ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵏⵏⵓⵕⵥⵎ ⵏ ⵓⵏⵎⵓⵇⵇⴰⵔ ⴼ ⵓⵙⵓⵜⴳ ⵏ ⵉⵙⵍⴳⵏⵏ

ⵙ ⵉⵙⵎ ⵏ ⵕⴱⴱⵉ, ⵜⴰⵥⴰⵍⵍⵉⵜ ⴷ ⵓⴼⵔⴰ ⴼ ⵓⵕⵇⵇⴰⵚ ⵏⵏⵙ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⵓⵔⴰ ⴷ ⵉⵎⵛⵛⵉⵡⴰⵕ

ⵍⴰⵍ ⵏ ⵜⵓⵎⵔⵜ ⵜⴰⵎⵙⵇⴰⴷⵜ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ

ⵉⴷ ⵎⴰⵙⵙ ⵉⵎⵓⵣⴰⵢⵏ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵉⴳⴰ ⵜⵓⵎⵔⵜ ⴰⴷ ⵕⵥⵎⵖ ⴰⵏⵎⵓⵇⵇⴰⵔ ⴰⴷ ⵉⵙⴰⵡⴰⵍ ⴼ ⵉⵎⵔⵙⵉ ⵉⵍⵍⴰⵏ, ⴳ ⵓⵣⵎⵣ ⴰⴷ, ⴳ ⵉⵅⵎⵎⵉⵎⵏ ⵏ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ, ⴷ ⵉⵎⴷⵔⴰⵡⵏ ⴳ ⵜⵖⴰⵡⵙⴰ ⵜⴰⴷⵉⵎⵓⵇⵔⴰⵟⵉⵜ ⴷ ⵉⴽⴰⴷⵉⵎⵉⵢⵏ ⴷ ⵜⵎⵔⵙⴰⵍ ⵏ ⵓⵔⵣⵣⵓ. ⵉⴳⴰ, ⵎⴽ ⵍⵍⵉ ⵜⵙⵙⵏⵎ, ⵡⵉⵏ ⵓⵙⵓⵜⴳ ⵏ ⵓⵣⵣⴳⵉⵔ ⵏ ⵉⵙⵍⴳⵏⵏ ⴷ ⵓⵙⵖⵍ ⵏ ⵓⴷⵔⵉⵣ ⵏⵏⵙⵏ ⴼ ⵡⴰⵎⵓⵏⵏ.

ⴳ ⵜⵣⵡⵉⵔⵉ, ⴷⴰ ⵙⵓⵜⴳⵖ ⵜⴰⵎⴰⴷⵔⴰⵡⵜ ⵉⵍⵍⴰⵏ ⵊⴰⵔ ⵜⴰⵎⵓⵏⵜ ⵏ ⵓⵕⵓⴱⴱⴰ ⴷ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵙⵏⴰⵍ ⵏ ⵜⴷⵉⵎⵓⵇⵔⴰⵟⵉⵜ ⴷ ⵓⵙⵔⵅⵓ ⵏ ⵉⵙⵏⴼⵍⵏ ⴷ ⵓⵎⵙⴰⵡⴰⵍ ⵊⴰⵔ ⵓⵙⵇⵇⵉⵎ ⵏⵏⵖ ⴷ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵜⵉⵏⴰⵎⵓⵔⵉⵏ ⵏ ⵓⵕⵓⴱⴱⴰ ⵎⴽ ⵉⴳⴰ ⵓⵙⵏⴼⴰⵔ ⵏ ⵜⴳⵯⵎⴰⵏⵜ ⵡⵉⵙ ⵙⵉⵏ ⵎⵓ ⵉⵍⵍⴰ ⵓⵣⵣⴳⵉⵔ ⵏⵏⵙ ⵖⵉⵍⴰⴷ.

ⴰⵔ ⵙⵓⵜⴳⵖ ⵓⵍⴰ ⵜⴰⵎⴷⵔⴰⵡⵜ ⵊⴰⵔ ⵓⵙⵇⵇⵉⵎ ⴷ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ, ⵉⵡⴰⵜⵜⵙⵏ ⴰⵙⵔⵖⵓ ⵏ ⵓⵙⵙⵏ ⵉⵜⵜⵓⵙⵏⴼⴰⵍⵏ ⵏ ⵜⵎⵙⴽⴰⵔ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵓⵙⴽⵔ ⵏ ⵜⵎⴷⵔⴰⵡⵜ ⴷ ⵓⵎⵙⴰⵡⴰⵍ ⴰⵙⵔⵜⴰⵏ ⴰⵎⵔⵙⵍⴰⵏ ⵊⴰⵔ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴷ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵔⵓⴱⴱⴰ, ⴳ ⵓⵙⴰⵜⵉ ⵏ ⵓⴷⵓⵙⵜⵓⵔ ⵏ 2011, ⴷ ⵓⵙⵔⵙ ⵏ “ⵓⵎⴷⵔⴰⵡ ⵉ ⵜⴷⵉⵎⵓⵇⵔⴰⵟⵉⵜ” ⵍⵍⵉ ⵉⵟⵟⴰⴼ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴳ ⵜⵙⵎⵓⵏⵜ ⴰⴷ.

ⵙ ⵜⵎⵍⴷⴰ ⴰⴷ, ⵏⴻⵏⵏⵓⵔ ⴰⵙⵓⵔⵙ ⴱⴰⵀⵔⴰ ⵉⵣⵣⵉⴳⵣⵏ ⴷ ⵜⵎⴷⵔⴰⵡⵜ ⵉⴷⵔⴰⵏ ⴷ ⵜⵎⵙⵎⵓⵏⵜ ⵜⴰⴷ ⵜⴰⴱⵕⵍⴰⵎⴰⵏⵉⵜ ⴷ ⵓⵙⵇⵇⵉⵎ ⵏ ⵓⵕⵓⴱⴱⴰ ⵙ ⵓⵎⴰⵜⴰ, ⵉ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏⵏⵖ ⴷ ⵓⵙⵓⵜⴳ ⵏ ⵎⴰⴷ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⴳ ⵜⵉⵏⵡⵉⵜ ⵜⴰⴷⵉⵎⵓⵇⵔⴰⵟⵉⵜ ⴷ ⵜⵎⵔⵙⵍⴰⵏⵜ, ⵎⴽ ⵍⵍⵉ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⴳ ⵜⴱⵔⴰⵜ ⵏⵏⵙ ⵜⴰⵎⴰⵜⵜⵓⵢⵜ ⵉ ⵉⴳⵎⴰⵎⴰⵏ ⵏ ⵓⴱⵕⵍⴰⵎⴰⵏ ⵙ ⵜⵎⵍⴷⴰ ⵏ ⵓⵙⴼⵓⴳⵍⵓ ⵏ ⵓⴽⵜⵓⵢ ⵡⵉⵙ 60 ⵏ ⵓⴱⵕⵍⴰⵎⴰⵏ ⵉⵣⵡⴰⵔⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ.

