ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵙⵏⵓⴱⴳ ⴰⵏⵎⵀⴰⵍ ⴰⵎⴰⵜⴰⵢ ⵏ ⵜⵎⴰⴷⴷⴰⵙⵜ ⵏ ⵓⵎⴰⴹⴰⵍ ⵓⵙⵍⵉⵎ ⵉ ⵓⵙⴳⵎⵉ ⴷ ⵜⵎⴰⵙⵙⴰⵏⵉⵏ ⴷ ⵜⴷⵍⵙⴰ
ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵙⵙ ⵏ ⵓⵙⵉⵏⴰⵙ 22 ⵛⵓⵜⴰⵏⴱⵉⵔ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ ⵎⴰⵙⵙ ⵙⴰⵍⵉⵎ ⴱⵏ ⵎⵓⵃⴰⵎⵎⴰⴷ ⵍⵎⴰⵍⵉⴽ ⴰⵏⵎⵀⴰⵍ ⴰⵎⴰⵜⴰⵢ ⵏ ⵜⵎⴰⴷⴷⴰⵙⵜ ⵏ ⵓⵎⴰⴹⴰⵍ ⵓⵙⵍⵉⵎ ⵉ ⵓⵙⴳⵎⵉ ⴷ ⵜⵎⴰⵙⵙⴰⵏⵉⵏ ⴷ ⵜⴷⵍⵙⴰ “ⵉⵙⵉⵙⴽⵓ”.
ⵖ ⵜⵣⵡⵉⵔⵉ ⵏ ⵓⵏⵎⵓⵇⵇⴰⵔ, ⵉⵏⵏⴰ ⵎⴰⵙⵙ ⵙⴰⵍⵉⵎ ⴱⵏ ⵎⵓⵃⴰⵎⵎⴰⴷ ⵍⵎⴰⵍⵉⴽ ⵎⴰⵙ ⵉⴳⴰ ⵍⵎⵖⵔⵉⴱ ⵖ ⵉⵡⴰⵏⴽⵏ ⵍⵍⵉ ⵙⴽⵔⵏⵉⵏ ⴷ ⴱⴷⴷⵏⵉⵏ ⴷ ⵜⵎⴰⴷⴷⴰⵙⵜ ⵏ “ⵉⵙⵉⵙⴽⵓ”, ⵙ ⵜⵎⵍⴷⴰ ⴰⴷ ⵉⵙⵎⵏⵉⴷ ⵉⵙⵡⴰⵍⴰⵢⵏ ⵉⵙⵜⵔⴰⵜⵉⵊⵉⵢⵏ ⵏ ⵜⵡⵓⵔⵉ ⵏ ⵜⵎⴰⴷⴷⴰⵙⵜ ⵖ ⵉⵙⴳⴳⵯⴰⵙⵏ ⴷ ⵓⵛⴽⴰⵏⵉⵏ, ⴷ ⵉⵙⵏⴼⴰⵔⵏ ⵍⵍⵉ ⵔⴰⴷ ⵜⵙⴽⵔ, ⵉⵎⵍⵉ ⴷ ⵜⴰⵏⵏⴰⵢⵜ ⵜⴰⵎⴰⵢⵏⵓⵜ ⵏ ⵜⵎⴰⴷⴷⴰⵙⵜ ⵉⴱⴷⴷⵏ ⴼ ⵓⵎⵏⵣⴰⵢ ⵏ ⵜⵎⴰⴼⴰⵡⵜ ⴷ ⵓⵏⴱⴰⴹ ⵉⵥⵉⵍⵏ.
ⵉⵙⵉⵙⴼⵉⵡ ⵎⴰⵙⵙ ⴰⵏⵎⵀⴰⵍ ⴰⵎⴰⵜⴰⵢ ⵏ ⵜⵎⴰⴷⴷⴰⵙⵜ ⵏ ⵓⵎⴰⴹⴰⵍ ⵓⵙⵍⵉⵎ ⵉ ⵓⵙⴳⵎⵉ ⴷ ⵜⵎⴰⵙⵙⴰⵏⵉⵏ ⴷ ⵜⴷⵍⵙⴰ ⵎⴰⵙ ⵉⴳⴰ ⵍⵎⵖⵔⵉⴱ ⴰⵎⴷⵔⴰⵡ ⴰⴷⵙⵍⴰⵏ ⵏ ⵜⵎⴰⴷⴷⴰⵙⵜ, ⵉⴱⴷⵔ ⵜⵓⴳⵜ ⵏ ⵉⵙⵏⴼⴰⵔⵏ ⵍⵍⵉ ⵜⵙⴽⴰⵔ ⵜⵎⴰⴷⴷⴰⵙⵜ ⵖ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵖ ⵉⴳⵔⴰⵏ ⵏ ⵓⵙⴳⵎⵉ ⴷ ⵓⵙⵙⵍⵎⴷ ⴷ ⵜⴷⵍⵙⴰ ⴷ ⵓⴼⵔⴰⴳ ⵏ ⵡⴰⵢⴷⴰ. ⵉⵣⵎⵎⵉⵎ ⵎⴰⵙ ⵜⵙⴽⵔ ⵍⵉⵙⵉⵙⴽⵓ ⴷ ⴽⵉⴳⴰⵏ ⵏ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⵖ ⵓⵙⵎⴰⵇⵇⵍ ⵏ ⵓⵎⵓⴽⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴷ ⵉⵙⵡⴰⵍⴰⵢⵏ ⵏⵏⵙ ⴰⵜⵜⵓⵢⵏⵉⵏ ⴰⵖⴱⴰⵍⵓ ⵏ ⵓⵙⵓⵊⴷ ⵏ ⵉⵖⴰⵡⴰⵙⵏ ⵏ ⵜⵡⵓⵔⵉ ⵏⵏⵙⵏⵜ.
