ⵉⵙⵓⵜⴳ ⵓⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⵜⵓⵕⴽⵢⴰ ⴰⵔⴳⴳⵉⴳ ⴷ ⵜⵣⵣⵉⴳⵣⵜ ⵉⵍⵍⴰⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ

ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⴰⵜⵓⵕⴽⵉ ⵎⵓⵚⵟⴰⴼⴰ ⵛⴰⵏⵟⵓⴱ, ⴰⴽⵡⴰⵙ ⴳ ⴰⵏⵇⴰⵕⴰ, ⴰⵙⵓⵜⴳ ⵏ ⵜⵎⴰⵣⵉⵔⵜ ⵏⵏⵙ ⵏ ⵓⵔⴳⴳⵉⴳ ⴷ ⵜⵣⵣⵉⴳⵣⵜ ⵍⵍⴰⵏⵉⵏ ⴳ ⵜⵍⴷⵉⵜ ⵏ ⵍⵎⵖⵔⵉⴱ. 

ⵢⵉⵏⵉ ⵎⴰⵙⵙ ⵛⵏⵟⵓⴱ ⴳ ⵓⵎⴹⴰⴽⴰⵕ ⵏⵏⵙ ⴰⴽⴷ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⴰⵎⵓⵏⵜ ⵉ ⵓⵏⴰⵎⵎⴰⵙ, ⴳ ⵓⴳⵔⴰⵡ 61 ⵏ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⴰⴷⵎⵙⴰⵏ ⵏ ⵉⵡⴰⵏⴽⵏ ⵏ ⵢⵉⵍ ⴰⵙⴳⴳⴳⴰⵏ, ⵎⴰⵙ ⵜⵜⴰⵡⵙ ⵜⵣⵣⵉⴳⵣⵜ ⵏ ⵜⴳⵍⴷⵉⵜ ⴳ ⵓⵙⵎⵖⵔ ⵏ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⵜⵓⵕⴽⵢⴰ, ⴷ ⵓⵏⴰⵔⵓⵣ ⵏⵏⵙ ⴰⴷ ⵢⵉⵍⵉ ⵓⵔⴳⴳⵉⴳ ⵏ ⵍⵎⵖⵔⵉⴱ ⴳ ⵉⵡⴰⵏⴽⵏ ⵏ ⵜⵙⴳⴰ. 

ⵖⵎⴽ ⵍⵍⵉ ⵉⵙⵓⵜⴳ ⵜⵉⵡⵉⵣⵉ ⴷ ⵓⴼⵛⴰⴷ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⴰⵎⴷ ⵡⵉⵙ ⵚⴹⵉⵚ ⴷⴰⵜ ⵏ ⵓⵏⴷⵓⴷⵉ ⴳ ⵉⴼⴼⵓⵙ ⵏ ⵜⵓⵕⴽⵢⴰ. 

ⵉⵃⴰⴹⵕ ⴳ ⵓⵎⵓⵇⵇⴰⵔ ⴰⴷ ⵓⵎⵙⵇⵇⴰⴷ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⵜⵓⵕⴽⵢⴰ ⵎⴰⵙⵙ ⵎⵓⵃⴰⵎⴰⵎⴷ ⵄⴰⵍⵉ ⴰⵍⴰⵣⵔⴰⵇ, ⵉⵙⵓⵜⴳ ⵎⴰⵙⵙ ⵛⵏⵟⵓⴱ ⵜⵉⵣⴷⴰⵢⵉⵏ ⵥⵉⵍⵏⵉⵏ ⵏ ⵜⵎⴰⵣⵉⵔⵜ ⵏⵏⵙ ⴰⴽⴷ ⵍⵎⵖⵔⵉⴱⵏ ⵢⵉⵏⵉ ⵎⴰⵙ ⵉⴳⴰ ⵍⵎⵖⵔⵉⴱ ⵜⴰⵎⴰⵣⵉⵔⵜ ⵉⵙⵜⴰⵡⵀⵎⵎⴰⵏ ⴳ ⵓⵙⴰⵢⵔⵓⵔ ⴰⵏⴰⵎⵎⴰⵙ ⵉ ⵜⵓⵕⴽⵢⴰ. 

ⵉⵣⵎⵎⵉⵎ ⵎⴰⵙ ⵉⵍⴽⵎ ⵓⵙⵏⴼⵍ ⴰⵏⵙⴱⴰⴱ ⵊⴰⵔ ⵙⵏⴰⵜ ⵜⵎⵉⵣⴰⵔ 4.7 ⵎⵍⵢⴰⵕ ⴷⵓⵍⴰⵕ ⴳ 2022, ⵙ 10 % ⴳ ⵓⵙⴳⴳⵯⴰⵙ ⵉⵣⵔⵉⵏ, ⵉⵍⵉⵏⵜ ⴳ ⵜⴳⵍⴷⵉⵜ 160 ⵏ ⵜⵎⵙⵙⵓⵔⵜ ⵙⴽⵔⵏⵉⵏ 10.000 ⵏ ⵜⵓⵣⵣⵍⵜ ⵏ ⵜⵡⵡⵓⵔⵉ. 

