ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵕⵥⵥⵓⵎ ⵏ ⵜⵡⵓⵔⵉⵡⵉⵏ ⵏ ⵜⵙⵇⵇⵉⵎⵜ ⵜⴰⵎⵣⵣⴳⴰⵔⵜ ⵏ ⵜⴰⵎⵓⵏⵜ ⵏ ⵉⵙⵇⵇⵉⵎⵏ ⵏ ⵉⵡⴰⵏⴽⵏ ⵏ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⵓⵙⵍⵉⵎ

ⵙ ⵉⵙⵎ ⵏ ⵕⴱⴱⵉ, ⵜⴰⵥⴰⵍⵍⵉⵜ ⴷ ⵓⴼⵔⴰ ⴼ ⵓⵕⵇⵇⴰⵚ ⵏⵏⵙ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⴳⵎⴰⵎⴰⵏ ⵏ ⵜⵙⵇⵇⵉⵎⵜ ⵜⴰⵎⵣⵣⴳⴰⵔⵜ ⵏ ⵜⴰⵎⵓⵏⵜ ⵏ ⵉⵙⵇⵇⵉⵎⵏ ⵏ ⵉⵡⴰⵏⴽⵏ ⵉⴳⵎⴰⵎⵏ ⴳ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⵓⵙⵍⵉⵎ 

ⵎⴰⵙⵙ ⴰⵏⴼⵍⵓⵙ ⴰⵎⴰⵜⴰⵢ 

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ 

ⵎⵎⵔⵖ ⵍⵍⵉ ⵔⴰⴷ ⴷⵉⴷⵉⵏ ⴷⵔⵓⵖ ⴰⵕⵥⵥⵓⵎ ⵏ ⵜⵡⵓⵔⵉⵡⵉⵏ ⵏ ⵜⵙⵎⵓⵏⵉ ⵜⵉⵙ 52 ⵏ ⵜⵙⵇⵇⵉⵎⵜ ⵜⴰⵎⵣⵣⴳⴰⵔⵜ ⵏ ⵜⴰⵎⵓⵏⵜ ⵏ ⵉⵙⵇⵇⵉⵎⵏ ⵏ ⵉⵡⴰⵏⴽⵏ ⵏ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⵓⵙⵍⵉⵎ ⵙ ⵓⵅⵎⵎⴻⵎ ⵍⵍⵉ ⵜⴰⴽⴽⴰ ⵜⴳⵍⴷⵉⵜ ⵏ ⵍⵎⵖⵔⵉⴱ ⴰⴳⵎⴰⵎ ⴰⵎⵙⴽⴰⵔ ⵏ ⵜⵎⴰⴷⴰⵙⵜ ⵉ ⵜⵎⵙⴰⵔⵉⵏ ⵏ ⵉⵎⴰⴷⴰⵏⵏ ⴷ ⵜⵎⵜⵜⴰ ⵜⵓⵙⵍⵉⵎⵜ. 

ⴳ ⵜⵣⵡⵉⵔⵉ, ⴷⴰ ⵙⵔⵓⵏ ⵙⴱⵔⵔⴰⴽⵖ ⴳ ⵍⵎⵖⵔⵉⴱ, ⴰⴽⴰⵍ ⴳ ⵜⵍⵍⴰ ⵜⵍⴰⵍⵉⵜ ⵏ ⵜⵎⴰⴷⴷⴰⵙⵜ ⵏ ⵓⴳⵔⴰⵡ ⵓⵙⵍⵉⵎ ⵙ ⵜⵖⵜⴰⵙⵜ ⵏ ⵓⴳⵔⴰⵡ ⵓⵙⵍⵉⵎ ⵏ ⵕⵕⴱⴰⵟ ⵙⴳ 22 ⴰⵔ 25 ⵛⵓⵜⴰⵏⴱⵉⵔ 1969, ⵍⵍⵉⵖ ⵃⵕⴳⵏ ⴰⵢⵜ ⵚⵀⵢⵓⵏ ⵜⵉⵎⵣⴳⵉⴷⴰ ⵏ ⵍⴰⵇⵚⴰ ⵉⴳⴰⵏ ⵍⵇⴱⵍⵜ ⵜⴰⵣⵡⴰⵔⵓⵜ ⴷ ⵜⵉⵙ ⴽⵕⴹⵜ ⵖ ⵍⵃⴰⵕⴰⵎⴰⵢⵏ ⴳ 21 ⵖⵓⵛⵜ ⴳ ⵓⵙⴳⴳⵯⴰⵙ ⴰⵏⵏ ⵏⵉⵜ. 

