ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵡⴰⵙⵙ ⵏ ⵜⵖⵔⵉ ⵙ ⵜⵎⵍⴷⴰ ⵏ ⵓⵙⴼⵓⴳⵍⵓ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵜⵎⵖⴰⵔⵜ ⴼ: “ⴰⵙⵍⴳⵏ ⵏ ⵜⵓⵡⵊⴰ ⴷ ⵓⵙⴽⵔ ⵏ ⵢⵉⵙⴽⵉⵍ”

ⵎⴰⵙⵙⴰ ⵜⴰⴳⵯⵏⵙⴰⵙⵜ ⵏ ⵜⵎⵜⵜⴰ ⵎⵓⵏⵏⵉⵏ ⵉ ⵜⵎⵖⴰⵔⵜ ⴳ ⵍⵎⵖⵔⵉⴱ

ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵍⵎⵖⵔⵉⴱ

ⵎⴰⵙⵙⴰ ⵜⴰⴳⵯⵏⵙⴰⵙⵜ ⵏ ⵜⵎⵔⵙⵍⵜ ⵏ ⵡⵉⵙⵜⵎⵉⵏⵙⵜⵔ ⵉ ⵜⴷⵉⵎⵓⵇⵔⴰⵟⵉⵜ

ⵉⵙⵜ ⵎⴰⵙⵙⴰ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵉⴷ ⵎⴰⵙⵙ ⵉⴱⵕⵍⴰⵎⴰⵏⵉⵢⵏ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⴰⴳⴷⵓⴷ ⵉⵃⴰⴹⵕⵏ

ⴰⵔ ⵏⵙⴼⵓⴳⵍⵓ ⴰⵙⵙ ⴰⴷ, ⴰⵎ ⵉⵡⴰⵏⴽⵏ ⵏ ⵓⵎⴰⴹⴰⵍ, ⴰⵙⵙ ⴰⵎⴰⴹⵍⴰⵏ ⵏ ⵜⵎⵖⴰⵔⵜ ⵉⵎⵙⴰⵙⴰⵏ ⴷ ⵡⵉⵙ ⵜⴰⵎ ⵡⵓⵙⵙⴰⵏ ⴳ ⵎⴰⵕⵙ ⴳ ⴽⵔⴰⵢⴳⴰⵜ ⴰⵙⴳⴳⵯⴰⵙ, ⴰⵙⴼⵓⴳⵍⵓ ⴰⴷ ⵉⴳⴰ ⴰⵙⵔⵙ ⴰⵙⴳⴳⵯⵙⴰⵏ ⵏ ⵓⵙⴷⵓⵙ ⵏ ⵜⵣⵣⵉⴳⵣⵜ ⵍⵍⵉ ⵏⵙⴽⵔ ⴳ ⵢⵉⴳⵔ ⵏ ⵜⵙⵔⵜⴰⵢ ⵚⴰⵃⴰⵏⵉⵏ ⵉ ⵉⵣⵔⴼⴰⵏ ⵏ ⵜⵎⵖⴰⵔⵜ ⴷ ⵓⵙⴱⴷⴷⵉ ⵏ ⵓⵙⵏⵓⵃⵢⵓ ⵊⴰⵔ ⵜⵉⵎⵖⴰⵔⵉⵏ ⴷ ⵉⵔⴳⴰⵣⵏ, ⴷ ⵓⴱⴷⴷⴰⴷ ⴼ ⵜⵏⴰⵥⴰⵕⵉⵏ ⵍⵍⵉ ⴷ ⵉⵇⵇⴰⵏ ⵡⴰⵍⴰⵢ ⵉ ⵓⵙⴽⵔ ⵏ ⵢⵉⵙⴽⵉⵍ ⴳ ⵉⵣⵔⴼⴰⵏ ⵊⴰⵔ ⵡⴰⵡⵜⵎ ⴷ ⵜⴰⵡⵜⵎⵜ.

