ⵢⵓⵎⵥ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴰⴼⵔⵉⵙ ⵏ ⵓⵎⴷⵔⴰⵡ ⵉⵣⵣⵉⴳⵣⵏ ⴷⴰⵔ “ⴼⵓⴱⵔⵉⵍ”

ⵉⵙⵖⵣⵏ ⵓⵏⵎⵓⵇⵇⴰⵕ ⵏ ⵉⵏⵙⵙⵉⵅⴼⵏ ⵏ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⴳ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⵍⴽⴰⵔⴰⵢⵉⴱ ⴷ ⵍⵎⵉⴽⵙⵉⴽ (ⴼⵓⴱⵔⵉⵍ), ⴰⴽⵕⴰⵙ 27 ⵏⵓⵡⴰⵏⴱⵉⵔ 2024 ⴳ ⵜⵙⵎⵓⵏⵉⵏⵏ ⵏⵏⵙ ⵜⵉⵙ 30 ⵍⵍⵉ ⵉⵙⵏⵓⴱⴳ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴰⵙⵙ ⵏ 27 ⴷ 28 ⵏⵓⵡⴰⵏⴱⵉⵔ 2024, ⵜⵉⴽⴽⵉ ⵏ ⵓⴼⵔⵉⵙ ⵏ “ⵓⵎⴷⵔⴰⵡ ⵉⵣⵣⵉⴳⵣⵏ” ⵍⵍⵉⵖ ⵉⴳⴰⵙ ⵖⴰⵙ ⴰⴳⵎⴰⵎ ⵉⵎⵥⵕⵉ ⵙⴳ 2014, ⵖⵎⴽ ⵍⵍⵉ ⵉⵜⵜⵓⴼⴽⴰ ⵓⵙⵓⵜⴳ ⵉ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵎⴰⵙⵙ ⵎⵓⵃⴰⵎⵎⴰⴷ ⵡⵍⴷ ⵕⵕⵛⵉⴷ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴼ ⵜⵉⵍⴰⵍⵜ ⵏ ⵜⴳⵍⴷⵉⵜ ⴳ ⵓⵙⴷⵓⵙ ⵏ ⵓⵎⵢⴰⵙ ⵉⴼⴼⵓⵙ-ⵉⴼⴼⵓⵙ ⵊⴰⵔ ⵉⴼⵔⵉⵇⵢⴰ ⴷ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ. 

ⵉⵙⴷⴷⵉⴷ ⵎⴰⵙⵙ ⴰⵔⵢⵉⵍ ⴰⵍⴱⴰⵕⴰⴹⵓ ⵓⵔⴱⵉⵏⵉ ⵎⴰⵙ ⵜⴳⴰ ⵜⵉⴽⴽⵉ ⵏ ⵓⴼⵔⵉⵙ ⴰⴷ ⴰⵙⵎⵖⵔ ⵏ ⵜⵓⴳⴳⴰⵙ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ “ⴳ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴽⴷ ⵜⵉⵎⵉⵣⴰⵔ ⵏ ⴼⵓⴱⵔⵉⵍ, ⵍⵍⵉⵖ ⵣⵣⵉⴳⵣⵏ ⴽⵉⴳⴰⵏ ⵏ ⵉⵙⵏⴼⴰⵔⵏ ⵛⵛⴰⵔⵏⵉⵏ ⵎⵏⵉⴷ ⵏ ⵜⵏⴰⵥⴰⵕⵉⵏ ⴷ ⵓⵚⴽⵓ ⵏ ⵓⵙⵎⴰⵇⵇⵍ ⵉⵛⵛⴰⵔⵏ ⵉ ⵉⵎⴰⵍ ⵏ ⵜⵎⵉⵣⴰⵔ ⵏⵏⵖ”.

ⵢⵉⵏⵉ ⵎⴰⵙ ⴷ ⵉⵎⵉⵥ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴰⴼⵔⵉⵙ ⵏ “ⵓⵎⴷⵔⴰⵡ ⵉⵣⵣⵉⴳⵣⵏ”ⵉⴳⴰ ⵜⴰⵎⴰⵜⵔⵜ ⴼ ⵜⵉⵍⵉⵜ ⵏ ⵜⴳⵍⴷⵉⵜ ⴳ ⵜⴳⵔⴰⵡⵜ ⴰⴷ, ⴷ ⵎⴰⵙ ⵉⵜⵜⵓⵡⵙ ⵓⵏⵎⵓⵇⵇⴰⵕ ⴳ ⵜⵉⵍⵉⵜ ⵏ ⵡⴰⵡⵏⴰⴹ ⵉ ⵜⴳⵎⵉ ⵉⵛⵛⴰⵔⵏ ⵙ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ.

