ⵉⵣⵎⵎⵉⵎ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵓⵏⵙⵙⵉⵅⴼ ⵏ ⵍⴽⵏⵉⵙⵉⵜ ⴳ ⵉⵙⵕⴰⵉⵍ ⵜⴰⵎⵙⵙⴽⵯⵜⵉⵜ ⵏ ⵓⵏⵔⴰⵎⴰⵙ. ⴰⵏⵙⵙⵉⵅⴼ ⵏ ⵍⴽⵏⵉⵙⵉⵜ: ⵚⵚⵃⵕⴰ ⵔⴰⴷ ⴱⴷⴷⴰ ⵜⴳ ⵜⴰⵎⵖⵔⵉⴱⵉⵜ

ⵉⵎⴹⴰⴽⴰⵕ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ 8 ⵢⵓⵏⵢⵓ 2023 ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⴷ ⵎⴰⵙⵙ ⴰⵎⵉⵔ ⵓⵃⴰⵏⵏⴰ ⴰⵏⵙⵙⵉⵅⴼ ⵏ ⵍⴽⵉⵏⵙⵉⵜ ⴳ ⵉⵙⵕⴰⵉⵍ ⴼ ⵓⵙⴷⵙⵓ ⵏ ⵜⵣⴷⴰⵢⵉⵏ ⵊⴰⵔ ⵜⵉⵎⵔⵙⴰⵍ ⵜⵉⵣⵣⵔⴰⴼⵉⵏ ⵏ ⵙⵏⴰⵜ ⵜⵎⵉⵣⴰⵔ, ⵙ ⵜⵎⵍⴷⴰ ⵏ ⵓⵔⵣⴰⴼ ⵏⵏⵙ ⴰⵎⴰⴷⴷⵓⴷ ⴰⵎⵣⵡⴰⵔⵓ ⵍⵍⵉ ⵉⵙⴽⵔ ⵉ ⵜⴳⵍⴷⵉⵜ ⵏ ⵍⵎⵖⵔⵉⴱ.

ⵉⵙⵓⵜⴳ ⵎⴰⵙⵙ ⴰⵎⵉⵔ ⵓⵃⴰⵏⵏⴰ ⵜⴰⵏⴰⵔⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵍⵇⵓⴷⵙ, ⴷ ⵜⵉⵍⴰⵍⵜ ⵏⵏⵙ ⴳ ⵓⵙⴽⵔ ⵏ ⵓⴼⵔⴰ ⵊⴰⵔ ⵉⵙⵕⴰⵉⵍ ⴷ ⴼⵉⵍⵉⵙⵟⵉⵏ, ⵢⵉⵏⵉ ⵎⴰⵙ ⵢⵉⵡⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵜⴰⵎⵢⵉⵎⴰⵏⵜ ⵏⵏⵙⵏ ⵍⵍⵉⵖ ⵉⴼⵔⴽ ⵙ ⵜⵎⵙⴰⵔⵉⵏ ⴷ ⵜⵏⴰⵥⴰⵕⵉⵏ ⵏⵏⵙⵏ ⴰⵢⵍⵍⵉ ⵢⵉⵡⵙⵏ ⵉ ⴱⴰⴱ ⵏ ⵡⴰⴷⴷⵓⵔ ⴰⴷ ⵉⴳ ⴰⵏⴼⴳⵓⵔ ⵊⴰⵔ ⵉⵙⵕⴰⵉⵍ ⴷ ⴼⴰⵍⵉⵙⵟⵉⵏ ⵉ ⵓⵙⴽⵔ ⵏ ⵓⴼⵔⴰ.

ⵉⵏⵏⴰ ⵎⴰⵙⵙ ⴰⵎⵉⵔ ⵓⵃⴰⵏⵏⴰ ⴰⵏⵙⵙⵉⵅⴼ ⵏ ⵍⴽⵏⵉⵙⵉⵜ ⵎⴰⵙ ⴱⴷⴷⴰ ⵜⴳⴰ ⵚⵚⵃⵕⴰ ⵜⴰⵎⵖⵔⵉⴱⵉⵜ, ⴰⵢⵍⵍⵉ ⵏⵉⵜ ⵉⵜⵜⵉⵏⵉ ⵓⵎⵣⵔⵓⵢ, ⴰⵢⵍⵍⵉ ⵔⴰⴷ ⵏⵉⵜ ⵢⵉⵏⵉ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵏ ⵉⵙⵕⴰⵉⵍ ⵙ ⵜⵖⴰⵔⴰⵙⵜ ⵜⴰⵎⴰⴷⴷⵓⴷⵜ ⴳ ⵎⴰⵏⵏ ⵓⵔ ⵢⴰⴳⴳⵉⴳⵏ.

