴰⴷ ⵏⵍⴽⵎ ⴰⵡⵜⵜⴰⵙ ⴰⴷ, ⵉ ⵓⵙⴰⴼⴰⵔ ⵉ ⴽⵓⵢⴰⵏ ⴳ ⵉⴼⵔⵉⵇⵢⴰ, ⴷ ⵓⵙⵉⵜⵜⵉ ⵏ ⵜⴱⴱⴰⵢⴹⴰⵕⵉⵏ ⴷⴰⵜ ⵏ ⵜⵉⵍⵉⵜ ⵏ ⵜⵎⴳⵓⵔⵉ ⵜⴰⵏⵙⵉⵎⴰⵏⵜ ⵏ ⵉⵙⴰⴼⴰⵔⵏ ⴳ ⵉⴼⵔⵉⵇⵢⴰ, ⵍⵍⵉ ⵉⵜⵜⵓⵙⵎⵔⴰⵙⵏ ⴷ ⵉⵎⵉⵙⵙ ⵏ ⵜⵙⵓⵍⴰⵏⵜ ⵏ ⵉⵎⵉⵥ ⵜⵉⵍⵉ ⴳ ⵜⵎⵣⵡⵓⵔⴰ ⵜⵉⵙⵍⴽⵉⵏ ⵏ ⵜⵡⴰⴼⵉⵜ ⵏ ⵉⵙⴰⴼⴰⵔⵏ.
ⴷ ⵉⴱⵕⵍⴰⵎⴰⵏⵉⵢⵏ, ⵉⵇⵇⴰⵏ ⴰⵖ ⴷ ⵓⵍⴰ ⵓⵏⵄⴰⵕ ⵉ ⵓⵙⵎⴰⵜⵜⵉ ⵏ ⵜⴻⵜⵉⴽⵏⵓⵍⵓⵊⵉⵜ ⵙ ⵉⴼⵔⵉⵇⵢⴰ, ⵃⵎⴰ ⴰⴷ ⵢⵉⵍⵉ ⵓⵙⵔⵅⵓ ⵏ ⵡⵓⵔⵉ ⵏ ⵉⵏⵍⵉⵢⵏ ⵉⴼⵔⵉⵇⵉⵢⵏ ⵙ ⵜⵎⵉⵣⴰⵔ ⵏⵏⵙⵏ, ⵃⵎⴰ ⴰⴷ ⴰⵡⵙⵏⵜ ⵜⵎⵙⵙⵓⵔⵉⵏ ⵜⵉⵎⵏⵏⴰⵡⵉⵏ ⵏ ⵜⵏⴰⵎⵓⵔⵜ ⵓⵎⵥⵏⵉⵏ ⵉⵙⴳⴱⵔⵏ ⵏ ⵉⴼⵔⵉⵇⵢⴰ ⴷ ⵉⵎⴼⴽⴰⵡⵏ ⵉⴳⵔⴰⵖⵍⴰⵏⵏ, ⴰⴷ ⴰⵡⵙⵏ ⴳ ⵉⵙⵏⴼⴰⵔⵏ ⵟⵟⴰⴼⵏⵉⵏ ⵜⴰⵢⵢⴰⴼⵓⵜ ⵜⴰⵏⴰⵎⵓⵏⵜ ⴷ ⵜⴷⵎⵙⴰⵏⵜ, ⵉⴱⴷⴷⵏ ⴼ ⵓⵙⵙⴰⵔⵓ ⴷ ⵜⵎⴷⵔⴰⵡⵜ ⵓⵔⴷ ⵙ ⵓⵙⵏⵊⵊⵎ ⴷ ⵜⵡⵉⵣⵉ.