ⵔⴰⴷ ⵉⴳ ⵓⵙⵎⵖⵔ ⵏ ⵜⵎⴷⵔⴰⵡⵜ ⵊⴰⵔ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴷ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ, ⴰⵙⵓⵜⴳ ⵏ ⵉⵎⵓⴽⵏⵏ ⵉⵅⴰⵜⴰⵔⵏ ⵉⵎⵔⵙⵍⴰⵏⵏ ⵍⵍⵉ ⵜⵙⴽⴰⵔ ⵜⴳⵍⴷⵉⵜ, ⴷ ⵓⵙⴷⵓⵙ ⵏ ⵓⴷⵖⴰⵔ ⵏⵏⵙ ⴰⵏⵎⵏⴰⴷ ⴷ ⵓⴳⵔⴰⵖⵍⴰⵏ .

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵎⴽ ⵍⵍⵉ ⵜⵙⵙⵏⵎ, ⴰⴷⵓⵙⵜⵓⵔ ⵏ 2011, ⵢⵉⵡⵉ ⴷ ⵉⵎⵓⴽⵏⵏ ⵉⵅⴰⵜⴰⵔⵏ, ⵉⵙⴽⵔ ⵜⵉⴷⵉⵏⴰⵎⵉⵜⵉⵏ ⴳ ⵎⴰⵕⵕⴰ ⵉⴳⵔⴰⵏ, ⵉⵙⴰⵜⵉ ⵜⵉⵍⵉⵜ ⵏ ⵉⵣⵔⴼⴰⵏ, ⵉⵙⵎⵖⵔ ⵉⴳⵔ ⵏ ⵓⵙⵍⴳⵏ, ⴷ ⵉⵎⵓⴽⵏⵏ ⵏ ⵓⴱⵕⵍⴰⵎⴰⵏ, ⵢⵉⵡⵉ ⴷ ⴰⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵉ ⵜⵥⵍⴰⵢⵉⵏ ⵏ ⵓⴱⵕⵍⴰⵎⴰⵏ.

ⵉⴳⴰ ⵍⵃⴰⵍⴰ ⴰⵎⵓⴽⵏ ⴰⵏⴰⵎⵎⴰⵙ ⵉ ⵓⵙⴷⵓⵙ ⵏ ⵜⵎⵙⴽⵔⵜ ⵜⴰⴷⵉⵎⵓⵇⵔⴰⵟⵉⵜ ⴷ ⵓⵡⴰⵏⴽ ⵏ ⵓⵣⵔⴼ ⴷ ⵜⵎⵔⵙⴰⵍ ⴷ ⵜⵏⵏⵓⴱⴹⴰ ⵉⵥⵉⵍⵏ  ⴷ ⵓⵣⵣⴳⵉⵔ ⵏⵏⵙ, ⵉⵎⵎⴰⵖ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⵓⵙⵓⵊⴷ ⴷ ⵓⵣⵓⵣⵣⵔ ⵏ ⵓⵙⴰⵜⵉ ⴰⵙⵖⵓⵍⴰⵏ ⵉ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵉⵏ, ⴰⵢⵍⵍⵉ ⵉⴳⴰⵏ ⵙⴳ ⵜⵙⵏⵜⴰⵢⵉⵏ ⵜⵉⵎⵣⵡⵓⵔⴰ ⴳ ⵓⵙⵡⵉⵔ ⴰⴳⵔⴰⵖⵍⴰⵏ ⴷ ⵓⵎⴰⵏⴰⵔ ⴰⵙⵖⵓⵍⴰⵏ ⵉ ⵓⵙⴽⵔ ⵏ ⵓⵙⵓⵜⴳ ⵙ ⵉⵙⵖⵍⵏ ⴷ ⵉⵍⵓⴳⵏ ⵙⵇⵇⴰⵇⵏⵉⵏ.

ⴷⴼⴼⵉⵔ ⴽⴽⵓⵥⵜ ⵜⵡⵓⵔⵉⵡⵉⵏ ⵏ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⵊⴰⵔ 2015 ⴷ 2021, ⵏⵕⵥⵎ ⴳ ⵜⵡⴰⵍⴰ ⵜⴰⵣⵣⵔⴰⴼⵜ ⵏ ⵖⵉⵍⴰⴷ, ⵚⴹⵉⵚⵜ ⵜⵡⵓⵔⵉⵡⵉⵏ ⵏ ⵓⵙⵓⵜⴳ, ⴳⵉⵙⵏⵜ ⴰⵙⵓⵜⴳ ⵏ ⵜⴼⴰⴷⵉⵡⵉⵏ ⴷ ⵜⵎⵏⵜⵍⵉⵏ ⵏ ⵓⵣⵣⴳⵉⵔ ⵏ ⵓⵙⵍⴳⵏ 103.13 ⵉⵣⴷⵉⵏ ⴷ ⵓⵙⴱⴷⴷⵉ ⵏ ⵜⴽⵕⴷⵉ ⵎⴳⴰⵍ ⵏ ⵜⵎⵖⴰⵔⵉⵏ, ⵍⵍⵉ ⵉⵟⵟⴰⴼⵏ ⴰⵜⵉⴳ ⵏⵏⵙ ⴷ ⵜⵏⴰⵥⴰⵕⵉⵏ ⵏⵏⵙ ⵣⴷⵉⵏⵉⵏ ⴷ ⵡⴰⵎⵓⵏ ⴷ ⵉⵣⵔⴼⴰⵏ ⴷ ⵜⴷⵉⵎⵇⵓⵔⴰⵟⵉⵜ.

