ⴰⵎⵛⴰⵛⴽⴰ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵛⵉⵍⵉ ⴼ ⵓⵙⵎⵔⵙⵍ ⵏ ⵓⵎⴹⴰⴽⴰⵕ ⴰⴱⵕⵍⴰⵎⴰⵏⵉ ⵊⴰⵔ ⵙⵉⵏ ⵉⵙⵇⵇⵉⵎⵏ ⵙ ⵜⵙⵇⵇⵉⵎⵜ ⵉⵛⵛⴰⵔⵏ

ⵉⵎⴹⴰⴽⴰⵕ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵡⴰⵢⵏⴰⵙ 17 ⴱⵕⴰⵢⵕ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ ⴷ ⵎⴰⵙⵙ IVAN FLORES GARCIA, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵜⵎⴰⵣⵉⵔⵜ ⵏ ⵛⵛⵉⵍⵉ, ⴷ ⵉⵍⵍⴰⵏ ⵖ ⵢⵉⵅⴼ ⵏ ⵓⴽⴰⴱⴰⵕ ⵉⵙⵜⴰⵡⵀⵎⵎⴰⵏ ⴳ ⵓⵔⵣⴰⴼ ⵏ ⵜⵡⵓⵔⵉ ⴷ ⵜⴷⴷⵓⴽⵍⴰ ⵉ ⵜⵎⴰⵣⵉⵔⵜ ⵏⵏⵖ.

ⴳ ⵜⵣⵡⵉⵔⵉ ⵏ ⵓⵏⵎⵓⵇⵇⴰⵔ ⴰⴷ, ⵉⵙⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵡⵉⵔ ⵉⵣⵣⵉⴳⵣⵏ ⵖ ⵍⵍⴰⵏⵜ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⵊⴰⵔ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵏ ⵙⵏⴰⵜ ⵜⵎⵉⵣⴰⵔ, ⵖ ⵜⵍⵍⴰ ⵜⵍⵍⵓⴳⵏⴰ ⵏ ⵓⵎⵛⴰⵡⴰⵕ ⴷ ⵓⵙⵏⴼⵍ ⵏ ⵉⵔⵣⴰⴼⵏ ⵊⴰⵔ ⵉⴳⵎⴰⵎⵏ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴷ ⵓⵛⵉⵍⵉ. ⵢⵉⵏⵉ ⵖ ⵓⵎⵏⴰⴹ ⴰⴷ ⵎⴰⵙ ⵜⴻⵟⵟⴰⴼ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⵜⵉⵍⴰⵍⵜ ⵜⴰⵅⴰⵜⴰⵔⵜ ⵖ ⵡⴰⴷⴰⵙ ⵏ ⵜⴰⵏⵏⴰⵢⵉⵏ ⴷ ⵓⵔⵎⴰⵙ ⵏ ⵉⵙⵏⴼⵍⵏ ⵉⵜⵜⵉⵍⵉⵏ ⵖ ⵡⴰⵎⵓⵏⵏ, ⵖⵎⴽ ⵍⵍⵉ ⵜⴻⵜⵜⴰⵡⵙ ⵖ ⵓⵙⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ ⵙⵏⴰⵜ ⵜⵎⵉⵣⴰⵔ ⵖ ⵉⴳⵔⴰⵏ ⴽⵓⵍⵍⵓⵜⵏ.