ⵙ ⵓⵙⴷⴷⴻⴷ, ⵥⴹⴰⵕⵏⵜ ⵜⵎⵔⵙⴰⵍ ⴷ ⵜⵙⵏⵓⵔⴰⵢⵉⵏ ⵜⵉⴼⵔⵉⵇⵉⵢⵉⵏ ⵜⵜⵓⵙⴽⴰⵔⵏⵉⵏ ⵉ ⵡⴰⵡⵜⵜⴰⵙ ⴰⴷ ⴰⴷ ⴳⵉⵏⵜ ⴰⵙⴰⵜⵉ ⵉ ⵓⵣⴷⴰⵢ ⵏ ⵜⵢⵢⴰⴼⵓⵜⵉⵏ ⵏ ⵓⵏⵄⴰⵔ ⴰⴷ ⴰⴱⵕⵍⴰⵎⴰⵏⵉ ⴰⴼⵔⵉⵇⵉ ⴷ ⵜⵙⵔⵜⴰⵢ ⵜⵉⵎⵏⵥⴰⵡⵉⵏ ⵣⴷⵉⵏⵉⵏ.
ⵜⵉⵏⴳⴳⵯⴰ ⴷ ⵉⵏⴳⴳⵯⴰ,
ⵍⵍⴰⵏ ⵉⵡⵜⵜⴰⵙⵏ ⴰⴷ ⴳ ⵓⴳⵏⵙ ⵏ ⵜⵏⴰⵥⴰⵕⵜ ⵏ ⵓⵙⴷⵓⵙ ⴷ ⵓⵜⴳⵎⵉ ⵏ ⵡⴰⵢⴷⴰ ⴰⵏⴼⴳⴰⵏ ⴷ ⵓⴷⵎⵙⴰⵏ, ⴳ ⵓⴳⵏⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⴳⵏⵙ ⵏ ⵡⴰⵜⵉⴳⵏ ⵉⴷⵉⵎⵓⵇⵔⴰⵟⵉⵢⵏ, ⴳⵏ ⵉⴱⵕⵍⴰⵎⴰⵏⵉⵢⵏ ⵙⴳ ⵜⵎⵔⵙⴰⵍ ⵍⵍⵉ ⴼⵍⵍⴰⵙⵏⵜ ⴱⴷⴷⵏⵉⵏ.
ⵜⵇⵇⴰⵏ ⴰⵖ ⴷ ⵜⵡⵡⵓⵔⵉ ⵃⵎⴰ ⴰⴷ ⴳⵉⵏ ⵉⵡⵜⵜⴰⵙⵏ ⴰⴷ ⴳ ⵓⵙⵖⵉⵡⵙ ⴰⵙⵔⵜⴰⵏ, ⴷ ⵜⵓⴳⴳⴰⵙ ⵍⵍⵉ ⵔⴰⴷ ⵏⵙⴽⵔ ⴳ ⵓⵙⵡⵉⵔ ⴰⴳⵔⴰⵖⵍⴰⵏ, ⴷ ⵉⵣⵣⵔⴰⴼⵏ ⵉⵏⴰⵎⵓⵔⵏ ⴷ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵍⵍⵉ ⴹⵓⴼⵏ ⵉⴱⵕⵍⴰⵎⴰⵏⵏ ⵙⵓⵜⴳⵏ ⵓⵍⴰ ⴰⵣⵣⴳⵉⵔ ⴷ ⵜⵉⵔⵡⵉ ⵏⵏⵙⵏ.
