ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2021-2026:
ⵉⵎⴹⴰⴽⴰⵕⵏ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⴽⴰⴱⴰⵕ ⵙⴳ ⵓⵙⵇⵇⵉⵎ ⴰⵎⵛⴰⵡⴰⵕ ⴰⵎⴷⵏⴰⵏ ⴳ ⵉⵏⴷⵓⵏⵉⵙⵢⴰ
ⵉⵎⴹⴰⴽⴰⵕ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵢⴰⵏⵙ 18 ⵢⵓⵍⵢⵓⵣ 2022 ⴳ ⵕⵕⴱⴰⵟ ⴷ ⵓⴽⴰⴱⴰⵕ ⵙⴳ ⵓⵙⵇⵇⵉⵎ ⴰⵎⵛⴰⵡⴰⵕ ⴰⵎⴷⵏⴰⵏ ⴳ ⵜⴳⴷⵓⴷⴰⵏⵜ ⵏ ⵉⵏⴷⵓⵏⵉⵙⵢⴰ, ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵀⵉⴷⴰⵢⴰⵜ ⵏⵓⵕ ⵡⴰⵃⵉⴷ, ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ, ⵉⵍⵍⴰⵏ ⴳ ⵓⵔⵣⴰⴼ ⵏ ⵜⵡⵡⵓⵔⵉ ⵉ ⵜⴳⵍⴷⵉⵜ ⵏ ⵍⵎⵖⵔⵉⴱ.
ⵢⵓⵎⴰ ⵓⴽⴰⴱⴰⵕ ⵏ ⵉⵏⴷⵓⵏⵉⵙⵢⴰ ⵓⵍⴰ ⵎⴰⵙⵙ ⴼⴰⴹⵉⵍ ⵎⵓⵃⴰⵎⴰⵎⴷ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵎⴰⵙⵙ ⵎⴰⵄⵕⵓⴼ ⴽⴰⵀⵢⵓⵏⵓ ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵇⵇⵉⵎ ⴳ ⴽⵉⴳⴰⵏ ⵏ ⵉⵎⵙⵜⴳⴳⴰⵔⵏ ⵉⵎⵙⵙⵓⴳⵓⵔⵏ.
ⵉⵃⴰⴹⵕ ⴳ ⵉⵎⴹⴰⴽⴰⵕⵏ ⵓⵎⵙⵇⵇⴰⴷ ⵏ ⵜⴳⴷⵓⴷⴰⵏⵜ ⵏ ⵉⵏⴷⵓⵏⵉⵙⵢⴰ ⴳ ⵕⵕⴱⴰⵟ ⵎⴰⵙⵙ ⵀⴰⵙⵔⵓⵍ ⴰⵣⵡⴰⵔ, ⵉⵍⵉⵏ ⴼ ⵓⵙⵓⵜⴳ ⵏ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⵟⵟⴰⴼⵏⵉⵏ ⵉⵥⵓⵕⴰⵏ ⵉⵎⵣⵔⴰⵢⵏ ⴷ ⵉⴷⵍⵙⴰⵏⵏ, ⵖⵎⴽ ⴰⵏⵏ ⴷ ⵜⴱⵔⵉⴷⵉⵏ ⵏ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⵜⵉⴱⵕⵍⴰⵎⴰⵏⵉⵢⵉⵏ ⵊⴰⵔ ⵍⵎⵖⵔⵉⴱ ⴷ ⵉⵏⴷⵓⵏⵉⵙⵢⴰ, ⴷ ⵓⵎⴹⴽⴰⵕ ⵏ ⵜⵎⵙⴰⵔⵉⵏ ⵛⵛⴰⵔⵏⵉⵏ.
