ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴳⵯⵏⵙⴰⵙ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⵓⴳⵔⴰⵡ ⴰⵎⵣⵡⴰⵔⵓ ⴽⵓⵔⵉⵢⴰ ⵉⴼⵔⵉⵇⵢⴰ, ⴰⵏⵙⵙⵉⵅⴼ ⵏ ⵓⴽⴰⴱⴰⵕ ⵏ ⵍⵎⵖⵔⵉⴱ

ⴱⴰⴱ ⵏ ⵡⴰⴷⴷⵓⵔ ⴰⵏⵙⵙⵉⵅⴼ ⵏ ⴽⵓⵔⵢⴰ ⵎⴰⵙⵙ YOON SUK YEOL

ⴱⴰⴱ ⵏ ⵡⴰⴷⴷⵓ ⴰⵏⵙⵙⵉⵅⴼ ⵏ ⵎⵓⵕⵉⵟⴰⵏⵢⴰ, ⴰⵏⵙⵙⵉⵅⴼ ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ ⵎⴰⵙⵙ ⵎⵓⵃⴰⴰⴷ ⵡⵍⴷ ⵍⵖⵣⵡⴰⵏⵉ; 

ⵉⴷ ⴱⴰⴱ ⵏ ⵡⴰⴷⴷⵓⵔ ⵉⵏⵙⵙⵉⵅⴼⵏ; 

ⵉⴷ ⴱⴰⴱ ⵏ ⵡⴰⴷⴷⵓⵔ ⵉⵏⵙⵙⵉⵅⴼⵏ ⵏ ⵜⵏⴱⴰⴹⵉⵏ ⴷ ⵉⵎⴰⵡⵙⴰⵙⵏ,

ⵉⴷ ⵎⴰⵙⵙ ⵉⵎⵙⵇⵇⴰⴷⵏ; 

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ;

ⵉⴳⴰ ⵉⵢⵉ ⴰⴷⴷⵓⵔ ⴰⴷ ⴷⵔⵓⵖ ⴳ ⵓⴳⵔⴰⵡ ⴽⵓⵔⵢⴰ-ⵉⴼⵔⵉⵇⵢⴰ ⵉⵍⵍⴰⵏ ⴳ ⵙⵢⵓⵍ ⴳ ⵜⵙⵓⵜⵍⵜ ⵏⵏⵙ ⵜⴰⵎⵣⵡⴰⵔⵓⵜ, ⴳ ⴽⵓⵔⵢⴰ ⵜⴰⵎⴰⵣⵉⵔⵜ ⵜⴰⵎⴷⴷⴰⴽⴽⵯⵍⵜ ⴷ ⵜⵎⴷⵔⴰⵡⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ.

ⵎⴰⵙⵙ ⴰⵏⵙⵙⵉⵅⴼ, ⵔⵉⵖ ⴰⴷ ⴰⵡⵏ ⵉⵏⵉⵖ ⴰⵣⵓⵍ ⴷ ⵓⵙⵓⵜⴳ ⴷ ⵓⵙⵏⵉⵎⵎⵔ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵍⵍⵉⵖ ⵜⵖⵔⴰⵎ ⵉ ⵜⴳⵍⴷⵉⵜ ⵏ ⵍⵎⵖⵔⵉⴱ ⵉ ⵓⴷⵔⴰⵡ ⴳ ⵓⴳⵔⴰⵡ, ⴷ ⵓⵙⵓⵜⴳ ⵏ ⴱⴰⴱ ⵏ ⵡⴰⴷⴷⵓⵔ ⵉ ⵜⵙⵏⵜⴰⵢⵜ ⵏⵏⵓⵏ. ⴰⵙⵏⵉⵎⵎⵔ ⵏⵉⵜ ⴷ ⵓⵙⵓⵜⴳ ⴷ ⵜⴳⵯⵎⴰⵜ ⵉ ⵎⴰⵙⵙ ⴰⵏⵙⵙⵉⵅⴼ ⵎⵓⵃⴰⵎⵎⴰⴷ ⵡⵍⴷ ⵍⵖⵣⵡⴰⵏⵉ ⴰⵏⵙⵙⵉⵅⴼ ⵏ ⵜⴰⵎⵓⵏⵜ ⵏ ⵉⴼⵔⵉⵇⵢⴰ, ⴰⵏⵙⵙⵉⵅⴼ ⵏ ⵎⴰⵓⵕⵉⵟⴰⵏⵢⴰ, ⵍⵍⵉ ⵉⵎⵓⵏⵏ ⴷ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵜⵣⴷⴰⵢⵉⵏ ⵏ ⵉⴷⴰⵎⵎⵏ ⴷ ⵜⴳⵯⵎⴰⵜ ⴷ ⵜⵓⴷⴷⵓⵊⵓⵕⴰ ⴷ ⵓⵎⵣⵔⵓⵢ ⴷ ⵜⴷⵍⵙⴰ. ⵜⴰⴳⵍⴷⵉⵜ ⵏ ⵍⵎⵖⵔⵉⴱ ⵖⵓⵔⵙ ⴰⴱⵓⵔⵣ ⵍⵍⵉⵖ ⵉⵍⵍⴰ ⵓⴳⵔⴰⵡ ⴳ ⵜⵏⵙⵙⵉⵅⴼⵜ ⵜⴰⵎⵓⵕⵉⵟⴰⵏⵉⵜ ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ, ⴰⵢⵍⵍⵉ ⵉⵙⴷⵓⵙⵏ ⵜⵉⵙⵏⵜⴰⵢⵉⵏ ⵏⵏⵓⵙ, ⵎⴰⵙⵙ ⴰⵏⵙⵙⵉⵅⴼ. 