ⵜⴰⵏⴰⵜⴰⵎⵜ ⵏ ⵓⵖⵉⵍⵓⴼ ⵍⵍⵉⵖ ⵉⵣⵔⵉ ⵎⴰⴷ ⵉⴳⴰⵏ 55 ⵏ ⵓⵙⴳⴳⵯⴰⵙ ⵙⵎⴷⵏⵉⵏ, ⴷ ⵍⵇⵓⴷⵙ ⴷ ⵉⴽⴰⵍⵉⵡⵏ ⴰⴽⴽⵯ ⵏ ⴼⴰⵍⵉⵚⵟⵉⵏ , ⴷ ⵓⵎⴰⴷⴰⵏ ⵏ ⴼⴰⵍⵉⵙⵟⵉⵏ ⵉⴳⴰⵏ ⴳⵯⵎⴰⵜⵏⵖ; ⵍⵍⴰⵏ ⴷⴰⵜ ⵜⵉⵎⵏⵜⵍⵉⵏ ⵏⵉⵜ ⵏ ⵓⵙⴷⵓⵔⵔⵉ, ⴷ ⵉⵎⵏⵖⵉ ⴷ ⵜⵕⴰⵄⴰⵢⵜ ⵎⴳⴰⵍ ⵏ ⵉⵎⴰⵏⵏ ⴷ ⵡⴰⵢⴷⴰ, ⵎⴰⴷ ⴰⴷ ⴱⵀⴰⵔⴰ ⵏⵙⵙⵊⵔⴰⵛ. 

ⵓⵔ ⵔⵉⵖ ⴰⴷ ⵙⵎⵔⵙⵖ ⴰⵙⵏⵓⴱⴳ ⵏ ⵜⵎⴰⵣⵉⵔⵜ ⵏⵏⵖ ⵏ ⵜⵙⵎⵓⵏⴰⵢ ⴰⴷ ⵜⵉⴰⴷⴷⴰⵙⵉⵏ ⴰⴼⴰⴷ ⴰⴷ ⵙⵏⵉⴷⵖ ⴰⵏⵏⴰⵍ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵉⴱⴷⴷⵏ ⴷ ⵉⴳⴰⵏ ⴰⵎⵣⵔⴰⵢ ⵉ ⵜⵎⵙⴰⵔⵜ ⵏ ⵓⵎⴰⴷⴰⵏ ⵏ ⴼⴰⵍⵉⵙⵟⵉⵏ ⵃⵎⴰ ⴰⴷ ⵢⴰⵎⵥ ⵜⴰⵙⵉⵎⴰⵏⵜ ⵏⵏⵙ ⵉⵟⵟⴼ ⴰⵡⴰⵏⴽ ⵏⵏⵙ ⴷ ⵜⵎⴰⵥⵓⵏⵜ ⵏⵏⵙ ⵍⵇⵓⴷⵙ ⵖ ⵟⵟⴰⴼⵏ ⵉⵎⵖⵔⵉⴱⵉⵢⵏ ⵉⵙⵡⴰⴽ ⴷ ⵉⴳⵉⴷⴰⵔ ⴷ ⵜⵓⵣⴷⵓⵖⵉⵏ, ⴷ ⵉⵎⵉ ⴰⵎⵣⵔⴰⵢ, ⵎⴰⵛⵛ ⵉⵇⵇⴰⵏ ⴷ ⴰⴷ ⵙⵙⴽⵯⵜⵉⵖ ⵜⴰⵡⵓⵔⵉ ⵏ ⵜⵉⴳⵎⵎⵉ ⵏ ⵓⴷⵔⵉⵎ ⵏ ⵍⵇⵓⴷⵙ ⵉⴹⴼⵕⵏ ⵜⴰⵙⵇⵇⵉⵎⵜ ⵏ ⵍⵇⵓⴷⵙ ⵍⵍⵉ ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⴳ ⵍⵍⴰⵏ ⵉⵙⵏⴼⴰⵔⵏ ⵏⵏⴰⵍⵏⵉⵏ ⴰⴱⴷⴷⴰⴷ ⵏ ⵉⵎⵣⴷⴰⵖⵏ ⵏ ⵜⵖⵔⵜ ⴳⴰⵍ ⵏ ⵓⵙⴷⵓⵔⵔⵉ, ⵉⵇⵇⴰⵏ ⴷ ⵉⵍⴰ ⴰⴷ ⵙⵙⴽⵯⵜⵉ ⵜⵉⵙⵏⵜⴰⵢⵉⵏ ⴳⴳⵓⵔⴰⵏⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ ⴳ ⵓⵚⵕⵓⴼ ⵏ ⵜⵡⵉⵣⵉ ⵏ ⴰⵢⵜ ⵖⴰⵣⵣⴰ, ⵉⴳ ⵍⵎⵖⵔⵉⴱ ⴰⵎⵣⵡⴰⵔⵓ ⵍⵍⵉ ⵉⵚⵕⴼⵏ ⵙ ⵜⵖⴰⵔⴰⵙⵜ ⵏ ⵡⴰⴽⴰⵍ. ⴰⵢⵍⵍⵉ ⵉⵎⵎⴰⵍⴰⵏ ⴰⵙⵖⵡⵏ ⴰⵎⵖⵔⵉⴱⵉ ⵉ ⵙⵓⵏⴰⵍ ⵏ ⵜⵎⵙⴰⵔⵜ ⵏ ⴼⴰⵍⵉⵙⵟⵉⵏ ⴳ ⵜⵙⵉⵎⴰⵏⵜ ⵏⵏⵙ ⴷ ⵓⵙⴽⵔ ⵏ ⵓⵡⴰⵏⴽ ⵏⵏⵙ. 