ⵜⵎⵍⴰ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ ⴰⵍⵜⴰⵖ ⵏⵏⵙ ⴳ ⵓⵎⵏⴰⴷ ⴰⴷ ⴰⵎⵏⵥⴰⵡ, ⵏⵜⵜⴰⵜ ⴰⵔ ⴱⴷⴷⴰ ⵜⵜⵏⵄⴰⵕ ⴼ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ ⵜⵙⵙⵉⵣⵡⵓⵔ ⵜ, ⵜⵙⴽⵔ ⵙⵔⵙ ⴳ ⵉⵙⵙⴰⵔⵓⵜⵏ ⵏⵏⵙ ⴳ ⴽⵉⴳⴰⵏ ⵏ ⵜⵎⵉⵣⴰⵔ ⵏ ⵏ ⵓⵎⵏⵥⴰⵡ ⵉⴱⴷⴷⵏ ⴼ ⵚⴰⵃⴰ ⵉⵛⵛⴰⵔⵏ, 60% ⵏ ⵉⵙⵙⴰⵔⵓⵜⵏ ⵉⵎⵖⵔⵉⴱⵉⵢⵏ ⵍⵍⴰⵏⵉⵏ ⴳ ⴱⵕⵕⴰ ⴳⴰⵏ ⵡⵉⵏ ⵉⴼⵔⵉⵇⵢⴰ.
ⴳⴰⵏⵜ ⵜⵎⵚⵕⴰⵢ ⵜⵉⴼⵔⵉⵇⵉⵢⵉⵏ, ⴷ ⵜⵙⵏⵜⴰⵢⵜ ⵏ ⵓⵎⵙⴰⵙⴰ ⵏ ⵜⴼⵍⵍⴰⵃⵜ ⵜⴰⴼⵔⵉⵇⵉⵜ ⵉⵜⵜⵓⵙⵙⴰⵏⵏ ⵙ (AAA Initiative) ⵍⵍⵉ ⵉⵕⵥⵎ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴷ ⴽⵉⴳⴰⵏ ⵏ ⴰⵢⵜⵎⴰⵙ ⵉⵏⵎⵖⵓⵔⵏ ⵏ ⵉⵡⴰⵏⴽⵏ ⵉⴼⵔⵉⵇⵉⵢⵏ ⴳ ⵓⴳⵔⴰⵡ ⵏ ⵓⵏⵣⵡⵉ ⴽⵓⴱ22 ⴳ ⵡⴰⵎⵓⵔ ⵏ ⵡⴰⴽⵓⵛ ⴳ 2016, ⴰⵏⴰⵡ ⵏ ⵓⵎⵢⴰⵡⴰⵙ ⵉⵟⵟⴰⴼⵏ ⴰⴼⴰⵔⵙ ⵏ ⵓⵙⴳⴱⵔ ⴷ ⵓⵙⵉⵜⵜⵉ ⵏ ⵓⵥⵍⴰⴹ. ⵔⴰⴷ ⵜⴳ ⵜⵏⴰⵥⴰⵕⵜ ⴰⵙⵉⴷⵔⵓⵙ ⵏ ⵓⵛⵃⵓ ⵏ ⵉⴼⵔⵉⵇⵢⴰ ⴷ ⵜⴼⵍⵍⴰⵃⵜ ⵏⵏⵙ ⵎⵏⵉⴷ ⵏ ⵜⵎⵓⴽⵔⵉⵙⵉⵏ ⵏ ⵓⵏⵣⵡⵉ ⴷ ⵓⵙⵎⵖⵔ ⵏ ⵉⵙⵏⴼⴰⵔⵏ ⵉⵏⴼⵍⴰⵃⵏ ⴳ ⴽⵉⴳⴰⵏ ⵏ ⵜⵎⵉⵣⴰⵔ ⵏ ⵓⵎⵏⵥⴰⵡ.
ⵉⴳⴰ ⵓⵙⵉⵔⴰ ⴰⵛⴰⵔⵉⴼ ⵏ ⵍⴼⵓⵙⴼⴰⵟ, ⴰⵙⵙⴰ ⴰⴷ, ⴰⵎⵣⵡⴰⵔⵓ ⴳ ⵉⴼⵔⵉⵇⵢⴰ ⴳ ⵢⵉⴳⵔ ⵏ ⵓⴼⴰⵔⵙ ⴷ ⵓⵙⵎⵖⵔ ⵏ ⵜⴼⵍⵍⴰⵃⵜ ⵜⴰⴼⵔⵉⵇⵉⵜ, ⵖⵉⵍⴰⴷ ⵔⴰⴷ ⵉⵙⵏⴰⵍ ⴰⵙⵎⵖⵔ ⵏ ⵜⴼⵍⵍⴰⵃⵜ ⴳ ⴽⵉⴳⴰⵏ ⵏ ⵜⵎⵉⵣⴰⵔ ⵏ ⵓⵎⵏⵥⴰⵡ.
