ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵙⵇⴰⴷ ⵏ ⵍⴱⵕⴰⵥⵉⵍ ⵍⵍⵉ ⵉⵙⵓⵜⴳⵏ ⵜⵉⵍⴰⵍⵜ ⵜⴰⵎⵣⵡⴰⵔⵓⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵖ ⵓⵙⴷⵓⵙ ⵏ ⵓⵎⵢⴰⴷⴰⵙ ⵏⴳⵔ ⵜⵖⵔⵎⵉⵡⵉⵏ ⴷ ⵉⵙⴳⴷⴰⵏ
ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵙⵙ ⵏ ⵓⴽⵕⴰⵙ 14 ⴽⵟⵓⴱⵕ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ ⵎⴰⵙⵙ JULIO GLINTERNICK BITELLI ⴰⵎⵙⵇⴰⴷ ⵏ ⵜⴳⴷⵓⴷⴰⵏⵜ ⵏ ⵍⴱⵕⴰⵥⵉⵍ ⵖ ⵕⵕⴱⴰⵟ, ⵖ ⵓⵔⵣⴰⴼ ⵏ ⵓⵎⵢⴰⵙⵙⴰⵏ ⵍⵍⵉⵖ ⵉⴳⴰ ⴰⵎⵙⵇⴰⴷ ⴰⵎⴰⵢⵏⵓ ⵖ ⵜⴳⵍⴷⵉⵜ.
ⵖ ⵜⵣⵡⵉⵔⵉ ⵏ ⵓⵏⵎⵓⵇⵇⴰⵔ, ⵉⵙⵓⵜⴳ ⵎⴰⵙⵙ ⴰⵎⵙⴰⵇⴰⴷ “ⵉⵙⵡⵓⴷⴷⵓⵜⵏ ⵉⵎⵣⵡⵓⵔⴰ ⴷ ⵉⴱⵃⵏⵏⵉⵢⵏ” ⵍⵍⵉ ⵜⵙⴽⵔ ⵜⴳⵍⴷⵉⵜ, ⵙ ⵉⵙⵡⴰⵍⴰⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⴷ ⵉⴷⵔⵉⵣⵏ ⵏⵏⵙ, ⵖⵎⴽ ⵍⵍⵉ ⵉⵙⵓⵜⴳ ⵜⵉⵍⴰⵍⵜ ⵜⴰⵎⵣⵡⴰⵔⵓⵜ ⵏ ⴱⴰⴱ ⵏ ⵡⴰⴷⴷⵓⵔ ⵖ ⵓⵙⴷⵓⵙ ⵏ ⵓⵎⵢⴰⴷⴰⵙ ⵏⴳⵔ ⵜⵖⵔⵎⵉⵡⵉⵏ ⴷ ⵉⵙⴳⴷⴰⵏ, ⵉⴱⴷⵔ ⵜⴰⵎⴰⵖⵜ ⵏ ⴱⴰⴱ ⵏ ⵡⴰⴷⴷⵓⵔ ⵖ ⵓⴼⵔⴰⴳ ⵏ ⵡⴰⵢⴷⴰ ⴰⴷⵙⵍⴰⵏ ⵓⴷⴰⵢ ⴰⵎⵖⵔⵉⴱⵉ, ⴷ ⵓⵙⵏⵓⴱⴳ ⵏ ⴱⴰⴱ ⵏ ⵡⴰⴷⴷⵓⵔ ⵏ ⵍⴱⴰⴱⴰ “ⴼⵕⴰⵏⵚⵡⴰ” ⵖ 2019. ⵉⵣⵎⵎⵉⵎ ⵎⴰⵙ ⵉⵜⵜⵓⵙⵙⴰⵏ ⵍⵎⵖⵔⵉⴱ ⴷ ⵍⴱⵕⴰⵥⵉⵍ ⵙⴳ ⵣⵉⴽⴽ ⵙ ⵓⴱⵓⵖⵍⵓ ⵏⵏⵙⵏ ⴰⵖⵔⵎⴰⵏ ⴷ ⵓⵏⵏⵓⵕⵥⵎ ⵏⵏⵙⵏ ⴼ ⴽⵓ ⵜⴰⴷⵍⵙⵉⵡⵉⵏ.
