ⴷⴰⴽⴰⵕ: ⵉⵙⵏⵓⴱⴳ ⵓⵏⵙⵙⵉⵅⴼ ⵎⴰⴽⵉ ⵙⴰⵍ ⵎⴰⵙⵙ ⵟⴰⵍⴱⵉ ⵍⵄⴰⵍⴰⵎⵉ

ⵉⵙⵏⵓⴱⴳ ⵓⵏⵙⵙⵉⵅ ⵏ ⵙⵙⵉⵏⵉⴳⴰⵍ ⵎⴰⴽⵉ ⵙⴰⵍ, ⴰⵙⵙ ⵏ ⵓⴽⵕⴰⵙ, ⴳ ⵓⴳⴰⴷⵉⵔ ⵏⵏⵙ ⴳ ⴷⴰⴽⴰⵕ, ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵍⵍⴰⵏ ⴳ ⵓⵔⵣⴰⴼ ⵏ ⵜⵡⵓⵔⵉ ⵉ ⵙⵙⵉⵏⵉⴳⴰⵍ. ⵉⵍⵍⴰ ⵓⵙⵏⵓⴱⴳ ⴰⴷ ⵙ ⵜⵉⵍⵉⵜ ⵏ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵙⵙⵉⵏⵉⴳⴰⵍ ⴰⵎⴰⴷⵓ ⵎⴰⵎⵉ ⴷⵢⵓⴱ, ⴷ ⵓⵎⵙⵇⵇⴰⴷ ⵏ ⴱⴰⴱ ⵏ ⵡⴰⴷⴷⵓⵔ ⴳ ⵙⵙⵉⵏⵉⴳⴰⵍ, ⵎⴰⵙⵙ ⵃⴰⵙⴰⵏ ⵏⵏⴰⵚⵉⵕⵉ.

ⵉⵙⵓⵜⴳ ⵎⴰⵙⵙ ⵟⴰⵍⴱⵉ ⵍⵄⴰⵍⴰⵎⵉ ⵜⵉⵣⴷⴰⵢⵉⵏ ⵥⵉⵍⵏⵉⵏ ⵊⴰⵔ ⵍⵎⵖⵔⵉⴱ ⴷ ⵙⵙⵉⵏⵉⴳⴰⵍ, ⵙ ⵜⵏⴰⵔⴰ ⵜⵓⵏⵥⵉⵥⵜ ⵏ ⵉⵅⴰⵜⴰⵔⵏ ⵏ ⵙⵏⴰⵜ ⵜⵎⵉⵣⴰⵔ, ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴷ ⵓⵏⵙⵙⵉⵅⴼ ⵎⴰⴽⵉ ⵙⴰⵍ, ⵢⵉⵏⵉ ⵎⴰⵙ ⴷ ⵉⵇⵇⴰⵏ ⵓⵙⴷⵓⵙ ⵏ ⵜⵣⴷⴰⵢⵉⵏ ⴰⴷ ⵜⵉⵎⵣⵔⴰⵢ ⴳ ⵎⴰⵕⵕⴰ ⵉⵙⵡⵉⵔⵏ.

ⵢⵉⵏⵉ ⵎⴰⵙ ⵉⴳⴰ ⵓⵙⵏⵓⴱⴳ ⴰⴷ ⵜⴰⵎⵍⴷⴰ ⵏ ⵓⵙⵓⵜⴳ ⴷ ⵓⵙⵏⵉⵎⵎⵔ ⵏ ⵓⵎⴰⴷⴰⵏ ⵏ ⵍⵎⵖⵔⵉⴱ ⴼ ⵓⵙⵏⴰⵍ ⵍⵍⵉ ⵜⵙⵎⵏⵉⴷ ⵙⵙⵉⵏⵉⴳⴰⵍ ⵉ ⵜⵎⵙⴰⵔⵜ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ.

ⵉⵙⵓⵜⴳ ⵓⵍⴰ ⵜⴰⵣⵣⵉⴳⵣⵜ ⵉⵍⵍⴰⵏ ⴳ ⵙⵙⵉⵏⵉⴳⴰⵍ ⴳ ⵜⵓⵚⴽⵉⵡⵉⵏ ⵏⵏⵙ ⵜⵉⵏⴰⴷⴷⴰⵡⵉⵏ, ⴷ ⵓⵔⴳⴳⵉⴳ ⴷ ⵓⵎⵛⴰⴱⴱⴰⴽ ⴰⵏⴰⵎⵓⵏ ⵉⵍⵍⴰⵏ ⴳ ⵜⵎⴰⵣⵉⵔⵜ, ⵢⵉⵏⵉ ⵎⴰⵙ ⴳⴰⵏⵜ ⵜⵎⵙⴽⴰⵔ ⴰⴷ ⵜⴰⵢⴰⴼⵓⵜ ⵏ ⵜⵓⵏⵥⵉⵥⵜ ⴷ ⵜⵉⵏⵡⵉⵜ ⵜⵉⵙⵔⵜⴰⵏⵉⵏ, ⴰⵢⵍⵍⵉ ⵢⵉⵡⵙⵏ ⴳ ⵓⴼⵔⴰⴳ ⵏ ⵓⵔⴳⴳⵉⴳ ⴰⵙⵔⵜⴰⵏ.