ⵉⵙⵙⵓⵜⴳ ⵎⴰⵙⵙ ⵍⵎⴰⵍⴽⵉ ⵓⵍⴰ ⵜⴰⵙⵏⵜⴰⵢⵜ ⵜⴰⵎⵣⵔⴰⵢⵜ ⵍⵍⵉ ⵉⵙⴽⵔ ⵓⴱⵕⵍⴰⵎⴰⵏ ⴰⵛⵉⵍⵉ ⵙ ⵙⵉⵏ ⵉⵙⵇⵇⵉⵎⵏ ⵏⵏⵙ ⵖ 2018 ⵍⵍⵉⵖ ⴷ ⵉⵎⵛⴰⵛⴽⴰ ⴷ ⵢⴰⵜ ⵜⵓⵜⵔⴰ ⵉⵍⵍⴰⵏ ⴷ ⵡⴰⴷⴷⴰⴷ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵍⵍⵉ ⵢⵓⵙⵉⵏ ⵜⴰⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ ⵉⴳⴰⵏ ⴰⴼⵙⵙⴰⵢ ⵏ ⵜⵉⵍⴰⵡⵜ ⵉ ⵓⵎⵏⵣⴰⵖ ⵉⵜⵜⵓⵙⴽⴰⵔⵏ ⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ, ⵢⵉⵏⵉ :«ⵜⴰⵎⵓⴽⵔⵉⵙⵜ ⴰⴷ ⵉⵜⵜⵓⵙⴽⴰⵔⵏ ⵓⵔ ⵙⵓⵍ ⵜⵍⵍⵉ ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵉⵎⵎⴰⵖ ⵓⵎⴰⴹⴰⵍ ⵏ ⵡⴰⵙⵙ ⴰⴷ ⴷ ⵜⵏⵥⴰⵕ ⵜⵉⵎⴰⵢⵏⵓⵜⵉⵏ ⵖ ⵜⵍⵍⴰ ⵜⵏⴼⵔⵓⵜ ⴷ ⵓⵔⴳⴳⵉⴳ, ⵉⵖ ⵏⵔⴰ ⴰⴷ ⵏⵍⴽⵎ ⴰⵡⵜⵜⴰⵙ ⴰⴷ, ⵉⵇⵇⴰⵏ ⴷ ⴰⴷ ⵏⵓⵇⵇⵔ ⵜⴰⵢⴰⵏⵜ ⵏ ⵉⵎⴰⴷⴰⵏⵏ ⴷ ⵜⵉⵏ ⵉⵡⴰⵏⴽⵏ».

ⵉⴱⴷⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷⴰⵔ ⵜⵏⵓⴽⵔⴰ ⵜⴰⴷⵎⵙⴰⵏⵜ ⵏ ⵜⵎⴰⵣⵉⵔⵜ ⵏ ⵛⵛⵉⵍⵉ ⴷ ⵜⵣⵎⵔⵜ ⵏⵏⵙ ⴼ ⵓⵙⵉⴼⴹ, ⵉⵎⵍⵉ ⴷ ⵎⴰⵙ ⵍⵍⴰⵏⵜ ⴽⵉⴳⴰⵏ ⵏ ⵜⵥⵉⴹⴰⵕ ⵏ ⵓⵙⵙⴷⵓⵙ ⵏ ⵓⵙⵏⴼⵍ ⵖ ⵉⴳⵔⴰⵏ ⵏ ⵜⴷⴰⵎⵙⴰ ⴷ ⵓⵙⵖⵏⵣⵉ ⵊⴰⵔ ⵙⵏⴰⵜ ⵜⵎⵉⵣⴰⵔ. ⵉⵙⵙⴽⵯⵜⵉ ⴷ  ⵎⴰⵙ ⵉⵙⴽⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵖ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ ⵢⴰⵏ ⵓⵙⵡⴰⵍⴰ ⴰⵙⵜⵔⴰⵜⵉⵊⵉ ⵏ ⵜⴳⵍⴷⵉⵜ, ⵉⵍⵇⵎ : « ⵜⴳⴰ ⵛⵛⵉⵍⵉ ⵜⴰⵎⴰⵣⵉⵔⵜ ⵉⴳⴰⵏ ⵜⴰⵎⴷⴷⴰⴽⴽⵯⵍⵜ ⵏⵏⵖ, ⵙⵎⵓⵏⵜ ⴰⵖ ⴷⵉⵙ ⵜⵣⴷⴰⵢⵉⵏ ⴷⵓⵙⵏⵉⵏ ⵥⵉⵍⵏⵉⵏ, ⵥⴹⴰⵕⵏⵜ ⵙⵏⴰⵜ ⵜⵎⵉⵣⴰⵔ ⴰⴷ ⴰⴽⴽⵯ ⵙⵡⵓⵔⵉⵏⵜ ⵖ ⵉⴳⵔⴰⵏ ⴳⴰⵏⵉⵏ ⵓⴷⴷⵉⵔⵏ ⴰⵎ ⵜⵉⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏⵏ ⴷ ⵜⴳⵎⵉ ⵜⴰⵙⵓⵍⴰⵏⵜ».   