ⵙ ⵉⵣⵡⴰⵔ, ⵙⵙⵓⵔⴼⴰⵜ ⵉⵢⵉ ⴰⴷ ⵙⴰⵡⵍⵖ ⴼ ⵓⵎⵏⴰⴷ ⵏ ⵓⵙⵓⵜⴳ ⵏ ⵜⵙⵏⵙⵉ ⵏ ⵓⵙⵍⴳⵏ ⴰⴷ, ⴰⴷ ⴷⵉⴷⵓⵏ ⴷⵔⵓⵖ ⴽⵔⴰ ⵙⴳ ⵜⵏⴰⵥⴰⵕⵉⵏ ⵏ ⵓⵙⵓⵜⴳ ⵏ ⵜⵙⵏⵙⵉ ⵏ ⵉⵙⵍⴳⵏⵏ ⴷ ⵡⴰⵡⵜⵜⴰⵙⵏ ⵏⵏⵙ.

ⵉⴳⴰ ⵍⵃⴰⵍ ⵜⵉⵎⵙⴽⵔⵜ ⵖ ⵎⵎⴰⵇⵇⴰⵔⵏⵜ ⵜⵎⵥⵍⴰⵢ ⴳⴰⵏⵉⵏ ⴽⵕⴰⴹⵜ ⵏ ⵉⴱⵕⵍⴰⵎⴰⵏⵏ: ⴰⵣⵣⵔⴰⴼ ⴷ ⵜⵉⴹⴰⴼ ⵏ ⵜⵏⴱⴰⴹⵜ, ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵉⵖ ⵏⵙⵔⵙ ⵜⵉⵙⵏⵙⵉ ⵏ ⴽⵔⴰ ⵏ ⵓⵙⵍⴳⵏ ⴷⴰⵜ ⵏ ⵓⵙⵓⵜⴳ, ⴰⵔ ⵜ ⵏⵙⴽⴰⵔ ⵉ ⵓⵙⵖⵓⴷⵓ ⵏⵏⵙ ⵙ ⵜⵖⴰⵔⴰⵙⵜ ⵜⴰⴳⵣⵎⴰⵏⵜ ⵏⵖ ⵜⴰⵎⴰⵜⴰⵢⵜ. ⴷⴰⵜ ⵏⵏⵙ, ⵉⴳⴰ ⵓⵙⵇⵙⵉ ⵏ ⵜⵏⴱⴰⴹⵜ ⵅⴼ ⵓⵣⵣⴳⵉⵔ ⴷ ⵜⵎⵏⵜⵍⵉⵏ ⵏⵏⵙ ⴷ ⵜⵉⵕⵡⵉ ⵏⵏⵙ ⴷ ⵜⵢⴰⴼⵓⵜ ⵏⵏⵙ, ⵙⴳ ⵜⵉⵏⴱⴰⴹⵉⵏ ⵍⵍⵉ ⵙⴽⴰⵔⵏ ⵉⴱⵕⵍⴰⵎⴰⵏ ⴳ ⵓⵙⴰⵜⵉ ⵏ ⵓⵏⵢⴰⵍⴽⴰⵎ ⴰⴽⴷ ⵜⴰⵏⴱⴰⴹⵜ ⵜⴰⵎⵣⵣⴳⴰⵔⵜ.

ⵉⵖ ⵏⵙⵔⵙ ⴽⵔⴰ ⵏ ⵓⵙⴽⴳⵏ ⵉ ⵓⵙⵓⵜⴳ, ⴷⴰ ⵜ ⵏⵙⴽⴰⵔ ⵃⵎⴰ ⴰⴷ ⵏⵙⵙⵏ ⴰⴷⵔⵉⵣ ⵏ ⵜⵙⵏⵙⵉ ⵏⵏⵙ ⴼ ⵡⴰⵍⵓⵏ ⴷ ⵓⵙⵖⵍ ⵏ ⵜⵉⵕⵡⵉ ⵏⵏⵙ, ⴷ ⵓⵎⵙⴰⵙⴰ ⵏ ⵉⵎⵏⵜⴰⵢⵏ ⵙ ⵓⵣⵣⴳⵉⵔ ⵏⵏⵙ ⴷ ⵎⴰⵙ ⵉⵙⴱⴷⴷⵏ ⵉⵡⵜⵜⴰⵙⵏ ⵏⵏⵙ. ⵙ ⵖⵎⴽ ⴰⵏⵏ, ⵥⴹⴰⵕⵏ ⵉⴱⵕⵍⴰⵎⴰⵏⵏ ⴷ ⵜⵏⴱⴰⴹⵉⵏ ⴰⴷ ⵙⵡⵓⵔⵉⵏ ⵙ ⵓⴼⵔⴰⴽ ⴷ ⵜⵓⵙⵙⵏⴰ ⵙ ⵓⵏⵛⴽ ⵏ ⵓⴷⵔⵉⵣ ⵏ ⵓⵣⵣⵔⴰⴼ, ⴷ ⵜⵣⵣⵉⴳⵣⵜ ⵙ ⵓⵎⵓⴽⵏ  ⵏⵖ ⴰⵙⵏⴼⵍ, ⵙ ⵓⵙⵍⴳⵏ ⴷ ⵓⵣⵣⵔⴰⵢ ⵏ ⵜⴱⴱⴰⵢⴹⴰⵕⵉⵏ, ⴷ ⵓⵙⵓⵊⴷ ⵏ ⵉⵙⵓⴳⴰⵎ ⵉⵎⴰⵜⵜⵓⵢⵏ ⴷ ⵉⵏⴼⴳⴰⵏⵏ ⵉ ⵓⵙⴽⵔ ⵏ ⵓⵙⵍⴳⵏ ⴷ ⵓⵙⴱⴷⴷⵉ ⵏ ⵜⴱⴱⴰⵢⴹⴰⵕⵉⵏ ⴷⴰⵜ ⵏ ⵓⵣⵣⴳⵉⵔ ⵏⵏⵙ.