ⵢⵉⵏⵉ ⵎⴰⵙⵙ ⵟⴰⵍⴱⵉ ⵍⵄⴰⵍⴰⵎⵉ ⵎⴰⵙ ⵉⴳⴰ ⵓⵏⵎⵓⵇⵇⴰⵔ ⵜⴰⵎⵍⴷⴰ ⵏ ⵓⵙⵔⵖⴷ ⵏ ⵓⵏⵙⵙⵉⵅⴼ ⵏ ⵙⵙⵉⵏⵉⴳⴰⵍ ⴼ ⵜⵓⴳⴳⴰⵙ ⵏⵏⵙ ⴷ ⵓⵎⵣⴰⵖ ⵏ ⵜⵏⵓⴼⴰ ⵏ ⵉⴼⵔⵉⵇⵢⴰ ⴳ ⵓⵣⵎⵣ ⵍⵍⵉⵖ ⵉⵙⵙⵉⵅⴼ ⵜⴰⵎⵓⵏⵜ ⵜⴰⴼⵔⵉⵇⵉⵜ.

ⴳ ⵜⴳⵉⵔⴰ ⵏ ⵓⵙⵏⵓⴱⴳ, ⵉⴼⴽⴰ ⵓⵏⵙⵙⵉⵅⴼ ⵎⴰⴽⵉ ⵙⴰⵍ ⵉ ⵎⴰⵙⵙ ⵟⴰⵍⴱⵉ ⵍⵄⴰⵍⴰⵎⵉ ⵜⴰⵎⴰⴷⴰⵢⵜ ⵏ ⵓⴳⵔⵣⴰⵎ ⴰⵏⴰⵎⵓⵔ ⴳ ⵜⵙⴽⵯⴼⵍⵜ ⵏ ⵓⵅⴰⵜⴰⵔ, ⵜⵜⵓⴼⴽⵉⵏⵜ ⵓⵍⴰ ⵜⵎⴰⴷⴰⵢⵉⵏ ⵏ ⵓⴳⵔⵣⴰⵎ ⴰⵏⴰⵎⵓⵔ ⵜⴰⵙⴽⵯⴼⵍⵜ ⵏ ⵓⴼⵙⵢⴰⵏ ⵉ ⵎⴰⵙⵙ ⴰⵃⵎⴰⴷ ⵜⵜⵡⵉⵣⵉ ⴷ ⵎⴰⵙⵙ ⵄⴰⴱⴷⵕⵕⴰⵃⵉⵎ ⵛⴰⵀⵉⴷ ⴷ ⵎⴰⵙⵙ ⵛⵛⴰⵡⵉ ⴱⵍⵄⵙⵙⴰⵍ ⴷ ⵎⴰⵙⵙ ⵕⴰⵛⵉⴷ ⵃⵎⵎⵓⵏⵉ.

ⵉⵍⵍⴰ ⴳ ⵓⵔⵣⴰⴼ ⴰⴷ ⵏ ⵜⵡⵓⵔⵉ ⵓⵣⵎⵎⴻⵎ ⵏ ⵜⵎⵙⵙⴽⵯⵜⵉⵜ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵊⴰⵔ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵙⵙⵉⵏⵉⴳⴰⵍ.

ⵉⵍⵍⴰ ⴳ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵎⵖⵔⵉⴱⵉ: ⵎⴰⵙⵙ ⴰⵃⵎⴰⴷ ⵜⵜⵡⵉⵣⵉ, ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⵥⵖⵕⵜ ⴷ ⵜⵎⴰⵜⵔⴰⵔⵜ, ⵎⴰⵙⵙ ⵄⴰⴱⴷⵕⵕⴰⵃⵉⵎ ⵛⴰⵀⵉⴷ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵜⴰⵙⵔⵎⵓⵏⵜ, ⵎⴰⵙⵙ ⵛⵛⴰⵡⵉ ⴱⵍⵄⵙⵙⴰⵍ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵜⴰⴷⵙⵜⴰⵔⵜ ⵜⴰⴷⵉⵎⵓⵇⵔⴰⵟⵉⵜ ⵜⴰⵏⴰⵎⵓⵏⵜ, ⵎⴰⵙⵙ ⵕⴰⵛⵉⴷ ⵃⵎⵎⵓⵏⵉ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵡⴰⵍⴰⵢ ⴷ ⵜⵙⵔⵎⵓⵏⵜ.