ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵕⵥⵥⵓⵎ ⵏ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⴰⴼⵔⵉⵇⵉ ⴼ: “ⴰⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⴰⴼⵔⵉⵇⵉ ⴳ ⵓⵎⴰⵍⵓ ⵏ ⵜⵏⴰⵥⴰⵕⵉⵏ ⵍⵍⴰⵏⵉⵏ”

ⵜⵉⵏⴳⴳⵯⴰ ⴷ ⵉⵏⴳⴳⵯⴰ ⵉⴱⵕⵍⴰⵎⴰⵏⵉⵢⵉⵏ,

ⵉⴷ ⵎⴰⵙⵙ ⵉⵎⵙⵇⵇⴰⴷⵏ,

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ;

 ⵏⵎⵎⵔ ⵜⵉⴽⴽⵍⵉⵜ ⵢⴰⴹⵏⵉⵏ ⵍⵍⵉⵖ ⴽ ⵏⵙⴱⵔⵔⴽ ⴷ ⴰⵢⵜⵎⴰⵜⵏ  ⴳ ⵜⵉⵍⵉⵜ ⵙ ⵡⴰⴽⴰⵍ ⴰⴼⵔⵉⵇⵉ ⵉⴱⵓⵖⵍⴰⵏ, ⴷ ⵓⵎⵣⵔⵓⵢ ⵏ ⵜⵖⵏⵙⴰ ⵉⵛⵛⴰⵔⵏ, ⴷ ⵜⴷⵍⵙⴰ ⵜⴰⴼⵔⵉⵇⵉⵜ ⵉⴱⵓⵖⵍⴰⵏⵉⴱⵖⵔⵏ ⵉⵟⵟⴰⴼⵏ ⵉⵥⵓⵕⴰⵏ ⴳ ⵓⵣⵎⵣ,ⵙ ⵜⵎⵏⵏⴰⵡⵜ ⵏⵏⵙ ⵉⵥⵍⵉⵏ ⵉⵍⵍⴰⵏ ⴳ ⵢⵉⴳⵔ ⴰⵎⵏⵥⴰⵡ ⵢⵓⵙⵄⴰⵏ,ⴷ ⵉⵏⴳⴳⵯⴰ ⵍⵍⵉ ⴷ ⴰⴽⴽⵯ ⵏⴷⵔⵓ, ⵉⵙⵏⴼⴰⵔⵏ ⵏ ⵓⵚⴽⵓ ⴰⴷⵉⵎⵓⵇⵔⴰⵟⵉ ⴷ ⵓⵎⵔⵙⵍⴰⵏ ⴷ ⵓⵏⴰⵔⵓⵣ ⵏ ⵓⵙⵎⵖⵔ ⴰⴼⵔⵉⵇⵉ.

ⵜⵉⵏⴳⴳⵯⴰ ⴷ ⵉⵏⴳⴳⵯⴰ, ⵍⵍⵉⵖ ⵏⵙⵡⵉⵏⴳⵎ ⴳ ⵓⵙⵏⵓⴱⴳ ⵏ ⵜⵉⵏⴰⵡⵜ ⴰⴷ, ⵏⵙⵔⵙ ⴽⵉⴳⴰⵏ ⵏ ⵉⵅⵎⵎⵉⵎⵏ, ⴰⵎⵣⵡⴰⵔⵓ ⴰⵏⵛⴽ ⵏ ⵜⵏⴰⵥⴰⵕⵉⵏ ⴷⴰⵜ ⵏ ⵓⵎⵏⵥⴰⵡ ⵏⵏⵖ ⵍⵍⵉ ⴰⴽ ⴳⴳⵓⵜⵏⵉⵏ ⵙ ⵜⵣⵣⵉⴳⵣⵜ ⵏ ⴽⵉⴳⴰⵏ ⵏ ⵜⴰⵙⵙⴰⵙⵉⵏ, ⵡⵉⵙ ⵙⵉⵏ ⵍⵍⵉⵖ ⴷ ⵉⵇⵇⴰⵏ ⴰⴷ ⵉⵍⵉⵏ ⵉⵙⴰⵢⵔⵓⵔⵏ ⵉⴱⵕⵍⴰⵎⴰⵏⵉⵢⵉⵏ ⵉ ⵓⵎⴹⴰⴽⴰⵕ ⵉⵍⴻⵍⵍⵉ ⵙⴳ ⵉⵍⵓⴳⵏⵏ ⵏ ⵉⴳⵔⴰⵡⵏ ⵉⵎⵔⵙⵍⴰⵏⵏ ⵍⵍⵉ ⵏⵙⴽⴰⵔ ⴳ ⵓⵙⴰⵜⵉ ⵏ ⵜⵎⴰⴷⴷⴰⵙⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⴳⵜⵉⵔⴰⵏⵉⵏ, ⵡⵉⵙ ⴽⵕⴰⴷ ⵍⵍⵉ ⵏⵔⴰ ⴰⴷ ⴰⴽⴽⵯ ⵏⴷⵔⵓ ⴳ ⵓⵙⵏⴰⵍ ⵏ ⵓⵏⵄⴰⵕ ⵍⵍⵉ ⵙⴽⴰⵔⵏⵜ ⵜⵎⴰⴷⴷⴰⵙⵉⵏ ⵜⵉⵎⵏⵥⴰⵡⵉⵏ ⴷ ⵜⵙⴳⴰⵡⴰⵏⵉⵏ ⵜⵉⴼⵔⵉⵇⵉⵢⵉⵏ, ⵖⵎⴽ ⴰⵏⵏ ⴷ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ ⵉ ⵚⴰⵃⴰ ⵏ ⵓⵎⵏⵥⴰⵡ ⵏⵏⵖ.

ⵉⵍⵍⴰ ⵓⵏⵎⵓⵇⵇⴰⵔ ⴰⴷ ⴳ ⵓⵙⴰⵜⵉ ⵏ ⵉⵏⵎⵓⵇⵇⴰⵔⵏ ⵉⴱⵕⵍⵎⴰⵏⵉⵢⵉⵏ  ⵍⵍⵉ ⵜⵙⵏⵓⴱⴳ ⵓⴳⴳⴰⵔ ⵏ ⵜⴰⵎⵥⵓⵏⵜ ⵜⴰⴼⵔⵉⵇⵉⵜ, ⴳⵉⵙ ⵡⵉⴷⴰ ⵉⵙⵏⵓⴱⴳ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⵍⵍⵉ ⵉⵙⵏⵓⴱⴳⵏ ⴽⵉⴳⴰⵏ ⵏ ⵉⵏⵎⵓⵇⵇⴰⵔⵏ ⴷ ⵜⵉⵏⴰⵡⵉⵏ ⴼ ⵜⵎⵙⴰⵔⵉⵏ ⵜⵉⴼⵔⵉⵇⵉⵢⵉⵏ ⵜⵉⵙⵉⵍⴰⵏⵉⵏ ⴰⵎ: “ⵉⴼⵔⵔⵉⵇⵢⴰ ⴷⴰⵜ ⵏ ⵓⵙⴱⴷⴷⵉ ⵏ ⵜⵎⵓⴽⵔⵉⵙⵉⵏ ⵏ ⵓⵏⵣⵡⵉ”, ⴷ “ⵜⵉⵏⴰⵥⴰⵕⵉⵏ ⵏ ⵓⵙⵉⴷⴼ ⴰⴼⵔⵉⵇⵉ” , ⴷ “ⴰⵎⵓⵜⵜⵉ ⵏ ⵉⵡⴷⴰⵏ ⴷ ⵜⵎⴳⵓⵔⴰ ⵊⴰⵔ ⵜⵉⵎⵉⵣⴰⵔ ⵏ ⵉⴼⵔⵉⵇⵢⴰ” ⴷ ⵡⵉⵢⵢⴰⴹ.