 ⵉⴷ ⴱⴰⴱ ⵏ ⵡⴰⴷⴷⵓⵔ ⴷ ⵜⴰⵜⵜⵓⵢⵜ ⴷ ⵜⵓⵎⵔⵜ; 

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ;

 ⵉⴳⴰ ⵓⵙⵏⵜⵍ ⵏ ⵓⴳⵔⴰⵡ ⴰⵎⵣⵡⴰⵔⵓ ⴽⵓⵔⵉⵢⴰ-ⵉⴼⵔⵉⵇⵢⴰ “ⵉⵎⴰⵍ ⵍⵍⵉ ⴰⴽⴽⵯ ⵏⵙⵔⵙ: ⵜⴰⵣⵣⵉⴳⵣⵜ ⵉⵛⵛⴰⵔⵏⴷ ⵜⴰⵙⵓⵍⴰⵏⵜ ⴷ ⵜⵡⵉⵣⵉ”, ⵉⵙⵙⵎⵖⵔ ⴰⵏⴰⵔⵓⵣ ⵉⵛⵛⴰⵔⵏ ⵏ ⵉⴼⵔⵉⵇⵢⴰ ⴷ ⴽⵓⵔⵢⴰ ⵉ ⵜⴳⵎⵉ ⴷ ⵜⵣⵣⵉⴳⵣⵜ ⵉ ⵡⴰⵍⴰⵢ ⵏ ⵜⵏⴰⵥⴰⵕⵉⵏ ⴷⴰⵜ ⵏ ⵜⵔⴰⴱⴱⵓⵜ ⵜⴰⴳⵔⴰⵖⵍⴰⵏⵜ, ⵜⵉⵏⴰⵥⴰⵕⵉⵏ ⵜⵜⵉⵏⵎⵖⵓⵔⵏⵉⵏ, ⵙ ⵓⵖⵉⵍⵓⴼ, ⵉⵍⵉⵏⵜ ⵙⴳ ⵓⵙⵔⵙ ⴰⵊⵢⵓ-ⴰⵙⵔⵜⴰⵏ ⴷ ⵡⵉⵏ ⵜⵏⴼⵔⵓⵜ ⴰⵔ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵉⴷⵔⵉⵣⵏ ⵏⵏⵙ ⵉⵅⴰⵜⴰⵔⵏ, ⵙⵍⴰⵡⵏ ⴰⴽⴽⵯ ⴼ ⵜⵎⵉⵣⴰⵔ ⵏ ⵓⵎⵏⵥⴰⵡ ⵏⵏⵖ ⵍⵍⵉ ⵓⵔ ⵉⴳⵉⵏ ⵜⴰⵎⴰⵙⴰⵢⵜ ⴰⴱⵍⴰ ⵙ ⵎⴰⴷ ⵉⴷⵔⵓⵙⵏ ⴼ ⵜⵉⵔⵖⵉ ⵏ ⵡⴰⴽⴰⵍ, ⵙ ⵎⴰⴷ ⵉⴷⵔⵓⵙⵏ ⴼ 4% ⵏ ⵉⴳⴰⵣⵏ ⴳⴰⵏⵉⵏ ⵉⵎⵏⵜⵉⵍⵏ ⵏ ⵜⵔⵖⵉ ⴰⴷ.  

ⵍⵍⴰⵏⵜ ⵜⵏⴰⵥⴰⵕⵉⵏ ⴷⴰⵔ ⴽⵉⴳⴰⵏ ⵏ ⵜⵎⵉⵣⴰⵔ ⵏ ⵉⴼⵔⵉⵇⵉⵢⴰ, ⴰⵢⵍⵍⵉ ⵉⵙⴱⵉⴷⴷⵏ ⵜⵉⴳⵎⵉ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ, ⵙⵙⵉⵎⵖⵓⵔⵜ ⵜⵉⵎⴽⵕⴰⴹ ⵜⵉⴳⴷⵓⴷⴰⵏⵉⵏ, ⵙⴽⵔⵏⵜ ⴰⴷⴷⴰⴷⵏ ⵏ ⴰⵔⴰⵏⵓⵔⵓⵣ, ⵙⵍⵡⴰⵏ ⴰⴽⴽⵯ ⴷⴰⵔ ⵉⵄⵔⵔⵉⵎⵏ ⵉⴼⵔⵉⵇⵉⵢⵏ ⵔⴰⵏⵉⵏ ⵜⵓⴷⵔⵜ ⵉⵥⵉⵍⵏ ⴷ ⵡⴰⴷⴷⵓⵔ, ⴷ ⵏⵜⵜⴰⵏ ⴰⵔ ⵉⵥⵕⵕⴰ ⴰⴱⵓⵖⵍⵓ ⵉⵍⵍⴰⵏ ⴷⴰⵔ ⵉⵏⴳⴳⵯⴰ ⵏⵏⵙ ⴳ ⵉⵎⵏⵥⴰⵡⵏ ⵢⴰⴹⵏⵉⵏ. 

