ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2021-2026:
ⴰⵙⵏⵓⴱⴳ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵓⵎⵙⵇⵇⴰⴷ ⵏ ⵍⴱⵕⴰⵥⵉⵍ... ⵉ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⵏⵉⵜ ⵜⴰⵙⵉⵏⵔⴰⵏⵜ ⴷ ⵜⴳⵜⵉⵔⴰⵏⵜ ⵉⵕⵡⴰⵏ ⵉⵏⵢⴰⵍⴽⴰⵎⵏ ⴷ ⵜⵎⵙⴰⵔⵉⵏ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ ⵙ ⵓⵡⵇⵇⵔ ⵏ ⵜⵅⵅⵓⵜⵔⴰ ⴷ ⵜⵢⴰⵏⵜ ⵜⴰⵏⴰⴽⴰⵍⵜ
ⵉⵙⵏⵓⴱⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 13 ⵛⵓⵜⴰⵏⴱⵉⵔ 2022 ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⴰⵎⵙⵇⵇⴰⴷ ⵏ ⵍⴱⵕⴰⵥⵉⵍ ⴳ ⵕⵕⴱⴰⵟ ⵎⴰⵙⵙ Julio Glinternick Bitelli, ⵎⴹⴰⴽⴰⵕⵏ ⴼ ⵜⵣⴷⴰⵢⵉⵏ ⵜⵉⵎⵣⵔⴰⵢⵉⵏ ⴷⵔⴰⵏⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⵙⵍⴰⵡⴰⵏ ⴰⴽⴽⵯ ⴳ ⵓⵙⵡⵉⵔ ⴰⴱⵕⵍⴰⵎⴰⵏⵉ.
ⴳ ⵓⵏⵎⵓⵇⵇⴰⵔ ⴰⴷ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵎⵙⵇⵇⴰⴷ ⵏ ⵍⴱⵕⴰⵥⵉⵍ ⴼ ⵜⵇⴱⵓⵔⴰ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⵉⵏⵔⴰⵏⵉⵏ ⴷ ⵜⴳⵜⵉⵔⴰⵏⵉⵏ, ⵙⴰⵡⵍⵏ ⵓⵍⴰ ⴼ ⵡⴰⵜⵉⴳ ⵏ ⵓⵙⴷⵓⵙ ⵏⵏⵙⵏⵜ ⵙ ⵓⵙⵏⴼⵍ ⵏ ⵉⵔⵣⴰⴼⵏ ⴷ ⵓⵎⵢⴰⵡⴰⴹ ⵉⵕⵡⴰⵏ ⴷ ⵉⵙⵓⵍⵏ ⵊⴰⵔ ⵜⵉⵔⵓⴱⴱⴰ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⵏⵉⵜ, ⴷ ⵓⵣⴷⴰⵢ ⴳ ⵉⵏⵎⵓⵇⵇⴰⵔⵏ ⵉⴱⵕⵍⴰⵎⴰⵏⵉⵢⵉⵏ ⵉⵏⵎⵏⴰⴹⵏ ⴷ ⵉⴳⵔⴰⵖⵍⴰⵏⵏ, ⵙ ⵓⵡⵇⵇⵔ ⵏ ⵜⵅⵅⵓⵜⵔⴰ ⵏ ⵉⵡⴰⵏⴽⵏ ⴷ ⵜⵢⴰⵏⵜ ⵏⵏⵙⵏ ⵜⴰⵏⴰⴽⴰⵍⵜ ⴷ ⵜⵍⵍⵓⴳⵏⴰ ⵜⴰⴳⵔⴰⵖⵍⴰⵏⵜ.
ⵉⵍⵍⴰ ⵓⵍⴰ ⵓⵙⵓⵜⴳ ⵏ ⵜⵣⴷⴰⵢⵉⵏ ⵜⵉⵎⵣⵔⴰⵢⵉⵏ ⴷⵓⵙⵏⵉⵏ ⵊⴰⵔ ⵕⵕⴱⴰⵟ ⴷ ⴱⵕⴰⵥⵉⵍⵢⴰ, ⴷ ⵜⵍⴰⵍⵉⵜ ⵏ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⴳ ⵙⵏⴰⵜ ⵜⵎⵉⵣⴰⵔ ⴳ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴷⵎⵙⴰⵏ ⴷ ⵓⵏⵙⴱⴰⴱ ⴷ ⵓⴷⵍⵙⴰⵏ ⴷ ⵓⵚⴽⵓ ⵏ ⵜⵎⴷⵔⴰⵡⵜ ⵜⴰⵎⵏⵏⴰⵡⵜ ⵉⴱⴷⴷⵏ ⴼ ⵓⵎⵙⴰⵡⴰⵍ ⴰⵙⵔⵜⴰⵏ ⴰⴱⵕⵍⴰⵎⴰⵏⵉ ⵉⴷⵔⴰⵏ ⴷ ⵓⵎⵢⴰⵡⴰⵙ ⴰⴷⵎⵙⴰⵏ ⴷ ⵓⵏⵙⴱⴰⴱ ⵉⵙⵓⵍⵏ ⴷ ⵉⵣⵣⵉⴳⵣⵏ.
ⵉⴳⴰ ⵓⵏⵎⵓⵇⵇⴰⵔ ⴰⴷ ⵜⴰⵎⵍⴷⴰ ⵏ ⵙⵉⵏ ⵉⵎⵙⵜⴳⴳⴰⵔⵏ ⵉ ⵓⵙⵎⵏⵉⴷ ⵏ ⵜⵥⵍⴰⵢⵜ ⵏ ⵓⵏⴳⵔⴰⵡ ⴰⴱⵕⵍⴰⵎⴰⵏⵉ ⴳ ⵙⵏⴰⵜ ⵜⵎⵉⵣⴰⵔ ⴷ ⵜⵉⵍⴰⵍ ⵏⵏⵙⵏ ⵣⴷⵉⵏⵉⵏ ⴷ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴳ ⵉⵙⵡⵓⵔⵏ ⴰⵙⵉⵏⵔⴰⵏ ⴷ ⵓⴳⵜⵉⵔⴰⵏ ⵃⵎⴰ ⴰⴷ ⵜⴳ ⵜⴰⴷ ⵉⵕⵡⴰⵏ ⵉⵜⵜⵏⵢⴰⵍⴽⴰⵎⵏ ⴷ ⵜⵎⵙⴰⵔⵉⵏ ⵜⵉⵏⴰⵎⵓⵔⵉⵏ ⴷ ⵜⵎⵏⴰⴹⵉⵏ ⴷ ⵜⴳⵔⴰⵖⵍⴰⵏⵉⵏ ⵍⵍⴰⵏⵉⵏ ⴳ ⵜⵎⵣⵡⵓⵔⴰ ⵏ ⵜⵡⵡⵓⵔⵉ ⵜⴰⴱⵕⵍⴰⵎⵏⵉⵜ ⵉⵛⵛⴰⵔⵏ.