ⵜⵉⵏⴳⴳⵯⴰ ⴷ ⵉⵏⴳⴳⵯⴰ,

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵓⵔ ⵙⵖⴰⵡⵙⴰⵏⵜ ⵜⵏⴰⵥⴰⵕⵉⵏ ⵏ ⵓⵎⵏⵥⴰⵡ ⵏⵏⵖ ⴰⵙⵙ ⴰⴷ ⵉ ⵜⵎⵎⴰⵔⵉ ⵉⴳⴳⵓⵜⵏ ⴷ ⵜⵓⴳⴳⵯⴰⵙ ⵉⵥⵍⵉⵏ ⵉ ⵓⵙⵙⵏ ⵏⵏⵙⵏⵜ, ⵎⴰⵛⵛ ⵙⵖⴰⵡⵙⴰⵏⵜ ⵉ ⵜⵎⵔⵓⵔⵉⵜⵉⵏ ⵏⵏⵖ ⵜⵉⵎⴳⵔⴰ, ⴷ ⵓⴼⵓⵍⵍⵙ ⵏⵏⵖ ⴰⵎⴳⵔⵓ, ⴷ ⵡⴰⵍⴰⵢ ⵏ ⵜⵙⵖⵍⵜ ⵏ ⵓⵙⵎⵓⵙⵙⵓ ⴷ ⵜⵉⴹⴰⴼ ⵉ ⵓⵏⵄⴰⵕ ⵏ ⵜⵏⵓⴼⴰ ⵏ ⵓⵎⵏⵥⴰⵡ ⵏⵏⵖ ⴷⴰⵜ ⵏ ⵓⴱⵓⵖⵍⵓ ⵏ ⵜⵏⵉⵎⴰⵏⵉⵏ ⵜⵉⵏⴰⵎⵓⵔⵉⵏ ⴳ ⵉⵎⵏⵥⴰⵡⵏ ⵢⴰⴷⵏⵉⵏ, ⵎⴽ ⵍⵍⵉ ⵏⵉⵜ ⵏⵥⵕⴰ ⴳ ⵓⴱⴰⵢⵢⵓⵕ ⵏ ⴽⵓⴼⵉⴷ 19 ⵍⵍⵉ ⵎⵎⴰⵖⵏⵜ ⵜⵎⵉⵣⵔ ⵏⵏⵖ ⵙ ⵜⵏⴱⴰⴹⵉⵏ ⴷ ⵉⴱⵕⵍⴰⵎⴰⵏⵏ ⴷ ⵓⴷⴷⵉⵙⵏ ⵉⵖⵔⵎⴰⵏⵏ ⴷ ⵉⵙⵔⵜⴰⵏⵏ ⴷ ⵜⵏⵓⴼⴰ ⵏ ⵜⵙⵏⵉⵊⵊⵉⵜ ⴷ ⵜⵏⴰⵎⵓⵏⵉⵏ, ⴷ ⵓⴱⴰⵢⵢⵓⵕ ⴷ ⵉⴷⵔⵉⵣⵏ ⵏⵏⵙ ⵙ ⵜⵥⴹⴰⵕⵉⵏ ⴷⵔⵓⵙⵏⵉⵏ, ⵎⴰⵛⵛ ⵙ ⵜⵉⵔⴰⵜ ⵉⴷⵓⵙⵏ ⴷ ⵜⵡⵉⵣⵉ ⵜⴰⵏⴰⵎⵓⵏⵜ ⵍⵍⵉ ⵉⵍⵍⴰⵏ ⴳ ⵓⴳⵏⵙ ⵏ ⵜⴷⵍⵙⴰ ⵜⴰⴼⵔⵉⵇⵉⵜ.

ⵖⵉⴷ ⵓⵔ ⵔⵉⵖ ⴰⴷ ⵙⵙⴽⵜⵉⵖ ⴰⴳⴳⴰⵙⵏ ⵏ ⵓⵎⵏⵥⴰⵡ ⵏⵏⵖ ⴳ ⵓⵎⵏⴰⴹ ⵏ ⵜⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ ⴳ ⵓⵔ ⵜⵍⵍⵉ ⵜⵣⵔⴼⵜ, ⵎⴰⵛⵛ ⵔⴰⵉⵖ ⴰⴷ ⵉⵏⵉⵖ ⵎⴰⵙ ⴷ ⴰⵙⵡⵓⵔⵉ ⵙ ⵉⵎⴰⵏ ⴷ ⵜⵉⵔⴰⵜ ⵜⴰⴼⵔⵉⵇⵉⵜ ⵉⵛⵛⴰⵔⵏ, ⴷ ⵓⵙⵎⵓⵏ ⵏ ⵜⵓⴳⴳⵯⴰⵙ ⵉⴳⴰ ⵜⴰⵙⴰⵔⵓⵜ ⵏ ⵡⴰⵍⴰⵢ ⵏ ⵜⵏⴰⵥⴰⵕⵉⵏ ⵍⵍⵉ ⵙⴱⴷⴷⵏⵉⵏ ⴽⵉⴳⴰⵏⵏ ⵜⴷⵉⵏⴰⵎⵉⵢⵉⵏ ⵏ ⵜⴳⵎⵉ ⴳ ⵓⵎⵏⵥⴰⵡ.

ⴳ ⵜⵎⵣⵡⴰⵔ ⵏ ⵜⵏⴰⵥⴰⵕⵉⵏ ⴷⴰⵜ ⵏ ⵜⵎⴰⵥⵓⵏⵜ ⵏⵏⵖ ⵉⴼⵔⵉⵇⵢⴰ, ⵉⵍⵍⴰ ⵡⴰⵍⴰⵙ ⵏ ⵜⵣⵣⵉⴳⵣⵜ ⵏ ⵉⵎⴰⵖⵏ ⵉⴳⵯⵏⵙⴰⵏⵏ ⴳ ⴽⵉⴳⴰⵏ ⵏ ⵜⵎⵉⵣⴰⵔ ⵏ ⵓⵎⵏⵥⴰⵡ, ⴰⵔ ⵜⵕⵥⵥⴰ ⵜⵏⴼⵔⵓⵜ ⵜⴰⴳⵯⵏⵙⴰⵏⵜ ⴳ ⴽⵉⴳⴰⵏ ⵏ ⵜⵎⵉⵣⴰⵔ, ⵖ ⵓⵣⵎⵣ ⵖ ⵜⵔⵎⵙ ⵉⴼⵔⵉⵇⵢⴰ ⴳ ⵓⵙⵉⵜⵜⵉ ⵏ ⵉⵎⴰⵖⵏ ⵣⵣⵔⴰⵢⵏⵉⵏ ⵉⵡⵜⵜⴰ ⴷ ⵡⵉⴷⴰ ⴳⴰⵏⵉⵏ ⵉⴳⵯⵏⵙⴰⵏⵏ, ⵙ ⵓⵎⵢⴰⵙ ⴷ ⵓⵚⴽⵓ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏⵉⵏ ⴷ ⵜⴷⵉⵎⵓⵇⵔⴰⵟⵉⵢⵉⵏ, ⵉⵣⵣⵉⴳⵣ ⵓⵙⵏⵎⴰⵍⴰ ⵏ ⵉⵙⵜⴰⵢⵏ ⴳ ⵜⵓⴳⵜ ⵏ ⵜⵎⵉⵣⴰⵔ ⵏⵏⵖ ⴰⵢⵍⵍⵉ ⵉⴳⴰⵏ ⵜⴰⵎⵢⵓⵔⵜ ⵜⴰⵙⵔⵜⴰⵏⵜ ⵍⵍⵉ ⴷ ⵉⵇⵇⴰⵏ ⵓⵡⵇⵇⵔ, ⵜⵉⵍⵉ ⵓⵍⴰ ⵜⴰⵙⵓⵜ ⵜⴰⵎⴰⵢⵏⵓⵜ ⵏ ⵜⵓⴼⵔⵉⵏⵜ ⵜⴰⵙⵔⵜⴰⵏⵜ ⵍⵍⵉ ⵉⴳⵉⴷⵉⵏ ⵉⴼⵔⵉⵇⵢⴰ ⴳ ⵍⴰⵕⵕⴰ ⵏ ⵉⵙⵡⵉⵔⵏ.

ⴰⵣⵣⵔⴰⵢ ⴷ ⵓⵍⴳⴳⵓⴷ ⵏ ⵜⴽⵕⴹⴰ ⵏ ⵉⵎⴰⵖⵏ ⴳ ⵓⵎⴰⴹⴰⵍ, ⴰⵔ ⵉⵎⵎⴰⵍ ⵎⴰⵙ ⴷ ⵉⴼⵔⵉⵇⵢⴰ ⴷ ⴰⵎⵏⵥⴰⵡ ⴳ ⵍⵍⴰⵏ ⴽⵉⴳⴰⵏ ⵏ ⵉⵎⴰⵖⵏ ⵀⵔⵛⵏⵉⵏ ⴰⴽⴽⵯ ⴳ ⵓⵎⴰⴹⴰⵍ.