ⵏⵙⵜⵉ ⴳ ⵓⵙⵇⵇⵉⵎ ⵏ ⵉⵎⵢⵔⴰ ⴰⴷ ⵏⵎⴹⴰⴽⴰⵕ ⴼ ⵉⵣⵔⴼⴰⵏ ⵉⵏⴼⴳⴰⵏⵏ ⵏ ⵜⵎⵖⴰⵔⵉⵏ, ⵓⵔ ⴷ ⵖⴰⵙ ⴳ ⵜⵎⵍⴷⴰ ⴰⴷ ⵜⴰⵙⴳⴳⵯⵙⴰⵏⵜ, ⵎⴰⵛ ⴳ ⵎⴰⴷ ⵉⵍⴰ ⵓⵙⴳⴳⵯⴰⵙ ⵙ ⵜⵖⴰⵔⴰⵙⵜ ⵉⵙⵓⵍⵏ, ⵙ ⵓⵙⵡⴰⵍⴰ ⴰⵙⵜⵔⴰⵜⵉⵊⵉ ⵉⵡⴰⵜⵙⵙⵏ ⴰⵙⵎⵔⵙⵍ ⵏ ⵜⵎⵙⴰⵔⵉⵏ ⵏ ⵢⵉⵙⴽⵉⵍ ⴷ ⵜⵏⴳⴰⴷⴷⴰⵢⵜ ⵍⵍⵉ ⵉⵜⵜⵓⵙⴽⴰⵔⵏ ⵙ ⵙⵉⵏ ⵉⴽⵛⵓⵎⵏ: ⴰⴽⵛⵓⵎ ⵓⵍⴳⵉⵏ, ⵍⵍⵉⵖ ⵜⵜⵓⵥⵍⴰⵢ ⵜⴳⴳⵓⵔⵜ ⵉⵙⵎⴷⵏ ⵉ ⵢⵉⵙⴽⵉⵍ ⴷ ⵜⵏⴳⴰⴷⴷⴰⵢⵜ ⴳ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ, ⴷ ⵓⴽⵛⵓⵎ ⵏ ⵜⵡⵓⵔⵉ ⵙ ⵓⵙⴽⵔ ⵏ ⵜⵡⵓⵔⵉⵡⵉⵏ ⵜⵉⴷⵙⵜⴰⵔⵉⵏ ⵏ ⵓⴱⵕⵍⴰⵎⴰⵏ ⴳ ⵓⵣⵣⵔⴰⴼ ⴷ ⵜⵉⴹⴰⴼ ⴷ ⵓⵙⵓⵜⴳ, ⵖⵎⴽ ⴰⵏⵏ ⴷ ⵓⵙⴽⵔ ⵏ ⵜⵔⴰⴱⴱⵓⵜ ⵜⴰⴷⴳⵓⵎⴰⵏⵜ ⵜⴰⵎⵙⵉⴽⵓⴷⵜ ⵉ ⵢⵉⵙⴽⵉⵍ ⴷ ⵜⵏⴳⴰⴷⴷⴰⵢⵜ, ⴳ ⵍⵍⴰⵏⵜ ⵜⵎⵓⵔⴰ ⴷ ⵉⵎⵓⵔⴰ ⵙⴳ ⵎⴰⵕⵕⴰ ⵜⵉⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⵏⵙⵔⵙ ⴰⵖⴰⵡⴰⵙ ⴳ ⵉⵍⵍⴰ ⵓⵏⴰⵔⵓⵣ , ⵃⵎⴰ ⴰⴷ ⵏⴷⵔⵓ ⴰⴽⴷ ⵎⴰⵕⵕⴰ ⵎⵙⴽⴰⵔⵏ ⵉⵎⵔⵙⵍⴰⵏⵏ ⴷ ⵡⴰⵎⵓⵏ ⴰⵖⵔⵎⴰⵏ ⴷ ⵓⵎⴰⵙⵙⴰⵏ ⵉ ⵓⵣⵓⵛⵛⵍ ⵏ ⵓⵙⴽⵔ ⵏ ⵢⵉⵙⴽⵉⵍ ⵊⴰⵔ ⵡⴰⵡⵜⵎ ⴷ ⵜⵓⵡⵜⵎⵜ ⴳ ⵜⵎⴰⵣⵉⵔⵜ ⵏⵏⵖ . ⵙ ⵜⵔⴰⴱⴱⵓⵜ ⴰⴷ, ⵏⵡⴰⵜⵜⵙ, ⵜⵉⵡⵉⵣⵉ ⴳ ⵜⵓⴳⴳⵯⴰⵙ ⵜⵉⵏⴰⵎⵓⵔⵉⵏ ⵉ ⵓⵙⴷⵓⵙ ⵏ ⵢⵉⵙⴽⵉⵍ ⵊⴰⵔ ⵡⴰⵡⵜⵎ ⴷ ⵜⴰⵡⵜⵎⵜ , ⵙ ⵜⵙⵓⵎⵔⵜ ⴷ ⵓⵙⵏⴰⵍ ⴷ ⵓⵙⴷⵓⵙ ⵏ ⵓⵎⵎⵉⵥⵏ ⵏ ⵜⵎⵖⴰⵔⵉⵏ ⴳ ⵎⴰⵕⵕⴰ ⵉⴳⵔⴰⵏ, ⴷ ⵓⵙⴷⵓⵙ ⵏⵏⵙⵏ  ⴳ ⵡⴰⵎⵎⴰⵙⵏ ⵏ ⵜⵖⵜⴰⵙⵜ, ⴷ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵜⵡⵓⵔⵉ ⵉⵛⵛⴰⵔⵏ ⴰⴽⴷ ⵜⵉⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⴷ ⵓⵣⵔⴼⴰⵏ ⴷ ⵓⵙⵔⵜⴰⵏ ⵉ ⵓⵙⵎⵖⵔ ⵏ ⵉⵙⵓⵔⵙⵏ ⵏ ⵜⵎⵖⴰⵔⵜ, ⴷ ⵓⵙⴽⵔ ⴷ ⵓⵙⵎⵖⵔ ⵏ ⵜⵣⴷⴰⵢⵉⵏ ⵜⵉⵎⴷⵔⴰⵡⵉⵏ ⴰⴽⴷ ⵜⵉⵎⵔⵙⴰⵍ ⵙⵡⵓⵔⵉⵏⵉⵏ ⴳ ⵓⵏⴳⵔⴰⵡ ⴰⴳⵔⴰⵖⵍⴰⵏ ⴷ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⴷ ⵓⵍⵜⴰⵖ ⴳ ⵓⵙⴰⵡⵓⵔ ⵏ ⵓⵎⵓⴽⵏ ⵍⵍⵉ ⵉⵕⵥⵎ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵃⴼⴹ ⵕⴱⴱⵉ ⵉ ⵓⵣⵣⵔⴰⵢ ⵏ ⵓⵍⵓⴳⵏ ⵏ ⵜⵓⵡⵊⴰ, ⵉ ⵓⵙⴷⵓⵙ ⵏ ⵓⵎⴹⴰⴽⴰⵕ ⴰⴱⵕⵍⴰⵎⴰⵏⵉ ⴼ ⵢⵉⵙⴽⵉⵍ ⵊⴰⵔ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⴳ ⵉⵣⵔⴼⴰⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵍⵙⴰⵏⵏ ⴷ ⵉⵡⵏⴹⴰⵏⵏ, ⵔⴰⴷ ⵢⴰⵉⵍⵉ ⵓⵙⴼⵓⴳⵍⵓ ⵏ ⵡⴰⵙⵙ ⴰⴷ ⴰⵎⴰⴹⵍⴰⵏ ⵙ ⵓⵎⴹⴰⴽⴰⵕ ⵏ ⵜⵎⵙⴰⵔⵉⵏ ⵏ ⵢⵉⵙⵉⴽⵉⵍ ⵙ ⵓⴽⵛⵓⵎ ⵏ ⵓⵍⵓⴳⵏ ⵏ ⵜⵓⵡⵊⴰ, ⵍⵍⵉ ⵉⴳⴰ ⵓⵙⵏⵜⵍ ⴰⴷ ⴰⵎⴰⵢⵏⵓ ⵉⵟⵟⴰⴼⵏ ⴰⵜⵉⴳ ⵏⵏⵙ, ⴷ ⵓⵎⵙⴰⵙⴰ ⵏⵏⵙ ⴰⴽⴷ ⴰⵎⴹⴽⴰⵕ ⴰⵎⴰⵜⴰⵢ ⴷⴰⵔ ⵓⵎⵏⴰⴷ ⴰⵏⴰⵎⵓⵔ ⴰⵎⴰⵜⴰⵢ, ⴷ ⵓⵙⵎⵍ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵏ ⵜⴳⵔⴰⵡⵜ ⵏ ⵓⵣⵣⵔⴰⵢ ⵏ ⵓⵍⵓⴳⵏ ⵏ ⵜⵓⵡⵊⴰ, ⵔⴰⴷ ⵉⴳ ⵡⴰⵙⵙ ⴰⴷ ⵏ ⵜⵖⵔⵉ ⵍⵍⵉ ⵔⴰⴷ ⵢⵉⵍⵉ ⴼ: “ⴰⵍⵓⴳⵏ ⵏ ⵜⵓⵡⵊⴰ ⴷ ⵉⴽⵛⵓⵎⵏ ⵏ ⵓⵙⴽⵔ ⵏ ⵢⵉⵙⴽⵉⵍ”, ⵜⴰⵎⵍⴷⴰ ⵏ ⵓⴷⵔⴰⵡ ⵏ ⵜⴰⵏⵏⴰⵢⵢⵉⵏ ⵅⴼ ⵓⵙⴰⵡⵓⵔ ⴰⴷ ⴰⵣⵣⵔⴰⴼ ⵉⵙⵜⴰⵡⵀⵎⵎⴰⵏ, ⵉⵟⵟⴰⴼⵏ ⴰⵜⵉⴳ ⴰⵅⴰⵜⴰⵔ ⵙ ⵉⵎⵏⴰⴷⵏ ⵏⵏⵙ ⵉⵣⵔⴼⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ ⴷ ⵡⵉⵏ ⵡⴰⵜⵉⴳ , ⴷ ⵓⵙⴽⵯⵜⵉ ⵏ ⵉⵙⵡⴰⵍⴰⵢⵏ ⵉⴳⵍⴷⴰⵏⵏ ⵉ ⵓⵣⵣⵔⴰⵢ ⵏ ⵓⵍⵓⴳⵏ ⵏ ⵜⵓⵡⵊⴰ: “ⴳ ⵓⵙⴰⵜⵉ ⵏ ⵉⵡⵜⵜⴰⵙ ⵏ ⵍⵉⵙⵍⴰⵎ, ⴷ ⵜⵥⵍⴰⵢⵉⵏ ⵏ ⵡⴰⵎⵓⵏ ⴰⵎⵖⵔⵉⴱⵉ, ⴷ ⵓⵙⵖⵣⵏ ⵏ ⵢⵉⵙⴽⵉⵍ ⴷ ⵜⵡⵓⵔⵉ ⵉⵏⵏⵓⵕⵥⵎⵏ, ⴷ ⵓⵎⵛⴰⵡⴰⵕ ⴷ ⵓⵎⵙⴰⵡⴰⵍ, ⴷ ⵓⵙⴷⵔⴰⵡ ⵏ ⵜⵎⵔⵙⴰⵍ ⴷ ⵉⵎⵙⴽⴰⵔⵏ ⵉⵎⵏⵜⴰⵢⵏ” . ⴳⴰⵏ ⵉⵙⵡⴰⵍⴰⵢⵏ ⴰⴷ ⵉⴳⵍⴷⴰⵏⵏ ⵉⵎⴰⵜⵜⵓⵢⵏ ⵜⴰⴽⴰⵕⴹⴰ ⵏ ⵓⴱⵔⵉⴷ ⴷ ⵓⵙⴰⵖⵓⵍ ⵉ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⴷ ⵡⴰⵔⵔⴰⵡ ⴷ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⴷ ⵓⵙⵕⵚⵓ ⵏ ⵢⵉⵙⴽⵉⵍ ⵊⴰⵔ ⵓⵔⴳⴰⵣ ⴷ ⵜⵎⵖⴰⵔⵜ ⴳ ⵓⵙⴰⵜⵉ ⵏ ⵢⵓⵡⵊⴰ ⵉ ⵓⴼⵔⴰⴳ ⵏ ⵜⵏⴰⴼⵓⵜ ⵜⴰⵎⴰⵜⵜⵓⵢⵜ ⵏ ⵡⴰⵔⵔⴰⵡ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉ ⵓⵍⵓⴳⵏ ⵏ ⵜⵓⵡⵊⴰ ⴰⵅⵎⵎⴻⵎ ⵉⵥⵍⵉⵏ, ⵉⴱⴷⴷ ⴱⴰⴱ ⵏ ⵡⴰⴷⴷⵓⵔ ⵙⴳ ⵎⴰⴷ ⵉⵍⵍⴰ ⴷ ⵓⴷⴰⴱⵓ ⵏ ⵉⵎⵣⵓⵡⵔⴰ ⵏⵏⵙ ⴼ ⵓⵙⴷⴷⵉⴷ ⴼ ⵡⴰⵜⵉⴳ ⵏ ⵜⵓⵡⵊⴰ ⴷ ⵜⴰⵔⵙⵍⵜ ⵜⴰⵙⵉⵍⴰⵏⵜ ⵉ ⵡⴰⵎⵓⵏ, ⵉⵙⴷⴷⵉⴷ ⴳ ⴽⵉⴳⴰⵏ ⵏ ⵜⵎⵍⴷⴰ ⴼ ⵡⴰⵜⵉⴳⵏ ⵉⴷⵙⵍⴰⵏⵏ ⵍⵍⵉ ⴷ ⵉⵇⵇⴰⵏ ⵓⵙⵖⵣⵏ ⴳ ⵓⵙⴰⵜⵉ ⵏ ⵜⵣⴷⴰⵢⵉⵏ ⴳ ⵓⴳⵯⵏⵙ ⵏ ⵜⵓⵡⵊⴰ, ⴳ ⵜⵣⵡⵉⵔⵉ ⴰⴷⴷⵓⵔ ⵏ ⵜⵎⵖⴰⵔⵜ, ⵉⵖⵔ ⴱⴰⴱ ⵏ ⵡⴰⴷⴷⵓⵔ, ⴳ ⵓⵙⴳⴳⵯⴰⵙ ⵏ 2003, ⵉ ⵜⵙⵇⵇⵉⵎⵜ ⵉⵜⵜⵓⵙⵎⴰⴳⴰⵍⵏ ⵙ ⵓⵣⵣⵔⴰⵢ ⵏ ⵓⵙⵍⴳⵏ ⵏ ⵜⵓⵡⵊⴰ ⵉ “ⵜⵉⵍⵉⵜ ⵏ ⵜⵉⵔⵔⴰ ⵜⴰⵎⴰⵢⵏⵓⵜ ⴳ ⵓⵎⵔⴰⵙ ⵏ ⵉⵔⵎⵎⵓⵙⵏ ⴳⴰⵏⵉⵏ ⵎⴳⴰⵍ ⵏ ⵡⴰⴷⴷⵓⵔ ⴷ ⵜⵏⴼⴳⴰⵏⵜ ⵏ ⵜⵎⵖⴰⵔⵜ”.

