ⵉⵎⴹⴰⴽⴰⵕ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⴱⵕⵉⵟⴰⵏⵉ

ⵉⵙⵏⵓⴱⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵢⵏⴰ ⵙ03 ⴽⵟⵓⴱⵔ 2022 ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⴰⴽⴰⴱⴰⵔ ⴰⴱⵕⵍⴰⵎⴰⵏⵉ ⴰⴱⵕⵉⵟⴰⵏⵉ ⵉⵍⵍⴰⵏ ⴳ ⵓⵔⵣⴰⴼ ⵏ ⵜⵡⵡⵓⵔⵉ ⵉ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵓⵙⵙⴰⵏ ⵏ 3 ⴰⵔ 7 ⴽⵟⵓⴱⵕ, ⵔⴰⴷ ⵉⵙⴽⵔ ⵓⴽⴰⴱⴰⵕ ⵉⵏⵎⵓⵇⵇⴰⵕⵏ ⴰⵎⴷ ⵉⵎⵙⵜⴰⵢⵏ ⵉ ⵓⵎⵙⴰⵡⴰⵍ ⵉⵙⵓⵍⵏ ⵀⴰⵔ ⵉⴱⵕⵍⴰⵎⴰⵏⵉⵢⵏ ⴳ ⵍⵎⵖⵔⵉⴱ ⴷ ⴱⵕⵉⵟⴰⵏⵢ, ⵉ ⵜⵓⵙⵙⵏⴰ ⵏ ⵜⵉⵔⵎⵉⵜ ⵜⴰⵙⵔⵜⴰⵏⵜ ⴷ ⵜⵎⵖⵔⴰⴱⵉⵜ ⴷ ⵉⵙⵙⴰⵡⵓⵔⵏ ⵉⵅⴰⵜⴰⵔⵏ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ.

ⵍⵍⴰⵏ ⵉⵎⴹⴰⴽⴰⵔⵏ ⴼ ⵓⵙⵓⵜⴳ ⵏ ⵜⵣⴷⴰⵢⵉⵏ ⵜⵉⵎⵣⵔⴰⵢⵉⵏ ⴷ ⵜⴷⵍⵙⴰⵏⵉⵏ ⴷⵔⴰⵏⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ, ⴷ ⵓⵣⵣⵔⴰⵢ ⵏ ⵜⴱⵔⵉⴷⵉⵏ ⵏ ⵓⵙⴷⵓⵙ ⵏ ⵓⵍⵢⴰⵡⴰⵙ ⴰⴱⵕⵍⴰⵎⴰⵏⵉ ⵙ ⵓⵙⵎⵔⵙⵍ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⴷ ⵜⴳⵜⵉⵔⴰⵏⵉⵏ ⴷ ⵓⵎⵢⴰⵡⴰⴹ ⵉⵙⵓⵍⵏ ⴷ ⵓⵙⴽⵔ ⵏ ⵉⵙⴰⵢⵔⵓⵔⵏ ⵏ ⵓⵎⵙⴰⵡⴰⵍ ⴷ ⵓⵙⵏⴼⵍ ⵏ ⵜⵎⵓⵣⴰⵢⵉⵏ ⴷ ⵜⵉⵔⵎⵉⵜⵉⵏ, ⴷ ⵓⵙⵎⵏⵉⴷ ⵏ ⵜⵉⵔⵎⵉⵜ ⵜⴰⴱⵕⵍⴰⵎⴰⵏⵉⵜ ⴳ ⵙⵏⴰⵜ ⵜⵎⵉⵣⴰⵔ ⴷ ⵓⵎⴹⴰⴽⴰⵕ ⵏ ⵜⵎⵙⴰⵔⵉⵏ ⵛⵛⴰⵔⵏⵉⵏ.