ⵖ ⵜⵙⴳⴰ ⵏⵏⵙ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵜⵎⴰⵣⵉⵔⵜ ⵏ ⵛⵛⵉⵍⵉ ⴼ ⵡⴰⵜⵉⴳ ⵏ ⵓⵙⵙⴷⵓⵙ ⵏ ⵜⵣⴷⴰⵢⵉⵏ ⵏ ⵜⴷⴰⵎⵙⴰ ⴷ ⵓⵙⵖⵏⵣⵉ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵢⵉⵏⵉ ⵎⴰⵙ ⵉⴳⴰ ⵍⵎⵖⵔⵉⴱ ⴰⴷⴰⴼ ⵙ ⵉⴳⴰⴷⴰⵣⵏ ⵏ ⵉⴼⵔⵉⵇⵢⴰ ⵖⵎⴽ ⵍⵍⵉ ⵜⴳⴰ ⵛⵛⵉⵍⵉ ⴰⴷⴰⴼ ⵙ ⵡⵉⵏ ⴰⵎⵔⵉⴽⴰ ⵜⴰⵍⴰⵜⵉⵏⵉⵜ. ⵢⵉⵏⵉ ⵎⴰⵙ ⵜⵙⵎⴷ ⵜⴷⴰⵎⵙⴰ ⵏ ⴽⵔⵢⴰⴳⴰⵜⵜ ⵜⴰⵎⴰⵣⵉⵔⵜ ⵜⵉⵏ ⵜⴰⵢⵢⴰⴹ, ⵉⵍⵇⵎ ⵎⴰⵙ ⵉⵍⵍⴰ ⵖ ⵓⵏⵣⴳⵓⵎ ⵏ ⵜⵎⴰⵣⵉⵔⵜ ⵏⵏⵙ ⴰⴷ ⵜⵣⵣⵉⴳⵣ ⵙ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⵙ ⴽⵉⴳⴰⵏ ⵏ ⵓⵎⵢⴰⵡⴰⵙ ⴷ ⵜⵡⵉⵣⵉ.

ⵉⵙⴷⴷⵉⴷ ⵎⴰⵙⵙ IVAN FLORES GARCIA ⵓⵍⴰ ⴼ ⵡⴰⴷⴷⴰⴷ ⵉⴼⴰⵡⵏ ⵏ ⵜⵎⴰⵣⵉⵔⵜ ⵏⵏⵙ ⴷⴰⵜ ⵏ ⵜⵎⵙⴰⵔⵜ ⵏ ⵜⴰⵢⴰⵏⵜ ⵜⴰⴽⴰⵍⴰⵏⵜ ⵏ ⵜⴳⵍⴷⵉⵜ, ⵢⵉⵏⵉ :«ⴷⴰ ⵏⵙⵙⵓⵜⵓⴳ ⵜⴰⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ ⵍⵍⵉ ⵉⴼⴽⴰ ⵍⵎⵖⵔⵉⴱ, ⵏⵍⵍⴰ ⴷⵉⴷⵙ, ⴷⴰ ⵏⵜⵓⵇⵇⴰⵔ ⴰⵙⵍⴳⵏ ⴰⴳⵔⴰⵖⵍⴰⵏ ⴷ ⵜⵅⵅⵓⵜⵔⴰ ⵏ ⵉⵎⴰⴷⴰⵏⵏ ⴷ ⵉⵡⴰⵏⴽⵏ ».

ⵖ ⵓⵙⵡⵉⵔ ⴰⴱⵕⵍⴰⵎⴰⵏⵉ, ⵉⵙⵙⵉⵙⴼⵉⵡ ⵎⴰⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵛⵛⵉⵍⵉ ⵎⴰⵙ ⵜⴳⴰ ⵜⵎⵢⴰⵇⵇⴰⵏⵜ ⵏ ⵓⵎⴹⴰⴽⴰⵕ ⴰⴱⵕⵍⴰⵎⴰⵏⵉ ⵊⴰⵔ ⵙⵉⵏ ⵉⵙⵇⵇⵉⵎⵏ « ⵢⴰⵜ ⵜⵎⵢⴰⵇⵇⴰⵏⵜ ⴱⴰⵀⵔⴰ ⵉⵙⵜⴰⵡⵀⵎⵎⴰⵏ», ⵜⴳⴰ ⵜⴰⵎⵢⴰⵇⵇⴰⵏⵜ ⵜⴰⵎⵣⵡⴰⵔⵓⵜ ⴷⴰ ⵉⵣⵎⵎⵉⵎ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵛⵛⵉⵍⵉ ⴷ ⵢⴰⵏ ⵓⴱⵕⵍⴰⵎⴰⵏ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⴷ ⵡⴰⵄⵕⴰⴱⵏ.  ⵖ ⵓⵎⵏⴰⴹ ⴰⴷ, ⵉⵖⵔⴰ ⵉ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵢⴰⵏ ⵓⵔⵣⴰⴼ ⵏ ⵜⵡⵓⵔⵉ ⵉ ⵜⵎⴰⵣⵉⵔⵜ ⵏ ⵛⵛⵉⵍⵉ ⵍⵍⵉ ⵔⴰⴷ ⵉⴳ ⴰⵣⵎⵣⵣⵓ ⵏ ⵓⵙⵉⴳⴳⵍ ⵏ ⵜⴱⵔⵉⴷⵉⵏ ⵏ ⵓⵙⵙⴷⵓⵙ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ.