ⵉⵙⵉⵙⴼⵉⵡ ⵎⴰⵙ ⴰⵎⵙⵇⴰⴷ ⵎⴰⵙ ⵉⵎⵓⵏ ⵍⵎⵖⵔⵉⴱ ⴷ ⵍⴱⵕⴰⵥⵉⵍ ⵖ ⵜⵣⴷⴰⵢⵉⵏ ⵜⵉⵇⴱⵓⵔⵉⵏ ⵍⵍⴰⵏⵉⵏ ⵙⴳ ⵜⴰⵙⵓⵜ ⵜⵉⵙ ⵜⵥⴰⵜ ⴷ ⵎⵔⴰⵡⵜ, ⵢⵉⵏⵉ ⵎⴰⵙ ⵍⵍⴰⵏ ⴽⵉⴳⴰⵏ ⵏ ⵉⴱⵕⴰⵥⵉⵍⵉⵢⵏ ⴳⴰⵏⵉⵏ ⴰⵢⵜ ⵍⵎⵖⵔⵉⴱ. ⵖⵎⴽ ⵍⵍⵉ ⵉⵙⴷⴷⵉⴷ ⴼ ⵡⴰⴷⴷⴰⴷ ⵏ ⵜⵎⴰⵣⵉⵔⵜ ⵏⵏⵙ ⵖ ⵓⵎⵓⴽⵔⵉⵙ ⵉⵜⵜⵓⵙⴽⴰⵔⵏ ⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ, ⵢⵉⵏⵉ “ⴰⵔ ⵜⵥⵕⵕⴰ ⵍⴱⵕⴰⵥⵉⵍ ⵜⵓⴳⴳⴰⵙ ⵏ ⵜⴳⵍⴷⵉⵜ ⵉ ⵓⴼⵙⴰⵢ ⵏ ⵜⵎⵓⴽⵔⵉⵙⵜ ⵎⴰⵙ ⴳⴰⵏⵜ ⵜⵉⵏ ⵜⵉⵍⴰⵡⵜ ⴷ ⵜⵉⴷ ⵖⵥⴰⵏⵏⵉⵏ, ⵏⵜⵜⴰⵜ ⵜⵍⵍⴰ ⴷ ⵓⴱⵔⵉⴷ ⵏ ⵓⴼⵓⴽⴽⴰ ⵏ ⵜⵎⵜⵜⴰ ⵉⵎⵓⵏⵏ ⵃⵎⴰ ⴰⴷ ⵢⵉⵍⵉ ⵓⴼⵙⴰⵢ ⴰⵣⵔⴼⴰⵏ ⴷ ⵡⵉⵏ ⵜⵉⵍⴰⵡⵜ ⵉⵜⵜⵓⵇⴱⴰⵍⵏ ⴷⴰⵔ ⴽⵓ ⵜⴰⵙⴳⵉⵡⵉⵏ”.
ⵖ ⵓⵙⵡⵉⵔ ⴰⴷⵎⵙⴰⵏ, ⵉⵙⴷⴷⵉⴷ ⵎⴰⵙⵙ ⴰⵎⵙⵇⴰⴷ ⵎⴰⵙ ⵍⵍⴰⵏⵜ ⵜⵥⴹⴰⵕⵉⵏ ⵜⵉⵅⴰⵜⴰⵔⵉⵏ ⵉ ⵓⵙⴱⵓⵖⵍⵓ ⵏ ⵓⵙⵏⴼⵍ ⵏ ⵓⵙⵖⵏⵣⵉ ⴷ ⵜⴷⵎⵙⴰ ⵏⴳⵔ ⵙⵏⴰⵜ ⵜⵎⵉⵣⴰⵔ ⵙⵍⴰⵡⴰⵏ ⴰⴽⴽⵯ ⵖ ⵢⵉⴳⵔ ⵏ ⵜⴼⵍⵍⴰⵃⵜ, ⵉⵖⵔ ⴰⴷ ⵢⵉⵍⵉ ⵓⵙⵎⵢⴰⵏⴰⵡ ⵏ ⵜⵣⴷⴰⵢⵉⵏ ⵜⵉⴷⵎⵙⴰⵏⵉⵏ ⵃⵎⴰ ⴰⴷ ⵉⵍⵉⵏⵜ ⴼ ⵉⴳⵔⴰⵏ ⵉⵎⴰⵢⵏⵓⵜⵏ ⴰⵎ ⵜⴰⵜⵉⴽⵏⵓⵍⵓⵊⵉⵜ ⴷ ⵜⵎⴳⵓⵔⵉ.