ⵢⵉⵏⵉ ⵎⴰⵙ ⴳⴰⵏ ⵓⵟⵟⵓⵏⵏ ⴰⴷ ⵡⵉⴷ ⵥⵉⵍⵏⵉⵏ, ⴷ ⵓⵏⴰⵔⵓⵣ ⵉ ⴽⵉⴳⴰⵏ ⵏ ⵉⵙⵏⴼⵍⵏ ⵙ ⵓⵙⵎⵀⵍ ⵏ ⵓⵎⵢⴰⵡⴰⵙ ⴷ ⵓⵍⵜⴰⵖ ⵏ ⴽⵓ ⵜⵉⵎⵔⵙⴰⵍ ⴳ ⵜⴷⵉⵏⴰⵎⵉⵜ ⴰⴷ, ⵖ ⵉⵍⵍⴰ ⵓⴱⵕⵍⴰⵎⴰⵏ ⵙ ⵓⵙⵏⴼⵍ ⵏ ⵉⵔⵣⴰⴼⵏ ⵓⵏⵚⵉⴱⵏ ⵊⴰⵔ ⵙⵏⴰⵜ ⵜⵎⵉⵣⴰⵔ.

ⵉⵙⵙⵔⵖ ⴷ ⵓⵍⴰ ⴰⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴼ ⵓⵎⵓⵔⵙ ⵏ ⵜⵙⵎⵓⵏⴰⵢ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⴰⵎⵓⵏⵜ ⵉ ⵓⵏⴰⵎⵎⴰⵙ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵟⴰⵍⴱⵉ ⵍⵄⴰⵍⴰⵎⵉ, ⵉⵍⵍⴰⵏ ⴳ ⵍⵎⵖⵔⵉⴱ. 

ⵉⵙⵎⴰⵢⵏⵓ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵍⵎⵖⵔⵉⴱ ⴰⴼⵛⴰⴷ ⵏ ⴱⴰⴱ ⵏ ⵡⴰⴷⴷⵓⵔ ⴷ ⵜⵏⴱⴰⴹⵜ ⴷ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴷⴼⴼⵉⵔ ⵏ ⵓⵏⴷⵓⴷⵉ ⵉⵍⵍⴰⵏ ⴳ ⵜⵓⵕⴽⵢⴰ ⴳ ⴱⵕⴰⵢⵔ ⵉⵣⵔⵉⵏ. 

ⵉⵙⵓⵜⴳ ⴰⴷⴷⴰⴷ ⵏ ⵜⵓⵕⴽⵢⴰ ⴼ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ, ⵢⵉⵏⵉ ⵎⴰⵙ ⵉⴷⵔⵓ ⵍⵎⵖⵔⵉⴱ ⴷ ⵜⵓⵕⴽⵢⴰ ⵜⵉⵔⵙⴰⵍ ⵏ ⵓⵡⵇⵇⵔ ⵏ ⵜⵅⵅⵓⵜⵔⴰ ⵜⴰⵏⴰⴽⴰⵍⵜ ⵏ ⵉⵡⴰⵏⴽⵏ ⴷ ⵜⵉⵍⵉⵜ ⵏ ⵓⴼⵔⴰ ⴷ ⵜⵏⴼⵔⵓⵜ ⴳ ⵓⵎⴰⴹⴰⵍ ⴷ ⵓⴼⵓⴽⴽⵓ ⵏ ⵉⵎⴰⵖⵏ ⵙ ⵓⴼⵔⴰ. 

ⵉⵙⴷⴷⵉⴷ ⵎⴰⵙⵙ ⵟⴰⵍⴱⵉ ⵍⵄⴰⵍⴰⵎⵉ ⵎⴰⵙ ⵍⵍⴰⵏⵜ ⵜⵎⵍⴷⴰ ⵏ ⵓⵙⵙⴰⵔⵓ ⴳ ⵍⵎⵖⵔⵉⴱ ⵉⴳⴰⵏ ⵜⴰⵡⵡⵓⵔⵜ ⵙ ⵉⴳⴰⴷⴰⵣⵏ ⵏ ⵉⴼⵔⵉⵇⵢⴰ, ⵉⵖⵔ ⵉ ⵓⵙⵎⵖⵔ ⵏ ⵜⴷⵔⴰⵡⵉⵏ ⵊⴰⵔ ⵍⵎⵖⵔⵉⴱ ⴷ ⵜⵓⵕⴽⵢⴰ ⴼ ⵚⴰⵃⴰ ⵃⵎⴰ ⴰⴷ ⵢⵉⵍⵉ ⵓⵙⵙⵏ ⵏ ⵜⵎⵍⴷⴰ ⵍⵍⴰⵏⵉⵏ ⴳ ⵉⴼⵔⵉⵇⵢⴰ. 