ⴰⵅⵎⵎⴻⵎ ⴰⴷ ⴰⴳⵍⴷⴰⵏ ⴰⴷ ⵢⵉⵡⵉⵏ ⵜⴰⵥⵕⵉⴳⵜ ⵏ ⵓⵙⵍⴳⵏ ⴰⵜⵔⴰⵔ ⴳ 2004, ⵜⵎⵍⴰ ⵜⴰⵣⵣⵉⴳⵣⵜ ⵏⵏⵙ ⴳ ⵓⵙⵡⵉⵔ ⵏ ⵜⴱⵔⵉⴷⵜ ⵏ ⵓⵙⵓⵊⴷ ⴷ ⵜⵓⵎⴰⵢⵜ, ⴰⵢⵍⵍⵉ ⵏⵉⵜ ⵉⴼⴰⵡⵏ ⵙ ⵜⵖⴰⵔⵙⵜ ⵉⴷⵓⵙⵏ ⵍⵍⵉ ⵉⵙⴰⵡⵍ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⵓⴽⵜⵓⵢ ⵡⵉⵙ 23 ⵏ ⴼⵓⴳⵍⴰ ⵏ ⵓⴷⴰⴱⵓ  ⵍⵍⵉⵖ ⵉⵙⴰⵡⵍ ⴼ ⵉⵡⵜⵜⴰ ⵏ ⵓⵙⵍⴳⵏ ⴰⴷ: ⵉⵖ ⵉⵙⴽⵔ ⵓⵙⵍⴳⵏ ⵏ ⵜⵓⵡⵊⴰ ⴰⵥⵎⴰⵥⵥⵍ, ⵀⴰⵜⵉ ⵖⵉⵍⴰⴷ ⵓⵔ ⵙⵓⵍ ⵜⴷⵓⵎ, ⴰⵛⴽⵓ ⵜⵉⵔⵎⵉⵜ ⵜⵎⵍⴰⴷ ⴽⵉⴳⴰⵏ ⵏ ⵜⴱⴱⴰⵢⴹⴰⵕⵉⵏ, ⵍⵍⴰⵏⵉⵏ ⴷⴰⵜ ⵏ ⵓⵙⵎⴰⴷ ⵏ ⵜⵡⴰⴷⴰ ⴰⴷ ⴷ ⵓⵙⴽⵔ ⵏ ⵉⵡⵜⵜⴰⵙ ⵏⵏⵙ”.

ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ: “ⴰⵚⴽⵓ ⵏ ⵍⵎⵖⵔⵉⴱ ⵏ ⵜⵣⵣⵉⴳⵣⵜ ⴷ ⵡⴰⴷⴷⵓⵔ, ⵍⵍⵉ ⵏⵔⴰ ⵓⵔ ⵔⴰⴷ ⵢⵉⵍⵉ ⴰⴱⵍⴰ ⵙ ⵜⵎⴷⵔⴰⵡⵜ ⵏ ⵎⴰⵕⵕⴰ ⵉⵎⵖⵔⵉⴱⵉⵢⵏ, ⵉⵔⴳⴰⵣⵏ ⴷ ⵜⵎⵖⴰⵔⵉⵏ, ⴳ ⵜⵡⵓⵔⵉ ⵏ ⵜⴳⵎⵉ”, ⴷ ⵎⴰⵙⴷ “ ⴰⵙⵉⵥⴹⵕ ⵏ ⵜⵎⵖⴰⵔⵉⵏ ⴳ ⵉⵣⵔⴼⴰⵏ ⵏⵏⵙⵏⵜ ⵓⵔ ⵉⵣⴷⵉ ⴷ ⵜⵉⴽⴽⵉ ⵏ ⵜⵎⵣⵡⴰⵔ ⵉ ⵜⵎⵖⴰⵔⵉⵏ ⴱⵍⴰ ⵡⴰⵍⵓ, ⵎⴰⵛ ⵙ ⵜⵉⴽⴽⵉ ⵏ ⵉⵣⵔⴼⴰⵏ ⵏⵏⵙⵏ ⵉⵣⵔⴼⴰⵏⵏ ⴷ ⵓⵍⴳⵉⵏⵏ. ⴳ ⵍⵎⵖⵔⵉⴱ ⵏ ⵡⴰⵙⵙ ⴰⴷ, ⵓⵔ ⴷ ⵉⵇⵇⴰⵏ ⴰⴷ ⵓⵔ ⵟⵟⵉⴼ ⵜⵎⵖⴰⵔⵜ ⵉⵣⵔⴼⴰⵏ ⵏⵏⵙ”.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵏⴱⵓⵔⵣ ⵙ ⵜⵡⴰⴷⴰ ⵏ ⵓⵎⵓⴽⵏ ⵍⵍⵉ ⵖ ⵏⵣⵣⵉⴳⵣ ⵙ ⵉⵥⵎⵓⵥⵥⴰⵍ ⴱⴷⴷⵏⵉⵏ ⴳ ⵢⵉⴳⵔ ⵏ ⵢⵉⵙⴽⵉⵍ, ⴳ ⵓⵣⵣⵔⴰⴼ ⴷ ⵉⵙⴰⵡⵓⵔⵏ ⵉⵏⴰⵎⵓⵔⵏ ⵜⵜⴰⵡⵙⴽⴰⵔⵏⵉⵏ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.

