ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⴷ ⵜⵏⵙⵙⵉⵅⴼⵜ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵜⵏⵙⵙⵉⵅⴼⵜ ⴷ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵙⵓⵜⴳⵏ ⵉⵏⴰⵡ ⴰⴳⵍⴷⴰⵏ ⴰⵎⴰⵜⵜⵓⵢ ⵍⵍⵉ ⵉⴳⴰⵏ ⵢⴰⵜ ⵜⴽⴰⵕⴹⴰ ⵏ ⵜⵡⵓⵔⵉ ⵉⴼⴰⵡⵏ ⵉ ⵖⵉⵍⴰⴷ ⴷ ⵉⵎⴰⵍ.
ⵖ ⵙⵏⴰⵜ ⵜⴼⵓⴳⵍⵉⵡⵉⵏ ⵖ ⵎⵓⵏⵏ ⵉⵎⵏⴰⴷⵏ ⵏ ⵓⵙⴳⴷ ⴷ ⵜⵏⵎⵓⵔⵉ ⴷ ⵉⵎⴰⵏ, ⵜⴰⴼⵓⴳⵍⴰ ⵏ ⵓⴷⴰⴱⵓ ⴷ ⵜⴼⵓⴳⵍⴰ ⵏ ⵜⴼⴰⵙⴽⴰ ⵜⴰⵎⴱⴰⵔⴽⵉⵜ, ⵎⵓⵏⵏ ⵉⴼⵔⴷⴰⵙ ⵏ ⵓⵙⵇⵇⵉⵎ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴷⴼⴼⵉⵔ ⵏ ⵉⵏⴰⵡ ⴰⴳⵍⴷⴰⵏ ⴰⵎⴰⵜⵜⵓⵢ ⵙ ⵜⵎⵍⴷⴰ ⵏ ⵓⴽⵜⵜⴰⵢ ⵡⵉⵙ ⵙⵉⵏ ⵉⴷⵎⵔⴰⵡ ⴷ ⵢⴰⵏ ⵖ ⵉⵍⵍⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴼ ⵓⴷⴰⴱⵓ ⵏ ⵉⵎⵣⵡⵓⵔⴰ ⵏⵏⵙ ⵉⴷ ⴱⴰⴱ ⵏ ⵡⴰⴷⴷⵓⵔ.
ⵙ ⵜⵎⵍⴷⴰ ⵏ ⵙⵏⴰⵜ ⵜⴼⵓⴳⵍⵉⵡⵉⵏ ⴰⴷ, ⵓⵣⵏⵏ ⵉⴼⵔⴷⴰⵙ ⵏ ⵓⵙⵇⵇⵉⵎ ⵜⵓⴼⵔⴰⵢⵉⵏ ⵏ ⵍⵎⴰⵃⴰⴱⴱⴰ ⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵃⴼⴹ ⵕⴱⴱⵉ, ⵖⵎⴽ ⴰⵏⵏ ⴷ ⴽⵓ ⵜⵉⴳⵓⵔⵉⵡⵉⵏ ⵏ ⵜⵎⵏⵏⵡⴰⵍⵜ ⵉⵎⵓⵏⵏ ⴷ ⵡⴰⵔⵉⴷ ⵉⵥⵉⵍⵏ ⵉ ⴱⴰⴱ ⵏ ⵡⴰⴷⴷⵓⵔ ⵙ ⴽⵉⴳⴰⵏ ⵏ ⵜⴷⵓⵙⵉ ⴷ ⵙⵙⵍⴰⵎⵜ, ⵃⵎⴰ ⴰⴷ ⵉⵙⴽⵔ ⵉ ⵓⵎⴰⴷⴰⵏ ⵏⵏⵙ ⴰⵎⵙⵓⴼⵓ ⴽⵓ ⵎⴰ ⴷ ⵉⵔⴰ ⵖ ⵜⵣⵣⵉⴳⵣⵜ ⴷ ⵓⴱⵓⵖⵍⵓ.
ⴱⴷⴷⵏ ⵉⴼⵔⴷⴰⵙ ⵏ ⵓⵙⵇⵇⵉⵎ ⴼ ⵜⴱⵔⴰⵜⵉⵏ ⵜⵉⵅⴰⵜⴰⵔⵉⵏ ⵉⵍⵍⴰⵏ ⵖ ⵉⵏⴰⵡ ⴰⴳⵍⴷⴰⵏ ⴰⵎⴰⵜⵜⵓⵢ ⵙ ⴽⵓ ⵉⵎⵏⴰⴷⵏ ⵏⵏⵙ: ⵉⵏⴼⴳⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ ⴷ ⵉⵎⵔⵙⵍⴰⵏⵏ, ⴷ ⵎⴰ ⴷ ⵓⵎⴰⵏⵜ ⵜⴱⵔⴰⵜⵉⵏ ⴰⴷ ⵖ ⵜⵎⵙⵉⵔⵉⵏ ⵙⵜⴰⵡⵀⵎⵎⴰⵏⵉⵏ ⵉⵔⴰⵏ ⴰⵙⵡⵓⵜⵜⵓ ⵏ ⵜⴰⵙⵙⴰⵙⵜ ⴷ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏⵏⵙ ⵙ ⵢⴰⵏ ⵓⵙⵎⴰⵇⵇⵍ ⴰⵙⵜⵔⴰⵜⵉⵊⵉ ⴷ ⵓⵖⴰⵡⴰⵙ ⵉⴳⴰⴷⴷⴰⵏ ⵉ ⵜⴷⵎⵙⴰ ⵉⴷⵓⵙⵏ ⴷ ⵉⵙⵎⴷⵏ ⴷ ⵜⵣⵔⴼⵜ ⵜⴰⵏⴰⵎⵓⵏⵜ ⴷ ⵜⵣⵔⴼⵜ ⵏⴳⵔ ⵜⵙⴳⴳⵉⵡⵉⵏ.
ⴱⴷⴷⵏ ⵉⴼⵔⴷⴰⵙ ⵏ ⵓⵙⵇⵇⵉⵎ ⵙ ⴽⵉⴳⴰⵏ ⵏ ⵓⵙⵓⵜⴳ ⴼ ⵜⵓⵎⴰⵢⵉⵏ ⵏ ⵉⵏⴰⵡ ⴰⴳⵍⴷⴰⵏ ⴰⵎⵣⵔⴰⵢ, ⴱⴷⴷⵏ ⵓⵍⴰ ⴼ ⵜⴷⵔⵓⵜ ⵜⴰⵏⴼⴳⴰⵏⵜ ⵜⴰⵅⴰⵜⴰⵔⵜ ⵍⵍⵉ ⵙⴰ ⵉⵥⵕⵕⴰ ⵓⴳⵍⵍⵉⴷ ⵏ ⵜⵎⴰⵣⵉⵔⵜ ⵜⴰⵔⵡⴰ ⵏ ⵓⵎⴰⴷⴰⵏ ⵏⵏⵙ ⴰⵎⵙⵓⴼⵓ, ⴷ ⵓⵅⵎⵎⴻⵎ ⴰⵅⴰⵜⴰⵔ ⵍⵍⵉ ⵉⴼⴽⴰ ⵉ ⵜⴷⵓⵙⵉ ⵏ ⵓⵏⵎⵓⵔⵉ, ⴷ ⵏⵜⵜⴰⵏ ⵉⴹⴼⵕ ⴷ ⴰⵔ ⵢⴰⴽⴽⴰ ⵉⵙⵡⴰⵍⴰⵢⵏ ⵉ ⴽⵓ ⵉⴳⵎⴰⵎⵏ ⵏ ⵓⵡⴰⵏⴽ ⵉ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⴷ ⵓⵙⵓⵊⴷ ⵏ ⴽⵓ ⵜⵉⵥⵉⴹⴰⵕ ⵉ ⵚⴰⵃⴰ ⵏ ⵓⴼⴳⴰⵏ.