ⴷⴰ ⵜⵜⴰⵡⵙⵏ ⵉⵎⴰⵖⵏ ⴰⴷ ⴳ ⵓⵙⴷⵔⵓ ⵏ ⵓⵥⵍⴰⴹ, ⴷⴰ ⴳⵉⵙ ⵛⵛⵜⴰⵏ, ⵙⵍⴰⵡⴰⵏ ⴰⴽⴽⵯ ⴳ ⵉⵎⵏⴰⴹⵏ ⵉⵊⵢⵓⵣⵔⵜⴰⵏⵏ ⵖ ⵥⴹⴰⵕⵏ ⵉⵎⵓⵙⵙⵓⵜⵏ ⵏ ⵓⴱⵔⵙⵙⵉⵡⴷ ⴷ ⵉⵙⵡⵉⵏⴳⵉⵎⵏ ⵏ ⵓⵥⵍⴰⵢ ⴰⴷ ⵟⵟⵉⴼⵏ ⵉⴷⵖⴰⵔⵏ ⵏⵏⵙⵏ ⴳ ⴽⵔⴰ ⵏ ⵜⵙⴳⴳⵉⵡⵉⵏ ⵏ ⵓⵎⵏⵥⴰⵡ, ⵙⴱⴷⴷⵏ ⵜⵉⴳⵎⵉ ⴷ ⵓⵚⴽⵓ ⴰⴷⵉⵎⵓⵇⵔⴰⵟⵉ ⴷ ⵓⵎⵔⵙⵍⴰⵏ ⴷ ⵓⵔⴳⴳⵉⴳ ⴷ ⵓⴼⵔⴰ.

ⵉⵖ ⵜⴳⴰ ⵜⵏⴰⵥⴰⵕⵜ ⵏ ⵓⴱⵔⵙⵙⵉⵡⴷ ⴳ ⵜⵓⵏⵖⵉⵍⵜ ⵏⵏⵙ ⵜⴰⵜⵔⴰⵔⵜ ⵜⴰⴷ ⵉⴽⵛⵎⵏ ⵙ ⵓⵎⵏⵥⴰⵡ ⵏⵏⵖ, ⵀⴰⵜⵉ ⵓⵔ ⴷⴰⵔⵙ ⵜⴰⵣⴷⴰⵢⵜ ⵙ ⵡⴰⵡⵏⴰⴹ ⴰⴼⵔⵉⵇⵉ ⴳ ⵉⵍⵍⴰ ⵓⵣⵔⴼ ⴷ ⵓⴼⵔⴰ. ⵉⵣⵣⵉⴳⵣⵏ ⵏ ⵓⴱⵔⵙⵙⵉⵡⴷ ⴷ ⵉⵥⵓⵕⴰⵏ ⵏⵏⵙ ⵉⴳⵔⴰⵖⵍⴰⵏⵏ, ⴰⵔ ⴳⵉⵙ ⵙⴽⴰⵔⵏ ⵡⴰⴷ ⴱⴰⵀⵔⴰ ⵉⵙⵙⵀⵔⵛⵏ ⴳ ⵉⵎⵏⴰⴹⵏ ⵉⴼⵔⵉⵇⵉⵢⵏ.

ⴰⴱⵔⵙⵙⵉⵡⴷ ⵓⵔ ⵉⵕⵥⵉ ⵖⴰⵙ ⴰⵔⴳⴳⵉⴳ, ⵎⴰⵛⵛ ⵉⵙⴽⵔ ⵓⵍⴰ ⴰⵙⵎⴰⵜⴰ ⵏ ⵜⵡⴰⵔⵣⵉⵢⵜ ⴷ ⵡⴰⴷⴷⴰⴷ ⵏ ⵡⴰⵔⴰⵡⵓⵏⴽ, ⵉⵙⵔⵙ ⴰⴼⵓⵙ ⵏⵏⵙ ⴼ ⴽⵉⴳⴰⵏ ⵏ ⵉⵙⵓⴳⴰⵎ ⵉⵙⵜⵔⴰⵜⵉⵊⵉⵢⵏ ⴳ ⴽⵔⴰ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⵃⵎⴰ ⴰⴷ ⵉⴹⵎⵏ ⴰⵙⵙⵥⵕⴼ ⵏ ⵉⴱⴽⴽⴰⴹⵏ ⵏⵏⵙ ⴷ ⵜⵣⵣⵉⴳⵣⵜ ⵏⵏⵙ, ⵢⴰⵍⵍ ⵓⵍⴰ ⴰⵙⵡⵉⵔ ⵏ ⵜⴽⵚⵚⴰⴹ ⴷⴰⵔ ⵉⵎⵣⴷⴰⵖⵏ. ⵙ ⵖⵎⴽ ⴰⵏⵏ, ⵉⵎⵙⴰⵙⴰ ⴷ ⵡⴰⵏⴰⵡⵏ ⵢⴰⴹⵏⵉⵏ ⵏ ⵉⴱⴽⴽⴰⴹⵏ ⵓⵍⴳⵉⵏⵏ ⴷ ⵉⵎⵓⵙⵙⵓⵜⵏ ⵏ ⵜⵥⵍⴰⵢⵜ ⵍⵍⵉ ⴷ ⵉⵎⵏⴰⵇⵇⴰⵔ ⴳ ⵜⵏⵓⴼⴰ ⴷ ⵜⵙⵔⵜⴰⵜⵉⵊⵉⵢⵏ ⴷ ⵜⵏⴰⵥⴰⵕⵉⵏ.

ⵉⵖ ⵜⵍⵍⴰ ⵜⴳⵔⵓⵎⵎⴰ ⵜⴰⴳⵔⴰⵖⵍⴰⵏⵜ, ⵙⵍⵡⴰⵏ ⴰⴽⴽⵯ ⵜⵉⴷⴰ ⵟⵟⴰⴼⵏⵉⵏ ⴰⵡⴰⵍ ⴳ ⵜⵖⵜⴰⵙⵜ ⵜⴰⴳⵔⵖⵍⴰⵏⵜ, ⴷ ⵜⵎⵉⵣⴰⵔ ⵜⵉⴱⵖⵓⵔⵉⵏ, ⴳ ⵉⵔⵉⵎ ⵏ ⵓⵙⵎⵏⵉⴷ ⵏ ⵓⵙⵏⴰⵍ ⵉⵖⵣⴰⵏⵏ, ⵉⴼⴰⵡⵏ ⵉⴳⴰⵏ ⴰⵎⵏⵏⴰⵡ ⴳ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ ⴷ ⵓⴽⴽⵓⵙ ⵏ ⵉⵎⵓⵙⵙⵓⵜⵏ ⵏⵏⵙ, ⵉⵇⵇⴰⵏ ⴷ ⴼ ⵜⵎⵉⵣⴰⵔ ⵏⵏⵖ ⵜⵉⴼⵔⵉⵇⵉⵢⵉⵏ ⴰⴷ ⵙⵙⵏⵏⵜ ⴰⵏⵛⴽ ⵏ ⵉⵎⵉⵣⵉ ⵏ ⵓⴱⵔⵙⵙⵉⵡⴷ ⵍⵍⵉ ⵉⵍⵍⴰⵏ ⵉⵙⵙⵉⵡⵉⴷⵏ ⴽⵓⵢⴰⵏ, ⴷ ⵓⵙⵙⵏ ⵏ ⵓⵏⵛⴽ ⵏ ⵉⵎⵉⵣⵉ ⵍⵍⵉ ⵜⵙⴽⴰⵔ ⵜⴰⵎⵓⵏⵜ ⵊⴰⵔ ⵓⴱⵔⵙⵙⵉⵡⴷ ⴷ ⵓⵥⵍⴰⵢ, ⵓⵔ ⴷ ⵖⴰⵙ ⴼ ⵓⵔⴳⴳⵉⴳ ⴷ ⵜⵏⴼⵓⵔⵜ ⵎⴰⵛⵛ ⵓⵍⴰ ⴼ ⵜⵉⵕⵥⵉ ⵏ ⵉⵡⴰⵏⴽⵏ ⴷ ⵉⴷⵔⵉⵣⵏ ⵍⵍⴰⵏⵉⵏ ⴼ ⵓⵣⵡⴰⴼ ⴰⵎⴳⵔⵓ ⴷ ⵓⵔⵡⵍ ⵙ ⵜⵎⵉⵣⴰⵔ ⵢⴰⴹⵏⵉⵏ ⴷ ⵜⴰⵙⵙⴰⵏⵉⵏ ⵜⵉⵏⴼⴳⴰⵏⵉⵏ ⵍⵍⵉ ⴷⵉⴷⵙⵏ ⵎⵓⵏⵏⵉⵏ.