ⵃⵎⴰ ⴰⴷ ⵉⴳ ⵓⵙⵓⵜⴳ ⴰⵎⴳⴳⴰⵔⵓ ⵏ ⵉⵙⵍⴳⵏⵏ ⵡⴰⴷ ⵉⵕⵡⴰⵏ, ⵉⵇⵇⴰⵏ ⴷ ⴰⴷ ⵉⴳ ⵓⵙⵍⴳⵏ ⴼ ⵉⵜⵜⵓⵙⴽⴰⵜ ⵓⵙⵓⵜⴳ ⵡⴰⴷ ⵉⵍⵍⴰⵏ ⴳ ⵎⴰ ⴰⴷ ⵓⵔ ⵉⴷⵔⵓⵙⵏ ⴼ ⴽⵕⴰⴹ ⵉⵙⴳⴳⵯⴰⵙⵏ ⴷ ⴰⵙⵖⵍ ⴰⴳⵔⴰⵖⵍⴰⵏ. ⵉⵇⵇⵏ ⴷ, ⴳ ⵜⴱⵔⵉⴷⵜ ⵏ ⵓⵙⵓⵜⴳ, ⵓⴷⵔⴰⵡ ⵏ ⵉⵎⵏⵜⴰⵢⵏ  ⵙ ⵓⵙⵍⴳⵏ, ⴷ ⵉⴳⵯⵏⵙⴰⵙⵏ ⵏ ⵡⴰⵎⵓⵏ ⴰⵖⵔⵎⴰⵏ. ⴷ ⵓⵔ ⴳⵉⵏⵜ ⵖⴰⵙ ⵜⵖⵉⵎⵉⵜⵉⵏ ⵏ ⵓⵙⴼⵍⴷ ⴰⵙⴳⵓⵎ ⵉ ⵓⵙⵎⵓⵏ ⵏ ⵓⴳⴳⴰⵔ ⵏ ⵜⵎⵓⵛⴰ ⴷ ⵉⵏⵖⵎⵉⵙⵏ ⵅⴼ ⵓⵙⴽⵔ ⵏ ⵓⵙⵍⴳⵏ, ⵜⴰⵡⵓⵔⵉ ⵜⴰⵙⵉⵍⴰⵏⵜ ⵏ ⵜⵏⵏⵓⴱⴹⴰ ⵏ ⵓⵙⵓⵜⴳ. ⴰⵢⵍⵍⵉ ⵔⴰⴷ ⵢⴰⵡⵙ ⵏ ⵜⵉⵍⵉⵜ ⵏ ⵓⵅⵎⵎⴻⵎ ⵏ ⵓⵎⵏⴰⴷ ⴰⵎⴰⵜⴰⵢ ⴳ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⴷ ⵓⵙⵎⵓⵙⵙⵓ ⵏ ⵓⵙⵏⴰⵍ ⵉ ⵉⵎⵓⴽⵏⵏ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⴳ ⵓⵙⵡⵓⵔⵉ ⵉ ⵓⵙⵉⵜⵜⵉ ⵏ ⵜⵏⴰⵥⴰⵕⵉⵏ ⴷⴰⵜ ⵏ ⵜⴷⵉⵎⵓⵇⵔⴰⵟⵉⵜ ⴳ ⵜⴰⵙⵓⵜ ⵜⵉⵙ 21, ⴰⵎ ⵜⴰⵏⴰⵥⴰⵕⵜ ⵏ ⵜⵎⵏⵣⴰⵖⵉⵏ ⵏ ⵜⴰⴳⵯⵉⵜ ⵏ ⵜⵎⵔⵙⴰⵍ, ⴷ ⵡⵓⵔⵔⵉ ⵏ ⵓⵙⵖⵡⵏ ⴰⵙⵔⵜⴰⵏ ⴷ ⵜⴰⴳⵯⵉⵜ ⵏ ⵉⵙⵜⴰⵏ, ⴰⵔ ⵙⵙⴷⵓⵙⵏ ⴽⵓⴳⴰⵏ ⵏ ⵉⴱⵕⵍⴰⵎⴰⵏⵏ, ⴳ ⵏⵉⵜ ⵉⵍⵍⴰ ⵡⵉⵏ ⵍⵎⵖⵔⵉⴱ ⵜⵉⵥⵍⴰⵢⵉⵏ ⴷ ⵜⵡⵓⵔⵉⵡⵉⵏ ⵏⵏⵙ, ⵙⵍⴰⵡⴰⵏ ⴰⴽⴽⵯ ⴳ ⵓⵙⵓⵜⴳ ⴷ ⵜⵉⴹⴰⴼ ⵏ ⵜⵙⵔⵜⴰⵢ ⴷ ⵉⵖⴰⵡⴰⵙⵏ ⵉⴳⴷⵓⴷⴰⵏⵏ.

ⵓⵔ ⴳⵉⵙ ⵜⵓⵔⴷⴰ ⵎⴰⵙ ⵔⴰⴷ ⵉⴼⴽ ⵎⴰ ⴰⵏⵏ ⵓⵏⴼⵓⵙ ⴰⵎⴰⵢⵏⵓ ⵉ ⵜⵎⵙⴽⵔⵜ ⵜⴰⴷⵉⵎⵓⵇⵔⴰⵟⵉⵜ ⴷ ⵜⵎⴷⵔⴰⵡⵜ ⴷ ⵜⵎⵢⵉⵎⴰⵏⵜ ⴳ ⵜⵎⵔⵙⴰⵍ.

