ⵉⵎⴹⴰⴽⴰⵕ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵟⴰⵍⵢⴰⵏⵉ

ⵉⵎⴹⴰⴽⴰⵕ ⵎⴰⵙⵙ ⵔⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⵙⵉⵎⵡⴰⵙ 3 ⵢⵓⵏⵢⵓ 2022 ⴷ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵟⴰⵍⵢⴰⵏⵉ ⵙⴳ ⵜⴰⵔⴰⴱⴱⵓⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵏⴰⵍ ⵏ ⵜⵙⵏⵜⴰⵢⵜ ⵏ ⵓⵏⴱⴰⴹ ⴰⵏⵉⵎⴰⵏ ⴳ ⵚⵚⵃⵕⴰ ⵜⴰⵎⵖⵔⵉⴱⵉⵜ, ⵙ ⵜⵎⵍⴷⴰ ⵏ ⵓⵔⵣⴰⴼ ⵏⵏⵙ ⵉ ⵍⵎⵖⵔⵉⴱ ⵉ ⵓⵙⴷⵓⵙ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵙⴳ 3 ⴰⵔ 6 ⵢⵓⵏⵢⵓ.

ⵢⵓⵎⴰ ⵓⴽⴰⴱⴰⵕ ⴰⴱⵕⵍⴰⵎⵏⵉ ⴰⵟⴰⵍⵢⴰⵏⵉ ⵙⴳ ⵓⵙⵇⵇⵉⵎ ⵏ ⵉⵎⵓⵔⴰ ⵉⴷ ⵎⴰⵙⵙ: ⵎⴰⵔⴽⵓ ⴷⵉ ⵎⴰⵢⵓ, ⵙⵜⵉⴼⴰⵏⵢⴰ ⴰⵙⴽⴰⵔⵉ, ⴰⵍⵉⵙⴰⵏⴷⵔⵓ ⵙⴰⵔⵓ ⴰⵍⴼⵓⵏⵙⵓ ⴱⴰⴳⴰⵏⵓ, ⵎⴰⵔⵢⴰ ⴱⵉⵔⵍⵉⵏⴳⵉⵔⵉ. ⵙⴳ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵉⴷ ⵎⴰⵙⵙ: ⵓⵔⴰⵏⵢⴰ ⴳⵡⵉⵍⵢⴰ ⵔⵓⵣⵉⵏⴰ ⴱⴰⴱⴰⵜⵓ, ⴼⵔⴰⵏⵙⵉⵙⴽⵓ ⵎⵓⵍⴰⵎ.

ⵉⵃⴰⴹⵔ ⴳ ⵉⵎⴹⴰⴽⴰⵕⵏ ⴰⴷ ⵎⴰⵙⵙ ⴰⵎⴰⵔⵉ ⵏ ⵓⵏⵙⵙⵉⵅⴼ ⵃⴰⵙⴰⵏ ⴱⵏ ⵄⵓⵎⴰⵔ, ⵉⵍⵉⵏ ⴼ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵊⴰⵔ ⵍⵎⵖⵔⵉⴱ ⴷ ⵉⵟⴰⵍⵢⴰ ⴷ ⵜⵎⵙⴰⵔⵉⵏ ⵛⵛⴰⵔⵏⵉⵏ ⴰⵎ ⴰⵣⵡⴰⴳ ⴷ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵜⵏⴼⵔⵓⵜ ⵏ ⵜⵉⵔⵎⵜ.

ⵉⵙⵓⵜⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵜⴰⵙⵏⵜⴰⵢⵜ ⵏ ⵓⵙⴽⵔ ⵏ ⵜⵔⴰⴱⴱⵓⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵏⴰⵍ ⵏ ⵓⵏⴱⴰⴹ ⴰⵏⵉⵎⴰⵏ ⴳ ⵚⵚⵃⵕⴰ ⵜⴰⵎⵖⵔⵉⴱⵉⵜ ⵙⴳ ⵓⴱⵕⵍⴰⵎⴰⵏ ⵏ ⵉⵟⴰⵍⵢⴰ. ⵉⵙⴷⴷⵉⴷ ⵎⴰⵙ ⵜⵍⵍⴰ ⵉⵟⴰⵍⵢⴰ ⴷ ⵜⵖⵜⴰⵙⵉⵏ ⵏ ⵜⵎⵜⵜⴰ ⵎⵓⵏⵏⵉⵏ, ⵉⵙⵓⵜⴳ ⵓⵍⴰ ⴰⴷⴷⴰⴷ ⵏⵏⵙ ⵉⵥⵉⵍⵏ ⵅⴼ ⵜⵎⵙⴰⵔⵜ ⵏ ⵚⵚⵃⵕⴰ ⵜⴰⵎⵖⵔⵉⴱⵉⵜ ⵃⵎⴰ ⴰⴷ ⵢⵉⵍⵉ ⵓⴼⵙⵙⴰⵢ ⴰⵙⵔⵜⴰⵏ ⵏ ⵜⵎⴰⵖⵜ ⴰⴷ ⵉⵜⵜⵓⵙⴽⴰⵔⵏ.