ⴷⴰⵜ ⵏ ⵉⵙⵓⵔⵙⵏ ⴰⴷ, ⵉⵇⵇⴰⵏ ⴷ ⴼ ⵉⴱⵕⵍⴰⵎⴰⵏⵏ ⵉⴼⵔⵉⵇⵉⵢⵉⵏ ⴷ ⵜⵎⴰⴷⴷⴰⵙⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⴼⵔⵉⵇⵉⵢⵉⵏ ⵜⵉⴳⵜⵉⵔⴰⵏⵉⵏ, ⴰⵏⵄⴰⵕ ⵉ ⵜⵙⵜⵔⴰⵜⵉⵊⵉⵜ ⵜⴰⴳⵔⴰⵖⵍⴰⵏⵜ ⵉⵣⵔⴱⵏ ⵉ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ ⴳ ⵉⴼⵔⵉⵇⵢⴰ, ⵙ ⵓⵍⵜⴰⵖ ⵏ ⵜⵔⴰⴱⴱⵓⵜ ⵜⴰⴳⵔⴰⵖⵍⴰⵏⵜ ⵙ ⵎⴰⵕⵕⴰ ⵜⵉⵥⴹⴰⵕⵉⵏ ⵍⵍⴰⵏⵉⵏ, ⵙ ⵓⵎⵙⴰⵙⴰ ⴷ ⵜⵡⵓⵔⵉ ⵉⵖⵣⴰⵏⵏⵏ ⴰⴽⴷ ⵜⵉⵏⴱⴰⴹⵉⵏ ⵏ ⵜⵎⵉⵣⴰⵔ ⵜⵉⵎⵏⵜⴰⵢⵉⵏ ⵉ ⵜⴳⵎⵉ ⵜⴰⴷⵖⴰⵔⴰⵏⵜ ⵉⴱⴷⴷⵏ ⴼ ⵜⵎⴷⵔⴰⵡⵏⵜ ⵉⵙⵎⴷⵏ ⴷ ⵜⵎⴰⵎⴽⵉⵏ ⵜⵉⵇⴱⵓⵔⵉⵏ ⵉ ⵓⵙⵏⴰⵍ ⵉ ⵜⴳⵎⵉ, ⵉⵜⵜⴰⵡⵙⵏ ⴳ ⵓⵙⵎⴰⵜⵜⵉ ⵏ ⵜⵥⴹⴰⵕⵉⵏ ⵏ ⵉⴼⵔⵉⵇⵢⴰ ⵉ ⵡⴰⵢⴷⴰ ⵉⵙⴽⴰⵔⵏ ⵜⴰⵡⵓⵔⵉ ⵉⵙⵉⴷⴼⵏ ⴽⵓⵢⴰⵏ, ⴰⵢⵍⵍⵉ ⵔⴰⴷ ⵉⵙⵉⵜⵜⵉ ⴰⴽⴰⵍ ⵉⵙⵎⵖⴰⵢⵏ ⵜⴰⴷⵍⵙⴰ ⵏ ⵜⴻⵟⵟⵓⵕⴼⴰ ⴷ ⵓⴱⵔⵙⵙⵉⵡⴷ.

ⵜⴰ ⴷ ⵜⴰⵎⵍⴷⴰ ⵏ ⵓⵙⵎⴰⵢⵏⵓ ⵏ ⵜⵡⵉⵣⵉ ⴰⴽⴷ ⵜⵉⵎⵉⵣⴰⵔ ⵜⴰⵢⵜⵎⴰⵜⵉⵏ ⴳ ⵉⴼⵔⵉⵇⵢⴰ ⵍⵍⵉ ⵉⵎⵎⴰⵖⵏ ⴷ ⵓⴱⵔⵙⵙⵡⵉⴷ ⵙ ⵜⵉⵔⴰⵜ ⴷ ⵍⵄⴰⵣⵉⵎⴰ ⴷ ⵓⵙⵖⵉⵡⵙ.

ⵜⵉⵏⴳⴳⵯⴰ ⴷ ⵉⵏⴳⴳⵯⴰ, ⴰⵔ ⵉⵙⵉⴳⴳⵉⵍ ⵓⵏⵛⴽ ⴰⴷ ⵏ ⵉⵎⵉⵣⵉ ⴰⵙⵎⴰⵜⵜⵉ ⴰⵅⴰⵜⴰⵔ ⴳ ⵓⵙⵎⴽⵍ ⴰⴳⵔⴰⵖⵍⴰⵏ ⴰⴽⴷ ⵓⴱⵔⵙⵙⵉⵡⴷ ⴳ ⵉⴼⵔⵉⵇⵢⴰ, ⵜⴰ ⵏⵏ ⵜⴳⴰ ⵜⴰⵎⴰⵙⴰⵢⵜ ⵉⴳⴰⵏ ⵣⵡⴰⵔ ⵜⵉⵏ ⵜⵏⴼⴳⵓⵔⵉⵏ ⴷⴰⵜ ⵓⵔⵜⴰ ⵜⴳⵉ ⵜⴰⵙⵔⵜⴰⵏⵜ ⵏⵖ ⵜⴰⵙⵜⵔⴰⵜⵉⵊⵉⵜ, ⴰⵢⵍⵍⵉ ⴳⵉⴳⵏⵖ ⵉⵙⵉⴳⴳⵉⵍⵏ ⵏⴽⴽⵯⵏⵉ ⵉⵎⵣⵣⵔⴰⴼⵏ ⵉⴼⵔⵉⵇⵉⵢⵏ, ⵉⴳⵏⵙⴰⵙⵏ ⵏ ⵉⵎⴰⴷⴰⵏⵏ, ⴰⴷ ⵏⵙⵔⵙ ⵜⵓⵜⵔⴰ ⴰⴷ ⴳ ⵜⵣⵡⵉⵔⵉ ⵏ ⵉⵏⵄⴰⵕⵏ ⵏⵏⵖ ⴳ ⵉⵏⵎⵓⵇⵇⴰⵔⵏ ⵉⴱⵕⵍⵎⴰⵏⵉⵢⵏ ⵉⴳⵔⴰⵖⵍⴰⵏⵏ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵜⵎⵓⵏ ⵜⵏⴰⵥⴰⵕⵜ ⴰⴷ ⵏ ⵜⵏⴼⵔⵓⵜ ⴷ ⵎⴰⴷ ⵉⵡⵉⵏ ⵓⵛⵛⵉⵍⵏ ⵏ ⵜⵏⴼⵔⵓⵜ ⵏ ⵓⵜⵛⵓ ⴳ ⵓⵎⵏⵥⴰⵡ ⵏ ⵉⴼⵔⵉⵇⵢⴰ ⴷ ⵎⴰⴷ ⵉⴹⴼⵕⵏ ⴰⴷⵔⵓⵙ ⵏ ⵓⵜⵛⵓ, ⴷ ⴽⵔⴰ ⵏ ⵜⵉⴽⴽⴰⵍ ⵉⵙⵓⵔⵙⵏ ⵏ ⵍⴰⵥ ⴳ ⴽⵔⴰ ⵏ ⵜⵙⴳⴳⵉⵡⵉⵏ ⵏ ⵉⴼⵔⵉⵇⵢⴰ, ⴷ ⵉⵙⵓⵔⵙⵏ ⵉⵏⴼⴳⴰⵏⵏ. ⵉⵖ ⵓⵔ ⵉⵍⵍⵉ ⵓⵔⴳⴳⵉⴳ ⴰⵔ ⵜⵜⴱⴷⴰⴷ ⵜⴳⵎⵉ, ⴱⴷⴷⵏⵜ ⵜⴷⵉⵏⴰⵎⵉⵢⵉⵏ ⵜⵉⴷⵎⵙⴰⵏⵉⵏ ⵜⵉⵍⵉ ⵜⴷⵎⵙⴰ ⵏ ⵓⵎⴰⵍⵓ ⵍⵍⵉ ⵓⵔ ⵜⴹⴼⵕ ⵜⵉⴹⴰⴼ ⵓⵍⴰ ⴰⵙⵏⵎⴰⵍⴰ. ⵉⵖ ⴰ ⵏⵜⵜⴰⴳⵯⵉ  ⵙ ⵜⵖⴰⵔⴰⵙⵜ ⵉⴷⵓⵙⵏ ⴰⴷ ⵉⵜⵜⵓⵏⵏⵉ ⵉ ⵉⴼⵔⵉⵇⵢⴰ ⴰⵎⵏⵥⴰⵡ ⵉⵜⵜⵓⵙⵙⴰⵏⵙ, ⵎⴽ ⵍⵍⵉ ⵎⵢⴰⵔⵏ ⴽⵔⴰ ⵏ ⵡⵉⵙ ⴰⴷ ⴰⵙ ⵜ ⵜⵜⵉⵏⵉⵏ, ⵀⴰⵜⵉ ⴰⵔ ⴰⵖ ⴰⴽⴽⵯ ⵜⵙⵇⵙⴰ ⵏⴽⴽⵯⵏⵉ ⵉⴼⵔⵉⵇⵉⵢⵏ ⵜⵉⵍⵉⵜ ⵏ ⵜⵏⴼⵔⵓⵜ ⵏ ⵓⵜⵛⵓ ⵉ ⵎⴰⵕⵕⴰ ⵉⴼⵔⵉⵇⵢⴰ, ⵎⴽⵍⵍⵉⵉⵍⵍⴰ ⵓⵙⵇⵙⵉ ⴼ ⵜⴳⵓⵔⵉⵡⵉⵏ ⵏ “ⵜⵎⴷⵔⴰⵡⵜ ⵜⴰⴳⵔⴰⵖⵍⴰⵏⵜ” ⴷ “ⵜⵡⵉⵣⵉ”, ⵢⵉⵍⵉ ⵓⵙⵇⵙⵉ ⵓⵍⴰ ⴼ ⵡⴰⵎⵎⴰⵙ ⵏ ⵉⴼⵔⵉⵇⵢⴰ ⴳ ⵜⵙⵜⵔⴰⵜⵉⵊⵉⵢⵉⵏ ⵜⵉⴳⵔⴰⵖⵍⴰⵏⵉⵏ.