ⵉⵍⵍⴰ ⵓⵙⵓⵜⴳ ⵏ ⵉⵙⵍⴳⵏ ⴳ ⵓⴳⵯⵏⵙ ⵏ ⵓⵙⵡⴰⵍⴰ ⴰⴷ ⴰⵎⴰⵢⵏⵓ ⵏ ⵜⵎⵙⴽⵔⵜ ⵜⴰⴱⵕⵍⴰⵎⴰⵏⵉⵜ, ⵉⴳ ⵙⴳ ⵜⵎⵔⵙⴰⵍ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⵢⵏⵓⵜ. ⵙⴳ ⵉⴼⵓⵍⴽⵉⵜⵏ ⵏⵏⵙ ⴰⵔ ⵉⵙⵙⵔⵅⵓ ⴰⵏⵏⵓⵕⵥⵎⵏ ⵏ ⵜⴷⵉⵏⴰⵎⵉⵜⵉⵏ ⵜⵉⵎⴰⵢⵏⵓⵜⵉⵏ ⴳ ⵜⵓⴷⵔⵜ ⵜⴰⴱⵕⵍⴰⵎⴰⵏⵉⵜ ⴳ ⵜⵣⴷⴰⵢⵉⵏ ⵏⵏⵙ ⴷ ⵜⵎⵙⴰⵔⵉⵏ ⵏ ⵡⴰⵎⵓⵏ, ⴰⵔ ⴰⵖ ⵉⵎⵎⴰⵍ ⵓⵍⴰ ⵓⴷⵎⴰⵡⵏ ⵏ ⵜⴱⴱⴰⵢⴷⴰⵔⵉⵏ ⵍⵍⴰⵏⵉⵏ ⴷⴰⵜ ⵏ ⵉⵣⵣⵔⴰⴼⵏ ⵉⵏⴰⵎⵓⵔⵏ, ⵢⴰⵊⵊ ⴰⵖ ⴰⴷ ⵏⴷⵔⵓ ⴰⴽⴷ ⵉⵎⵙⴽⴰⵔⵏ ⵢⴰⴷⵏⵉⵏ ⴳ ⵓⵙⵓⵜⴳ, ⴷ ⵓⵙⵙⵏ ⵏ ⵉⵎⴰⵍ, ⴰⵢⵍⵍⵉ ⵔⴰⴷ ⵢⴰⵍⵍ ⵜⴰⵢⵢⴰⴼⵓⵜ ⵏ ⵉⵙⵍⴳⵏⵏ, ⴷ ⵜⴷⵉⵎⵓⵇⵔⴰⵟⵉⵜ ⵙ ⵓⵎⴰⵜⴰ.

ⴳ ⵓⵎⵏⴰⴷ ⴰⴷ, ⵉⴳⴰ ⵓⵙⵜⴰⵢ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵓⵙⵍⴳⵏ 103.13 ⵉⵥⵍⵉⵏ ⵙ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵉⵏ ⵃⵎⴰ ⴰⴷ ⵉⴳⴰ ⴰⵙⵏⵜⵍ ⵏ ⵓⵙⵓⵜⴳ ⵙⴳ ⵓⵙⵇⵇⵉⵎ. ⵉⴳⴰ ⴰⴹⵕⵉⵚ ⴰⵏⴰⵎⵎⴰⵙ ⴳ ⵉⵣⵣⵔⴰⴼⵏ ⵉⵏⴰⵎⵓⵔⵏ ⵉⵟⵟⴰⴼⵏ ⵜⵉⵣⵣⵉⴳⵣⵉⵏ ⵏⵏⵣ ⵜⵉⵣⵔⴼⴰⵏⵉⵏ ⴷ ⵜⵏⴰⵎⵓⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⴱⵉⴷⴰⵖⵓⵊⵉⵢⵉⵏ ⴷ ⵜⴷⵍⵙⴰⵏⵉⵏ.

ⵉⵖ ⵜⴳⴰ ⵜⴽⵕⴷⵉ ⵎⴳⴰⵍ ⵏ ⵜⵎⵖⴰⵔⵉⵏ, ⵜⵉⵎⵙⴽⵔⵜ ⵍⵍⵉ ⵉⵀⵔⵛⵏ ⴷ ⵓⵔ ⵉⵜⵜⵓⵇⴱⴰⵍⵏ ⴷ ⵜⵔⴰⵄⵉⵜ ⵎⵏⵉⴷ ⵏ ⵉⵣⵔⴼⴰⵏ ⵉⵏⴼⴳⴰⵏⵏ ⵉ ⵜⵎⵖⴰⵔⵉⵏ ⴷ ⵜⴰⵣⵣⴰⵏⵉⵏ, ⵀⴰⵜⵉ ⵉⴳⴰ ⵜⴰⵖⴰⵡⴰⵙⴰ ⵜⴰⵎⴰⴹⵍⴰⵏⵜ ⵙ ⴽⵉⴳⴰⵏ ⵏ ⵓⵖⵉⵍⵓⴼ, ⵜⵍⵍⴰ ⴳ ⵎⴰⵕⵕⴰ ⴰⵎⵓⵏⵏ ⴷ ⵜⵖⵔⵎⵉⵡⵉⵏ ⴷ ⵜⴷⵍⵙⵉⵡⵉⵏ, ⵉⵇⵇⴰⵏ ⴷ ⵓⵙⴱⴷⴷⵉ ⵏ ⵉⵥⵓⵕⴰⵏ ⵏⵏⵙ ⴷ ⵜⵎⵏⵜⵍⵉⵏ ⵏⵏⵙ ⵙⴳ ⵉⵍⵍⴰ ⵓⵥⵍⴰⴹ ⴷ ⵉⵙⵡⵉⵏⴳⵉⵎⵏ ⵉⵏⴰⵎⵓⵏⵏ.

