ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴰⵙⵉⵡⴹ ⴼ ⵜⵙⵎⵓⵏⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⵢⵏⴰⵙ 09 ⵏⵓⵡⴰⵏⴱⵉⵔ 2020
ⵉⵙⴳⵓⵎⵏ ⵏ ⵓⵏⵎⵓⵇⴰⵔ: ⵉⵏⴰⵡ ⵏ ⵜⵡⴰⴷⴰ ⵜⴰⵣⴳⵣⴰⵡⵜ ⴷ ⵜⵎⵙⴰⵔⵉⵏ ⵏ ⵓⵣⵣⵔⴰⴼ ⴷ ⵜⵉⴹⴰⴼ
ⵉⵙⴽⵔ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴰⵙⵙ ⵏ ⵡⴰⵢⵏⴰⵙ 09 ⵏⵓⵡⴰⵏⴱⵉⵔ 2020, ⵜⵥⵍⵉ ⵉ ⵜⵉⴹⴰⴼ ⴷ ⵓⵣⵣⵔⴰⴼ ⴷ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ.
ⵖ ⵜⵣⵡⵉⵔⵉ, ⵉⵙⵓⵜⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵉⵏⴰⵡ ⴰⴳⵍⴷⴰⵏ ⴰⵎⴰⵜⵜⵓⵢ ⵙ ⵜⵎⵍⴷⴰ ⵏ ⵓⴽⵜⵜⴰⵢ ⵡⵉⵙ 45 ⵏ ⵜⵡⴰⴷⴰ ⵜⴰⵣⴳⵣⴰⵡⵜ, ⵖ ⵉⵙⴰⵡⵍ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⴼ ⵜⵢⴰⴼⵓⵜⵉⵏ ⴷ ⵉⵎⵓⵔⵙⵏ ⵍⵍⵉ ⵜⵙⴽⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵙ ⵜⵏⴰⵔⴰ ⵏⵏⵙ ⵜⵓⵏⵥⵉⵥⵜ ⵖ ⵓⵙⵉⵜⵜⵉ ⵏ ⵉⵙⵡⵉⵏⴳⵉⵎⵏ ⵏ ⵓⵏⴳⴰⵔⴰ ⵍⵍⵉ ⵉⴼⵍ ⵓⵣⵎⵣ, ⴷ ⵓⵙⵏⴰⵍ ⵏ ⵡⴰⵎⵓⵏ ⴰⴳⵔⴰⵖⵍⴰⵏ ⵉ ⵜⵙⵏⵜⴰⵢⵜ ⵏ ⵓⵏⴱⴰⴹ ⴰⵏⵉⵎⴰⵏ ⵉ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⴷⴷⵓ ⵏ ⵓⴱⴰⴹ ⴰⵎⵖⵔⵉⴱⵉ.
ⵙⵓⵜⴳⵏ ⵓⵍⴰ ⵜⵓⴳⴳⴰⵙ ⵣⵣⵉⴳⵣⵏⵉⵏ ⵖ ⵍⵎⵖⵔⵉⴱ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵏⵚⵕ ⵕⴱⴱⵉ ⵖ ⵜⴳⵎⵉ ⵏ ⵜⵙⴳⴳⵉⵡⵉⵏ ⵏ ⵉⴼⴼⵓⵙ, ⴷ ⵓⵙⵏⴰⵍ ⵏ ⵓⵙⵙⴰⵔⵓ ⴳⵉⵙⵏⵜ ⴷ ⵓⵎⵙⴰⵙ ⵏⵏⵙⵏⵜ ⴷ ⵓⵙⵎⵖⵔ ⵏ ⵜⴳⵎⵔⵜ ⵜⴰⵢⵍⴰⵏⵜ ⴷ ⵓⵙⴷⵓⵙ ⵏ ⵜⵎⴰⵍⵍⴰⵢⵜ, ⵙ ⵜⵖⴰⵔⴰⵙⵜ ⵏ ⵜⵎⵢⵉⵎⴰⵏⵜ ⵍⵍⵉⵖ ⴷ ⵎⵍⴰⵏ ⵉⵡⴰⵏⴽⵏ ⵉⵅⴰⵜⴰⵔⵏ ⵖ ⵓⵎⴰⴹⴰⵍ ⴰⴷⴷⴰⴷⵏ ⴱⴷⴷⵏⵉⵏ ⴼ ⵜⵎⴰⴷⵔⴰⵡⵉⵏ ⵜⵉⵙⵜⵔⴰⵜⵉⵊⵉⵢⵉⵏ ⴷ ⵜⴷⵎⵙⴰⵏⵉⵏ, ⵍⵍⵉ ⵓⵔ ⵉⵥⵍⵉⵏ ⵜⵉⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ ⴳⴰⵏⵉⵏ ⴰⴳⵣⵣⵓⵎ ⵖ ⵡⴰⴽⴰⵍ ⴰⵎⵖⵔⵉⴱⵉ.