ⵜⵉⵡⵉⴷ ⵜⴰⵎⴰⵖⵜ ⵉⵍⵍⴰⵏ ⵖⵉⵍⴰⴷ ⴳ ⵍⵇⴱⵍⵜ ⵏ ⵓⵕⵓⴱⴱⴰ ⴰⵣⴷⴰⵢ ⵏ ⵓⵙⵓⵔⵙ ⵏ ⵓⵜⵛⵓ ⴳ ⵉⴼⵔⵉⵇⵢⴰ ⴷ ⵉⵙⵓⵔⵙⵏ ⵉⵙⵜⵔⴰⵜⵉⵊⵉⵢⵏ ⵉⴳⵔⴰⵖⵍⴰⵏⵏ ⴷ ⵓⵏⵛⴽ ⵏ ⵉⴷⵔⵉⵣⵏ ⴳ ⵓⵏⴳⵔⴰⵡ ⵍⵍⵉ ⵉⵙⵙⵕⵚⴰ ⴰⴱⵟⵟⵓ ⴰⴳⵔⴰⵖⵍⴰⵏ ⵏ ⵜⵡⵓⵔⵉ ⴼ ⵜⵎⵉⵣⴰⵔ ⵏⵏⵖ ⴳ ⵉⴼⵔⵉⵇⵢⴰ, ⴷ ⵓⴷⵔⵓⵙ ⴰⵅⴰⵜⴰⵔ ⵉⴳⴰⵏ ⵜⴰⵙⵙⴰⵙⵜ ⴷⴰⵔ ⵓⵎⵏⵥⴰⵡ ⵏⵏⵖ. ⵖⵎⴽ ⴰⵏⵏ ⴰⴼ ⵉⵖⵍⵉ ⵡⴰⵜⵉⴳ ⵏ ⵉⵎⵜⵜⵉⵡⵏ ⵏ ⵓⵜⵛⵓ ⵙ ⵜⵖⴰⵔⴰⵙⵜ ⵍⵍⵉ ⵓⵔ ⵏⵎⵢⴰⵔ, ⵖⵍⵉⵏ ⵉⵙⵖⵍⵏ ⵏ ⵜⵣⵣⵓⴳⵜ, ⴰⵢⵍⵍⵉ ⵉⵙⵙⵕⵎⵉⵏ ⵜⴰⵡⵊⵉⵡⵉⵏ, ⵢⴰⵍⵍ ⴰⵏⵛⴽ ⵏ ⵓⴼⴽⴰⵙⵉ ⴰⴳⴷⵓⴷⴰⵏ.

ⵉⵇⵇⴰⵏ ⴰⵖ ⴷ, ⵜⵉⵏⴳⴳⵯⴰ ⴷ ⵉⵏⴳⴳⵯⴰ, ⴰⴷ ⵏⵙⵇⵙⴰ ⵉⵙ ⴷ ⵉⵙⵓⵔⵙⵏ ⴰⴷ ⵏ ⵓⵜⵛⵓ ⴷ ⵓⴷⵔⵓⵙ ⵉⴳⴳⵓⵜⵏ ⴳ ⵓⵙⴳⴼⴰⵔ ⴷ ⵉⵏⴳⵣⵓ ⵏ ⵜⵉⵍⵉⵜ ⵏⵏⵙ ⵉ ⵎⴰⵕⵕⴰ ⵉⵏⵎⵓⵔⴰⵏ ⵏⵏⵖ ⵉⴳⴰ ⵉⵙⴷⵔ ⵍⵍⵓ ⵓⵔ ⵏⵥⴹⴰⵕ ⴰⴷ ⵏⵔⴰⵔ ? ⵓⵔ ⵖⴰⵍⵖ ⵉⵙ ⵉⴳⴰ ⵖⵎⴽⴰ ⴰⵏⵏ ? ⵜⴰⵎⵏⵥⴰⵡⵜ ⵏⵏⵖ ⵜⴻⵟⵟⴰⴼ ⵓⴳⴳⴰⵔ  60 % ⵏ ⵉⴽⴰⵍⵉⵡⵏ ⴳⴰⵏⵉⵏ ⵉⴽⴰⵍⵉⵡⵏ ⵏ ⵜⴼⵍⵍⴰⵃⵜ ⴳ ⵓⵎⴰⴹⴰⵍ, ⵙⴳ ⴽⵉⴳⴰⵏ ⵏ ⵜⵙⴳⴳⵉⵡⵉⵏ ⴳⴳⵓⵜⵏⵉⵏ ⵏ ⵉⴼⵔⵉⵇⵢⴰ ⴰⵔ ⴷ ⵜⴼⴼⵉⵏ ⵉⵎⵍⵢⴰⵕⵏ ⵏ ⵉⵎⵜⵔⵓⵢⵏ ⵏ ⵡⴰⵎⴰⵏ ⵖⵓⵙⵏⵉⵏ ⵙ ⵢⵉⵍⵏ, ⵥⴹⴰⵕⵏⵜ ⵜⴰⴳⴰⵏⵉⵏ ⵏ ⵉⴼⵔⵉⵇⵢⴰ ⴰⴷ ⴼⴽⵉⵏⵜ ⵜⴰⵢⵙⴰ ⵉ ⵉⵎⵓⴷⴰⵔ ⵍⵍⵉ ⵉⵥⴹⴰⵕⵏ ⴰⴷ ⴰⴽⴽⴰⵏ ⴰⵜⵛⵓ ⵉ ⵓⴳⵣⵣⵓⵎ ⵉⴳⴳⵓⵜⵏ ⵏ ⵉⴼⴳⴰⵏⵏ, ⴷ ⴰⵙⵖⵍ ⴰⵅⴰⵜⴰⵔ ⵏ ⵉⵄⵔⵔⵉⵎⵏ ⵥⴹⴰⵕⵏⵉⵏ ⵉ ⵜⵡⵓⵔⵉ ⴷ ⵓⴼⴰⵔⵙ ⴳⴰⵏ ⵙⴳ ⵉⵎⵣⴷⴰⵖⵏ ⵏ ⵓⵎⵏⵥⴰⵡ ⵏⵏⵖ.