ⵉⵍⵍⴰ ⵓⵙⵖⵣⵏ ⵏ ⵓⵙⵍⴳⵏ ⴰⴷ ⴳ ⵓⵙⴰⵜⵉ ⵏ ⵉⵎⵓⴽⵏⵏ ⵉⵣⵔⴼⴰⵏⵏ ⵍⵍⵉ ⵉⵙⵖⵣⵏ ⵍⵎⵖⵔⵉⴱ ⵙⴳ ⴰⴼⴽⴽⵓⵥ ⵏ ⵜⴰⵙⵓⵜ, ⵙⵍⴰⵡⴰⵏ ⴰⴽⴽⵯ ⵉⵎⵓⴽⵏⵏ ⵚⴰⵃⴰⵏⵉⵏ ⵉ ⵜⵎⵖⴰⵔⵉⵏ ⴷ ⵜⴰⵡⵊⵉⵡⵉⵏ ⵍⵍⵉ ⵉⴼⵔⴳ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⴰⵙⵔⵙⵓ ⵏⵏⵙ ⵉ ⵓⵙⵓⵜⴳ ⴷⴼⴼⵉⵔ ⵙⵎⵎⵓⵙ ⵉⵙⴳⴳⵯⴰⵙ, ⴰⵔ ⵉⵎⵎⴰⵍ ⵜⵉⵔⴰⵜ ⵜⴰⵎⴳⵔⵓⵜ ⵉ ⵓⵙⵖⵓⴷⵓ ⴷ ⵓⵙⴼⴰⵍⴽⵉ ⵏⵏⵙ ⵃⵎⴰ ⴰⴷ ⵉⴳ ⵡⴰⴷ ⴱⴰⵀⵔⴰ ⵉⵕⵡⴰⵏ, ⴰⵔ ⵜⵎⵎⴰⵍ ⵓⵍⴰ ⵜⵉⵔⴰⵜ ⵜⴰⵙⵔⵜⴰⵏⵜ ⴳ ⵓⵙⴱⴷⴷⵉ ⵏ ⵜⵎⵓⴽⵔⵉⵙⵜ ⴰⴷ ⵉⴳⴰⵏ ⵎⴳⴰⵍ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵡⴰⵜⵉⴳⵏ ⵉⵏⴼⴳⴰⵏⵏ ⵙ ⵜⵉⵍⵉⵜ ⵏ ⵜⵔⵙⵍⵜ ⵜⴰⵣⵔⴼⴰⵏⵜ ⵉ ⵓⵙⴱⴷⴷⵉ ⴷ ⵡⴰⵔⴰⵢ ⴷ ⵓⵙⴳⵎⵉ ⵏ ⵉⵎⵏⴳⴰⵙⵏ.

ⵎⴽ ⵍⵍⵉ ⵜⵙⵙⵏⵎ, ⵉⵎⵙⴰⵙⴰ ⵓⵙⵓⵜⴳ ⵏ ⵓⵙⵍⴳⵏ ⴰⴷ ⵙⴳ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵓⵏⵏⵓⵕⵥⵎ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴳⵍⴷⵓⵏ ⵏ ⵉⵎⵓⵎⵏⵏ ⵉ ⵓⵙⴰⵡⵓⵔ ⵏ ⵓⵣⵣⵔⴰⵢ ⵏ ⵓⵙⵍⴳⵏ ⵏ ⵜⵓⵡⵊⴰ ⴷⴼⴼⵉⵔ ⵏ ⵡⴰⴳⵏⴰⵔ ⵏ ⵙⴳⴳⵯⴰⵙⵏ, ⴷ ⵓⵙⵎⵍ ⵏ ⴱⴰⴱ ⵏ ⵡⴰⴷⴷⵓⵔ ⵏ ⵜⴳⵔⴰⵡⵜ ⵍⵍⵉ ⵔⴰⴷ ⵉⵙⵔⵙ ⵉⵙⵡⵉⵏⴳⵉⵎⵏ ⵏ ⵓⵣⵣⵔⴰⵢ ⵉ ⵓⵙⵉⵜⵜⵉ ⵏ ⵜⵎⵓⴽⵔⵉⵙⵉⵏ ⵏ ⵜⵙⵏⵙⵉ ⵍⵍⴰⵏⵉⵏ, ⵎⵙⴰⵙⴰⵏⵜ ⵓⵍⴰ ⵜⵓⵎⴰⵢⵉⵏ ⵏ ⵓⵙⵍⴳⵏ ⴷ ⵓⴷⵓⵙⵜⵓⵔ ⵉⴳⴰⵏ ⴰⴷⵓⵙⵜⵓⵔ ⵏ ⵜⵣⵣⵉⴳⵣⵜ ⴷ ⵜⵍⴻⵍⵍⵉ ⵉⴹⵎⵏⵏ ⵉⵣⵔⴼⴰⵏ ⴷ ⵓⵛⵛⵉⵍⵏ, ⵉⴼⵔⴽⵏ ⵉ ⵉⵎⴰⵏ ⵏ ⵓⵣⵎⵣ ⴷ ⵡⴰⵜⵉⴳⵏ ⵉⵎⵖⵔⵉⴱⵉⵢⵏ ⵉⵇⴱⵓⵔⵏ.

ⵙ ⵓⴱⵓⵔⵣ, ⵉⴳⴰ ⵓⵙⴰⵡⵓⵔ ⴰⴷ, ⴷ ⵓⵎⵓⴽⵏ ⵏ ⵜⵎⵙⴰⵔⵉⵏ ⵏ ⵜⵓⵡⵊⴰ ⴷ ⵓⵙⴰⵜⵉ ⵏⵏⵙ, ⴰⴷ ⵢⴰⵡⵉ ⴰⵅⵎⵎⴻⵎ ⴷ ⵓⴼⵔⴰⴳ ⴰⵎⴰⵜⵜⵓⵢ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵍⵍⵉ ⵉⴳⴰⵏ ⴰⴳⵍⴷⵓⵏ ⵏ ⵉⵎⵓⵎⵏⵏ, ⵙ ⵓⴱⵔⵣ ⵜⵍⵍⴰ ⵜⴱⵔⵉⴷⵜ ⵏ ⵓⵎⵙⴰⵡⴰⵍ ⴷ ⵓⴷⵔⴰⵡ ⵍⵍⵉ ⵜⴹⴼⵕ ⵜⴳⵔⴰⵡⵜ ⵉⵜⵜⵓⵙⵎⴰⴳⴰⵍⵏ ⵙ ⵓⵣⵣⵔⴰⵢ ⵏ ⵓⵍⵓⴳⵏ ⵉ ⵓⵙⵓⵊⴷ ⵏ ⵜⵙⵓⵎⴰⵔ ⵍⵍⵉ ⵔⴰⴷ ⵉⵜⵜⵓⵚⵕⵉⴼ ⵉ ⵓⵙⵎⴰⵇⵇⵍ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.