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ 

ⵓⵔ ⵏⵎⵎⵣⵔⵉ ⴳ ⵓⵙⵙⵀⵔⵛ ⵏ ⵓⵙⴷⵓⵔⵔⵉ ⵏ ⵉⵙⵕⴰⵉⵍ ⵎⵏⵉⴷ ⵏ ⵓⵎⴰⴷⴰⵏ ⵏ ⴼⴰⵍⵉⵙⵟⵉⵏ, ⴷ ⵜⵉⵕⵥⵉ ⵉⴳⴳⵓⵜⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵔⵙⴰⵍ ⵏ ⵓⵙⵍⴳⵏ ⴰⴳⵔⴰⵖⵍⴰⵏ, ⴷ ⵓⵙⵍⴳⵏ ⴰⴳⵔⴰⵖⵍⴰⵏ ⴰⵏⴼⴳⴰⵏ, ⴷ ⵓⵙⵏⵓⵎⵍ ⵏ ⵡⴰⴷⴷⴰⴷ ⵏ ⵜⵓⴷⴷⵉⵙⵉⵏ ⵟⵟⴰⴼⵏⵉⵏ ⴰⵜⵉⴳ ⴳ ⵜⵖⵜⴰⵙⵜ ⵜⴰⴳⵔⴰⵖⵍⴰⵏⵜ ⵍⵍⵉ ⵉⵍⵍⴰⵏ ⴷⴰⵜ ⵏ ⵉⵔⵉⵎ  ⵖ ⵜⵖⴰⵡⵙⴰ ⵉⴳⴰⵏ ⵜⴰⵎⵙⴼⵓⵣⵣⵔⵜ ⴳ ⵉⵣⵔⴼⴰⵏ ⵏ ⵓⴼⴳⴰⵏ, ⵖ ⵍⵍⴰⵏ ⵉⵣⵔⴼⴰⵏ ⵏ ⵜⵓⴷⵔⵜ ⴷ ⵜⵍⴻⵍⵍⵉ ⴼ ⵓⵜⵛⵓ ⴷ ⵜⵙⵏⵉⵊⵊⵉⵜ ⴷ ⵓⵙⵙⵍⵎⴷ ⴷ ⵓⵣⴼⴼⵓⵖ, ⵉⵣⵔⴼⴰⵏ ⵍⵍⵉ ⵓⵔ ⵟⵟⴰⴼⵏ ⴰⵙⵙ ⴰⴷ ⴰⵢⵜⵎⴰⵜⵏⵖ ⴳ ⵖⴰⵣⵣⴰ, ⴳ ⵓⵎⵏⵉⴷ ⵢⴰⴹⵏⵉⵏ, ⵉⵇⵇⴰⵏ ⴷ ⴰⴷ ⵏⵙⴰⵡⴰⵍ ⵙ ⵉⵎⵓⵙⵍⵎⵏ, ⴰⴷⴷⴰⴷ ⵏⵏⵙⵏ, ⵉⵎⵣⵔⴰⵢⵏ, ⵉⵎⴰⵖⵏ ⵏⵏⵙⵏ ⵉⴳⵯⵏⵙⴰⵏ, ⴷ ⵜⵉⴽⵚⵚⴰⴷ  ⵏ ⴽⵔⴰ ⵖ ⵡⴰⵢⵢⴰⴹ, ⴰⵢⵍⵍⵉ ⵉⵍⵍⴰⵏ ⵙ ⵓⵙⴷⴷⵉⴷ ⴳ ⵓⵙⵡⵉⵔ ⵏ ⵓⵙⵏⴰⵍ ⵏ ⵉⵡⴰⵏⴽⵏ ⵏⵏⵙⵏ ⵏ ⵓⵎⴰⴷⴰⵏ ⵏ ⴼⴰⵍⵉⵙⵟⵉⵏ, ⵉⵙⵙⵉⵎⵥⵉ ⴰⴷⴷⴰⴷ ⴷⴰⵜ ⵏ ⵜⵔⴰⴱⴱⵓⵜ ⵜⴰⴳⵔⴰⵖⵍⴰⵏⵜ ⴳ ⵓⵎⵣⴰⵖ ⵏ ⵜⵎⵙⴰⵔⵉⵏ ⵏ ⵉⵎⴰⴷⴰⵏⵏ ⴷ ⵜⵓⵏⵓⴼⴰ ⵏ ⵜⵎⵜⵜⵉ ⵜⵓⵙⵍⵉⵎⵜ,ⴳ ⵜⵣⵡⵉⵔⵉ ⵏⵏⵙ ⵜⴰⵎⵙⴰⵔⵜ ⵏ ⴼⴰⵍⵉⵙⵟⵉⵏ.