ⵎⴰⵏⵉ ⵖ ⵜⵍⵍⴰ ⵜⵎⵓⴽⵔⵉⵙⵜ ? ⵉⴳⴰ ⵜⵉⴷⵜ ⵎⴰⵙ ⴷ ⵜⵉⵎⵓⴽⵔⵉⵙⵉⵏ ⵏ ⵓⵏⵣⵡⵉ ⵟⵟⴰⴼⵏⵜ ⴰⴷⵔⵉⵣ ⴼ ⵜⴼⵍⵍⴰⵃⵜ ⵜⴰⴼⵔⵉⵇⵉⵜ, ⵍⵍⵉⵖ ⴰⴷ ⵜⵜⴰⵡⵉⵏⵜ ⵜⵎⵓⴽⵔⵉⵙⵉⵏ ⴰⴷ ⴰⴼⵔⵉⵙ ⵏ ⵜⵏⵣⵔⵓⴼⵜ ⴷ ⵜⵖⴰⵔⵜ ⴷ ⵉⵏⴳⵉⵜⵏ. ⵎⴰⵛⵛ ⴰⵙⵙ ⴰⴷ ⵏⵥⴹⴰⵕ ⴰⴷ ⵏⵙⴽⵔ ⴰⵙⵎⴽⵍ ⵉⵖ ⵜⵍⵍⴰ ⵜⵉⵔⴰⵜ ⵜⴰⵙⵔⵜⴰⵏⵜ ⴷⴰⵔ ⵡⴰⵎⵓⵏ ⴰⴳⵔⴰⵖⵍⴰⵏ. ⴳ ⵓⵎⵏⴰⴹ ⴰⴷ, ⵔⵉⵖ ⴰⴷ ⴷⵉⴷⵓⵏ ⵙⴰⵇⵙⴰⵖ ⴼ ⵓⵙⵖⵡⵏ ⵏ ⵉⵎⴼⴽⴰⵏ ⵉⴳⵔⴰⵖⵍⴰⵏⵏ ⴷ ⵜⵓⴷⴷⵉⵙⵉⵏ ⵉⵡⵉⵏⵉⵏ ⵚⴰⵃⴰ ⵉ ⵜⵎⵔⴰⵡⵉⵏ ⵏ ⵉⵙⴳⴳⵯⴰⵙⵏ, ⴷ ⴰⵔ ⴰⵙⵏⵜ ⵓⴽⴰⵏ ⵙⵓⵍ ⵉⵜⵜⵚⵉⵃⵉ, ⵙ ⵓⵙⴳⵓⴼⵙⵓ ⵏ ⵡⴰⴽⴰⵍ ⵙ ⵜⵎⴳⵓⵔⵉ ⵉⴳⴳⵓⵜⵏ, ⴰⵙⴽⵔ ⵙ ⵉⵙⵖⵡⴰⵏ ⵏⵏⵙⵏⵜ ⴳ ⵉⴳⵔⴰⵡⵏ ⵏ ⵜⵎⵢⴰⵇⵇⴰⵏⵜ ⵏ ⵜⵎⵜⵜⴰ ⵎⵓⵏⵏⵉⵏ ⵅⴼ ⵉⵙⵏⴼⵍⵏ ⵏ ⵓⵏⵣⵡⵉ ⵙⵍⴰⵡⴰⵏ ⴰⴽⴽⵯ ⴰⴳⵔⴰⵡ ⵏ ⴱⴰⵔⵉⵣ (Cop 21) ⴷ ⵓⴳⵔⴰⵡ ⵏ ⵡⴰⵎⵓⵏ ⵏ ⵡⴰⴽⵓⵛ (Cop 22) ⴷ ⵓⵙⵙⵥⵕⴼ ⵏ “ⵓⴼⵏⵉⵇ ⴰⵣⴳⵣⴰⵡ ⵉ ⵓⵏⵣⵡⵉ”, ⵉⴳⴰⵏ ⵡⵉⵏ ⵜⵎⵉⵣⴰⵔ ⵣⵣⵉⴳⵣⵏⵉⵏ ⵜⵜⴰⵡⴹⵕⵕⴰⵏⵉⵏ ⴳ ⵡⴰⵍⴰⵢ ⵏ ⵜⵔⵖⵉ ⵏ ⵡⴰⴽⴰⵍ, ⵖ ⵏⵉⵜ ⵜⵍⵍⴰ ⵉⴼⵔⵉⵇⵢⴰ ⵓⵔ ⵉⵜⵜⴰⵡⵙⵏ ⵖⴰⵙ ⵙ 4 % ⵏ ⵉⴳⴰⵣⵏ ⵙⴽⴰⵔⵏⵉⵏ ⵜⵉⵔⵖⵉ ⵏ ⵡⴰⴽⴰⵍ.

ⵍⵍⴰⵏⵜ ⵜⵎⵏⵜⵍⵉⵏ ⵢⴰⴹⵏⵉⵏ ⵍⵍⵉ ⵏⵥⴹⴰⵕ ⴰⴷ ⵏⵣⵣⵔⵉ  ⵍⵍⵉ ⵓⴽⴰⵏ ⵙⵓⵍ ⵉⵙⴱⴷⴷⴰⴷⵏ ⵜⴰⵣⵣⵉⴳⵣⵜ ⵏ ⵉⵖⴱⵓⵍⴰ ⵏ ⵓⵜⵛⵓ ⴳ ⵉⴼⵔⵉⵇⵢⴰ: ⵜⴰⴼⵍⵍⴰⵃⵜ ⴷ ⵍⴽⵙⵉⴱⵜ ⴷ ⵜⴳⵯⵎⵔⵜ ⵜⴰⵢⵍⴰⵏⵜ. ⵍⵍⵉⵖ ⵉⴷⵔⵓⵙ ⵓⵙⵙⵥⵕⴼ, ⵓⵔ ⵔⴰⵔ ⵉⵜⵜⴰⵡⵙ ⴰⴷ ⵉⵍⵉⵏ ⵉⵙⵏⴼⴰⵔⵏ ⵉⵅⴰⵜⴰⵔⵏ ⴷ ⵉⵙⵜⵔⴰⵜⵉⵊⵉⵢⵏ ⵍⵍⵉ ⵔⴰⴷ ⵉⵙⵏⴼⵍ ⵜⵉⵥⴹⴰⵕⵉⵏ ⵏ ⵉⴼⵔⵉⵇⵢⴰ ⴳ ⵉⴳⵔⴰⵏ ⴰⴷ ⵙ ⵡⴰⵢⴷⴰ, ⵍⵍⵉ ⵓⵔ ⵜⵍⵍⵜ ⵜⴻⵜⵉⴽⵏⵓⵍⵓⵊⵉⵜ ⴷ ⵢⵓⵙⴰ, ⵜⴰⴼⵍⵍⴰⵃⵜ ⴳ ⵉⴼⵔⵉⵇⵢⴰ ⵙ ⵓⵎⴰⵜⴰ ⵜⴳⴰ ⵜⵉⵏ ⵜⵓⴷⵔⵜ ⴷ ⵜⵇⴱⵓⵔⵜ, ⵍⵍⵉⵖ ⴷⵔⵓⵙⵏⵜ ⵜⵥⴹⴰⵕⵉⵏ, ⵓⵔ ⵏⵥⴹⴰⵕ ⴰⴷ ⵏⵙⴽⵔ ⵜⵓⵚⴽⵉⵡⵉⵏ ⵍⵍⵉ ⵔⴰⴷ ⵢⴰⵡⵙ ⴳ ⵓⵙⵎⵓⵙⵙⵓ ⵏ ⵡⴰⵎⴰⵏ, ⴰⵢⵍⵍⵉ ⵓⵔ ⵉⵜⵜⴰⵡⵙⵏ ⴳ ⵜⵉⵍⵉⵜ ⵏ ⵜⴼⵍⵍⴰⵃⵜ ⵉⵙⵡⴰⵏ ⵉⵟⵟⴰⴼⵏ ⵜⴰⵢⴰⴼⵓⵜ ⵉⴳⴳⵓⵜⵏ ⵉⴳⴰⵏ ⵜⴰⵙⵓⵍⴰⵏⵜ.  

ⵃⵎⴰ ⴰⴷ ⵏⵙⵏⴼⵍ ⵜⴰⴽⵙⵓⵍⵉⵜ ⴰⴷ, ⵉⵇⵇⴰⵏ ⴷ ⵜⵉⴽⴽⵍⵉⵜ ⵢⴰⴹⵏⵉⵏ ⴼ ⵜⵔⴰⴱⴱⵓⵜ ⵜⴰⴳⵔⴰⵖⵍⴰⵏⵜ ⴰⴷ ⵜⵙⵔⵙ ⵜⵉⵏⵉⵎⴰⵏⵉⵏ ⵏⵏⵙ ⵜⵉⵏⴰⵎⵎⴰⵙⵉⵏ, ⴷ ⵓⵙⵉⵣⵡⵔ ⵏ ⵜⵏⵓⴼⴰ ⵜⵉⵏⴰⵎⵓⵔⵉⵏ ⵙ ⵓⵙⵔⵅⵓ ⵏ ⵓⵙⵎⴰⵜⵜⵉ ⵏ ⵜⴻⵜⵉⴽⵏⵓⵍⵓⵊⵉⵜ ⴷ ⵉⴷⴳⴰⵔⵏ ⴷ ⵉⵙⵍⴽⵉⵏⵏ ⵏ ⵜⵡⴰⴼⵉⵜ ⴷ ⵜⵢⴰⴼⵓⵜⵉⵏ ⵏ ⵓⵔⵣⵣⵓ ⴰⵎⴰⵙⵙⴰⵏ ⴷ ⵜⴻⵜⵉⵇⵏⵉⵢⵉⵏ ⵏ ⵓⴼⴰⵔⵙ, ⵙ ⵜⵎⵉⵣⴰⵔ ⵏ ⵓⵎⵏⵥⴰⵡ ⵏⵏⵖ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⴷⴰⵜ ⵏ ⵉⴽⴰⵍⵉⵡⵏ ⵏ ⵜⴼⵍⵍⴰⵃⵜ ⴷ ⵜⵥⴹⴰⵕⵉⵏ ⵜⵉⵏⴼⴳⴰⵏⵉⵏ, ⵉⵟⵟⴰⴼ ⵓⵎⵏⵥⴰⵡ ⵏⵏⵖ ⵉⵙⵓⴳⴰⵎ ⴰⵢⵍⴰⵏⵏ ⴳⴳⵓⵜⵏⵉⵏ, ⴳⵉⵙ ⵓⴳⴳⴰⵔ ⴱ 13 ⵎⵍⵢⵓⵏ ⵏ ⵓⴽⵉⵍⵓⵎⵉⵟⵕ ⵏ ⵓⴷⵖⴰⵔ ⴰⵢⵍⴰⵏ, ⴷ 6.5 ⵏ ⵎⵍⵢⵓⵏ ⵏ ⵓⴽⵉⵍⵓⵎⵉⵟⵔ ⵏ ⵡⴰⴽⴰⵍ ⴰⵎⵏⵥⴰⵡ ⴳ ⵍⵍⴰⵏ ⵉⵙⵓⴳⴰⵎ ⴳⴳⵓⵜⵏⵉⵏ, ⴳⵉⵙ ⵓⵍⴰ 26 ⵏ ⵜⵎⵉⴹⵉ ⵏ ⵓⴽⵉⵍⵓⵎⵉⵟⵔ ⵏ ⵓⴼⵜⴰⵙ ⵍⵍⵉ ⵉⴳⴰⵏ ⵉⴳⵔ ⵏ ⵜⵉⵍⴰⵍ ⵅⴰⵜⵔⵏⵉⵏ ⴷ ⵉⵙⵏⴼⵍⵏ ⵉⵏⵙⴱⴰⴱⵏ ⵉⵎⵏⵥⴰⵡⵏ ⴷ ⵉⴳⵔⴰⵖⵍⴰⵏⵏ ⴳⴳⵓⵜⵏⵉⵏ ⴳ ⵉⵍⵍⴰ ⵚⴰⵃⴰ.

ⵉⵇⵇⴰⵏ ⴷ ⴰⴷ ⵏⵙⵡⵉⵏⴳⵎ ⵖ ⵓⵏⵛⴽ ⵏ ⵜⵥⴹⴰⵕⵉⵏ ⵍⵍⵉ ⵔⴰⴷ ⵙⴽⵔⵏ ⵉⵎⴰⵙⵙⵏ ⴰⴷ ⵏ ⵡⴰⵍⴰⵢ ⵉ ⵓⴼⴰⵔⵙ ⵏ ⵓⵜⵛⵓ ⴷ ⵓⵙⵎⵖⵔ ⵏ ⵜⵎⴳⵓⵔⴰ ⵏ ⵓⵜⵛⵓ ⴳⴰⵏⵉⵏ ⵜⵉⵎⵣⵡⵓⵔⴰ.

ⵖⵎⴽ ⵍⵍⵉ ⵉⵟⵟⴰⴼ ⵓⵎⵏⵥⴰⵡ ⵏⵏⵖ ⵜⵉⵥⴹⴰⵕⵉⵏ ⵜⵉⵅⴰⵜⴰⵔⵉⵏ ⵏ ⵓⴼⴰⵔⵙ ⵏ ⵜⵥⴹⴰⵕⵜ ⵙⴳ ⵉⵖⴱⵓⵍⴰ ⵉⵎⴰⵢⵏⵓⵜⵏ, ⵢⵉⵥⴹⵉⵕ ⴰⴷ ⵉⴳ ⴰⵎⵣⵡⴰⵔⵓ ⴰⴳⵔⴰⵖⵍⴰⵏ ⴳ ⵢⵉⴳⵔ ⴰⴷ.

ⴷⴰⵜ ⵏ ⵜⴻⵜⵉⴽⵏⵓⵍⵓⵊⵉⵢⵉⵏ ⴷ ⵓⵙⵙⵥⵕⴼ ⴷ ⵜⵙⵓⴳⴰⵔ, ⵉⵇⵇⴰⵏ ⴰⵖ ⴷ ⴳ ⵉⴱⵕⵍⴰⵎⴰⵏⵏ ⵉⴼⵔⵉⵇⵉⵢⵏ ⴰⴷ ⵏⵎⵎⴰⵖ ⴼ ⵜⵏⵓⴼⴰ ⵏ ⵓⴼⴰⵔⵙ ⵏ ⵓⵜⵛⵓ ⴷ ⵓⴱⵟⵟⵓ ⵏⵏⵙ. ⴳ ⵓⵎⵏⵉⴷ ⴰⴷ, ⵉⵇⵇⴰⵏ ⴷ ⴰⴷ ⵏⵎⵎⴰⵖ ⴼ ⵜⵙⵓⵍⴰⵏⵜ ⴳ ⵓⴼⴰⵔⵙ ⴰⵏⴼⵍⴰⵃ, ⴷ ⵓⵙⵎⵖⵔ ⵏ ⵜⴼⵍⵍⴰⵃⵜ ⵏ ⵜⵎⵢⵉⵡⴰⵙⵜ ⵖ ⵟⵟⴰⴼⵏⵜ ⵜⵎⵖⴰⵔⵉⵏ ⴰⴷⵖⴰⵔ ⵏ ⵜⵣⵡⵉⵔⵉ.

ⵉⵙⵖⴰⵡⵙⴰ ⴽⵓⵍⵍⵓ ⵎⴰ ⴰⵏⵏ ⵙ ⵜⵎⵢⵉⵎⴰⵏⵜ ⴳ ⵜⵥⴹⴰⵕⵉⵏ ⵏⵏⵖ ⴷ ⵓⵛⵛⵉⵍ ⵏ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ, ⴷ ⴰⴷ ⵏⴼⵔⴽ ⵎⴰⵙ ⵜⴳⴰ ⵉⴼⵔⵉⵇⵢⴰ ⵜⴰⵎⵏⵥⴰⵡⵜ ⵏ ⵉⵎⴰⵍ ⴷ ⵡⴰⵏⵏⴰⵣⵏ ⵏ ⵉⵎⴰⵍ, ⵎⴰⵅⵅ ⴰⵙⵙ ⴰⴷ ⵜⵍⵍⴰ ⴳ ⵓⴳⵏⵙ ⵏ ⵓⵎⵃⵉⵣⵡⴰⵔ ⴰⴳⵔⴰⵖⵍⴰⵏ ⴰⵅⴰⵜⴰⵔ, ⴰⵢⵍⵍⵉ ⵏⵉⵜ ⵙⴷⴷⵉⴷⵏ ⴽⵉⴳⴰⵏ ⵏ ⵉⵎⴰⵙⵙⵏ ⵉⵜⵜⵓⵏⵏⴰⵏ ⵎⴰⵙ ⴳⴰⵏⵜ ⵜⵉⵏ ⵜⵎⴷⵔⴰⵡⵜ ⴰⴽⴷ ⵉⴼⵔⵉⵇⵢⴰ. ⵎⴰⵅⵅ ⵔⴰⵏⵜ ⴽⵉⴳⴰⵏ ⵜⵓⴷⴷⵉⵙⵉⵏ ⵜⵉⵅⴰⵜⴰⵔⵉⵏ ⴰⴷ ⵟⵟⴼⵏⵜ ⴰⴷⵖⴰⵔ ⴰⴷⵎⵙⴰⵏ ⴳ ⵉⴼⵔⵉⵇⵢⴰ ⴳ ⵓⵎⵏⴰⴹ ⴳ ⵜⵙⵏⵎⴰⵍⴰ ⵜⵎⴰⵢⵜⵜⵉⵜ ⵏ ⵉⵚⴰⵃⴰⵜⵏ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⴳⴽⵔⴰⵢⴳⴰⵜⴰⵏⵎⵓⵇⵇⴰⵔ ⴰⴼⵔⵉⵇⵉ, ⴰⵔ ⴷ ⴽⵜⵜⵉⵖ ⴰⵡⴰⵍ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⴳ ⵉⵏⴰⵡ ⵏⵏⵙ ⴰⵎⵣⵔⴰⵢ ⴳ ⵓⴳⵔⴰⵡ ⵡⵉⵙ 28 ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ ⴰⵙⵙ ⵏ 31 ⵉⵏⵏⴰⵢⵔ 2017 ⴳ ⴰⴷⵉⵙ ⴰⴱⴰⴱⴰ ⵍⵍⵉⵖ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ: “ⵜⵍⴽⵎ ⵜⵉⵣⵉ ⴰⴷ ⵜⴰⵎⵥ ⵉⴼⵔⵉⵇⵢⴰ ⴰⵢⴷⴰ ⵏⵏⵙ. ⴷⴼⴼⵉⵔ ⵏ ⵜⵎⵔⴰⵡⵉⵏ ⵏ ⵉⵙⴳⴳⵯⴰⵙⵏ ⵏ ⵜⵓⴽⴽⵕⴹⴰ ⵏ ⵡⴰⵢⴷⴰ ⵏ ⵉⴽⴰⵍⵉⵡⵏ ⵉⴼⵔⵉⵇⵉⵢⵏ. ⵜⵇⵇⴰⵏ ⴷ ⵜⵡⵓⵔⵉ ⵉ ⵓⵙⴽⵔ ⵏ ⵜⴼⵔⴽⴰ ⵜⴰⵎⴰⵢⵏⵓⵜ ⵏ ⵓⴱⵓⵖⵍⵓ”. ⵉⵙⵎⴷ ⵡⴰⵡⴰⵍ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.