ⴰⵎⵏⵥⴰⵡ ⵏⵏⵖ ⵓⵔ ⵢⴰⴷ ⵙⵓⵍ ⵉⴳⵉ ⵡⴰⴷ ⵉⴳⴰⵏ ⵉⴳⵍⵍⵉⵏ, ⴳⵉⵙ ⵜⴰⴷⵉⵏⴰⵎⵉⵜ ⵉⴷⵔⴰⵏ ⵜⴰⵙⵔⵜⴰⵏⵜ ⴷ ⵜⵎⵔⵙⵍⴰⵏⵜ ⴷ ⵜⴷⵎⵙⴰⵏⵜ, ⴷ ⵉⵙⵎⵓⵜⵜⵓⵢⵏ ⵙⵜⴰⵡⵀⵎⵎⴰⵏⵉⵏ, ⵎⴰⵛⵛ ⵉⵙⵖⵍⵏ ⵏ ⵜⴳⵎⵉ ⴷ ⵜⵖⵔⴰⴷ ⴷ ⵓⵥⵍⴰⴹ ⴰⵎⴰⵡⴰ ⴷ ⵜⵏⵓⴼⴰ ⴳ ⵉⴼⵔⵉⵇⵢⴰ, ⴳⴰⵏ ⵙⵓⵍ ⵡⵉⴷ ⴷⵔⵓⵙⵏⵉⵏ ⴳ ⵓⵙⵡⵉⵔ ⴰⴳⵔⴰⵖⵍⴰⵏ. 

ⴰⵙⵔⵙ ⴰⴷ ⵓⵔ ⵉⴳⵉ ⵓⵎⵎⵍ (Ce n’est pas une fatalité), ⴰⵛⴽⵓ ⴰⵎⵏⵥⴰⵡ ⵏⵏⵖ ⵖⵓⵔⵙ ⵜⵉⵥⴹⴰⵕⵉⵏ ⴳⴳⵓⵜⵏⵉⵏ: ⵉⵙⵓⴳⴰⵎ ⵉⵏⴼⴳⴰⵏⵏ ⴳⴳⵓⵜⵏⵉⵏ, ⵉⵙⵓⴳⴰⵎ ⵉⵎⵣⵡⵓⵔⴰ ⵍⴰⵏⵉⵏ ⴰⵜⵉⴳ ⴷ ⵉⵣⵓⵖⴰⵣ ⴳⴳⵓⵜⵏⵉⵏ ⴳⴰⵏⵉⵏ ⵉⵙⵜⵔⴰⵜⵉⵊⵉⵢⵏ, ⵉⴽⴰⵍⵉⵡⵏ ⵉⵏⴼⵍⴰⵃⵏ, ⵉⵟⵟⴰⴼ ⵓⵎⵏⵥⴰⵡ 60 % ⵏ ⵉⴽⴰⵍⵉⵡⵏ ⵉⵏⴼⵍⴰⵃⵏ ⴳ ⵓⵎⴰⴹⴰⵍ. ⵖⵎⴽ ⴰⵏⵏ ⴷ ⵉⵙⵓⴳⴰⵎ ⴰⵢⵍⴰⵏⵏ. ⵉⴳ ⵓⵎⵏⵥⴰⵡ ⴰⵙⴳⵎ ⴰⵙⵜⵔⴰⵜⵉⵊⵉ ⵉ ⵓⵜⵛⵓ, ⴷ ⵉⴳⵔ ⵉ ⵜⵉⵍⴰⵍ ⴷ ⵜⵏⵓⴼⴰ ⴷ ⵡⴰⵙⵙⴰⵢ. 

ⵙⵖⴰⵡⵙⴰⵏⵜ ⵜⵥⴹⴰⵔⵉⵏ ⴰⴷ ⵉ ⵉⵎⴰⵙⵙⵏ ⴷ ⵉⵙⵙⵥⵕⴼⵏ ⴷ ⵜⵙⵓⴳⴰⵔ ⵍⵍⵉ ⵔⴰⴷ ⵜⵏⵜ ⵉⵙⵏⴼⵍⵏ ⵙ ⵉⴳⴰⴷⴰⵔⵏ ⵍⵍⵉ ⵔⴰⴷ ⵉⵙⴽⵔ ⵜⴰⵏⴽⵔⴰ ⵜⴰⴼⵔⵉⵇⵉⵜ. ⴼⵔⴽⵖ ⵎⴰⵙ ⴷ ⴽⵓⵔⵉⵢⴰ ⵙ ⵓⵎⵣⵔⵓⵢ ⵏⵏⵙ ⴷ ⵓⵖⵣⴰⵏ ⵏ ⵜⵎⴷⵔⴰⵡⵉⵏ ⵏⵏⵙ, ⴷ ⵡⴰⵔⵡⴰⵍⴰ ⵏⵏⵙ, ⴷ ⵓⴼⵔⴰⴽ ⵏⵏⵙ ⴰⴷⵉⴱⵍⵓⵎⴰⵙⵉ, ⵜⵥⴹⴰⵕ ⴰⴷ ⵜⴰⵡⵙ ⴳ ⵓⵙⴽⵔ ⵏ ⵜⵏⴽⵔⴰ ⵙ ⵜⴷⵔⴰⵡⵉⵏ ⵍⵍⵉ ⵏⵏ ⵉⵣⵣⵔⴰⵢⵏ ⵎⴰⴷ ⵉⴳⴰⵏ ⴰⵙⵉⵏⵔⴰⵏ ⵙ ⵎⴰⴷ ⵉⴳⴰⵏ ⵡⵉⵏ ⵓⵎⵏⵥⴰⵡ ⴰⴳⵜⵉⵔⴰⵏ. 