ⴰⵎⴰⴷⴰⵏ ⵏ ⴼⴰⵍⵉⵙⵟⵉⵏ, ⵢⵓⴽⵍⴰⵍ, ⵙ ⵜⵏⴰⵔⴰ ⵏ ⵜⵏⴱⴰⴹⵜ ⵜⴰⵏⴰⵎⵓⵔⵜ ⵏ ⴼⴰⵍⵉⵙⵟⵉⵏ, ⴰⵙⵏⴰⵍ ⴰⴽⴽⵯ ⵉ ⵓⵣⵔⴼⴰⵏ ⵏⵏⵙ ⵓⵍⴳⵉⵏⵏ ⵍⵍⵉ ⵔⴰⴷ ⵉⵜⵜⴰⵡⵙⴽⴰⵔ ⵙ ⵓⵎⵏⴰⴷ ⴰⵙⵔⵜⴰⵏ ⵉⴼⴰⵡⵏ ⵏ ⵉⵎⴷⴰⵡⴰⵍⵏ ⴱⴷⴷⵏⵉⵏ ⴼ ⵓⵡⴰⵏⴽ ⴰⴼⵉⵍⵉⵙⵟⵉⵏⵉ ⴰⵏⵉⵎⴰⵏ ⵎⵓ ⵜⴳⴰ ⵍⵇⵓⴷⵙ ⵏ ⵍⵇⴱⵍⵜ ⵜⴰⵎⴰⵥⵓⵏⵜ ⵏⵏⵙ, ⴰⴼⴼⵙⵙⴰⵢ ⴼ ⵔⴰⴷ ⵜⴱⵉⴷⴷ ⵜⵔⴰⴱⴱⵓⵜ ⵜⴰⴳⵔⴰⵖⵍⴰⵏⵜ ⴳ ⵓⵙⴰⵜⵉ ⵏ ⵓⵙⵖⵡⵏ ⴰⴳⵔⴰⵖⵍⴰⵏ ⵉⴼⴰⵡⵏ ⴷ ⵉⵖⵣⴰⵏⵏ.

ⴰⵎⴰⴷⴰⵏ ⵏ ⴼⴰⵍⵉⵙⵟⵉⵏ ⵓⵔ ⵢⴰⴽⴽⴰ ⵖⴰⵙ ⵉⵙⴼⴰⵙⴽⴰⵜⵏ ⴰⴷ ⵃⵎⴰ ⴰⴷ ⵢⴰⴼⵉ ⵉⵅⴼⵉ ⵏⵏⵙ ⴷⴰⵜ ⵏ ⵎⴰⵔⵓⵔ ⴰⵎⴰⵢⵏⵓ ⵏⵖ ⵜⵉⵍⵉⵜ ⵉⴱⴱⵉⵏ. 

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ 

ⵔⴰⴷ ⵜⵙⵖⵣⵏⵏ ⴳ ⵜⵙⵎⵓⵏⴰⵢ ⵏⵏⵓⵏ ⵉⵙⵏⴼⴰⵔⵏ ⵏ ⵉⵖⴰⵡⴰⵙⵏ ⵏ ⵜⵡⵓⵔⵉⵡⵉⵏ ⵏ ⵜⵙⵇⵇⵉⵎⵉⵏ ⵜⵉⵙⵓⵍⴰⵏⵉⵏ ⴷ ⵜⵙⴳⵓⵎⴰⵏⵉⵏ, ⴷ ⵓⴳⵔⴰⵡ ⴰⵎⴰⵜⴰⵢ ⵏ ⵜⴰⵎⵓⵏⵜ. ⵉⵖ ⴳⴰⵏⵜ ⵜⵙⵎⵓⵏⴰⵢ ⴰⴷ ⵜⵉⵎⴰⴷⴷⴰⵙⵉⵏ, ⵔⴰⴷ ⴳⵉⵙⵏⵜ ⵢⵉⵍⵉ ⵓⵍⴰ ⵓⵎⴹⴰⴽⴰⵕ ⴰⵙⵔⵜⴰⵏ ⴷ ⵓⵙⵡⴰⵍⴰ ⵏ ⵉⵎⴹⴰⴽⴰⵕⵏ ⴷ ⵜⵡⵓⵔⵉⵡⵉⵏ. 

ⴳ ⵓⵎⵏⵉⴷ ⴰⴷ, ⵔⴰⴷ ⴱⴰⵀⵔⴰ ⵉⴼⴰⵍⴽⵉ ⵉ ⵉⵎⴰⴷⴰⵏⵏ ⵓⵙⵍⵉⵎⵏ ⴰⴷ ⵡⴰⵍⴰⵏ ⵉⵎⴹⴰⴽⴰⵕⵏ ⵏ ⵜⴰⵎⵓⵏⵜ ⵏⵏⵖ, ⴷ ⵜⵙⵓⵎⴰⵔ ⵏⵏⵙ ⴷ ⵡⴰⴷⴷⴰⴷⵏ ⵏⵏⵙ ⴰⵙⵡⴰⵍⴰ ⵏ ⵜⵡⵓⵔⵉ ⴷ ⵓⵏⵍⵉ ⴷ ⵜⵉⵍⴰⵡⵜ ⵍⵍⵉ ⵔⴰⴷ ⵢⴰⵡⵙ ⵉ ⵜⵎⵉⵣⴰⵔ ⵏⵏⵖ ⴳ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⵍⵍⴰⵏⵉⵏ ⴷⴰⵜ ⵏⵏⵙⵏ ⵖⵎⴽ ⴰⵏⵏ ⴷ ⵜⴰⵙⵙⴰⵙⵉⵏ. 

ⴰⵔ ⵉⵙⴰⵡⴰⵍ ⵡⴰⴷⴷⴰⴷ ⵏ ⵜⵎⵉⵣⴰⵔ ⵜⵓⵙⵍⵉⵎⵉⵏ ⵙ ⴽⵉⴳⴰⵏ ⵏ ⵜⴰⵙⵙⴰⵙⵉⵏ ⴰⴷ, ⵉⵎⴰⵖⵏ ⴱⴰⵀⵔⴰ ⵇⴱⵔⵏⵉⵏ ⴷ ⵛⴷⴷⴰⵏⵉⵏ ⵍⵍⴰⵏ ⴳ ⵜⵎⵉⵣⴰⵔ ⵜⵓⵙⵍⵉⵎⵉⵏ. ⵉⵖ ⵉⵣⴷⵉ ⴽⵔⴰ ⵏ ⵉⵎⴰⵖⵏ ⴰⴷ ⴷ ⵉⴽⵛⵓⵎⵏ ⵏ ⴱⵕⵕⴰ, ⵢⵓⵔⵔⵉ ⴽⵉⴳⴰⵏ ⴳⵉⵙⵏ ⵙ ⵜⵓⵟⵟⵓⵕⴼⴰ ⵉⵀⵔⵛⵏ, ⴷ ⴰⵔⵜⴰⵙⵉⵎⴰⵏⵜ ⵏ ⵜⵖⵜⴰⵙⵜ ⵜⴰⵏⴰⵎⵓⵔⵜ ⴳ ⴽⵔⴰ ⵏ ⵡⴰⴷⴷⴰⴷⵏ ⴷ ⵜⵔⴰⵄⴰⵢⵜ ⵎⴳⴰⵍ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵉⵡⴰⵏⴽⵏ ⴷ ⵓⵙⵎⵖⵔ ⵏ ⴳⴰⵔ ⵉⵙⵡⵉⵏⴳⵉⵎⵏ ⵏ ⵓⵥⵍⴰⵢ. 

ⴰⵜⵉⴳ ⵏ ⵜⵙⵓⵎⴰⵔ ⴷ ⵉⵙⵖⵍⴰⴼ ⴰⴷ ⵍⵍⵉ ⵔⴰⴷ ⵉⵜⵜⵓⵙⵎⵏⵉⴷ ⵉ ⵜⴰⵎⵓⵏⵜ ⵏⵏⵖ ⴷ ⵉⵏⴳⵎⴰⵎⵏ ⵏⵏⵙ ⵥⵍⵉⵏⵉⵏ ⴷ ⵜⵙⵇⵇⵉⵎⵉⵏ ⵏⵏⵙ ⵜⵉⵙⵓⵍⴰⵏⵉⵏ, ⴳ ⵜⵉⵍⴰⵡⵜ ⵏⵏⵙ ⴷ ⵜⵎⵣⵣⴳⴰⵔⵜ ⵏⵏⵙ, ⴷ ⵜⵎⴰⴼⴰⵡⵜ ⵏⵏⵙ ⴷ ⵉⵎⵉⵥ ⵏⵏⵙ ⵙⴳ ⵉⴱⴰⵕⵍⴰⵎⴰⵏⵏ ⵉⴳⵎⴰⵎⵏ, ⵙ ⵓⵎⵙⴰⵙⴰ ⵍⵍⵉ ⵔⴰⴷ ⵓⵔ ⵉⵙⴱⴷⴷ ⴰⵙⴽⵔ ⵏ ⵜⵖⵜⴰⵙⵉⵏ ⴷ ⵉⵙⵡⴰⵍⴰⵢⵏ ⵏ ⵜⵓⴳⵜ. 

