ⵍⴱⵓⵕⵟⵓⵖⴰⵍ: ⵉⴷⵔⵓ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵙⵓⵜⵍⵜ ⵜⵉⵙ 18 ⵏ ⵓⴱⵕⵍⴰⵎⴰⵏ ⵏ ⵢⵉⵍ ⵓⵎⵍⵉⵍ ⴰⵏⴰⵎⵎⴰⵙ
ⵉⴷⵔⵓ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵙⵓⵜⵍⵜ ⵜⵉⵙ 18 ⵏ ⵓⴱⵕⵍⴰⵎⴰⵏ ⵓⵎⵍⵉⵍ ⴰⵏⴰⵎⵎⴰⵙ ⴳ 15 ⴷ 16 ⵎⴰⵢ 2024 ⴳ ⴱⵕⴰⴳⴰ ⴳ ⵍⴱⵓⵕⵟⵓⵖⴰⵍ.
ⵜⵥⵍⵉ ⵜⵙⵓⵜⵍⵜ ⴰⴷ ⵍⵍⵉⵖ ⵢⵉⵡⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵜⴰⵙⵎⵖⵓⵔⵜ ⵏ ⵓⴱⵕⵍⴰⵎⴰⵏ ⵏ ⵢⵉⵍ ⵓⵎⵍⵉⵍ ⴰⵏⴰⵎⵎⴰⵙ ⵉ ⵜⵡⵓⵔⵉ ⵜⴰⵏⴼⴳⴰⵏⵜ ⵙ ⵜⵉⵍⵉⵜ ⵏⵏⵙ ⴼ ⵜⵙⵏⵓⵔⴰⵢⵜ ⵏ ⵜⴰⴷⴷⴰⵔⵜ ⵏ ⵜⴷⵔⵉⵎⵜ ⵏ ⵍⵇⵓⴷⵙ ⴰⵛⴰⵔⵉⴼ ⵍⵍⵉ ⵢⴰⴽⴽⴰⵏ ⵜⵉⵏⵓⴼⴰ ⴷ ⵜⵡⵉⵣⵉ ⵜⵉⵏⴼⴳⴰⵏⵉⵏ ⵉ ⵓⵎⴰⴷⴰⵏ ⵏ ⴼⴰⵍⵉⵙⵟⵉⵏ.
ⵢⵓⵎⴰ ⵓⴽⴰⴱⴰⵕ ⵏ ⵓⵙⵇⵇⵉⵎ ⵏ ⵉⵎⵓⵔⴰ:
- ⵎⴰⵙⵙ ⴰⵎⴰⵔⵉ ⵎⵓⵃⴰⵎⵎⴰⴷ ⴰⵃⵡⵉⵟ, ⵙⴳ ⵜⵔⴰⴱⴱⵓⵜ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵉⵏⵙⵉⵎⴰⵏⵏ
- ⵎⴰⵙⵙⴰ ⵜⴰⵎⴰⵔⵉⵜ ⴼⴰⴷⵡⴰ ⵎⵓⵃⵙⵉⵏ ⵍⵃⵉⵢⴰⵏⵉ, ⵜⴰⵔⴰⴱⴱⵓⵜ ⵜⴰⵃⴰⵔⴰⴽⵉⵜ.
ⴳ ⵜⴷⵔⴰⵡⵜ ⵏⵏⵙ, ⵉⵙⵎⵏⵉⴷ ⵓⴽⴰⴱⴰⵕ ⴰⴷ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⵉⵣⵡⴰⵔⵏ ⴳ ⵓⵙⴱⴷⴷⵉ ⵏ ⵓⵙⵏⴼⵍ ⵏ ⵓⵏⵣⵡⵉ ⵜⵙⵜⵔⴰⵜⵉⵊⵉⵜ ⵜⴰⵏⴰⵎⵓⵔⵜ ⴷ ⵉⵙⴰⵡⵓⵔⵏ ⵙⵜⴰⵡⵀⵎⵎⴰⵏⵉⵏ ⵉ ⵓⴼⵔⴰⴳ ⵏ ⵉⵙⵓⴳⴰⵎ ⵉⴳⴰⵎⴰⵏⵏ ⴷ ⵓⵙⵎⴰⵜⵜⵉ ⵙ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵜⵣⴳⵣⴰⵡⵉⵏ.
ⵉⵙⵎⵏⵉⴷ ⵓⴽⴰⴱⴰⵕ ⵏ ⵍⵎⵖⵔⵉⴱ ⵓⵍⴰ ⵜⴰⵙⵔⵜⵉⵜ ⵏ ⵍⵎⵖⵔⵉⴱ ⴳ ⵓⴼⵔⴰⴳ ⵏ ⵡⴰⵡⵏⴰⴹ ⴷ ⵓⵙⵙⴰⵔⵓ ⴳ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ, ⴰⵢⵍⵍⵉ ⵉⴳⴰⵏ ⴰⵏⴰⵡ ⵉ ⵜⵎⵉⵣⴰⵔ ⵢⴰⴹⵏⵉⵏ ⵙⵍⴰⵡⴰⵏ ⴰⴽⴽⵯ ⵜⵉⵏ ⵉⴼⵔⵉⵇⵢⴰ, ⴰⵢⵍⵍⵉ ⵢⵉⵡⵙⵏ ⴰⴷ ⵉⵍⵉⵏ ⴽⵉⴳⴰⵏ ⵏ ⵓⵎⵎⵉⵥⵏ ⴳ ⵢⵉⴳⵔ ⵏ ⵡⴰⵡⵏⴰⴹ, ⵙ ⴽⵉⴳⴰⵏ ⵏ ⵉⵙⵏⴼⴰⵔⵏ ⴷ ⵉⵖⴰⵡⴰⵙⵏ ⵍⵍⵉ ⵜ ⵙⵎⵖⵔⵏⵉⵏ ⴳ ⵓⵙⵡⵉⵔ ⴰⴳⵔⴰⵖⵍⴰⵏ.
ⵉⵏⵇⵇⵉⵙⵏ ⵜⵜⴰⵡⵙⵎⵏⴰⴷⵏⵉⵏ ⴳ ⵜⵙⵓⵜⵍⵜ ⴰⴷ ⴳⴰⵏ ⵉⵎⵣⵡⵓⵔⴰ ⵉ ⵉⵡⴰⵏⴽⵏ ⵏ ⵜⵙⴳⴰ ⵏ ⵢⵉⵍ ⵓⵎⵍⵉⵍⴰ ⴰⵏⴰⵎⵎⴰⵙ, ⵙⵍⴰⵡⴰⵏ ⴰⴽⴽⵯ ⵜⵉⵣⵣⵉⴳⵣⵉⵏ ⵜⵉⵙⵔⵜⴰⵏⵉⵏ ⴷ ⵜⵉⵏ ⵜⵏⴼⵔⵓⵜ ⵍⵍⴰⵏⵉⵏ ⴳ ⵜⵙⴳⴰ ⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ ⴷ ⵍⵇⴱⵍⵜ ⵜⴰⵏⴰⵎⵎⴰⵙⵜ, ⴷ ⵓⵙⴷⵓⴷⴷⵓⵢ ⴷ ⵓⵎⵢⴰⵡⴰⵙ ⴰⴷⵎⵙⴰⵏ ⴷ ⵜⵖⵉⵙⵜ ⵜⴰⵎⴳⵓⵔⴰⵏⵜ ⴷ ⵓⵙⵏⴼⵍ ⵏ ⵓⵏⵣⵡⵉ ⴷ ⵓⵙⵎⵓⵜⵜⵉ ⴰⵥⴹⴰⵕⴰⵏ.