ⵙ ⵓⵙⴷⴷⴻⴷ, ⵉⴳⴰ ⵓⴳⵔⴰⵡ ⴰⴷ ⵜⴰⵙⴰⵔⵓⵜ ⵏ ⵓⵙⴽⵔ ⵏ ⵡⴰⵡⵜⵜⴰⵙ ⴰⴷ. 

ⵉⵖ ⵜⵙⵖⴰⵡⵙⴰ ⵉⴼⵔⵉⵇⵢⴰ ⵙ ⵓⵙⵎⴰⵜⵜⵉ ⵏ ⵜⴻⵜⵉⴽⵏⵓⵍⵓⵊⵉⵜ ⴷ ⵜⵙⵓⴳⴰⵔ ⴷ ⵓⵙⵎⴰⵜⵜⵉ ⵏ ⵓⵙⵙⴰⵔⵓ, ⵀⴰⵜⵉ ⴽⵓⵔⵉⵢⴰ ⵜⵟⵟⴰⴼ ⵜⵉⵥⴹⴰⵕⵉⵏ ⵙⵜⴰⵡⵀⵎⵎⴰⵏⵉⵏ ⴳ ⵢⵉⴳⵔ ⴰⴷ. ⴳ ⵢⵉⴳⵔ ⵏ ⵜⵎⴳⵓⵔⵉ ⴷ ⵜⴻⵜⵉⴽⵏⵓⵍⵓⵊⵉⵜ ⵜⴰⵎⴰⵢⵏⵓⵜ ⴷ ⵜⵖⵉⵙⵜ ⵜⴰⵎⴳⵓⵔⴰⵏⵜ, ⴷ ⵜⵙⴱⴱⴰⴱⵜ ⴷ ⵡⴰⵙⵙⴰⵢ, ⵜⵥⴹⴰⵕ ⴽⵓⵔⵉⵢⴰ ⵙ ⵜⴷⵔⴰⵡⵜ ⴰⴽⴷ ⵉⴼⵔⵉⵇⵢⴰ ⵙ ⴽⵉⴳⴰⵏ ⴳ ⵓⵙⴰⵜⵉ ⵏ ⵓⵙⵎⴰⵇⵇⵍ ⵚⴰⵃⴰ-ⵚⴰⵃⴰ, ⵉⵣⵣⵉⴳⵣⵏ ⵙ ⵉⵎⴰⵍ ⵖ ⵓⵔ ⵉⵍⵍⴰ ⵓⵎⵢⴰⵡⴰⵙ ⵖⴰⵙ ⵜⵏⵓⴼⴰ ⵜⵉⵥⵕⴼⴰⵏⵉⵏ. 

ⵉⵖ ⵜⴳⴰ ⵉⴼⵔⵉⵇⵢⴰ ⴰⴽⴰⵍ ⵉⴳⴰⵏ ⴰⵄⵣⵔⵉ ⵉⵙⵖⴰⵡⵙⴰⵏ ⵙ ⵉⵙⵏⴼⵍⵏ ⴷⵔⴰⵏⵉⵏ, ⵙ ⵓⵎⴰⵡⴰ ⴰⵙⵉⵍⴰⵏ ⴰⴳⵯⵏⵙⴰⵏ ⵉⵣⵔⵉⵏ ⵉⵡⵜⵜⴰ ⴷ ⵜⵎⴳⵓⵔⵉ ⴷ ⵓⵜⵛⵓ ⴷ ⵜⵥⴹⴰⵕⵜ ⵉⵖⵓⵙⵏ, ⵀⴰⵜⵉ ⵜⵟⵟⴰⴼ ⴽⵓⵜⵉⵢⴰ ⵜⵉⵎⵓⵣⴰⵢⵉⵏ ⴷ ⵜⴻⵜⵉⴽⵏⵓⵍⵓⵊⵉⵜ ⵍⵍⵉ ⵔⴰⴷ ⵢⴰⵡⵙ ⴳ ⵓⵙⴽⵔ ⵏ ⵉⵏⴰⵔⵓⵣⵏ ⴰⴷ. 

ⵉⵖ ⵜⵍⵍⴰ ⵉⴼⵔⵉⵇⵢⴰ ⴰⵙⵙ ⴰⴷ ⴳ ⵓⴳⵯⵏⵙ ⵏ ⵓⵎⵃⵉⵣⵡⴰⵔ ⴰⴳⵔⴰⵖⵍⴰⵏ, ⵀⴰⵜⵉ ⵜⴰⵎⴷⵔⴰⵡⵜ ⴽⵓⵔⵉⵢⴰ-ⵉⴼⵔⵉⵇⵢⴰ, ⵍⵍⵉ ⵉⵜⵜⵙⵎⴰⴷⵏ ⴷ ⵜⵎⴷⵔⴰⵡⵉⵏ ⵢⴰⴹⵏⵉⵏ ⴳ ⵓⵎⵏⵥⴰⵡ ⵍⵍⵉ ⵏⵜⵜⵓⵇⵇⴰⵔ ⴷ ⵏⵜⵜⵙⵓⵜⴳ, ⴷ ⵡⴰⵡⵍⴰⴼ ⵏ ⴽⵓⵔⵉⵢⴰ ⴳ ⵉⴼⵔⵉⵇⵢⴰ ⴷ ⵜⵍⵍⴰⵙⵜ ⴷ ⵓⵎⵓⵔⵙ ⵏⵏⵙ ⴰⵅⴰⵜⴰⵔ ⴷ ⵜⵣⵣⵉⵣⴳⵜ ⵍⵍⵉ ⵙ ⵜⵙⴽⵔ ⴰⵙⵔⵙ ⵏⵏⵙ ⴰⵜⵉⴽⵏⵓⵍⵓⵊⵉ ⴷ ⵓⵎⴰⵙⵙⴰⵏ ⴷ ⵓⴷⵎⵙⴰⵏ, ⴷ ⵓⵙⵖⵡⵏ ⵏⵏⵙ ⴰⵙⵓⵍⴰⵏ ⵉ ⵓⵙⵏⴰⵍ ⵏ ⵓⵔⴳⴳⵉⴳ ⵏ ⵉⵡⴰⵏⴽⵏ ⵉⴼⵔⵉⵇⵉⵢⵏ ⴷ ⵜⵢⴰⵏⵜ ⵏⵏⵙ ⵜⴰⵏⴰⴽⴰⵍⵜ ⴷ ⵜⵅⵅⵓⵜⵔⴰ ⵏⵏⵙ ⵜⴰⵏⴰⵎⵓⵔⵜ, ⴳⴰⵏ ⵜⵉⵎⵏⵜⵍⵉⵏ ⵏ ⵓⵎⵓⵔⴰⵙ ⵏ ⵜⴷⵉⵏⴰⵎⵉⵜ ⴰⴷ ⵜⴰⵎⴰⵢⵏⵓⵜ ⴳ ⵓⵎⵢⴰⵡⴰⵙ ⴰⴼⵔⵉⴽⵉ-ⴰⴽⵓⵔⵉ. 

 ⵉⴷ ⴱⴰⴱ ⵏ ⵡⴰⴷⴷⵓⵔ ⴷ ⵜⴰⵜⵜⵓⵢⵜ ⴷ ⵜⵓⵎⵔⵜ;

ⵉⵍⵍⴰ ⵓⴱⵓⵔⵣ ⴷⴰⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴰⴷ ⵜⵎⵓⵏ ⴷ ⴽⵓⵔⵉⵢⴰ ⴳ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⴷ ⵉⵙⵏⴼⵍⵏ ⵉⵏⵙⴱⴰⴱⵏ, ⴷ ⵜⵣⴷⴰⵢⵉⵏ ⵏⵏⵙ ⵜⵉⵎⵏⵏⴰⵡⵉⵏ ⴰⴽⴷ ⵜⵓⴳⵜ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ. ⵙⴳ ⵎⴰⴷ ⵉⵍⵍⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴼ ⵓⴷⴰⴱⵓ ⴳ 1999, ⵜⵣⵎⵎⵉⵎ ⵜⵎⴰⵣⵉⵔⵜ ⵏⵏⵖ ⵓⴳⴳⴰⵔ ⵏ ⵉⴼⴹ (1000) ⵏ ⵜⵎⵢⴰⵇⵇⴰⵏⵜ ⴷ ⵓⴱⵕⵓⵟⵓⴽⵓⵍ ⵏ ⵓⵎⵢⴰⵡⴰⵙ ⴰⴽⴷ 40 ⵏ ⵜⵎⴰⵣⵉⵔⵜ ⵜⴰⴼⵔⵉⵇⵉⵜ ⵢⴰⴹⵏⵉⵏ ⴰⵢⵍⵍⵉ ⵉⵣⵔⵉ ⵓⵏⵛⴽ ⵏ ⵜⵎⵢⴰⵇⵇⴰⵏⵉⵏ ⵊⴰⵔ ⵜⴰⴳⵍⴷⵉⵜ ⴷ ⴰⵢⵜⵎⴰⵙ ⵉⴼⵔⵉⵇⵉⵢⵏ 1500. ⴰⵢⵍⵍⵉ ⵉⵎⵎⴰⵍⴰⵏ ⴰⵙⵖⵡⵏ ⵉⵖⵣⴰⵏⵏ ⵏ ⵍⵎⵖⵔⵉⴱ ⴷ ⵉⵙⵓⵍⵏ ⵉ ⵓⵎⵢⴰⵡⴰⵙ ⴰⴼⵔⵉⵇⵉ-ⴰⴼⵔⵉⵇⵉ. 