ⴳⵜⵙⴳⴰ ⵢⴰⴹⵏⵉⵏ, ⵜⵉⵖⵜⴰⵙⵉⵏ ⵏ ⵜⴰⵎⵓⵏⵜ ⵏⵏⵖ  ⵎⴽ ⵏⵏⴰ ⴳⴰⵏⵜ ⴳ ⵜⵉⵕⵡⵉ ⴷ ⵓⵖⵣⴰⵏ, ⵓⵔ ⵔⴰⴷ ⵕⵡⵓⵏⵜ ⵙⴽⵔⵏⵜ ⴰⴷⵔⵉⵣ, ⵉⵖ ⵓⵔ ⵎⵓⵏⵏⵜ ⴷ ⵜⵖⵉⵙⵜ, ⵔⵎⵙⵏⵜ ⵉⵙⵏⴼⵍⵏ ⵉⴳⵔⴰⵖⵍⴰⵏⵏ, ⴰⵎⵥⵏ ⵜⵏⵜ ⵜⴳⵔⴰⵡⵉⵏ ⵢⴰⴹⵏⵉⵏ ⵏ ⵜⵡⵓⵔⵉ ⵜⵓⵙⵍⵉⵎⵜ ⵉⵛⵛⴰⵔⵏ, ⵍⵍⵉⵖ ⵥⴹⴰⵕⵏⵜ ⴰⴷ ⵙⴽⵔⵏⵜ ⴰⵣⵣⴳⵉⵔ ⴷ ⵓⵣⴷⴰⵢ. 

ⴰⵣⴷⴰⵢ ⴰⴷ ⴷ ⵓⵏⵏⵓⵕⵣⵎ ⴰⴷ ⵍⵍⵉ ⵏⵔⴰ ⵙⴳ ⵜⵎⴰⴷⴷⴰⵙⵉⵏ ⴰⵎⴰⴹⴰⵍ ⵓⵙⵍⵉⵎ, ⵜⵓⵏⴱⵉⴹⵉⵏ ⴷ ⵜⵙⴳⵓⵎⴰⵏⵉⵏ, ⵉⵇⵇⴰⵏ ⴷ ⴰⴷ ⵢⵉⵍⵉ ⵓⵍⴰ ⵎⵏⵉⴷ ⵏ ⵜⵎⴰⴷⴷⴰⵙⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⴳⵜⵉⵔⴰⵏⵉⵏ, ⵉ ⵓⵙⵏⵏ ⵏ ⵜⵎⵙⴰⵔⵉⵏ ⵏⵏⵖ, ⴷ ⵓⵣⵣⵔⴰⵢ ⵏ ⵜⵣⴳⴰⵍⵉⵏ ⴷ ⵡⴰⵏⴰⵡⵏ ⵏ ⵓⵙⵙⵔⴽⵙ ⵍⵍⵉ ⵜⵜⴰⵊⵊⴰⵏⵉⵏ ⴰⵎⵏⴰⴷ ⴰⵎⴰⵜⴰⵢⴰ ⴰⴳⵔⴰⵖⵍⴰⵏ, ⴱⴷⴷⵏ ⴷⴰⵜ ⵏⵏⵖ ⵖⵉⵍⴰⴷ ⵜⵉⴽⵎⵉⵙⵜ ⵏ ⵉⴷ ⴱⴰⴱ ⵏ ⵓⴱⵔⵙⵙⵉⵡⴷ ⵙⴽⴰⵔⵏⵉⵏ, ⵙ ⵉⵙⵎ ⵏ ⵍⵉⵙⵍⴰⵎ ⴷ ⵉⵎⵓⵙⵍⵎⵏ, ⴳⴰⵔ ⵜⵉⵡⵓⵔⵉⵡⵉⵏ ⵍⵍⵉ ⵓⵔ ⴳⵉⵏⵉⵏ ⵜⵉⵏ ⵍⵉⵙⵍⴰⵎ. 