ⵖ ⵓⵎⵏⵉⴷ ⵏⵏⵙ, ⵉⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵡⵓⵔⵉ ⵏ “ⵉⵙⵉⵙⴽⵓ”, ⵢⵉⵏⵉ ⵎⴰⵙ ⴷ ⵉⴳⵍⵍⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵍⵃⴰⵙⴰⵏ ⵡⵉⵙ ⵙⵉⵏ ⴰⴷ ⵜ ⵉⵕⵃⵎ ⵕⴱⴱⵉ ⴷⴰⵔⵙ ⵜⵉⵍⴰⵍⵜ ⵜⴰⵅⴰⵜⴰⵔⵜ ⵖ ⵓⵙⴽⵔ ⵏ ⵜⵎⴰⴷⴷⴰⵙⵜ ⴰⴷ ⵖ 1982. ⵢⵉⵏⵉ ⵎⴰⵙ ⴱⴰⵀⵔⴰ ⵜⵙⵜⴰⵡⵀⵎⵎⴰ ⵜⵎⴰⴷⴷⴰⵙⵜ ⴰⴷ ⵖ ⵓⵙⵡⵉⵔ ⴰⴳⵔⴰⵖⵍⴰⵏ ⵍⵍⵉⵖ ⵍⴽⵎⵏ ⵉⵡⴰⵏⴽⵏ ⵉⴳⵎⴰⵎⵏ ⵏⵏⵙ 54 ⵏ ⵓⵡⴰⵏⴽ, ⵉⵖⵔ ⵃⵎⴰ ⴰⴷ ⵏⵏ ⵉⵍⵉⵏⵜ ⵜⵓⴳⴳⴰⵙ ⵏ ⵜⵎⴰⴷⴷⴰⵙⵜ ⴷ ⵓⵙⵏⴰⵍ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ.
ⵉⵙⵓⵜⴳ ⵎⴰⵙⵙ ⵍⵎⴰⵍⴽⵉ ⵜⵉⵙⵏⵜⴰⵢⵉⵏ ⵍⵍⵉ ⵜⵕⵥⵎ ⵜⵎⴰⴷⴷⴰⵙⵜ ⵏ “ⵉⵙⵉⵙⴽⵓ” ⵉ ⵓⵙⵏⴰⵍ ⵏ ⵜⴳⵎⵉ ⵜⴰⴷⵍⵙⴰⵏⵜ, ⴷ ⵓⵏⵏⵓⵕⵥⵎ ⴼ ⵉⵡⴰⵏⴽⵏ ⴷ ⵜⵎⴰⴷⴷⴰⵙⵉⵏ ⵢⴰⴹⵏⵉⵏ, ⴷ ⵓⵙⵏⴰⵍ ⵏ ⵓⵎⵙⴰⵡⴰⵍ ⵏⴳⵔ ⵜⵖⵔⵎⵉⵡⵉⵏ, ⴷ ⵓⵙⵙⵔⵇⴱ ⵏ ⵡⴰⵎⵓⵏ ⵏ ⵜⵓⵙⵙⵏⴰ ⴷ ⵉⵙⵏⴼⴰⵔⵏ ⵢⴰⴹⵏⵉⵏ, ⵢⵉⵏⵉ “ⵜⴳⴰ ⵉⵙⵉⵙⴽⵓ ⵢⴰⵜ ⵜⴷⵓⵙⵉ ⵉⵍⴳⴳⵯⴰⵖⵏ ⵍⵍⵉ ⴷ ⵏⴷⵔⵓ ⴰⵜⵉⴳⵏ ⴷ ⵉⵙⵡⴰⵍⴰⵢⵏ ⴳⴰⵏⵉⵏ ⵢⴰⵏ”.
ⵜⴳⴰ “ⵉⵙⵉⵙⴽⵓ” ⵢⴰⵜ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵉⵥⵍⵉⵏ ⵖ ⵉⴳⵔⴰⵏ ⵏ ⵓⵙⴳⵎⵉ ⴷ ⵜⵎⴰⵙⵙⴰⵏⵉⵏ ⴷ ⵜⴷⵍⵙⴰ, ⵜⴼⴼⵖ ⴷ ⵖ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⵓⵙⵍⵉⵎ, ⵉⵍⵍⴰ ⵓⵙⵖⵉⵎ ⵏⵏⵙ ⵖ ⵕⵕⴱⴰⵟ ⵜⴰⵎⴰⵥⵓⵏⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ.