ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵙⵏⵓⴱⴳ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵜⴰⴷⵖⵔⴰⵏⵜ ⵏ ⴼⴰⵍⵓⵏⵚⵢⴰ

ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵡⴰⵢⵏⴰⵙ 17 ⴱⵕⴰⵢⵕ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ ⵎⴰⵙⵙ XIMO PUIG I FERRER  ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵜⴰⴷⵖⵔⴰⵏⵜ ⵏ ⴼⴰⵍⵓⵏⵚⵢⴰ ⵉⵍⵍⴰⵏ ⵖ ⵓⵔⵣⴰⴼ ⵏ ⵜⵡⵓⵔⵉ ⵉ ⵜⵎⴰⵣⵉⵔⵜ ⵏⵏⵖ.

ⵉⵃⴰⴹⵕ ⵖ ⵓⵏⵎⵓⵇⵇⴰⵔ ⴰⴷ ⵓⵎⵙⵇⴰⴷ ⵏ ⵚⴱⴰⵏⵢⴰ ⴳ ⵕⵕⴱⴰⵟ, ⵉⵙⴷⴷⵉⴷ ⴳⵉⵙ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵜⵣⵣⵉⴳⵣⵜ ⵜⴰⵍⵓⴳⴰⵏⵜ ⵖ ⵍⵍⴰⵏⵜ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⵚⴱⴰⵏⵢⴰ, ⵢⵉⵏⵉ:«ⴳⴰⵏⵜ ⵜⵣⴷⴰⵢⵉⵏ ⴳⵔ ⵜⵎⵉⵣⴰⵔ ⵏⵏⵖ ⵜⵉⵎⵥⵍⵉⵜⵉⵏ, ⵙⵎⵓⵏⵏ ⴰⵖ ⵉⵣⴷⴰⵢⵏ ⵉⵎⵣⵔⴰⵢⵏ ⴷ ⵉⵖⵔⵎⴰⵏⵏ ⴷ ⵉⴷⵍⵙⴰⵏⵏ ⴷⵔⴰⵏⵉⵏ, ⵜⵉⵍⵉ ⵜⵡⵓⵔⵉ ⵎⵇⵓⵔⵏ ⵃⵎⴰ ⴰⴷ ⵢⵉⵍⵉ ⵓⵙⵙⴷⵓⵙ ⵏⵏⵙⵏⵜ, ⴳⵉⵏ ⵉⵎⵏⴰⴷⵏ ⵏ ⵓⵎⵢⴰⵡⴰⵙ ⵊⴰⵔ ⵜⵎⵉⵣⴰⵔ ⵏⵏⵖ ⵓⴳⴳⴰⵔ ⵏ ⵉⵎⴰⴼⴰⵢⵏ».