ⴳ ⵓⵎⵏⵉⴷ ⴰⴷ, ⴰⵔ ⴷ ⵙⵙⴽⵯⵜⴰⵢⵖ ⵜⴰⵜⴳⴰⵔⵜ ⵜⴰⵏⴰⵎⵎⴰⵙⵜ “ⴰⵙⵉⵡⴹ ⵏ ⵡⴰⵎⵓⵔ ⵏ ⵡⴰⴽⵓⵛ” ⵍⵍⵉ ⴷ ⵉⴼⴼⵖⵏ ⵙⴳ ⵓⴳⵔⴰⵡ ⴰⴱⵕⵍⴰⵎⴰⵏⵉ ⴰⴳⵔⴰⵖⵍⴰⵏ ⴼ: ⴰⵎⵙⴰⵡⴰⵍ ⵏ ⵉⵙⴽⴷⵏ: ⴰⴷ ⵏⵎⵢⴰⵡⴰⵙ ⵉ ⵉⵎⴰⵍ ⵉⵛⵛⴰⵔⵏ, ⵉⵜⵜⵓⵙⵏⵎⴰⵍⴰⵏ ⴳ ⵡⴰⵎⵓⵔ ⵏ ⵡⴰⴽⵓⵛ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ 13 ⴰⵔ 15 ⵢⵓⵏⵢⵓ 2023, ⴷⴷⵓ ⵏ ⵉⵡⵉⵣ ⴰⵎⴰⵜⵜⵓⵢ ⵏ ⵓⴳⵍⴷⵓⵏ ⵏ ⵉⵎⵓⵎⵏⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⵍⵍⵉ ⵉⵙⵏⵎⴰⵍⴰ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴷ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⴷ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⵢⴰⴷⵏⵉⵏ. ⵉⴳⴰ ⵓⵙⵉⴷ ⴰⴷ ⵜⴰⵜⴳⴰⵔⵜ ⵜⴰⵙⵓⵖⴰⵍⵜ ⵜⴰⴳⵔⴰⵖⵍⴰⵏⵜ ⴳ ⵢⵉⴳⵔ ⵏ ⵓⵎⵙⴰⵡⴰⵍ ⵊⴰⵔ ⵉⵙⴽⴷⵏ ⴷ ⵜⵖⵔⵎⵉⵡⵉⵏ, ⵜⵇⵇⴰⵏⴷ ⵜⵡⵓⵔⵉ ⵉ ⵓⵙⵎⵀⵍ ⵏⵏⵙ ⵉ ⵚⴰⵃⴰ ⵏ ⵜⵎⵙⴰⵔⵉⵏ ⵏⵏⵖ ⴷ ⵓⵣⵣⵔⴰⵢ ⵏ ⵡⴰⵡⵍⴰⴼ ⵏ ⵍⵉⵙⵍⴰⵎ ⴷⴰⵔ ⵜⵔⴰⴱⴱⵓⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ. 

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ 

ⵜⴰⵏⵎⵎⴰⵙⵜ ⵏ ⵜⵎⵙⴰⵔⵜ ⵏ ⴼⴰⵍⵙⵉⵟⵉⵏ ⴷ ⵜⵎⴰⵙⴰⵢⵜ ⵏⵏⵖ ⵜⴰⵙⵔⵜⴰⵏⵜ ⴷ ⵜⵖⵔⵎⴰⵏⵜ ⵎⵏⵉⴷ ⵏⵏⵙ, ⵉⵇⵇⴰⵏ ⴷ ⴰⴷ ⴰⵖ ⵓⵔ ⵜⵙⵙⵜⵜⵓ ⴰⵣⵣⵔⴰⵢ ⵏ ⵜⵣⴷⴰⵢⵉⵏ ⵊⴰⵔ ⵉⵡⴰⵏⴽⵏ ⵓⵙⵍⵉⵎⵏ ⴷ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏⵏⵖ ⵜⵉⴷⵎⵙⴰⵏⵉⵏ ⴷ ⵉⵙⵏⴼⵍⵏ ⵏⵏⵖ ⵉⵏⵙⴱⴰⴱⵏ ⵍⵍⵉ ⵛⵃⴰⵏⵉⵏ ⵊⴰⵔ ⵜⴰⵎⵓⵏⵉⵏ ⵜⵉⵙⴳⴰⵡⴰⵏⵉⵏ ⴷ ⵜⵎⵏⵥⴰⵡⵉⵏ, ⴷ ⵓⵙⴱⴷⴷⵉ ⵏ ⵜⴰⵙⵙⴰⵙⵉⵏ ⵜⵉⵎⴰⵢⵏⵓⵜⵉⵏ ⴰⵎ ⵉⵙⵏⴼⵍⵏ ⵏ ⵓⵏⵣⵡⵉ, ⴷ ⵉⵣⵡⴰⴳⵏ, ⴷ ⵜⵎⵓⵔⵉⵙⵉⵏ ⵏ ⵉⵎⵣⵡⴰⵏ ⴷ ⵜⴷⵔⵓⵙⵉⵏ ⵜⵓⵙⵍⵉⵎⵉⵏ ⴳ ⵜⵎⵉⵣⴰⵔ ⴰⵔⵜⵓⵙⵍⵉⵎⵉⵏ, ⴷ ⵓⵙⵙⵍⵎⴷ ⴷ ⵜⴷⵔⴰⵡⵜ ⵏ ⵜⵎⵖⴰⵔⵉⵏ ⴳ ⵡⴰⵎⵎⴰⵙⵏ ⵏ ⵜⵖⵜⴰⵙⵜ ⵜⴰⴳⵯⵏⵙⴰⵙⵜ ⴷ ⵜⵎⵣⵣⴳⴰⵔⵜ. 