ⴰⵔ ⵜⵎⵎⴰⵍ ⵜⴱⵔⵉⴷⵜ ⴰⴷ, ⴰⵙⵜⴰⵢ ⵏ ⵓⵙⴷⵔⵓ ⴷ ⵓⵎⵙⴰⵙⴰ ⵙ ⵉⵜⵜⵓⵙⵙⴰⵏ ⵡⴰⵏⴰⵡ ⴰⵎⵖⵔⵉⴱⵉ ⴳ ⵓⵙⵖⵣⵏ ⵏ ⵉⵎⵓⴽⵏⵏ ⵉⵏⴰⵎⵓⵏⵏ ⵉⵅⴰⵜⴰⵔⵏ, ⴰⵢⵍⵍⵉ ⵔⴰⴷ ⵢⴰⵡⵙ- ⵙ ⵓⵙⴳⵓⴷⵉ ⵏ ⵉⵎⵓⴽⵏⵏ- ⴳ ⵜⵉⵍⵉⵜ ⵏ ⵡⴰⵏⴰⵡ ⴰⵎⵔⵙⵍⴰⵏ ⴰⴷⵉⵎⵓⵇⵔⴰⵟⵉ ⴰⵎⵖⵔⵉⴱⵉ ⵉⵥⵍⵉⵏ, ⵍⵍⵉ ⵔⴰⴷ ⵉⵙⴽⵔ ⴳ ⵜⵎⴰⵣⵉⵔⵜ ⵏⵏⵖ ⵜⴰⴷⵓⵙⵉ ⵜⴰⴷⵉⵎⵓⵇⵔⴰⵟⵉⵜ ⴷ ⵜⴷⵎⵙⴰⵏⵜ ⵉⵣⵣⵉⴳⵣⵏ, ⵉⵙⵎⵓⵏⵏ ⵊⴰⵔ ⵓⴷⵔⵓ ⵏⵏⵙ ⴰⵖⵔⵎⴰⵏ ⴰⵎⵣⵔⴰⵢ ⴰⵏⴱⵖⵓⵔ ⴷ ⵜⵎⵢⵓⵔⵉⵏ ⵏⵏⵙ ⵜⵉⵎⵔⵙⵍⴰⵏⵉⵏ, ⴷ ⵡⴰⵢⵉⴳⵏ ⵥⵉⵍⵏⵉⵏ ⴰⵜⵔⴰⵔⵏ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵏⴼⵔⴽ ⴳ ⵍⵎⵖⵔⵉⴱ ⵎⴰⵙ ⴷ ⵜⵉⵍⵉⵜ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⴷ ⵜⵓⵡⵊⴰ ⵓⵔ ⴳⵉ ⵖⴰⵙ ⵉⵣⵣⵔⴰⴼⵏ, ⴷ ⵓⵙⵏⵎⴰⵍⴰ ⴷ ⵜⵎⵔⵙⴰⵍ. ⵇⵇⴰⵏⵏ ⴷ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴰⴽⴽⴰⵏⵉⵏ ⵉ ⵉⵙⵍⴳⵏⵏ ⴰⵏⴰⵎⴽ ⵉⴼⴰⵡⵏ ⵉⵍⵍⴰⵏ ⴳ ⵓⵙⵉⵥⴹⵕ ⴷ ⵉⵎⵉⵥ ⵏ ⵉⵎⴰⵙⵙⵏ ⵍⵍⵉ ⵔⴰⴷ ⵉⴹⵎⵏ ⵉⴽⵛⵓⵎⵏ ⵉⵙⵓⵍⴰⵏⵏ ⴹⵎⵏⵏⵉⵏ ⵜⴰⵙⵉⵎⴰⵏⵜ ⵏ ⵜⵎⵖⴰⵔⵉⵏ ⴷ ⵓⵙⵉⵜⵜⵉ ⵏ ⵓⵥⵍⴰⴹ ⴷ ⵓⵙⵏⵓⵃⵢⵓ.

ⴳ ⵓⵎⵏⵉⴷ ⴰⴷ, ⵉⵇⵇⴰⵏ ⴷ ⵓⵙⵙⴽⵜⵉ ⵏ ⵉⵖⴰⵡⴰⵙⵏ ⵏ ⵓⴼⵔⴰⴳ ⴰⵏⴰⵎⵓⵏ ⴷ ⵓⵙⵏⴰⵍ ⵓⵙⵔⵉⴷ ⵉ ⵡⵉⴷⴰ ⵙⵖⴰⵡⵙⴰⵏⵉⵏ, ⴳⵉⵙⵏ ⵜⵉⵎⵖⴰⵔⵉⵏ ⴰⵢⵍⵍⵉ ⵉⴳⴰⵏ ⵙⴳ ⵉⵙⴰⵡⵓⵔⵏ ⵍⵍⵉ ⵉⵡⵉⵏⵉⵏ ⴰⵅⵎⵎⴻⵎ ⴰⴳⵍⴷⴰⵏ ⵉⵥⵍⵉⵏ.

 ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵓⵔ ⵔⴰⴷ ⴽⵛⵎⵖ ⴳ ⵉⵣⵓⵣⵣⵔⵏ ⵏ ⵓⵙⵓⵜⴳ ⵏ ⵉⵙⵍⴳⵏⵏ ⴷ ⵓⵙⵖⵍ ⵏ ⵓⴷⵔⵉⵣ ⵏⵏⵙⵏ, ⴷ ⵜⴱⵔⵉⴷⵉⵏ ⵍⵍⵉ ⵙⴽⴰⵔⵏ ⵉⴱⵕⵍⴰⵎⴰⵏⵏ, ⴽⵓ ⴷ ⵢⴰⵏ ⵙ ⵓⵎⵏⴰⴷ ⵏⵏⵙ ⴰⵎⵔⵙⵍⴰⵏ, ⵎⴰⵛ ⵔⵉⵖ ⴰⴷ ⵙⵓⵜⴳⵖ ⵜⴰⵡⵓⵔⵉ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ, ⴳ ⵓⵙⵉⵔⴰ ⵏ ⵓⵙⵇⵇⵉⵎ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵔⵍⴰⵎⴰⵏⵉⵢⵉⵏ ⵉ ⵓⵙⴽⵔ ⵏ ⵓⵍⴰⵖⵎⵓ ⴰⴷ ⴰⵎⵣⵡⴰⵔⵓ ⴳ ⵎⴰⴷ ⵉⵥⵍⵉⵏ ⵙ ⵓⵙⵓⵜⴳ ⵉⵙⵍⴳⵏⵏ, ⵏⵙⵓⵜⴳ ⵓⵍⴰ ⵜⴰⴱⵔⵉⴷⵜ ⵏ ⵓⵏⵏⵓⵕⵥⵎ ⴷ ⵓⴷⵔⴰⵡ ⵍⵍⵉ ⵙ ⵜⵙⵡⵓⵔⵉ ⴳ ⵜⵖⵉⵎⵉⵜⵉⵏ ⵏ ⵓⵙⵙⴼⵍⴷ ⵍⵍⵉ ⵜⵙⵏⵎⴰⵍⴰ ⴰⴽⴷ ⵜⵉⵎⵔⵙⴰⵍ ⴷ ⵜⵎⵙⵙⵓⴳⴰⵔ ⴷ ⵜⵎⴰⴷⴷⴰⵙⵉⵏ ⴰⵔⴰⵜⵓⵏⴱⵉⴹⵉⵏ, ⵔⴰⴷ ⵏⵎⴹⴰⴽⴰⵕ ⴼ ⵓⵏⵇⵇⵉⵙ ⵍⵍⵉ ⵔⴰⴷ ⵜⵙⵎⴷ ⵜⵔⴰⴱⴱⵓⵜ, ⴳ ⵜⵙⵓⵜⵍ ⵜⴰⵣⵣⵔⴰⴼⵜ ⴷ ⵢⵓⵛⴽⴰⵏ.  

