ⵉⵎⴹⴰⴽⴰⵕⵏ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⴽⴰⴱⴰⵔ ⴰⴱⵕⵍⴰⵎⴰⵏⵉ ⵏ ⵍⵖⵎⵔⵉⴱ ⴷ ⵉⵏⵙⵙⵉⵅⴼⵏ ⵏ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏ ⴳ ⵍⵢⴰⴱⴰⵏ ⴷ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵍⵢⴰⴱⴰⵏ-ⵍⵎⵖⵔⵉⴱ

ⵉⵎⴹⴰⴽⴰⵕ ⵎⴰⵙⵙ ⵕⴰⵛⵉⴷ ⵟⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵓⴽⴰⴱⴰⵕ ⴷⴷ ⵉⵎⵓⵏ, ⴰⵙⵉⵏⴰⵙ 7 ⵎⴰⵕⵚ 2023 ⴳ ⵟⵓⴽⵢⵓ, ⴷ ⵎⴰⵙⵙ HOSODA Hiroyuki ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵎⴰⵙⵙ Hidehisa Otsuji ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴷ ⵉⴳⵎⴰⵎⵏ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵍⵢⴰⴱⴰⵏ-ⵍⵎⵖⵔⵉⴱ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ NAKASONE Hirofumi ⴳ ⵓⵙⴰⵜⵉ ⵏ ⵓⵔⵣⴰⴼ ⵉ ⵍⵢⴰⴱⴰⵏ ⵙ ⵜⵖⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ.

ⵉⵍⵍⴰ ⴳ ⵓⴽⴰⴱⴰⵕ ⵏ ⵍⵎⵖⵔⵉⴱ ⵎⴰⵙⵙ ⵎⵓⵃⴰⵎⵎⴰⴷ ⵖⵉⵢⵢⴰⵜ ⵙⴳ ⵓⴳⵔⴰⵡ ⴰⵏⴰⵎⵓⵔ ⵏ ⵉⵏⵙⵉⵎⴰⵏⵏ, ⵎⴰⵙⵙ ⴰⵃⵎⴰⴷ ⵜⵡⵉⵣⵉ ⵙⴳ ⵜⵥⵖⵕⵜ ⴷ ⵜⵎⴰⵜⵔⴰⵔⵜ, ⵎⴰⵙⵙ ⵏⵓⵔⴷⴷⵉⵏ ⵎⴹⵢⴰⵏ ⵙⴳ ⵜⵙⵉⵎⴰⵏⵜ ⵉ ⵜⵎⵓⵏⵉ ⴷ ⵢⵉⵙⴽⵉⵍ, ⵎⴰⵙⵙ ⵄⴰⴱⴷⵕⵕⴰⵃⵉⵎ ⵛⴰⵀⵉⴷ ⵙⴳ ⵜⵔⴰⴱⴱⵓⵜ ⵜⴰⵙⵔⵎⵓⵏⵜ, ⵎⴰⵙⵙ ⵛⵛⴰⵡⵉ ⴱⵍⵄⵙⵙⴰⵍ ⵙⴳ ⵜⵔⴰⴱⴱⵓⵜ ⵜⴰⴷⵙⵜⴰⵔⵜ ⵜⴰⴷⵉⵎⵓⵇⵔⴰⵟⵉⵜ ⵜⴰⵏⴰⵎⵓⵏⵜ, ⵎⴰⵙⵙ ⵍⵃⵓⵙⴰⵢⵏ ⴰⵣⵓⴳⴰⵖ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵍⵎⵖⵔⵉⴱ-ⵍⵢⴰⴱⴰⵏ.

ⵉⵍⵍⴰ ⵓⵎⴹⴰⴽⴰⵔ ⴼ ⵓⵙⴷⵓⵙ ⵏ ⵜⵣⴷⴰⵢⵉⵏ ⵊⴰⵔ ⵜⵉⵎⵉⵣⴰⵔ ⵟⵟⴰⴼⵏⵉⵏ ⴰⵎⵣⵔⵓⵢ ⴰⵎⵣⵔⴰⵢ ⴷ ⵓⴷⵍⵙⴰⵏ ⵉⴷⵔⴰⵏ, ⴷ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵥⵉⴽⵏⵉⵏ, ⵉⵍⵍⴰ ⵓⵔⵣⴰⴼ ⴰⴷ ⴳ ⵓⵙⴰⵜⵉ ⵏ ⵓⵙⵏⴰⵍ ⵏ ⵜⵣⴷⴰⵢⵉⵏ ⴰⴷ, ⵙ ⵓⵙⵎⵔⵙ ⵏⵏⵙⵏⵜ ⴷ ⵓⵎⵢⴰⵡⴰⴹ ⴰⵙⵓⵍⴰⵏ ⴷ ⵓⵙⴽⵔ ⵏ ⵉⵙⴰⵢⵔⵓⵔⵏ ⵏ ⵓⵎⵙⴰⵡⴰⵍ ⴷ ⵓⵙⵏⴼⵍ  ⵏⵜⵎⵓⵣⴰⵢⵉⵏ ⴷ ⵜⵉⵔⵎⵉⵜⵉⵏ ⴷ ⵓⵙⵎⵏⵉⴷ ⵏ ⵜⵉⵔⵎⵉⵜ ⵜⴰⴱⵕⵍⴰⵎⴰⵏⵉⵜ ⴷ ⵓⵎⴹⴰⴽⴰⵕ ⵏ ⵜⵎⵙⴰⵔⵉⵏ ⵛⵛⴰⵔⵏⵉⵏ.