ⵀⴰⵜ ⵜⵙⴽⵔ ⵜⴰⵎⵓⵏⵜ ⵏⵏⵖ ⵉ ⵎⴰⵕⵕⴰ ⵜⵉⵎⵙⴰⵔⵉⵏ ⴰⴷ, ⵜⵉⵙⵇⵇⵉⵎⵉ ⵜⵉⵙⵓⵍⴰⵏⵉⵏ, ⴳ ⵎⴰⵕⵕⴰ ⵉⴳⵔⴰⵡⵏ ⵏⵏⵖ ⴰⵔ ⵓⴽⴰⵏ ⵏⵙⴽⴰⵔ ⴰⵙⴼⵙⵉ ⵏ ⴷⵉⵎⴰ ⴷ ⵉⵙⵖⵍⴰⴼⵏ ⵏ ⴱⴷⴷⴰ.

ⵎⴰⵛⵛ ⵉⵙ ⵓⵔ ⵜⵍⴽⵎ ⵜⵉⵣⵉ ⴰⴷ ⵏⴳ ⵉⴷ ⴱⴰⴱ ⵏ ⵜⵡⵓⵔⵉ, ⵏⴳ ⵡⵉⴷ ⵟⵟⴰⴼⵏⵉⵏ ⴰⴷⵔⵉⵣ ⴳ ⵓⵏⴳⵔⴰⵡ ⴰⴳⵔⴰⵖⵍⴰⵏ ⵉⵜⵜⵓⵙⴽⵉⵔⵏ, ⴰⴷ ⵏⵏⵙⵏ ⵎⴰⵙ ⵓⵔ ⵔⴰⴷ ⵏⴳ ⵡⵉⴷⴰ ⵟⵟⴰⴼⵏⵉⵏ ⴰⴷⵔⵉⵣ ⵉⴷⵓⵙⵏ, ⴰⴱⵍ ⴰ ⵉⵖ ⵏⴷⵓⵙ ⵙ ⵓⵏⵍⵉ ⴷ ⵜⴰⵎⵓⵏⵜ. 

ⵉⵙⵜⵎⴰ ⴷ ⴰⵢⵜⵎⴰ, 

ⵓⵔ ⵡⴰⵜⵙⵙⵖ ⴳ ⵜⴳⵓⵔⵉ ⴰⴷ  ⵙⵎⵏⵉⴷⵖ ⴰⵙⵎⴰⵇⵇⵍ ⵉⵅⵛⵏⵏ ⵅⴼ ⵡⴰⴷⴷⴰⴷ ⵏ ⵓⵎⴰⴹⴰⵍ ⵓⵙⵍⵉⵎ, ⴳ ⵍⵍⴰⵏⵜ ⴽⵉⴳⴰⵏ ⴽⵉⴳⴰⵏ ⵏ ⵜⵎⵉⵜⴰⵔ ⵏ ⵜⵉⴼⴰⵡⵜ, ⵉⵍⵉⵏ ⴳ ⵉⵡⴰⵏⴽⵏ ⵏⵏⵙ ⴰⵢⵍⵍⵉ ⵉⴳⴰⵏ ⴰⵙⵙ ⴰⴷ ⵜⴰⵍⵍⴰⵙⵉⵏ ⵏ ⵓⵎⵓⵔⵙ ⴷ ⵉⵇⵇⴰⵏ ⵓⴱⵓⵔⵣ, ⵎⴰⵛⵛ ⴽⵉⴳⴰⵏ ⵏ ⵜⴰⵙⵙⴰⵙⵉⵏ ⵍⵍⴰⵏⵉⵏ ⴳ ⴽⵉⴳⴰⵏ ⵏ ⵉⵡⴰⵏⴽⵏ ⵏⵏⵖ ⵓⵙⵍⵉⵎⵏ, ⴷ ⵜⵔⴰⵄⴰⵢⵜ ⵍⵍⵉ ⵜⵏ ⵉⵡⴰⵜⵜⵙⵏ ⴷ ⵓⵛⵃⵓ ⵏ ⵡⴰⴷⴷⴰⴷ ⵏ ⵓⵎⴰⴹⴰⵍ ⵓⵙⵍⵉⵎ, ⴰⵔ ⴷ ⵉⵜⵜⴰⵡⵉ ⵜⴰⴽⴰⵜ ⵏ ⵉⵙⵇⵙⵉⵙⵜ ⴳ ⵓⵎⵏⴰⴹ ⴰⴳⵔⴰⵖⵍⴰⵏ ⵍⵍⵉ ⴱⴰⵀⵔⴰ ⵉⵛⴷⴷⴰⵏ. 

ⵏⴻⵏⵏⵓⵔⵣⵖ ⴰⵎⵓⵔⵙ ⵉⵜⵡⵓⵔⵉⵡⵉⵏ ⵏⵏⵓⵏ, ⴱⵔⵔⴽⴰⵜ ⴷⴰⵖ ⴳ ⵜⴳⵍⴷⵉⵜ ⵏ ⵍⵎⵖⵔⵓⴱ. 

ⴰⵣⵓⵍ