ⵖ ⵜⴳⵉⵔⴰ ⵏ ⵓⵏⵎⵓⵇⵇⴰⵔ, ⵣⵎⵎⵉⵎⵏ ⵙⵉⵏ ⵉⵎⵙⵜⴳⴳⴰⵔⵏ “ⵜⴰⵎⵢⴰⵇⵇⴰⵏⵜ ⵏ ⵓⵎⴹⴰⴽⴰⵕ ⴰⴱⵕⵍⴰⵎⴰⵏⵉ ⵏⴳⵔ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵜⴳⴷⵓⴷⴰⵏⵜ ⵏ ⵛⵛⵉⵍⵉ”, ⵜⵡⴰⵜⵜⵙ ⴰⵙⵎⵔⵙⵍ ⵏ ⵓⵎⴹⴰⴽⴰⵕ ⴰⴱⵕⵍⴰⵎⴰⵏⵉ ⵊⴰⵔ ⵙⵉⵏ ⵉⵙⵇⵇⵉⵎⵏ, ⴷ ⵓⵙⵓⴼⵖ ⵏ ⵢⴰⵏ ⵓⵙⴰⵢⵔⴰⵔ ⵏ ⵓⵙⵏⴼⵍ ⵏ ⵜⵎⵓⵣⴰⵢⵉⵏ ⴷ ⵜⵉⵔⵎⵉⵜⵉⵏ ⵖ ⵢⵉⴳⵔ ⵏ ⵓⵣⵣⵔⴰⴼ, ⴷ ⵓⵙⵏⴼⵍ ⵏ ⵉⴽⴰⴱⴰⵕⵏ ⵖ ⵍⵍⴰⵏ ⵉⴱⵕⵍⴰⵎⴰⵏⵉⵢⵏ ⴷ ⵉⵎⵙⵖⴰⵏⵏ ⵏ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ, ⵖⵎⴽ ⴰⵏⵏ ⴷ ⵓⵙⵙⴷⵓⵙ ⵏ ⵜⵡⵉⵣⵉ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⵖ ⵜⵣⵣⵉⴳⵣⵜ ⵏ ⵜⵣⴷⴰⵢⵉⵏ ⵜⵓⵏⵚⵉⴱⵉⵏ ⵏⴳⵔ ⵜⵏⴱⴰⴹ ⵏ ⵙⵏⴰⵜ ⵜⵎⵉⵣⴰⵔ.

ⵉⵍⵍⴰ ⵓⵎⵛⴰⵛⴽⴰ ⴰⴷ ⵉⵜⵜⵓⵙⴽⵉⵔ ⵓⵏⵎⵓⵇⵇⴰⵔ ⴰⵎⴰⵣⵡⴰⵔⵓ ⵏ ⵜⵙⵇⵇⵉⵎⵜ ⵏ ⵓⵎⴹⴰⴽⴰⵕ ⴰⴱⵕⵍⴰⵎⴰⵏⵉ ⵖ ⵓⵙⴳⴳⵯⴰⵙ ⴰⵏⵏ ⴷ ⵢⵓⵛⴽⴰⵏ ⵙ ⵓⵣⵎⵣⵣⵓ ⵏ ⵓⴽⵜⵜⴰⵢ ⵖ ⵣⵔⵉⵏ ⴽⵕⴰⴹ ⵡⴰⴳⵏⴰⵔⵏ ⵏ ⵉⵙⴳⴳⵯⴰⵙⵏ ⴼ ⵓⵙⵏⵜⵉ ⵏ ⵜⵣⴷⴰⵢⵉⵏ ⵜⵉⴷⵉⴱⵍⵓⵎⴰⵙⵉⵢⵉⵏ ⵊⴰⵔ ⵍⵎⵖⵔⵉⴱ ⴷ ⵛⵛⵉⵍⵉ.