ⴰⵙⵖⵡⵏ ⴰⴷ ⵓⵔ ⵉⴳⵉ ⵡⵉⵏ ⴰⵙⵙ ⴰⴷ, ⵉⴳⴰ ⴰⴳⵣⵣⵓⵎ ⵙⴳ ⵓⵎⵣⵔⵓⵢ ⵉⴷⵔⴰⵏ ⵏ ⵜⴳⵍⴷⵉⵜ ⴷ ⵜⵎⵢⵓⵔⵉⵏ ⵏⵏⵙ ⴷ ⵜⴷⵍⵙⴰ ⵏⵏⵙ. ⴰⵢⵍⵍⵉ ⵉⵜⵜⵉⵙⴷⵓⵙⵏ ⴳ ⵜⴼⵔⴽⴰ ⵏ ⵜⵖⵏⵙⴰ ⵏ ⵉⴼⵔⵉⵇⵢⴰ ⵉ ⵜⵙⵉⵎⴰⵏⵜ ⴷ ⵜⴼⵔⴰⵔⴰ ⵏ ⵜⵙⵉⵎⴰⵏⵉⵏ ⵜⵉⵏⴰⵎⵓⵔⵉⵏ, ⵉⵖⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵙⵎⵎⵓⵙ ⵜⴰⵎⵍⵍⴰ ⵏ ⵕⴱⴱⵉ ⴼ ⵉⵎⴰⵏ ⵏⵏⵙ, ⵉ ⵓⴳⵔⴰⵡ ⵏ ⵜⴳⵎⵎⵉ ⵜⵓⵎⵍⵉⵍⵜ ⴳ ⵉⵏⵏⴰⵢⵔ 1961, ⵉⴼⴼⵖ ⴷ ⴳⵉⵙ “ⵓⵎⵇⵇⵏ ⵏ ⵉⴼⵔⵉⵇⵢⴰ ⵜⴰⵎⴰⵢⵏⵓⵜ”. ⵜⵡⴰⵜⵜⵙ ⵜⵎⵙⴰⵔⵜ ⴰⴷ  ⴰⵙⵎⵓⵏ ⵏ ⵜⵓⴳⴳⴰⵙ ⵏ ⵓⵎⵏⵣⴰⵡ ⵉ ⵓⵖⵓⵍ ⵏ ⵉⴳⵣⵎⴰⵏ ⵏⵏⵙ ⴷ ⵜⴰⵎⵓⵏⵜ ⵜⴰⴼⵔⵉⵇⵉⵜ, ⴰⵢⵍⵍⵉ ⴷ ⵢⵉⵡⵉⵏ ⴰⵙⴽⵔ ⵏ ⵜⵎⴰⴷⴷⴰⵙⵜ ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ. 

ⵉⵖ ⵏⵣⴷⵉ ⵜⵉⵍⵉⵜ ⴷ ⵉⵎⴰⵍ ⵙ ⵓⵎⵣⵔⵓⵢ ⵍⵍⵉ ⵉⴳⴰⵏ ⵓⴷⴷⵉⵔ, ⵉⵎⵎⴰⵖ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵏⵚⵕ ⵕⴱⴱⵉ ⵙⴳ 2000 ⴳ ⵓⵙⴽⵔ ⵏ ⴽⵉⴳⴰⵏ ⵏ ⵜⵙⵏⵜⴰⵢⵉⵏ, ⵉⵕⵥⵎ ⴷ ⴰⵢⵜⵎⴰⵙ ⵉⵏⵙⵙⵉⵅⴼⵏ ⵏ ⵉⵡⴰⵏⴽⵏ ⵉⴼⵔⵉⵇⵉⵢⵏ ⵉⵙⵏⴼⴰⵔⵏ ⵏ ⵜⴳⵎⵉ ⵙ ⵓⵙⵎⴰⵇⵇⵍ ⵉⴷⵔⴰⵏ ⵉⵡⴰⵜⵜⵙⵏ ⵜⵉⵍⵉⵜ ⵏ ⵉⴼⵔⵉⵇⵢⴰ ⵜⴰⵎⴰⵢⵏⵓⵜ: ⵉⴼⵔⵉⵇⵢⴰ ⵉⴷⵓⵙⵏ, ⵉⴼⵔⵉⵇⵢⴰ ⵉⵥⴹⴰⵕⵏ ⴰⵎⵣⴰⵖ ⵏ ⵜⵏⵓⴼⴰ ⵏⵏⵙ. 

ⵍⵍⵉⵖ ⵉⴼⵔⴽ ⵍⵎⵖⵔⵉⴱ ⵙ ⵜⵏⴰⵎⵎⴰⵙⵜ ⵏ ⵜⴼⵍⵍⴰⵃⵜ ⴷ ⵜⴳⵎⵉ ⵜⴰⵙⵓⵍⴰⵏⵜ ⴳ ⵜⴳⵎⵉ ⵜⴰⵎⴰⵜⴰⵢⵜ ⵏ ⵓⵎⵏⵥⴰⵡ, ⵉⵕⵥⵎ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴷ ⴰⵢⵜⵎⴰⵙ ⵉⴼⵔⵉⵇⵉⵢⵏ ⵙⴳ 2016 ⴳ ⵓⴳⵔⴰⵡ ⵏ ⵓⵏⵣⵡⵉ ⴳ ⵡⴰⵎⵓⵔ ⵏ ⵡⴰⴽⵓⵛ ⵜⵓⴳⵜ ⵏ ⵜⵙⵏⵜⴰⵢⵉⵏ ⵉ ⵚⴰⵃⴰ ⵏ ⵓⵎⵏⵥⴰⵡ, ⴰⵎ ⵜⴰⵏⵙⵜⴰⵢⵜ ⵏ ⵓⵎⵙⴰⵙⴰ ⵏ ⵜⴼⵍⵍⴰⵃⵜ ⵜⴰⴼⵔⵉⵇⵉⵜ (AAA). 

ⵉⵏⵄⵕ ⵍⵎⵖⵔⵉⴱ ⵃⵎⴰ ⴰⴷ ⵜⵉⵍⵉ ⵉⴼⵔⵉⵇⵢⴰ ⴳ ⵓⴳⵯⵏⵙ ⵏ ⵉⵅⵎⵎⵉⵎⵏ ⵏ ⵓⵏⵣⵡⵉ ⴳ ⵓⵙⵡⵉⵔ ⴰⵎⴰⴹⵍⴰⵏ, ⵙ ⵓⵙⴽⵔ ⵏ ⴽⵕⴰⴹⵜ ⵜⵙⵇⵇⵉⵎⵉⵏ ⴼ ⵓⵏⵣⵡⵉ ⴷ ⵜⴳⵎⵉ ⵜⴰⵙⵓⵍⴰⵏⵜ ⴳ ⵉⴼⵔⵉⵇⵢⴰ ( ⵜⴰⵙⴳⴰ ⵏ ⵙⵙⴰⵃⵉⵍ ⴷ ⵍⴽⵓⵏⴳⵓ ⴷ ⵉⵡⴰⵏⴽⵏ ⵜⵉⴳⵣⵉⵔⵉⵏ ⵎⵥⵥⵉⵏⵉⵏ).

