ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵙⵏⵓⴱⴳ ⵜⴰⵎⴰⵔⵉⵜ ⵏ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⴳⵎⵉ ⴳ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ

ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⴽⵡⴰⵙ 06 ⴱⵕⴰⵢⵕ 2020, ⴳ ⵓⵙⵖⵉⵎ ⵏ ⵓⵙⵇⵇⵉⵎ ⵎⴰⵙⵙⴰ Chrysoula Zacharopoulou ⵜⴰⵎⴰⵔⵉⵜ ⵏ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⴳⵎⵉ ⴳ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ, ⴷ ⵢⵓⵛⴽⴰ ⵏ ⵙ ⵜⵎⴰⵣⵉⵔⵜ ⵏⵏⵖ ⴳ ⵓⵔⵣⴰⴼ ⵏ ⵜⵡⵓⵔⵉ.

ⵜⵉⵡⵉ ⴷ ⵎⴰⵙⵙⴰ Chrysoula Zacharopoulou, ⴳ ⵓⵏⵎⵓⵇⵇⴰⵔ ⴰⴷ, ⵎⴰⵙ ⴰ ⵜⵜⵃⵉⵢⵢⴰⵍ ⵜⴰⵎⵓⵏⵜ ⵏ ⵓⵕⵓⴱⴱⴰ ⵉ ⵜⵎⴷⵔⴰⵡⵜ ⵜⴰⵎⴰⵢⵏⵓⵜ ⴷ ⵉⴼⵔⵉⵇⵢⴰ, ⵍⵍⵉⵖ ⵍⵍⴰⵏⵜ ⵜⵏⵥⴰⵕ ⵉⵛⵛⴰⵔⵏ ⴳ ⵙⵏⴰⵜ ⵜⵙⴳⴳⵉⵡⵉⵏ ⴰⵎ : ⵜⴰⵣⵡⴰⴳⵜ, ⵉⵙⵏⴼⵍⵏ ⵏ ⵓⵏⵣⵡⵉ, ⵜⵉⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏⵏ ⴷ ⵜⵉⵢⵢⴰⴹ. ⵜⵣⵎⵎⵉⵎ ⵎⴰⵙ ⵜⴳⴰ ⵜⴳⵍⴷⵉⵜ ⵏ ⵍⵎⵖⵔⵉⴱ ⵜⴰⵎⵣⵡⴰⵔⵓⵜ ⴳ ⵉⵙⵡⵉⵔⵏ ⴰⵏⵎⵏⴰⴹ ⴷ ⵓⵎⵏⵥⴰⵡ, ⵜⵉⵏⵉ:«ⵜⵉⵍⴰⵍⵜ ⵏ ⵍⵎⵖⵔⵉⴱ ⵜⵙⵜⴰⵡⵀⵎⵎⴰ ⴱⴰⵀⵔⴰ ⴳ ⵜⵙⴳⴰ ⵜⴰⵊⵢⵓⵙⵔⵜⴰⵏⵜ ⵖⵎⴽ ⴰⵏⵏ ⵓⵍⴰ ⴳ ⵓⵙⵡⵉⵔ ⵏ ⵜⵏⴼⵔⵓⵜ ⴷ ⵜⴳⵎⵉ».

ⵜⵙⴷⴷⵉⴷ ⵎⴰⵙⵙⴰ ⵜⴰⵎⴰⵔⵉⵜ ⵏ ⵓⵏⵙⵙⵉⵅⴼ ⵏ ⵜⴳⵎⵉ ⴳ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ, ⵎⴰⵙ ⴷ ⵉⵇⵇⴰⵏ ⴰⴷ ⵜⴳ ⵜⵙⵔⵜⵉⵜ ⵜⴰⵎⴰⵢⵏⵓⵜ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ, ⵎⵏⵉⴷ ⵏ ⵉⴼⵔⵉⵇⵢⴰ, ⵜⴰⴱⵕⴰⴳⵎⴰⵜⵉⵜ ⵜⴰⵡⵉ ⴷ ⴰⴱⵖⵓⵔ ⵉ ⵜⵙⴳⴳⵉⵡⵉⵏ ⵙ ⵙⵏⴰⵜ,  ⵖⵎⴽ ⵍⵍⵉ ⵜⴱⴷⵔ ⵉⵎⵏⵉⴷⵏ ⵉⵎⴰⴼⴰⵢⵏ ⵏ ⵜⴳⵎⵉ ⴳ ⵉⴼⵔⵉⵇⵢⴰ.

ⴳ ⵜⵙⴳⴰ ⵏⵏⵙ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵉⵜⵜⵓⵙⵙⴰⵏ ⵓⵣⵎⵣ ⴰⴷ ⵙ ⵉⵙⵏⴼⵍⵏ ⴳⴰⵏⵉⵏ ⵉⵎⵣⵉⵣⵣⵍⵏ, ⵉⵍⵇⵎ:«ⵉⴼⵔⵉⵇⵢⴰ ⵏ ⵡⴰⵙⵙ ⴰⴷ ⵓⵔ ⵜⴳⵉ ⴰⵎ ⵉⴼⵔⵉⵇⵢⴰ ⵉⵣⵔⵉⵏ, ⵉⵇⵇⴰⵏ ⴷ ⴼ ⵓⵕⵓⴱⴱⴰ ⴰⵏⵏ ⵜⴽⵙ ⵉ ⵜⵣⵣⵉⴳⵣⵜ ⵉⵍⵍⴰⵏ ⴳ ⵓⵎⵏⵥⴰⵡ ⵏ ⵉⴼⵔⵉⵇⵢⴰ ⴳ ⵉⴳⵔⴰⵏ ⴽⵓⵍⵍⵓⵜⵏ».

ⵉⵙⵙⵉⵙⴼⵉⵡ ⴷ ⵎⴰⵙⵙ ⵍⵎⴰⵍⴽⵉ ⵜⵉⵍⴰⵍⵜ ⵏ ⵍⵎⵖⵔⵉⴱ ⴳ ⵓⵙⵙⴷⵓⵙ ⵏ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ, ⵙⵍⵉⵀⵡⴰⴷⴷ ⴰⴽⴽⵯ ⴷ ⵜⵎⵉⵣⴰⵔ ⵏ ⵓⵎⵏⵥⴰⵡ ⴰⴼⵔⵉⵇⵉ, ⵉⵎⵍⵉ ⴷ ⵖ ⵓⵎⵏⵉⴷ ⴰⴷ ⵜⵉⵎⴷⵔⴰⵡⵉⵏ ⵜⵉⵎⵏⵏⴰⵡⵉⵏ ⵉⵙⵎⵓⵏⵏ ⵊⴰⵔ ⵍⵎⵖⵔⵉⴱ ⴷ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⴳ ⵉⴳⵔⴰⵏ ⴰⴷ:   ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ, ⵜⴰⵡⵓⵔⵉ ⵏ ⵍⴰⴱⵏⴰⴽ, ⴰⵙⴳⵎⵉ ⴷ ⵓⵙⵎⵓⵜⵜⴳ, ⴰⵙⴳⴷ ⴷ ⵡⵉⵢⵢⴰⴹ. ⵢⵉⵏⵉ:« ⵉⵣⵎⵔ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ ⴰⴷ ⵉⴳ ⵜⴰⵎⵙⵙⵉⵍⵉⵜ ⵏ ⵓⵎⵢⴰⵡⴰⵙ ⵉⵥⵥⵍⵎⴹ-ⵉⴼⴼⵓⵙ».  

ⵉⴳⴰ ⵓⵏⵎⵓⵇⵇⴰⵔ ⴰⴷ ⴰⵣⵎⵣⵣⵓ ⴳ ⵙⵏⴼⵍⵏ ⵙⵉⵏ ⵉⵎⵙⵜⴳⴳⴰⵔⵏ ⵜⴰⵏⵏⴰⵢⵉⵏ ⴼ ⵜⵎⴰⵎⴽⵉⵏ ⵏ ⵓⵙⵙⵎⵖⵔ ⵏ ⵓⵎⵢⴰⵡⴰⵙ ⵊⴰⵔ ⵓⵕⵓⴱⴱⴰ ⴷ ⵉⴼⵔⵉⵇⵢⴰ, ⵖⵎⴽ ⴰⵏⵏ ⴷ ⵓⵙⵙⵎⵖⵔ ⵏ ⵉⵙⵓⵔⵙⵏ ⵏ ⵜⵎⵖⴰⵔⵜ ⴷ ⵉⵄⵔⵔⵉⵎⵏ ⴷ ⴽⵉⴳⴰⵏ ⵏ ⵉⵎⵔⵙⵉⵡⵏ ⵉⵣⴷⵉⵏ ⴷ ⵜⴳⵎⵉ.