ⵉⵖ ⵉⵍⵍⴰ ⵓⵎⵏⵥⴰⵡ ⵏⵏⵖ ⴳ ⵓⴳⵏⵙ ⵏ ⵜⵏⴰⵥⵕⵉⵏ ⵜⵉⴳⵔⴰⵖⵍⴰⵏⵉⵏ, ⴷ ⵓⵙⵏⵜⵍ ⵏ ⵜⵣⵡⵉⵔⵉ ⵜⴰⴷⵎⵙⴰⵏⵜ ⵊⴰⵔ ⵉⵡⴰⵏⴽⵏ ⵉⵅⴰⵜⴰⵔⵏ, ⴰⵛⴽⵓ ⵜⴻⵟⵟⴰⴼ ⵜⵉⵥⴹⴰⵕⵉⵏ ⵅⴰⵜⵔⵏⵉⵏ, ⵉⵇⵇⴰⵏ ⴷ ⴰⴷ ⵏⵙⵇⵙⴰ ⵉⵅⴼⴰⵡⵏ ⵏⵏⵖ ⵏⴽⴽⵏⵉ ⵉⴼⵔⵉⵇⵉⵢⵏ, ⵎⴰⴷ ⵉⵍⵍⴰⵏ ⵊⴰⵔ ⵏⵏⵖ ⴷ ⵓⵣⵣⴳⵉⵔ ⵏ ⵜⵙⵜⵔⴰⵜⵉⵊⵉⵢⵉⵏ ⵏ ⵓⵎⵢⴰⵡⴰⵙ ⵉⴼⴼⵓⵙ ⵉⴼⴼⵓⵙ? ⵎⴽ ⵏⵏⴰ ⵜⴳⴰ ⵜⵎⵔⴰⵔⵓⵜ, ⵉⵙⵔⵙ ⴼⵍⵍⴰⵖ ⵓⵎⵏⴰⴹ ⵏ ⵖⵉⵍⴰⴷ ⴰⵣⵣⵔⴰⵢ ⵏ ⴽⵉⴳⴰⵏ ⵏ ⵜⵖⴰⵡⵙⵉⵡⵉⵏ, ⴷ ⴰⴷⴷ ⵏⴰⴽⵉ ⴳ ⵜⵣⴷⴰⵢⵉⵏ ⵏⵏⵖ, ⵏⵙⵉⵜⵜⵉ ⴰⵔⵔⴰⵣⵏ ⵏ ⵜⵎⴰⵖⴰⵜ ⵜⴰⵚⵎⵎⴰⴹⵜ, ⵏⵙⵔⵙ ⵜⵉⵏⵓⴼⴰ ⵏ ⵉⴼⵔⵉⵇⵢⴰ ⴷ ⵉⵎⴰⴷⴰⵏⵏ ⵏⵏⵙ ⴷ ⵜⵣⵡⵉⵔⵉ ⵏ ⵜⵡⵡⵓⵔⵉ ⵏⵏⵖ ⵜⴰⵎⵏⵥⴰⵡⵜ.