ⴳ ⵜⵣⵡⵉⵔⵉ, ⵉⵙⵏⵉⵎⵎⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵎⵙⵜⴳⴳⴰⵔⵏ ⵏ ⵍⵢⴰⴱⴰⵏ ⴼ ⵓⵙⵏⵓⴱⴳ ⴷ ⵡⴰⴷⴷⴰⴷ ⵏ ⵜⵎⴰⵣⵉⵔⵜ ⵏⵏⵙⵏ ⵅⴼ ⵜⵎⵙⴰⵔⵜ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵉⵙⵎⵏⵉⴷ ⴰⵖⴰⵡⴰⵙ ⵏ ⵓⵏⴱⴰⴹ ⴰⵏⵉⵎⴰⵏ ⵏ ⵍⵎⵖⵔⵉⴱ ⵉ ⵓⴼⵓⴽⴽⵓ ⵏ ⵜⵎⴰⵖⵜ ⵉⵜⵜⵓⵙⴽⴰⵔⵏ ⴳ ⵜⵙⴳⴳⵉⵡⵉⵏ ⵏ ⵉⴼⴼⵓⵙ, ⵍⵍⵉ ⵉⴳⴰⵏ ⴰⴼⵙⵙⴰⵢ ⵏ ⵜⵉⵍⴰⵡⵜ ⵉⵖⵣⴰⵏ, ⴰⵢⵍⵍⵉ ⵉⵎⵎⴰⵍⴰⵏ ⴰⵎⵙⴰⵙⴰ ⴰⴳⵔⴰⵖⵍⴰⵏ ⴷ ⵓⵙⴳⴰⵡⴰⵏ ⵉⴳⴳⵓⵜⵏ ⵍⵍⵉ ⵜⴻⵟⵟⴰⴼ ⵜⵙⵓⵎⵔⵜ ⴰⴷ.

ⵉⵙⵓⵜⴳ ⵎⴰⵙⵙ ⵕⴰⵛⵉⴷ ⵜⴰⵍⴱⵉ ⵍⵄⴰⵍⴰⵎⵉ ⴰⵙⵡⵉⵔ ⵏ ⵜⵣⴷⴰⵢⵉⵏ ⵥⵉⵍⵏⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵢⵉⵏⵉ ⵎⴰⵙ ⴷ ⴰⵏⴳⵔⴰⵡ ⴰⴳⵍⴷⴰⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵍⵢⴰⴱⴰⵏ ⵉⴳⴰ ⵜⴰⵔⵙⵍⵜ ⵏ ⵓⵔⴳⴳⵉⴳ ⴷ ⵜⴳⵎⵉ, ⵢⵉⵏⵉ ⵎⴰⵙ ⵜⵉⵡⵙ ⵜⵓⵏⵥⵉⵣⵟ ⵏ ⵉⵅⴰⵜⴰⵔⵏ ⵏ ⵙⵏⴰⵜ ⵜⵎⵎⵉⵣⴰⵔ ⴳ ⵓⴼⵙⵙⴰⵢ ⵏ ⴽⵉⴳⴰⵏ ⵏ ⵜⵏⴰⵥⴰⵕⵉⵏ. ⵢⵉⵏⵉ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵜⵥⴹⴰⵕ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⴰⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⴰⴷ ⵜⵣⵔⵉ ⴽⵉⴳⴰⵏ ⵏ ⵜⵏⴰⵥⵕⵉⵏ, ⵜⵕⵥⵎ ⵓⵍⴰ ⵉⵙⴰⵡⵓⵔⵏ ⴳⴳⵓⵜⵏⵉⵏ ⴰⵎ ⴰⵙⴼⵍⵙ ⴰⴷⵓⵙⴰⵏ ⴷ ⵓⴼⵔⴰⴳ ⴰⵏⴰⵎⵓⵏ ⴷ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵜⵏⴼⵔⵓⵜ ⵏ ⵓⵜⵛⵓ ⴷ ⵓⵙⵎⴰⵜⵜⵉ ⴰⵎⵓⵟⵟⵓⵏ ⴷ ⵜⴼⵍⵍⴰⵃⵜ, ⴰⵢⵍⵍⵉⵖ ⵜⴳⴰ ⵜⴳⵍⴷⵉⵜ ⴰⵏⴰⵡ ⴳ ⵓⵙⵡⵓⵔ ⴰⵎⵏⵥⴰⵡ ⴷ ⵓⴳⵔⴰⵖⵍⴰⵏ ⴷ ⵡⴰⵏⴰⵡ ⵏ ⵜⵏⴼⵔⵓⵜ ⴷ ⵓⵔⴳⴳⵉⴳ ⴰⵏⵎⵏⴰⴹ ⴷ ⵓⴳⵔⴰⵖⵍⴰⵏ.