ⵙⴷⴷⵉⴷⵏ ⵓⵍⴰ ⴰⵙⵎⵓⵙⵙⵓ ⵏ ⵉⴳⵏⵙⴰⵙⵏ ⵏ ⵜⵎⵜⵜⵉ ⵖ ⵓⵎⵣⴰⵖ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⴷ ⵓⵙⴱⴷⴷⵉ ⵏ ⴳⴰⵔ ⵜⵉⵡⵓⵔⵉⵡⵉⵏ ⵣⴷⵉⵏⵉⵏ ⴷ ⵜⵣⴳⴰⵍⵉⵏ ⴷ ⵉⵙⵡⵉⵏⴳⵉⵎⵏ ⵍⵍⵉ ⵉⴼⵍ ⵓⵣⵎⵣ ⴳⴰⵏⵉⵏ ⵎⴳⴰⵍ ⵏ ⵓⵚⴽⵓ ⴰⵎⵖⴰⵔⵉⴱⵉ ⴷ ⵉⵣⵎⴰⵣ ⴳⴳⵓⵜⵏⵉⵏ ⵉ ⵜⴳⵎⵉ ⴷ ⵜⵣⵣⵉⴳⵣⵜ ⴷ ⵓⴱⵓⵖⵍⵓ.
ⵖ ⵜⵡⵓⵔⵉ ⵏ ⵜⵉⴹⴰⴼ, ⵜⵎⴷⴰⵡⴰⵍ ⵜⵙⵎⵓⵏⵉ ⵖ ⵓⵖⴰⵡⴰⵙ ⵏ ⵓⴳⵣⵣⵓⵎ ⵡⵉⵙ ⵙⵉⵏ ⵏ ⵡⴰⵢⵢⵓⵔ ⵏ ⵏⵓⵡⴰⵏⴱⵉⵔ ⵙ ⵓⵙⵖⵉⵡⵙ ⵏ ⵉⴳⵔⴰⵏ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵜⵣⵔⴼⵜ ⴷ ⵜⵥⴹⴰⵕⵜ ⴷ ⵉⵣⵓⵖⴰⵣ ⵖ ⵜⵖⵉⵎⵉⵜ ⵏ 16 ⵏⵓⵡⴰⵏⴱⵉⵔ, ⴷ ⵉⴳⵔⴰⵏ ⵏ ⵜⵙⴱⴷⴰⴷⵉⵏ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ ⴷ ⵜⴷⵓⵙⵉ ⴷ ⵜⵓⵡⵊⴰ ⴷ ⵜⵡⵉⵣⵉ ⴷ ⵜⵎⵥⵉ ⵖ ⵜⵖⵉⵎⵉⵜ ⵏ ⵡⴰⵙⵙ ⵏ 23 ⵏⵓⵡⴰⵏⴱⵉⵔ 2020, ⵙⴷⴷⵉⴷⵏ ⴰⴷ ⵢⵉⵍⵉ ⵓⵙⵡⵓⵔⵉ ⵙ ⵓⵎⵏⵏⵉ 152 ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⴰⴼⴰⴷ ⴰⴷ ⵉⵍⵉⵏⵜ ⵙⵏⴰⵜ ⵜⵓⵜⵔⵉⵡⵉⵏ ⵖ ⵜⴳⵉⵔⴰ ⵏ ⵜⵖⵉⵎⵉⵜ ⵍⵍⵉ ⵥⵍⵉⵏⵉⵏ ⵉ ⵜⵎⵔⴰⵔⵓⵜ ⴼ ⵉⵙⵇⵙⵉⵜⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⴼ ⵜⵎⵙⴰⵔⵉⵏ ⵍⵍⵉ ⴷ ⴳⴳⵯⵔⴰⵏⵉⵏ.
ⵜⵎⴷⴰⵡⴰⵍ ⵜⵙⵎⵓⵏⵉ ⵓⵍⴰ ⴼ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ ⴷ ⵜⵣⵣⵉⴳⵣⵜ ⵏ ⵜⵡⵓⵔⵉ ⵏ ⵜⵙⵇⵇⵉⵎⵉⵏ ⵖ ⵜⵖⵔⵉ ⵏ ⵉⵙⵏⴼⴰⵔⵏ ⵏ ⵜⵎⵙⴰⵙⵜⵍⵉⵏ ⵜⴰⵢⵢⴰⵡⵉⵏ , ⴷ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ ⴷ ⵡⴰⴽⵓⴷ ⵉⵥⵍⵉⵏ ⵉ ⵓⵎⴹⴰⴽⴰⵕ ⴰⵎⴰⵜⴰⵢ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⴷ ⵜⵎⵙⴰⵙⵜⵍⵉⵏ ⵜⴰⵢⵢⴰⵡⵉⵏ.