ⵉⴹⴼⵕ ⴰⵏⵄⴰⵕ ⴰⴷ ⴰⵢⵍⵍⵉ ⵉⵙⴽⴰⵔ ⵍⵎⵖⵔⵉⴱ ⵃⵎⴰ ⴰⴷ ⵜⴼⵍⵍⴰⵃⵜ ⵜⴰⴼⵔⵉⵇⵉⵜ ⵜⴰⵙⵓⵍⴰⵏⵜ ⵉⵟⵟⴰⴼⵏ ⵜⴰⵢⵢⴰⴼⵓⵜ ⵉⵙⴽⴰⵔⵏ ⵜⵉⵖⵔⴰⴷ ⴷ ⵜⵡⵓⵔⵉ ⴷ ⵡⴰⴷⴷⵓⵔ, ⵉⵜⵜⴰⵡⵙⵏ ⴳ ⵜⵏⴼⵔⵓⵜ ⵏ ⵓⵜⵛⵓ.

ⴳ ⵓⵎⵏⵉⴷ ⵢⴰⴹⵏⵉⵏ, ⵉⵇⵇⴰⵏ ⴷ ⵓⵙⵙⴽⵯⵜⵉ ⵏ ⵡⴰⵜⵉⴳ ⴰⵙⵜⵔⴰⵜⵉⵊⵉ ⵏ ⵓⵙⵏⴼⴰⵔ ⵏ ⵓⵜⵜⵉⵢⵢⵓ ⵏ ⵍⴳⴰⵣ ⵏⵉⵊⵉⵔⵢⴰ-ⵍⵎⵖⵔⵉⴱ ⵉⵡⴰⵜⵜⵙⵏ ⵜⵉⵡⵉⵣⵉ ⴳ ⵜⴳⵎⵉ ⵏ 13 ⵏ ⵜⵎⴰⵣⵉⵔⵜ ⵜⴰⴼⵔⵉⵇⵉⵜ ⵃⵎⴰ ⴰⴷ ⵜⵟⵟⵉⴼ ⵜⴰⵥⴹⴰⵕⵜ ⵍⵍⵉ ⵜⵙⵖⴰⵡⵙⴰ ⵜⵣⵣⵉⴳⵣⵜ. 

ⵉⵙⵎⴷ ⵓⵙⵏⴼⴰⵔ ⴰⴷ ⵙ ⵜⵙⵏⵜⴰⵢⵜ ⵜⴰⴳⵔⴰⵖⵍⴰⵏⵜ ⵍⵍⵉ ⵉⵕⵥⵎ ⴱⴰⴱ ⵏ ⵡⴰⴷⴷⵓⵔ ⴳ ⵏⵓⵡⴰⵏⴱⵉⵔ 2023 ⵍⵍⵉ ⵉⵡⴰⵜⵙⵏ ⵙ ⵓⵙⴼⵙⵉ ⵏ ⵎⴰⴷ ⵉⵜⵜⵓⵅⴰⵚⵚⴰⵏ ⴳ ⵓⵎⴰⵡⴰ ⴰⵙⵉⵍⴰⵏ ⴳ ⵜⵎⵉⵣⴰⵔ ⵏ ⵓⴼⵜⴰⵙ ⴰⴼⵔⵉⵇⵉ, ⴰⵙⵉⵥⴹⵔ ⵏ ⵜⵎⵉⵣⴰⵔ ⴰⴷ ⵙ ⵓⵙⵉⴷⴼ ⵙ ⵢⵉⵍ ⵏ ⵡⴰⵟⵍⴰⵚ ⴷ ⵓⵙⵉⵜⵜⵉ ⵏ ⵓⵣⵍⴰⵢ ⴷⴰⵔ ⵍⵍⵉ ⵓⵔ ⵟⵟⴰⴼⵏⵉⵏ ⵉⴱⵔⴷⴰⵏ ⵙ ⵢⵉⵍ ⴷ ⵓⵣⵣⴳⵉⵔ ⵏ ⵉⵙⵏⴼⴰⵔⵏ ⵉⵅⴰⵜⴰⵔⵏ ⵣⵣⵔⴰⵢⵏⵉⵏ ⵉⵡⵜⵜⴰ ⵣⴷⵉⵏⵉⵏ ⵉⴼⵔⵉⵇⵢⴰ ⴷ ⵓⵎⴰⴹⴰⵍ, ⴷⵔⵓⵏ ⴽⵓ ⵓⴷⴷⵉⵔⵏ ⵉⴷⵎⵙⴰⵏⵏ ⴳ ⵓⵙⵏⴼⴰⵔ ⴰⴼ ⴰⵏⴳⵎⵓ ⴳ ⵉⵍⵍⴰ ⵓⵏⴰⵔⵓⵣ. 

