ⴰⵙⵉⵔⴰ(2016-2021):
ⴰⵙⵉⵡⴹ ⵏ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵉⵏⴰⵡⵜ ⵏ ⵉⵏⵙⵙⵉⵅⴼⵏ, ⴰⵢⵏⴰⵙ 1 ⵎⴰⵕⵚ 2021
ⵉ ⵓⵙⵓⵊⴷ ⵉ ⵜⵙⵓⵜⵍⵜ ⵉⵥⵍⵉⵏ, ⵉⵙⵏⵎⴰⵍⴰ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵜⴰⵙⵎⵓⵏⵉ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉ ⵓⵙⵏⵎⴰⵍⴰ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ, ⴰⵢⵏⴰⵙ 1 ⵎⴰⵕⵚ 2021.
ⴳ ⵜⵣⵡⵉⵔⵉ, ⵉⵙⵙⴽⵜⵉ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵜⵓⵎⴰⵢⵉⵏ ⵏ ⵓⵙⴽⵔ ⵏ ⵜⵙⵓⵜⵍⵜ ⴷ ⵓⵖⴰⵡⴰⵙ ⵏⵏⵙ, ⵢⵉⵏⵉ ⵎⴰⵙ ⵜⵙⵜⴰⵡⵀⵎⵎⴰ ⴳ ⵓⵎⵣⵔⵓⵢ ⵏ ⵜⵡⵓⵔⵉ ⵏ ⵓⵙⵇⵇⵉⵎ ⴳ ⵓⵙⵓⵊⴷ ⵏ ⵉⵣⵣⵔⴰⴼⵏ ⵏ ⵉⵙⵜⴰⵢⵏ, ⴷ ⵉⵣⵣⵔⴰⴼⵏ ⵣⴷⵉⵏⵉⵏ ⴷ ⵓⴼⵔⴰⴳ ⴰⵏⴰⵎⵓⵏ ⴷ ⵓⴳⵎⴰⵎ ⴰⵏⴰⵎⵓⵔ ⵏ ⵓⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ, ⴷ ⵓⵙⵏⴼⴰⵔ ⵏ ⵓⵙⵍⴳⵏ ⴰⵎⴰⴷⴷⴰⵙ ⵏ ⵓⵙⵎⵍ ⴳ ⵜⵣⵣⵓⵍⵉⵏ ⴰⵜⵜⵓⵢⵏⵉⵏ.
ⵉⵙⴰⵡⵍ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ, ⴼ ⵓⵙⵓⵔⵙ ⵉⵥⵉⵍⵏ ⵏ ⵢⵉⵎⴰⵏ ⴰⵏⵎⵓⵔ ⵢⴰⵜⵜⵓⵢⵏ ⵏ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⴳ ⵜⵡⴰⵍⴰ ⵍⵍⵉ ⵉⵣⵔⵉⵏ ⴳ ⵓⵎⴹⴰⴽⴰⵕ ⴷ ⵜⵖⵔⵉ ⵏ ⵜⵎⵙⴰⵔⵉⵏ ⴷ ⵉⵅⵎⵎⵉⵎⵏ ⵏ ⵉⵏⵎⵓⵔⴰⵏ, ⵢⵉⵏⵉ ⵎⴰⵙ ⵜⴳⴰ ⵜⴰⵙⵓⵜⵍⵜ ⵉⵣⴷⵉⵏ ⴷ ⴽⵉⴳⴰⵏ ⵏ ⵜⵏⴰⵥⵕⵉⵏ ⵍⵍⵉ ⴳ ⵜⵍⵍⴰ ⴳ ⵓⵣⵎⵣ ⵏ ⵓⴱⴰⵢⵢⵓⵕ, ⴰⵎ ⴰⵍⴰⵢ ⴰⴷⵎⵙⴰⵏ ⴷ ⵢⵉⴳⵔ ⵓⵔ ⵉⴳⴰⴷⴷⴰⵏ ⴷ ⵓⴼⵔⴰⴳ ⴰⵏⴰⵎⵓⵏ ⴷ ⵓⵙⵎⵖⵔ ⵏ ⵢⵉⴳⵔ ⵏ ⵓⴷⵡⴰⵙ, ⴷ ⵉⵙⵓⵔⵙⵏ ⴳ ⵜⵏⵣⵔⵓⴼⵜ ⵜⴰⵎⵖⵔⵉⴱⵉⵜ ⴷ ⵓⵙⵏⴰⵍ ⴰⴳⵔⴰⵖⵍⴰⵏ ⵉⵣⵣⵉⴳⵣⵏ ⵉ ⵡⴰⴷⴷⴰⴷ ⴰⵎⵖⵔⵉⴱⵉ ⴷ ⵉⵣⵔⴼⴰⵏ ⵏⵏⵙ ⵓⵍⴳⵉⵏⵏ.
ⵉⴼⴼⵖ ⵓⵙⵉⵔⴰ ⴰⴷ ⵜⵉⵍⵉⵜ ⵜⵖⵉⵎⵉⵜ ⵜⴰⴳⴷⵓⴷⴰⵏⵜ ⴰⵙⵉⵏⴰⵙ 2 ⵎⴰⵕⵚ 2021 ⴳ ⵜⵙⵔⴰⴳⵜ ⵜⵉⵙ ⴽⵕⴰⴹⵜ ⵉ ⵓⵏⵏⵓⵕⵥⵎ ⵏ ⵜⵙⵓⵜⵍⵜ ⵉⵥⵍⵉⵏ, ⵜⴹⴼⵕ ⵜⵜ ⴷ ⵜⵖⵉⵎⵉⵜ ⵜⴰⴳⴷⵓⴷⴰⵏⵜ ⵉ ⵜⵖⵔⵉ ⴷ ⵓⵙⵜⴰⵢ ⵏ ⵎⵏⵏⴰⵡ ⵉⵣⵣⵔⴰⴼⵏ: ⴰⵙⵍⴳⵏ ⴰⵎⴰⴷⴷⴰⵙ ⵏ ⵓⵙⵎⵍ ⴳ ⵜⵣⵣⵓⵍⵉⵏ ⵜⵉⵎⴰⵜⵜⵓⵢⵉⵏ ⴷ ⵙⵉⵏ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴼ ⵜⵍⴳⴰⵎⵉⵏ ⵏ ⵉⵙⵜⴰⵢⵏ ⴷ ⵓⵙⵍⴳⵏ ⵏ ⵉⵙⵜⴰⵢⵏ ⴷ ⵓⵙⵏⵎⴰⵍⴰ ⴷ ⵓⵣⵣⵔⴰⵢ ⵉⵥⵍⵉⵏ ⵏ ⵜⵍⴳⴰⵎⵉⵏ ⵏ ⵉⵙⵜⴰⵢⵏ ⵏ ⵜⵎⵚⵕⴰⵢ ⵜⵉⵣⵣⵓⵍⴰⵏⵉⵏ.
ⵜⵙⵏⵎⴰⵍⴰ ⵓⵍⴰ ⵜⵉⵏⴰⵡⵜ ⵏ ⵉⵏⵙⵙⵉⵅⴼⵏ ⵜⴰⵙⵎⵓⵏⵉ ⵏⵏⵙ ⴳ ⵡⴰⵙⵙ ⴰⴷ ⵏⵉⵜ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⴰⵏⵙⵙⵉⵅⴼ ⵍⴰⵃⴱⵉⴱ ⵍⵎⴰⵍⴽⵉ, ⵥⵕⴰⵏ ⵉⴼⵔⴷⴰⵙ ⵏ ⵓⵙⵇⵇⵉⵎ ⴰⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ ⴷ ⵜⵣⵣⵉⴳⵣⵜ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵜⵉⵎⵏⵜⴰⵢ ⵙ ⵉⴹⵕⵉⵚⵏ ⵉⵣⵣⵔⴰⴼⵏ ⵏ ⵜⵙⵓⵜⵍⵜ ⵉⵥⵍⵉⵏ.
ⴳ ⵜⵣⵡⵉⵔⵉ ⵏ ⵜⵙⵎⵓⵏⵉ, ⵉⵙⵙⵎⵖⵔ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵜⵓⴳⴳⴰⵙ ⵏ ⵎⴰⵙⵙ ⵎⵓⵚⵟⴼⴰ ⵕⵕⵎⵉⴷ ⴰⵎⴰⵡⵙⴰⵙ ⵏ ⵓⵡⴰⵏⴽ ⵉⵜⵜⵓⵙⵎⴰⴳⴰⵍⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵣⴷⴰⵢⵉⵏ ⴷ ⵓⴱⵕⵍⴰⵎⴰⵏ ⴳ ⵓⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ ⴰⵙⵇⵇⵉⵎ ⴷ ⵜⵏⴱⴰⴹⵜ, ⴷ ⵜⵎⴰⵖⵜ ⵏⵏⵙ ⵉ ⵓⵙⵎⵖⵔ ⵏ ⵓⵎⵢⴰⵡⴰⵙ ⴰⴷ, ⵍⵍⵉⵖ ⵉⵙⵙⵏ ⴰⵙⵡⵉⵔ ⴰⵅⴰⵜⴰⵔ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⴳ ⵓⵎⴹⴰⴽⴰⵕ ⵏ ⵜⵎⵙⴰⵔⵉⵏ ⵜⵓⴷⴷⵉⵔⵉⵏ ⵏ ⵜⵎⴰⵣⵉⵔⵜ ⵏⵏⵖ.
ⵉⵖⵔ ⵓⵏⵙⵙⵉⵅⴼ ⵏ ⵓⵙⵇⵉⵎ ⴷ ⵉⵎⴷⵔⴰⵡⵏ ⴳ ⵜⵙⵎⵓⵏⵉ ⵃⵎⴰ ⴰⴷ ⵉⵊⵊⵉ ⵎⴰⵙⵙ ⴰⵎⴰⵡⵙⴰⵙ ⴷ ⵓⵍⴳⴳⵓⴷ ⵢⵓⵔⵔⵉ ⴷ ⵙ ⵜⵉⵍⴰⵍⵜ ⵏⵏⵙ ⵜⴰⴽⵓⵢⴰⵙⵜ.