ⵉⵙⴰⵡⵍ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵥⵉⵍⵏⵉⵏ ⵊⴰⵔ ⵍⵎⵖⵔⵉⴱ ⴷ ⵉⵏⴷⵓⵏⵉⵙⵢⴰ, ⵉⵎⵍ ⴰⵙⵎⴰⵍⴰ ⵉⵥⵉⵍⵏ ⵏ ⵜⵙⵓⵜⵍⵜ ⵜⵉⵙ 144 ⵏ ⵜⵙⵎⵓⵏⵜ ⵜⵎⵙⵎⵓⵏⵜ ⵜⴰⵎⴰⵜⴰⵢⵜ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ, ⵍⵍⵉ ⵉⴳⴰⵏ ⵜⴰⵎⵍⴷⴰ ⵏ ⵓⵙⴽⵔ ⵏ ⵉⵏⵎⵓⵇⵇⴰⵔⵏ ⵉⵙⵉⵏⵔⴰⵏⵏ ⴷ ⵉⴳⵜⵉⵔⴰⵏⵏ ⴷ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ ⴷⵔⵓⵏⵉⵏ ⴳ ⵜⵙⵓⵜⵍⵜ ⴰⴷ ⴳ ⴱⴰⵍⵉ ⴳ ⵉⵏⴷⵓⵏⵉⵙⵢⴰ. ⵢⵉⵏⵉ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵎⴰⵙ ⵟⵟⴰⴼⵏⵜ ⵜⵣⴷⴰⵢⵉⵏ ⵕⵡⴰⵏⵉⵏ ⵙⵎⵓⵏⵏⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⵜⵉⵔⵙⴰⵍ ⵜⵉⵎⵣⵔⴰⵢⵉⵏ ⴷ ⵜⴷⵍⵙⴰⵏⵉⵏ ⴷ ⵜⵉⵏ ⵓⵙⴳⴷ. ⵍⵍⵉⵖ ⵉⵙⵎⵏⵉⴷ ⵜⵉⵔⵎⵉⵜ ⵜⴰⴱⵕⵍⴰⵎⴰⵏⵉⵜ ⵜⴰⵎⵖⵔⵉⴱⵉⵜ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵡⴰⵜⵉⴳ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴳ ⵓⵎⵙⵡⴰⴰⵍ ⴷⵓⵎⵢⴰⵡⴰⴹ ⴷ ⵓⵙⵏⴼⵍ ⵏ ⵜⵉⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ ⴳ ⵜⵉⵍⵉⵜ ⵏ ⵜⵎⵔⴰⵔⵓⵜⵉⵏ ⵉ ⵉⵙⵖⴰⵡⵙⴰⵜⵏ ⴱⴷⴷⵏⵉⵏ ⵍⵍⴰⵏⵉⵏ ⴳ ⵓⵖⴰⵡⴰⵙ ⴰⴱⵕⵍⴰⵎⴰⵏⵉ ⴰⵏⴰⵎⵓⵔ ⴷ ⵓⵏⵎⵏⴰⴹ ⴷ ⵓⴳⵔⴰⵖⵍⴰⵏ ⴰⵎ ⵜⴰⴷⵓⵙⵉ ⴷ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵜⵥⴰⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵓⵙⵎⴰⵢⵏⵓ ⴳ ⵉⴳⵔⴰⵏ ⵏ ⵓⵙⵙⵍⵎⴷ ⵏ ⵓⵙⵎⵓⵜⵜⵉ ⴰⵎⵓⵟⵟⵓⵏ ⴷ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ ⴷ ⵓⵣⵡⴰⴳ.
ⴳ ⵓⵎⵏⵉⴷ ⵏⵏⵙ, ⵉⵙⵏⵉⵎⵎⵔ ⵎⴰⵙⵙ ⵀⵉⴷⴰⵢⴰⵜ ⵏⵓⵕ ⵡⴰⵃⵉⴷ ⴷ ⵓⴽⴰⴱⴰⵕ ⵏⵏⵙ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵓⵙⵏⵓⴱⴳ, ⵙⴰⵡⵍⵏ ⴼ ⵜⵣⵣⵉⴳⵣⵜ ⵏ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⵉⵏⴷⵓⵏⵉⵙⵢⴰ ⴷ ⵎⴰⴷ ⴳⵉⵙ ⵉⵍⵍⴰⵏ ⴳ ⵓⵎⵢⴰⴷⴰⵙ ⵏ ⵜⴷⵍⵙⴰ ⴷ ⵓⵙⵡⵉⵏⴳⵎ ⴷ ⵓⵙⴳⴷ. ⵉⵙⵎⵏⵉⴷ ⵎⴰⵙⵙ ⵀⵉⴷⴰⵢⴰⵜ ⵏⵓⵕ ⵡⴰⵃⵉⴷ ⴰⵏⴳⵔⴰⵡ ⴰⴱⵕⵍⴰⵎⴰⵏⵉ ⵏ ⵜⴳⴷⵓⴷⴰⵏⵜ ⵏ ⵉⵏⴷⵓⵏⵉⵙⵢⴰ ⴷ ⵜⵎⵥⵍⴰⵢ ⵏ ⵓⵙⵇⵇⵉⵎ ⴰⵎⵛⵡⴰⵕ ⴰⵎⴷⵏⴰⵏ, ⵉⵙⵎⵏⵉⴷ ⵜⴰⵙⵓⵎⵔⵜ ⵏ ⵓⵙⴽⵔ ⵏ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⵉⵙⵎⵓⵏⵏ ⴳ ⵜⴼⵔⴽⴰ ⵜⴰⵎⵣⵡⴰⵔⵓⵜ ⵉⵡⴰⵏⴽⵏ ⵉⴳⵎⴰⵎⵏ ⴳ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⵓⵙⵍⵉⵎ, ⵓⵔ ⵔⴰⴷ ⵢⵉⵍⵉ ⴳ ⵓⴷⵖⴰⵔ ⵏ ⵜⵎⴰⴷⴷⴰⵙⵉⵏ ⵍⵍⵉ ⵍⵍⴰⵏⵉⵏ, ⵔⴰⴷ ⵉⴼⴰⵡ ⵓⴱⵔⵉⴷ ⵏⵏⵙ ⴷ ⵉⵡⵜⵜⴰⵙⵏ ⵏⵏⵙ ⴳⴰⵏⵉⵏ ⵡⵉⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴷ ⵓⵎⵙⴰⵡⴰⵍ ⴷ ⵓⵙⵏⴼⵍ ⵏ ⵜⵉⵔⵎⵉⵜⵉⵏ, ⵢⵉⵏⵉ ⵎⴰⵙ ⵉⵍⵍⴰ ⵓⵎⴹⴰⴽⴰⵕ ⵅⴼ ⵏⵏⵙ ⴰⴽⴷ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ ⵏ ⵉⵡⴰⵏⴽⵏ ⵓⵙⵍⵉⵎⵏ, ⵔⴰⴷ ⵜⵉⵍⵉ ⵜⵍⴰⵍⵉⵜ ⵏⵏⵙ ⴳ ⴽⵟⵓⴱⵕ ⴷ ⵢⵓⵛⴽⴰⵏ.
ⴳ ⵓⵏⵢⴰⵍⴽⴰⵎ ⴷ ⵜⵙⵓⵎⵔⵜ ⵏ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ, ⵉⴱⴷⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵎⴰⴷ ⵉⵙⵙⵥⵉⵍⵏ ⵜⴰⵙⵡⵉⵏⴳⵎⵜ ⴰⴷ ⵍⵍⵉ ⵔⴰⴷ ⵢⴰⵡⵙ ⴳ ⵓⵏⵏⵓⵕⵥⵎ ⵏ ⵉⵙⴰⵢⵔⵓⵔⵏ ⵉⵎⴰⵓⵏⵓⵜⵏ ⵏ ⵜⵓⵙⵙⵏⴰ ⵏ ⵜⵉⵔⵎⵉⵜⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴳⴰⵏⵉⵏ ⵢⴰⵜ ⴷ ⵜⵙⵉⵏⵔⴰⵏⵉⵏ ⴷ ⵜⴳⵜⵉⵔⴰⵏⵉⵏ, ⴷ ⵓⵎⴹⴰⴽⴰⵕ ⴷ ⵓⵎⵙⴰⵡⴰⵍ ⴷ ⵓⵙⵏⴼⵍ ⵏ ⵜⵉⵔⵎⵉⵜⵉⵏ ⴷ ⵜⵎⵓⵥⴰⵢⵉⵏ , ⴱⵍⴰ ⵕⵥⴰⵏⵜ ⵜⵙⵎⵉⴳⴰⵍ ⵏ ⵜⵎⴰⴷⴷⴰⵙⵏⵉⵏ ⵍⵍⴰⵏⵉⵏ. ⵉⵖⵔ ⵎⴰⵙⵙ ⵟⴰⵍⴱⵉ ⵍⵄⴰⵍⴰⵎⵉ ⵉ ⵓⵙⵎⵖⵔ ⵏ ⵓⵎⵛⴰⵡⴰⵕ ⴷ ⵓⵎⴷⴰⴽⴰⵕ ⵅⴼ ⵜⵙⵓⵎⵔⵜ ⵏ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⴰⵔ ⴷ ⵉⵍⴰⵍ ⴼ ⵜⵔⵙⴰⵍ ⴷⵓⵙⵏⵉⵏ.
ⵉⴳⴰ ⵓⵙⵏⵓⴱⴳ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⵍⴰⵎⴰⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵎⴰⵙⵙ ⵀⵉⴷⴰⵢⴰⵜ ⵏⵓⵕ ⵡⴰⵃⵉⴷ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵎⵛⵡⴰⵔ ⴰⵎⴷⵏⴰⵏ ⴳ ⵜⴳⴷⵓⵙⴰⵏⵜ ⵏ ⵉⵏⴷⵓⵏⵉⵙⵢⴰ ⴷ ⵓⴽⴰⴱⴰⵕ ⵏⵏⵙ ⵜⴰⵎⵍⴷⴰ ⵏ ⵓⵎⴹⴰⴽⴰⵕ ⴼ ⵜⵉⵔⵎⵉⵜⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵏ ⵍⵎⵖⵔⵉⴱ ⴷ ⵉⵏⴷⵏⵓⵏⵉⵙⵢⴰ ⴷ ⵜⵎⵔⵙⴰⵍ ⵜⵉⵙⵔⵜⴰⵏⵉⵏ ⴳ ⵙⵏⴰⵜ ⵜⵎⵉⵣⴰⵔ ⵖⵎⴽ ⴰⵏⵏ ⴷ ⵜⵎⴰⵢⵏⵓⵜⵉⵏ ⵏ ⵜⵖⴰⵡⵙⴰ ⵜⴰⴱⵕⵍⴰⵎⴰⵏⵉⵜ ⵜⴰⵙⵉⵏⵔⴰⵏⵜ ⴷ ⵜⴳⵜⵉⵔⴰⵏⵜ.