ⵜⴻⵟⵟⴰⴼ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵜⵉⵎⵓⵣⴰⵢⵉⵏ ⵜⵉⵎⵣⵡⵓⵔⴰ ⴷ ⵜⵙⵓⴳⴰⵔ ⴳ ⴽⵉⴳⴰⵏ ⵏ ⵉⴳⵔⴰⵏ ⴰⵎ ⵜⴰⴼⵍⵍⴰⵃⵜ ⴷ ⵜⴳⵎⵔⵜ ⵜⴰⵢⵍⴰⵏⵜ ⴷ ⵓⵙⵎⵓⵙⵙⵓ ⵏ ⵡⴰⵎⴰⵏ ⴷ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵓⵙⵎⴰⵜⴰ ⵏ ⵓⵙⴼⵍⵙ ⴰⴷⵓⵙⴰⵏ ⴷ ⵓⵙⵉⵜⵜⵉ ⵏ ⵜⵄⴰⵎⵉⵜ ⴷ ⵜⵏⴼⵔⵓⵜ ⵏ ⵓⵜⵛⵓ, ⵜⵓⵊⴰⴷ ⴰⴷ ⵜⵣⵣⵉⴳⵣ ⵜⵉⵎⴷⵔⴰⵡⵉⵏ ⵏⵏⵙ ⴷ ⵓⵙⵎⵖⵔ ⵏⵏⵙⵏⵜ ⴰⴽⴷ ⴰⵢⵜⵎⴰⵙ ⴳ ⵉⴼⵔⵉⵇⵢⴰ. ⴰⵢⵍⵍⵉ ⵜⵙⴽⴰⵔ ⴼ ⵜⵔⵙⵍⵜ ⵏ ⵚⴰⵃⴰ ⵉⵛⵛⴰⵔⵏ ⴷ ⵓⵡⵇⵇⵔ ⵏ ⵉⵙⵜⴰⵢⵏ ⵏⵏⵙⵏ ⴷ ⵜⵎⵔⵙⴰⵍ ⵏⵏⵙⵏ ⴷ ⵜⵅⵅⵓⵜⵔⴰ ⴷ ⵜⵢⴰⵏⵜ ⵏ ⵡⴰⴽⴰⵍ ⵏⵏⵙⵏ, ⴷ ⵓⴳⵓⵣ ⴷ ⵚⴰⵃⴰ ⵉⵛⵛⴰⵔⵏ.
ⵎⴰⵙⵙ ⴰⵏⵙⵙⵉⵅⴼ
ⵜⵉⵏⴳⴳⵯⴰ ⴷ ⵉⵏⴳⴳⵯⴰ
ⴳⵉⵖ ⵙⴳ ⵉⴼⵔⵉⵇⵢⵉⵏ ⴼⵔⴽⵏⵉⵏ ⵎⴰⵙ ⴷ ⴰⵎⵏⵥⴰⵡ ⵏⵏⵖ ⵉⴳⴰ ⴰⵎⵏⵥⴰⵡ ⵏ ⵉⵎⴰⵍ ⴷ ⵡⵉⵏ ⵉⵔⵔⵉⵎⵏ. ⵉⵇⵇⴰⵏⴷ ⴰⴷ ⵏⵓⵔⵔⵉ ⵙ ⵓⵎⵣⵔⵓⵢ ⵉⵖ ⵏⵔⴰ ⴰⵍⴰⵢ ⴰⴼⵔⵉⵇⵉ, ⴷ ⵜⵎⵙⴽⴰⵔ ⵏ ⵡⵉⵢⵢⴰⴹ ⴳ ⵜⴰⵎⵓⵏⵜ ⴷ ⵜⵣⴷⴰⵢⵉⵏ ⴷ ⵓⵙⵎⵔⵙ ⵉⵥⵉⵍⵏ ⵉⵛⵛⴰⵔⵏ ⵉ ⵡⴰⵢⴷⴰⵜⵏ ⵉ ⵜⵏⵉⴼⴰ ⵏ ⵉⵎⴰⴷⴰⵏⵏ ⵏⵏⵖ ⴷ ⵓⵙⵎⵖⵔ ⵏ ⵜⵎⵉⵣⴰⵔ ⵏⵏⵖ.
ⵜⴰⵏⵎⵎⵉⵔⵜ ⴼ ⵓⵙⵙⴼⵍⴷ ⵏⵏⵓⵏ