ⵉⵙⵓⵜⴳ ⵓⵍⴰ ⵜⴰⵣⵣⵉⴳⵣⵜ ⵉⵍⵍⴰⵏ ⴳ ⵜⵓⵕⴽⵢⴰ ⴳ ⵙⵏⴰⵜ ⵜⵎⵔⴰⵡⵉⵏ ⴳⴳⵓⵔⴰⵏⵉⵏ, ⴷ ⵜⵉⵍⴰⵍⵜ ⵏ ⴰⵏⵇⴰⵕⴰ ⴳ ⵓⴼⵙⵙⴰⵢ ⵏ ⵜⴰⵙⵙⴰⵙⵜ ⵊⴰⵔ ⵔⵓⵙⵢⴰ ⴷ ⵓⴽⵕⴰⵏⵢⴰ, ⵙ ⵓⵙⴽⵔⵏ ⵏ ⵜⵎⵢⴰⵇⵇⴰⵏⵜ ⴷ ⵓⵙⵉⴼⴹ ⵏ ⵡⴰⵍⵓⴷⵏ ⵏ ⵓⴽⵕⴰⵏⵢ. ⵙ ⵜⵎⵍⴷⴰ ⴰⴷ, ⵉⵖⵔⴰ ⵎⴰⵙⵙ ⵟⴰⵍⴱⵉ ⵍⵄⴰⵍⴰⵎⵉ ⵉ ⵓⵏⴳⴳⵯⵓ ⵏⵏⵙ ⴰⵜⵓⵕⴽⵉ ⵉ ⵓⴷⵔⴰⵡ ⴳ ⵓⴳⵔⴰⵡ ⴰⴱⵔⵍⴰⵎⴰⵏⵉ ⴼ ⵓⵎⵙⴰⵡⴰⵍ ⵊⴰⵔ ⵉⵙⴳⴷⵏ ⵍⵍⵉ ⵜⴰⴷ ⵢⵉⵍⵉ ⴳ ⵡⴰⵎⵓⵔ ⵏ ⵡⴰⴽⵓⵛ ⴳ ⵡⴰⵢⵢⵓⵔ ⵏ ⵢⵓⵏⵢⵓ. 

ⵉⵍⵍⴰ ⵓⴳⵔⴰⵡ ⴰⴷ ⵡⵉⵙ 61 ⵏ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⴰⴷⵎⵙⴰⵏ ⵏ ⵉⵡⴰⵏⴽⵏ ⵏ ⵢⵉⵍ ⴰⵙⴳⴳⴰⵏ ⴳ ⴰⵏⵇⴰⵕⴰ ⴰⵙⵙ ⵏ ⵓⴽⵡⴰⵙ, ⵉⴷⵔⵓ ⴳⵉⵙ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⴰⵎⵓⵏⵜ ⵉ ⵓⵏⴰⵎⵎⴰⵙ. 

ⵔⴰⴷ ⴳⵉⵙ ⵢⵉⵍⵉ ⵓⵎⴹⴰⴽⴰⵕ ⴼ ⵉⵎⵏⴰⴷⵏ ⴷ ⵜⵏⴰⵥⴰⵕⵉⵏ ⵏ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⴰⴷⵎⵙⴰⵏ ⵏ ⵉⵡⴰⵏⴽⵏ ⵏ ⵢⵉⵍ ⴰⵙⴳⴳⴰⵏ ⵓⵙⵙⴰⵏ ⵏ 4 ⴷ 5 ⵎⴰⵢ ⴷ ⵓⵙⴼⵓⴳⵍⵓ ⵏⵏⵙ ⵡⵉⵙ 30, ⴷ ⵜⵉⵍⴰⵍⵜ ⵏ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵜⵉⵏⴰⵎⵓⵔⵉⵏ ⴳ ⵓⵙⴷⵓⵙ ⵏ ⵓⴼⵔⴰ ⴷ ⵓⵔⴳⴳⵉⴳ ⴷ ⵜⵣⵣⵉⴳⵣⵜ ⵜⴰⴷⵎⵙⴰⵏⵜ ⴷ ⵉⵎⵔⵙⵉⵡⵏ ⵢⴰⴹⵏⵉⵏ.