ⵉⴳⴰ ⵍⵃⴰⵍ ⵉⵙⵏⴼⴰⵔⵏ ⵙ ⵉⵡⵜⵜⴰⵙⵏ ⵉⵏⴼⴳⴰⵏⵏ ⵥⵉⵍⵏⵉⵏ, ⴷⴰⵜ ⴰⴷ ⴳⵉⵏ ⵉⵏⵙⴱⴰⴱⵏ, ⴰⵢⵍⵍⵉ ⵉⵎⵎⴰⵍⴰⵏ ⵜⵉⵔⴰⵜ ⵉ ⵓⵙⵉⵥⴹⵕ ⵏ ⵉⵎⴰⴷⴰⵏⵏ ⵏ ⵉⴼⵔⵉⵇⵢⴰ ⴳ ⵓⵣⵔⴼ ⴳ ⵜⴳⵎⵉ, ⴷ ⵉⵎⵉⵥ ⵏ ⵚⴰⵃⴰ ⵙⴳ ⵜⵣⵣⵉⴳⵣⵜ ⵜⴰⵎⴳⵓⵔⴰⵏⵜ ⴷ ⵜⴻⵜⵉⴽⵏⵓⵍⵓⵊⵉⵜ ⴷ ⵜⵎⴰⵙⵙⴰⵏⵜ ⴷ ⵡⴰⴷⴰⴼ ⵙ ⵜⵏⵓⴼⴰ ⵜⵉⵙⵉⵍⴰⵏⵉⵏ. 

ⵓⵔ ⴳⵉⵙ ⵜⵓⵔⴷⴰ, ⵎⴰⵙ ⴷ ⴰⵙⵎⴰⵇⵇⵍ ⴰⴷ ⵏ ⵓⵎⵢⴰⵡⴰⵙ, ⴷ ⵡⴰⵜⵉⴳⵏ ⴰⴷ ⵔⴰⵏⵉⵏ ⴰⵙⴽⵔ ⵏ ⵜⵣⵣⵉⴳⵣⵜ ⵜⴰⵎⴳⵔⵓⵜ, ⵔⴰⴷ ⴰⵡⵙⵏ ⴳ ⵡⴰⵍⴰⵢ ⵏ ⵉⴼⵔⵉⵇⵢⴰ, ⴰⵎⵏⵥⴰⵡ ⵏ ⵉⵎⴰⵍ, ⵉⵇⵇⴰⵏ ⴷ ⴼ ⵓⵎⴰⴹⴰⵍ ⴰⴷ ⵉⵣⵣⵔⵉ ⵉⵙⵡⵉⵏⴳⵎⵏ ⵏⵏⵙ ⴼⵍⵍⴰⵙ, ⴰⵛⴽⵓ ⵜⴳⴰ ⴰⵎⵥⴰⵡ ⵏ ⵜⵎⵍⴷⴰ ⴷ ⵉⵙⵓⴳⴰⵎ ⵉⵏⴼⴳⴰⵏⵏ ⵉⵄⵔⵔⵉⵎⵏ ⴷ ⵜⵥⴹⴰⵕⵉⵏ ⴳⴳⵓⵜⵏⵉⵏ, ⴰⵛⴽⵓ ⵖⵓⵔⵙ ⴰⵣⵔⴼ ⴰⴷ ⵜⵙⴽⵔ ⵜⵉⴳⵎⵉ ⵍⵍⵉ ⵔⴰⴷ ⵉⵙⴽⵔ ⴰⵔⴳⴳⵉⴳ ⴳ ⵓⵎⵏⴰⴷ ⴰⴳⵔⴰⵖⵍⴰⵏ ⴳ ⵍⵍⴰⵏ ⵉⵎⴰⵖⵏ ⴷ ⵜⵉⵔⴰⵜ ⵏ ⵜⵉⵕⵥⵉ ⵏ ⵜⵎⵢⵉⴷⵉⵔⵜ ⵉⵛⵛⴰⵔⵏ. 

ⴳ ⵓⵎⵏⴰⴹ ⴰⴷ, ⵉⵎⵎⴰⵖ ⵍⵎⵖⵔⵉⴱ ⴼ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⴰⴽⴷ ⴽⵓⵔⵉⵢⴰ ⴷ ⵓⵙⵎⵖⵔ ⵏⵏⵙ ⵉ ⵉⵎⵏⴰⴷⵏ ⴳⴳⵓⵜⵏⵉⵏ, ⵉⴼⵔⴽ ⵓⵍⴰ ⵎⴰⵙ ⴷ ⵜⴰⵎⴷⵔⴰⵡⵜ ⵏⴳⵔ ⵉⴼⵔⵉⵇⵢⴰ ⴷ ⴽⵓⵔⵉⵢⴰ ⵔⴰⴷ ⵜⴰⵡⵙ ⴳ ⵜⵣⵣⵉⴳⵣⵜ ⵏ ⵓⵎⵏⵥⴰⵡ ⴷ ⵓⵔⴳⴳⵉⴳ ⵏ ⵓⵎⴰⴹⴰⵍ ⴷ ⵓⵙⴽⵔ ⵏ ⵜⵣⵔⴼⵜ ⵜⴰⴳⵔⴰⵖⵍⴰⵏⵜ. 

ⵜⴰⵏⵎⵎⵉⵔⵜ ⵏⵏⵓⵏ ⵎⴰⵙⵙ ⴰⵏⵙⵙⵉⵅⴼ, ⴰⵣⵓⵍ.