ⵉⵙⴰⵡⵍ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⴽⴰⴱⴰⵔ ⵏⵏⵙ, ⵜⵉⵎⵥⵍⴰⵢ ⵏ ⵜⵎⵔⵙⴰⵍ ⵜⵉⵙⵔⵜⴰⵏⵉⵏ ⴷ ⵜⴷⵙⵜⴰⵔⵉⵏ ⴳ ⵓⵏⴳⵔⴰⵡ ⴰⵙⵔⵜⴰⵏ ⵏ ⵍⵎⵖⵔⵉⴱ, ⴼⴽⵉⵏ ⴰⵙⵎⴰⵇⵇⵍ ⵏ ⵓⵏⴳⵔⴰⵡ ⴰⴱⵕⵍⴰⵎⴰⵏⵉ ⴷ ⵜⵣⴷⴰⵢⵉⵏ ⵏⵏⵙ ⴰⴽⴷ ⵜⵉⵎⵔⵙⴰⵍ ⴷ ⵜⵏⴱⴰⴹⵉⵏ ⵢⴰⴹⵏⵉⵏ, ⴷ ⵜⵔⴰⵙⴰⵍ ⵏ ⵡⴰⵏⴰⵡ ⴰⵎⵖⵔⵉⴱⵉ ⴷ ⵎⴰⴷ ⵜⴻⵟⵟⴰⴼ ⵜⴳⵍⴷⵉⵜ ⵙⴳ ⵜⵏⴼⵔⵓⵜ ⴷ ⵓⵔⴳⴳⵉⴳ ⴷ ⵓⵅⵎⵎⴻⵎ ⴳ ⵓⴼⴳⴰⵏ ⵙⵍⴰⵡⴰⵏ ⴰⴽⴽⵯ ⵜⴰⵎⵖⴰⵔⵜ ⴷ ⵜⵓⵡⵊⴰ ⴷ ⵉⵄⵔⵔⵉⵎⵏ.

ⵙⵓⵜⴳⵏ ⵉⵎⵙⵜⴳⴳⴰⵔⵏ ⵏ ⵍⵢⴰⴱⴰⵏ ⴰⵔⵣⴰⴼ ⴰⴷ ⵍⵍⵉ ⵔⴰⴷ ⵉⵖⴰⵎⴰ ⴳ ⵓⵣⵎⵎⴻⵎ ⵏ ⵓⵎⵢⴰⵡⴰⵙ ⵊⴰⵔ ⵙⵏⴰⵜ ⵜⵎⵉⵣⴰⵔ. ⵙⴷⴷⵉⴷⵏ ⵉⵏⵙⵙⵉⵅⴼⵏ ⵏ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏ ⴳ ⵍⵢⴰⴱⴰⵏ ⴷ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵜⵔⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵍⵢⴰⴱⴰⵏ-ⵍⵎⵖⵔⵉⴱ ⵎⴰⵙ ⵔⴰⴷ ⴰⵡⵙⵏ ⵉⵏⵎⵓⵇⵇⴰⵔⵏ ⴰⴷ ⴳ ⵓⵙⵎⴱⵔ ⵏ ⵓⵎⵙⴰⵡⴰⵍ ⴷ ⵓⵎⵢⴰⵡⴰⴹ ⴰⵎⵔⵙⵍⴰⵏ ⵉⵙⵓⵍⵏ ⵊⴰⵔ ⵉⴱⵕⵍⴰⵎⴰⵏⵏ ⵏ ⵙⵏⴰⵜ ⵜⵎⵉⵣⴰⵔ ⴷ ⵓⵕⵥⵥⵓⵎ ⵏ ⵉⵎⵏⴰⴷⵏ ⵢⴰⴹⵏⵉⵏ ⵏ ⵓⵎⵢⴰⵡⴰⵙ ⴳ ⵉⴳⵔⴰⵏ ⵏ ⵓⵙⵖⵏⵣⵉ ⴷ ⵜⵎⴰⵙⵙⴰⵏⵜ ⴷ ⵜⴷⵍⵙⴰ ⴷ ⵜⵎⴰⵍⵍⴰⵢⵜ, ⴷ ⵜⵓⵙⵙⵏⴰ ⵏ ⵜⵉⵔⵎⵉⵜ ⴷ ⵡⴰⵏⴰⵡ ⵏ ⵍⵢⴰⴱⴰⵏ.