ⵙⴳ ⵉⵙⴰⵡⵓⵔⵏ ⵍⵍⵉ ⵔⴰⴷ ⵉⵟⵟⴷ ⵉⴷⵔⵉⵣⵏ ⵓⵙⵔⵉⴷⵏ ⴼ ⵓⵙⵓⵔⵙ ⵏ ⵜⵎⵖⴰⵔⵉⵏ ⴷ ⵓⵙⵉⵥⴹⵕ ⵏⵏⵙⵏⵜ ⴷ ⵓⵙⴷⵓⵙ ⵏ ⵢⵉⵙⴽⵉⵍ, ⵔⴰⴷ ⵏⴱⴷⵔ ⴰⵙⴰⵡⵓⵔ ⵏ ⵓⴼⵔⴰⴳ ⴰⵏⴰⵎⵓⵏ, ⵍⵍⵉ ⵔⴰⴷ ⵉⵔⴰⵔ ⵉ ⵉⵙⵖⴰⵡⵙⴰⵜⵏ ⵏ ⵜⵎⵖⴰⵔⵉⵏ ⴷ ⵓⵙⴱⴷⴷⵉ ⵏ ⵓⵙⵏⵓⵃⵢⵓ ⴷ ⵓⵙⵉⵜⵜⵉ ⵏⵏⵙⵏ ⴳ ⵉⴳⵔⴰⵏ ⵏ ⵜⵡⵓⵔⵉ ⴷ ⵓⴷⵡⴰⵙ. ⵔⴰⴷ ⴷⴰⵔⵙⵏⵜ ⵉⵍⵉⵏⵜ ⵓⵍⴰ ⵜⵏⵓⴼⴰ ⵜⵉⴷⵓⵙⴰⵏⵉⵏ  ⴷ ⵉⵣⵔⴼⴰⵏ ⵏⵏⵙ ⵏ ⵜⵍⴰⵍⵉⵜ, ⴰⵢⵍⵍⵉ ⵔⴰⴷ ⴰⵙⵏⵜ ⵉⴼⴽ ⵙ ⵜⵎⴹⴼⵓⵔⵜ ⴰⵙⵉⵥⴹⵕ ⴷ ⵜⵙⵉⵎⴰⵏⵜ ⵜⴰⴷⵎⵙⴰⵏⵜ, ⴷ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ  ⵏ ⵜⵎⵖⴰⵔⵉⵏ, ⵢⴰⵡⵙ ⴰⵙⵏⵜ ⴳ ⵜⵎⴷⵔⴰⵡⵜ ⴳ ⵜⵓⴷⵔⵜ ⵜⴰⵎⴰⵜⴰⵢⵜ.

ⵜⵉⵎⵍⴷⴰ ⴰⴷ ⵓⵔ ⵔⴰⴷ ⵙⵉⵃⵉⵏⵉⵜ ⵖⴰⵙ ⵉ ⵜⵎⵖⴰⵔⵜ ⵎⴰⵛ ⵉ ⵡⴰⵎⵓⵏ ⴰⴽⴽⵯ, ⴰⵛⴽⵓ ⴰⵔ ⵙⵍⴽⴰⵔⵏⵜ ⵢⴰⵏ ⵓⵙⵖⵓⴷⵓ ⵏ ⵉⵙⵖⵓⵍⵏ ⵉⵏⴰⵎⵓⵔⵏ ⴰⵎ ⴰⵙⵉⵣⴷⵔ ⵏ ⵓⵟⵟⵓⵏⵏ ⵏ ⵜⵎⵜⵜⴰⵏⵜ ⵏ ⵜⵎⵖⴰⵔⵉⵏ ⵓⵔⵓⵏⵉⵏ ⴷ ⵜⵎⵜⵜⴰⵏⵜ ⵏ ⵜⴰⵣⵣⴰⵏⵉⵏ ⵍⵓⵏⵏⵉⵏ, ⴷ ⵓⵙⴱⴷⴷⵉ ⵏ ⵍⵉⵜⵉⵀⴰⵍ ⵏ ⵜⴼⵔⵅⵉⵏ ⵍⵍⵉ ⵜⵍⵍⴰ ⵜⵎⵓⴽⵔⵉⵙⵜ ⵏ ⵉⵙⵖⴰⵡⵙⴰⵜⵏ ⵏ ⵜⵓⵡⵊⴰ ⴷ ⵓⴷⵡⴰⵙ ⴷ ⵓⵙⵍⵎⴷ, ⴷ ⵓⵙⵉⵎⵥⵉ ⵏ ⵓⵎⵣⵔⴰⵢ ⵊⴰⵔ ⵡⴰⵡⵜⵎ ⴷ ⵜⴰⵡⵜⵎⵜ ⴳ ⵢⵉⴳⵔ ⵏ ⵜⵡⵓⵔⵉ, ⴷ ⵓⵙⵖⵓⴷⵓ ⵏ ⵓⵙⵡⵉⵔ ⵏ ⵜⵓⴷⵔⵜ ⵏ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵢⵉⵏ.