ⵢⵉⵏⵉ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵎⴰⵙ ⴼⵔⴽⵏ ⵉⴱⵕⵍⴰⵎⴰⵏⵉⵢⵉⵏ ⵏ ⵉⵟⴰⵍⵢⴰ ⵙ ⵉⵙⵏⴼⵍⵏ ⵍⵍⴰⵏⵉⵏ ⴳ ⵜⵙⴳⴰ ⴰⴷ, ⴷ ⵎⴰⵙ ⵉⵣⴷⵉ ⵓⵔⴳⴳⵉⴳ ⵏ ⵉⵡⴰⵏⴽⵏ ⵏ ⵉⵥⵥⵍⵎⴹ ⵏ ⵓⵏⴰⵎⵎⴰⵙ ⴷ ⵓⵔⴳⴳⵉⴳ ⵏ ⵉⵡⴰⵏⴽⵏ ⵏ ⵉⴼⴼⵓⵙ ⵏⵏ, ⴷ ⵉⵣⴷⵉ ⵓⵚⴽⵓ ⵏ ⵉⵎⴰⵍ ⵏ ⵉⴼⵔⵉⵇⵢⴰ ⵙ ⵍⵎⵖⵔⵉⴱ.

ⵙ ⵉⵙⵎ ⵏ ⵓⴽⴰⴱⴰⵕ ⴰⴱⵕⵍⴰⵎⵏⵉ, ⵉⵙⴰⵡⵍ ⵎⴰⵙⵙ ⵎⴰⵔⴽⵓ ⴷⵉ ⵎⴰⵢⵓ ⴼ ⵜⵉⵔⴰⵜ ⵉⴷⵉⵙⵏ ⵉ ⵓⵙⵏⴰⵍ ⵏ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⵉⵟⵍⴰⵢⴰ, ⴷ ⵎⴰⵙ ⵉⴳⴰ ⵓⵔⵣⴰⴼ ⴰⴷ ⵜⵉⵔⴰⵜ ⵏ ⵓⵙⵏⴰⵍ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ. ⵉⵙⴷⴷⵉⴷ ⵎⴰⵙ ⵉⵙⵎⵓⵏ ⵓⴽⴰⴱⴰⵕ ⵉⴳⵯⵏⵙⴰⵙⵏ ⵙⴳ ⵜⵓⴳⵜ ⵉⵙⴽⵔⵏ ⵜⴰⵏⴱⴰⴹⵜ ⵏ ⵉⵟⴰⵍⵢⴰ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵎⴰⵔⵢⵓ ⴷⴰⵔⵖⵉ,  ⴷ ⵓⵙⵏⴰⵍ ⵏ ⵉⵙⵏⴼⵍⵏ ⴳ ⵍⵎⵖⵔⵉⴱ. ⴰⵔⵣⴰⴼ ⴰⴷ ⵉⵔⴰⵏ ⴰⵙⴷⵓⵙ ⵏ ⵜⵣⴷⴰⵢⵉⵏ ⴳ ⵜⵙⵔⵜⵉⵜ ⴷ ⵜⴷⵎⵙⴰ ⴷ ⵜⴷⵍⵙⴰ ⴷ ⵜⵏⴼⵔⵓⵜ ⴷ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ, ⵜⴰⵖⴰⵡⵙⴰ ⵉⵙⵜⴰⵡⵀⵎⵎⴰⵏ ⵉ ⵓⴽⴰⴱⴰⵕ  ⴰⴷ ⴰⴱⵕⵍⴰⵎⴰⵏⵉ.