ⵉⵙⵙⵓⵜⴳ ⵎⴰⵙⵙ ⵍⵎⴰⵍⴽⵉ, ⴰⵙⵏⴰⵍ ⵏ ⵉⴱⵕⵍⴰⵎⴰⵏⵉⵢⵏ ⵉⵚⴱⵍⵢⵓⵏⵏ ⵖ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⵍⵍⵉⵖ ⵉⵍⵍⴰ ⵓⵣⵣⵔⴰⵢ ⵏ ⵜⵎⵢⴰⵇⵇⴰⵏⵜ ⵜⴰⵏⴼⵍⴰⵃⵜ ⴷ ⵜⵎⵢⴰⵇⵇⴰⵏⵜ ⵏ ⵜⴳⵎⵔⵜ ⵜⴰⵢⵍⴰⵏⵜ ⵖ ⵓⵙⴳⴳⵯⴰⵙ ⵉⵣⵔⵉⵏ ⵊⴰⵔ ⵍⵎⵖⵔⵉⴱ ⴷ ⵜⵎⵓⵏⵜ ⵏ ⵓⵕⵓⴱⴱⴰ, ⴰⵢⵍⵍⵉ ⵉⵎⵎⴰⵍⴰⵏ ⵜⵉⵍⵍⵓⴳⵏⴰ ⴷ ⵡⴰⴱⴰⴹ ⵏ ⵍⵎⵖⵔⵉⴱ ⴼ ⵡⴰⴽⴰⵍ ⵏⵏⵙ ⴰⵏⴰⵎⵓⵔ ⴽⵓⵍⵍⵓⵜ. ⵉⵙⵙⵉⵙⴼⵉⵡ ⴷ ⵎⴰⵙ ⵉⵕⵥⵎ ⵍⵎⵖⵔⵉⴱ ⴰⵙⴰⵡⵓⵔ ⵏ ⵜⵏⵎⵏⴰⴹⵜ ⵜⴰⵎⵉⵔⵉⵡⵜ, ⵢⴰⵡⵉ ⴷ ⴼ ⵜⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ ⵉⴳⴰⵏ ⴰⴼⵙⵙⴰⵢ ⵏ ⵜⵉⵍⴰⵡⵜ ⵉ ⵓⵎⵓⴽⵔⵉⵙ ⵉⵜⵜⵓⵙⴽⴰⵔⵏ ⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ, ⵖⵎⴽ ⵍⵍⵉ ⵉⵙⵙⵓⵜⴳ ⵖ ⵓⵎⵏⴰⴹ ⴰⴷ ⵜⵉⵔⵎⵉⵜ ⵏ ⵚⴱⴰⵏⵢⴰ ⵖ ⵢⵉⴳⵔ ⵏ ⵜⴰⵔⵏⴰⵎⵎⴰⵙⵜ.   

ⵉⵙⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵓⵍⴰ ⵙ ⵜⴷⵓⵙⵉ ⵏ ⵜⵣⴷⴰⵢⵉⵏ ⵉⵙⵎⵓⵏⵏ ⴰⴱⵕⵍⴰⵎⴰⵏ ⴰⵎⵖⵔⵉⴱⵉ ⴷ ⵓⵙⵇⵇⵉⵎ ⵏ ⵍⴽⵓⵕⵟⵉⵚⵚ ⵏ ⵚⴱⴰⵏⵢⴰ, ⵉⵎⵍⵉ ⴷ ⴰⵜⵉⴳ ⵏ ⵓⵙⵙⴷⵓⵙ ⵏ ⵓⵎⵢⴰⵡⴰⵙ ⴳⵔ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵉⴱⵕⵍⴰⵎⴰⵏⵏ ⵉⵏⵎⵏⴰⴹⵏ ⵖ ⵚⴱⴰⵏⵢⴰ,  ⵙⵍⴰⵡⴰⵏ ⴰⴽⴽⵯ ⴰⴱⵕⵍⴰⵎⴰⵏ ⵏ ⵜⵎⵏⴰⴹⵜ ⵏ ⴼⴰⵍⵓⵏⵚⵢⴰ ⵍⵍⵉⵖ ⵜⴳⴰ ⵅⵜⴰ ⴷ ⵢⴰⵏ ⵓⵛⴰⵎⵓⵛ ⴰⴷⵎⵙⴰⵏ ⵉⵙⵜⴰⵡⵀⵎⵎⴰⵏ.

