ⴰⵎⵙⴰⵡⴰⵍ ⴰⴱⵕⵍⴰⵎⴰⵏⵉ ⴰⵙⵓⵍⴰⵏ ⵉⵕⵡⴰⵏ ⴳ ⵉⵎⴹⴰⴽⴰⵕⵏ ⵊⴰⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵍⵎⵖⵔⵉⴱ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵏ ⴽⵓⵍⵓⵎⴱⵢⴰ

ⵉⵎⴹⴰⴽⴰⵕ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 6 ⴷⵓⵊⴰⵏⴱⵉⵔ ⴳ ⵕⵕⴱⴰⵟ ⴷ ⵎⴰⵙⵙ Roy Leonardo Barreras Montealegre  ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴳ ⵜⴳⴷⵓⴷⴰⵏⵜ ⵏ ⴽⵓⵍⵓⵎⴱⵢⴰ, ⵉⵍⵍⴰⵏ ⴳ ⵓⵔⵣⴰⴼ ⵏ ⵜⵡⵡⵓⵔⵉ ⵉ ⵍⵎⵖⵔⵉⴱ.

ⵉⵃⴰⴹⵕ ⵓⵎⵙⵇⵇⴰⴷ ⵏ ⴽⵓⵍⵓⵎⴱⵢⴰ ⴳ ⵕⵕⴱⴰⵟ ⵎⴰⵙⵙ José Renato Salazar Acosta , ⵢⵉⵍⵉ ⵓⵎⴹⴰⴽⴰⵕ ⴼ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⵊⴰⵔ ⵜⵉⵎⵉⵣⴰⵔ ⵍⵍⵉ ⴷ ⵉⵇⵇⴰⵏ ⴰⴷ ⵥⵉⵍⵏⵜ ⵙ ⵓⵎⵙⴰⵡⴰⵍ ⴷ ⵓⵎⵢⴰⵡⴰⴹ ⴰⵙⵓⵍⴰⵏ ⵉⵕⵡⴰⵏ, ⵢⵉⵍⵉ ⵓⵙⵓⵜⴳ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⵉⵏⵔⴰⵏⵉⵏ ⴷ ⵜⴳⵜⵉⵔⴰⵏⵉⵏ ⴷ ⵜⵉⵍⴰⵍⵜ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴳ ⵓⵣⵣⵔⴰⵢ ⴷ ⵓⵙⵉⵙⴼⵉⵡ ⵏ ⵡⴰⴷⴷⴰⴷⵏ, ⴷ ⵓⵙⴷⴷⵉⴷ ⵏ ⵡⴰⵜⵉⴳ ⵏ ⵜⵔⵓⴱⴱⴰ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⴷ ⵉⵔⵣⴰⴼⵏ ⴷ ⵓⵎⵛⴰⵡⴰⵕ ⴰⵙⵓⵍⴰⵏ ⴳ ⵓⵙⴷⵓⵙ ⵏ ⵜⵣⴷⴰⵢⵉⵏ.   

ⴳ ⵜⵣⵡⵉⵔⵉ, ⵉⵙⵏⵉⵎⵎⵔ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵎⴰⵙⵙ Roy Leonardo Barreras Montealegre  ⴼ ⵓⵔⵣⴰⴼ ⴰⴷ, ⵉⵙⴷⴷⵉⴷ ⵎⴰⵙ ⵜⵓⵇⵇⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⵜⴰⵢⴰⵏⵜ ⵜⴰⴽⴰⵍⴰⵏⵜ ⵜⵙⵡⵓⵔⵉ ⵓⵍⴰ ⴼ ⵓⴼⵔⴰ ⴷ ⵜⵏⴼⵔⵓⵜ ⵉⴳⵔⴰⵖⵍⴰⵏⵏ, ⵢⵉⵏⵉ ⵎⴰⵙ ⵉⴳⴰ ⵓⵏⵎⵓⵇⵇⴰⵔ ⴰⴷ ⵜⴰⵎⵍⴷⴰ ⵏ ⵓⵙⵉⵙⴼⵉⵡ ⵏ ⵡⴰⴷⴷⴰⴷⵏ ⴷ ⵓⵙⴷⵓⵙ ⵏ ⵓⵎⵙⴰⵡⴰⵍ ⴰⴱⵕⵍⴰⵎⴰⵏⵉ ⵉⵛⵛⴰⵔⵏ, ⴷ ⵎⴰⵙ ⵢⵓⵇⵇⵔ ⵍⵎⵖⵔⵉⴱ ⵜⵉⵅⵅⵓⵜⵔⴰ ⵏ ⵉⵡⴰⵏⴽⵏ ⴷ ⵓⵔ ⴰⵔ ⵉⴽⵛⵛⵎ ⴳ ⵜⵖⴰⵡⵙⵉⵡⵉⵏ ⵏⵏⵙⵏⵜ ⵜⵉⴳⵏⵙⴰⵏⵉⵏ.

ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵓⵎⵎⵉⵥⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵉⵙⵎⵏⵉⴷ ⵓⵍⴰ ⵜⴰⵎⵙⴰⵔⵜ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵓⵙⵏⴰⵍ ⴰⵏⵎⵏⴰⴷ ⴷ ⵓⴳⵔⴰⵖⵍⴰⵏ ⵍⵍⵉ ⴰⵙ ⵉⵚⴰⵃⴰⵏ, ⵉⵖⵔ ⵉ ⵉⴱⵕⵍⴰⵎⴰⵏⵉⵢⵏ ⵙⴳ ⴽⵓⵍⵓⵎⴱⵢⴰ ⵉ ⵓⵔⵣⴰⴼ ⵏ ⵍⵎⵖⵔⵉⴱ ⵉ ⵜⵓⵙⵙⵏⴰ ⵏ ⵉⵙⵓⵔⵙⵏ ⴳ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ ⴷ ⵜⴳⵎⵉ ⵏⵏⵙⵏⵜ, ⵉⵖⵔ ⵉ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⴽⵓⵍⵓⵎⴱⵉ ⵉ ⵓⵔⵣⴰⴼ ⵏ ⵜⵡⵡⵓⵔⵉ ⵉ ⵜⴳⵍⴷⵉⵜ ⵏ ⵍⵎⵖⵔⵉⴱ.

ⴳ ⵓⵎⵏⵉⴷ ⵏⵏⵙ, ⵉⵙⵏⵉⵎⵎⵔ ⵎⴰⵙⵙ Roy Leonardo Barreras Montealegre  ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵓⵙⵏⵓⴱⴳ ⴷ ⵓⵎⴹⴰⴽⴰⵕ ⵉⵕⵡⴰⵏ ⵍⵍⵉ ⵉⵎⵎⴰⵍⴰⵏ ⴰⵙⵡⵉⵔ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⵏⵔⴰⵉⵏ ⴷ ⵜⴳⵜⵉⵔⴰⵏⵉⵏ, ⵉⵙⴷⴷⵉⴷ ⴼ ⵓⵙⵎⵖⵔ ⴷ ⵓⵙⴷⵓⵙ ⵏ ⵜⵔⴰⵓⴱⴱⴰ ⵏ ⵜⴷⴷⵓⴽⴽⵯⵍⴰ ⴷ ⵓⵎⵙⴰⵡⴰⵍ ⴷ ⵓⵎⵛⴰⵡⴰⵕ ⵃⵎⴰ ⴰⴷ ⵉⵍⵉⵏⵜ ⵜⵣⴷⴰⵢⵉⵏ ⵥⵉⵍⵏⵉⵏ ⵊⴰⵔ ⵍⵎⵖⵔⵉⴱ ⴷ ⴽⵓⵍⵓⵎⴱⵢⴰ ⵎⵇⵇⴰⵔ ⵜⵉⴳⴳⵓⴳⵜ.

ⵢⵉⵏⵉ ⵎⴰⵙⵙ Roy Leonardo Barreras Montealegre: ”ⵏⵓⵎⵎⵔ ⴱⴰⵀⵔⴰ ⵙ ⵓⵔⵣⴰⴼ ⴰⴷ ⵉ ⵍⵎⵖⵔⵉⴱ ⵉ ⵓⵙⴷⵓⵙ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵊⴰⵔ ⵍⵎⵖⵔⵉⴱ ⴷ ⴽⵓⵍⵓⵎⴱⵢⴰ ⵍⵍⴰⵏⵉⵏ ⵙⴳ 50 ⵏ ⵓⵙⴳⴳⵯⴰⵙ, ⵉⵙⴽⵔ ⵓⴽⵓⵏⴳⵕⵉⵙ ⴰⴽⵓⵍⵓⵎⴱⵉ ⵜⴰⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ  ⴽⵓⵍⵓⵎⴱⵢⴰ-ⵍⵎⵖⵔⵉⴱ, ⴰⵔ ⴰⵇⵔⴰⵖ ⵉ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⵓⵔⵣⴰⴼ ⵏ ⴽⵓⵍⵓⵎⴱⵢⴰ ⵖⵎⴽ ⴰⵏⵏ ⴷ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵍⵎⵖⵔⵉⴱ-ⴽⵓⵍⵓⵎⴱⵢⴰ”.

ⵉⴳⴰ ⵓⵙⵇⵇⵉⵎ ⵏ ⵉⵎⵓⵔⴰ ⴰⴳⵎⴰⵎ ⵉⵎⵥⵕⵉ ⴳ ⵓⴱⵕⵍⴰⵎⴰⵏ ⵏ ⵍⴰⵏⴷⵉⵣ ⴳ ⵍⵍⴰⵏ ⵉⴳⵎⴰⵎⵏ ⵏ ⴽⵓⵍⵓⵎⴱⵢⴰ ⴷ ⵍⴱⵉⵔⵓ ⴷ ⵛⵛⵉⵍⵉ ⴷ ⵍⵉⴽⵡⴰⴷⵓⵔ ⴷ ⴱⵓⵍⵉⴼⵢⴰ, ⵉⴳⴰ ⴰⴳⵎⴰⵎ ⵏ ⵓⵎⵙⴰⵡⴰⵍ ⴷ ⵓⵎⵛⴰⵡⴰⵕ ⴰⵙⵓⵍⴰⵏ ⵊⴰⵔ ⵉⴱⵕⵍⴰⵎⴰⵏⵉⵢⵏ ⵏ ⵍⵎⵖⵔⵉⴱ ⴷ ⴽⵓⵍⵓⵎⴱⵢⴰ.