ⵅⴼ ⵜⵎⵙⴰⵔⵜ ⵏ ⵚⵚⵃⵕⴰ ⵜⴰⵎⵖⵔⵉⴱⵉⵜ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⴽⴰⴱⴰⵕ ⵎⴰⵙ ⵜⴼⵔⴽ ⵜⵔⴰⴱⴱⵓⵜ ⴰⴷ ⵙ ⵜⵙⵏⵜⴰⵢⵜ ⵏ ⵓⵏⴱⴰⴹ ⴰⵏⵉⵎⴰⵏ  ⵍⵍⵉ ⵉⵙⵎⵏⵉⴷ ⵍⵎⵖⵔⵉⴱ ⵜⴳ ⴰⴼⵙⵙⴰⵢ ⵏ ⵜⵉⵍⴰⵡⵜ ⴷ ⵓⵙⵖⵣⵏ, ⵢⵉⵏⵉ ⵎⴰⵙ ⵔⴰⵏ ⴰⴷ ⵢⵉⵍⵉ ⵓⵎⴰⴹⴰⵍ ⴷ ⵡⴰⴷⴷⴰⴷ ⴰⴷ, ⴷ ⵎⴰⵙ ⵔⴰⴷ ⵜⵙⴽⵔ ⵜⵔⴰⴱⴱⵓⵜ ⴰⴷ ⵜⵓⴳⴳⴰⵙ ⵉ ⵓⵙⵏⴰⵍ ⵏ ⵜⵡⵡⵓⵔⵉ ⵏ ⵜⵎⵜⵜⴰ ⵎⵓⵏⵏⵉⵏ ⴳ ⵓⵎⵏⵉⴷ ⴰⴷ, ⵃⵎⴰ ⴰⴷ ⵢⵉⵍⵉ ⵓⴼⵙⵙⴰⵢ ⴰⵙⵔⵜⴰⵏ ⵉⵜⵜⵓⵇⴱⴰⵍⵏ.

ⵉⵙⵓⵜⴳ ⵓⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵜⵉⵍⴰⵍⵜ ⵏ ⵍⵎⵖⵔⵉⴱ ⴳ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ ⴰⴳⵔⴰⵖⵍⴰⵏ, ⵢⵉⵏⵉ ⵎⴰⵙ ⵉⵍⵍⴰ ⵓⵎⵢⴰⵡⴰⵙ ⵊⴰⵔ ⵙⵏⴰⵔ ⵜⵎⵉⵣⴰⵔ ⵏ ⵜⵉⵍⴰⵍⵜ ⵜⴰⴷⵎⵙⴰⵏⵜ ⵏ ⵉⵎⵖⵔⵉⴱⵉⵢⵏ ⵍⵍⴰⵏ ⴳ ⵉⵟⴰⵍⵢⴰ, ⵉⵙⴰⵡⵍ ⴼ ⵓⵙⵏⴰⵍ ⵏⵏⵙ ⵉ ⵉⵙⵏⴼⴰⵔⵏ ⵏ ⵓⵎⵢⴰⵡⴰⵙ ⴳ ⵉⴳⵔⴰⵏ ⵏ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ.

ⵙⴰⵡⵍⵏ ⵉⴳⵎⴰⵎⵏ ⵏ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵟⴰⵍⵢⴰⵏⵉ ⴼ ⵜⵣⵣⵉⴳⵣⵜ ⵉⵥⵉⵍⵏ ⵉⵍⵍⴰⵏ ⴳ ⵜⴳⵍⴷⵉⵜ ⴳ ⴽⵓ ⵉⴳⵔⴰⵏ, ⵙⴷⴷⵉⴷⵏ ⴼ ⵓⵎⵙⴰⵡⴰⵍ ⴷ ⵜⵡⵡⵓⵔⵉ ⵉⵛⵛⴰⵔⵏ ⵊⴰⵔ ⵕⵓⵎⴰ ⴷ ⵕⵕⴱⴰⵟ ⵃⵎⴰ ⴰⴷ ⵢⵉⵍⵉⵓⵍⵓⵢ ⵏ ⵜⵏⴰⵥⴰⵕⵉⵏ ⵣⴷⵉⵏⵉⵏ ⴷ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵓⴼⵔⴰ ⴷ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ ⴷ ⵜⵏⴼⵔⵓⵜ ⵏ ⵜⵉⵔⴰⵎ.

ⵙⴽⵔ ⵉⴳⵎⴰⵎⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴳ ⵉⵟⴰⵍⵢⴰ ⵜⴰⵔⴰⴱⴱⵓⵜ ⴰⴷ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵏⴰⵍ ⵏ ⵜⵙⵏⵜⴰⵢⵜ ⵏ ⵓⵏⴱⴰⴹ ⴰⵏⵉⵎⴰⵏ ⴳ ⵚⵚⵃⵕⴰ ⵜⴰⵎⵖⵔⵉⴱⵉⵜ ⴰⵙⵙ ⵏ 31 ⵎⴰⵢ 2022.