 ⵖ ⵓⵎⵏⵉⴷ ⵏⵏⵙ, ⵉⵎⵍⴰ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵜⴰⴷⵖⵔⴰⵏⵜ ⵏ ⴼⴰⵍⵓⵏⵚⵢⴰ ⵎⴰⵙ ⴳⴰⵏⵜ ⵜⵣⴷⴰⵢⵉⵏ ⴳⵔ ⵜⵙⴳⴰ ⵏ ⴼⴰⵍⵓⵏⵚⵢⴰ ⴷ ⵍⵎⵖⵔⵉⴱ ⵜⵉⴷ ⴱⴰⵀⵔⴰ ⵇⴱⵔⵏⵉⵏ, ⵉⵍⵇⵎ:«ⵉⵅⴰⵚⵚⴰ ⴰⴷ ⵏⵙⵢⴰⴼⴰ ⵉⵥⵓⵕⴰⵏ ⵉⵛⵛⴰⵔⵏ ⵃⵎⴰ ⴰⴷ ⴱⴰⵀⵔⴰ ⴷⵓⵙⵏⵜ ⵜⵣⴷⴰⵢⵉⵏ ⵏⵏⵖ», ⵢⵉⵏⵉ ⵓⵍⴰ:«ⵉⴳⴰ ⵍⵎⵖⵔⵉⴱ ⴰⵙⴰⴷⴼ ⵙ ⵓⵎⵏⵥⴰⵡ ⵏ ⵉⴼⵔⵉⵇⵢⴰ ⵍⵍⵉ ⵉⴳⴰⵏ ⴰⵎⵏⵥⴰⵡ ⵏ ⵜⴰⵙⵓⵜ ⵏ ⵡⴰⴳⵏⴰⵔ ⴷ ⵢⴰⵏ, ⵖⵎⴽ ⵍⵍⵉ ⵜⴳⴰ ⵚⴱⴰⵏⵢⴰ ⴰⵙⴰⴷⴼ ⵙ ⵓⵎⵏⵥⴰⵡ ⵏ ⵓⵕⵓⴱⴱⴰ, ⵉⵍⵍⴰ ⵓⵣⵎⵣ ⴷ ⵢⵓⵙⴰⵏ ⵉ ⵓⵙⵙⴷⵓⵙ ⵏ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ».

ⵉⵎⵍⵉ ⴷ ⵎⴰⵙⵙ XIMO PUIG I FERRER ⵎⴰⵙ  ⴷ ⵢⵓⵛⴽⴰ ⵖ ⵓⵔⵣⴰⴼ ⴰⴷ ⵉ ⵜⴳⵍⴷⵉⵜ ⵢⴰⵏ ⵓⴽⴰⴱⴰⵕ ⵏ ⵉⵎⵙⵜⴳⴳⴰⵔⵏ ⴷ ⵉⴷ ⴱⴰⴱ ⵏ ⵜⵡⵓⵔⵉⵡⵉⵏ ⵖ ⵜⵎⵏⴰⴹⵜ ⵏ ⴼⴰⵍⵓⵏⵚⵢⴰ, ⵉⴳ ⵡⴰⵡⵜⵜⴰⵙ ⴰⴷ ⵉⵍⵉⵏⵜ ⵜⵎⴷⵔⴰⵡⵉⵏ ⴷ ⵉⵏⴳⴳⵯⴰ ⵏⵏⵙⵏ ⵖ ⵍⵎⵖⵔⵉⴱ, ⵜⵉⵍⵉ ⵓⵍⴰ ⵜⵏⴰⵣⵓⴼⵜ ⵏ ⵉⵣⵎⴰⵣ ⵉⵎⴰⵢⵏⵓⵜⵏ ⵏ ⵓⵙⵙⴰⵔⵓ ⴷ ⵓⵙⵙⴷⵓⵙ ⵏ ⵓⵎⵢⴰⵡⴰⵙ ⵖ ⵜⴷⴰⵎⵙⴰ ⴷ ⵓⵙⵖⵏⵣⵉ.  

ⵙ ⵓⵣⵎⵣⵣⵓ ⴰⴷ, ⵉⴼⴽⴰ ⵜⴰⵖⵓⵔⵉ ⵉ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵃⵎⴰ ⴰⴷ ⵉⵙⴽⵔ ⴰⵔⵣⴰⴼ ⵏⵏⵙ ⵉ ⵜⵙⴳⴰ ⵏ ⴼⴰⵍⵓⵏⵚⵢⴰ ⵉⵎⴹⵉⴽⵉⵕ ⵓⵍⴰ ⴷ ⵓⵏⵙⵙⵉⵅⴼ ⵏ ⵓⴱⵚⵍⴰⵎⴰⵏ ⵏ ⵜⵎⵏⴰⴹⵜ ⵅⴼ ⵜⴱⵔⵉⴷⵉⵏ ⵏ ⵓⵙⵙⴷⵓⵙ ⵏ ⵜⵣⴷⴰⵢⵉⵏ ⵊⴰⵔ ⵜⵉⵎⵔⵙⴰⵍ ⵜⵉⵣⵣⵔⴰⴼⵉⵏ.