ⵖ ⵜⵙⴳⴰ ⵏⵏⵙ, ⵉⵙⵙⴽⵜⵉ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵔⵣⴰⴼ ⴰⵎⵣⵔⴰⵢ ⵍⵍⵉ ⵉⵙⴽⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵍⴱⵕⴰⵥⵉⵍ ⵖ 2004, ⵍⵍⵉ ⵉⵕⵥⵎⵏ ⵉⵎⵏⵉⴷⵏ ⵉⵎⴰⵢⵏⵓⵜⵏ ⵉ ⵓⵎⵢⴰⵡⴰⵙ ⵏⴳⵔ ⵙⵏⴰⵜ ⵜⵎⵉⵣⴰⵔ. ⵢⵉⵏⵉ ⵎⴰⵙ ⵉⴳⴰ ⵍⵎⵖⵔⵉⴱ ⵜⴰⵎⴰⵣⵉⵔⵜ ⵜⴰⴼⵔⵉⵇⵉⵜ ⵜⴰⵎⵣⵡⴰⵔⵓⵜ ⵉⵙⵙⵏⵏ ⵙ ⵜⵙⵉⵎⴰⵏⵜ ⵏ ⵍⴱⵕⴰⵥⵉⵍ ⵖ ⵜⴰⵙⵓⵜ ⵜⵉⵙ ⵜⵥⴰⵜ ⴷ ⵎⵔⴰⵡⵜ, ⴰⵢⵍⵍⵉ “ⵉⵎⵎⴰⵍⴰⵏ ⵜⵉⵣⴷⴰⵢⵉⵏ ⵏ ⵜⴷⴷⵓⴽⴽⵍⴰ ⴷⵔⴰⵏⵉⵏ ⵉⵙⵎⵓⵏⵏ ⵏⴳⵔ ⵙⵏⴰⵜ ⵜⵎⵉⵣⴰⵔ”.
ⵉⵙⵓⵜⴳ ⵎⴰⵙⵙ ⵍⵎⴰⵍⴽⵉ ⴰⴷⴷⴰⴷ ⵏ ⵍⴱⵕⴰⵥⵉⵍ ⵖ ⵜⵎⵙⴰⵔⵜ ⵏ ⵚⵚⵃⵕⴰ ⵜⴰⵎⵖⵔⵉⴱⵉⵜ, ⴷ ⵓⵙⵏⴰⵍ ⵏ ⵓⴱⵕⵍⴰⵎⴰⵏ ⴰⴱⵕⴰⵥⵉⵍⵉ ⵙ ⵙⵉⵏ ⵉⵙⵇⵇⵉⵎⵏ ⵏⵏⵙ ⵉ ⵜⵓⴳⴳⴰⵙ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵃⵎⴰ ⴰⴷ ⵢⵉⵍⵉ ⵓⴼⵙⴰⵢ ⵉⵙⵎⴷⵏ ⵉ ⵜⵎⵓⴽⵔⵉⵙⵜ ⴰⴷ ⵉⵜⵜⵓⵙⴽⴰⵔⵏ, ⵙ ⵓⵙⵜⴰⵢ ⵏ ⵙⵏⴰⵜ ⵜⵙⵖⵍⴰⴼ ⴽⴽⴰⵏⵉⵏ ⵜⴰⵎⴰ ⵏ ⵓⵏⴱⴰⴹ ⴰⵏⵉⵎⴰⵏ ⵏ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ.
ⵙ ⵜⵎⵍⴷⴰ ⴰⴷ, ⵉⵙⴰⵡⵍ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵜⵉⵔⴰⵜ ⵉⴷⵓⵙⵏ ⵉ ⵓⵙⵎⵖⵔ ⵏ ⵓⵎⵢⴰⵡⴰⵙ ⵏⴳⵔ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵖ ⵙⵏⴰⵜ ⵜⵎⵉⵣⴰⵔ, ⵢⴰⵣⵏ ⵢⴰⵜ ⵜⵖⵓⵔⵉ ⵉ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵍⴱⵕⴰⵣⵉⵍ ⵃⵎⴰ ⴰⴷ ⵉⵙⴽⵔ ⵢⴰⵏ ⵓⵔⵣⴰⴼ ⵏ ⵜⵡⵓⵔⵉ ⵉ ⵜⵎⴰⵣⵉⵔⵜ ⵏⵏⵖ ⵍⵍⵉ ⵔⴰⴷ ⵉⴳ ⴰⵣⵎⵣⵣⵓ ⵏ ⵓⵔⵣⵣⵓ ⵏ ⵉⴱⵔⵉⴷⵏ ⵏ ⵓⵙⵎⵖⵔ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⵉ ⴽⵉⴳⴰⵏ ⵏ ⵓⵎⵢⴰⵡⴰⵙ ⴷ ⵓⵎⵛⴰⵡⴰⵕ.