ⵙⴷⴷⵉⴷⵏ ⵉⵎⵙⵜⴳⴳⴰⵔⵏ ⵓⵍⴰ ⴼ ⵓⵙⵏⴼⵍ ⵏ ⵜⵉⵔⵎⵉⵜⵉⵏ ⵜⵎⵙⴰⵔⵉⵏ ⵀⵎⵎⴰⵏⵉⵏ ⵙⵏⴰⵜ ⵜⵎⵉⵣⴰⵔ, ⴱⴷⴷⵏ ⴼ ⵓⵙⴷⵓⵙ ⵏ ⵓⵙⵏⴼⵍ ⴰⵏⵙⴱⴰⴱ ⴳ ⵉⴳⵔⴰⵏ ⵏ ⵜⴳⵯⵎⵔⵜ ⵜⴰⵢⵍⴰⵏⵜ ⴷ ⵜⴼⵍⵍⴰⵃⵜ, ⵙⴷⴷⵉⴷⵏ ⴼ ⵜⵥⴹⴰⵕⵉⵏ ⵏ ⵜⵎⴰⵍⵍⴰⵢⵜ ⵍⵍⴰⵏⵉⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴰⵢⵍⵍⵉ ⴷ ⵉⵜⵜⴰⵡⵉⵏ ⵉⵎⴰⵍⵍⴰⵢⵏ ⵏ ⵓⵎⴰⴹⴰⵍ ⴷ ⵡⵉⵏ ⵍⵢⴰⴱⴰⵏ, ⵙ ⵜⵎⵏⵏⴰⵡⵜ ⵜⴰⴷⵍⵙⴰⵏⵜ ⴷ ⵜⵙⵏⵉⵍⵙⵜ ⴷ ⵜⵊⵓⵖⵔⴰⴼⵉⵜ ⵉⵍⵍⴰⵏ ⴳ ⵍⵎⵖⵔⵉⴱ. ⵙⵙⵔⵖⴷⵏ ⵍⵎⵖⵔⵉⴱ ⴼ ⵜⵉⵢⵢⴰⴼⵓⵜ ⵍⵍⵉ ⵜⵙⴽⵔ ⵜⵔⴰⴱⴱⵓⵜ ⵜⴰⵏⴰⵎⵓⵔⵜ ⵜⴰⵎⵖⵔⵉⴱⵉⵜ ⵉ ⵜⵓⵡⵊⵊⴰ ⵏ ⵓⴹⴰⵕ ⴳ ⵇⴰⵟⴰⵕ 2022.

ⴳ ⵓⵎⴹⴰⴽⴰⵔ ⴷ ⵓⵙⵏⴼⵍ ⵏ ⵜⴰⵏⵏⴰⵢⵢⵉⵏ, ⵉⵙⴰⵡⵍ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⴽⴰⴱⴰⵕ  ⴷ ⵉⵎⵙⵜⴳⴳⴰⵔⵏ ⵏ ⵍⵢⴰⴱⴰⵏ ⴼ ⵜⵎⵙⴰⵔⵉⵏ ⵜⵉⵏⵎⵏⴰⴹⵉⵏ ⴷ ⵜⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ ⵛⵛⴰⵔⵏⵉⵏ, ⴷ ⵜⵉⵍⴰⵍ ⵏ ⵉⴱⵔⵍⴰⵎⴰⵏⵏ ⴳ ⵜⵡⴰⴼⵉⵜ ⵏ ⵉⴼⵙⵙⴰⵢⵏ ⴳ ⵓⴳⵯⵏⵙ ⵏ ⵜⵡⵡⵓⵔⵉ ⵜⴰⴱⵍⴰⵎⴰⵏⵉⵜ.