ⵙ ⵓⵎⵙⴰⵙⴰ ⴷ ⵓⵙⵎⴰⵇⵇⵍ ⴰⴷ ⴰⴳⵍⴷⴰⵏ ⵉⵎⵎⴰⵖⵏ ⴼ ⵜⵏⵓⴼⴰ ⵏ ⵉⴼⵔⵉⵇⵢⴰ, ⵉⵇⵇⴰⵏ ⴰⴷ ⵏⵙⵙⴽⵯⵜⵉ ⵉⵙⵏⴼⴰⵔⵏ ⵉⵏⴼⵍⴰⵃⵏ ⵉⵎⵣⵡⵓⵔⴰ ⴱⴷⴷⵏⵉⵏ ⴼ ⵜⵎⴷⵔⴰⵡⵜ ⵚⴰⵃⴰ-ⵚⴰⵃⴰ ⵍⵍⵉ ⵜⵙⴽⴰⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⴽⵉⴳⴰⵏ ⵏ ⵜⵎⵉⵣⴰⵔ ⵜⴰⵢⵜⵎⴰⵜⵉⵏ ⴳ ⵉⴼⵔⵉⵇⵢⴰ, ⴰⵎ ⵜⵉⴳⵯⵎⵎⴰ ⵜⵉⵏⴼⵍⴰⵃⵉⵏ ⵜⵉⴼⵔⵉⵇⵉⵢⵉⵏ, ⴷ ⵜⵙⵏⵜⴰⵢⵜ ⵏ ⵓⵎⵢⴰⵙⴰ ⵏ ⵜⴼⵍⵍⴰⵃⵜ ⵜⴰⴼⵔⵉⵇⵉⵜ (les trois AAA) ⴷ ⵉⵙⵏⴼⴰⵔⵏ ⵏ ⵜⵔⴰⴱⴱⵓⵜ ⵏ ⵓⵙⵉⵔⴰ ⴰⵛⴰⵔⵉⴼ ⵏ ⵍⴼⵓⵚⴼⴰⵟ ⵍⵍⵉ ⵉⴳⴰⵏ ⵜⴰⵎⵣⵡⴰⵔⵓⵜ ⴳ ⵓⵙⵎⵖⵔ ⵏ ⵜⴼⵍⵍⴰⵃⵜ ⵜⴰⴼⵔⵉⵇⵉⵜ ⴷ ⵓⵙⵉⵥⴹⵕ ⵏ ⵉⴼⵍⵍⴰⵃⵏ ⵉⴼⵔⵉⵇⵉⵢⵏ ⴳ ⵍⴰⵏⴳⵔⵉⵢⴰⵜ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⴳ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ ⴷ ⵜⵎⴰⵖⵜ ⵏ ⵓⵚⴽⵓ ⵏ ⵜⴳⵎⵉ ⴷ ⵜⴷⵉⵎⵓⵇⵔⴰⵟⵉⵜ ⴷ ⵜⵏⴼⵔⵓⵜ ⵏ ⵓⵜⵛⵓ, ⵉⵇⵇⴰⵏ ⴰⴷ ⴰⴷ ⵏⵙⵡⵓⵔⵉ ⵙ ⵜⵎⴰⵢⵜⵜⵉⵜ ⵏ ⵓⵎⵢⴰⵡⴰⵙ ⴷ ⵓⵙⵡⵓⵔⵉ ⵙ ⵜⵙⵜⵔⴰⵜⵉⵊⵉⵜ ⵏ ⵓⵎⵢⴰⵡⴰⵙ ⴷ ⵜⵣⵣⵉⴳⵣⵜ ⵙ ⵉⵎⴰⵍ ⴷ ⵓⵙⴷⵓⵙ ⵏ ⵜⵡⵉⵣⵉ ⴷ ⵜⵎⴷⵔⴰⵡⵜ ⴳ ⵜⵍⵍⴰ ⵜⵣⵔⴼⵜ ⵙ ⵓⵔⵓⵢ ⵙ ⵓⵎⵣⵔⵓⵢ ⴷ ⵜⵎⵙⵉⵔⵉⵏ ⵏⵙ ⴷ ⵜⴷⵉⵏⴰⵎⵉⵜ ⵏⵏⵙ ⴷ ⵉⵎⵉⵥ ⵏ ⵜⵎⵙⵉⵔⵉⵏ ⵙⴳ ⵉⵎⴰⵖⵏ ⴷ ⵜⴰⵙⵙⴰⵙⵉⵏ.

ⵖⵎⴽ ⴰⵏⵏ ⴰⴼ ⴷ ⵉⵇⵇⴰⵏ ⵓⵡⵇⵇⵔ ⵏ ⵜⵎⵥⵍⴰⵢⵉⵏ ⵏⵏⵖ ⵜⵉⴷⵍⵙⴰⵏⵉⵏ ⴷ ⵜⵎⵔⴰⵍⵉⵏ ⴷ ⵜⴷⵍⵙⵉⵡⵉⵏ ⵜⵉⴼⵔⵉⵇⵉⵢⵉⵏ ⴷⵔⴰⵏⵉⵏ ⵟⵟⴰⴼⵏⵉⵏ ⴰⵎⵏⴰⴷ ⴳⵉⵏⵜ ⵉⵎⵉⵙⵙ ⵏ ⵡⴰⵍⴰⵢ ⵏ ⵜⴳⵎⵉ.

ⴳ ⵎⴰⵕⵕⴰ ⵎⴰ ⴰⵏⵏ, ⵍⵍⴰⵏ ⵜ ⴼ ⵉⴱⵕⵍⴰⵎⴰⵏⵏ ⵏⵏⵖ ⵜⵉⵎⴰⵙⴰⵢⵉⵏ ⵜⵉⵅⴰⵜⴰⵔⵉⵏ ⵍⵍⵉ ⴷ ⵉⵇⵇⴰⵏ ⴰⴷ ⵏⴰⵙⵉ ⵙ ⵓⵖⵣⵏ ⵉⴱⴷⴷⵏ ⵍⵍⵉ ⴷ ⵉⵇⵇⴰⵏ ⴰⴷ ⵙⵔⵙ ⵏⵙⴽⵔ ⵉⵖ ⵏⴻⵏⵄⵕ ⴼ ⵜⵏⵓⴼⴰ ⵏ ⵓⵎⵏⵥⴰⵡ ⵏⵏⵖ.

ⴰⵔ ⴷⴰⵖ ⵙⵔⵓⵏ ⵙⴱⵔⵔⴰⴽⵖ ⴷ ⴰⵔ ⴽⵯⵏ ⵙⵏⵉⵎⵎⵉⵔⵖ ⴼ ⵓⵙⵙⴼⵍⴷ ⵏⵏⵓⵏ.