ⵙ ⵜⵎⵍⴷⴰ ⴰⴷ, ⴰⵔ ⵙⵓⵜⴳⵖ ⵜⴰⴷⵔⴰⵡⵜ ⵏ ⵜⵙⵇⵇⵉⵎⵜ ⵏ ⵍⴱⵓⵏⴷⵓⵇⵉⵢⵢⴰ ⵉ ⵜⴷⵉⵎⵓⵇⵔⴰⵟⵉⵜ ⵙ ⵓⵙⵍⴳⵏ ⵉⴹⴼⵕⵏ ⴰⵙⵇⵇⵉⵎ ⵏ ⵓⵕⵓⴱⴱⴰ, ⵙⵓⵜⵖ ⵜⵉⵡⵓⵔⵉⵡⵉⵏ ⵏⵏⵙ ⴷ ⵓⵏⵏⵓⵕⵥⵎ ⵏⵏⵙ, ⵙⴷⴷⵉⴷⵖ ⴰⵏⴰⵔⵓⵣ ⵏⵏⵖ ⵉ ⴽⵉⴳⴰⵏ ⵏ ⵓⵎⵢⴰⵡⴰⵙ ⴰⴽⴷ ⵜⵎⵔⵙⵍⴰⵜ ⴰⴷ ⵏ ⵓⵙⵡⵉⵏⴳⵎ, ⴳ ⵉⴳⴰ ⵍⵎⵖⵔⵉⴱ ⴰⴳⵎⴰⵎ ⵙⴳ 2007.

ⴷⴰⵔⵏⵖ ⴰⴱⵓⵔⵣ ⵙ ⵎⴰⴷ ⵉⵙⴽⵔ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵎⵙⴽⴰⵔ ⴳ ⵢⵉⴳⵔ ⵏ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⴷ ⵓⵣⴷⴰⵢ ⴷ ⵓⵎⵏⴰⴷ ⴰⵏⴰⵎⵓⵔ ⴰⵜⵔⴰⵜ, ⴰⵢⵍⵍⵉⵖ ⵏⵍⵍⴰ ⴷⴰⵜ ⵏ ⵜⵎⵙⴽⵔⵜ ⵜⴰⵎⵖⵔⵉⴱⵉⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⵏⵔⴰ ⴰⵙⵎⵖⵔ ⴰⵙⵓⵍⴰⵏ ⵏ ⵜⵥⵍⵉⵜ ⴰⴷ ⴷ ⵓⵙⵕⵚⵓ ⵏ ⵓⵙⵓⵜⴳ ⵏ ⵓⴷⵔⵉⵣ ⵏ ⵉⵙⵍⴳⵏⵏ ⴷ ⵓⵙⵖⵍ ⵏ ⵓⴷⵔⵉⵣ ⵉⴳⴰⵏ ⴰⴳⵣⵣⵓⵎ ⵙⴳ ⵜⵉⵎⵙⴽⵔⵜ ⴰⴷ.

ⵉⴳⴰ ⵡⴰⵡⵜⵜⴰⵙ ⴰⵙⴽⵔ ⵏ ⵜⵏⵏⵓⴱⴹⴰ ⴳ ⵜⵙⵔⵜⵉⵜ ⵜⴰⴳⴷⵓⴷⴰⵏⵜ, ⴷ ⵉⵥⵉⵕ ⵏ ⵓⴷⵔⵉⵣ ⵏ ⵜⵎⴽⵔⴰⴹ ⵜⴰⴳⴷⵓⴷⴰⵏⵜ, ⴷ ⵓⴹⵎⵏ ⵏ ⵉⵣⵔⴼⴰⵏ ⴷ ⵜⵣⵣⵉⴳⵣⵜ ⵏ ⵜⵉⴹⴰⴼ ⵜⴰⵣⵣⵔⴰⴼⵜ ⵉ ⵓⵣⵣⵔⴰⵢ ⵏ ⵜⵎⵓⴽⵔⵉⵙⵉⵏ ⴷ ⵓⵙⵎⵖⵔ ⵏ ⵉⵣⵣⵔⴰⴼⵏ ⵏⵏⵖ ⵉⵏⴰⵎⵓⵔⵏ ⵉ ⵓⴹⵎⵏ ⵏ ⵉⵣⵔⴼⴰⵏ ⴷ ⵓⵙⵖⵏ ⵏ ⵓⵛⵛⵉⵍⵏ ⴳ ⵓⵙⴰⵜⵉ ⵏ ⵓⵡⴰⵏⴽ ⵏ ⵜⵎⵔⵙⴰⵍ ⴷ ⵓⵣⵔⴼ ⴷ ⵓⵙⵍⴳⵏ.

ⵙⵉⵜⵉⵎⵖ ⴰⵎⵓⵔⵙ ⵉ ⵜⵡⵓⵔⵉⵡⵉⵏ ⵏⵏⵓⵏ, ⵜⴰⵏⵎⵎⵉⵔⵜ ⴼ ⵓⵙⵙⴼⵍⴷ ⵏⵏⵓⵏ