ⵉⵙⵓⵜⴳ ⵓⵏⴼⵍⵓⵙ ⵏ “ⴼⵓⴱⵔⵉⵍ” ⵜⵓⴳⴳⴰⵙ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⴷ ⵜⵉⵍⴰⵍⵜ ⵏⵏⵙ  ⵉⴳⴰⵏ ⵜⴰⵙⴰⵔⵓⵜ ⵏ ⵜⵣⵣⵉⴳⵣⵜ ⵏ ⵍⵎⵖⵔⵉⴱ. ⵉⵙⵓⵜⴳ ⴰⵙⵏⵓⴱⴳ ⵏ ⵜⵙⵎⵓⵏⵉ ⵜⵉⵙ 30, ⴰⵢⵍⵍⵉ ⵉⵎⵎⴰⵍⴰⵏ ⵜⵉⵡⵉⵣⵉ ⵏ ⵍⵎⵖⵔⵉⴱ ⴳ ⵓⵙⴷⵓⵙ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⴳⵔⴰⵖⵍⴰⵏⵉⵏ. 

ⵢⵉⵏⵉ ⵎⴰⵙ ⵔⴰⴷ ⵢⵉⵍⵉ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⵏ ⵜⵏⵏⴱⴹⴰ ⵏ ⵓⵏⵣⵡⵉ ⴷ ⵜⵏⴼⵔⵓⵜ ⴷ ⵜⴳⵎⵉ ⵜⴰⵏⴰⵎⵓⵏⵜ ⴷ ⵜⴷⵎⵙⴰⵏⵜ, ⵙ ⵓⵎⵢⴰⵡⴰⵙ ⵉⵛⵛⴰⵔⵔⵏ, ⴷ ⵔⴰⴷ ⵜⴰⵡⵙ ⵜⵙⵎⵓⵏⵉ ⴰⴷ ⴳ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵎⵏⵉⴷ ⵏ ⵜⵏⴰⵥⴰⵕⵉⵏ ⵍⵍⴰⵏⵉⵏ. 

ⴳ ⵓⵏⵏⵓⵕⵥⵎ ⵏ ⵜⵙⵓⵏⵉ ⴼ “ⴰⵙⴱⴷⴷⵉ ⵏ ⵜⵏⴰⵥⴰⵕⵉⵏ ⵛⵛⴰⵔⵏⵉⵏ: ⵜⴰⵏⴼⵔⵓⵜ, ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵜⴳⵎⵉ ⵜⴰⴷⵎⵙⴰⵏⵜ”, ⵉⵙⴷⴷⵉⴷ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴼ ⵜⵏⴰⵥⴰⵕⵉⵏ ⵍⴰⵏⵉⵏ ⴳ ⵜⵎⵉⵣⴰⵔ ⵏ ⵉⴼⴼⵓⵙ, ⴷ ⵜⵉⵏⵉ ⴼⵔⵉⵇⵢⴰ ⴷ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ ⵍⵍⵉ ⴷ ⴷ ⵉⵇⵇⴰⵏ ⵓⵙⵎⵔⵙ ⵉ ⵚⴰⵃⴰ ⵏ ⵜⴳⵎⵉ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ ⵏ ⵉⵎⴰⴷⴰⵏⵏ ⵏⵏⵙⵏⵜ. ⵢⵉⵏⵉ ⵎⴰⵙ ⵉⵟⵟⴰⴼ ⵍⵎⵖⵔⵉⴱ ⵜⵉⵥⴹⴰⵕⵉⵏ ⵏ ⵓⵎⵣⵔⵓⵢ ⵉ ⵓⵎⵢⴰⵡⴰⵙ ⴷ ⵓⵙⵏⴼⵍⵏ ⵏ ⵓⵙⵙⴰⵔⵓ, ⵙ ⵓⴷⵖⴰⵔ ⵏⵏⵙ ⴳ ⴰⵟⵍⴰⵚⵉ, ⴷ ⵢⴰⵥ ⵓⵕⵓⴱⴱⴰ ⴷ ⵓⵙⴷⵔⴰⵡ ⵏⵏⵙ ⴰⴼⵔⵉⵇⵉ ⴷ ⵓⵏⴰⵎⵎⴰⵙ. 