ⴳ ⵓⵏⵎⵓⵇⵇⴰⵔ ⴰⴷ, ⵉⵙⵓⵜⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵜⵉⵣⴷⴰⵢⵉⵏ ⵥⵉⵍⵏⵉⵏ ⵊⴰⵔ ⵙⵏⴰⵜ ⵜⴳⵍⴷⴰⵢ ⴷ ⵓⵎⵢⴰⵡⴰⵙ ⵉⵕⵡⴰⵏ ⵉⵙⵎⵓⵏⵏ ⵙⵉⵏ ⵉⴱⵕⵍⴰⵎⴰⵏⵏ ⴰⵎⵖⵔⵉⴱⵉ ⴷ ⵓⴱⵕⵉⵟⴰⵏ, ⵉⵙⴰⵡⴰⵍ ⴼ ⵜⵎⴷⵔⴰⵡⵜ ⵉⵥⵉⵍⵏ ⵉⵙⵎⵓⵏⵏ ⴰⵙⵇⵇⵉⵎ ⵏ ⵉⵎⵓⵔⴰ ⴷ ⵜⵎⵔⵙⵍⵜ ⵏ ⵡⵉⵙⵜⵎⵉⵏⵙⵜⵔ ⵉ ⵜⴷⵉⵎⵓⵇⵔⴰⵟⵉⵜ  ⴰⵢⵍⵍⵉ ⵢⵉⵡⵙⵏ ⴳ ⵓⵙⵏⴼⵍ ⵏ ⵜⵉⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ ⴷ ⵜⵓⵙⵙⵏⴰ ⵏ ⵓⵏⴳⵔⴰⵡ ⴰⴱⵕⵍⴰⵎⴰⵏⵉ  ⴳ ⴱⵕⵉⵟⴰⵏⵢⴰ. ⵉⵙⴰⵡⴰⵍ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵓⵍⴰ ⴼ ⵜⴷⵉⵏⴰⵎⵉⵜ ⵜⴰⵙⵔⵜⴰⵏⵜ ⴷ ⵜⵎⵔⵙⵍⴰⵏⵜ ⵉⵍⵍⴰⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵏⵉⵜ ⵉⵍⵍⴰ ⵓⵙⵏⵎⴰⵍⴰ ⵏ ⵉⵙⵜⴰⵢⵏ ⵉⵣⵣⵔⴰⴼⵏ ⵏ ⵛⵓⵜⴰⵏⴱⵉⵔ 2021 ⴳ ⵉⵡⵙⵏ ⴽⵉⴳⴰⵏ ⵏ ⵉⵎⵙⵜⴰⵢⵏ ⴳⴳⵓⵜⵏⵉⵏ.

ⴳ ⵓⵎⴹⴰⴽⴰⵕ ⴰⴷ, ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⵉⵎⵥⵍⴰⵢ ⵏ ⵓⵏⴳⵔⴰⵡ ⴰⴱⵕⵍⴰⵎⴰⵏⵉ ⴰⵎⵖⵔⵉⴱⵉ ⴷ ⵜⵣⴷⴰⵢⵉⵏ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⴽ ⵜⵏⴱⴰⴹⵉⵏ ⴷ ⵜⵎⵔⵙⴰⵍ ⵢⴰⴷⵏⵉⵏ, ⵉⵙⵎⵏⵉⴷ ⵓⵍⴰ ⵜⵉⵔⵙⴰⵍ ⴷ ⵜⵎⵥⵍⴰⵢ ⵏ ⵡⴰⵏⴰⵡ ⴰⵎⵖⵔⵉⴱⵉ ⴷ ⵎⴰⴷ ⵉⵍⵍⴰⵏ ⴳ ⵜⴳⵍⴷⵉⵜ ⴷ ⵜⵏⴼⵔⵓⵜ ⴷ ⵓⵔⴳⴳⵉⴳ ⴷ ⵓⵅⵎⵎⴻⵎ ⴳ ⵓⴼⴳⴰⵏ, ⴷ ⵓⵍⵜⴰⵖ ⵏ ⵍⵎⵖⵔⵉⴱ ⴳ ⵉⵙⴰⵡⵓⵔⵏ ⵅⴰⵜⵔⵏⵉⵏ ⴰⵎ ⴰⵙⴼⵍⵙ ⴰⴷⵓⵙⴰⵏ ⴷ ⵓⴼⵔⴰⴳ ⴰⵏⴰⵎⵓⵏ ⴷ ⵜⵥⴹⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵜⵏⴼⵔⵓⵜ ⵏ ⵓⵜⵛⵓ ⴷ ⵓⵙⵎⴰⵜⵜⵉ ⴰⵎⵓⵟⵟⵓⵏ, ⴰⵢⵍⵍⵉ ⵉⵙⴽⵔⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⵢⴰⵏ ⵡⴰⵏⴰⵡ ⵉⵥⵉⵍⵏ ⴳ ⵉⵙⵡⵉⵔⵏ ⴰⵎⵏⵥⴰⵡ ⴷ ⵓⴳⵔⴰⵖⵍⴰⵏ, ⵢⵉⵍⵉ ⵚⴰⵃⴰ ⵙⴳ ⵜⵉⵔⵎⵉⵜ ⴷ ⵜⵎⵓⵣⴰⵢⵜ ⵏⵏⵙ.

ⴳ ⵓⵎⵏⵉⴷ ⵏⵏⵙⵏ, ⵏⵏⴰⵏ ⵉⴳⵎⴰⵎⵏ ⵏ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⴱⵕⵉⵟⴰⵏⵉ ⵎⴰⵙ ⵉⵡⴰⵜⵜⵙ ⵓⵔⵣⴰⴼ ⴰⴷ ⴰⵙⵎⵖⵔ ⵏ ⵓⵎⵙⴰⵡⴰⵍ ⴷ ⵓⵎⵢⴰⵡⴰⴹ ⵉⵙⵓⵍⵏ ⵊⴰⵔ ⵉⴱⵕⵍⴰⵎⴰⵏⵉⵢⵏ ⴳ ⵙⵏⴰⵜ ⵜⵎⵉⵣⴰⵔ, ⴷ ⵜⵓⵙⵙⵏⴰ ⵏ ⵡⴰⵏⴰⵡ ⴰⵎⵖⵔⵉⴱⵉ ⴷ ⵜⵎⵥⵍⴰⵢ ⵏ ⵉⵙⴰⵡⵓⵔⵏ ⵉⵅⴰⵜⴰⵔⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ  ⴰⵎ ⴰⴼⵔⴰⴳ ⴰⵏⴰⵎⵓⵏ ⴷ ⵓⵙⴼⵍⵙ ⴰⴷⵓⵙⴰⵏ ⴷ ⵜⵥⴹⴰⵕⵜ ⵜⴰⵎⴰⵢⵏⵓⵜ ⴷ ⵓⵙⵎⴰⵜⵜⵉ ⴰⵎⵓⵟⵟⵓⵏ, ⴷ ⵜⵏⴼⵔⵓⵜ ⴷ ⵓⵔⴳⴳⵉ ⵍⵍⵉ ⴳⵉⵙ ⵉⵍⵍⴰⵏ. ⴷ ⵎⴰⵙ ⵉⵙⵔⵙ ⵢⴽⴰⴱⴰⵕ ⴽⵉⴳⴰⵏ ⵏ ⵉⵏⵎⵓⵇⵇⴰⵔⵏ ⴷ ⵉⵔⵣⴰⵏ ⵍⵍⵉ ⵔⴰⴷ ⵢⴰⵡⵙ ⴳ ⵜⵓⵙⵙⵏⴰ ⵏ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ.

ⵉⵙⵓⵜⴳ ⵓⴽⴰⴱⴰⵕ ⴰⴱⵕⵉⵟⴰⵏⵉ ⵜⵉⵔⵉⵎⵉⵜ ⵜⴰⵎⵖⵔⵉⴱⵉⵜ, ⵜⵉⵔⵉ ⴰⴷ ⵉⵙⵙⵏ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ  ⴷ ⵓⵙⴷⵓⵙ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵏ ⵊⴰⵔ ⵍⵎⵖⵔⵉⴱ ⴷ ⴱⵕⵉⵟⴰⵏⵢⴰ. ⵙⴷⴷⵉⴷⵏ ⵉⵎⵓⵔⴰ ⵉⴱⵕⵉⵟⴰⵏⵉⵢⵏ ⴼ ⵡⴰⵜⵉⴳ ⵏ ⵓⵙⵏⴼⵍ ⵏ ⵜⵉⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ ⵙⵍⴰⵡⴰⵏ ⴰⴽⴽⵯ ⴼ ⵜⵎⵙⴰⵔⵉⵏ ⵛⵛⴰⵔⵏⵉⵏ.

ⵉⴳⴰ ⵓⵏⵎⵓⵇⵇⴰⵔ ⵊⴰⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⴽⴰⴱⴰⵔ ⴰⴱⵕⵍⴰⵎⴰⵏⵉ ⴰⴱⵕⵉⵜⴰⵏⵉ ⵜⴰⵎⵍⴷⴰ ⵏ ⵓⵙⵏⴼⵍ ⵏ ⵜⴰⵏⵏⴰⵢⵢⵉⵏ ⵅⴼ ⵜⵉⵎⵙⴰⵔⵉⵏ ⵜⵉⵏⵎⵏⴰⴹⵉⵏ ⴷ ⵜⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ ⵛⵛⴰⵔⵏⵉⵏ,  ⴷ ⵓⵙⵉⵡⵍ ⴼ ⵜⵉⵍⴰⵍ ⵏ ⵉⴱⵕⵍⴰⵎⴰⵏⵉⵢⵏ ⴳ ⵓⵎⵏⵉⴷ ⴰⴷ ⴷ ⵜⵡⴰⴼⵉⵜ ⵏ ⵉⴼⵙⵙⴰⵢⵏ ⵉⵎⴰⵢⵏⵓⵜⵏ ⴷ ⵓⵙⴰⵏⵉⵏ.

ⵢⵓⵎⴰ ⵓⴽⴰⴱⴰⵕ ⴰⴷ:

-          ⴰⵎⴰⵔⵉ FABIAN NINO UZIELL-HAMILTON ⴰⵎⴰⵡⵙⴰⵙ ⵏ ⵓⴼⵔⴰ ⴷ ⵓⴽⵓⵙ ⵏ ⵓⵔⴱⴰⴱ ⴳ ⵜⵏⴱⴰⴹⵜ ⵏ ⵜⵣⵓⵍⵜ.

-          ⴰⵎⴰⵔⵉ CHARALAMBOUS CHARALAMBOS ⴰⵎⴰⵡⵙⴰⵙ ⵏ ⵓⵡⴰⵏⴽ ⵉ ⵜⵙⴳⴰ ⵏ ⵍⵇⴱⵍⵜ ⵜⴰⵏⴰⵎⵎⴰⵙⵜ ⴷ ⵉⵥⵥⵍⵎⴹ ⵏ ⵉⴼⵔⵉⵇⵢⴰ ⴳ ⵜⵏⴱⴰⴹⵟ ⵏ ⵜⵣⵓⵍⵜ.

-          ⵍⵍⵓⵔⴷ PURVIS OF TWEED JEREMY ⵙⴳ ⵓⴽⴰⴱⴰⵕ ⵏ ⵉⴷⵉⵎⵓⵇⵔⴰⵟⵉⵢⵏ ⵉⵍⴻⵍⵍⵉⵢⵏ ⴷ ⵓⵎⴰⵔⵉ ⵏ ⵓⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵜⴰⴱⵕⵍⴰⵎⴰⵏⵉⵜ ⵉⵙⵎⵓⵏⵏ ⵉⵙⵡⴰⵍⴰⵢⵏ ⵉⵙⵔⵜⴰⵏⵏ ⴱⵕⵉⵟⴰⵏⵢⴰ-ⵍⵎⵖⵔⵉⴱ (APPG-MOROCCO).