ⵣⵎⵎⵉⵎⵏ ⵉⴼⵔⴷⴰⵙ ⵏ ⵓⵙⵇⵇⵉⵎ ⵙ ⴽⵉⴳⴰⵏ ⵏ ⵓⵙⵓⵜⴳ ⵉⵙⵓⵔⵙⵏ ⵏ ⵜⵡⵉⵣⵉ ⴷ ⵓⵎⵢⴰⵡⴰⵙ ⴷ ⵜⵡⵓⵔⵉ ⵜⴰⵎⵅⴰⵙⵜ ⵉⵍⵍⴰⵏ ⵖ ⵜⵎⴽⵜⵉⵜ, ⵎⴽ ⵍⵍⵉ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵃⴼⴹ ⵕⴱⴱⵉ, ⴳⵉⵏ ⴰⵖⴱⴰⵍⵓ ⵏ ⵓⵏⴰⵥⵓⵕ ⴰⵅⴰⵜⴰⵔ ⵉ ⵓⴹⴼⵕ ⵏ ⵜⵡⴰⴷⴰ ⵏ ⵓⵚⴽⵓ ⵍⵍⵉ ⴼ ⵉⵙⵎⵏⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵃⴼⴹ ⵕⴱⴱⵉ ⵜⴰⴽⴰⵕⴹⴰ ⵏ ⵜⵡⵓⵔⵉ ⴼ ⵎⵏⵏⴰⵡ ⵉⵙⵡⵉⵔⵏ.
ⵉⵡⵉⵏ ⴷ ⵉⵅⵎⵎⵉⵎⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⵅⵎⵎⴻⵎ ⵉⵙⵜⴰⵡⵀⵎⵎⴰⵏ ⴷⴰⵔ ⵉⴳⵏⵙⴰⵙ ⵏ ⵜⵎⵜⵜⵉ, ⴰⵅⵎⵎⴻⵎ ⵖ ⵉⵍⵍⴰ ⵓⵙⴳⵉⴷⴷⵉ ⴰⵎⴰⵢⵏⵓ ⵏ ⵜⵎⵣⵡⵓⵔⴰ ⴷ ⵓⵙⵡⵓⵔⵉ ⵏ ⴽⵓ ⵜⵉⵥⵉⴹⴰⵕ ⵜⵓⴷⴷⵉⵔⵉⵏ ⵏ ⵜⵎⴰⵣⵉⵔⵜ ⵏⵏⵖ ⵃⵎⴰ ⴰⴷ ⵢⵉⵍⵉ ⵓⵚⴽⵓ ⵏ ⵜⵔⵙⴰⵍ ⵏ ⵜⴷⵎⵙⴰ ⵉⴷⵓⵙⵏ ⵉⴽⵛⵎⵏ ⴰⵎⵃⵉⵣⵡⵔ, ⴷ ⵓⵙⵓⵊⴷ ⵏ ⵡⴰⵏⴰⵡ ⴰⵏⴰⵎⵓⵏ ⵉⵙⵎⴷⵏ ⵖ ⵓⵙⴰⵜⵉ ⵏ ⵓⴹⴼⵕ ⴰⵎⵔⵙⵍⴰⵏ ⴷ ⵓⵥⵕⴼⴰⵏ ⴷ ⵓⵏⴱⴰⴹ ⵉⵎⵓⵏⵏ ⴷ ⵓⵙⵡⵓⴷⴷⵓ ⵉⵥⵉⵍⵏ ⴷ ⵓⵣⴷⴰⵢ ⵏⴳⵔ ⵜⵎⴰⵙⴰⵢⵜ ⴷ ⵓⵙⵉⴹⵏ.
ⵖⵎⴽ ⵍⵍⵉ ⵉⵣⵎⵎⵉⵎ ⵓⵏⵙⵙⵉⵅⴼ ⴷ ⵉⴼⵔⴷⴰⵙ ⵏ ⵓⵙⵇⵇⵉⵎ ⵙ ⵓⵙⵓⵜⴳ ⴰⵅⵎⵎⴻⵎ ⵉⵍⵍⴰⵏ ⴷⴰⵔ ⵓⵃⵟⵟⵓ ⴰⵏⴰⵎⵓⵏ ⵉ ⴽⵓ ⵉⵎⵖⵔⵉⴱⵉⵢⵏ ⴷ ⵜⵖⵓⵔⵉ ⵏ ⴱⴰⴱ ⵏ ⵡⴰⴷⴷⵓⵔ ⵉ ⵓⵎⵓⴽⵏ ⵉⴷⵔⴰⵏ ⵏ ⵉⵏⴳⵔⴰⵡⵏ ⴷ ⵉⵖⴰⵡⴰⵙⵏ ⵉⵏⴰⵎⵓⵏⵏ ⵙ ⵢⴰⵏ ⵓⵖⴰⵡⴰⵙ ⴰⴽⵓⴷⴰⵏ ⴷ ⵓⵙⴰⵜⵉ ⴰⵣⵔⴼⴰⵏ ⴷ ⵉⵙⵜⴰⵢⵏ ⵏ ⵓⵙⵙⵥⵕⴼ.
ⴷⴼⴼⵉⵔ ⵏ ⵓⵙⵎⵏⵉⴷ ⵏ ⵜⵓⵎⴰⵢⵉⵏ ⵏ ⵉⵏⴰⵡ ⴰⴳⵍⴷⴰⵏ ⴰⵎⴰⵜⵜⵓⵢ, ⵙⴷⴷⵉⴷⵏ ⴽⵓ ⵉⴳⵎⴰⵎⵏ ⵏ ⵓⵙⵇⵇⵉⵎ, ⴼ ⵓⵍⵜⴰⵖ ⵏⵏⵙⵏ ⵙ ⴰⵢⵍⵍⵉ ⵉⵍⵍⴰⵏ ⵖ ⵜⵎⵥⵍⴰⵢ ⵜⵉⴷⵙⵜⴰⵔⵉⵏ ⵏ ⵓⵙⵇⵇⵉⵎ ⵙ ⵜⵉⴹⴰⴼ ⵉⵕⵡⴰⵏ ⴷ ⵉⵙⵓⵍⵏ ⵉ ⵜⵏⴱⴰⴹⵜ ⴷ ⵜⵎⵔⵙⴰⵍ ⵥⵍⵉⵏⵉⵏ ⵙ ⵉⵙⴰⵡⵓⵔⵏ ⴰⴷ, ⴷ ⵓⵙⵎⵓⵙⵙⵓ ⵉ ⵓⵙⵓⴼⵖ ⵏ ⵉⵣⵣⵔⴰⴼⵏ ⵥⵍⵉⵏⵉⵏ ⵙ ⵓⵏⴳⵔⴰⵡ ⴰⴷⵓⵙⴰⵏ ⴼ ⵉⵙⴽⵔ ⵓⵙⵇⵇⵉⵎ ⵏ ⵉⵎⵓⵔⴰ ⵢⴰⵜ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ, ⵖⵎⴽ ⴰⵏⵏ ⴷ ⵉⵣⵣⵔⴰⴼⵏ ⴷ ⵓⵙⴰⵏⵉⵏ ⵉ ⵓⴹⴼⵕ ⵏ ⵜⵣⵣⵉⴳⵣⵜ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ ⵙ ⵓⵎⴰⵜⴰ.
ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴷ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⵎⴰⵙ ⵔⴰⴷ ⵢⵉⵍⵉ ⵓⵙⵙⴰⵔⵓ ⵏ ⵡⴰⵢⴷⴰ ⵉⵍⴰⵏ ⴰⵜⵉⴳ ⵉⵍⵍⴰⵏ ⵖ ⵜⵙⵏⵜⴰⵢⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵃⴼⴹ ⵕⴱⴱⵉ ⵖ ⵓⵙⵡⵉⵔ ⴰⴼⵔⵉⵇⵉ ⴷ ⵓⵙⴳⴰⵡⴰⵏ ⴷ ⵓⴳⵔⴰⵖⵍⴰⵏ, ⵙ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⵉⵕⵡⴰⵏ ⵖ ⵉⵍⵍⴰ ⵉⵎⴰⵏ ⵏ ⵓⵙⵓⴼⵓ ⵉ ⵉⵎⴷⴷⵓⴽⴽⴰⵍ ⵏ ⵍⵎⵖⵔⵉⴱ ⵖ ⴽⵓ ⵉⵎⵏⵥⴰⵡⵏ ⴷ ⵜⵎⴰⴷⴷⴰⵙⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵜⵏⵎⵏⴰⴹⵉⵏ ⴷ ⵜⵏⵎⵏⵥⴰⵡⵉⵏ.