ⵉⵙⴰⵡⵍ ⵎⴰⵙⵙ ⵎⵓⵃⴰⵎⵎⴰⴷ ⵡⵍⴷ ⵕⵕⴰⵛⵉⴷ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⴼ ⵓⵎⵢⴰⵡⴰⵙ ⵉⵥⵉⵍⵏ ⵊⴰⵔ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴷ ⵓⵏⵎⵓⵇⵇⴰⵕ ⵏ ⴼⵓⴱⵔⵉⵍ, ⵉⴱⴷⴷⵏ ⴼ ⵓⵡⵇⵇⵔ. ⵉⵇⵇⴰⵏ ⴷ ⵓⵙⴷⵓⵙ ⵏⵏⵙ ⵉ ⵚⴰⵃⴰ ⵏ ⵜⵎⵉⵣⴰⵔ ⴷ ⵉⵎⴰⴷⴰⵏⵏ. ⵢⵉⵏⵉ ⵎⴰⵙ ⵜⴳⴰ ⵜⵖⵜⴰⵙⵜ ⵏ ⵓⵎⴷⵔⴰⵡ ⵉⵣⵣⵉⴳⵣⵏ ⵉⵜⵜⵓⴼⴽⴰⵏ ⵉ ⵍⵎⵖⵔⵉⴱ ⴳ ⵓⵏⵎⵓⵇⵇⴰⵕ ⵏ ⴼⵓⴱⵔⵉⵍ. ⴷ ⵜⵡⵉⵙⵉ ⵏ ⵜⵖⵜⴰⵙⵜ ⴰⴷ ⴳ ⵜⵉⴽⴽⵉ ⵏ ⵓⴳⵎⴰⵎ ⵉⵙⵎⴷⵏ ⵉ ⵜⵎⵔⵙⵍⵜ ⵜⴰⵣⵣⵔⴰⴼⵜ ⵜⴰⵎⵖⵔⵉⴱⵉⵜ ⴳ ⵓⵏⵎⵓⵇⵇⴰⵕ, ⵉⵇⵇⴰⵏ ⴷ ⵓⵙⵡⵉⵏⴳⵎ ⴰⵎⴳⵔⵓ ⵉ ⵓⵙⵎⵔⵙⵍ ⵏ ⵜⵣⴷⴰⵢⵉⵏ ⵙ ⵓⵙⵎⴰⵇⵇⵍ ⴰⵎⵔⵙⵍⴰⵏ ⴰⵎⴰⵢⵏⵓ. 

ⵉⵙⴷⴷⵉⴷ ⵎⴰⵙⵙ ⵙⴰⵏⵛⵉⵣ ⵔⵓⴷⵔⵉⴳⵓ ⴰⵔⵢⴰⵙ, ⴰⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵣⵣⵔⴰⴼⵜ ⵏ ⴽⵓⵙⵜⴰⵔⵉⴽⴰ, ⴰⵏⵙⵙⵉⵅⴼ ⵏ ⵓⵏⵎⵓⵇⵇⴰⵕ ⵏ ⴼⵓⴱⵔⵉⵍ, ⵎⴰⵙ ⵔⴰⴷ ⵜⵕⵥⵎ ⵜⵙⵎⵓⵏⵉ ⴰⴷ ⵜⵉⵙ 30 ⵉⵎⵏⴰⴷⵏ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⴷ ⵓⵚⴽⵓ ⴰⵣⵣⵔⴰⴼ ⵏ ⵓⵙⵎⵖⵔ ⵏ ⵜⵎⵉⵣⴰⵔ ⵏⵏⵙ, ⴷ ⵓⵙⵙⵕⵚⵓ ⵏ ⵉⵣⵔⴼⴰⵏ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ ⴷ ⵉⵡⵏⴹⴰⵏⵏ, ⵉⵙⴰⵡⵍ ⵓⵍⴰ ⴼ ⵜⵎⵙⴽⴰⵔ ⵍⵍⴰⵏⵉⵏ ⵃⵎⴰ ⴰⴷ ⵉⴳ ⵍⵎⵖⵔⵉⴱ ⴰⵎⴷⵔⴰⵡ ⵉⵣⵣⵉⴳⵣⵏ. 

ⴳ ⵜⵡⵓⵔⵉⵡⵉⵏ ⵏ ⵓⵜⵙⵎⵓⵏⵉ, ⵜⵜⵓⵙⴽⴰⵔ ⵜⵉⵏⴰⵡⵜ ⵜⴰⴱⵕⵍⴰⵎⴰⵏⵉⵜ ⴼ “ⵓⵙⵎⵖⵔ ⵏ ⵓⵎⵢⴰⵡⴰⵙ ⵊⴰⵔ ⵉⴼⵔⵉⵇⵢⴰ ⴷ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ ⵉ ⵓⵙⴱⴷⴷⵓ ⵏ ⵜⵏⴰⵥⴰⵕⵉⵏ ⵏ ⵜⵏⴼⵔⵓⵜ ⴷ ⵓⴼⵔⴰ”, ⵉⵙⵎⵏⵉⴷ ⵎⴰⵙⵙ ⴼⵓⴰⴷ ⵢⴰⵣⵓⵖ, ⴰⵎⵙⵇⵇⴰⴷ ⴰⵏⵎⵀⴰⵍ ⴰⵎⴰⵜⴰⵢ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⴷ ⵜⵖⴰⵡⵙⵉⵡⵉⵏ ⵜⵉⵙⴳⴰⵡⴰⵏⵉⵏ ⴳ ⵜⵎⴰⵡⴰⵙⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⵉⴱⵉⵢⵏ ⵏ ⴱⵕⵕⴰ, ⵜⴰⴽⵛⵛⵓⵎⵜ  ⴼ ⵜⵡⵓⵔⵉ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵉ ⵜⵎⵙⴰⵔⵉⵏ ⵜⵉⵣⵔⴼⴰⵏⵉⵏ ⵏ ⵉⴼⵔⵉⵇⵢⴰ ⴷ ⵜⵏⵓⴼⴰ ⵏ ⵉⵎⴰⴷⴰⵏⵏ ⵏⵏⵙ, ⴷ ⵓⵙⵖⵡⵏ ⵏ ⵍⵎⵖⵔⵉⴱ ⵎⵏⵉⴷ ⵏ ⵜⵎⵙⴰⵔⵉⵏ ⴰⴷ ⴷ ⵎⴰⵕⵕⴰ ⵜⵉⵙⵏⵜⴰⵢⵉⵏ ⵏⵏⵙ ⵡⴰⵜⵜⵙⵏⵉⵏ ⴰⵙⵎⵖⵔ ⵏ ⵜⴳⵎⵉ ⵜⴰⵏⴼⴳⴰⵏⵜ ⴷ ⵜⵙⵓⵍⴰⵏⵜ. 

ⵉⵙⴷⴷⵉⴷ ⴰⴼⵔⴰⴽ ⵏ ⵍⵎⵖⵔⵉⴱ ⴼ ⵡⴰⵜⵉⴳ ⵏ ⵜⴳⵎⵉ ⵜⴰⵎⴰⵜⴰⵢⵜ ⴳ ⵜⵏⴼⵔⵓⵜ ⴷ ⵓⴼⵔⴰ, ⴷ ⵉⵖⴰⵡⴰⵙⵏ ⵏ ⵍⵎⵖⵔⵉⴱ ⴳ ⵉⴳⵔⴰⵏ ⵏ ⵓⵙⵙⵍⵎⴷ ⴷ ⵜⴷⵓⵙⵉ ⴷ ⵜⴷⵎⵙⴰ ⴳ ⵓⵎⵏⵥⴰⵡ, ⴷ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ, ⵙ ⵜⵏⵙⵜⴰⵢⵉⵏ ⴳⴳⵓⵜⵏⵉⵏ ⴳⵉⴳⵔⴰⵏ ⵏ ⵜⵏⴼⵔⵓⵜ ⵏ ⵓⵜⵛⵓ ⴷ ⵜⵥⴹⴰⵕⵜ ⴷ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ. 

ⵢⵉⵏⵉ ⵎⴰⵙ ⵉⵜⵜⴰⵡⵙ ⵍⵎⵖⵔⵉⴱ ⴳ ⵓⴼⵔⴰⴳ ⵏ ⵓⴼⵔⴰ ⴷ ⵜⵏⴼⵔⵓⵜ ⴳ ⵓⵎⴰⴹⴰⵍ, ⵉⵙⵓⵜⴳ ⴰⵙⵎⴰⵇⵇⵍ ⵓⵏⵥⵉⵥ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴷ ⵡⴰⵜⵉⴳ ⵏ ⵜⵎⵢⴰⴷⴰⵙⵜ ⵜⴰⴳⵜⵉⵔⴰⵏⵜ.

ⵙⵓⵜⴳⵏ ⵉⵎⴷⵔⴰⵡⵏ ⴳ ⵜⵙⵓⵜⵍⵜ ⵜⵉⵙ 30 ⵏ ⴼⵓⴱⵔⵉⵍ ⴰⵙⵎⴰⵇⵇⵍ ⵉⴷⵔⴰⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉⵙⵏⴰⵍⵏ ⴰⵎⵢⴰⵡⴰⵙ ⵊⴰⵔ ⵜⵉⵎⵉⵣⴰⵔ ⵏ ⴼⵓⴱⵔⵉⵍ ⴷ ⵍⵎⵖⵔⵉⴱ, ⴷ ⵜⵉⵍⴰⵍⵜ ⵜⴰⵎⵣⵡⴰⵔⵓⵜ ⵏ ⴱⴰⴱ ⵏ ⵡⴰⴷⴷⵓⵔ ⴳ ⵜⵉⵍⵉⵜ ⵏ ⵓⴼⵔⴰ ⴷ ⵜⵏⴼⵔⵓⵜ ⴳ ⵍⵇⴱⵍⵜ ⵜⴰⵏⴰⵎⵎⴰⵙⵜ, ⵖⵔⵉⵏ ⵉ ⵜⵡⵉⵣⵉ ⵜⴰⵎⴰⴹⵍⴰⵏⵜ ⴷ ⵜⵡⵓⵔⵉ ⵉⵛⵛⴰⵔⵏ ⴷ ⵓⵎⵢⴰⵡⴰⵙ ⴷ ⵓⵎⵙⴰⵡⴰⵍ ⵊⴰⵔ ⵉⴱⵕⵍⴰⵎⴰⵏⵏ ⵉ ⵜⵉⵍⵉⵜ ⵏ ⵓⴱⵓⵖⵍⵓ ⴷ ⵜⵣⵔⴼⵜ ⵜⴰⵏⴰⵎⵓⵏⵜ.  

ⵖⵔⵉⵏ ⵓⵍⴰ ⵉ ⵓⵙⵎⵖⵔ ⵏ ⵓⵎⵢⴰⵡⴰⵙ ⵊⴰⵔ ⵉⵡⴰⵏⴽⵏ ⵏ ⵉⴼⵔⵉⵇⵢⴰ ⴷ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ, ⴷ ⵜⵥⵕⵉⴳⵜ ⵏ ⵉⵣⵣⵔⴰⴼⵏ ⴳ ⵢⵉⴳⵔ ⵏ ⵜⴳⵎⵉ ⵜⴰⵙⵓⵍⴰⵏⵜ, ⴷ ⵓⵙⵔⵙ ⵏ ⵜⵎⵙⴽⴰⵕ ⵥⵉⵍⵏⵉⵏ ⴳ ⵢⵉⴳⵔ ⵏ ⵜⵏⴼⵔⵓⵜ ⴷ ⵓⴼⵔⴰ, ⴷ ⵜⴷⵔⴰⵡⵜ ⵏ ⵜⵎⵖⴰⵔⵜ ⴷ ⵡⴰⵎⵏⵓⵏ ⴰⵖⵔⵎⵓⵏ ⴳ ⵓⵙⴽⵔ ⵏ ⵜⵏⴼⵔⵓⵜ ⴷ ⵓⴼⵔⴰ.