ⵜⴰⵡⴰⴷ ⵏ ⵍⵎⵖⵔⵉⴱ ⵉ ⵢⵉⵙⴽⵉⵍ, ⵍⵍⵉ ⵉⵙⵙⵕⵚⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵙⴳ ⵜⵉⵍⵉⵜ ⵏⵏⵙ ⴳ ⵓⴷⴰⴱⵓ, ⵍⵍⵉ ⵉⵙⴷⵓⵙ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⵏ 2011, ⵜⴳⴰ ⵜⴰⵡⴰⴷⴰ ⵜⴰⵎⴰⵜⴰⵢⵜ ⵉ ⵎⴰⴷ ⵉⴳⴰⵏ ⴰⵣⵔⴼⴰⵏ ⴷ ⵓⵏⴰⵎⵓⵏ ⴷ ⵓⴷⵎⵙⴰⵏ ⵍⵍⵉ ⵉⴳⴰⵏ ⴰⵙⴳⵓⵎ ⵏ ⵓⴱⵓⵔⵣ ⵉ ⵎⴰⵕⵕⴰ ⵏⵏⵖ , ⵎⴰⵛ ⵉⵇⵇⴰⵏ ⴷ ⵓⵍⴰ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⵣⴷⵉⵏⵉ ⴷ ⵓⵙⴼⵔⵓ ⵏ ⵏ ⵉⴹⵕⵉⵚⵏ ⵓⵍⴳⵉⵏⵏ ⴷ ⵜⵙⵏⵙⵉ ⵏⵏⵙⵏ, ⴳⵉⵙⵏ ⴰⵙⵍⴳⵏ ⵏ ⵜⵓⵡⵊⴰ, ⵍⵍⴰⵏ ⵓⴽⴰⵏ ⵙⵓⵍ ⵜⴱⴱⴰⵢⴹⴰⵕⵉⵏ ⴷⴰⵜ ⵏ ⵜⵙⵏⵙⵉ ⵉⵥⵉⵍⵏ ⵏ ⵜⵓⵎⴰⵢⵉⵏ ⵏⵏⵙⵏⵜ, ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵍⵍⴰⵏ ⵜⵓⴳⵜ ⵏ ⵉⵙⵖⵡⴰⵏⵏ ⴷ ⵉⴷ ⴱⴰⴱ ⵏ ⵜⵣⵔⴼⵜ ⵎⴽ ⵉⵍⵍⴰⵏ ⴳ ⵉⵏⴰⵡ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ: “ⵎⴰⵙ ⵉⵥⵍⵉ ⵓⵙⵍⴳⵏ ⵏ ⵜⵓⵡⵊⴰ ⵖⴰⵙ ⵉ ⵜⵎⵖⴰⵔⵉⵏ”.

ⵉⵇⵇⴰⵏ ⴷ ⵓⵙⴽⵜⵉ ⵙ ⵓⴹⴼⵕ ⵏ ⵓⵎⵓⴽⵏ ⵏ ⵓⵙⵍⴳⵏ ⴰⴷ, ⴷ ⵓⵡⵇⵇⵔ ⵏ ⵓⴷⵎ ⴰⴷⵍⵙⴰⵏ ⴷ ⵓⵙⵎⴽⵍ ⵏ ⴳⴰⵔ ⵉⵙⵡⵉⵏⴳⵉⵎⵏ ⵅⴼ ⵓⵙⵍⴳⵏ, ⴼ ⵜⵣⴷⴰⵢⵜ ⵊⴰⵔ ⵜⵎⵖⴰⵔⵉⵏ ⴷ ⵉⵔⴳⴰⵣⵏ ⴳ ⵓⴳⵯⵏⵙ ⵏ ⵜⵓⵡⵊⴰ ⴳ ⵎⴰⵕⵕⴰ ⵉⵙⴰⵢⵔⵓⵔⵏ, ⴷ ⵜⵉⵍⴰⵍ ⵜⵉⵏⴰⵎⵓⵏⵉⵏ ⵏ ⴽⵓ ⵢⴰⵏ, ⵜⴰⵏⴰⵥⴰⵕⵜ ⴷⴰⵖ ⴷ ⵉⵇⵇⴰⵏⵏ ⴰⴽⴽⵯ ⵙ ⵜⵓⴳⴳⵯⴰⵙ ⵡⴰⵜⵜⵙⵏⵉⵏ ⴰⵙⴱⴷⴷⵉ ⵏ ⴳⴰⵔ ⵉⵡⵍⴰⴼⵏ ⵍⵍⴰⵏⵉⵏ ⴳ ⵡⴰⵎⵓⵏ, ⵙ ⵓⵙⵏⵜⵉ ⵙⴳ ⵜⴰⵡⵊⴰ ⴷ ⵜⵉⵏⵎⵍ ⴷ ⵓⵙⵏⵖⵎⵙ ⴷ ⵜⵎⵔⴰⵙⵍ ⵢⴰⴹⵏⵉⵏ ⵏ ⵜⵏⴽⵔⴰ ⵜⴰⵏⴰⵎⵓⵏⵜ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⴳ ⵜⴳⵉⵔⴰ ⵓⵔ ⴰⴷ ⵜⵜⵓⵖ ⴰⵙⵓⵜⴳ ⵏ ⵜⵓⴳⴳⵯⴰⵙ ⵏ ⵎⴰⵕⵕⴰ ⵉⵎⵙⴽⴰⵔⵏ ⵉⵏⴰⵎⵓⵔⵏ ⵉⵎⴰⴷⴷⵓⴷⵏ ⴷ ⴰⵔⵉⵎⴰⴷⴷⵓⴷⵏ, ⴷ ⵓⵙⵓⵜⴳ ⵏ ⵓⵎⵢⴰⵡⴰⵙ ⴰⴽⴷ ⵜⵉⵎⴰⴷⴷⴰⵙⵉⵏ ⵜⵉⵏⵎⵏⴰⴹⵉⵏ ⴷ ⵜⴳⵔⴰⵖⵍⴰⵏⵉⵏ, ⵍⵍⵉ ⵔⴰⴷ ⵉⵟⵟⴼ ⵜⵉⵍⴰⵍⵜ ⵜⴰⵅⴰⵜⴰⵔⵜ ⴳ ⵓⵙⵡⵉⵔ ⵏ ⵜⵉⵔⵎⵉⵜⵉⵏ ⵥⵉⵍⵏⵉⵏ ⴳ ⵎⴰⵕⵕⴰ ⵜⴰⵙⴳⴳⵉⵡⵉⵏ ⵏ ⵓⵎⴰⴹⴰⵍ , ⴷ ⵓⵙⴷⵓⵙ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴳ ⵢⵉⴳⵔ ⵏ ⵉⵙⴽⵉⵍ, ⴰⵎⵢⴰⵡⴰⵙ ⵍⵍⵉ ⵏⵙⴽⴰⵔ ⵙ ⵜⵉⵔⴰⵜ ⵏⵏⵖ ⵉⴷⵓⵙⵏ ⴳ ⵓⵙⵕⵚⵓ ⵏ ⵜⵣⴷⴰⵢⵉⵏ ⵏ ⵜⴳⵯⵎⴰⵜ ⴷ ⵜⴷⴷⵓⴽⴽⵯⵍⴰ ⴷ ⵓⵎⵢⴰⵡⴰⵙ ⴷ ⵜⵡⵉⵣⵉ ⴷ ⵜⵎⴷⵔⴰⵡⵜ, ⴷ ⵓⵙⴽⵔ ⵏ ⵜⵣⵣⵉⴳⵣⵜ ⵉⵛⵛⴰⵔⵏ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵉⵏⴼⴳⴰⵏⵏ ⵏ ⵜⵎⵖⴰⵔⵉⵏ ⴷ ⵓⵙⵎⵖⵔ ⵏⵏⵙⵏ ⴷ ⵓⵙⴱⴷⴷⵉ ⵏ ⵓⵙⵏⵓⵃⵢⵓ ⵊⴰⵔ ⵡⴰⵡⵜⵎ ⴷ ⵜⴰⵡⵜⵎⵜ.

ⴳ ⵜⴳⵉⵔⴰ, ⵙⵉⵜⵎⵖ ⴰⵎⵓⵔⵙ ⵉⵙⵎⴷⵏ ⵉ ⵡⴰⵙⵙ ⴰⴷ ⵏ ⵜⵖⵔⵉ , ⵏⴻⵏⵏⵓⵔⵣⵖ ⴰⴷ ⵉⴼⴼⵖ ⵙ ⵜⵢⴰⴼⵓⵜⵉⵏ ⴷ ⵉⵙⵖⵍⴰⴼ ⵕⵡⴰⵏⵉⵏ ⵙ ⵎⴰⴷ ⵢⵉⵡⵙⵏ ⴳ ⵓⵙⵖⵓⴷⵓ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⴳ ⵢⵉⴳⵔ ⵏ ⵓⵣⵣⵔⴰⴼ ⴰⵡⵓⵊⴰⵏ ⴷ ⵉⵣⵣⵔⴰⴼⵏ ⵢⴰⴷⵏⵉⵏ ⵣⴷⵉⵏⵉⵏ ⴷ ⵉⵣⵔⴼⴰⵏ ⵉⵏⴼⴳⴰⵏⵏ ⵏ ⵜⵎⵖⴰⵔⵜ.

         ⴰⴷ ⴷⵉⴷⵏⵖ ⵉⴱⴷⴷ ⵕⴱⴱⵉ ⴳ ⵎⴰⴳ ⵉⵍⵍⴰ ⵓⴼⵓⵍⴽⵉ ⵉ ⵜⵎⴰⵣⵉⵔⵜ ⵏⵏⵖ ⵙ ⵜⵏⴰⵔⴰ ⵉⵣⵉⵍⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ.