ⵖ ⵓⵙⵏⵓⴱⴳ ⵏ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵀⵓⵍⴰⵏⴹⵉ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ: “ⵍⵎⵖⵔⵉⴱ ⴷ ⵜⴰⵎⴰⵣⵉⵔⵜ ⵉⵍⴰⵏ ⴰⴱⴰⴹ, ⵓⵔ ⵔⴰⴷ ⵢⴰⵊⵊ ⴰⵡⴷ ⵢⴰⵏ ⴰⴷ ⵉⴽⵛⵛⵎ ⵖ ⵜⵖⴰⵡⵙⵉⵡⵉⵏ ⵏⵏⵙ ⵜⵉⴳⵯⵏⵙⴰⵏⵉⵏ”

ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵉⵔⴰ, ⴰⵙⵙ ⵏ ⵡⴰⵢⵏⴰⵙ 24 ⴱⵕⴰⵢⵕ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ, ⵎⴰⵙⵙ HAYKE VELDMAN ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵓⵙⵖⵏⵣⵉ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⵅⴼ ⵜⴳⵎⵉ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵀⵓⵍⴰⵏⴹⴰ, ⴷ ⵉⵔⵣⴼⵏ ⵙ ⵜⵎⴰⵣⵉⵔⵜ ⵏⵏⵖ ⵖ ⵢⵉⵅⴼ ⵏ ⵓⴽⴰⴱⴰⵕ ⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ.

ⵖ ⵜⵉⵣⵡⵉⵔⵉ ⵏ ⵓⵏⵎⵓⵇⵇⴰⵔ ⴰⴷ, ⵉⵏⵏⴰ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵔⴰⴷ ⵢⴰⵡⵙ ⵓⵔⵣⴰⴼ ⵏ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵀⵓⵍⴰⵏⴹⵉ ⵉ ⵜⴳⵍⴷⵉⵜ ⵖ ⵜⵣⵣⵉⴳⵣⵜ ⵏ ⵜⵣⴷⴰⵢⵉⵏ ⵊⴰⵔ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵏ ⵙⵏⴰⵜ ⵜⵎⵉⵣⴰⵔ, ⵖⵎⴽ ⵍⵍⵉ ⵉⵙⵙⵓⵜⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵜⵉⵣⴷⴰⵢⵉⵏ ⵜⵉⵎⵣⵔⴰⵢⵉⵏ ⵜⵉⵇⴱⵓⵔⵉⵏ ⵉⵙⵎⵓⵏⵏ ⵍⵎⵖⵔⵉⴱ ⴷ ⵀⵓⵍⴰⵏⴹⴰ, ⵢⵉⵏⵉ:«ⵉⵍⵍⴰ ⴼⵍⵍⴰⵖ ⴰⴷ ⵏⵃⴹⵓ ⴰⵢⴷⴰ ⴰⵎⵣⵔⴰⵢ ⵏ ⵜⵣⴷⴰⵢⵉⵏ ⵏⵏⵖ ⵃⵎⴰ ⴰⴷ ⵏⵕⵥⵎ ⵉⵎⵏⵉⴷⵏ ⵉⵎⴰⵢⵏⵓⵜⵏ ⴷⴰⵜ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ».