ⵉⵙⴷⴷⵉⴷ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵎⴰⵙ ⵜⴳⴰ ⵜⴳⵍⴷⵉⵜ ⵏ ⵍⵎⵖⵔⵉⴱ ⴰⵛⴰⵎⵓⵛ ⵏ ⵓⴼⵔⴰ ⴷ ⵓⵎⵙⴰⵡⴰⵍ ⴷ ⵜⵎⵢⵉⴷⵉⵔⵜ ⵊⴰⵔ ⵜⵉⵖⵔⵎⵉⵡⵉⵏ ⴷ ⵜⴷⵍⵙⵉⵡⵉⵏ ⴷ ⵉⵙⴳⴷⵏ, ⵉⵙⵎⵏⵉⴷ ⵜⵉⵙⵏⵜⴰⵢⵉⵏ ⵍⵍⵉ ⵉⵙⴽⴰⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⴳ ⵓⵎⵏⵉⴷ ⴰⴷ ⵍⵍⵉⵖ ⵉⴳⴰ ⴰⴳⵍⴷⵓⵏ ⵏ ⵉⵎⵓⵎⵎⵏ. ⵉⴱⴷⵔ ⴳ ⵓⵎⵏⵉⴷ ⴰⴷ ⴰⴳⵔⴰⵡ ⴰⴱⵕⵍⴰⵎⴰⵏⵉ ⴰⴳⵔⴰⵖⵍⴰⵏ ⴼ ⵓⵎⵙⵡⴰⵍ ⵊⴰⵔ ⵉⵙⴳⴷⵏ ⵍⵍⵉ ⵔⴰⴷ ⵉⵙⵏⵎⴰⵍⴰ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴷ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⴳ ⵡⴰⵎⵓⵔ ⵏ ⵡⴰⴽⵓⵛ ⴳ ⵉⵎⴰⵍⴰⵙⵙ ⴷ ⵢⵓⵛⴽⴰⵏ ⵙ ⵓⴼⵔⴰⴳ ⴰⵎⴰⵜⵜⵓⵢ ⵏ ⴱⴰⴱⴰ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ.

ⵉⵍⵍⴰ ⵓⵎⵙⴰⵙⴰ ⴼ ⵜⵉⴽⴽⵉ ⵏ ⵓⵏⴼⵓⵙ ⴰⵎⴰⵢⴰⵏⵓ ⵉ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵊⴰⵔ ⵙⵉⵏ ⵉⵙⵇⵇⵉⵎⵏ, ⵣⵎⵎⵉⵎⵏ ⵜⴰⵎⵙⵙⴽⵯⵜⵉⵜ ⵏ ⵓⵏⵔⴰⵎⴰⵙ ⴼ ⵓⵙⵎⵖⵔ ⵏ ⵜⵣⴷⴰⵢⵉⵏ ⴳ ⵎⴰⵕⵕⴰ ⵉⴳⵔⴰⵏ ⵏ ⵜⵡⵡⵓⵔⵉ ⵜⴰⴱⵕⵍⴰⵎⴰⵏⵉⵜ. ⴰⵢⵍⵍⵉ ⵔⴰⴷ ⵢⴰⵡⵙ ⴳ ⵓⵙⴷⵓⵙ ⵏ ⵜⴷⴷⵓⴽⴽⵯⵍⴰ ⵊⴰⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵉⵙⵕⴰⵉⵍ ⴳ ⵎⴰⵕⵕⴰ ⵉⴳⵔⴰⵏ ⵛⵛⴰⵔⵏⵉⵏ ⴷ ⵓⵙⵎⵖⵔ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵛⵛⴰⵔⵏⵉⵏ ⵙ ⵜⵖⴰⵔⴰⵙⵜ ⵜⴰⵙⵓⵍⴰⵏⵜ ⵉ ⵓⵙⵎⵖⵔ ⴷ ⵓⵙⵖⵓⴷⵓ ⴷ ⵓⵙⵏⴼⵍ ⵏ ⵜⵎⴰⵣⴰⵢⵉⵏ ⴳ ⵉⴳⵔⴰⵏ ⵏ ⵓⵣⵣⵔⴰⴼ ⴷ ⵜⵡⵡⵓⵔⵉ ⵜⴰⴱⵕⵍⴰⵎⴰⵏⵉⵜ.

ⵃⴰⴹⵕⵏ ⴳ ⵓⵏⵎⵓⵇⵇⴰⵔ ⴰⴷ ⵎⴰⵙⵙ ⵏⵓⵕⴷⴷⵉⵏ ⵍⵀⴰⵔⵓⵛⵉ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵍⵎⵖⵔⵉⴱ-ⵉⵙⵕⴰⵉⵍ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵎⴰⵙⵙⴰ ⵏⴰⴷⵢⴰ ⴱⵓⵃⵉⴷⴰ ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵏ ⵜⵖⴰⵡⵉⵙⵉⵡⵏ ⵏ ⴱⵕⵕⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵖⴰⵡⵙⵉⵡⵉⵏ ⵜⵓⵙⵍⵉⵎⵉⵏ ⴷ ⵉⵎⵖⵔⵉⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ.