ⵉⵙⵏⵓⴱⴳ ⵎⴰⵙⵙ ⵃⴰⵙⴰⵏ ⴱⵏ ⵄⵓⵎⴰⵕ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵎⴰⵙⵙⴰⵏⵉⵏ ⴷ ⵜⴻⵜⵉⴽⵏⵓⵍⵓⵊⵉⵜ ⴷ ⵓⵙⵎⴰⵢⵏⵓ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵍⵎⵉⴽⵙⵉⴽ

ⵉⵙⵏⵓⴱⴳ ⵎⴰⵙⵙ ⵃⴰⵙⴰⵏ ⴱⵏ ⵄⵓⵎⴰⵕ, ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ, ⴰⴽⵡⴰⵙ 9 ⵢⵓⵏⵢⵓ 2022 ⵎⴰⵙⵙ López Casarín Javíer Joaquím ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵎⴰⵙⵙⴰⵏⵉⵏ ⴷ ⵜⴻⵜⵉⴽⵏⵓⵍⵓⵊⵉⵜ ⴷ ⵓⵙⵎⴰⵢⵏⵓ ⴷ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵍⵎⵉⴽⵙⵉⵙⴽ ⴰⴳⵎⴰⵎ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵍⵎⵉⴽⵙⵉⴽ ⵍⵎⵖⵔⵉⴱ, ⵙ ⵜⵎⵍⴷⴰ ⵏ ⵓⵔⵣⴰⴼ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵛⵛⵓⵕⴰ ⴳ ⵍⵎⵉⴽⵙⵉⴽ ⵎⴰⵙⵙⴰ López Casarín Javíer Joaquím ⵉ ⵜⴳⵍⴷⵉⵜ ⴳ 9 ⴰⵔ 12 ⵢⵓⵏⵢⵓ.

ⴳ ⵓⵏⵎⵓⵇⵇⴰⵔ ⴰⴷ, ⵉⵍⵍⴰ ⵓⵙⵎⵏⵉⴷ ⵏ ⵜⵏⴰⵥⴰⵕⵉⵏ ⵛⵛⴰⵔⵏⵉⵏ ⵍⵍⴰⵏⵉⵏ ⴷⴰⵜ ⵏ ⵍⵎⵖⵔⵉⴱ ⴷ ⵍⵎⵉⴽⵙⵉⴽ ⴳ ⵜⵏⴼⵔⵓⵜ ⵏ ⵜⵉⵔⵎⵜ ⴷ ⵜⵥⴹⴰⵕⵜ ⴷ ⵡⴰⵎⴰⵡⵏ ⴷ ⵜⵎⵓⴽⵔⵉⵙⵜ ⵏ ⵓⵣⵡⴰⴳ ⴷ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵊⴰⵔ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⴳ ⵙⵏⴰⵜ ⵜⵎⵉⵣⴰⵔ.

ⴳ ⵓⵏⵎⵓⵇⵇⴰⵔ ⴰⴷ, ⵉⵙⴰⵡⵍ ⵎⴰⵙⵙ ⴱⵏ ⵄⵓⵎⴰⵕ ⴼ ⵜⵉⵍⴰⵍⵜ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴳ ⵓⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ ⵍⵎⵖⵔⵉⴱ ⴷ ⵍⵎⵉⴽⵙⵉⴽ, ⵍⵍⵉ ⵉⴳⴰⵏ ⵉⵎⵉⵙⵙ ⵉⵕⵡⴰⵏ ⵉ ⵓⵙⵉⵙⵙⵏ ⵙ ⵍⵎⵖⵔⵉⴱ ⴷ ⵜⵎⵙⴰⵔⵜ ⵏⵏⵖ ⵜⵏⴰⴽⴰⵍⵜ. ⵢⵉⵏⵉ ⵎⴰⵙ ⵜⴳⴰ ⵜⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ ⵍⵍⵉ ⵜⵙⵎⵏⵉⴷ ⵜⵎⴰⵣⵉⵔⵜ ⵏⵏⵖ ⵉ ⵓⴼⵙⵙⴰⵢ ⵏ ⵓⵎⵓⴽⵔⵉⵙ ⵉⵜⵜⵓⵙⴽⴰⵔⵏ ⵜ ⵜⵎⵖⵔⵉⴱⵉⵜ ⵏ ⵚⵚⵃⵕⴰ  ⴰⴼⵙⵙⴰⵢ ⵍⵍⵉ ⵙⴱⵔⵔⴽⵏⵜ ⵜⵓⴳⵜ ⵏ ⵜⵎⵉⵣⴰⵔ ⴰⵎ ⵎⴰⵔⵉⴽⴰⵏ ⴷ ⵙⴱⴰⵏⵢⴰ, ⵉⵖⵔ ⵉ ⵉⵎⵙⵜⴳⴳⴰⵔⵏ ⵏ ⵍⵎⵉⴽⵙⵉⴽ ⵉ ⵓⵔⵣⴰⴼ ⵏ ⵜⵎⵏⴰⴹⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ ⵃⵎⴰ ⴰⴷ ⵥⵕⵉⵏ ⵜⵉⴳⵎⵉ ⵍⵍⵉ ⴳⵉⵙⵏⵜ ⵃⵉⵢⵢⴷⵏ ⵜⵉⴽⵔⴽⴰⵙ ⵍⵍⵉ ⵜⵜⵉⵏⵉⵏ ⵡⴰⵄⴷⵉⵡⵏ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ ⵙⵍⴰⵡⴰⵏ ⴰⴽⴽⵯ ⵡⵉⴷⴰ ⵍⵍⴰⵏⵉⵏ ⴳ ⴽⵔⴰ ⵏ ⵉⵡⴰⵏⴽⵏ ⵏ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ.

ⵉⵙⴷⴷⵉⴷ ⵎⴰⵙⵙ ⴱⵏ ⵄⵓⵎⴰⵕ ⵎⴰⵙ ⵉⴳⴰ ⵍⵎⵖⵔⵉⴱ ⵜⴰⵎⴰⵣⵉⵔⵜ ⵏ ⵓⵏⵏⵓⵕⵥⵎ ⴷ ⵓⵎⵙⵓⵔⵓⴼ ⴷ ⵜⵍⴻⵍⵍⵉ, ⵜⵓⵊⴰⴷ ⵉ ⵓⵣⴷⴷⵓⵢ ⴷ ⵜⵡⵡⵓⵔⵉ ⴰⴽⴷ ⵍⵎⵉⴽⵙⵉⴽ ⵉ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⵛⵛⴰⵔⵏⵉⵏ ⵍⵍⴰⵏⵉⵏ ⴷⴰⵜ ⵏⵏⵙⵏ ⴳ ⵜⵏⴼⵔⵓⵜ ⵏ ⵓⵜⵛⵓ ⴷ ⵜⵥⴹⴰⵕⵜ ⴷ ⵡⴰⵎⴰⵏ ⴷ ⵓⵣⵡⴰⴳ, ⵢⵉⵏⵉ ⵎⴰⵙ ⵉⵟⵟⴰⴼ ⵍⵎⵖⵔⵉⴱ ⵜⴰⵙⵔⵜⵉⵜ ⵜⴰⵎⵣⵡⴰⵔⵓⵜ  ⵉ ⵡⴰⵍⴰⵢ ⵏ ⵜⵏⴰⵥⵕⵉⵏ ⴰⴷ ⵙ ⵡⴰⵏⵏⴰⵢ ⵓⵏⵥⵉⵥ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ.

ⵙⴰⵡⵍⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ: ⵎⴰⵙⵙ ⵍⴰⵟⵉⴼⴰ ⵍⴱⵍⵉⵃ, ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵏ ⵜⵉⴹⴰⴼ ⵏ ⵜⴷⵔⵉⵎⵜ ⵜⴰⵎⴰⵜⴰⵢⵜ, ⵎⴰⵙⵙⴰ ⵏⴰⵊⵡⴰ ⴽⵓⴽⵓⵙ ⵙⴳ ⵜⵙⵇⵇⵉⵎⵜ ⵏ ⵜⵣⵔⴼⵜ ⴷ ⵓⵣⵣⵔⴰⴼ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⵅⴰⵡⵍⴰ ⵍⵖⵔⵛⵉ ⵙⴳ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ, ⵎⴰⵙⵙ ⵄⴰⵍⴰⴷⴷⵉⵏ ⵍⴱⵀⵕⴰⵡⵉ, ⵙⴳ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴼ ⵜⴳⵎⵉ ⵜⴰⴷⵎⵙⴰⵏⵜ, ⵃⴰⴹⵕⵏⵉⵏ ⴳ ⵓⵏⵎⵓⵇⵇⴰⵔ ⴰⴷ  ⵙⴰⵡⵍⵏ ⴼ ⵜⵏⴰⵥⴰⵕⵉⵏ ⵍⵍⴰⵏⵉⵏ ⵊⴰⵔ ⵍⵎⵖⵔⵉⴱ ⴷ ⵍⵎⵉⴽⵙⵉⴽ ⴷ ⵜⵥⴹⴰⵕⵉⵏ ⵏⵏⵙⵏ, ⵖⵔⵉⵏ ⵉ ⵓⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ ⵙⵏⴰⵜ ⵜⵎⵉⵣⴰⵔ ⴳ ⵓⵙⴰⵜⵉ ⵏ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ, ⴱⴷⴷⵏ ⴼ ⵜⵉⵍⴰⵍⵜ ⵏ ⵓⴱⵕⵍⴰⵎⴰⵏ ⴳ ⵓⵙⴷⵓⵙ ⴷ ⵓⵎⵢⴰⵡⴰⵙ ⴰⵙⵉⵏⵔⴰⵏ ⵊⴰⵔ ⵙⵏⴰⵜ ⵜⵎⵉⵣⴰⵔ.

ⵙⴰⵡⵍⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵓⵎⵎⵉⵥⵏ ⵏ ⵜⵎⴰⵣⵉⵔⵜ ⵏⵏⵖ ⴷ ⵓⵙⵕⵚⵓ ⵏ ⵓⵙⴽⵓ ⴰⴷⵉⵎⵓⵇⵔⴰⵟⵉ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵍⴻⵍⵍⵉ ⵏ ⵡⴰⵡⴰⵍ ⴷ ⵓⵙⵎⵖⵔ ⵏ ⵓⵙⵓⵔⵙ ⵏ ⵜⵎⵖⴰⵔⵜ ⴷ ⵢⵉⵙⴽⵉⵍ ⵊⴰⵡⵔ ⵡⴰⵡⵜⵎ ⴷ ⵜⵡⴰⵜⵎⵜ.

ⵉⵙⴷⴷⵉⴷ ⵎⴰⵙⵙ López Casarín ⵎⴰⵙ ⵉⴷⵔⵓ ⵍⵎⵖⵔⵉⴱ ⴷ ⵍⵎⵉⴽⵙⵉⴽ ⵜⵓⴳⵜ ⵏ ⵜⵖⴰⵡⵙⵉⵡⵉⵏ  ⴷ ⵜⵏⴰⵥⴰⵕⵉⵏ ⴰⵎ ⴰⵣⵡⴰⴳ, ⵜⴰⵙⵔⵜⵉⵜ ⵏ ⵍⵎⵉⴽⵙⵉⴽ ⴳ ⵓⵎⵏⵉⴷ ⴰⴷ ⴷⴰ ⵜⵜⵓⵇⵇⴰⵔ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵉⴹⴰⴼ ⵏ ⵓⵣⵡⴰⴳ ⵉ ⵓⵙⴱⴷⴷⵉ ⵏ ⵓⵙⵖⵏⵣⵉ ⵏ ⵉⵡⴷⴰⵏ ⴷ ⵓⵙⵔⵡⵍ ⵏ ⵉⵙⴷⵓⵀⴷⵓⵢⵏ.

ⵢⵉⵏⵉ ⵎⴰⵙⵙ López Casarín ⵎⴰⵙ ⵜⵣⵣⵉⴳⵣ ⵜⴷⵎⵙⴰ ⴳ ⵍⵎⵖⵔⵉⴱ ⴷ ⵍⵎⵉⴽⵙⵉⴽ, ⵉⵇⵇⴰⵏ ⴷ ⵓⵙⵏⴼⵍ ⵏ ⵜⵎⵓⵛⴰ ⴷ ⵓⵙⵙⵔⵇⴱ ⵏ ⵓⵙⵙⴰⵔⵓ ⵊⴰⵔ ⵏⵏⵙⵏ, ⵖⵎⴽ ⴰⵏⵏ ⴷ ⵓⵙⴽⵔ ⵏ ⵓⵣⵔⵉⵔⴳ ⵏ ⵡⴰⵙⵙⴰⵢ ⵏ ⵉⴳⵏⵏⴰ ⵊⴰⵔ ⵍⵎⵖⵔⵉⴱ ⴷ ⵍⵎⵉⴽⵙⵉⴽ ⵍⵍⵉ ⵔⴰⴷ ⵉⵙⴷⵓⵔⵙ ⴰⵎⵓⴷⴷⵓ ⵊⴰⵔ ⵏⵏⵙⵏ ⴰⵔ ⵙⴰⵜ ⵜⵙⵔⴰⴳⵉⵏ.