ⵉⵙⵙⵉⵙⴼⵉⵡ ⵎⴰⵙⵙ ⵍⵎⴰⵍⴽⵉ ⵎⴰⵙ ⵜⵍⵍⴰ ⵓⵕⵓⴱⴱⴰ ⵖ ⵢⴰⵜ ⵜⴼⵔⴽⴰ ⵉⵥⵍⵉⵏ ⵖ ⵓⵎⵣⵔⵓⵢ ⵏⵏⵙ ⵍⵍⵉⵖ ⵜⴼⴼⵓⵖ ⴱⵕⵉⵟⴰⵏⵢⴰ ⵖ ⵜⴰⵎⵓⵏⵜ ⵏ ⵓⵕⵓⴱⴱⴰ, ⵢⵉⵏⵉ ⵎⴰⵙ ⵉⴳⴰ ⵜⴰⵖⴰⵡⵙⴰ ⵜⴰⵎⵣⵡⴰⵔⵓⵜ ⴷⴰⵔ ⵜⵎⵉⵣⴰⵔ ⵏ ⵓⵕⵓⴱⴱⴰ ⴰⴷ  ⵉⵍⵉⵏ ⵉⴼⵙⵙⴰⵢⵏ ⵉ ⵜⵎⵓⴽⵔⵉⵙⵉⵏ ⵏ ⵍⵍⵉ ⴳⵉⵙ ⵍⵍⴰⵏⵉⵏ, ⵖⵎⴽ ⵍⵍⵉ ⵉⴱⴷⵔ ⵓⵍⴰ ⵉⴹⵉⵚⵏ ⵏ ⵎⴰ ⴰⴷ ⴼ ⵓⴳⴷⴷⵉⵎ ⵏ ⵉⴼⴼⵓⵙ ⵏ ⵢⵉⵍⵍ ⴰⵏⴰⵎⵎⴰⵙ, ⵉⵍⵇⵎ:«ⵍⵍⵉⵖ ⵜⴳⴰ ⵀⵓⵍⴰⵏⴹⴰ ⵖ ⵜⵎⵉⵣⴰⵔ ⵜⵉⵎⵣⵡⵓⵔⴰ ⵍⵍⵉ ⵉⵙⴱⴷⴷⵏ ⵜⴰⵎⵓⵏⵜ ⵏ ⵓⵕⵓⴱⴱⴰ, ⵉⵇⵇⴰⵏⴷ ⴰⴷ ⴷⴰⵔⵙ ⵉⴳ ⵉⵎⵔⵙⵉ ⴰⴷ ⴰⵎⵣⵡⴰⵔⵓ ⵓⴳⴳⴰⵔ ⵏ ⵉⵎⵔⵙⵉⵡⵏ ⵅⵓⵚⵚⴰⵏⵉⵏ ⵜⵉⵎⵉⵣⴰⵔ ⵢⴰⴹⵏⵉⵏ».

ⵉⵎⵍⴰ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵓⵔ ⵙⵙⵏⵏ ⴽⵉⴳⴰⵏ ⵏ ⵉⴱⵕⵍⴰⵎⴰⵏⵉⵢⵏ ⵏ ⵀⵓⵍⴰⵏⴹⴰ ⵜⵉⴷⵜ ⵏ ⵉⵙⵔⵓⵙⵏ ⵉⵙⵔⵜⴰⵏⵏ ⴷ ⵉⵣⵔⴼⴰⵏⵏ ⴷ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵏ ⵜⴳⵍⴷⵉⵜ, ⵉⵙⵙⵀⵔⵛ ⵍⵍⵉⵖ ⵓⵔ ⵜⵍⵍⵉ ⵜⴰⵔⴰⵡⵙⴰⵏⵜ ⴷⴰⵔ ⴽⵔⴰ ⴳⵉⵙⵏ ⵍⵍⵉ ⴷⴷⴰⵔ ⵉⴳⴳⵓⵜ ⵓⵎⵏⵃⵓⵔ ⵏ ⵉⵙⵜⴰⵢⵏ. ⵉⵙⴷⴷⵉⴷ ⵎⴰⵙ ⵉⴳⴰ ⵍⵎⵖⵔⵉⴱ ⴰⵎⴰⴷⵔⴰⵡ ⴰⵙⵜⵔⴰⵜⵉⵊⵉ ⵏ ⵓⵕⵓⴱⴱⴰ, ⵉⵎⵎⴰⵖ ⴼ ⵓⵃⵟⵟⵓ ⵏ ⵜⵏⴼⵔⵓⵜ ⵏⵏⵙ, ⵉⴳ ⴰⵎⴷⴷⴰⴽⴽⵯⵍ ⵉ ⴽⵓ ⵜⵉⵎⵉⵣⴰⵔ ⵜⵉⴷⵉⵎⵓⵇⵔⴰⵟⵉⵢⵉⵏ ⵍⵍⵉ ⵉⵜⵜⵓⵇⴰⵔⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵍⵇⵎ:«ⵏⴽⴽⵯⵏⵉ ⵏⵍⵍⴰ ⴷ ⵓⵎⵙⴰⵡⴰⵍ ⴰⴷⵉⵎⵓⵇⵔⴰⵟⵉ, ⵍⵎⵖⵔⵉⴱ ⵉⴳⴰ ⵜⴰⵎⴰⵣⵉⵔⵜ ⵉⵟⵟⴰⴼⵏ ⴰⴱⴰⴹ ⵏⵏⵙ, ⵓⵔ ⵔⴰⴷ ⵢⴰⵊⵊ ⴽⵔⴰ ⵏ ⵢⴰⵏ ⴰⴷ ⵉⴽⵛⵛⵎ ⵖ ⵜⵖⴰⵡⵙⵉⵡⵉⵏ ⵏⵏⵙ ⵜⵉⴳⵯⵏⵙⴰⵏⵉⵏ. ⵍⵍⵉⵖ ⵏⴳⴰ ⵉⴱⵕⵍⴰⵎⴰⵏⵉⵢⵏ , ⵉⵍⵍⴰ ⴼⵍⵍⴰⵖ ⴽⵓⵍⵍⵓ ⴰⵖ ⴰⴷ ⵏⵙⵡⵓⵔⵉ ⵃⵎⴰ ⴰⴷ ⵜⵓⵔⵔⵉ ⵜⵎⵢⵉⵎⴰⵏⵜ ⵢⵉⵍⵉ ⵓⵙⵙⴷⵓⵙ ⵏ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ».