ⴳ  ⵓⵙⴰⵜⵉ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴷⵍⵙⴰⵏ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵉⵏⵏⴰ ⵎⴰⵙⵙ López Casarín  ⵎⴰⵙ ⵔⴰⴷ ⵉⵜⵜⵓⵙⴽⵉⵔ ⵉⵎⴰⵍⴰⵙⵙ ⵏ ⵍⵎⵖⵔⵉⴱ ⴳ ⵍⵎⵉⴽⵙⵉⴽ ⴳ ⵛⴰⵜⴰⵏⴱⵉⵔ ⵙ ⵜⵎⵍⴷⴰ ⵏ ⵓⴽⵜⵜⵓⵢ ⵡⵉⵙ 60 ⴼ ⵜⵣⴷⴰⵢⵉⵏ ⵜⵉⴷⵉⴱⵍⵓⵎⴰⵙⵉⵢⵉⵏ ⵊⴰⵔ ⵍⵎⵉⴽⵙⵉⴽ ⴷ ⵍⵎⵖⵔⵉⴱ, ⵉⵖⵔ ⵉ ⵓⵙⵇⵇⵉⵎ ⵏ ⵉⵎⵓⵔⴰ ⴰⴷ ⴳⵉⵙ ⵉⵃⴰⴹⵕ.

ⵉⵙⵎⵏⵉⴷ ⵎⴰⵙⵙ López Casarín ⴰⵙⵎⴰⵇⵇⵍ ⴼ ⵜⵙⵔⵜⵉⵜ ⴳ ⵍⵎⵉⴽⵙⵉⴽ ⵍⵍⵉⵖ ⵔⴰⴷ ⵉⵍⵉⵏ ⵉⵙⵜⴰⵢⵏ ⵏ ⵜⵏⵙⵙⵉⵅⴼⵜ ⴳ 2024, ⴷ ⵜⵙⵎⵉⴳⴰⵍ ⵏ ⵜⵙⵇⵇⵉⵎⵜ ⵍⵍⵉ ⵉⵙⵙⵉⵅⴼ ⴰⵎ ⴰⵣⵣⴳⵉⵔ ⵏ ⵉⵖⴰⵡⴰⵙ 30/20 ⵉⵣⴷⵉⵏ ⵙ ⵓⵙⴰⵢⵔⵓⵔ ⴷ ⵜⴻⵜⵉⴽⵏⵓⵍⵓⵊⵉⵜ ⴷ ⵢⵉⵙⴽⵉⵍ.

ⵉⴳⴰ ⵎⴰⵙⵙ López Casarín ⴰⴳⵎⴰⵎ ⴳ ⵓⴽⴰⴱⴰⵕ ⵏ ⵉⵣⴳⵣⴰⵡⵏ ⵉⵍⵍⴰⵏ ⴳ ⵜⵏⴱⴰⴹⵟ ⵍⵍⵉ ⵉⵙⵙⵉⵅⴼ ⵓⴽⴰⴱⴰⵕ ⵏ ⵎⵓⵔⵉⵏⴰ, ⵉⴳ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵍⵎⵉⴽⵙⵉⴽ-ⴱⵕⵉⵟⴰⵏⵢⴰ, ⴷ ⵓⵎⴰⵔⵉ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵊⴰⵔ ⵍⵎⵉⴽⵙⵉⴽ ⴷ ⵎⴰⵔⵉⴽⴰⵏ.

ⵔⴰⴷ ⵉⵙⵎⵏⵉⴷ ⵎⴰⵙⵙ López Casarín  ⴰⴷⵍⵉⵙ ⵏⵏⵙ ⵉⵜⵜⵓⵙⵖⵍⵏ ⵙ ⵜⴰⵄⵕⴰⴱⵜ ⴳ ⵓⵙⴼⵙⵔ ⴰⵎⴰⴹⵍⴰⵏ ⵏ ⵓⴷⵍⵉⵙ ⴳ ⵕⵕⴱⴰⵟ.