ⵙ ⵓⵣⵎⵣⵣⵓ ⴰⴷ, ⵉⵎⵍⴰ ⴰⴷ ⵎⴰⵙⵙ ⵍⵎⴰⵍⴽⵉ ⵉⵙⴰⵡⵓⵔⵏ ⴼⴰⵡⵏⵉⵏ ⵏ ⵜⴳⵎⵉ ⵖ ⵜⵎⴰⵣⵉⵔⵜ ⵏⵏⵖ, ⵉⴱⴷⵔ ⴰⵙⵡⴰⵍⴰ ⴰⵙⵜⵔⴰⵜⵉⵊⵉ ⵏ ⵜⴳⵍⴷⵉⵜ ⵖ ⵓⵙⵙⵕⵚⵓ ⵏ ⵜⴳⵎⵉ ⵜⴰⵙⵓⵍⴰⵏⵜ ⵖ ⵉⵍⵍⴰ ⵓⵙⵎⵔⵙ ⵏ ⵜⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏⵏ ⴷ ⵓⵙⵡⵓⴷⴷⵓ ⵉⵥⵉⵍⵏ ⵏ ⵡⴰⵎⴰⵏ ⴷ ⵓⵙⵓⴼⵖ ⵏ ⵉⵎⵓⴽⵏⵏ ⵉⵎⴰⵢⵏⵓⵜⵏ ⵖ ⵢⵉⴳⵔ ⵏ ⵜⴼⵍⵍⴰⵃⵜ ⴷ ⵓⵙⵙⵓⵜⴳ ⵏ ⵜⴰⴳⴰⵏⵉⵏ ⴷ ⵓⵙⴱⴷⴷⵉ ⵏ ⵓⵙⵏⵣⵔⵓⴼ. ⵉⵎⵍⵉ ⴷ ⵜⵓⴳⴳⴰⵙ ⵏ ⵜⴳⵍⴷⵉⵜ ⵖ ⵓⵙⵖⵓⴷⵓ ⵏ ⵓⵡⵏⴰⴹ ⵏ ⵓⵙⵡⵓⵔⵉ, ⴰⵢⵍⵍⵉ ⵉⴼⴽⴰⵏ ⵉ ⵍⵎⵖⵔⵉⴱ ⴰⴷ ⵉⵣⵣⵉⴳⵣ ⵙ ⵙⴰⵜ ⵜⵙⴽⴼⴰⵍ ⵢⵉⵍⵉ ⵖ ⵜⵙⴽⴼⵍⵜ ⵜⵉⵙ 53 ⵙ ⴰⵢⵍⵍⵉ ⵉⵍⵍⴰⵏ ⵖ ⵜⵏⴰⴹⵜ ⵉⴳⴳⵓⵔⴰⵏ ⴷ ⵉⵙⵙⴼⵓⵖ ⵍⴱⴰⵏⴽ ⴰⵎⴰⴹⵍⴰⵏ ⵖ ⵢⵉⴳⵔ ⵏ ⵜⵡⵓⵔⵉⵡⵉⵏ ⵙ ⵓⵙⵎⵣⴰⵣⴰⵍ ⴷ ⵓⵙⴳⴳⵯⴰⵙ ⵉⵣⵔⵉⵏ.

ⵖ ⵜⵙⴳⴰ ⵏⵏⵙ, ⵉⵙⴷⴷⵉⴷ ⵎⴰⵙⵙ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵓⵙⵖⵏⵣⵉ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⵅⵜ ⵜⴳⵎⵉ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⴰⵀⵓⵍⴰⵏⴹⵉ ⵎⴰⵙ ⵉⵡⴰⵜⵜⵙ ⵓⵔⵣⴰⴼ ⴰⴷ ⵏⵏⵙ ⵏⵜⵜⴰⵏ ⴷ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵉ ⵜⴳⵍⴷⵉⵜ, ⴰⵙⵙⴷⵓⵙ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⵙⵍⴰⵡⴰⵏ ⴰⴽⴽⵯ ⵖ ⵢⵉⴳⵔ ⵏ ⵓⵙⵖⵏⵣⵉ, ⵢⵉⵏⵉ:«ⵏⵔⴰ ⴰⴷ ⵏⵥⵕ ⵉⵎⵏⴰⴷⵏ ⵉⵎⴰⵢⵏⵓⵜⵏ ⵏ ⵓⵎⵢⴰⵡⴰⵙ ⵏ ⵜⴷⴰⵎⵙⴰ ⴷ ⵓⵙⵖⵏⵣⵉ ⵖ ⵙⵏⴰⵜ ⵜⵎⵉⵣⴰⵔ, ⵏⴻⵏⵏⵓⵔⵣ ⴰⴷ ⵏⴳ ⵉⵎⴰⴷⵔⴰⵡⵏ ⴷⵉⴷⵓⵏ».

ⵉⵙⵙⵓⵜⴳ ⵎⴰⵙⵙ HAYKE VELDMAN ⵓⵍⴰ ⵙ ⵜⵣⵣⵉⴳⵣⵜ ⵉⴼⴰⵡⵏ ⵏ ⵍⵎⵖⵔⵉⴱ ⵖ ⵢⵉⴳⵔ ⵏ ⵓⵡⵏⴰⴹ ⵏ ⵓⵙⵡⵓⵔⵉ, ⵉⵙⴷⴷⵉⴷ ⴼ ⵡⴰⵜⵉⴳ ⵏ ⵓⵙⵙⴷⵓⵙ ⵏ ⵜⵎⵢⵉⵎⴰⵏⵜ ⵊⴰⵔ ⵙⵏⴰⵜ ⵜⵎⵉⵣⴰⵔ ⵙ ⴰⵢⵍⵍⵉ ⵔⴰⴷ ⵢⵉⵍⵉ ⵖ ⵚⴰⵃⴰ ⵏ ⵓⵙⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ ⵏⵏⵙⵏⵜ.

ⵏⵏⴰⵏ ⵉⴳⵎⴰⵎⵏ ⵏ ⵓⴽⴰⴱⴰⵕ ⵎⴰⵙ ⵜⵏ ⵜⵙⵙⵓⵙⵎ ⵜⵣⵣⵉⴳⵣⵜ ⵜⴰⴷⵎⵙⴰⵏⵜ ⵉⵍⵍⴰⵏ ⵖ ⵜⴳⵍⴷⵉⵜ, ⵖⵉⴽ ⴰⵏⵏ ⴷ ⵜⵓⴳⴳⴰⵙ ⵏⵏⵙ ⵖ ⵓⵙⴱⴷⴷⵉ ⵏ ⵓⴱⵔⵙⵉⵡⴷ ⴷ ⵓⵙⵙⵕⵚⵓ ⵏ ⵜⴳⵎⵉ ⵜⴰⵙⵓⵍⴰⵏⵜ.

ⵜⵃⴰⴹⵕ ⵖ ⵓⵏⵎⵓⵇⵇⴰⵔ ⴰⴷ ⵎⴰⵙⵙⴰ Désirée Bonis ⵜⴰⵎⵙⵇⴰⴷⵜ ⵏ ⵀⵓⵍⴰⵏⴹⴰ ⵖ ⵕⵕⴱⴰⵟ, ⵖⵎⴽ ⵍⵍⵉ ⵉⵃⴰⴹⵕ ⵎⴰⵙⵙ ⵙⴰⵄⵉⴷ ⵛⴱⴰⵄⵜⵓ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵙⵢⴰⴼⵓⵜⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ.